እረ ለመሆኑ ከአንድነት ወዲያ ለኦሮሞ ማን ሊመጣ ነው? 

“….ያኔ እንተያያለን…”

በትላንትናው ዕለት የአዳማ አንድነት ሰልፍ ፈቃዳችንን ከ20ቀናት ደጅ ጥናት በኋላ ወስደናል፡፡ግን ከአስገራሚ ገጠመኞቹ ጥቂቱንም ቢሆን ማካፈል ግድ ይለናልና እነሆ፡፡ፈቃዱን ከመስጠታቸው በፊት ከከተማው ጸጥታ ክፍል ሶስት ሰዎች መጥተው ከንቲባው ጽ/ቤት ተጠርተው ገቡ፡፡እኛ በዚህ ዕለት ካልተሰጠን ላንወጣ ተነጋግረን ገብተናልና “ቶሎ ድረሱልኝ” ያላቸው ሰዎች መምጣት ደስ ብሎናል እንጂ አልፈራንም፡፡ሆኖም ነገርየው ለካ ማስፈራራት ነበር፡፡

በተለያዩ መንገዶች ትንኮሳ ቢደረግብንም ለትንኮሳው ምላሽ ከመስጠት ይልቅ ህጋዊውን ወረቀት መያዝ ቅድሚያ ሰጥተን ይዘን ወጥተናል፡፡ከትንኮሳዎቹ ሁለቱን ልጥቀስ፡፡

1. የጸጥታው ክፍል ኀላፊ ሻ/ቃ ዘሪሁን የመረጣችሁት መንገድ ትራፊክ የሚበዛበት ማደያዎች፣ባንኮች እና ገበያዎች ያሉበትበመሆኑ አንፈቅድላችሁም ልሂድ ብትሉ ያኔ እንተያያለን በማለት ሊያሰገድደን ሞክሯል፡፡

2. ልትይዙ ካስገባችኋቸው መፈክሮች “ ‘የኦሮሞ የዩኒቨርሲቲ ተማሪዎች ጥያቄ በሕጋዊ አግባብ ይመለስ!’ የሚለው ተሰርዞ መውጣት አለበት::” በማለቱ ከፍተኛ ክርክር ገጥመን ልንግባባ አልቻልንም፡፡በዚሁ የተነሳ ሻለቃው “ይህን መፈክር ይዘህ ብትወጣ አስገባሃለሁ!” በማለት ዝቶብኛል፡፡በተጨማሪም አብራ የነበረች ሴት “እናንተ ስለኦሮሞ ምንአገባችሁ!” በማለት ልታጣጥለን ሞክራለች፡፡

እረ ለመሆኑ ከአንድነት ወዲያ ለኦሮሞ ማን ሊመጣ ነው?…ደግሞስ ሕብረብሔራዊ ፓርቲ አንተ ለዚህ ብሄር አያገባህም ሊባል የሚያስችለው ምን መንገድ አለ?…እረ ኢህአዴግ ሆይ በህገ መንግስታዊ መብትና ዲሞክራሲዊ መብታችን ላይ የሚጣልብንን ማዕቀብ በሕግ አምላክ ጠብቅልን-ኋላ የመንግስትነትህ ድርሻ የት ገባ ተብለህ ቀንህ ሲደርስ ትጠየቃለህ !

ተስፋዬ ዋቅቶላ (የአዳማ አንድነት ፓርቲ የሕ/ግ)