ፖለቲካ፣ ሐይማኖት፣ ዘር፣ በሰው ልቦና ውስጥ።

ፖለቲካ እና ፖለቲከኞችን ስንመለከት ባላደጉ አገሮች ለፖለቲካ ፍጆታቸው ሐይማኖትን እና ዘርን መጠቀሚያ ያደርጋሉ። የወያኔ የፖለቲካ እንቅስቃሴ ማሳያው መንገዱ  ሐይማኖትና ዘርን ለርካሽ ስራው ወደ ሜዳው ያስገባቸዋል። እንደዚህ አይነቱ የፖለቲካ አካሄድ ከአጥፍቶ ጠፊ ቡድን ተለይቶ አይታይም። ሰው የተባለው ክቡር ፍጥረትን በሃይልና በማይፈልገው መንገድ በግድ  ፖለቲካዊ እውቀት ሳይኖራቸው ወደ ሜዳው ማስገባት የወያኔ ስልት ነው። የቀድሞ የወያኔ መሪ የነበሩት እንዲ ብለው ነበረ << ምርጥ ኢሕአዴግ ሁኑ ካልሆናችሁ በናንተ ላይ ሌላ ምርጥ ኢሕአዴግ እሾማለው>> ብለው እንደተናገሩት የሜዳ ውስጥ ጨዋታ ይሄ ነው። ወይ መሆን …አልያም ባንተ ላይ ሌላ መሾም። የትኛውም ሐይማኖት ተከታይ ሁን የትኛውም ዘር ሁን ወደ ሜዳው እንድትገባ ይደረጋል ከምርጥ ውስጥ የሆነ በሜዳው ይቆያል ከምርጥ ውስጥ ያልሆነ ደግሞ ይባረራል።

በስፖርቱ አለም ወደ ሜዳው የሚገቡት ሰውነታቸው  የዳበረ  እና በቂ ችሎታ ያላቸው ናቸው። በተለያየ ግዜ የተለያየ ግጥሚያ ካደረጉ በኋላ በልጦ የሰራ እና በቂ ችሎታ ያለው አሸንፎ ደጋፊውን አስጨብጭቦ የተዘጋጀለትን ዋንጫ እና የተለያዩ ሽልማቶችን ይወስዳል። ባደጉት አገሮች ልክ እንደ ስፖርቱ  ተመሳሳይ ነው። ጠንክሮ የሰራ እና ጥሩ የፖለቲካ ብቃት ያለው አሸንፎ የበላይነትን ያገኛል። የኛ አገር ግን እንደዚህ አይደለም። የአገራችን ፖለቲካ ሐይማኖትና ዘርን ወደ ሜዳው በጥቅም ተብትቦ እና  አስገድዶ  አስገብቷል። ገዢ  የተባለው አካል የራሱ ሜዳ ውስጥ ተገዢ የተባሉ ቡድኖችን ሁሉ በግድም ወይም በማግባባት አልያም በጥቅም እንዲገቡ ተደርጓል። ወደሜዳው የገቡት የፖለቲካ እውቀት፣ የሐይማኖት እውቀት፣ ስለዘር እውቀት የሌላቸውን ባልዳበረ  ችሎታ  ወያኔ ወዳዘጋጀው ሜዳ ገብተው መገኘቱ አደገኛነቱን መናገር አይከብድም። ኢትዮጵያ ውስጥ የፖለቲካ ግጥሚያ የሚያስከፍለው መሰዋትነት እንደ ስፖርቱ ላብ ሳይሆን ደምን መሆኑ ከባድ ያደርገዋል። እስቲ በጥቂቱ ስለ ሐይማኖት እና ዘር እንመልከት።

ሐይማኖት፡-

ሐይማኖት ማለት የማይታየውን እግዚአብሔር እንደ  አዩት አድርጎ ማመን ነው። እግዚአብሔር የማያዳላ  ፈራጅ እና ታማኝ አምላክ ነው። አለማትን ፈጥሮ በውስጣቸው የሚኖሩትን በእኩል የሚያስተዳድር ድንቅ አምላክ ነው። ለደጉም ለክፉውም፣ ለጻድቁም ለሃጣኑም፣ ለሚያምነውም ለማያምነውም፣ ለትልቁም ለትንሹም፣ የአምላክነቱን ጸጋ ለሁሉም ሳያዳላ እኩል  ይሰጣል። እግዚአብሔር ፀሐይን ስሙን ለሚጠራውም ለማይጠራውም እኩል ያወጣል፣ እግዚአብሔርን ለሚያምኑም ሰይጣንንም ለሚያምኑ እኩል ዝናብ ያዘንባል፣ የአየር ስጦታንም ለሰውም ለእንስሳም እኩል ይሰጣል፣ እግዚአብሔር የነጻነት አምላክ እንደሆነ እንረዳለን። ደግ ብቻ ይኑር ክፉው ይጥፋ፣ የሚያምነኝ ብቻ ይቅር ሌላይ ይሙት፣ የሚል ህግ በእግዚአብሔር ዘንድ የለም። እግዚአብሔር ሁሉን ማድረግ የሚችል ሆኖ ሳለ የማንንም እገዛ የማይፈልግ ሆኖ ሳለ በተፈቀደልን እድሜ በነጻነት እንድንኖር ፈቅዶልናል። ውሃም እሳትም ተቀምጦልሃል እጅህን ወደፈለገው  ክተት ብሎ ለሰው ልጆች የነጻ ምርጫ አስቀምቷል።

