የአማራ ክልል ምክትል ርዕሰ መስተዳድርና የብአዴን ጽ/ቤት ኃላፊ የሆኑት አቶ አለምነው መኮንን መኖሪያ ቤት በድንጋይ መደብደቡን የፍኖተ ነፃነት ምንጮች ጠቆሙ፡፡ የፍኖተ ነፃነት ምንጮች እንጠቆሙት ባሳለፍነው ሳምንት የካቲት 1 እና የካቲት 2 ቀን 2006 ዓ.ም(ቅዳሜና እሁድ) ለሊት በተደጋጋሚ ማንነታቸው ባልታወቀ ግለሰቦች መኖሪያ ቤታቸው በድንጋይ መደብደቡን ተከትሎ ቤታቸው ቀንና ለሊት በፖሊስ እየተጠበቀ ይገኛል፡፡
አቶ አለምነው መኮንን የአማራን ህዝብ የሚያዋርድና የሚዘልፍ ንግግር ሲያደርጉ የተቀዳ ድምፅ ለህዝብ ይፋ ከሆነበት ጊዜ ጀምሮ በብአዴን ውስጥ የንትርክ ምክንያት መሆናቸው አይዘነጋም፡፡
በሌላ በኩልም የብአዴን ንብረት የሆነውን ዳሸን ቢራን አንጠጣም የሚለው ተቃውሞ በከፍተኛ ሁኔታ በሕዝቡ ዘንድ እየተሰራጨ የሚገኝ ሲሆን ሕዝቡም አቶ አለምነው ካልተባረሩ እየተሰደብን የነርሱን ምርት አንጠቀምም በሚለው አቋሙ እንደጸና ነው። ሕዝቡ በጠራው የቦይኮት ዳሸን ቢራ እንቅስቃሴ የተነሳ በዳሸን ቢራ ምርት ላይ ተጽእኖ እያደረበት መሆኑ የታወቀ ሲሆን አንዳንድ መጠጥ ቤቶችም የዳሸን ቢራ ጠጪዎች ቁጥር እየቀነሰ መምጣቱን ገልጸዋል።
