አዲስ አድማስ ጋዜጣ ሌንጮ ለታ አዲስ አበባ ገብተዋል ሲል ዘገበ

(ዘ-ሐበሻ) በአዲስ አበባ የሚታተመው አዲስ አድማስ ጋዜጣ የኦሮሞ ዴሞክራሲያዊ ግምባር ሊቀመንበር አቶ ሌንጮ ለታ አዲስ አበባ ከ3 ቀናት በፊት ገብተዋል ሲል ዘገበ። ዘ-ሐበሻ በዚህ ጉዳይ ላይ ለማጣራት ወደ የኦሮሞ ዴሞክራሲያዊ ግምባር የሕዝብ ግንኙነት አቶ ሌንጮ ባቲ በተደጋጋሚ ደውላ መረጃውን ለማረጋገጥ ባትችልም፤ ጋዜጣው ሌንጮ አዲስ አበባ ናቸው ሲል ዘግቧል። ዘ-ሐበሻ ከቀናት በፊት “እነ ሌንጮ ለታ ኢትዮጵያ ሊገቡ ነው” የሚል እና “አቶ ሌንጮ ለታ “ሃገር ቤት ገብተን በመታገል አዲስ ታሪክ እንሰራለን” አሉ” የሚሉ ሁለት ዘገባዎችን ማስነበቧ ይታወሳል።

ከቀናት በፊት የኢሳት ራድዮ ጋዜጠኛ መሳይ ዓለማየሁ ለኦቦ ሌንጮ በስልካቸው ደውሎ በጉዳዩ ላይ ሊያነጋግራቸው ፈልጎ ነገ ደውልልኝ የሚል ምላሽ ከሰጡ በኋላ በነጋታው ሲደወልላቸው ስልካቸውን ሳያነሱ እንደቀሩ የሚታወስ ሲሆን የኦቦ ሌንጮን ድርጅት እና ኢሕአዴግን እያደራደሩ ነበር የተባሉት ኤፍሬም ይስሃቅም እንዲሁ ድርድሩ ገና ያላለቀ በመሆኑ የምናገረው የለኝም ብለው ነበር። ዛሬ አዲስ አድማስ ሌንጮ አዲስ አበባ ገብተዋል ብሎ መዘገቡ ብዙዎችን እያነጋገረ ነው።

የአዲስ አድማስ ጋዜጣ እንደወረደ ዘገባ የሚከተለው ነው፡-

በኢትዮጵያ መንግስት “ሽብርተኛ ተብሎ የተሰየመው የኦሮሞ ነፃ አውጪ ግንባር /ኦነግ/ ከፍተኛ አመራር የነበሩት አቶ ሌንጮ ለታ፣ አዲስ ያቋቋሙትን ፓርቲ ይዘው በሰላማዊ መንገድ ለመታገል አዲስ አበባ መግባታቸውን ምንጮች ገለፁ፡፡ ኢህአዴግ የደርግ ስርዓትን አስወግዶ አዲስ አበባን ሲቆጣጠር ከአቶ መለስ ዜናዊ ጋር ለፕሬዝዳንትነት እንዲወዳደሩ ተጠቁመው አልፈልግም ማለታቸው የሚነገርላቸው አቶ ሌንጮ፤ ወደ ሰላማዊ ትግል መግባታቸውን በተመለከተ ብዙዎች አምነው እንዳልተቀበሏቸው የገለፁ ሲሆን ከሶስት ቀናት በፊት አዲስ አበባ መግባታቸው ታውቋል፡፡ በሰላማዊ መንገድ ለመታገል ኢትዮጵያ መግባታቸውን አስመልክቶ የቀድሞ ድርጅታቸው ኦነግ ስላለው አቋም ከውጭ ሚዲያዎች የተጠየቁት አቶ ሌንጮ፤ “እሱን ኦነግ ነው የሚያውቀው” ሲሉ መልሰዋል፡፡ የአቶ ሌንጮ ለታን ወደ ሀገር ቤት መመለስ አስመልክቶ አስተያየት የተጠየቁት ዶ/ር ነጋሶ ጊዳዳ፤ ቀደም ሲል ኦነግ በሁለት አመለካከቶች መሃል ሲዋልል የነበረ ፓርቲ መሆኑን ይገልጻሉ፡፡ አንደኛው፤ ኦሮሚያ ሙሉ ለሙሉ መገንጠል አለባት የሚለው ሲሆን ሁለተኛው ደግሞ ትገንጠልም አትንገንጠልም በሚለው አመለካከት መሃል የሚዋልል ነበር ይላሉ፡፡

አሁን የእነ አቶ ሌንጮ ወደ ሠላማዊ ትግል መመለስ፣ በኢትዮጵያ አንድነት እምነት የነበረው አካል ተለይቶ መውጣቱን ያመለክታል ብለዋል፡፡ ይህም በበጐ የሚታይ ነው ያሉት ዶ/ር ነጋሶ፤ ለኢትዮጵያ ህዝብና ለኦሮሞ ህዝብ ትግል መልካም መንገድ እንደሚከፍትም ያላቸውን እምነት ገልጸዋል፡፡ ዶ/ር ነጋሶ ቀደም ሲል በኦነግ የፖለቲካ ትግል ውስጥ ማለፋቸውን “ዳንዲ፣ የነጋሶ መንገድ” በሚለው መጽሃፋቸው ጠቁመዋታል፡፡ ከኦነግ ዋና ዋና መሪዎች አንዱ የነበሩት ሌንጮ ለታ “ወደ ሰላማዊ ትግል ተመልሻለሁ” ማለታቸውን መንግስት ያውቀው እንደሆነ የተጠየቁት የመንግስት ኮሚዩኒኬሽን ሚኒስትር ዴኤታ አቶ ሽመልስ ከማል፤ በበኩላቸው፤ በግለሰብ ደረጃ የተሟላ መረጃ እንደሌላቸው ጠቁመው፣ አንድ ሽብርተኛ ተብሎ በህዝብ ተወካዮች ምክር ቤት የተሰየመ ድርጅት ወደ ሰላማዊ ትግል መመለሱ የሚረጋገጥለትና ስያሜው የሚነሳለት ግን በራሱ በህዝብ ተወካዮች ም/ቤት ነው ብለዋል፡፡ አቶ ሌንጮ ለታን በአካል አግኝተን ለማነጋገር ያደረግነው ጥረት አልተሳካም፡፡

ከቀናት በፊት ኦቦ ሌንጮ ለጀርመን ድምጽ ራድዮ የሚከተለውን ብለው ነበር፦