ህዝብን ያማረሩ ባለስልጣናት እድገት እየተሰጣቸው መሆኑን ተገለፀ

• የየካ ክፍለ ከተማ ነጋዴዎች በግብር እየተማረሩ ነው

በየካ ክፍለ ከተማ ውስጥ የሚገኙ ነጋዴዎች በ2006 ዓ.ም ይከፍሉት ከነበረው በ10ና 10 በመቶ ግብር ጭማሬ በ2007 ዓ.ም እንዲከፍሉ መገደዳቸውን ገልጸዋል፡፡ ነጋዴዎቹ ያማረሩ ባለስልጣናት እድገት እየተሰጣቸው መሆኑን ገልጸዋል፡፡ ግብሩ የተጨመረባቸው የአዲስ አበባ ከተማ አስተዳደር በ2008 ዓ.ም ከ31 እስከ 38 ሚሊዮን ብር ለማሟላት በመታቀዱ ነው፡፡

በተለይ በየካ ክፍለ ከተማ የሚኖሩት ነጋዴዎች የክፍለ ከተማው የገቢዎች አወሳሰን ኃላፊ አቶ ወንድሙ አባቡቶ በሚወስኑባቸው ከአቅም በላይ በሆነ ግብር የተመረሩ ሲሆን ሰውዬው በዚሁ ህዝብን በማማረር ተግባራቸው ከቀበሌ ንግድና ኢንዱስትሪ ቢሮ በሶስት አመት ውስጥ ወደ ክፍለ ከተማ ማደጋቸው ተግልጾአል፡፡ ከዚህም በተጨማሪ አቶ ወንድሙ አባቡቶን ወደ ፌደራል ገቢዎች እድገት ለመስጠት ለሳምንት ሶስት ቀን በሲቪል ሰርቪስ የዲግሪ ትምህርታቸውን እየተከታተሉ መሆኑን ታማኝ ምንጮች ገልጸዋል፡፡ አቶ ወንድሙ በህዝብ ላይ በደል እየፈፀመ መሆኑን የበታች ሰራተኞች አቤቱታ ቢያቀርቡም ‹‹አርፋችሁ ስሩ እሱ ስራውን በሚገባ እየሰራ ነው፡፡›› የሚል የቃል ማስጠንቀቂያ ተሰጥቷቸዋል ተብሏል፡፡