በአሜሪካ ዋሺንግተን ዲሲ ከተማ እና አካባቢዋ ያሉ አብያተ ክርስቲያንናት እንዲሁም የተለያዩ የሲቪል ድርጅቶች በቅርቡ በየመን፥ በሊቢያና በደቡብ አፍሪካ በአሰቃቂ ሁኔታ የተገደሉ ኢትዮጵያዊያንን ለመዘከር እሁድ እለት በዚህ በዋሺንግተን ዲሲ ከተማ የመታሰቢያ ዝግጅቶችን አካሄዱ።

ነዋሪነታቸው በዋሺንግተን ዲሲ እና በአካባቢዋ በርካታ ኢትዮጵያዊን በታደሙበት በዚህ ዝግጅት፥ የአሜሪካው ፕሬዘዳንት ባራክ ኦባማ ሟች ኢትዮጵያዊያንን አስመልክቶ ያስተላለፉት የሀዘን መልክት ተነቧል። ልዪ የጸሎትና የሻማ ማብራት ስነስርዓት በተከናወነበት በዚሁ ዝግጅት፥ ከኢትዮጵያ ኦርቶዶክስ ተዋህዶ ቤተክርስቲያን፥ ከኢትዮጲያ የሙስሊም እምነት ተወካዮች፥ ከመካነ-እየሱስ ወንጌላዊት ቤተክርስቲያን፥ እንዲሁም ከአለምአቀፍ ወንጌላዊት ቤተክርስቲያን የተወከሉ የሀይማኖት አባቶች የሃዘን መግለጫ መልክት ማስተላለፋቸውን ከስፍራው የደረስን መረጃ አመልክቷል ።

ለግማሽ ቀን ያህል በተከናወነው በዚሁ የመታሰቢያ ዝግጅት ወቅት ከዋልድባ ገዳም ማህበር ፤ ከዲሲ ሜትሮ ግብረ-ሀይል እንዲሁም ከተለያዩ የህብረተሰብ ክፍሎች በሊቢያ በአሰቃቂ ሁኔታ የተገደሉ ኢትዮጵያዊንን በማስመልከት የተሰማቸውን ሀዘን እንደገለጹ ታዉቋል።

በእለቱም ለሟች ቤተሰቦች ድጋፍ የሚውል የገንዘብ ማሰባሰቢያ ዝግጅት ተካሂዶ ከ ፬ ሺህ ዶላር በላይ መሰብሰቡ ታውቋል።

በቅርቡ በሊቢያ፥ የመንና፥ ደቡብ አፍሪካ የተገደሉ ኢትዮጵያዊያንን በማስመልከት ነዋሪነታቸው በዚሁ በአሜሪካ የተለያዩ ግዛቶችና የተለያዩ ሀገራት የሚኖሩ ኢትዮጵያዊያን የተለያዩ ዝግጅቶችን ሲያከናውኑ መቆየታቸው ይታወሳል።

Source:: Ethsat

The post በሊቢያ በግፍ ለተገደሉ ኢትዮጵያዉያን የፀሎትና የሻማ ማብራት ስነስርዓት ተካሄደ appeared first on Zehabesha Amharic.

ግፍና መከራው ሲፈራረቁባት

እያየህ ዝም አትበል ተሎ ድረስላት
እስራኤልን እንዳሰብክ ኢትዮንም አስባት።
በዓለም ተበትነው ሲገቡ ከእስር ቤት
አንገታቸው ሲቀላ በሌላቸው እምነት
የፊጥኚም ታስረው ሲቃጠሉ በእሳት
ከፎቅ ተወርውረው ሲጣሉ ከመሬት
ይህነን እያየህ ምነው ጨከንክባት
እስራኤልን እንዳሰብክ እሷን አስባት
በተናገርከው፤ በቃልህ መሰረት።
እንጀራ ፍለጋ ከተሰደዱበት
ልጆቿን ሰብስበህ መልሰህ አምጣላት
ከሞት የተረፉትን የአሉትን በሕይወት።
እንደ በግ መታረድ ለክርስቲያን ሰው
ዛሬ አዲስ አይደለም ድሮም የነበር ነው
አባቶች አልፈዋል ሰማእ-ት ተቀብለው።
የውጭ ጠላትማ ጥንትም የነበር ነው
አሁን እያረደን ያለ የውስጥ አይሲስ ነው
ቆዳው እኛን መስሎ ልቡ ግን ሌላ ነው።
በአለፈው ዓመት መምህሩን ስትወስድ ተማሮች ትተሃል
እስከ መጨረሻው መቼም አይማሩ ደጋግመው ወድቀዋል
የንጉሦች ንጉሥ የኃያላን ኃያል
እነሱን አንስተህ አሳየን ዘንድሮ ክፍል አጣበዋል።
ቦታውም ይለቀቅ ለቆጠረ ፊደል
ለተማረ ሰው እውቀት ለሚያካፍል።
ተማሩ ተማሩ እያለ ህዝቡ ቢነግራቸው
ከማንስ ያዩትን ትምህርቱ ይግባቸው
ሃያ አራት ዓመት ተደፍኖ ልብና አንጎላቸው።
እጃቸውን ይዞ ሰው ሲያስተምራቸው
ትምህርቱን የሚያቁት ያኔ ነው ያኔ ነው
ከነሱም ሲደርስ ከሰው የደረሰው።
ጠላት አሰፍስፎ ዙሪያውን ቢከበን
የቅዱሳን አምላክ የአባቶቻችን
እኛን ይጠብቃል ሆኖ በጎናችን
የሚያስፈራን የለም እግዚአብሔር አለልን።
እኛ አንጠብቅም ከሰዎች እርዳታ
አለልን ፈጣሪ ችግር የሚፈታ
እልል በይ ኢትዮጵያ በትንሣኤ ለታ
አንችን ለመቀደስ ሊመጣነው ጌታ።
ከትቢያው አንስቶ ዙፋን ላይ ሊያስቀምጥሽ
መላእኩ ይመጣል ምስራች ሊያበስርሽ
ጥቁሩን አውልቂና ነጩን ልብስ ልበሽ
ከፍ ብለሽ ተቀመጭ ዓለምም እንዲያይሽ።
ኢትዮጵያ ሀገራችን ወድቀሽ ትነሻለሽ፤
ልክ እንደ እስራኤል አችንም አይረሳሽ፤
ጠላትሽን አጥፍቶ አንችን ይባርካል፤
የፈጠረሽ አምላክ የኃያላን ኃያል።
ግንቦት፤፯ቀን፡ ፪ሺ፯ ዓ/ም (15/05/2015)

The post እስራኤልን እንዳሰብክ ኢትዮንም አስባት (አዳነ መኮነን) appeared first on Zehabesha Amharic.

የደህሚት ድምጽ እንደዘገበው በርካታ የአማራ ክልል ተወላጅ የሆኑ ነባር የኢ.ህ.አ.ዴ.ግ ወታደሮች ስርዓቱን በመቃወም ወደ ሱዳን ሃገር እየሄዱ መሆናቸውን ለማወቅ ተችሏል።

በምንጮቻችን መረጃ መሰረት ለረዥም አመታት በውትድርና ሲያገለግሉ ቆይተው ከሃዲው ስርዓት የተለያዩ ምክንያቶችን በመፍጠር እያባረራቸው እንደሆነ የገለጸው መረጃው ከእነዚህም መካከል አወል አሊና ገብረማሪያም ታከለ የተባሉ የደቡብ ወሎ ተወላጆች እንዲሁም ምንዋጋው ቸኮልና አሸናፊ የተባሉ የጎንደር ተወላጆች የሚገኙባቸው 4 ነባር ወታደሮች ስርዓቱን በመቃወም ወደ ሱዳን ሃገር ሲሄዱ መያዛቸውን ታውቋል።

እነዚህ በስርዓቱ ታስረው የሚገኙ ወገኖቻችን ለበርካታ አመታት ስርዓቱን ሲያገለግሉ ቆይተው ያለምንም መቋቋሚያ ከተባረሩ በኋላ መሬት ጠይቀው የሚሰጣቸው አካል ባለማግኘታቸው ኑሮ መሯቸው ወደ ሱዳን ሃገር እንዲሰደዱ መገደዳቸውን ለማወቅ ተችሏል።

The post ሥርዓቱን ለረጅም ዓመታት ሲያገለግሉ የነበሩ 4 ወታደሮች ወደ ሱዳን ተሰደዱ appeared first on Zehabesha Amharic.

ከእሙ አብረኸት

1. የካቲት 26/2004 የቀረቡትን 3 ጥያቄዎች ሳይቀበል አለባብሶ ለማለፍ መሞከሩ
2. በሚዲያዎቹ ህጋዊና ፍትሐዊ እንቅስቃሴውን ለማጠልሸት በመሞከሩ
3. ኮሚቴውን በማሰሩ
4. የመጅሊሱን ምርጫ በራሱ ቀበሌ በ‹‹ማስመረጡ››
5. ኮሚቴዎቻችንን በማእከላዊ በቶርቸር በማሰቃየቱ
6. የሐሰት ክስ በመመስረቱ
7. “ጅሀዳዊ ሀረካት” ብሎ የሀሰት ቆርጦ ቀጥል ዶክመንታሪ በመስራቱ
8. ለአህባሽ ዲስኩር በመንግስት ሚዲያ ሰፊ ሽፋን በመስጠቱ
9. የፍርድ ቤትን ትእዛዝ በመጣስም በቴሌቪዥን በማሳየቱ
10. የሐሰት ምስክሮችን በማሰልጠኑና በማስመስከሩ
11. ፖሊስ ከፍርድ ቤት በላይ የሆነበት ስርአት በመዘርጋቱ
12. የታሳሪዎችን ህገ- መንግስታዊ መብት በመጣሱ
13. የታሳሪ ሴት ጠያቂዎችን ሂጃብ ካላወለቃችሁ ብሎ ጥየቃ በመከልከሉ
14. ከሌላው እስረኛ በተለየ የጠያቂዎች ኮሚቴውን እንዳይጠይቁ ገደብ በማድረጉ
15. በእለተ ጁሙዓ ለፖለቲካ ድራማ ሲባል ሙስሊሙ ላይ ጉዳት በማድረሱ
16. በዒድ ቀን ደም በማፍሰስ
17. በኮፈሌ፣ በአሳሳ፣ በገርባ፣ በሐረር ንፁሐን ሙስሊሞችን በመግደሉ
18. ቁርአንን በድብቅ ሳይሆን በይፋ በማቃጠሉ
19. የሙስሊም ሴቶችን ሂጃብ በማቃጠሉ
20. ክብርን በሚነኩ ስድቦች እንድንሰደብ በማድረጉ
21. መርማሪዎቹ ‹‹ህገ- መንግስቱን ቀድዳችሁ ጣሉት›› እያሉ በመዘባበታቸውና መንግስትም ይህንን አውቆ ዝም በማለት የመንግስት አቋም መሆኑን በማሳየቱ
22. ደህንነቶቹና መርማሪዎቹ ‹‹አቃቤ ህጉም፣ ዳኛውም የእኛ ናቸው›› በማለታቸውና መንግስትም ይህንን አውቆ ዝም በማለት የመንግስት አቋም መሆኑን በማሳየቱ
23. ሙስሊሙን በሆነ ባልሆነው አስረው በመግረፍና በማንገላታት ለፖሊሶቹ የ‹‹ገቢ ምንጭ›› በመፍጠሩ
24. ሙስሊሙን አስረው እየገረፉ በሀሰት እንዲመሰክሩ በማድረጉ
25. የመንግስት ፖሊሶች መስጊዶችን ገብተው በማርከሳቸው
26. የኮሚቴዎችን ቤተሰቦች በሚዘገንን ሁኔታ በማሰቃየታቸው
27. በሌሊት የሙስሊሞችን ቤት ያለ ፍርድ ቤት ትእዛዝ ሰብረው በመግባት በፍተሻ ስም በፖሊሶችና ደህንነቶች ዘረፋ በመፈፀማቸው
28. በርካታ መስጊዶችን ከሊባኖስ ባስመጣው አህባሽ አስተሳሰብ በሰለጠኑ ሰዎች በእጅ አዙር በመቆጣጠራቸው
29. በርካታ ኢማሞች እንዲባረሩ በማድረጉ
30. በርካታ የእስልምና አስተማሪዎች እንዲሰደዱ በማድረጉ
31. በቀበሌ ‹‹ያስመረጣቸውን›› የመጅሊስ አሻንጉሊት አመራሮች ገምግሞ በራሱ እንደገና በመሾም ‹‹የመጅሊሱ አድራጊ ፈጣሪ እኔ ነኝ›› በማለቱ
32. ባልና ሚስትን ከማፋታት ወደ ኋላ የማይመለሱትን ፅንፈኛና ቀንደኛ የአህባሽ ሐዋሪያዎች ወደ መጅሊስ ወንበር በማምጣቱ
33. ሙስሊም ተማሪዎችን ሃይማኖታቸው ግዴታ ባደረገባቸው አለባበስ ምክንያት ከትምህርት ገበታቸው በማባረሩ
34. ተማሪዎች ሃይማኖታዊ ግዴታቸው የሆነውን ሶላት እንዳይሰግዱ በመከልከሉ
35. ሙስሊሙን ተማሪ ነጥለው ለመምታት በተዘጋጁ መመሪያዎች በማውጣቱ
36. ሁሉንም እስላማዊ ጋዜጦችን በማገዳቸው
37. ሙስሊም ጋዜጠኞችን በማሰራቸው
38. መስጊዶችን ሙስሊም ባልሆኑ ጆሮ ጠቢዎች በማጥለቅለቁ
39. የአህባሽን ግዳጅ ስልጠና በማስቀጠሉ
40. የሀሰት ምስክሮች ህዝብና ታዛቢዎች እንዳያያቸው ዝግ ችሎት በማድረጉ
41. በመስጊዶች ውስጥ በቀበሌ መጅሊሶቹ የምርጫ ቅስቀሳ በማድረጉ
42. ዳኞች ሁሌም ለአቃቤ ህጉ ወግነው በመስራታቸው
43. ከዳኞች ውስጥ የኢህአዴግ አባል በመኖሩ
44. በተደጋጋሚ ፍተሻ በማድረግ የኮሚቴዎችን የማስታወሻ ደብተራቸውን በህገወጥነት በመውሰዱ
45. ኮሚቴዎቻችን ላይ ቤተሰብና ህዝበሙስሊሙ እንዳይጠይቃቸው ብሎ ከሌላ ታሳሪ ለይቶ የጊዜ ገደብ በማሳነሱ
46. ከፍርድ በፊት ኮሚቴዎችን ወደ ቃሊቲ በማዛወርና ነጣጥሎ በማሰር የስነልቦና ቸችግር ለመፍጠር በመሞከሩ
47. ከፍርድ በፊት ኮሚቴዎችን ሌላ እስረኛ አብሯቸው እንዳይሆን በማድረጉና የስነልቦና ችግር ለመፍጠር በመሞከሩ
48. ኮሚቴዎቻችንን ምግብ እንዳይገባላቸው በመከልከል በጨለማ ቤት በማሰሩ
49. የፍርድ ሂደቱን እንዳሻው እንዲጓተት በማድረጉና ኮሚቴዎች በእስር ለረጅም ጊዜ እንዲጉላሉ በማድረጉ
50. የሚያዝያ 30 2007 የፍርድ ቀኑን ለምርጫ እንዲመቸው ብሎ በማዘዋወሩ የኢህአዴግ ግፍ ተዘርዝሮ አያልቅም!

The post ኢህአዴግን የማልመርጥበት 50 ምክንያቶች appeared first on Zehabesha Amharic.

(በማንደፍሮ ባይለየኝ)

ሴይሙር ሀርሽ በምርመራ ጋዜጠኝነት (Investigative Journalism) አንጋፋና ስመ ጥር ከሆኑ የሙያው ሰዎች አንዱ ነው፡፡ ወደዚህ ስራ እንደተሰማራ ‹‹My Lai massacre›› በሚል ርዕስ የተዋጣለት ምርመራዊ ዘገባ አቅርቦ ነበር፡፡ ይህም እ.ኤ.አ በ1968 ዓ.ም የአሜሪካ ወታደሮች በመቶዎች የሚቆጠሩ ሰላማዊ ዜጎችን እንደጨፈጨፉ ቁልጭ አድርጎ የሚያሳይ ዘገባ ነበር፡፡

ሀርሽ ከዚያን ጊዜ ወዲህ በርካታ የተደበቁ ምስጢሮችን እየፈለፈለ በማጋለጥ ይታወቃል፡፡ በተለይ ከ9/11 የአሜሪካ ጥቃት ወዲህ ኢራቅ ውስጥ በሚገኘው አቡ ጋሪብ እስር ቤት ባሉ እስረኞች ላይ የአሜሪካ ወታደሮች የሚፈፅሙትን ግፍ ይፋ አድርጓል፡፡ ‹‹60 Minutes›› የሚል ርዕስ ባለው የቴሌቭዥን ፕሮግራሙና በዘኒውዮርከር መፅሔት ላይ በምርመራ ጋዜጠኝነት ያገኛቸውን መረጃዎች ሲዘረግፍ ቆይቷል፡፡ በዚህ ሳምንት ደግሞ ሀርሽ አዲስ ሚስጢር ይዞ ለአለም ብቅ ብሏል፡፡

‹‹The White House’s Story (about the 2011 U.S Navy SEAL raid in Pakistan that killed Osama bin laden Might have been written by Lewis Carroll›› በሚል ርዕስ ነው ሚስጥሩን ይዞ ከች ያለው፡፡

ይሁን እንጂ ይህ የሀርሽ ፅሑፍ ከ1993 ዓ.ም ጀምሮ ሲሰራበት በቆየው ዘኒውዮርከር መፅሔት ላይ ሊወጣለት አልቻለም፡፡ ፅሑፉን ያስተናገደለት ‹‹ለንደን ሪቪው ኦፍ ቡክስ›› ነው፡፡ እሁድ ዕለት ለንደን ሪቪው ኦፍ ቡክስ ላይ የቀረበው ይህ ፅሑፍ የበርካቶችን ቀልብ ስቦ በሰፊው ከመነበቡም በላይ በአለም አቀፍ ደረጃ መነጋገሪያ ሊሆን በቅቷል፡፡ የሚገርመው በዚሁ እለት ማንነታቸው ባልታወቁ ሀይሎች የለንደን ሪቪው ኦፍ ቡክስ ድረ ገፅ አደጋ ገጥሞት ከስራ ውጪ እንዲሆን ተደርጓል፡፡

ሀርሽ ምን ይዞ መጣ?

