እየተገባደደ ባለው ክረምት ስድስት ሰዎች በጐርፍ አደጋ ሕይወታቸው አልፏል

ከሌላው የክረምት ወቅት ጋር ሲነፃፀር በዘንድሮ የጐርፍ አደጋ ሕይወታቸው ያለፈ ሰዎች ቁጥር የቀነሰ ቢመስልም፣ በተለይ በንብረት ላይ ግን በብዙ ሚሊዮን ብር የሚገመት ንብረት መውደሙን ከመግለጽ ባለፈ፣ እርግጠኛውን አኃዝ ማስቀመጥ እንዳልተቻለ በአዲስ አበባ ከተማ አስተዳደር የእሳትና ድንገተኛ አደጋዎች መከላከልና መቆጣጠር ባለሥልጣን አስረድቷል፡፡

የባለሥልጣኑ የኮሙዩኒኬሽን ኦፊሰር አቶ ንጋቱ ማሞ ለሪፖርተር እንደገለጹት፣ በተለይ በንብረት ላይ ነሐሴ 19 ለ20 አጥቢያ 2006 ዓ.ም. ሌሊቱን ሲጥል ባደረው ዝናብ በቂርቆስ ክፍለ ከተማ ሪቼ አካባቢ በመኖሪያ ቤቶች ላይ ጉዳት ደርሷል፡፡ እንደ ኦፊሰሩ ገለጻ የጐርፍ አደጋ በተደጋጋሚ በሚያጠቃቸው አፍንጮ በር፣ አምባሳደር፣ ሲኤምሲ፣ አዋሬ፣ ቀጨኔ፣ ኦሎምፒያ፣ ስድስት ኪሎ ዩኒቨርሲቲ አካባቢ፣ ጳውሎስ ሆስፒታል ውስጥ፣ መነን አካባቢ፣ መካኒሳ፣ ካቴድራልና ጀሞ (23 መኖሪያ ቤቶች ላይ) የጐርፍ አደጋ ደርሶ ንብረት ማውደሙን አስረድተዋል፡፡

አቶ ንጋቱ ጨምረው እንደገለጹት፣ በክረምት ወቅት ብዙም የእሳት አደጋ የሚያሰጋ ባይሆንም፣ ነሐሴ 19 ቀን 2006 ዓ.ም. መርካቶ ጆንያ ተራ አካባቢ አደጋው ተከስቷል፡፡ በ2006 ዓ.ም. በተመሳሳይ ቦታ የደረሰው የእሳት አደጋ ለሁለተኛ ጊዜ መሆኑን የተናገሩት ኦፊሰሩ፣ አራት ሱቆች ብቻ መቃጠላቸውንና ግምቱ 360 ሺሕ ብር የሚሆን ንብረት መውደሙን ገልጸዋል፡፡ ስምንት ሚሊዮን ብር የሚገመት ንብረት መትረፉንም አክለዋል፡፡