ውሃ ማለት፡- እምነትና ስራን አዋህደህ መገኘት ሲሆን እንዲህ ይገለጻሉ። ደግነት፣ የዋህነት፣ ፍቅር፣ ራስን መግዛት፣ ታዛዝነት፣ ባልንጀራህን እንደራስህ አድርገህ መውደድ። እነዚህ የሰራ መልካም ሰው በማታልፈዋ አለም በደስታ የሚያኖሩ ሲሆን…

እሳት የተባለው ደግሞ ጥል፣ ክርክር፣ መለያየት፣ አድመኝነት፣ ቁጣ፣ ክፋት፣ መግደል፣ ባልንጀራህን አለመውደድ የመሳሰሉት በዚህም አለም በማታልፈውም አለም ደስታን የማናገኝበት ነው። ኢትዮጵያ ውስጥ በሐይማኖት ያለን አመለካከት ከፍተኛ ነው። በክርስትናውም በእስላሙም ሐይማኖታቸውም የሚወዱ ያሉባት ህዝብ ናት። ታዲያ ሐይማኖቱን የሚያከብር ማን ነው? እውነት በመናገር በፍቅር በማኖር የእግዚአብሔርን መንግስት እንዲወርሱ ከማድረግ ይልቅ ጥላቻንና ክፋትን እያስተማርን ለሌላው መጥፋትን የምንመኝ ስንቶቻችን ነን? በሐይማኖታችን የሚፈቀደው የታመመን በጸሎት ማዳን፣ የተጣላን ማስታረቅ፣ የተራራቀን ማቀራረብ፣ ስለሰው ሐጥያት መናገር ሳይሆን ስለራስህ ሐጥያት ማሰብ፣ ሰውን ከክፉ ስራው ወደ በጎነት መመለስ እንጂ ውድቀቱንና ጥፋቱን መመኘት በእግዚአብሔር ዘንድ ዋጋ የለውም።  ሰው ሆይ እግዚአብሔር ዋጋ ከፋይ ነው። መልካም የሰራ ገነትን ክፉም የሰራ ሲኦልን የሚያስገባ በነፍስም በስጋ ላይ ስልጣን ያለው እግዚአብሔር ስለሆነ በሰራነው ስራ ዋጋችንን ለመቀበል ተዘጋጅተናል ማለት ነው። ዋጋም ከፋዩ እግዚአብሔር ነው።

ዘር፡-

የሰው ዘር በሙሉ ከአዳም እና ከሄዋን እንደተገኘ በሁሉም በተ እምነት አስተምሮ ውስጥ እንዳለ የታወቀ ነው። ይህም እስከ ጥፋት ውሃ ድረስ ማለትም እስከ ኖህ ዘመን ድረስ ከቆየ በኋላ የሰው ልጅ በሰራው ክፋት እግዚአብሔር ተቆጥቶ ከምድር የሚፈልቅ ውያ ከሰማይ የማያባራ  ዝናብ  ምድርን አጥለቅልቆ በውስጧ ያሉትን በሙሉ በሐጥያታቸው ምክንያት ሲጠፉ መልካሙ ሰው የነበረው ኖህና ቤተሰቡ ከእንስሳቱ ሁለት ሁሉት አድርጎ በኖህ መርከብ ከእግዚአብሔር ቁጣ ከመጣው የጥፋት ውሃ በመትረፋቸው የሰው ዘር ሊቀጥል ችሏል። የኖህ ልጆችም ሴም፣ ካምና፣ ያፌት ይባላሉ። ዘፍጥረት 10+1-32