ዋናውና አዲስ ነገር ሆኖ በሀርሽ ጽሁፍ የተጠቀሰው ቢን ላደንን ለመያዝ ስለተደረገው ዘመቻ የፕሬዝዳንት ኦባማ አስተዳደር ያስቀመጠው ስዕል ሙሉ በሙሉ ሀሰት መሆኑ ነው፡፡
ቢን ላደን የት እንደተደበቀ፣ ምን እየሰራ እንደነበርና ያለበት የጤንነት ሁኔታ ጭምር በአሜሪካና በፓኪስታን ባለስልጣናት እንደሚታወቅ ፅሁፉ ያስረዳል፡፡ በፓኪስታን ሰሜናዊቷ ከተማ አቦታድ የተከናወነው ‹‹ዘመቻ ቢን ላደን›› ግን እነዚህን እውነታዎች ወደ ጎን በመሸሸግ እንደነበር ይገልፃል፡፡

ከአንድ በጡረታ የተገለለ የአሜሪካ የስለላ ቢሮ ከፍተኛ የስራ ሃላፊ የተገኘውና በሀርሽ ጽሑፍ በዝርዝር ከቀረበው መረጃ ውስጥ የሚከተሉትን ነጥቦች ላካፍላችሁ፡፡

1. በ2011 የአሜሪካ ባህር ሃይል ልዩ ኮማንዶ (Navy SEAL) ቢን ላደን ተደብቆበታል በተባለው ሰሜን ፓኪስታን የአቦታባድ መኖሪያ ግቢ ውስጥ ያከናወነው ዘመቻ ድንገተኛ አይደለም፡፡ ኮማንዶቹ እንደተገለፀው በአደገኛና ምንነቱ ባልታወቀ ሁኔታ ውስጥ ልዩ ግዳጅ የተወጡም አይደሉም፡፡ ቢን ላደን በዚህ በአቦታባድ መኖሪያ ቤት ለአምስት ዓመት ያህል የፓኪስታን ጦር ሃይል እስረኛ ሆኖ ቆይቶ ነበር፡፡ ዘመቻው በዚያ ምሽት የተቀነባበረውም ሆነ ተብሎ በሂሊኮፕተር ወደ መኖሪያ ቤቱ እንዲያመሩ የተደረገውም በድብቅ ሳይሆን በስምምነት ነበር፡፡ በመሆኑም ኮማንዶቹ የገቡት የፓኪስታን እስር ቤት እንጂ የቢን ላደን መኖሪያ ቤት አይደለም፡፡

2. የፓኪስታን ጦር ሃይል ከፍተኛ የደህንነት አባላት ከአሜሪካ ኮማንዶዎች ጋር በመሆን በዘመቻው ወቅት ተሰማርተው ነበር፡፡ አቦታባዱን ‹‹መኖሪያ ቤት›› መግቢያና መውጫ የሚያውቁት እነዚህ የደህንነት አባላት ኮማንዶዎቹን እየመሩ ቢን ላደን ‹‹የታሰረበት›› ቦታ አድርሰዋቸው ነበር፡፡ በዚያ ምሽት የተተኮሰው አንድ ጥይት ብቻ ሲሆን፤ እሷም በአሜሪካ ኮማንዶዎች የተተኮሰችና ቢን ላደን ለሕልፈት የዳረገች ጥይት ነበረች፡፡

3. ከዘመቻው በኋላ በርካታ የአሜሪካ ባለስልጣናት የሚነገረው መግለጫ የአቦታባዱን ‹‹መኖሪያ ቤት›› የአሜሪካ ስለላ ተቋም (ሲአይኤ) አባላት እንደደረሰበት ነው፡፡ አንድ ለቢን ላደን የሚላላክ ሰውን ሲአይኤ ጠርጥሮት ባደረገው ክትትል መኖሪያ ቤቱን ለማወቅ እንደቻለ በሰፊው ሲዘገብ ነበር፡፡ ይህ ግን ሙሉ በሙሉ ውሸት ነው፡፡ ኢዝላማባድ ውስጥ የሚገኘው የአሜሪካ ኤምባሲ የአቦታባዱ ‹‹መኖሪያ ቤት›› (እስር ቤት) ጉዳይ የተነገረው በሲአይኤ ሳይሆን ቢሮው ጠረጴዛ ላይ በተቀመጠለት መረጃ ነው፡፡

4. ቢን ላደን በአቦታባድ ‹‹መኖሪያ ቤት›› ውስጥ ታስሮ በቆየበት ጊዜ ሙሉ ወጪው የተሸፈነው በሳውዲ አረቢያ መንግስት ነበር፡፡

5. የፓኪስታን ጦር ሃይል ዶክተር ከቢን ላደን ዲኤንኤ (DNA) ወስደው በትክክል ራሱ መሆኑን ማረጋገጫ ጉዳዩ ለሚመለከተው መንግስት እንዲደርስ አድርገው ነበር፡፡ በመሆኑም ከዘመቻው በኋላ የኦባማ ባለስልጣናት በዚያ መኖሪያ ቤት ቢን ላደን ስለመኖሩ በእርግጠኝነት አናውቅም ነበር ያሉት ውሸት ነው፡፡

6. የፓኪስታን ከፍተኛ የጦር ሃይሉ ባለስልጣናት ማለትም የጦር ሃይሎች ጠቅላይ አዛዥ ጀነራል አሽፋቅ ፓርቪዝ ካያኒ እና የደህንነት ሃላፊው ጀነራል አህመድ ሹጃ ፓሻ ቢን ላደንን ለመያዝ (ለመግደል) ስለተደረገው ዘመቻ አያውቁም ነበር የተባለው ውሸት ነው፡፡

በአጠቃላይ ከላይ ከተቀመጡት ስድስት ነጥቦች በመነሳት ሀርሽ በፅሑፉ ያስቀመጠው ፕሬዝዳንት ኦባማና ከፍተኛ ባለስልጣናት የተናገሩት ሁሉ ሀሰት እንደነበር ነው፡፡ ቢን ላደንም በታሰረበት ቦታ እንደተገደለና እሱን ለመያዝ ምንም ጥረትና ስለላ እንዳልተደረገም ጭምር ነው፡፡

The post የኡሳማ ቢንላደን ግድያና የኦባማ ውሸት appeared first on Zehabesha Amharic.

በትግራይ ክልል ሰሜናዊ ምዕራብ ዞን ምድረ ፈላሲና አካባቢዋ ከሚገኙ የኢ.ህ..አ.ዴ.ግ ወታደሮች የምክትል አስር አለቃ ማእርግ ያለው ወታደር ማንነታቸው ባልታወቁ ሰዎች እንደተገደለ የደህሚት ድምጽ ዘገበ::
እንደ ዘገባው ከሆነ በትግራይ ክልል ሰሜናዊ ምዕራብ ዞን ላዕላይ አድያቦ ወረዳ ልዩ ስሙ ምድረ ፈላሲና አካባቢው ከሚገኙት የኢ.ህ.አ.ዴ.ግ. ስርዓት ወታደሮች መካከል አሊ አራጌ የተባለ ምክትል አስር አለቃ ሚያዝያ 20 ቀን 2007 ዓ/ም በፈቃድ ወደ አዲ ነብሪ ኢድ በሄደበት ጊዜ ማንነቱ ባልታወቀ ገዳይ ሚያዝያ 23 ቀን 2007 ዓ/ም በአከባቢው በሚገኘው ካምፕ ሞቶ እንደተገኘ ታውቋል።
ይህ የተገደለው ወታደር በማን እንደተገደለ በሃላፊዎች ምንም ዓይነት የተደረገ ምርምራ ሳይኖር መቀበሩን የገለፀው መረጃው የአካባቢውን ህብረተሰብ ከሰራዊቱ ለመነጠል የዚህ አካባቢ ህዝብ የትህዴን አባል ነው የሚል ወሬ ከሰራዊቱ አዛዦች መናፈሱን የደረሰን መረጃ ጨምሮ አስረድቷል።

The post በትግራይ ምክትል 10 አለቃ አሊ አራጌ ተገድሎ ተገኘ appeared first on Zehabesha Amharic.

ባለፈው የውድድር ዘመን ሚቹ 30 ሚሊዮን ፓውንድ ተገምቶ ነበር፡፡ ነገር ግን በኦክቶበር 2013 ወዲህ ኳስ እና መረብ አላገናኘም፡፡ በአንድ ወቅት የስዋንሲ ጨራሽ አጥቂ የነበረው ስፔናዊ ራሱን በውሰት በናፖሊ የተጠባባቂ ወንበር ላይ ተቀምጦ አገኘው፡፡ በዚያም ቢሆን ንቁ ተሳትፎ እያደረገ አይደለም፡፡
የስዋንሲ ባሳለፈው የመጀመሪያ የውድድር ዘመን የብዙዎችን ትኩረት የሳበው ተጨዋች በጉዳት እና በቂ ተሳትፎ አለማድረግ ምክንያት አቋሙ ተንሸራተተ፡፡ ለናፖሊ ተሰልፎ በተጫወተባቸው ስድስት ጨዋታዎች አንድም ጎል አላስቆጠረም፡፡

የስዋንሲው አሰልጣኝ ጋሪ ሞንክ በመጪው ክረምት ከተጫዋቹ ጋር በቆይታው ዙሪያ ይነጋገራል፡፡ ለመወሰን እንደሚቸገርም ይጠበቃል፡፡ የሞንክ ውሳኔ ምን ይሆን? የክለቡ የቀድሞ ኮከብ ጎል አግቢ በሊበሪቲ ስታዲየም እንዲቆይ ያገባዋል ወይስ የ29 ዓመቱ አጥቂ በኮንትራቱ ላይ ቀሪ የአንድ ዓመት ጊዜ እየቀረበው በዝቅተኛ የዝውውር ሂሳብ አሳልፎ ይሸጠዋል?
‹‹ከሚቹ ጋር መልካም ግንኙነት አለን፡፡ የቡድን ጓደኞች ስለነበርን በሚገባ አውቀዋለሁ፡፡ አሰልጣኝ ከሆንኩ በኋላ ግንኙነታችን ቀጥሏል›› ይላል ሞንኮ፡፡ ‹‹ባለፈው ክረምት በሚገባ አነጋግሬዋለሁ፡፡ መሄድ እንደፈለገ ተመለከትኩ፡፡ እኔም በሃሳቡ ተስማማሁ፡፡ በመጪው ክረምት የሚፈጠረው ተመሳሳይ ነገር ነው፡፡››

‹‹ድንቅ አጀማመር››

ስዋንሲ እርሱን ከራዮ ቫ ዩካኖ ለማዘዋወር 2 ሚሊዮን ፓውንድ ከፍሏል፡፡ የእግር ኳስ ተንታኞች የ2012/13 የውድድር ዘመን ትንበያቸውን ሲሰጡ እርሱን ዘልለውት ነበር፡፡ እርሱ ግን ወደ ፕሪሚየር ሊግ መምጣቱን በሚያስገርም መልኩ አወጀ፡፡ ስዋንሲ በመጀመሪያ ዕለት ጨዋታ ኪውፒአርን 5-0 ሲረታ ሁለት ጎሎችን አስቆጠረ፡፡
ከሶስት ጨዋታዎች በኋላ ስዋንሲ የፕሪሚየር ሊጉን የደረጃ ሰንጠረዥ መምራት ጀመረ፡፡ ክለቡ ሶስቱንም ጨዋታዎች ሲያሸንፍ ሚቹ በሶስቱም ጎል አስቆጥሯል፡፡ ግዙፉ ባለረዥም ፀጉር አጥቂም ወዲያውኑ መነጋገሪያ ሆነ፡፡ አሰልጣኝ ማይክል ላውድሮፕ እርሱን በማግኘታቸው የተሰማቸውን ደስታ የገለፁት ‹‹የውድድር ዘመኑ ምርጥ ግዢ›› በማለት ነው፡፡ ሰር አሌክስ ፈርጉሰን ይህንን የመሰለ ተሰጥኦ ሳይመለከቱት እንዴት ሊያመልጣቸው እንደቻለ የምልመላ ዲፓርትመንት ባልደረቦቼን አነጋግራለሁ በማለት ቀልደዋል፡፡ የተወሰኑ ታላላቅ የፕሪሚየር ሊግ ክለቦች በዙሪያው እያንዣበቡ እንደሆነም መነጋገር ጀመረ፡፡ በጃንዋሪ 2013 ስዋንሲ አጥቂውን አዲስ ኮንትራት አስፈረመው፡፡ በተሻሻለው ኮንትራቱ የተነቃቃው ስፔናዊ አጥቂ በሁሉም ውድድሮች ላይ 22 ጎሎችን አስቆጠረ፡፡ የካፒታል ካፕ ዋንጫን ባሸነፉበት የማይረባ የውድድር ዘመን የስዋንሲ የውድድር ዘመኑ ምርጥ ተጨዋች ተብሎ ተመረጠ፡፡

ለብሔራዊ ቡድን የተጫወተው አንድ ጊዜ ብቻ ነው
የሚቹ ዕድገት ማቆሚያ ያለው አይመስልም ነበር፡፡ ሁለተኛ የውድድር ዘመኑን በስዋንሲ ሲጀምር ድንቅ ብቃቱ አብሮት ቀጠለ፡፡ ስዋንሲ በዩሮፓ ሊግ ጨዋታ ማልሞን 4-0 ሲያሸንፍ የስዋንሲን የዩሮፓ ሊግ ዘመቻ የመጀመሪያ ጎል አስቆጠረ፡፡ ከሜዳቸው ውጪ ቫሌንሲያን 3-0 ሲያሸንፍ ኳስ እና መረብ አገናኘ፡፡
የሚቹ እንቅስቃሴ አንፀባራቂ ነበር፡፡ የስፔን ብሔራዊ ቡድን አሰልጣኝ ቪሴንቴ ዴል ቦስኬን ቀልብ ገዛ፡፡ በ2013 ለዓለም ዋንጫ ማጣሪያ ቢላሩስን ሲገጥሙ የመጀመሪያ ብሔራዊ ቡድን ጨዋታውን አደረገ፡፡ ዣቪ እና ሴስክ ፋብሪጋዝን የመሳሰሉ ተጨዋቾችን የያዘው ቡድን አካል ሆነ፡፡ ነገር ግን ያ ጨዋታ ብቸኛው አጋጣሚ ሆነ፡፡ ከዚያን ጊዜ በኋላ የውድድር ዘመኑ ወደ አልሆነ አቅጣጫ ሲጓዝ ተመለከተ፡፡ ከአንድ ወር በኋላ በደቡብ ዌልስ ደርቢ በካርዲፍ ሲቲ 1-0 ሲሸነፉ ቀላል የሚመስል የቁጭምጭሚት ጉዳት አጋጠመው፡፡ በዲሴምበር ወደ ሜዳ ተመልሶ በሁለት ጨዋታዎች ላይ ቢሰለፍም እስከ ማርች ድረስ ከሜዳ ተገለለ፡፡ በውድድር ዘመኑ ለመጨረሻ ጊዜ ያስቆጠራት ጎል የተገኘችው በኦክቶበር ነበር፡፡

በስዋንሲ ጥሩ የማይባል ሁለተኛ የውድድር ዘመን ካሳለፈ በኋላ ሚቹ ለአንድ የውድድር ዘመን በሚዘልቅ የውሰት ስምምነት ወደ ናፖሊ አመራ፡፡ አላማው ወደ ቀድሞ ብቃቱ ለመመለስ እንደ መንደርደሪያ ሊጠቀመው ነበር፡፡ ሆኖም ወደ ጣልያን ያደረገው ጉዞ ሚቹ ያለመውን መነቃቃት አላስገኘለትም፡፡ ስፔናዊው በዚህ የውድድር ዘመን ተሰልፎ መጫወት የቻለው በስድስት ጨዋታዎች ላይ ብቻ ነው፡፡ ጉዳቶች የ29 ዓመቱን አጥቂ ዕድገት አስተጓጉሎበታል፡፡ ነገር ግን ለጨዋታ ብቁ በሚሆንበት ጊዜ እንኳን የመሰለፍ ዕድል የሚያገኘው ከጎንዛሎ ሂግዌይን፣ ሎሬንዞ ኢንሴፔ፣ ድራይስ ማርቴንስ፣ ማግሎ ጋቢያዲን፣ ማሬክ ሃምሲክ እና ሌሎች የፊት መስመር ተሰላፊዎች በኋላ ነው፡፡
ሞንክ ሚቹ ወደ ሙሉ ጤንነቱ ሲመለስ የቀድሞውን ብቃቱን መልሶ እንደሚያገኝ ያምናል፡፡ ‹‹ለዚህ ያበቁት ጉዳቶቹ ናቸው፡፡ ለጨዋታ ብቁ ሆኖ ረዘም ላለ ጊዜ መቆየት አልቻለም፡፡ ያንን ማድረግ ለተጨዋች ፈታኝ ነው፡፡ ሌላ ምንም አይደለም፡፡ ዕድለኛ አልነበረም፡፡ ከጉዳት ነፃ ሆኖ ረዘም ላለ ጊዜ መቆየት ቢችል ተመሳሳዩን ብቃት መመልከት እንችላለን፡፡›› በማለት ለአጥቂው ያለውን መልካም ስሜት ይገልፃል፡፡

ጊግስ ወንድሙን ይቅርታ ጠየቀ
የቀድሞው የማንችስተር ዩናይትድ ክንፍ ተጫዋች ሪያን ጊግስ ይቅርታ ለመጠየቅ ወደ ወንድሙ መደወሉ ታምኗል፡፡ የቀያይ ሰይጣናቱ ታሪካዊ ተጨዋች ከወንድሙ ሮድሪ ሚስት ናታሻ ጋር ለስምንት ዓመታት ፆታዊ ግንኙነት እንደነበረው ይፋ ከወጣ በኋላ የወንድማማቾቹ ግንኙነት ሻክሮ ነበር፡፡ አሁን ያንን ግንኙነት ለማደስ ጥረት በማድረግ ላይ ናቸው፡፡
‹‹ከጥቂት ሳምንታት በፊት ሪያን ሳይታሰብ ለሮድሪ ደወለለት፡፡ ሮድሪ ጥፋት የሰራው እርሱ ስለሆነ ቀድሞ ሊደውሉልኝ የሚገባው ሪያን ነው በሚለው አቋሙ ፀንቶ ነበር›› በማለት ለወንድማማቾቹ ቅርበት ያለው ምንጭ ተናግሯል፡፡ የ41 ዓመቱ ሪያን እና የ38 ዓመቱ ሮድሪ የፋሲካ ዕለት በአንድ ቡና ቤት ውስጥ አንድ ላይ ታይተዋል፡፡ በዚያ የነበረ እንግዳ ‹‹ዳግም ጥሩ የአብሮነት ቆይታ እያደረጉ ነበር›› ብሏል፡፡
ጉዳዩ ይፋ ከሆነ በኋላ ለሶስት ዓመታት አልተነጋገሩም ነበር፡፡ በዚህ ዓመት መጀመሪያ ላይ ሮሪ በቻናል ፋይቭ ላይ በሚተላለፍ በክህደት ዙሪያ በሚያጠነጥን ፕሮግራ ላይ ተሳታፊ ሆኖ ነበር፡፡ ‹‹አንድ ቀን ናታሻ ተሰወረችብኝ፡፡ ወደ ኦልድ ትራፎርድ ሄጄ እግር ኳስ ተጫወትኩ እና በጊዜ ተኛሁ፡፡ ዘጠኝ ሰዓት ላይ ስነቃ ቤት ውስጥ አልነበረችም፡፡ 12 ሰዓት ላይ እናቷ ጋዜጣ እና ደብዳቤ ይዛ በር አንኳክታ ገባች፡፡ እየሆነ ያለውን ነገር ያወቅኩት ከእናቷ ጎን ቁጭ ብዬ ጋዜጣውን በማንበብ ነው›› ሮድሪ ይቀጥላል፡፡
‹‹ደውዬ በጋዜጣ ላይ የወጣው ታሪክ እውነት ነው ወይ ብዬ ጠየቅኩት፡፡ በጭራሽ ብሎ አስተባበለ፡፡ በወቅቱ ማንን ማመን እንዳለብኝ አላወቅኩም ነበር፡፡ ሁለት ልታምናቸው የሚገባ ሰዎች በአጠገብህ ኖረው ሁለቱንም ማመን ትፈልጋለህ፡፡ ነገር ግን ናታሻ የፅሑፍ መልዕክቶችን አሳየችኝ፡፡ ሪያን የላካቸውን የራሱን ፎቶግራፎችም ተመለከትኩ፡፡
‹‹በኋላ ላይ ምንም ማለት እንዳልሆነ እና ከሚስቱ ጋር ከወሲብ ያለፈ ነገር እንዳልነበራቸው ነገረኝ፡፡ ለወሲብ ብሎ ቤተሰቤን አፈረሰ፡፡ ተስፋ ቆርጬ እርሱን ላለመናገር ወሰንኩ፡፡ ጥሩ ሰርተሃል፡፡ ደስ ይበልህ ወንድሜ የሚል የፅሑፍ መልዕክት ላኩለት፡፡›› ሮድሪ እና ናታሻ ለትዳራቸው ዕድል ለመስጠት ቢሞክሩም አልተሳካላቸውም፡፡ በ2013 በፍቺ ተለያዩ፡፡

The post Sport: የሚቹ ቀጣይ ዕጣ appeared first on Zehabesha Amharic.

– እርግዝናን ተከትሎ የሚከሰተው ደም ግፊት
– ለኩላሊት ሥራ ማቆም፣ ለደም መርጋት፣ ለልብ፣ ለአዕምሮ ህመም፣ ለጽንስ መቀጨትና ለሞት የሚያጋልጥበት ምስጢር ምንድን ነው?

