ከዳዊት በጋሻው
የዓለም ውድና ኮከብ ተጫዋቾችን የያዘው የስፔን ላሊጋ የሁለቱ ክለቦች ማለትም የባርሴሎናና የሪያል ማድሪድ ሩጫ እየተባለ በተደጋጋሚ ቢታማም በዚህ የውድድር ዓመት ግን ሀሜቱ ትንሽም ቢሆን ረገብ ያለ ይመስላል።
በዚህም የስፔን ላሊጋ በ2013/14 የውድድር ዘመን ከወትሮው በተለየ መልኩ ፉክክሩ ጠንካራ እየሆነ ነው።የዋና ከተማዋ ክለብ ሪያል ማድሪድና የካታሎናውያን ባርሴሎና ብቻቸውን ሲፎካከሩበት የነበረው ሊግ ዘንድሮ አትሌቲኮ ማድሪድን በመሃል አስገብቷል። ከሪያል ማድሪድ በተጨማሪ ሌላው የማድሪድ ከተማ ክለብ የሆነው አትሌቲኮ ማድሪድ ከባርሴሎናና ከሪያል ማድሪድ ጥሩ እየተፎካከረ መሆኑን በርካታ የስፖርት መገናኛ ብዙኃን እየዘገቡ ናቸው።
አትሌቲኮ ማድሪድ፣ባርሴሎናና ሪያል ማድሪድ ተከታትለው እየመሩት የነበረው ላሊጋ አሁን ማድሪድ ተረክቦታል። ሪያል ማድሪድ የላሊጋው መሪ እንዲሆን የሦስቱ ወሳኝ ተጫዋቾች ጥምረት ማለትም የጋሬዝ ቤል፣የካሬም ቤንዜማና የክርስቲያኖ ሮናልዶ(BBC) አስተዋጽኦ የላቀ ነበር።
ሌላውና በዚህ የውድድር ዓመት ተፎካካሪ ሆኖ የተከሰተው አትሌቲኮ ማድሪድ በዲያጎ ኮስታ አስፈላጊውን ጥቅም እያገኘ ነው።ዲያጎ ኮስታ ከአትሌቲኮ ማድሪድም አልፎ ስፔንን ያጓጓ ሲሆን «ብራዚላዊነቴን ትቼ ለስፔን እጫወታለሁ» እስከማለት ደርሷል።
የካታሎናውያን ባርሴሎና በአንጻሩ ወሳኝ አጥቂው ሊኦኔል ሜሲን በጉዳት ያጣ ቢሆንም በኔይማርና ሴስክ ፋብሪጋዝ ተገቢውን ጥቅም እያገኘ ነው። ሊኦኔል ሜሲም ከጉዳቱ ካገገመ በኋላ ወደ ሜዳ በመመለስ መደበኛ የግብ ማግባት ስራውን ጀምሯል። በአጠቃላይ የሦስቱ ክለቦች ፉክክር ዘንድሮ የሊጉ ድምቀት መሆን ችላል።
ባለፈው ሳምንት በተካሄዱት የ25ኛው ሳምንት የስፔን ላሊጋ የጨዋታ መርሀ ግብር ባርሲሎና ሲሸነፍ፣ ማድሪድ የላሊጋውን መሪነት መረከብ ችሏል። ባርሲሎና ባልተጠበቀ ሁኔታ በሪያል ሶሴዳድ 3ለ1 ሲሸነፍ ፣ ሪያል ማድሪድ ኢልቸን 3ለ0 በመርታት ከዚያን ቀን ጀምሮም የላሊጋው መሪ ሆኗል።
ባርሲሎና በሳምንቱ በሻምፒዮንስ ሊግ ማንቸስተር ሲቲን 2ለ0 በመርታት ጣፋጭ ድል ቢቀዳጅም በሊጉ የደረሰበት ሽንፈት መሪነቱን ለሪያል ማድሪድ እንዲሰጥ አድርጎታል።
በዲያጎ ኮስታ የሚመራው አትሌቲኮ ማድሪድና በዓለም ኮከቡ ክርስቲያኖ ሮናልዶ የሚታገዘው ሪያል ማድሪድ ባሳለፍነው ሳምንት በቪሴንቴ ካልደሮን ያደረጉት ጨዋታ በአቻ ውጤት የተለያዩ ሲሆን፤ ባርሴሎና በማሸነፉ ከመሪው ሪያል ማድሪድ ያለውን የነጥብ ልዩነት ማጥበብ ችሏል።
በስፔን ላሊጋ እስካሁን 26 ጨዋታዎች ሪያል ማድሪድ በ64 ነጥቦች ሲመራ ፣ባርሴሎና በ63 እንዲሁም አትሌቲኮ ማድሪድ በ61 ነጥቦች ሁለተኛና ሦስተኛ ደረጃ ላይ ተቀምጠዋል።ሪያል ቫያዶሊድና ራዮ ቫይካኖ በ23 ነጥቦች እንዲሁም ሪያል ቤቲስ በ15 ነጥቦች ወራጅ ቀጠና ውስጥ ገብተዋል።
የስፔን ላሊጋ የኮከብ ግብ አግቢነቱን (ፒቺቺ) የዓለም ኮከቡና የሪያል ማድሪዱ ክርስቲያኖ ሮናልዶ በ23 ግቦች፣ብራዚላዊውና በቅርቡ ለስፔን ሊጫወት ከጫፍ የደረሰው የአትሌቲኮ ማድሪዱ ዲያጎ ኮስታ በ21፣የባርሴሎናው አሌክስ ሳንቼዝ በ16 ፣የሪያል ሶሲዳዱ ግሪዝማንና የባርሴሎናው ሜሲ በ15 ግቦች ይከተላሉ።