[የሚኒሶታውን ደብረሰላም መድሃኔዓለም ቤ/ክ ጉዳይ ለምትከታተሉ ሁሉ] ቅጥፈታቸው ሲጋለጥ

ለሰላምና ለአንድነት የቆሙ ምዕመናን 3/24/2014
ቅጥፈታቸው ሲጋለጥ

ቤተክርስቲያናችን ተክሷል ስለዚህም ጠበቃ ቀጥረናል እያሉ ሲያወናብዱ የከረሙት አንዳንድ ሕገ-ወጥ የቦርድ አባላት ባለፈው ቅዳሜ 3/22/2014 መድኃኔዓለም በቤቱ አጋልጧቸዋል። ምንም አይነት ሕጋዊ የቅጥር ውል ስምምነት ፊርማ ከቤተክርስቲያኑ ጋር ሳይኖራት የቤተክርስቲያናችን እና የቦርዱ ጠበቃ ነኝ ስትል የከረመችው ግለሰብ በህዝብ እና በጠበቆች ፊት ቤተክርስቲያኑን ለመወከል ምንም አይነት የጽሑፍ ስምምነት እንዳልፈረመች ተናግራለች። በቤክርስቲያናችን የውስጥ ጉዳይ ጣልቃ በመግባት በሕጋዊው የቤተክርስቲያናችን ሊቀመንበር ላይ ከስልጣንህ ወርደሃል ከቦርዱም ተባረሃል በማለት ደብዳቤ በመጻፍ እንዲሁም ፖሊስ በሃሰት በመጥራት የቤተክርስቲያኑ ጠበቃ ነኝ ለምትለው ግለሰብ የቤተክርስቲያናችን አንድነትና ሰላም የሚገዳቸው አባላት ባለፈው ቅዳሜ 3/22/2014 በቤተክርስቲያናችን በመገኘት የተለያዩ ጥያቄዎችን ባቀረቡበት ወቅት ግለሰቧ ስማቸውን ለመግለጽ ያልፈለገቻቸው አንዳንድ አሁን ያሉና የቀድሞ ቦርድ አባላት በቃል በነገሩኝ መሠረት ብቻ ቤተክርስቲያኑንና ቦርዱን ወክዬ እየሰራሁ ነው ስትል የሕግ ሰው ነኝ የምትለው ግለሰብ ሕገ-ወጥነቷን በአደባባይ ገልጻለች።

በእለቱ ሕገ-ወጥ የቦርድ አባላት ሕዝቡ ተፈራርሞ ባቀረበው አጀንዳ መሠረት የአባላት ጠቅላላ ጉባዔ አንጠራም በማለት ከፍርድ ቤት በተመደቡት አደራዳሪ ዳኛ በኩል አቋማቸውን በማሳወቃቸው የቤተክርስቲያናችንን ደህንነት ለመጠበቅ እና ለማስጠበቅ እንዲሁም ሕገ-ወጥ የቦርድ ስብሰባን ለማስቆም
ወደ ቤተክርስቲያን የተመሙት ምእመናን የቤተክርስቲያኑ ጠበቃ ነኝ ስትል ከከረመችው ግለስብ ጋር ባደረጉት የጥያቄና መልስ ግብ ግብ ቤተክርስቲያናችንን ለመከፋፈልና ሰላሟን ለመንሳት እየሰሩ ያሉትን አንዳንድ የቦርድ አባላት የማጭበርበር ሥራ ያጋለጠ ነበር።

ውድ የደብረሰላም መድኃኔዓለም ምእመናን ላለፉት አንድ ዓመት ከአራት ወራት ያህል ሰላማችን ታውኮ፣ አንድነታችን ተናግቶና ሕሊናችን አዝኖና ከርሟል። ይህም ሁሉ ትዕግስት የተደረገው ለቤተክርስቲያን ሰላምና አንድነት ሲባል ነበር። ነገር ግን በአሁኑ ሰዓት በቤተክርስቲያናችን ውስጥ እንዲህ አይነት ከፍተኛ የማጭበርበር ሥራ እየተካሔደ ያለ በመሆኑና ቤተክርስቲያናችንን ፈጽሞ ለማዘጋትና ለማፍረስ እየተንቀሳቀሱ ያሉ ኃይሎች ስላሉ ቤተክርስቲያናችንን ከእንደነዚህ ዓይነት ሰርጎ ገቦች የማጽዳት ሥራ የሁላችንም መሆኑን ማወቅ ይኖርብናል። ለዚህም በመጪው ሜይ 11/2014 ዓ.ም በሚደረገው የአባላት ጠቅላላ ጉባዔ ላይ በነቂስ በመገኘት እና ኃላፊነት የሚሰማቸውን አዳዲስ የቦርድ አባላት በመምረጥ ቤተክርስቲያናችሁን እንድትታደጉ ጥሪያችንን እናስተላልፋለን። ያለ ሕጋዊ ውልና ፊርማ የቤተክርስቲያናችን ጠበቃ ነኝ በማለት በውስጥ ጉዳያችን በመግባት ስትንቀሳቀስ በነበረችው ‘የሕግ
ባለሙያ’ እና ይህንንም ድርጊት ባልተሰጣቸው ስልጣን ቤተክርስቲያኑን ወክይ ብለው በቃልም ሆነ በጽሑፍ ውለታ የገቡትን ግለሰቦች በሕግ የምንጠይቅ መሆኑን እንድታውቁ እንወዳለን። የሕግ የበላይነት በሰፈነበት ሃገር እንዲህ አይነቱ ሕገ-ወጥ ድርጊት መፈጸሙ ሁላችንንም ሊያስቆጣን ይገባል።

መድኃኔዓለም የቤተክርስቲያናችንን አድነት ይጠብቅልን።