ሰማያዊ ፓርቲ ነገ መጋቢት 27/2007 ዓ/ም በሃድያ ዞን ሆሳና ከተማ ለሚያደርገው ህዝባዊ ስብሰባ ቅስቀሳ እንዳያደርግ መከልከሉን የሰማያዊ ፓርቲ ም/ሊቀመንበርና የምርጫ ጉዳይ ኃላፊ አቶ ስለሽ ፈይሳ ለነገረ ኢትዮጵያ ገለጹ፡፡
(photo file)
የሰማያዊ ፓርቲ የሀድያ ዞን አስተባባሪዎች ፓርቲው ነገ መጋቢት 27/2007 ዓ.ም በዞኑ ከተማ ሆሳና ለሚያደርገው ህዝባዊ ስብሰባ ቅስቀሳ እያደረጉ በነበረበት ወቅት ‹‹በቅዳሜ ቀን ቅስቀሳ ማድረግ አትችሉም›› በሚል ስድስት የሰማያዊ ፓርቲ ዕጩዎችን ጨምሮ ሌሎች አባላት ሲታሰሩ መኪናን ጨምሮ የመቀስቀሻ መሳሪያዎቻቸው በፖሊስ ተይዘውባቸው እንደዋሉ ለነገረ ኢትዮጵያ ገልጸዋል፡፡
ህዝባዊ ስብሳባው እውቅና ያለው በመሆኑና ለቅስቀሳም የሚያስፈልጉ ህጋዊ መስፈርቶችን ቢያሟሉም በህገ ወጥ መንገድ ታስረው እንደዋሉ የገለጹት ዕጩዎች፤ የመኪና፣ የሞንታርቮና የሌሎች ወጭዎችን አውጥተው ዕቅዳቸውን እንዳያሳኩ ካድሬዎች እንቅፋት እየፈጠሩናቸው እንደሚገኙና ህዝቡ ስብሰባውን እንዳይታደም መከባና መሰናክል እንደተፈፀመባቸው ገልጸዋል፡፡
ምንም እንኳ ለህዝባዊ ስብሰባው ቅስቀሳ እንዳያደርጉ ክልከላና እንቅፋት ቢፈጠርባቸውም ህዝባዊ ስብሰባው በነገው ዕለት ሆሳና ከተማ ውስጥ ጎፎር ሜዳ በተባለ ቦታ ከቀኑ 7 ሰዓት -11 ሰዓት ተኩል ድረስ እንደሚካሄድ የስብሰባው አስተባባሪዎች ገልጸዋል፡፡
The post ሰማያዊ ፓርቲ በሀድያ ዞን ቅስቀሳ እንዳያደርግ ተከለከለ appeared first on Zehabesha Amharic.