የዶክተሩ ገጠመኝ 1
ቦታው በአንድ ክፍለ ሀገር ነው፡፡ አንዲት የሶስት ልጆች እናት፣ አራተኛ ልጇን አርግዛ ከገጠር ወረዳዎች እየመጣች በአንድ ሆስፒታል የወሊድ ክትትል ታደርጋለች፡፡ በሁለተኛው የእርግዝና ወቅት ላይ የደም ግፊት ይታይባታል፡፡ ዶክተሩ የበሽታውን አስከፊነት በመግለፅ ህክምና እንድትጀምር ሙያዊ ምክር ይሰጣታል፡፡ ሴትየዋ ግን ‹‹ህክምናው ልጄን ሊያሳጣኝ ይችላል›› በሚል የተሳሳተ አስተሳሰብ ምክንያት ወደመጣችበት የገጠር መንደር እምቢ ብላ ትመለሳለች፡፡ በወሯ ተመልሳ ስትመጣ ዶክተሩ የደም ግፊቱ ጊዜ በጨመረ ቁጥር እየተባባሰ እንደሚመጣ በመግለፅ ህክምና እንድትጀምር ለማግባባት ይሞክራል፡፡ ሴትየዋ ግን ፈቃደኛ ሆና አልተገኘችም፡፡ ከወር በኋላ ወደ ሆስፒታሉ ተመልሳ ስትመጣ ግን የደም ግፊቱ ከሚጠበቀው በላይ ጨምሯል፣ መተንፈስ አቅቷታል፣ ሳንባዋ ውስጥ ውሃ ቋጥሯል፣ በአጠቃላይ ግፊቱ ከፍተኛ ደረጃ ላይ ደርሷል፡፡ በህክምና ለማገዝ ከፍ ያለ ጥረት ተደረገ፡፡ ነገር ግን ሴትየዋ ሳንባዋ ውስጥ በተጠራቀመው ውሃ በመታፈኗ ምክንያት፣ በሆስፒታሉ አቅም ልትረዳ የምትችልበት ተስፋ ጠፋ፡፡ በዚህም ምክንያት ከ30 ደቂቃ በላይ ሳትቆይ፣ አራተኛ ልጅ ለማግኘት ብላ ሶስት ልጆቿን ጥላ ሞተች፡፡

የዶክተሩ ገጠመኝ 2
አንዲት ሴት፣ እርግዝናን ተከትሎ በሚከሰት ደም ግፊት አንድ የመንግሥት ሆስፒታል ትመጣለች፡፡ ነገር ግን ህመሙ ተባብሶ ጽንስ ከመቀጨጩ ባሻገር በማህፀኗ ውስጥ እያለ ሞቷል፤ የጉበትና የኩላሊት ጤና እንዲሁም የሚጥል በሽታ ገጥሟታል፡፡ እነዚህን ችግሮች ለማስተካከል ጽንሱ በቀዶ ህክምና እንዲወጣ ተደረገ፡፡ የተለያዩ መድሃኒቶችን በመስጠት፣ የእናትየዋን ጤና ለመመለስ ጥረት ተደረገ፡፡ ይሄም ሆኖ ከማህፀነው የሚደማው ደም አልቆም ይላል፡፡ ይህም ብቻ ሳይሆን የደም መርጋት ችግርም ያጋጥማታል፡፡ ሁኔታው እየተባባሰ ሲመጣ፣ በሐኪሞች ውሳኔ የሴትየዋ ማህፀን ተቆርጦ እንዲወጣ ተደረገ፡፡ የፈሰሰውን ደም ለመተካት ተጨማሪ ደም ተሰጣት፤ ይህ በሆነ በሶስተኛው ቀን ግን በሽታው እየተባባሰ እንጂ እየተሻሻለ ሊሄድ አልቻለም፡፡ ኩላሊቷ ስራውን አቆመ፡፡ በዚህም ሳቢያ በሽንት አማካኝነት መወገድ የሚገባው በሰውነቷና በደሟ ውስጥ መጠራቀም ጀመረ፡፡ የቆሻሻውን ደም ተከትሎ የሚከሰት የአዕምሮ ህመም ተከሰተባት፡፡ አጠቃላይ የሴትየዋ ጤና እየተወሳሰበ መጣ፡፡ ይሄም ሆኖ ግን የጤና ባለሙያዎች ተስፋ ባለመቁረጥ ጥረታቸውን ቀጥለዋል፡፡
የኩላሊት ጤና ለመመለስ፣ ለተከታታይ 10 ቀናት የዲያሌስስ ህክምና እንድታገኝ ተደረገ፡፡ በሂደት በጤናው ላይ መሰረታዊ ለውጥ መምጣት ቻለ፡፡ በአሁኑ ወቅት ከሞት ተርፋ ጥሩ ትዳር አላት፣ ማህበራዊም ሆነ ኢኮኖሚያዊ ህይወቷ የተስተካከለና አገርን መጥቀም የምትችልበት ሁኔታ ላይ ትገኛለች፡፡

ከዶክተሩ ገጠመኞች መገንዘብ እንደሚቻለው እርግዝናን ተከትሎ የሚከሰት የደም ግፊት መዘዙና ውስብስብነቱ ከፍ ያለ ነው፡፡ ለእናቶች ሞት ምክንያት ከሆኑ 5 የጤና ችግሮች መካከል የደም ግፊት አንዱና ዋነኛው ነው፡፡ ለመሆኑ ለምንድን ነው እርግዝናን ተከትሎ የደም ግፊት የሚከሰተው? ለምንስ ገዳይ በሽታ ሆነ? በእነዚህና ተያያዥ በሆኑ ጉዳዮ ዙሪያ፣ አንድ የማህፀንና ጽንስ ስፔሻሊስት ሐኪም ሙያዊ ማብራሪያ ሰጥተውናል፡፡

ጥያቄ፡- የደም ግፊት በሽታ በሴቶች ላይ ለምን እርግዝናን ተከትሎ ይከሰታል?
ዶ/ር፡- ምክንያት ሊሆን ይችላል ተብሎ የሚታሰበውና አሁን እየተደረጉ ያሉ ምርምሮች የሚያጠነጥኑት፣ በእርግዝና ወቅት በሚታዩ አዳዲስ ክስተቶች ላይ ነው፡፡ ለምሳሌ የጽንስ መምጣት፣ የእንግዴ ልጅ መኖር፣ በጽንሱና በእንግዴ ልጁ መካከል የሚኖረው የሆርሞኖች ለውጥ ጋር ይያያዛል ወይ- የሚሉ መላምቶች በተደጋጋሚ በህክምናው ዘርፍ ይነሳሉ፡፡ በእነዚህ ጉዳዮች ላይ ጥናቶች አተኩረው እየተካሄዱ ነው፡፡ ነገር ግን በእርግዝና ወቅት በተለየ ሁኔታ፣ ለምን የደም ግፊት እንደሚመጣ ከእርግዝናው ውጭ በውል ተለይቶ የታወቀ ምክንያት የለም፡፡

ጥያቄ፡- እስኪ ስለ ደም ግፊት በሽታ ምንነት ጠቅለል ያለ ሐሳብ ያካፍሉን?
ዶ/ር፡- በአጠቃላይ የደም ግፊት በሽታ የምንለው፣ በማንኛውም ሰው ላይ ሊከሰት የሚችልና የደም የግፊት መጠን መጨመር በሽታ ነው፡፡ በሽታው ፕራይመሪና ሰከንደሪ የደም ግፊት ተብሎ በሁለት ይከፈላል፡፡ ፕራይመሪ የደም ግፊት 90 በመቶ የሚከሰት ሲሆን ምክንያቱ (መንስኤው) ይሄ ነው ተብሎ በውል አይታወቅም፡፡ ሰከንደሪ የሚባለው የደም ግፊት 10 በመቶ የመከሰት ዕድል ያለውና የተለያዩ የጤና ችግሮችን ተከትሎ የሚመጣ ነው፡፡ ለምሳሌ የስኳር፣ የኩላሊት፣ የደም ስፍርና የልብ ጤና ችግር ያለባቸው እንዲሁም ከፍተኛ የሰውነት ውፍረት ባለባቸው ሰዎች ላይ ለሁለተኛው አይነት የደም ግፊት በሽታ የተጋለጡ ናቸው፡፡
ዛሬ የምንነጋገርበት እርግዝናን ተከትሎ የሚመጣው የደም ግፊት በሽታ፣ በሁሉም ማህበረሰብ ላይ ከሚከሰተው ደም ግፊት ጋር በስም ረገድ አንድ አይነት ይመስላል እንጂ በሽታው ግን የተለየ ነው፡፡ በሴቶች የእርግዝና ወቅት የሚከሰተው የደም ግፊት በሽታ፣ እናቶችን ለሞት ከሚያበቁ 5 የጤና ችግሮች ቀዳሚው ነው፡፡ በእርግዝና ወቅት የሚከሰቱ የደም ግፊት በሽታዎች 4 አይነት ናቸው፡፡ ለዛሬ የምናተኩርበት ግን በተደጋጋሚ በሚከሰተው ፕሪለምሽያ በሚባለው ላይ አተኩራለሁ፡፡ ይህ የጤና ችግር የሚከሰተው በ2ኛው የእርግዝና ወቅት አጋማሽ ነው፡፡ የበሽታው ዋነኛ መገለጫ የደም ግፊት መጨመርና በሽንት ውስጥ ፕሮቲን የሚባለው ንጥረ ነገር በብዛት መገኘት ነው፡፡

ጥያቄ፡- የዚህ ጤና ችግር ስርጭት በምን ደረጃ ላይ ይገኛል?
ዶ/ር፡- በዓለም አቀፍ ደረጃ እርግዝናን ተከትሎ የሚከሰተው ደም ግፊት ከ7 እስከ 10 በመቶ የሚሆኑትን እርግዝናዎችን ያጠቃልላል፡፡ በእኛ ሀገር ያለውን ስርጭት በተመለከተ እውነት ለመናገር፣ የችግሩን አገራዊ ስፋት የሚያሳይ የተጠና ጥናት የለም፡፡ ነገር ግን ተቋምን መሰረት አድርገው የተጠኑ ጥናቶች እንደሚያሳዩት የበሽታው ስርጭት ከዓለም አቀፉ ጋር ተቀራራቢ መሆኑን ነው፡፡ ነገር ግን አንድ የማህፀንና ጽንስ ስፔሻሊስት ሐኪም በዕለት ተዕለት የቀን ውሎው ላይ ከሚያጋጥመው፣ የእናቶች ጤና ችግሮች መካከል እርግዝናን ተከትሎ የሚከሰተው ደም ግፊት አንዱና ቀዳሚው ነው፡፡

ጥያቄ፡- መንስኤው ምንድን ነው?
ዶ/ር፡- እስካሁን በአለው ሳይንሳዊ ጥናት፣ በእርግዝና ወቅት የሚከሰተውን ደም ግፊት የሚያመጣው ተጨባጭ ምክንያት አይታወቅም፡፡ ምክንያቶቹ በመላምት ደረጃ ያሉ እንጂ በምርምር የተረጋገጡ አይደሉም፡፡

ጥያቄ፡- አጋላጭ ምክንያቶችስ የሉም?
ዶ/ር፡- አሉ!

ጥያቄ፡- ዋና ዋና የሚባሉትን ብናያቸው?
ዶ/ር፡- ለጤና ችግሩ ተጋላጭ የሚያደርጉ ምክንያቶች በግልጽ ይታወቃሉ፡፡ ዋና ዋና የሚባሉት አጋላጭ ምክንያቶች፣ የመጀመሪያ እርግዝና (የመጀመሪያ እርግዝናቸው የሆኑና ደጋግመው የወለዱ እናቶችን ስናነፃፅር፣ የመጀመሪያ እርግዝናቸው የሆኑ እናቶች ለጤና ችግሩ ይበልጥ ተጋላጭ ናቸው) በቀደመው እርግዝና የደም ግፊት ከነበረ ቀጥሎ በሚመጣው የእርግዝና ወቅት የመከሰት ዕድሉ ሰፊ ነው፡፡ ዕድሜ (ዕድሜያቸው ከ18 ዓመት በታች ሁነው የሚያረግዙና ከ40 ዓመት በላይ የሆኑ ሴቶች የሚያረግዙ ከሆነ ለደም ግፊት በሽታ የመጋለጥ ዕድላቸው ሰፊ ነው)
እንዲሁም የኩላሊትና የስኳር በሽታ፣ ከፍተኛ የሰውነት ክብደት ያላቸው፣ መንታ እርግዝና፣ የዘር ተጋላጭነትና ከእርግዝና በፊት የነበረ የደም ግፊት በሽታ ለጤና ችግሩ ተጋላጭ የሚያደርጉ ዋነኛ ምክንያቶች ናቸው፡፡

ጥያቄ፡- ከአመጋገብና ከአኗኗር ዘይቤ ጋር በተያያዘ፣ እርግዝናን ተከትሎ በሚከሰተው ደም ግፊት የሚያጋልጡ ምክንያቶች የሉም?
ዶ/ር፡- አመጋገብን በተመለከተ እርግዝናን ተከትሎ ለሚመጣው ደም ግፊት፣ በተለየ ሁኔታ ያመጣሉ ተብለው የሚጠቀሱ ምግቦች የሉም፡፡ ነገር ግን የጤና ችግሩ አጋላጭ ምክንያቶች ናቸው ብለን የገለጽናቸው ማለትም ለስኳር፣ ለኩላሊትና ለደም ግፊት በሽታዎች የሚያጋልጡ አመጋገቦችና የአኗኗር ሁኔታዎች አሉ፡፡ ስለሆነም አመጋገባችንና የአኗኗር ሁኔታችን በቀጥታ መንገድ እርግዝናን ተከትሎ፣ ለሚመጣ ደም ግፊት የሚያጋልጥ ቢሆንም በተዘዋዋሪ መንገድ ግን ለጤና ችግሩ የመጋለጥ ዕድልን ሊጨምር ይችላል፡፡

ጥያቄ፡- የበሽታው ምልክቶችስ የትኞቹ ናቸው?
ዶ/ር፡- በሽታው ብዙ ምክንያቶች አሉት፡፡ በእርግዝና ወቅት የደም ግፊት መጨመር፣ ግፊት በነበረባቸው ሴቶች ላይ ደግሞ የደም ግፊት መባባስ፣ ለቀናት የሚቆይ የራስ ምታት፣ የእይታ መደብዘዝ፣ የብርሃን ማንጸባረቅ፣ የላይኛው የሆድ ክፍል ህመም፣ የከፋ ማቅለሽለሽ፣ ማስታወክ፣ የሽንት መጠን መቀነስ፣ የደረት ህመም፣ የአየር ማጣት ስሜት፣ ሳል፣ የፅንሽ መቀጨጭ፣ የሽርት ውሃ መቀነስ፣ የፅንስ እንቅስቃሴ መቀነስ፣ የፅንስ ሆ ውስጥ መጥፋት፣ ሰውነትን ማንቀጥቀጥና ራስን ስቶ መውደቅ፣ በተጨማሪም የላይኛው የሰውነት ክፍል እብጠትና አንዲት ሴት በሳምንት ከ2 ኪሎ በላይ መጨመር ለሽታው መከሰት መሰረታዊ ምልክቶች ናቸው፡፡

ጥያቄ፡- የጤና ችግሩ ከእርግዝና በኋላ የመቀጠል ዕድል ይኖረዋል?
ዶ/ር፡- እርግዝናን ተከትሎ የሚመጣው ደም ግፊት፣ ከእርግዝና በኋላ በሁሉም ላይ ባይሆን በአንዳንድ ሴቶች ላይ አልፎ አልፎ ይቀጥላል፡፡ ነገር ግን ግፊቱን ለመቆጣጠር ከእርግዝና በኋላ የተለያዩ ህክምናዎች ይደረጋሉ፡፡ ሕክምናው ተደርጎ እናትየዋ ከወደለች ከ12 ሳምንት በኋላ ደም ግፊቱ ከቀጠለ እንደማንኛውም ሰው የሚከሰት መደበኛ የደም ግፊት ሁኖ የመቀጠል ሁኔታ አለ፡፡ ሆኖም አብዛኛው በእርግዝና ወቅት የሚከሰት ደም ግፊት ተገቢው የህክምና ክትትል ከተደረገ ከወሊድ በኋላ ይጠፋል፡፡

ጥያቄ፡- በእናትየዋ ላይ የታየው ደም ግፊት ወደ ልጅ ይተላለፋል?
ዶ/ር፡- የመተላለፍ ዕድሉ ጠባብና የለም ሊባል በሚችል ደረጃ ያለ ነው፡፡

ጥያቄ፡- በአግባቡ ያልታከመ ደም ግፊት በሽታ፣ በእናትየዋና በፅንሱ ላይ የሚያስከትለው ጉዳት ምንድን ነው?
ዶ/ር፡- በእርግዝና ወቅት የሚከሰት ደም ግፊት፣ በእናትየዋ ላይ ብዙ አይነት ጉዳቶችን ያስከትላል፡፡ ዋና ዋና የሚባሉትን አለፍ አለፍ ብለን እንያቸው፡፡ በቀዶ ህክምና የመውለድ ዕድልን ያሰፋል፣ ያለጊዜ መውለድ፣ የኩላሊት ሥራ መዳከም፣ የመጣል በሽታ፣ የሳንባ ውስጥ ውሃ መቋጠርና በስተመጨረሻም በእናትየዋ ላይ የሞት አደጋ ያመጣል፡፡ ፅንሱን በተመለከተ ያለ ጊዜ መውለድ፣ የመተንፈሻ ችግር፣ በከፍተኛ ደረጃ ለኢንፌክሽን መጋለጥ፣ በሰውነት ውስጥ የስኳር መጠን መቀነስ፣ የሰውት ሙቀት መጠን አለመጣጣም፣ ቀጭጮ መውለድ፣ የአዕምሮ ዕድገት ውስንነትና በኋላም ሞትን ያመጣል፡፡ ከእነዚህ ሁኔታዎች መገንዘብ የሚቻለው፣ በእርግዝና ወቅት የሚከሰትን የደም ግፊት በሽታ በአግባቡና በወቅቱ መታከም ካልተቻለ፣ በእናትየዋም ሆነ በህፃኑ ላይ ከፍተኛ ጉዳት የሚያስከትል መሆኑን ነው፡፡

ጥያቄ፡- የጤና ችግሩን መኖር አለመኖሩን ለማረጋገጥ የሚደረገው ምርመራ ምንድን ነው?
ዶ/ር፡- በእርግዝና ወቅት የተከሰተ ደም ግፊት በሽታ መኖር፣ አለመኖሩን ለማወቅ የተለየ እውቀትና ቴክኖሎጂ አይጠይቅም፡፡ ሁላችንም በምንለካበት የደም ግፊት መለኪያ ችግሩ መኖር አለመኖሩን ማረጋገጥ ይቻላል፡፡ በእርግጥ የበሽታውን ሙሉ ገጽታ ለማወቅ የደም ግፊት መጠንን መለካት ብቻ በቂ ላይሆን ይችላል፡፡ ግፊት መኖሩን ግን ያረጋግጣል፡፡ ግፊት መኖሩ ከተረጋገጠ በኋላ በሽታው ያለበት ደረጃናንና ሌሎች የጤና ችግሮችን ማምጣት አለማምጣቱን ለማረጋገጥ የጉበት፣ የኩላሊት፣ የደም ፕሮፋይል፣ የልብ፣ የአዕምሮና የመሳሰሉ ምርመራዎች እንደየአስፈላጊነቱ ይካሄዳሉ፡፡ የፅንሱን ጤንነት ለማረጋገጥም የአልትራሳውንድ ምርመራ ይካሄዳል፡፡ በእነዚህ መንገዶች የበሽታውን መኖር ብቻ ሳይሆን በሽታው ያለበትን ደረጃና ያስከተለውን ጉዳት በዝርዝር ማወቅ ይቻላል፡፡ በሀገራችን ደረጃም አቅሙ አለ፡፡

ጥያቄ፡- ህክምናውስ?
ዶ/ር፡- ሶስት ዋና ዋና የህክምና አይነቶች አሉ፡፡ የመጀመሪያው ህክምና መድሃኒትን በመጠቀም የግፊት መጠንን መቆጣጠር እና በቂ የሚባል ደረጃ ላይ ማድረስ ነው፡፡ ሁለተኛው አንቀጥቅጦ ወደሚጥል በሽታ እንዳትገባ ማከም ወይም ተከስቶ ከሆነ ወደተባባሰ ደረጃ እንዳይሸጋገር ማድረግ ነው፡፡ ሶስተኛውና የህክምናው ማጠንጠኛ የሚባለው ልጁ ጊዜው ሳይደርስ እንዲወለድ ማድረግ ነው፡፡ እንግዲህ ለዚህ ጤና ችግር የሚሰጡ ዋና ዋና ህክማዎች ከላይ የተገለፁት ናቸው፡፡ ደም ግፊቱ በተጓዳኝ ያመጣቸው ሌሎች የጤና ችግሮች ካሉ እነሱን የማከም ሥራ ይሰራል፡፡