ሴም፡- ኤላም፣ አሦር፣ አርፋክስድ፣ ሎድ፣ አራም፣ ቃይናን ስድስት ልጆችን ወለደ።

ካም፡- ኩሽ፣ ምስራይም፣ ፍጥ፣ ከነዓን አራት ልጆችን ወለደ።

ያፌት፡- ጋሜል፣ ማጎግ፣ ማዴ፣ ያህያን፣ ያልሳ፣ ቶቤል፣ ሞሳሕ፣ ቴራስ ስምንት ልጆችን ወለደ።

እነዚህ የኖህ ልጆች አሁን ላለው የዘር  መጠሪያ መሰረቶች ናቸው።

በሴም፡- ሴሜቲክስ የተባሉ የኖህ ልጅ ብዙ የምድራችን ግዛትን ላይ በመስፈር መጠሪያ የያዘ የአዳም ዘር ሊጠራበት ችሏል።

በኩሽ፡- ኩሸቲክስ የተባሉ የኖህ የልጅ ልጅ ብዙ የምድራችን ግዛትን ላይ በመስፈር መጠሪያ የያዘ የአዳም ዘር ሊጠራበት ችሏል።

በያፌት፡- ያፌታውያን የተባሉ የኖህ ልጅ ብዙ የምድራችን ግዛትን ላይ በመስፈር መጠሪያ የያዘ  የአዳም ዘር ሊጠራበት ችሏል።

እንዲህ እንዲ እያለ  የሰው ልጅ በሙሉ መጠሪያውን እያበጀ ሊመጣ ችሏል። ወደ ኋላ ከተጓዝን ሁሉም  የኖህ ልጆች ናቸው። ወደ መጀመሪያው ከተመለስን ደግሞ ሁሉም የአዳም ዘር መሆናቸውን እናውቃለን። ኢትዮጵያ ውስጥ ከሰማኒያ ሁለት ያላነሱ ቋንቋዎች ይነገራል። ሁሉም ቋንቋዎች ግን ገላጪነታቸው እኩል ነው። ቋንቋ ያስፈለገበት ዋናው ቁም ነገር ሰዎች ይግባቡበት ዘንድ ነው። ለምሳሌ ገመቹ፣ ሃጎስ፣ ደስታ የሚሉትን ስሞች ብንወስድ በተለያዩ  ቋንቋዎች አንድ አይነት ትርጉም ያላቸው ገላጭ ስሞች ናቸው።  ለገመቹ፣ ለሃጎስ እና ለደስታ  ልንሰጣቸው የሚገባ ክብር እና ቦታ እኩል መሆን አለበት። እንዲህ ካልሆነ ግን ከላይ በሐይማኖት ትንታኔዬ እንዳስቀመጥኩት ሐጥያት ሆኖብን ከሰው ጋር ብቻ ሳይሆን ከአምላክ ጋር የሚያጣላ ስለሆነ ለሁሉም ተናጋሪዎች እኩል ክብር ልንሰጥ ይገባል። ቋንቋዎች በተናጋሪው ዘንድ ተወዳጅነት ስላላቸው ሁሉም ሊያከብራቸው እና ሊረዳቸው እንዲሁም ክብርም ሊሰጣቸው ያስፈልጋል። ስለ ሌላው ማሰብ ስሌላው መጨነቅ የሌላውን ቋንቋ እና ወገንተኝነትን መውደድ ተገቢ ነው እንዲ ሲሆን ባልንጀራህን መውደድ የሚለው የእግዚአብሔር ቃል ተፈጻሚነት ያገኛል።

ባጠቃላይ ወያኔ የፈጠረው እና ያዘጋጀው ሜዳ በቀላሉ የሚታይ ጉዳይ አይደለም። ወደዚህ ሜዳ  በሦስት መንገድ ይገባሉ፡-

አንደኛው በግድ ሁለተኛው በጥቅም ሶስተኛው ባለማወቅ። ዛሬ የምንመለከተው ሃቅ ይሄ ነው። ወደ ወያኔአዊ ሜዳ የመግባቱ እና የማስገባቱ ተግባር ክፍተኛ ስራ እየተሰራ ያለው በወያኔዎች ሲሆን  ተጠቃሚዎችም ራሳቸው ናቸው። የሐይማኖት አባቶች በክርስትናውም በእስልምናውም በዋቄ ፈናም በሌላም ያላችሁ እውቀት እና ችሎታው ያላችሁ በሙሉ ምዕመናኖቻቹህን ወደዚህ የጥፋት ሜዳ እንዳይገቡ ንገሯቸው። ስለ ባልንጀራ መውደድ እና ፍቅር አስተምሯቸው። እኛ ክፉ መንግስ እንጂ ክፉ ህዝብ የለንም። ወያኔ በዘረጋው የክፋት ሜዳ ላይ እንዳይገቡ መንጋዎችን ጠብቋቸው።

በዘር ጉዳይ ወያኔ የዘረጋው የጥፋት ሜዳ እንደሆነ ለገመቹም፣ ለሃጎስም፣ ለደስታም ለሌሎችም በቋንቋቸው ንገሯቸው። የኛ ጠላት ገመቹ፣ ሃጎስ፣ ደስታ ሳይሆን… ሐይማኖትን የማይፈራ፣ ዘርን የማያከብር፣ ለወገኑ ግድ የሌለው፣ ወገን ከወገኑ፣ ዘርን ከዘር፣ ለማጫረስ  የሚሰራውን  ወያኔን እንደሆነ አሳውቋቸው። ወደ ወያኔ ሜዳ የምንገባው ወያኔን ለመምታት እንጂ ሌላ እንዳይሆን አሳስቧቸው። ይህንን ስናደርግ ለሐይማኖታችን ለወገኖቻችን በመድረስ በአገር ላይ የተቃጣውን ጥፋት በቀላሉ ማስቆም እንችላለን። ይህ ከራ ረቢ ነው። አዎ መልካምነት የእግዚአብሔር መንገድ ነው።

ከ-ከተማ ዋቅጅራ

29.03.2015

Email- waqjirak@yahoo.com

The post ፖለቲካ፣ ሐይማኖት፣ ዘር፣ በሰው ልቦና ውስጥ። appeared first on Zehabesha Amharic.