አቶ አስገደ ገ/ስላሴ
መጽሐፋቸው ላይ ስም አጥፍተዋል በሚል ተከሰው የህወሓት ባለስልጣናትን በመከላከያ ምስክርነት ቢጠሩም ባለስልጣናቱ በተደጋጋሚ በቀጠሮው ቀን ባለመገኘታቸው ለምስክሮች በሚያወጡት ወጭ ከፍተኛ ኪሳራ እንደደረሰባቸው አቶ አስገደ ገ/ስላሴ ለነገረ ኢትዮጵያ ገለጹ፡፡
ጥር 10/2007 ዓ.ም አቶ አስግደ በምስክነት ከጠሯቸው የህወሓት ባለስልጣናት መካከል ጀኔራል ጻድቃን ሲገኙ አቶ ስዩም መስፍን፣ አቶ ስብሃት ነጋ፣ አባይ ጸሃዬ፣ አርከበር እቁባይና ሌሎችም ባለስልጣናት ያልተገኙ ሲሆን ለየካቲት 13/2007 ዓ.ም በፖሊስ ተይዘው እንዲቀርቡ ሲወሰን ጄ/ር ጻድቃንን ጨምሮ ሌሎቹም በትዕዛዙ መሰረት ሳይገኙ ቀርተዋል ብለዋል፡፡ ባለስልጣናቱ በዳኛዋ ትዕዛዝ መሰረት የካቲት 13/2007 ዓ.ም ባለመቅረባቸው ለሶስተኛ ጊዜ ለየካቲት 24/2007 ዓ.ም በፖሊስ ተይዘው ቀርበው እንዲመሰክሩ ታዟል፡፡
ባለስልጣናቱ በቀሩባቸው ቀጠሮዎች አቶ አስገደ ከትግራይ አውራጃዎችና ከአዲስ አበባ ድረስ ለመጡ ምስክሮች የትራንስፖርት ወጭ በመሸፈናቸው ከፍተኛ ኪሳራ ድርሶብኛል ብለዋል፡፡ ለሶስተኛ ጊዜ በተላለፈው ቀጠሮም ባለስልጣናቱ ላይመጡ ይችላሉ ያሉት አቶ አስግደ ‹‹በእነሱ ምክንያት ከፍተኛ ወጭ እያወጣሁ ነው፡፡ አሁንም ለሶስተኛ ወጭ ላወጣ ነው፡፡ በዚህም ምክንያት ከፍተኛ የገንዘብ ኪሳራ አድርሰውብኛል፡፡›› ብለዋል፡፡
The post አስገደ ገ/ስላሴ በባለስልጣናቱ ምክንያት ከፍተኛ ኪሳራ እንደደረሰባቸው ገለጹ appeared first on Zehabesha Amharic.