ጥያቄ፡- እንደገለፁልኝ፣ በእርግዝና ወቅት የሚከሰተው የደም ግፊት በሽታን ለማከም ጥቅም ላይ የሚውሉት መድሃኒቶች ናቸው፣ በእርግዝና ወቅት መድሃኒት መሰጠት ጉዳት የለውም?
ዶ/ር፡- በእርግዝና ወቅት ዝም ብሎ የተገኘውን አይነት መድሃኒት መስጠትም ሆነ መጠቀም አይቻልም፣ አደገኛም ነው፡፡ ነገር ግን በእርግዝና ወቅት የሚከሰት የደም ግፊትን ለማከም የሚያገለግሉ መድሃኒቶች አሉ፡፡ ከእነዚህ መድሃኒቶች ውስጥ በእናትየዋም ሆነ በፅንሱ ላይ ምንም አይነት የከፋ ጉዳት የማያስከትሉ መድሃኒቶች አሉ፤ እነሱን ነው የምንጠቀመው፡፡

ጥያቄ፡- ይሄን የጤና ችግር መከላከል የሚቻለው እንዴት ነው?
ዶ/ር፡- በእርግዝና ወቅት የሚከሰተውን ደም ግፊት አስቀድሞ መከላከል አይቻልም፡፡ ነገር ግን አጋላጭ ምክንያቶች ብለን ከላይ የዘረዘርናቸውን መሰረታዊ ጉዳዮች ማስወገድ ከቻልን በተዘዋዋሪ የጤና ችግሩን መከላከል እንችላለን፡፡ በሌላም በኩል በሽታው ከተከሰተ በኋላም በወቅቱ ህክምና ማድረግ ከተቻለ በሽታው ሊያመጣቸው የሚችላቸውን ውስብስብ የጤና ጉዳቶች መከላከል ይቻላል፡፡ የእናቶችን ሞትንም መቀነስ ያስችላል፡፡

ጥያቄ፡- በማህበረሰቡ ውስጥ ከጤና ችግሩ ጋር በተያያዘ የተሳሳተ አስተሳሰብ ነው የሚሉት ካለ ቢያነሱት?
ዶ/ር፡- በእርግዝና ወቅት የሚከሰተውን ደም ግፊት በሽታ፣ በማህበረሰቡ ውስጥ ከሚከሰተው አጠቃላይ ደም ግፊት ጋር አንድ አድርጎ ማሰብ ይስተዋላል፡፡ ከዚሁ ጋር ተያይዞም ደም ግፊት አለብሽ ተብላ ሲነገራት፣ አጠቃላይ የህክምና ፓኬጅን ከመውሰድ ይልቅ የደም ግፊት መድሃኒት ብቻ ነጥሎ በመውሰድ፣ ግፊቱ ወርዷል ብሎ የማሰብ አዝማሚያ በስፋት ይስተዋላል፡፡ ከዚሁ ጋር ተያይዞም በህክምና ተቋማት በኩል በእርግዝና ወቅት የሚከሰተውን ደም ግፊት፣ እንደማንኛውም ግፊት በመቁጠር በዘፈቀደ መድሃኒት የማዘዝ ድርጊትም ይስተዋላል፡፡ ግፊት መጨመር የበሽታው አንዱ መገለጫ እንጂ የበሽታው ሁለንተናዊ ማለት አይደለም፡፡ ስለሆነም የደም ግፊቱን መጠን ቀነስን ማለት ሴትየዋን አከምን ማለት አይደለም፡፡

ጥያቄ፡- መልክትዎን ልውሰድና ውይይታችንን እናጠቃለው?
ዶ/ር፡- በአጠቃላይ ከእርግዝና ጋር ተያይዞ የሚከሰተው ደም ግፊት የከፋ ጉዳትን የሚያስከትል ነው፡፡ በአንፃሩ ደግሞ በሽታውን በቀላሉ ለማወቅና ለማከም የሚያስችለው አቅም በአቅራቢያችን ያለ ነው፡፡ ስለሆነም ነፍሰጡር ሴቶች በየጊዜው የደም ግፊት መጠናቸውን በምርመራ የማረጋገጥ ልማዳቸውን ቢያሳድጉ፣ ችግሩ ሲከሰትም በፍጥነት ህክምናውን ማድረግ ያስፈልጋል፡፡ እናቶች በጤና ተቋም ክትትል የሚወልዱበትን አቅም እና ልምድ በአገር ደረጃ ለማሳደግ ሁላችንም ድርሻ አለን የምንል አካሎች ትኩረት ሰጥተን መስራት ይኖርብናል ብዬ አምናለሁ፡፡

The post Health: ጽንስ ያለጊዜው እንዲወለድ የሚያስገድደው ደም ግፊት ለእናቶች ሞትም 14 በመቶ ድርሻ አለው ተባለ appeared first on Zehabesha Amharic.

በቅርቡ ሜርሰን ሄልዝ ኤንድ ሳኒቴሽን (Mercen Health and Sanitation Index) የተባለ ተቋም 25 የአለማችንን ከተሞች ቆሻሻ ሲል ፈርጇቸዋል፡፡ ተቋሙ እንደሚለው እነዚህ ከተሞች ንጽህና የሌላቸውና አየራቸው የተበከለ እንዲሁም በውስጣቸው የሚያልፉ ወንዞች በቆሻሻ የተሞሉ ናቸው፡፡ ተቋሙ በቆሻሻነት የፈረጃቸውን የአለማችን ከተሞች በቅደም ተከተል ሲያስቀምጥ የአዲስ አበባ መገኛ ስድስተኛ ደረጃ ላይ ሆኗል፡፡ አስሩ ቆሻሻ ከተሞች በቅደም ተከተል እነዚህ ናቸው፡፡
1.ባኩ (አዘርባጃን)

የአዲስ አበባ ከተማ ገጽታ (ፎቶ ከፋይል)

ወንዞቿ ተበክለዋል፡፡ አየሯ ቆሽሾዋል፡፡ በየጎዳናዎቿ ላይ የወዳደቁ ቆሻሻ ነገሮችን መመልከት ብርቅ አይደለም፡፡ ይህቺ ከተማ ዳካ ትባላለች፡፡ የባንግላዲሽ ርዕሰ መዲና፡፡
በዚህች ከተማ በርካታ ሰዎች በጣም በተጠጋጋ ሁኔታ የሚኖሩ ሲሆን በዚህም ሳቢያ ለበሽታና ለሞት የመጋለጥ እድላቸው ሠፊ ነው፡፡
3. አንታናናሪቮ
(ማዳጋስካር)
የህዝብ ቁጥሯ በፍጥነት እየጨመረ ይገኛል፡፡ በዚህም ምክንያት ከጊዜ ወደጊዜ ለአየር ብክለትና ለንጽህና ጉድለት እየተጋለጠች ነው፡፡ 8ኛዋ አህጉር በሚል
ቅጽል ስም የምትጠራውና በህንድ ውቅያኖስ ላይ የሠፈረችው ማዳጋስካር ዋና ከተማዋ በቆሻሻነት 3ኛ ደረጃ ላይ ተቀምጣለች፡፡
4.ፖርቶ
ፕሪንስ (ሄይቲ)
ከአመታት በፊት ከባድ ርዕደ መሬት ያስተናገደችውና በርካታ ዜጎቿን ያጣችው ብሎም የመሠረተ ልማቷ የወደመባት ሄይቲ ዋና ከተማ ፖርቶ ፕሪንስ ቆሻሻ ናት፡፡ አየሯና ውሃዋ ተበክሏል፡፡ የአየር ብክለትን ለመከላከል የሚደረገው እንቅስቃሴ ደካማ መሆን
ለከተማዋ መቆሸሽ ምክንያት ነው፡፡ በሙስና የሚታሙት የሄይቲ ባለስልጣናት ለህብረተሰቡ ጤና ግድ ያላቸው አይመስሉም፡፡
5.ሜክሲኮ ሲቲ
(ሜክሲኮ)
ደቡብ አሜሪካ ውስጥ ካሉት ዋና ከተሞች ሁሉ የሜክሲኮ ሲቲን ያህል በአየር ብክለት የተጎዳ የለም፡፡ ለዚያም ነው ከተማዋ ሁሌም በጭስ ተሸፍና የምትታየው፡፡
6.አዲስ አበባ (ኢትዮጵያ)
የኛዋ ከተማ አዲስ አበባ አፍንጫችን ይዘን
የምናልፍባቸው አካባቢዎችና ለማየት የሚቀፉ ወንዞችን የያዘች ከተማ ናት፡፡ ከፍተኛ የንጽህና ጉድለት ያለባትና ከክልል ከተሞች እንኳ በእጅጉ ባነሰ ደረጃ ላይ የምትገኘው አዲስ አበባ ከአለማችን ቆሻሻ ከተሞች ጎራ ተመድባለች፡፡ ሜርሰር ሄልዝ እንደሚለው በአዲስ አበባ ለውሃ ወለድ በሽታ የመጋለጥ እድል ከፍተኛ ነው፡፡ ልጆች ያለ እድሜያቸው የሚሞቱትም ለዚህ ነው ብሏል፡፡
7.ሙምባይ (ህንድ)
የህንድ መንግስት የሙምባይ ከተማን የንጽህና ችግር ለመቅረፍና የአየር ብክለትን ለመከላከል 1 ቢሊዮን ዶላር መድቦ እየተንቀሳቀሰ ነው፡፡ ነገር ግን በአሁኑ ወቅት የአለማችን ቆሻሻ ከተሞች ጎራ ከመሰለፍ አላዳናትም፡፡
8.ባግዳድ (ኢራቅ)
የኢራቅ ህዝቦች ችግራቸው ጦርነት ብቻ አይደለም፡፡ በየዕለቱ ድንገት በሚፈነዱ ቦንቦች ብቻ ሳይሆን በውሃ ወለድ በሽታ ጭምር ህይወታቸውን ያጣሉ፡፡ በተለያየ ጊዜ የኮሌራ በሽታ ተከስቶ በርካታ የባግዳድ ነዋሪዎችን ገድሏል፡፡ የተባበሩት መንግስታት የአካባቢ ፕሮግራም እንደሚለው በሚቃጠል ነዳጅና ከጦር መሳሪያዎች በሚወጣ ጭስ ሳቢያ ባግዳድ በአየር ብክለትም የተጎዳች ከተማ ናት፡፡
9.አልማቲ (ካዛኪስታን)
ነዋሪዎቿ ግዴለሽ ናቸው፡፡ የቤታቸውን ቆሻሻ ሁሉ እያወጡ በየመንገዱ ሲወረውሩ እፍረት አይሰማቸውም፡፡ መርዛማ የሆኑ ገዳይ ኬሚካሎችን ሳይቀር በግዴለሽነት በየቦታው ይጥላሉ፡፡ በዚህ ምክንያትም የካዛኪስታንዋ
ከተማ አልማቲ ለኑሮ የማትመች ሆናለች፡፡
10.ብራዛቪል
(ኮንጎ)
የንጹህ መጠጥ ውሃ ችግር ያለባት ብራዛቪል ለጤና የማይመቹ ከሚባሉ ከተሞች አንዷ ናት፡፡ የንጽህና ጉድለትና የአየር መበከልም ሌሎች የከተማዋ ራስ ምታቶች ናቸው፡፡

ምንጭ – ቁምነገር መጽሔት

The post አስሩ የዓለማችን ቆሻሻ ከተሞች appeared first on Zehabesha Amharic.

ውጤቱ የታወቀው ምርጫ ሊካሄድ የመጨረሻው ሳምንት ላይ እንገኛለን። የኢትዬጲያ ህዝብ የምርጫውን ውጤት አስቀድሞ የገመተው በመሆኑ ለሂደቱ ትኩረት ሳይሰጠው በመጠናቀቅ ላይ ይገኛል። በዚህ የመጨረሻ ሳምንት ላይ ተቀምጠን ሂደቱ እንዴት አለፈ ብሎ ለመመርመር ጊዜው ገና ይመስላል። ከዛ ይልቅ በምርጫው እለት ምን ሊሰራ ይችላል የሚለው ላይ አተኩሮ መንቀሳቀሱ የተሻለ ይሆናል። ለጊዜው ሁለት አማራጮች ይታዩኛል።
አማራጭ አንድ: ድምጵ ያለመስጠት፣
ከሚቀርቡት አማራጮች በግለሰብ ደረጃ ከፍተኛ ዋጋ ሊያስከፍል የሚችለው በምርጫው እለት ወደ ጣቢያ ባለመሄድ ድምጵ አለመስጠት ነው። ምንም እንኳን ዋጋው ከባድ ቢሆንም የሚያስተላልፈው መልእክት ከየትኛውም አማራጭ የላቀ ነው። መሰረታዊ የዲሞክራሲና ሰብአዊ መብት በተገፈፈበት፣… የሲቪል ማህበረሰብ ተቋማት በተሽመደመዱበት፣… የገዥው መደብን ፕሮፐጋንዳ ብቻ የሚያስተጋቡ ፕሬሶች የፓለቲካ ምህዳሩን በሞሉበት፣ …የብእር አርበኞችና የሀይማኖት ነጳነት ታጋዬች በአሸባሪው የፀረ ሽብር አዋጅ በተከሰሱበት፣ …ገዥውን መደብ በተወሰነ መልኩ ሊገዳደሩ የሚችሉ የፓለቲካ ፓርቲዎች በፓለቲካ ውሳኔ ተላልፈው በተሰጡበት… ወዘተ ሁኔታ የምርጫ ካርድ ተሸክሞ ወደ ምርጫ ጣቢያ መሄድ የሞራል ጥያቄ ማስነሳቱ የማይቀር ሀቅ ነው።
ስለዚህ ድምጵ የምሰጠው ምን ፈልጌ ነው? ምን ለማትረፍ ነው? ከላይ የተጠቀሱት መሰረታዊ ችግሮች በእኔ ድምጵ ሊሻሻሉ ይችላሉ ወይ? የሚሉ ቁምነገሮችን በማንሳት ምላሽ መስጠት የዚህ ሳምንት ቁልፍ ጥያቄ ይሆናል።
በመጀመሪያ ምርጫ ተመዝግቦ ድምጵ ያለመስጠት ልምድ ከዚህ በፊት በነበሩት ምርጫዎች ተከስቶ እንደሆነ መመልከቱ አስፈላጊ ይሆናል። ሩቅ ሳንሄድ የዛሬ አምስት አመት (2002 አም) በተካሄደው ምርጫ መቼም ልቡን ለኢህአዴግ ሰጥቶ የማያውቀው የአዲሳአባ ህዝብ ተግብሮታል። ለዚህ ማስረጃ የሚሆን አንጋፋው ፓለቲከኛ ፕሮፌሰር መስፍን ወልደ ማርያም በ2003 አም ” ሥልጣን ፣ባህልና አገዛዝ ፣ ፓለቲካና ምርጫ” በሚለው መጵሀፋቸው በግልጵ አመላክተዋል። ፕሮፌሰሩ የምርጫ 2002 ዋና ተዋንያኖች በሚተርኩበት ክፍል በገጵ 156 ላይ የክልሎቹን ህዝብ ብዛት፣ ለምርጫው የተመዘገቡና የመረጡትን በሰንጠረዥ አሳይተዋል። በዚህም መሰረት በአዲሳአባ እመርጣለው ብለው ከተመዘገቡት ውስጥ ወደ ምርጫ ጣቢያ በመሄድ የመረጡት 43•8% ብቻ ናቸው። በሌላ አነጋገር ለምርጫ ከተመዘገቡት 100 ሰዎች ውስጥ 56 ያህሉ አውራ ጣታቸው ላይ ቀለም አላረፈም። ወይም ምርጫ ካርዳቸውን ቀዳደው ጥለዋል።
በማስከተል ድምጵ ያለመስጠት ውጤታማ የሚሆነው በየትኛው አካባቢ ነው? የሚለውን ጥያቄ እንመልከት። ከልምድ በመነሳት የተቃዋሚ ፓርቲ እውነተኛ ታዛቢ በሌለባቸው፣ ገጠራማ አካባቢዎችና እንደ አፋር፣ ሱማሊያ፣ ጋምቤላ፣ ቤኔሻንጉል፣ ትግራይ የመሳሰሉ ክልሎች ድምጵ ያለመስጠት ብዙም ትርጉም የለውም። በእነዚህ “ተው ባይ” በሌለባቸው አካባቢዎች ምርጫው ከመካሄዱ በፊት ተለዋጭ ኮሮጆ የመዘጋጀት እድሉ ሰፊ ነው። የማቅለሙም ስራ አስቀድሞ ይጠናቀቃል። የገዥው ፓርቲ ተወዳዳሪዎች የአካባቢው ህዝብ ባጠቃላይ በአስር እጥፍ ተባዝቶ የሚያክለውን ያህል ድምጵ ያገኛሉ። ለዚህ ማሳያ የሚሆነው አሁንም የፕሮፌሰር መስፍን መጵሀፍ ይሆናል። ሁሉም እንደሚያውቀው በምርጫ ህጉ መሰረት አንድ የምርጫ ወረዳ የሚዋቀረው በምርጫ ወረዳው እስከ መቶ ሺህ ህዝብ ( ህጳናት፣ ወጣቶች፣ አዋቂ በሙሉ) ሲኖር ነው። በማእከላዊ ስታስቲክስ መረጃ መሰረት በኢትዬጲያ ከ15 አመት በታች የሚሆነው ሕዝብ ቁጥር 45•2% ያህል ይሆናል። ይህ ማለት በአንድ ምርጫ ክልል ለመምረጥ እድሜው የደረሰ በሙሉ ተመዝግቧል ቢባል ብዛቱ ከ50 ሺህ በታች ይሆናል። ይህን ታሳቢ አድርገን ጋሽ መስፍን በገጵ 157 ላይ ” አስገራሚ የምርጫ ውጤት” በሚል ርእስ የ25 ሰዎች ከመቶ ሺህ በላይ ድምጵ ማግኘታቸውን በሰንጠረዥ አሳይተዋል። ከዚህ ውስጥ ፊልቱ ወረዳ የተወዳደሩት አቶ ኡስማን አለ መላ 368, 211 ፣ ጂጂጋ ምርጫ ክልል አቶ አሊ ኡመር አለሌ 213,288፣ አሁንም ጅጅጋ አቶ አብዱልፈታህ አብድላሂ 246,782 የሚያህል ድምጵ አግኝተዋል። በመሆኑም እንደዚህ አይነት ቦታዎች ላይ ድምጵ መስጠትም ሆነ አለመስጠት የሚያመጣው ለውጥ የለም።
( በነገራችን ላይ የእነ ኡስማንን አስገራሚ ውጤት ስመለከት በጭንቅላቴ የሚመጣው አርቲስት ታማኝ በየነ በአንድ ወቅት በአዲሳአባ ስቴዲዬም ያቀረበው ቀልድ ነው። በወቅቱ በጫካ መሽገው ኢህአዴግ ስንት የኢትዬጲያ ወታደሮች እንደገደለ በሬዲዬ የሚናገሩት ፍሬህይወት ( በአሁን ሰአት የአዲሳአባ ፓርላማ እጩ) እና ሴኮቱሬ ጌታቸው ነበሩ። በየቀኑ 50ሺህ፣ 100ሺህ ገደልን የሚለው የእነ ሴኮ ብስራት ያልተዋጠለት ታማኝ ” እነዚህ ሰዎች ከነገው ትውልድ ተበድረው ይገላሉ ወይ?” የሚል ቀልድ አንስቶ በታሪክ ተመዝግቦለታል። በንጋታው የሬዲዬ ጣቢያውን የተረከበው ሴኮቱሬ ” ታማኝ! ሂሳቡን ስንመጣ እናወራርዳለን” ብሎት ነበር።

አወራርደው ይሆን??)
አማራጭ ሁለት: የድምጵ መስጫ ወረቀቱን የተቃውሞ መግለጫ ማድረግ ይህ አማራጭ ከግለሰብ ደህንነት አንጳር አስተማማኝ ተደርጐ ሊወሰድ የሚችል ነው። ይህን እርምጃ ሊወስዱ የሚችሉ ሰዎች በአንድ ለአምስት መዋቅር ውስጥ ተጠርንፈው መላወሻ ያጡ ግን ደግሞ ገዥው መደብንም ሆነ ተቃዋሚዎችን ለመምረጥ ፍላጐት የሌላቸው መሆናቸው አይቀርም። ከዚህ በተጨማሪም አንዳንድ የአንድነት፣ መኢአድና የትጥቅ ትግል አማራጭን የሚደግፋ ግለሰቦች በዚህ ማእቀፍ ውስጥ ሊካተቱ ይችላሉ ( በኢህአዴግ ኔትወርክ “C” እና ” D” ደረጃ የተሰጣቸው)። በተለይ ባለመምረጣቸው የስራ ዋስትና የማጣት እጣ ፋንታ የሚያጋጥማቸው ነዋሪዎች ወደ ምርጫ ጣቢያ በመሄድ ወረቀቱን የተቃዉሞ መግለጫቸው ቢያደርጉት ይመረጣል።
ቀጥሎ የሚመጣው ጥያቄ ወረቀቱ ላይ የሚሰፍረው የተቃውሞ መልእክት ምን ይሁን የሚለው ይሆናል። በመጀመሪያ ደረጃ በተቻለ መጠን መልእክቱ ወጥ እንዲሆን ማድረግ ነው። በተለይም የቡድን ጥያቄ ያላቸው ማህበረሰቦች የጋራ ፍላጐታቸውን የሚያሳይ የተቃውሞ መልእክት ( ምስልን ጨምሮ) ሊነድፋ ይችላሉ። ለምሳሌ የሙስሊሙን ንቅናቄ የሚመሩ አመራሮች ከዚህ ቀደም እንዳደረጉት ” ፍትህ” ፣ አሊያም ” የጨረቃ ምስል” የሚያሳይ እንዲሆን ማድረግ። የኦርቶዶክስ ተከታዬች ሰሞኑን የታረዱ ወንድሞቻችንን ለመዘከርና መንግስት በቤተክርስቲያኗ ላይ የሚያደርሰውን ጣልቃ ገብነት ለመቃወም ” የመስቀል ምልክት” አሊያም ተዛማች ነገሮችን ማድረግ። ለውጥ የሚመጣው በትጥቅ ትግል እንደሆነ የሚደግፋ ነዋሪዎችም በተመሳሳይ መንገድ ወጥ መልእክት ወይም ምልክት የሰፈረበት ወረቀት ወደ ኮሮጆ እንዲጨምሩ ማድረግ ያስፈልጋል። ይቻላልም።
ተቃዋሚ ፓርቲዎች፣
በምርጫው የሚሳተፋ የተቃዋሚ ፓርቲዎች በሁሉም ጣቢያዎች ታዛቢዎቻቸው እንዲገኙ ማድረግን መናገር ለቀባሪው ማርዳት ይሆናል። ሆኖም ግን በቂ ኦረንቴሽን ሰጥቶ ማሰማራት መታለፍ የሌለበት ነው። በ2002 የነበረው አንድ ችግር የተበላሹ ወረቀቶች ጣቢያው ላይ በሚገኙ ታዛቢዎች ስምምነት እንዲቆጠሩና ድምጵ አልባ እንዳይሆኑ ተደርጐ ነበር። ይህ የሚጠቅመው ገዥው መደብን ብቻ ነው። በመሆኑም የተቃዋሚ ፓርቲ ታዛቢዎች ለፓርቲያቸው ድምጵ ከመቆጣጠር ተሻግረው የተበላሹትንም መቁጠርና በፈርጅ በፈርጁ ማስቀመጥ እንደ ዋና ስራቸው መውሰድ ይኖርባቸዋል። ይህንንም ለፓርቲያቸው በፍጥነት ሪፓርት ማድረግ ይኖርባቸዋል። ጭማቂውን መሰረት አድርገው የተቃዋሚ ፓርቲ አመራሮች በምርጫው ማግስት ሰላማዊ ሰልፍ ቢጠሩ ደግሞ ትግሉን ወደ ሌላ ምእራፍ ያሸጋግሩታል። ውሳኔው የራሳቸውና የራሳቸው ብቻ ቢሆንም!!

