6 የአንድነት ከፍተኛ አመራሮች ከኢንጂነር ግዛቸው ካቤኔ ራሳቸውን አገለሉ

(ዘ-ሐበሻ) ኢንጂነር ግዛቸው በሕዝብ ዘንድ ከፍተኛ ተስፋ የተጣለበትን የአንድነት እና የመኢአድን ፓርቲዎች ውህደት አመቻች ኮሚቴ ካፈረሱና በርካታ ሕዝብን አሳዝነዋል ከተባለ ወዲህ የርሳቸው ካቢኔ ሆነው በአንድነት ውስጥ እያገለገሉ ከሚገኙት ውስጥ 5ቱ ራሳቸውን ማግለላቸውን ለዘ-ሐበሻ የደረሰው ዜና አመለከተ።

ራሳቸውን ከኢንጂነር ግዛቸው ካቤኔ ያገለሉትና ለኢንጂነሩም ደብዳቤ ያስገቡት የአንድነት ከፍተኛ አመራር አባላት

1. ተክሌ በቀለ –ተቀዳሚ ምክትል ፕሬዘዳንት
2. በላይ ፈቃዱ —ምክትል ፕሬዘዳንት
3. ሰለሞን ስዮም —የፖለቲካ ጉዳዮች ሃላፊ
4. ዳንኤል ተፈራ — የድርጅት ጉዳይ ሃላፊ
5. ዳዊት አስራደ —የኢኮኖሚ ጉዳዮች ሀላፊ
6. ፀጋየ አላምረው –የገንዘብ ክፍል ሃላፊ              መሆናቸው ታውቋል።

ከመኢአድ ጋር የሚደረገውን ውህደት እንዲኮላሽ አድርገዋል እየተባሉ የሚተቹት ኢንጂነር ግዛቸው በአስቸኳይ ስልጣናቸውን እንዲለቁ ግፊቱ የጨመረ መሆኑን ያስታወቁት የመረጃ ምንጮቻችን፤ አስተያየት ሰጪዎች በተለይ በሪፖርተር ጋዜጣ ላይ ጃንዋሪ 12 ቀን 2014 የሰጡት ቃለምልልስ ላይ ያሉትን በመጥቀስ “ይህን ካደረግኩ በኋላ ከኢሕአዴግ ጋር ገንቢ ግንኙነት (Constructive Engagement) እንዲኖረን እፈልጋለሁ፡፡ ኢትዮጵያ ውስጥ የጥላቻ ፖለቲካ ማብቃት አለበት፡፡ ኢሕአዴግ ተቃዋሚዎችን የሚያያቸው እንደ ጠላት ከዚያም አልፎ እንደ ሽብርተኛ ነው፡፡ ይኼንን ነገር ለሚያስብ ሰው እኮ በጣም ነው የሚያስደነግጠው፡፡ በእኛም በኩል ኢሕአዴግን የምናየው እንደ አውሬ ነው፡፡ ምናልባት የሠራውን ሥራ ሁሉ ዋጋ (Credit) ያለመስጠት አለ፡፡ አንዳንድ ጊዜ ፖለቲካችን ኢሕአዴግን መቃወም ብቻ ሆኖአል፡፡ ያ መቆም አለበት፡፡ ትልቁ ኳስ ያለው ኢሕአዴግ ዘንድ ነው፡፡ እኔ በበኩሌ ወደፊት በማደርገው እንቅስቃሴ ገንቢ ግንኙነት አድርገን ያለውን የፖለቲካ ምኅዳር ለሁላችንም እኩል ማድረግ አለበት፡፡” የሰውዬው አካሄድ ወዴት ነው እያሉ እንደሚነጋገሩበት አስታውቀዋል።