The post የተግባር ሳምንት – ኤርሚያስ ለገሰ appeared first on Zehabesha Amharic.

“የተራቡትን  መርጠን ከምንቸገር ያው የጠገበው ይሻለናል” የሚል መልክት ያላት ማዘናጊያ ሀሳብ በየፌስ ቡክ ላይ ተበትናለች። ሲጀመር በልቶ ጠገብኩ የሚሉ መቼ ነገሱብንና። በዛ ላይ ያለአባከና በሰፊው የለመደ ሆድ ለሌላ አምስት አመት ከበሉን ለመረጃ እንኳ  አጥንታችንም  አይጋኝም አትቀልዱ። የሚኖር አይመስለኝም እንጂ  በዚህና “ድምጽ መሰረቁ ላይቀር” አይነት አንድምታ ባላቸው ምክንያቶች ተንተርሶ ለወያኔ ድምፁን የሚሰጥ ካለ በቁሙ የሞተ ነው። ውጤቱ ምንም ሆነ ምንም እሱና አምላኩ ብቻ በሚያውቁት መደበቂያ ውስጥ ሆኖም እንኳ የማነበትን ማድረግ ካልቻለ “ሙትቻም” ያንሰዋል።

በተመሳሳይ ተቃዊሞዎች ሰርተውት፤ አድርገውትና፤ ሆነውት ቢሆን ስንል የምናነሳቸው ሀሳቦች በሙሉ እዚህ ጊዜ ላይ ሲደርስ ለጊዜው የግድ የሆነ ቦታ አስገብተን ልንቆልፍባቸው ግድ ይላል። በይበልጥም  ካለንበት ተጨባጭ አገራዊ እውነታ አኳያ ድምጻችንን ለመስጠት መሰረት የምናደርገው ድርጅቶች የላቸው አገራዊ  እቅድ፤ ጥቅላላ ጥንካሬያቸውና ያሳዩት ቁርጠኛነት  እንዲሁም  ፖለቲካዊ ፍላጎታችን ብቻ ከሆነ ብዙ ተቃዋሚ ለምርጫ በቀረቡበት ድምጻችንን ስለሚከፋፈል አሁነም  ወያኔ ተጠቃሚ ሊሆንበት የሚችልበት ጎን አለው። እንደምንመርጥበት ክልል ፤ በምንመርጥበት ጣቢያ እንደቀረቡት ተቃዋሚ እጩዎች አይነትና ብዛት፤ ያእጩው ጥሩ ግለሰባዊ ስብእና ባጠቃላይ ለመመረጥ ያለ የተሻለ እድል፤ በምንመርጥበት አካባቢ ነዋሪ የሆነው የበዛው የማህበረሰባችን ክፍል ፖለቲካል ዝንባሌና ፍላጎት የመሳሰሉ ቁም ነገሮችን ግምት ውስጥ አስገብቶ ድምጻችንን መስጠቱ ላሁኑ አዋጭ ብልጠትም ያለበት ያደርገዋል።

ይህን የምለው ተቀናቋኝ ድርጅቶች በአንድ ሆነው ለምርጫው ባይቀርቡም ዜጎች ከውስጣቸው አንዳቸውን  ብቻ ምርጫ አድርገው ሊያወጡ የሚችልበት ነባራዊ ሁኔታ ቢኖር ኖሮ እመክረው ነበር። ባስበው ባስበው ላሁኑ የሚቻል አይደለም ወይ ስላልታየኝ ነው። ወደ ሁለት ማጥበብ ግን ይቻላል። ያም ሆኖ በድርጅትም ሆነ በግለሰብ ደረጃ ከፍላጎት በዘለለ የሚቻልበት መሬት የረገጠ በቂ ነባራዊ ሁኔታ አለ የሚል ካለ ሀሳቡን ወደ ህዝብ  ሊገፋው ጊዜው አሁን ነው።

በግልፅ ማስቀመጥ ያስፈልጋል። በአገራችን ጥርት ብሎ የወጣ በግልፅ ለማናችንም የሚታይ ሁለት አይነት ፖለቲካዊ ፍላጎቶች አሉ። እነዚህን ፖለቲካዊ ፍላጎቶች ሙሉ በሙሉ አይወክሉም ሊሉ የሚችሉ ሊኖር ቢችሉም በበቂ የያዣቸውና ጎልተው የወጡ ሁለት ተቀናቃኝ ድርጅቶች አሉ። ሰማያዊ ፓርቲና መድረክ። ላማሸነፍና ለውጥ ላማምጣት ድምጻችንን የምንሰጥ ከሆነ በመጀመርያ ሌሎቹን በሙሉ ላሁኑ እንደሌሉ አድርገን እንነሳ። በሁለተኛ ደረጃ  ሰማያዊና መድረክንም ምርጫዎቻችን ለማድረግ የምናፎካክር ከሆነም አሁንም ሂደቱ ወያኔን ይጠቅማልና ድምፅ ለመሰጠት የምንወስንበት ሌላ አይነት ስሌት ልንቀምር የግድ ይገባል።

አዲስ አበባ፤ አማራ ክልል፤ ማህበረሰባዊ ስብጥራቸው ከፍተኛ የሆነ ትላልቅ ከተሞች ላይ በሙሉ ለሰማያዊ ፓርቲ ያለ ድጋፍ በዝቶ እስከታየ የመድረከም ሆነ የሌሎች ፓርቲ ደጋፊዎች ድምጻችሁን ለሰማያዊ ፓርቲ ምንም ሳታንገራግሩ  ስጡ። ብልጥ ለሆነና ጨዋታው ለገባው ሰማያዊ ፓርቲ የሚኒልክን ስርአት ሊመልስ ነው ተብሎ የተነገረውና ያመንንም ብንኖር። እንዲሁ የመድረክ ደጋፊዎች በብዛት ያሉበት አካባቢ ሆኖ የመድረክ እጩ ከሌለ ለሰማያዊ በመቀጠል ለሌሎች ተቃዋሚ ፓርቲዎች በደረጃ ባበረ መንገድ ድምጻችሁን ለመስጠት ዶልቱ።

ሌላህም ከአዲስ አበባ ውጪ የመድረክ እጩ ቀርቦ ሰማያዊ ፓርቲ እንደማያሸንፍ እያወክ ድምፅህን ለሰማያዊ ፓርቲ ብጭራሽ አትስጥ። ድምፅችንን በተባበረ ምንገድ ለመድረክ ለመስጠት እንዶልት። አሁን ያለውን ፌደራላዊ አከላል አምርረህ የምትቃወምም ቢሆን። በአማራ ክልልና በትላልቅ ከተሞች የሰማያዊ ፓርቲ እጩ እስካለ ሳታንገራጋር ለሰማያዊ ፓርቲ ድምጽህን ስጥ። የሰማያዊም የመድረክም እጩ ከሌለ ብቻ ለመኢአድ ከዛም ለሌሎች ተቀዋሚዎች በደረጃ ድምጽህን ስጥ።

ባጠቃላይ የትኛውም ተቀናቃኝ እጩ እንደማያሸንፍ እያወክ እጩው ወንድምህ ወይ እህትህም ብትሆን የፈለከውን ያህል የድርጅቱ አፍቃሪ ብትሆን ድምፅህን አትስጣቸው። ምክንያቱም ላሁኑ ፋይዳ የሌለው ነው። እንደውም በመጨረሻ ውጤቱ የምንጎዳበት ነው የሚሆነው። ወያኔን ለማዳካም ህዋዋትን ማዳካም ብቻ ሳይሆን ተለጣፊዎቹንም ማዳከም ግድ ይላል። ድምፅህን ለሰማያዊ ከምትሰጥ ለኦፒዲዬ ስጥ አያዋጣም። ይህን የሚሉት አንድም የመራራ ጠንክሮ መውጣት ያስፈራቸው ወያኔዎች ወይ ትግሉን ኦሮሞ ከሌላው ኢትዬጵያዊ ጋር በማድረግ አደጋውን ሳያዩ ጠብ የሚል ትርፍ ይኖራል ብለው በተሳሳተ መንገድ የሚያሰሉ ናቸውና አትስማ።

በዚህኛው ስሌት ከተንቀሳቀስን ብቻ ሲጀመር በየግል መንግስት ለመመስረት የሚበቃ እጩዎችን ያላቀረቡ ቢሆንም የሰማያዊና የመድረክን እጮዎች በሙሉ አሸናፊ ለማድረግ ይቻለናል። በሁኔታዎች ተገደው ጥምር መንግስት ለማቆም ያሚያስችላቸውን እድል መፍጠር እንችላለን። በዛ ላይ ፖለቲካዊ ወገንተኛነታችንና ፍላጎታችን ሰላማዊ ህጋዊና መንግስታዊ በሆነ አግባብ በትክክል እንዲወከል አደረግን ማለት ነው። ዘላቂነት ባለው መንገድ ዲሞክራሲን ባገራችን ለማስጀመር ይህን ወሳኝ የሆነ ስራ ከወንን ማለት ነው።

ይህ ስሌት ተግባራዊ እንዲሆን የሰማያዊና የመደርክ አመራሮች በጋራ የሚሰሯቸው ፖለቲካዊ ስራዎች ቢኖሩ ጥሩ ነው። ያም ካልተቻለ ካመራሮቹ የሚመጡ አመላካች ንግግሮች አጋዥነታቸው አሌ አይባልም። ተሰሚነት ያላቸው ግለሰቦችም ሆነ ድርጅቶችና ሜዲያዎች ይህን አይነት ስሌቱ ምርጫው ከሚደረገብት ጠቅላላ አገራዊ ሁኔታ አኳያ ማለፊያ ነው በሚል ቢደመጡ እንዲሁ ያግዛል።

The post ድምፅ አሰጣጣችን በምን ሰሌት ቢሆን ያዋጣል? – ዳዊት ዳባ appeared first on Zehabesha Amharic.

ከአረአያ ተስፋማርያም

“አትቀስቅሱኝ!”
በምዕራብ ዲሲ አቅጣጫ ማለዳ ላይ ስናልፍ ከወደጥግ አንድ ኩርምት ብሎ የተኛ ሰው አይናችን ገባ። በ50ዎቹ አጋማሽ የሚገመት ሃባሻ ወገን ነው። አቶ አምሳሉ ይባላል። የውስጡን ጉዳት ገፅታው ያሳብቃል።

..አንድ ልጅ ካፈራችለት የ30 አመት ፍቅረኛው ወይም የትዳር አጋሩ ያላሳበው በደል እንደተፈፀመበትና ለጐዳና ህይወት እንደዳረገው ይናገራል። ብዙም ማውራት የማይፈለገውና ተስፋ የመቁረጥ ሁኔታ የሚታይበት አቶ አምሳሉ ከባለቤቱ ጋር ያለያያቸው ድንገት በአደጋ የተገኘ ጠቀም ያለ የኢንሹራንስ ገንዘብ እንደሆነ ይናገራል። አሜሪካ ያስመጣቸው የባለቤቱ እህትና ወንድም እንዲሁም አንዲት ዘመዷ አባሪና ተባባሪ በመሆን እንዲሁም «ሊገድላትና ሊደፍራት ሲል አይተናል» ብለው በሃሰት በመመስከር ትዳሩን እንደበተኑትና በቁም እንደገደሉት ይገልፃል። የ21 አመት ልጁ በአባቱ በተፈፀመው በደል ተበሳጭቶ ሌላ ከተማ ሄዶ እንደሚኖርና የት እንዳለ እንደማያውቅ አምሳሉ ይጠቁማል።

« የ30 አመት ፍቅሬ ሊደፍረኝ…አለችኝ። ይገርማል! ጭራሽ ሊገድለኝ አለች!..በ30 አመት አንድ ቀን እጄን አንስቼባት አላውቅም! አንድ ቀን ሌላ ሴት ጋር ሄጄ አላውቅም! አሳሰረችኝ። አስፈረደችብኝ። ህይወቴን አመሳቀለችው» በሃዘን ስሜት ተወጦ ..ተመልሶ ለመተኛት ያደፈች አንሶላውን ወደፊቱ ጣል እያደረገ « እባካችሁ ተውኝ! አትቀስቅሱኝ! ሞቻለሁ!..»

The post በ30 ዓመት የትዳር አጋሩ የተነሳ በዋሽግንተን ዲሲ የጎዳና ተዳዳሪ ለመሆን የበቃው ኢትዮጵያዊ appeared first on Zehabesha Amharic.

በሕወሓት የበላይነት የሚተዳደረው የኢሕአዴግ አምባገነናዊ አገዛዝ ላለፉት ሃያአራት አመታት እጅግ ከፍተኛ ወንጀሎችን በሕዝብ ላይ በመፈጸም ንጹሃንን በማሰር ሰርቶ አገር ሊለውጥ የሚችለውን ትውልድ በማሰደድ እምቢኝ ያሉትን በመግደል…በተከታታይ እና በተደጋጋሚ በሚፈጽማቸው አሰቃቂ ግፎች ስልጣን ላይ ለመቆየት በሚያደርገው ትንቅንቅ እጅግ ዘግናኝ ታሪክ ይቅር የማይለው ወንጀል በዜጎች ላይ ፈጽሟል እየፈጸመ ነው::ወንጀል መፈጸሙ ሳያንሳ የራሱን የደም እጆች በሌሎች ላይ ለማቀባባት በመሞከር ራሱን ነጻ ለማውጣት የሃሰት ፕሮፓጋንዳ ቢረጭም አልተሳካለትም::

እያንዳንዳችን ከበፊቱ በተሻለ መልኩ ቆም ብለን ልናስብበት የሚገባ እድሎችን በመተቀም ለዘላቂ መፍትሄ ራሳችንን በማዘጋጀት እንዲህ አይነቱን አምባገነን መንግስት ልናስወግድ ይገባል::እስከዛሬ በሰቀቀን እና በ እ ህ ህ ያሳለፍነው ዘመናችን ችግሩ ማነው ብለን ልናጤነው እና ችግሩን በዘላቂነት ልናስወግድ የዜግነት ግዴታችን ነው::የወያኔው ስርአት በፈጠረው የኢኮኖሚ ፖሊሲ ግድፈት ሕዝቦች በከፍተኛ ደረጃ በኑሮ ውድነት ከመሰቃየታቸውን አልፎ ጥቂት የባለስልጣናት እና የዘመዶቻቸው ቱጃርነት የብዙሃን ድህነት ሲንሰራፋ ሙስና የስር አቱ ዋና መገለጫ መሆኑ የአደባባይ ሃቅ ነው::የኢኮኖሚ ፖሊሲው ኑሮ ውድነትን ብቻ ሳይሆን ስራ አጥነትንም በሰፊው አንሰራፍቷል::የዚህ ስራ አጥነት የፈጠረው ችግር ትኩሱን የስራ ሃይል ወደ ሰው አገር ከመሰደዱም በላይ ከፍተኛ ብሄራዊ ውርደትን አስከትሏል::

በመላው ኢትዮጵያ መብራት፣ ውሃና ኔትወርክ የለም የለም ብቻ ሳይሆን ላለመኖሩ ሰበብ ከሚፈጥር ውጪ ችግሩን የሚፈታ መንግስት የለም::በመላው አገሪቱ በተለይ በከተሞች አከባቢ የመንግስት ሰራተኞች ተማሪዎች የግል ተቀጣሪዎች በትራንስፖርት ችግር እየተንገላቱ ነው:ለዚህም መፍትሄ የሚሆን ነገር የሚያመጣ መንግስት ስለሌለ ሕዝቡ ራሱን እያስተዳደረ መሆኑ እሙን ነው::በጉልበት የሕዝብን ስልጣት ይዞ አለቅም ያለ ፓርቲ የመልካም አስተዳደር ችግር በመፍጠሩ ሕዝብ አቤት የሚልበት እና ችግሩን የሚፈታበት ቦታ በማጣቱ ቤቱ ተቀምጧል::በኢትዮጵያ ውስጥ የሚገኙ ነጻ ሚዲያዎች በነጻነት መንቀሳቀስ ባለመቻላቸው ግማሹ ለስደት ግማሹ ለእስር ግማሹ ለሞት ግማሹ ሰርቶ እንዳይበላ ተደርጎ በአምባገነኖች ተኮላሽቷል::ተቃውዋሚ የፖለቲካ ፓርቲዎች ይሁኑ የሲቭክ ማህበራት የበጎ አድራጎት ድርጅቶች በሚፈለገው መልኩ በነጻነት መንቀሳቀስ አልቻሉም::ይህ ሁሉ የፈጠረው የስር አቱ ፖሊሲዎች በርካቶችን ለሞት እና እስር እንዲሁም በርካታ ዜጎች ህይወታቸውን ለአደጋ በሚዳርግ መልኩ እየተሰደዱ ነው፡፡ ከዚህም በላይ ለቁጥር የሚታክቱ ምሬቶችና አቤቱታዎች ከየአቅጣጫው በየጊዜው ይሰማሉ፡፡

ያለው ስርአት በሃገር እና በሕዝብ ላይ የሚከሰቱ ችግሮችን በፍጹም እንደማይፈታ የታወቀ ነው::ከመፍታት ይልቅ በሰበብ እና በሌሎች ላይ በመላከክ ስለተጠመድ የህዝብን አቤቱታ መስማት በፍጹም ፍቃደኛ ባለመሆኑ ባለፉት 24 አመታት ባለበት ዛቢያ እየዞረ ምንም ነገር ስላለወጠ ካለ አዙሪት ለመውጣት የወያኔን የሰከረ ፖለቲካዊ ስርአት በሰበብ እና በሌሎች ላይ የሚላከኩ ጉዳቸውን አሸክሞ ከኢትዮጵያ ማስወገድ ችላ ሊባል የማይገባ ወሳኝ ወቅት ላይ ስለሆንን አፋጣኝ እርምጃዎችን በመውሰድ በሕዝባዊ አመጽ በአንድነት ስርአቱን ታግለን ልናስወግድ ግዴታ አለብን::

The post ሃያአራት አመት ጊዜ ያለወጠው አዙሪት! ከአዙሪት ለመውጣት .. (ምንሊክ ሳልሳዊ) appeared first on Zehabesha Amharic.

ተስፋ በሞግዚት አይገኝም ወይንም በሞግዚት አይተዳደርም የድርሻን በመወጣት – እንጂ። እኔ ተስፋ ፈላጊዋ ተስፋዬን ለማግኘት ተስፋዬን ለማስጣት ከሚተጉት ማናቸውም ጉዳዮች ጋር መፋለም ግድ ይለኛል።

ከሥርጉተ ሥላሴ 17.05.2015 / ሲዊዘርላንድ – ዙሪክ /

„መዳህኒቴ፡ እና፡ ክብሬ፡ በእግዚአብሄር፡ ነው፤ የረድኤቴ፡ አምላክ፡ ተስፋዬም፡ እግዜአብሄር፡ ነው።“/ መዝመር 61 ቁጥር 7/

ከሥርጉተ ሥላሴ 02.023.2014 (ሲዊዘርላንድ – ዙሪክ)

ወራቱን አላስታውሰውም „ግንቦት ሆይ“ የሚል ጹሑፍ ከዚኽው ከዘሃበሻ አግኝቼ አንብቤ ነበር። በወቅቱም መልሱን ጽፌ ነበር። የከተማ ሽምቅ ውግያም ሆነ ተናጠላዊ የበቀል ወርክሾፕ ለእኔ የማይመቸኝ ስለነበር። ነገር ግን ቀደም ብሎ የእኔ ሌላ ጹሑፍ በወጣልኝ ባላተራራቀ ጊዜ ስለነበር ወረፋ የሚጠብቁትን ስለተጋፋ – አልወጣም። ስለዚህም ዘሃበሻንም ተወቃሽ አያደርገውም። ነገር ግን በራዲዮ ፕሮግራሜ – ሰርቸዋለሁ። ሌላ ጊዜ ደግሞ ወጣት ጃዋርን ይቅርታ የጠዬቀ ጹሑፍ ከረንት ላይ አነበብኩኝ። እርእሱን አላስተውሰውም። በህይወቴ አንብቤ ያልገባኝ የመጀመሪያው ጹሑፍ ነበር። ስለሆነም ከሥር ያሉትን አስተያዬቶችን ማንበብ ግድ ስለነበር እንደ እኔ ያልገባቸው ሰዎች መኖራቸውን ሳገኝ ብቻዬን አለመሆኔን አረጋገጥኩኝና – ተጽናናሁ።

የገጣሚ ወጣት ሄኖክ የሺጥላ ሥነ ግጥም መጸሐፉን ወዳጄ በገንዘቧ ገዝታ ልካልኝ በውስጡ መደዴ ያልሆኑ ረቂቅ ግጥሞችን – አንብቤያለሁ፤ መግቢያው እጅግ ጥልቅ ትንተና ኖሮት የመጸሐፉ እርእሱ ግን በፍጹም ሁኔታ ያልተመቸኝ ነበር። እስካሁን ድረስ – አልገባኝም። ገዝታ ለላከችልኝ እህቴም ነግሬያት ነበር። በወቅቱ አድናቆታቸውን የገለጹለት ታዋቂና ተደማጭ ወገኖቼን ሳስብ ከእኔ የተሻለ ግንዛቤ እንዳላቸው ተረዳሁ። የሆነ ሆኖ አሁንም የሥነ ግጥሙ መጸሐፍ እርእስ አልገባኝም ብቻ ሳይሆን አልተመቸኝም።

ባለፈው ሳምንት ታናሼ በዕድሜ እንጂ በፖለቲካ ደረጃ ወይንም በሥነ ግጥም መክሊት ማለቴ አይደለም ደረጃዬ ከእሱ ጋር ለመመጠን ብዙ መሥራት እንደ አለብኝ  በሚገባ አውቃለሁኝ። ወንድም ገጣሚ ሄኖክ የሽጥላ ፌስ ቡኩ ላይ የለጠፈውን ዘሃበሻ ላይ አነበብኩኝ። ገብቶኛል። ስለዚህም መልስ ልሰጥበት ወደድኩኝ። „ተስፋ ሳይኖር ተስፋ መቁረጥ: የተስፋ ቢሶች ተስፋ ( ሄኖክ የሺጥላ )“ http://www.zehabesha.com/amharic/archives/41302

ወጣትነት በራሱ ተስፋ ነው አባቱ! አንተ በራስህ ለትውልዱ የተስፋ ቤተኛ ብቻ ሳትሆን የተስፋ መሪም ነህ – እኔን ሲገባኝ። አንተ አኮ ደረጃህ ከፍ ያለ ብቻ ሳይሆን የተደማጭነትህ ዕሴትም ከእርከኑ በላይ። ስለምን? ተስፋ ስለሆንክ። ስለዚህም ክብር ስጠው። እግዚአብሄር አምላክ ዬሥነ ጥበብ ማዕደኛ ማድረጉ ብቻ ሳይሆን ያንተን ያህል ግርማና ሞገስ ያላገኙ ብቁዎችም እንዳሉ ማሰብም ያለብህ ይመስለኛ። እንዲሁም አንተ በምትገኝባቸው የህዝብ አደባባዮች በዕድሜ፣ በዕውቀት – ደረጃ፤ በተምክሮ ልቅና የሚበልጡህ ከመቃጫቸው ብድግ ብለው አቀባባል ማድረግ ብቻ ሳይሆን ሁለመናቸውን ለአንተ ለግሰው መንፈሳቸውን ይሸልሙኃል። አድማጭ ማግኘት ነው የሥነ ጥበብ ሰው ሃብቱ በለው ህልሙ፤ ህልሙ በለው ድሉ። „ፍቅር“ ለዛውም የህዝብ ሲታደሉት ብቻ የሚገኝ ዕንቁ ነው – ለመንፈስ። ሥነ ጥበብ ከነታዳሚዋ በሯን በዚህ ቀንበጥ ዕድሜው የከፈተችለት ዕድለኛ ወጣት እኮ ነህ። ልዑል እኮ ነህ አንተ – ለዘመኑ። ሥጦታውን፤ አጋጣሚውን ሆነ ተደማጭነቱን አታቅልለው። በዕድሜያቸው የአንድ ስንኝ ዘለላ ትንፋሽ አንደበት መስኮት አጥተው የቀሩ ሊቃናት ዓለማችን ነበራት – አላትም። በህይወት እያሉ ባሊህ ባይ አጥተው ግን ካለፉ በኋላ ዓለም የምትዳደርበት ሥነ ፈለግ ሰርተው ሸልመውን – ሄደዋል።

ከዚህ አንፃር ሲታይ አንተና መክሊትህ ወፍ ያወጣችሁ የሥነ ጥበብ ዕድላም ናችሁ። ከእኛ አንድ ምሳሌ ላንሳልህ ሊቀ ሊቃውንቱ ጎመራው ኃይሉ ሥነ ግጥምን ጻፈው ከምልህ ፈጠረው ብልህ ይቀለኛል – ወንድምአለም። ጠረኑ ፈውስ ነበር። መንፈሱም ድህነት፤ ግን ምን አደረግንለት …. ትውልድን ገንብቶ አለፈ – ክልትምትም እንዳለ – በስደት። …. አንዲት ካሌንደር በስሙ አሳተምንለትን? ስንት ሰው ከመቀመጫው ተነሳለት? ለመሆኑ የዛን ሊቀ ሊቃውንት አራትዓይናማ ታሪክና ሥራውን ትውልዱ ያውቀዋልን? የሚመጥን ዕውቅና ሰጥተነው ነበርን? /ሲዊዲኖችንና ፍራንክፈርቶችን አይመለከትም/ እነሱ የሚችሉትን ክብርና ሞገስ ሰጥተውታልና። እውነቱን ልንገርህ እኔ ግልጽና ቀጥተኛ ሴት ነኝ። የሚሰማኝን ገቨር ሳልሻ ነው የምጽፈው። እሱና አንተን ስመዝነው ያንተው የገነት ያህል ነው፤ እሩቅ – ፈጣን ክብርህ እውቅናህና ደረጃህ። ሊቁን በአካልም አውቀዋለሁ። በብቃት ደግሞ አንተና ሊቀ ሊቃውነቱ የሥነ ግጥም አባት ከቁራጩም – አትደረስም። ተተኪ ቀርቶ አምሳያ የለውም። የሥነ ጥበብ ቅኔ ቁርባን ነበር። እሱ እንደ አንተ ዕድሉ አልገጠመችም ነበር። የተዘጋ ዕንቁ!

አሁን ወደ ነጥቤ ልመልስህ እናትዬ – እኔ እንደሚገባኝ ሥነ ጥበብ ህዋሷ ተስፋ ነው። ተስፋ ቢስ የጥበብ ሰው ምድር አፍርታ አታውቅም። የሥነ ጥበብ ቤተኛ ተስፋው ለራሱ ብቻ አይደለም – እእ። ለዕልፍ ተስፋ ነው የሚሆነው። ተስፋውን ማብቀል የሚችለው ደግሞ ሞግዚት ሳያሻው እራሱ ተግቶ በተሰጠው ጸጋ ለተስፋው ሲማስን ብቻ ነው። ሥነ ጥበብ ትንፋሹ ርትህ ነው። የርትህ ሚዛን ሲወላገድ ገብቶ ይማገዳል – መቆስቆሻ አይሻምና።

እናትዬ – ተስፋ ያለው ተስፋውን ያገኛል፤ ተስፋውን ያሾለከ ደግሞ ተስፋው ቀርቦ ፈቃድ ቢሰጠውም – ይሰወርበታል። እኔ እራሴ  ለእኔ ተስፋ ነኝ። በሌላ በኩል ተስፋን ለማግኘት ተስፋ መሆን መቻልም ይቻላል። ሌላ ማገዶ ሳይፈልጉ። የግድ የፖለቲካ ድርጀት አባልነት ወይንም የማህበር አባልነት አይጠይቅም። ብዙ መንገዶች አሉ ተስፋን ለማግኘት ስልተ – ገብ፤ የተመቸውን መርጦ መሞከር፣ አልሳካ ሲል ደግሞ ሌላ መተለም። እሱም አልሆን ካለ አዲስ ሃሳብ አፍልቆ ወይንም ፈጥሮ በአዲሱ …. መጪ ማለት የነፃት እልፍኝ ነው። „ተስፋ የለም መቼስ ኑሮ ያውቃል የሚለው የጹሑፉ አናት አምክንዮ“ ለተስፋ ሲሉ የተሰዉ፣ የታሰሩ፣ የተንገላቱ፣ የሚፋለሙም፣ የሚማገዱትን መስዋዕትነታቸውን ዕሴታዊ ግምገማ ያጎሳቁለዋል – በግፍም ይጨፈጭፈዋል፤ ሥቃያቸውም – ይወቅሰናል። ለእኔስ ተስፋዎቼ ትናንትም ነበሩ ዛሬም አሉ፤ ሚሊዮኖች የተማገዱበትም ዛሬም እዬተማገዱ ያሉበት ….. ሃቅ ነውና። ሀገሬ ልዕልት ኢትዮጵያም ተስፋዬ ናት። „ኢትጵያዊ“ ብዬ ነው ጥግ አግኝቼ በልቼ ጠጥቼ፣ መጠለያ አግኝቼ አንገቴን ቀና አድርጌ እምኖረው።

ተስፋን ማግኘት የድርሻን የመወጣት ጥያቄ ነው። በነፃነት ተስፋ ጉዞ የሞድ ሱቅ ዕቃ ባለመሆኑ ትግሉ ከሞት፣ ከስደት፣ ከመካራ፤ ከመገለል፤ ከፈተና ጋር ነው። መንገዱም የጠቆረ፣ አድካሚና አሰልቺ ነው። የተስፋን ውጤት ለማግኘት አንድ ሲደመር አንድ ሁለት ሊሆን አይችልም። ጥረት ብቻ ተስፋን ይወልዳል። እራሱ የጥረቱ ፈተና ታላቅ ተቋም ነው። በሂደቱ ብዙ ትርፍ ይገኛል።

ተስፋን ምራኝ ማለት ወይንም መወጠን – አንደኛ ተስፋ ጋር አለመፋታትን፤ ሁለተኛ አዲስ ፕሮጀክት ተስፋን አልሞ በጀመሩ ቁጥር አዲስ ሃይልና አቅም ያለው አዎንታዊ ነገ ይገኛል። ላይገኘም ይችላል። ግን ነገር ግን እኔ „ከእኔ“ የሚለውን መልስ ማግኘት ከተቻለ ህሊና ለህሊና የተስፋ ስንቅና ትጥቅ ይኖረዋል። ተስፋ ማደረግ በሰው ወይንም በቁስ ወይንም በዕድል አይደለም። ቅድመ – ማዕከለና – ድህረ ዓለምን የፈጠረ፤ የሚመራና የሚያስተዳድረው የሰማይና የምድር ንጉሥ የልዑል እግዚአብሄር ስለሆነ እሱን ኃይልን መከታ፤ መጠጊያ መጠለያ ማደረግ ነው።

በሌላ በኩል „ተስፋ የለም፤ ተስፋ መቼ ኑሮ ያውቃል“ ማለትም የሚቻል አይመስለኝም። ተስፋ አለ። ተስፋ እምነት ነው። እምነት ከሌላ ሰው የመሆን ትርጉሙም የለም ማለት ነው። ይሄ የአምክንዮ ወይንም የዕድምታ ድርድር አይደለም። ከሰው ልጅ ጋር አብሮ የተፈጠረ አካልና አምሳል ነው ሥጋና ደም ነው ተስፋ – ቃል። የኖኽ መርከብ የፍጥረት ተስፋ ….. የተፈጥሮ ጌጥ፤

ተስፋ ፈላጊው ተስፋ መኖሩን በቂ ዕውቅና ካልሰጠው ተስፋ እራሱ ሊያስተናግደው አይችልም። የተስፋ ሚዛን በሚታዩ ነገሮች ብቻም አይለካም። ተስፋ የመንፈስ ልማት መደርጀትን ብቃትን ሁሉ ያካታል። ተስፋ መንፈስ ነው። ተስፋ ጥልቀቱን ማዬት የሚቻለው ጥልቀት ባለው ትእግስት ብቻ ነው። የተስፋን አሸናፊነት ማረጋገጥ የሚቻለውም ጠንክሮ በተከታታይነትና በታታሪነት ተግተው ሲማስኑ ብቻ ነው። ተስፋ አሳላፊ አይሻም። ባዶ ብርጭቆ ይዞም ማንቆርቆሪያ አይጠበቅም፤ ወይንም በውክልና ተስፋ አይተዳደርም። ተስፋ የሚወለደው በራስ መዳፍ ብቻ ነው።

ወንድም ዓለም – ነገ ማለት ተስፋ ነው። ከሰዓት በኋላ ማለትም ተስፋ ነው፤ የዛሬ ወር ማለት ተስፋ ነው፤ ወላጆች ልጆቻቸውን ተስፋዬ፣ ተስፋዓለም፤ ተስፋሁን፤ ተስፋነሽ፤ ተስፉ፤ ተስፋ ትሁን፤ እያሉ የሚጠሩት በተለምዶ ወይንም የፊደላቱ ጥምረት እንደ ብርንዶ ሽው ብሏቸው አይደለም። ረቂቅ አምክኖዊ ሙቀት ለነገ በማለም ነው። ተስፋ እኮ የነገ ማለትም የማግሥት የሚነጋ የኑሮ መርህ ነው። መርኃ ግብርም ንድፍም ነው። ተስፋ ዬግል፣ የድርጅት፣ የመንግሥታት፣ የአጭር – የመካከለኛና የረጅም ጊዜ  ዕቅድ ነው። ተስፋን ብራናውም ቀለሙም ቢሰለፉ ውቅያኖሳዊ አውንታዊነቱን ሆነ ህያውነቱን ዘርዝረው አይዘልቁትም። ተስፋ ፍቅር ነው። ተስፋ መንፈስ ቅዱስ ነው፤ ተስፋ ደስታ ነው፤ ተስፋ ራዕይ ነው፤ ተስፋ ትልም ነው፤ ተስፋ ምህረት ነው፤ ተስፋ ጽናት ነው፤ ተስፋ ቋሚ ነው። ተስፋ ልጆች ናቸው፤ ተስፋ ኑሮና መኖር ነው፤ ተስፋ ትንፋሽ ነው፤ ተስፋ እናንተ ወጣቶች ናችሁ፤ ተስፋ የህሊና ዕሴት ነው፤ ተስፋ የህይወት አናባቢ ነው፤ ተስፋ ዳሳሽ ነው፤ ተስፋ አጽናኝ፤ ተስፋ ተፈጥሮን እና ሥጦታዎችን በአግባቡ በማክበር መተርጎምና ከተፈጥሮ ጸጋዎች ጋር መግባበት ይቻል ዘንድም መቻቻል ነው ወዘተ …..

በተስፋ ተፈጥሮ ውስጥ አሉታዊ ነገሮች የሉበትም፤ ስለምን? ተስፋ የብሩህ መንፈስ ጭማቂና ብርሃን ስለሆነ። ተስፋ ሁልጊዜ ብሥራት ነው። የምስራች ዜና አብሳሪ ነው። የውጤት ስኬት ነው። ተስፋ ቅድስቷን እርግብ ይመስላል። ተስፋ ጭልምተኛ አይደለም። በተስፋ ውስጥ ጭጋግ የለም፤ በተስፋ አውሎ የለም። ይህ ማለት ጉዞውን የሚያደናቅፉ ጨላማዊ፣ ጭጋጋዊ፣ አውሏዊ ገጠመኞች ወይንም ጸላዬ ሰናዮች የሉም ለማለት አይደለም። እነሱ እሱን እንዳናገኝ መንገድ ዘግተው ወይንም መተላለፊያውን አግደው ለመያዝ የተፈጠሩ አሜኬላዎች ናቸው። ተስፋ በነፍሱ ግን የመልካም ነገሮች ሁሉ መናኽሪያ መዲና ነው። ስለዚህ አንድ ሰው ከዚህ ማዕቀፍ ከወጣ በጤናውም ሆነ በኑሮው ላይ ሰፊ የሆኑ ሊፈቱ የማይችሉ ትብትቦች ይገጥሙታል። የጭንቀት በሽተኛ ቁራኛ መሆንም አለ፤ ዓለምን አጨልሞ የማዬት፤ ነገን የመፍራት ወዘተ …. ገዳዳ ዕጣዎች ይጠብቃሉ ….

አባቱ – ወጣትነት ውብ የዕድሜ ዘመን ነው። ወጣት አትሁን ማለት ከተፈጥሮ ጋር መጣላት ነው። ነገር ግን ወጣት ከተስፋ ጋር ከተጣላ የተሳሳተ ጊዜና ቦታ ላይ ስላለ ሃግ ሊባል ይገባዋል ባይ ነኝ። ምክንያቱም የነገ ትጉኃን ላይ ጠባሳ ስለሚሆን። ዛሬንም ቢሆን አቅሙን ይበላል። አንድን ህዝብ በተስፋ ዙሪያ ማሰባሰብ የፕሮፖጋንዳ ተግባር አይደለም። የነፃነት ትግል የፕሮፖጋንዳ ምርት ውጤት አይደለም። የዕውነት ፍሬ ዘር እንጂ። እንደዚህ መሰል ዕይታዎች ደግሞ ብዙ የተያያዙ ኔቶችን ያረግባሉ። ወይ ይወጥራሉ። ከረገቡ – የዛለ መንፈስ፤ ከተወጣረ ደግሞ መበጠስ ይኖራል። ስለዚህ በተመሳሳይ ሙቀትና ሂደት ፍላጎት ይመራ ዘንድ የመንፈስ ሥራዎችን ከሚንዱ ግላዊ ስሜቶች እራስን መግታት የተገባ ይመስለኛል። ምክንያቱም ለዚህ ተግባር ብቻ የተሰለፈ ወይንም የሚሠራ ዕውቅና ያለው ኃይል የለንምና። … ትውልድን በተስፋ ገንብቶ ብልጹግ ማድረግ የምሽት የቅልቅል ግብዣ አይደለም። ኃላፊነቱን ወስዶ፣ በሙሉ ጊዜና ኃይል የሚከውን መዋቅር፤ የተደራጀ ያስፈልገዋል። በልመና ገንዘብ ይህ ተግባር አይታሰብም። በቋሚ በጀት የሚመራ እጅግ ረቂቅ የሆኑ የመንፈስ መስመሮች ለመዘርጋት ብቁዎችንም – ይጠይቃል። ይህም ሆኖ  በእጅ ባለው ነገር ሁሉ በፈቃዳቸው በሚተጉ፤ ጠለቅ ያለ ትንተና እያቀረቡ ትውልዱን ለመገንባት በሚጥሩ ወገኖች ላይም ንደት ብቻ ሳይሆን ተጨማሪ የቤት ሥራም ይመስለኛል። በሌላ በኩል የጊዜም ሆነ የአቅም ብከነትም ነው – ተስፋን ማራቅም፤

ከዚህ ጋር አብሮ ሊታይ የሚገባው ቀለል ያሉ ህይወት ነክ ጉዳዮች ባነሳ ዓለም በተስፋዋ ዙሪያ የደረሰችበት ደረጃ እኛም ተጠቃሚ አድርጎናል። ወንድሜ ጦር ግንባር እያለ እናቴ በስልክ ደጃፍ ፊቱን እያዬሁ የማወራበት መላ ቢኖር ትል ነበር። እንሆ ዛሬ ዓለም ካለወጪ በነፃ እዬተያዬ በስካይፕ፤ በፓልቶክ፤ በባይበር እዬተያዩም ሆነ በድምጽ መገናኘት ይቻላል። አንዲት የታይፕ ጸሐፊ ሲበላሽባት መቅደድ ወይን በኡሑ ማጥፋት ነበረባት፤ ወይንመ አዲስ መጀመር ዛሬ ያ ሁሉ የለም፤ ቀደም ባለው ጊዜ ልብስ በእጅ ይታጠብ ነበር፤ እዚህ ሲዊዝ የ89 ዓመት እናት አለችኝ እማማ ስትነግረኝ ት/ቤት ሲሄዱ ሽርጥ ታጥቀው ነበር – ተማሪዎች። ስለምን? ከቆሻሻ እንዲታደግላቸው። ዛሬ በሰለጠነው ዓለም የለም። ስለምን? ተስፋ ያደረጉ ፍጥረታት ተግተው መዳፋቸውንና ህሊናቸውን ስላሰሩ አይደለም ለእነሱ ለእኛም ተርፈውናል። እኔ እላለሁ። ተስፋ ተፈጥሮ ነው። ስለሆነም ተስፋ ነበረ አለ ወደፊትም ይኖራል። ተስፋን ኮርኩሞ ከግንባር ሥር ወሽቆ „ተስፋ የለህም አልተፈጠርክም“ ማለት ግን ግሎባል የሆኑ ትስስሮችን፤ ተጠቃሚነት ሁሉ የሚያደቅ ዕይታ በመሆኑ የተሳሳተ መስመር ነው።

ሌላው የተነሳው የወሬ ወፍጮ፤ „አፈር ፈጭተው ሰው ያደረጉን እኛ የነሱ ልጆች ፣ ወሬ ፈጭተን ፣ ሰው ልናደርጋቸው አሰብን” ሰቀቀኑ ከመከረኛው የተነሳ፤ ተሎ ልንደርስለት አልቻልንም ለህዝባችን ነው። ይህም በራሱ ተስፈኝነት ሲሆን አዎንታዊ ቢሆንም፤ ዓለም እራሷ የምን መቀነት ነው ያላት፤ ስልጣኔ – ቴክኖሎጂ ሁሉም እኮ የወሬ ፍሬዎች ናቸው። አግልጋይነታቸውም ለወሬ ነው። ወሬ ሲባል የመረጃ ልውውጥ ማለት ነው። ዓለም ካለ መረጃ መኖር አትችልም። በመረጃ ልውውጥና ሽርሽር ነው ልትጠፋ ተነገዳግዳ የነበረቸው ዓለም ኃይልና በርታት አግኝታ በህብረት ህልውናዋ የተረጋገጠው። ዛሬም ለሰው ልጆች ሰቆቃ ሰበነክ ድርጅቶች መድረስ ችለው „ሰውን“ ያህል ክቡር ነገር የሚያተርፉት።

በሌላ በኩል ሀገሮች የሚተዳደሩት በወሬ ነው። በስብሰባ ነው የሚመረጡት፤ ከተመረጡ በኋላም የሚያስተዳድሩት – በወሬ። አፍ ተከርችሙ መሪነት የለም። „ምረጡኝ“ ለማለት ማውራት ያስፈልጋል፤ „ሥሩ“ ለማለትም አንደበትን መክፈት ይሻል፤ ልሳን አንደበት የተፈጠረውም ለዚኸው ተግባር ነው። አፍና ሠራዊቶቹ ከተፈጥሮቸው ይታቀቡ ብሎ ሰላማዊ ሰልፍ ፊደላትን ማሰለፍ ፈጣሪያቸውን አሻቅቦ መክሰስ ይመስለኛል።

በሌላ በኩል ንግግር ሙያ ነው። ንግግር ጥበብ ነው። በሀገራችን በኢትዮጵያም የንግግር ጥበብ በትምህርት ደረጃ ይሰጥ ነበር። እኔ እራሴ የዕድሉ ተጠቃሚ ነኝ። ንግግር በተሰጦ የሚገኝ ቢሆንም ክህሎቱን በሥልጠና ማጎልበት ይቻላል። ውይይቶች፤ ስብሰባዎች፤ ወርክሾፖች ሆኑ ፓናል ዲስክሽኖች ግባቸውን የሚመቱት በንግግር ተስጥዖ ልቅና ባለው ሰዎች ነው። የሰላም ድርድሮች፤  የኢኮኖሚ መግባባቶች፤ የፓለቲካ ስምምነቶች፤ የባህል ልውውጦች፤ የጋራ ውሳኔዌች፤ የወል ምክክሮች ሁሉ ፊደላቸው ንግግር ነው። አስተርጓሚዎችም ለዚህ ተግባር ተብለው ይሰለጥናሉ። ትልቁ የአንደበት መክፈቻ ቁልፍም ንጉሡ ቋንቋ አለ። ቋንቋና መክሊቱም ሌላው የተስፋ በር ናቸው። ውቅያኖስ ጸጋው ጋር ቋንቋ 13ኛው ፕላኔት ነው።

ሚዲያ ገንዘብ ነው። ሚዲያ ህይወት ነው። ሚዲያ ተስፋ ነው። ሚዲያ የዘመናችን የግብይት መናኽሪያ ነው። ገቢውም ሆነ ዲታነቱም እንዲሁም ተፈላጊነቱና ተደማጭነቱም የዚያን ያህል ውድ ነው። በምን ዕያታ በምን ምንዛሬ ከዚህ አጠቃላይ ግንዛቤ እንደተደረሰ ባላውቅም ዓለምና የመረጃ ምንጮችን ሆነ፤ የመረጃ መስመሮቻን እንዲሁም የመረጃ ተገልጋዮቿን ከነሥልጣኔያዊ ገፃቸው አፈርድሜ ያስጋጣ አገላለጽ ነው። አዝናለሁ – ከልብ።

በዚህ ሙያ በቴክኒኩ፤ በሎጅስቲክስ፤ በአድራጊና በተደራጊ የሚሊዮኖች ተወዳጅ የሙያ ዘርፍ ነው። ሙያው ዓለምን በር፣ መስኳት፣ መግቢያና መተንፈሻ ቧንቧ እንዲኖራት አድርጓታል። እኛም ቤተኛ በመሆናችን በራችን ዘግተን አለመቀመጣችን ከጥንቱ ከብራናው ዘመን ጀምሮ እስከ አሁኑ ኮንፒተራይዝድ ድረስ ሙሉ ድርሻችን በሙሉ ብቃት ደስ ብሎን ዕድሉን አክብረነው እንሳተፋለን። ይህ ደግሞ እንደነውር ተቆጥሮ የሚያስወቅስ መሆኑ ሌላው እልባት ሊያገኝ የሚገባው ጉዳይ ይመስለኛል።

ሆምፔጆች ይዘጉን? የኮሚኒቲ ራዲዮ ፕሮግራሞች ይከርቸሙን? የቴሊቪዢን ዝግጅቶች ይቋረጡን? ብዕርና ብራና ዬት ይደበቁ? የተፈጥሮ ድምጽስ ታፍኖ ይቀመጥና – ይሻግት? ሽሁራር እንስበላው – መንፈሳችነን? ልጅ ሄኖክ ለአንተ አላውቅም፤ ለእኔ ኢትዮጵያዊ ሚዲያዎች ሆኑ የነፃነት ትግል መንፈሶች እንዲሁም የባህል ዓውዶች ሁሉ „የመረጃ“ ምንጮች ብቻ ሳይሆኑ የትምህርት፤ የመወያያ፤ የመገናኛ፤ የመግባቢያ መድረኮች ናቸው። ሌላው ቀርቶ አንድ ሰው ከጓደኛው ጋር ተገናኝቶ ሲነጋገር አንደበቱን ሲከፍት የአፍ ጡንቻዎች ይፍታታሉ፤ ሲስቅ ጤናው ይጎለምሳል፤ የጨነቀውን ነገር ሲጫወተው ይቀለዋል፤ እንደተጠቀልልክ – ተጠቅልለህ ተስናበት ዓይነት ከሆነ ከሁሉም መልካም ነገሮች ጋር ግጭት ብቻ ሳይሆን ሌላ የመንፈስ ለውጥ የሚያስፈልግ ይመስለኛል።

ከዚህ ጋር በኮሚዲ ሙያ የሚሰሩ፤ በትዕይነት ላይ የተሰማሩት የቲያትር ሆነ የፊልም ተዋናዮች ሙያቸው ተገላጭነቱ በባላንባራስ ወሬ ነው። የፍትህ ውሎ ችሎትም በወሬ ነው። ተከሳሽ – ዳኛ – አቀቢ – ህግ – ጠበቃ – ምስክር በጥቅሻ ይሁን ወይ ተግባራቸውን የሚከውኑት? ፍሬ ያለው ነገር ማዬት ካልቻልክ አንተ ፍሬ ሁነህ አፍራ!

ይህ የምንጠቀምበት ፌስቡክ ቢሆን የተስፋ ባለሟል ነው። ተስፋ ያለው ወጣት የፈጠረው። ተስፋውን አሳክቶ ሚሊዮኖችን ያገናኘ፤ የት ላይ እንደቆምክ፤ እንዳለህም ግር እስኪለኝ ድረስ ደጋግሜ ጹሑፉን ሳነበው ደረጃህን – መክሊትህን – ዕውቅናህን – ተደማጭነትህን ለመቼ ቀጠሮ እንደሰጠኃቸው አልገባኝም። አንተን የሚወዱ፣ ያከበሩ፣ ተስፋ ያደረጉ፣ በመንፈሳቸው መስጠረው ያስቀመጡህ ወገኖችህ ሁሉ ቦታ አጥተው፤ ጥግ አጥተው ጥርኝ ልመና ላይ እንዳሉ ይሰማኛል። አንድ ዬጥበብ ቤተኛ ከሚያውቃቸው ደጋፊዎቹ ይልቅ የማያውቃቸው እጅግ በርካታ ስለሚሆኑ ለእነሱም በእንቡጢጣ  እሰብላቸው። ለመሰከሩልህም፤ ለምን? የወደዱህ – ያከበሩህ፤ ያፈቀሩህ እኮ ተስፋቸው ስለሆንክ ነበር። ታዲያ ስለምን ተስፋ ቢስ ታደርጋቸዋለህ? ተኝተህ እሰበው – ግን ከመንፈስህ ሆነህ። ሌሎች ስላነሳሱህ ወይንም ስለኮለኮልህ ሳይሆን ለአንተ ብቁ መሪው አንተው ብቻ ነህ። ምክንያትም ከውጪ እውቅና ይልቅ እራስን ማወቅ ብልጫ ስላለው።

እንደ ተተኪ ትውልድነትህም የነገ አደራ ተረካቢ ሆነህ ሳለ፤ ለአደራህ አንጋጠህ መጠበቅህ ከወጣትነት ሥነ ደንብ ጋር የሚያጣላህ ይመስለኛል። ወጣቶች ሁልጊዜ ወደፊት ናቸው፤ ወጣቶች ፍጥነታቸውን የሚያሳርፉት በተስፋቸው ላይ ነው። ተስፋቸውን ለማፍጠን የተስፋቸው ወታደሮች እነሱ እንጂ ሌላ አለመሆኑን ስለሚውቁ አውሎ አይነቀንቃቸውም፤ ወይንም በአማላጅ ወደ ተስፋ ጉዙ እንዲያዘንብሉ የግብዣ ወረቀት ከዬትኛውም ወገን አይጠብቁም።

እግዚአብሄር ይመስገን እኔ ሥርጉተ ወጣትም ነበርኩኝ፣ ወጣት አደራጅም ነበርኩኝ፤ እኔ የማውቃቸውና እመራቸው የነበሩት ወጣቶቼ የግንባር ሥጋነታቸውን በተግባር ያቀለሙ ነበሩ። ውጪ ሀገር እንኳን ያደራጀኋቸው ወጣቶች ስንት ተግባር አንደከወኑ ታሪክ አንድ ቀን ይዘክረዋል። ስለምን? ከወጣት ጋር መሥራት የድርብ ውጤት ባለሟልነት ገጸ በረከት ስለሆነ፤ ድፍረታቸው ትጋታቸው፤ ጽናታቸው፤ ሀገር ወዳድነታቸው፤ ፍትህ ራህብተኝነታቸው ሁለመናቸው የወጣትነትን ሥነ ደንብ ያሟሉ ብክነትም የማይጎበኘው ስለሆነ ለዛሬም ለነገም ለተነገ ወዲያም ወጣቶች ተስፋችን ናችሁ። ከቤቴ – ከተፈጥሮዬ – ከተሰጠኝ ጸጋ እውጣለሁ ካልክ ምርጫው የአንተ ሲሆን መቅኖ ከማፍሰሱ ላይ ግን ተግ ብትል መልካም ይሆናል። የተሰበሰበን መበትን /// እእ! እኔ ከአንተ ይህን አልጠብቅም። ተስፋ ነህ፤ ተስፋነትህን – ዋጠው። ትእዛዝ ግን አይደለም። ….  የትውልዱና የዘመኑ ታዳሚነትህ ግድ ስለሚል ብቻ።

ብክነት የመንፈስ ማለቴ ነው። መንፈሱ የሚባክን ወጣት የተላለፈው መሰመር አለ። ወጣት ከችኩልነቱ በስተቀር መንፈሱ ድርጁና ቋሚ ነው። አቅሙም ከብረት ቁርጥራጭ የተሠራ ተከታታይነት ያለው ነው። የትም ሀገር የሚቀሰቀሱ የፍትህ ጥያቄዎች አቀጣጣዮች፤ ሳይታክቱ ተግተው የሚሠሩ ወጣቶች ናቸው። ወጣትነት ክብርና ዝና ምኑም አይደለም። የህዝብ መበደል ነው ማዕከላዊ አጀንዳው። ስለዚህም ይማስናል – ለፍትህ፤ ለሰው ልጆች እኩልነት፤ ለሰው ልጆች ሙሉዑ ነፃነት ቀድሞ – ይማገዳል።

ተስፋዬ! ዛሬ ላልንበት ደረጃ ያደረሱን ወጣቶች ነገንም አሳምረው አደራጅተው የመምራት አቅምና ቁርጥኝነት አላቸው። ዛሬን የሰጡን ወጣቶችን ውለታው ቀርቶባቸው ስንሰርዛቸው ዘመን – ይታዘበናል። ትናንትም ወደፊትም ወጣት አዋቂ ፆታ ዕድሜ ዕምነት ብሄረሰብ ደንበር ሳይገድባቸው ለወል ተስፋችን የሚባክኑ – የሚደሙ – የሚቆስሉ – የታሰሩ – የተንገላቱ – የተደበደቡ – የተደፈሩ የተሰው ወገኖቼን ከልብ አምስግኜ ተስፋዎቼን ያኑርልኝ – እላለሁኝ። ግልጽነትህን ውስጥህን ማስጎብኘት መቻልህ ልዩ ነውና አመስግናለሁ። አይዞህ ታናሽ – ጤናማ ሳቂተኛ ንፋስ ይመጣል – ለተስፋ ማደር ከተቻለ- በህግጋታቱ መተዳደር ከተፈቀደ —-

ውዶቼ መሸቢያ ሰሞናት፤ ደህና ሰንብቱልኝ።

ተስፋችን የፈጠረ፣ ለተስፋችን አቅም የሰጠ፣ ተስፋችን መርቆ የሸለመን አምላካችን የተመሰገነ ይሁን። አሜን!

ለእኔስ ሰው መሆኔ ብቻ – ይበቃኛል።

እግዚአብሄር ይስጥልኝ።

The post የመሬት – መስኮት፤ የሰማይም – በር ነው ተስፋ፤ – ሥርጉተ ሥላሴ appeared first on Zehabesha Amharic.

አምዶም ገብረስላሴ ከትግራይ እንደገለጸው:-

የዓረና መድረክ የእጩ ተወዳዳሪዎች ምስል የያዙ ፖስተሮች በህወሓት የወረዳ ካቢኔ ኣባላት፣ ካድሬዎች፣ ፖሊሶችና የኮብልስቶን በመስራት ላይ ያሉ ወጣቶችና በህፃናት ኣማካኝነት እየተቀደደ ነው። የምርጫ ህጉ የተወዳዳሪዎች ፖስተር መቅደድ በህግ የሚያስጠይቅና የሚያስቀጣ ቢሆንም ህወሓት ግን በህጉ ተገዢ ለመሆን ፍቃደኛ ልጦን ኣልቻለችም።

ህወሓት በተግባርዋ የህዝብ መሳቅያ ሁና ፍርሃትዋ ምን ያክልል እንደሆነ በት ዝብት ላይ ወድቃለች። ይህ የህወሓት የፖስተር ቀደዳ ተግባር ለኮረጆ ቀደዳ እንደ የኣቋም መፈተኛ ልምምድ ሊታስብ ይችላል። እነሱ የፈለጉት ህገወጥ ተግባር ሲሰሩ እኛ ደግሞ የህዝባችን ልብ ፣ ድጋፍና ማገር እያገኘን እንጎመራለን።

ዓረና መድረክ እምዲህ ያስደነገጣቸው ምክንያት በመላ ትግራይ የምርጫ ታዛቢዎች መልምሎ ኣዘጋጅቶ በማቅረቡ ነው። ለታዛቢዎቻችን የእስራት፣ የማስፈራራትና ዛቻ በኣስተዳዳሪዎች እየደረሰባቸው ነው።

የፖሊስ ስራውና ሃላፊነቱ በኣግባቡ ኣለመወጣት ምርጫው ወዳልሆነ ኣቅጣጫ እየወሰደው ይገኛል።
ነፃነታችን በእጃችን ነው

The post በዓረና መድረክ የተደናገጠው ሕወሓት በትግራይ የተቃዋሚዎችን የምርጫ ፖስተሮች መቅደድ ጀምሯል appeared first on Zehabesha Amharic.

ጋዜጠኛ ሃብታሙ አሰፋ

< …በኢትዮጵያ ውስጥ አሁን ያለውን ውጥረት ለማርገብና ለአገሪቱና ለሕዝቡ መፍትሄ ለመፈለግ ቢያንስ እነዚህ ስልጣን ላይ ያሉ ሰዎች በአገርና በሕዝብ ላይ የበለጠ ጉዳት ሳያመጡ የያዙትን ይዘው… አብዮት በማንኛውም ሰዓት ይነሳል የኢትዮጵያ ሕዝብ ግን አሁን ሆ ብሎ አስቀድሞ ያለቀውን ምርጫ ተከትሎ … >

አቶ ፈቃደ ሸዋቀና ስለወቅቱ የኢትዮጵያ ሁኔታ ለህብር ሬዲዮ ከሰጡት ማብራሪያ የተወሰደ (ሙሉውን ያዳምጡት)

<…በኤርትራ ውስጥ በነጻነት ትንቀሳቀሳላችሁ ወይ ላልከው በነጻነትማ ስለምንቀሳቀስ ነው ይሄው ወጣቶች ትግሉን የሚቀላቀሉበትን ሁኔታ እያመቻቸን ያለነው….አምስት ዓመት ሙሉ ምን ስትሰሩ ነበር የተባለው ወያኔን የመሰለ ጠላት በአንድ ጊዚ ተነስቶ ሳይሆን በቂ ዝግጅት አድርጎ ነው …>

ታጋይ ተፈሪ ካሳሁን በኤርትራ የሚገኘው የአማራ ዲሞክራሲያዊ ሃይል ንቅናቄ መሪ

የቀድሞ የመኢአድ የሕዝብ ግንኙነት ሀላፊን ተስፋሁን አለምነህን ጨምሮ ኤርትራ ከገቡ ሶስት ወጣት ታጋዮች ጋር የተደረገ ቃለ መጠይቅና ያስተላለፉት ጥሪ (ሙሉውን ያዳምጡት)

<…ፕሮፌሰር አስራት ወልደየስ የኢትዮጵያውያን ድጋፍ የነበራቸው እውቅ የህክምና ሰው ፣የህዝብ ተቆርቋሪ አባታቸውን ግራያኒ ገሎባቸው እሳቸው በወያኔ እስር ቤት ተሰቃይተው በወቅቱ ህክምና ተከልክለው ለሞት የበቁ እንደ አቡነ ጴጥሮስ ለአገራቸው ሲሉ የተሰው ኢትዮጵያዊ ሰማዕት ናቸው …16ተኛ የሙት ዓመታቸውን ስንዘክር በስማቸው ወደፊት ፋውንዴሽን እንዲቋቋምና…>

አቶ ተክሌ የሻው የሞረሽ ወገኔ ሊቀመንበር የፕ/ር አስራት ወልደየስን 16ተኛ የሙት ዓመት መታሰቢያ ዝግጅት ያካሄዱበትን ምክንአት ለህብር በሰጡት ቃል ከገለጹት የተወሰደ(ሙሉውን ያዳምጡት)

የከሸፈው የብሩንዲ መፈንቅለ መንግስት እና በለውጡ አራማጆች ላይ ያመጣው ጣጣ( ልዩ ጥንቅር)

ሌሎችም

ዜናዎቻችን

ደቡብ አፍሪካ የኢትዮጵያውያን ሱቅ ሰሞኑን በዘረኞች ጥቃት ደረሰባቸው በበኬኒያ በስደት ላይ የሚገኙ የኢትዮጵያ ነፃ ፕሬስ ጋዜጠኞች ህይወታቸው አደጋ ላይ መሆኑን ገለጹ

አሜሪካ ዜጎቿ ምርጫውን ተከትሎ በኢትዮጵያ ለሚያደርጉት እንቅስቃሴ ጥንቃቄ እንዲያደርጉ አሳሰበች

ከመንገድ የታፈኑት አቶ ማሙሸት አማረ ነገ በድጋሚ ፍርድ ቤት ይቀርባሉ

በሊቢያ ለሞቱት ሐዘን የወጣውን ሕዝብ አሳምጸዋል ተብለው ተከሰዋል

በስልጣን ላይ ያለውን አገዛዝ በአገር ቤትም ሆነ በውጭ በጠመንጃ ብቻ ነው ማንበርከክ የሚቻለው ሲሉ ኤርትራ ለመሳሪያ ትግል የገቡ ወጣቶች ገለጹ

የብሩንዲ ፕሬዝዳንት ህዝቡ ወይ እኔን ወይ አልሸባብን ይምረጥ ሲሉ አስፈራሩ

የኢትዮጵያ በርካታ ወጣቶች ልባቸው መሸፈቱን ሮይተርስ ዘገበ

ናይጄሪያዊው አገረ ገዢ ኢትዮጵያዊት አገቡ መባላቸውን አስተባበሉ

የሚሉና ሌሎችም ዜናዎች አሉን

The post Hiber Radio: የአማራ ዲሞክራሲያዊ ሃይል ንቅናቄ መሪ በኤርትራ በነፃነት እየተንቀሳቀስን ነው አሉ * ተክሌ የሻው በፕሮፌሰር አስራት ስም ፋውንዴሽን ለማቋቋም ሃሳብ እንዳለ ገለጹ * አሜሪካ ዜጎቿ ምርጫውን ተከትሎ በኢትዮጵያ ለሚያደርጉት እንቅስቃሴ ጥንቃቄ እንዲያደርጉ አሳሰበች * በሊቢያ ለሞቱት ሐዘን የወጣውን ሕዝብ አሳምጸዋል ተብለው የተከሰሱት ማሙሸት አማረ ፍርድ ቤት ይቀርባሉ * አቶ ፈቃደ ሸዋቀና ስለወቅቱ የኢትዮጵያ ሁኔታ የሰጡት ቃለምልልስ እና ሌሎችም appeared first on Zehabesha Amharic.

– ግርማ ካሳ

የሚቀጥለው ሳምንት ምርጫ ነው። ከምርጫው የሚጠበቅ ለዉጥ ባይኖርም መድረክ እና ሰማያዊ ( የአንድነት ሰዎች በብዛት በምርጫው እንቅስቃሴ ለማድረግ ስለገቡ) በጠበበው የፖለቲካ ምህዳር ዉስጥም ሆነ ሕዝቡን ለማንቀሳቀስ ጥረት እያደረጉ ነው። በተለይም መድረክ በኦሮሚያና በትግራይ ብዙ ድጋፍ እያገኝ እንደሆነ የሚያሳዩ ምልክቶች አሉ።
መድረክን እና ሰማያዊ ወክለው ለፓርላማ ከሚወዳደሩ በርካታ ኢትዮጵያዊያን መካከል አንድ ሴት አለች። የዪኒቨርሲቲ ምሩቅ ናት። ሕወሃትን ከመሰረቱት መካከል። ሟቹ መለስ ዜናዊን መተኮስ ያስተማርቸው እርሷ እንደነበረች ይነገራል። ኢትዮጱያን የምትወድ፣ ህዝቧን የምትወድ ሴት።

ከባድመ ጦርነት በኋላ ህወሃት ሲከፋፈል፣ “አሰብ ለኢትዮጵያ ይገባታል” በሚል ከነ ስዬ አብርሃ ጋር በመሆን የመለስ ዜናዊ ተጻራሪ ሆነች። መለስ ዜናዊ የኦህደድና የብአዴኖችንን ድጋፍ ይዞ አሸናፊ ሆኖ ወጣ። ይች ሴትም ከሃላፊነቷ ተገፍታ ወጣች። ከጅምሩ ከመለስ ዜናዊ ጋር ሆና በስልጣን መቆይት ትችል ነበር። ከዚያም በኋላ ደግሞ አባይ ጸሃዬ እንዳደረገው ይቅርታ ጠይቃ ከመለስ ዜናዊ መታረቅ ትችል ነበር። ለሆዷ የቆመች ባለመሆኗ፣ ኢንቴግሪቲ ያላት በመሆኗ፣ ላመነችበት ነገር ጸናች። የሕዝብ ብሶት የወለደው ሕወሃት፣ ሕዝብን እና አገርን ከመጥቀም ይልቅ፣ ዳግማዊ ደርግ፣ እንደዉም ከደርግ የባሰ፣ አገርን የሚሸጥ መሆኑን በማወቋ፣ የሕወሃት ተቃዋሚ ሆነች። ከሌሎች ጋር በመሆን አረናን መሰረተች።

በ2002 ምርጫ በአድዋ አረና/መድረክን ወክላ ከመለስ ዜናዊ ጋር ተወዳደረች። “እንዴት ብትደፍሪኝ ነው” ብሎ መለስ ዜናዊ ፣በአድዋ፣ ጥይት መተኮስ ያስተማረችውን ታጋይ፣ እንድትደበደብ አደረገ። ሴት ናት፣ ሆኖም ሴትና አረግዊያንን መደብደብ ልማዳቸው የሆኑ የሕወሃት ጨካኝ ካድሬዎች በመልስ ትእዛዝ ቢደበድቧትም፣ እርሷ ግን አልተበግረችም። ብዙ ሕዝብ ደገፋት። መለስ ዜናው ግን ድምጽ ሰርቆ፣ ኮሮጆ ገልብጦ አሸነፍኩ አለ።

ይች ሴት አረጋሽ አዳነ ትባላለች። “ብዙዎች ደርግን ለመጣል ሕይወታቸውን የሰዉት ለመብት፣ ለሕግ የበለያነት፣ ለአገር አንድነት ነበር። ሆኖም በብዙዎች ደም የደርግ ስርዓት ቢወድቅም፣ ከሕወሃት ጥቂቶች ግን ድሉን ሃይጃክ አድርገዉታል” የምትለዋ አረጋሽ፣ የሕወሃት ስርዓት ተቀይሮ ለዉጥ እንዲመጣ መድረክ ወክላ በመቀሌ ትወዳደራለች።
ትግል ዉጣ ዉረድ አለው። ትግል መዉደቅ መነሳት አለው። ተስፋ የማትቆርጥ፣ ሕይወቷን ለትግሉ አሳልፋ የሰጠች፣ ለሕግ የበላይነት ለፍትህ፣ ለነጻነት፣ ለእኩልበት የቆመችዋን፣ አረጋሽ አዳነችን እንምረጥ !!!!! ሕወሃቶች ከአምስት አመታት በፊት እንዳደረጉት ድምጽ እንዳይሰርቁም፣ ድምጹ እስኪቆጠር ድረስ፣ ሕዝቡ በየምርጫ ጣቢያ ቁጭ ብሎ በመጠበቅ ራሱ ማስቆጠር አለበት። 3፣ 4 አጋዚ፣ ፌዴራልና ካድሬ ፣ ሺሆችን አስፈራርተው የሕዝብ ድምጽ እንዲሰርቁ ሊፈቅድላቸው አይገባም።

The post አረጋሽ አዳነ – ኢንቴግሪቲ ያላት ተወዳዳሪ appeared first on Zehabesha Amharic.

– ግርማ ካሳ

የሚቀጥለው ሳምንት ምርጫ ነው። ከምርጫው የሚጠበቅ ለዉጥ ባይኖርም መድረክ እና ሰማያዊ( የአንድነት ሰዎች በብዛት በምርጫው እንቅስቃሴ ለማድረግ ስለገቡ) በጠበበው የፖለቲካ ምህዳር ዉስጥም ሆነ ሕዝቡን ለማንቀሳቀስ ጥረት እያደረጉ ነው። በተለይም መድረክ በኦሮሚያና በትግራይ ብዙ ድጋፍ እያገኘ እንደሆነ የሚያሳዩ ምልክቶች አሉ።

መድረክን እና ሰማያዊ ወክለው ለፓርላማ ከሚወዳደሩ በርካታ ኢትዮጵያዊያን መካከል እኝህ አባት ይገኙበታል። በሞያቸው ጠበቃ ናቸው። የመልካም ሴት ባላቤትና የተባረኩ ልጆች አባት ናቸው። ከእኝህ አባት ሴት ልጆች መካከል አንዷ አስተማሪ ሆና ነበር። ከደሞዟ ብዙ ችግር ያለባቸውን ተማሪዎች ትረዳና ትደግፍ ነበር። እንደ ዜጋ ሕግ መንግስት በሚፈቅደው መሰረት ጻፈች፣ አስተያየቷን ሰጠች።

እነርሱ መስማትና ማንበብ ከሚፈለጉት ዉጭ እንዲጻፍና እንዲነገር የማይፈልጉት ገዢዎች፣ የአስተሳሰብ ድሆች በመሆናቸው፣ ብእሯን መመከት አልቻሉም። ወደ ጡንቻ ሄዱ። አሰሯት። በዉሸት ክስ ሽብርተኛ ናት ብለው ከሰሷት። ጠበቃ አባቷ ተከራከሩ። ሆኖም ፍርድ ቤቶች የፍትህ አካላት ሳይሆን የሕወሃት ፖሊት ቢሮ ጉዳይ አስፈጻሚዎች በመሆናቸው፣ ፍትህ ሊገኝ አልቻለም። ይች ወጣት ለአመታት በቃሊቲ ትሰቃያለች። ይች ወጣት ርዮት አለሙ ትባላለች። በዘመናችን ኢትዮጵያ ካፈራቻቸው ብርቅዬና ጀግና ኢትዮጵያውያን መካከል አንዷ !!!!

ጠበቃ አባቷ፣ ምን ያህል የሕግ ስርዓት እንደሌለ በመረዳታቸው፣ ፍትህ ከፍርድ ቤት እንደማይገኝ በማወቃቸው ለዚህ ደግሞ በዋናነት ምክንያቱ የተበላሻዉና የበሰበሰው የፖለትካ ስርዓቱ በመሆኑ፣ ይሄንን ስርዓት ለመለወጥ በቀድሞ ወረዳ አራት የመድረክ ተወዳዳሪ ሆነው ቀርበዋል።እኝህ አባት ጠበቃ አለሙ ጎቤቦ ይባላሉ።

ትግል የሁሉንም ተሳትፎ ይጠይቃል። ጠበቃ አለሙ በጥብቅና ሞያቸው ቀጥለው፣ ፍትህ ቢጓደልም “ ምን አገባኝ” ብለው መቀመጥ ይችሉ ነበር። ሆኖም ከራስ አልፎ ለሌላ መቆም ትልቅነት ስለሆነ፣ እኝህን አባትም ትልቅ አባት ስለሆኑ፣ ዝምታን አልመረጡም። ፖለቲካዉን ተቀላቅለው አምባገነንነትን ለመታገል ተነሱ።

የርዮት አለሙን አባት፣ የኛም የነጻነት ናፋቂዎች ሁሉ አባት የሆኑትን፣ አቶ አለሙን እንምረጥ !!!!! አገዛዙ ከአምስት አመታት በፊት እንዳደረጉት ድምጽ እንዳይሰርቁም፣ ድምጹ እስኪቆጠር ድረስ፣ ሕዝቡ በየምርጫ ጣቢያ ቁጭ ብሎ በመጠበቅ ራሱ ማስቆጠር አለበት። 3፣ 4 አጋዚ፣ ፌዴራልና ካድሬ ፣ ሺሆችን አስፈራርተው የሕዝብ ድምጽ እንዲሰርቁ ሊፈቅድላቸው አይገባም።

The post የርዮት አለሙ አባት – የጀግና ልጅ አባት፣ እርሳቸውም የፍትህ አርበኛ የሆኑ ተወዳዳሪ appeared first on Zehabesha Amharic.

በከበደ ኃይሌ

kbdeh2013@yahoo.com

መነሻ፡ ይህ ርዕሰ-ጉዳይ የሚያተኩረው በልዩ ልዩ ምክንያት ከአገራቸው ወጥተው በሳውዲ አረቢያ ገብተው እየደከሙ ይኖሩ በነበሩት ኢትዮጵያውያን ላይ የግፍ ግድያና ድብደባ ተፈጽሞባቸው የሞቱትን፤ የቆሰሉትንና የድካማቸው ዋጋ ሳይከፈላቸው ከአገሩ የተባረሩትን ወገኖች ለማስታወስ ያበቃንን የደቡብ አፍሪካና የሊቢያው ወንጀል ፍጻሜ ጉዳይ ቢሆንም፤ እገረመንገዱንም ኢትዮጵውያን በየደረሱበት ስለሚጠቁበት ምክንያት፤እንዲሁም ወገኖች በአሁኑ ጊዜ ከአገር ስለሚወጡበት፤ እንዳይወጡ ምንስ መደረግ ይኖርበታል ስለሚለውና፤የዓለም የድሞክራሲ ተምሳሊት በሆነቸው አሜሪካንና አውሮፓ አገሮች ውስጥ  የምንኖረው ዲያስፖራዎች የመኖር ዋስትናችን ቢጓደል ምን ዝግጅት ማድረግ ያስፈልገናል በሚሉት ነጥቦች ላይ ጸሐፊው ከወቅቱ የስደት ዘመን ጋር የተገናኙ የዛሬኛ፤የነገኛና የወደፊተኛ የግል አመለካከቱን ጽፎ ለአንባቢያን ለማጋራት ነው፡፡

የስደቱ ምክንያቶች፡ስለኢሰባዊ ድርጊታቸው ይህን ያህል ከጠቃቀስን በኋላ ወጣት የሆኑ ወገኖች ከአገር እንዳይወጡ በውጭው የሚኖረው ዲያስፖራ ምን የሥራ ድርሻ ወይም ኃላፊነት ይኖረዋል ለሚለው ጥያቅ ከፊል መልስ ሊሆን የሚችለውን ከመጠቆም በፊት ለመውጣት የሚያነሳሳቸውን ነገሮች በቅድሚያ እንመልከት፡፡ በአንደኛ ደረጃ አገር ቤት ያለው ወጣት ትክክለኛው የኑሮ ነጸብራቅ ቢነገራቸውም የውጭ አገር ኑሮ የዘመኑ ቴክኖሎጂ እንደሚያሳየው ቀላል እየመሰለው ምክር የሚቀበል ትውልድ ሆኖ አልተገኘም፡፡ በተጨማሪም ውጭ ወጥቶ ለመኖር ዕድል ያገኙ ብዙ ወጣቶች በልዩ ልዩ ምክንያት ጠባያቸው ተበላሸቶና ያሰቡት ሳይሳካላቸው ወደ አገር ቤት እንዲሚመለሱ የተደረጉ ስደተኞች በአገር ውስጥ የሚኖሩ ወላጆች በመመልከትና ልጆቻቸው ውጭ ሄደው የማይማሩና በኑሮ የሚጨናነቁ ከሆነ ከአገር እንዲወጡ የሚፈቅዱ ወላጆች ፍላጎት ቢቀንስም ሁሉን አውቃለሁ የሚል ባህሪ ያላቸው ወጣቶች የወላጅ ምክር አይቀበሉም፡፡

ወደ ዲያስፖራው ኃላነት ስንመለስ ደግሞ፤ኢትዮጵያውያን ከአገር  እንዲወጡ የዲያስፖራው ተሳትፎ ምን ያህል ነው ስለሚለው ነገር ሲኒሳ ደግሞ በገንዘብ  ክፍያ፤ ስለውጭው አገር የኑሮ ነጸብራቅ እውነቱን ስለማይነገሯቸውና እኛ ከጎናችሁ እንቆማለን እያሉ ሞራል ስለሚሰጧቸው ነው የሚለው ሁለተኛ ደረጃውን ይይዛል ፡፡ በሦስተኛ ደረጃ ዲያስፖራው አገር ቤት ለጊዜውም ሆነ ለረጀም ጊዜ ወደ ኢትዮጵያ ሄዶ ሲዝናና በማይት የወጣቱን ቀልብ  ስለሚሰብ  እኛም እንደነሱ መሆን እንችላለን በማለት ከአገር ካልውጣን ሞቼ እገኛለሁ እያሉ ወላጆችን ስለሚያሰቸግሩ፤ ወላጆችም አጠገባቸው ሆነው ህግ-ወጥ ተግባር ፈጽመው ከሚታሰሩባቸው፤ ሥራ ፈት ሆነው ከሚመለከቷቸው፤ በመጠጥና በአደንዛዥ ዕጽ ነሁልለው ከምናያቸው ከአገር ወጥተው ዕድላቸውን ይሞክሩ በማለት ወደ አውሮፓ የማሸጋገር ጉዞ እናመቻቻለን የሚሉ ደላሎችና ጉዳይ አስፈጻሚዎች የሚሰጧቸውን ያልተጨበጠ ተስፋ በማመንና በልጆቻቸው ጉዞ ወቅት የሚደርሰውን ስቃይና ሰቆቃ በግምት ውስጥ ባለማስገባት ተበድረውና ተለቅተው የመውጫ ወጪውን በመሸፈን ከአገር አስወጥተው ከአጠገባቸው ለማራቅ ሲሉ ነው፡፡ በአራተኛ ደረጃ በአገር ውስጥ የሥራ ዕድል ባለመኖሩና ቢወጡ በመንገድ ላይ ስለሚደርስባቸው እንግልትና ሕይወት ማጣት በማወቅም ሆነ ባለማወቅ በወኔ ከአገር እየኮበለሉ በየበረሃው የሚንከራተቱ፤ካለክፍያ እየሰሩ የሚገዙና ለሞት የሚዳረጉ ኢትዮጵያውያን ስደተኛ ቁጥር ብዙ እንደሆነ የዓለም ዜና አውታሮች በተደጋጋሚ በጽሁፍ ያወጡት እወጃ ለወጣቶችም ሆኑ ለወላጆች ጆሮ-ጠገብ ጉዳይ ሲሆን ቢሰሙትም ነገሩ እውነት ሳይመስላቸው ጉዳዩን አቅልለው ይመለከቱታል፡፡

በውጭው ዓለም  የኑሮ  ሁኔታ ውስጥ ተፈትነን ያለፍን ሰዎች ወጣት ወገኖቻችን ቢቀበሉትም ባይቀበሉትም በግልጽ በለማስረዳትና እንዲወጡ በቀጥታም ሆነ በተዘዋዋሪ መንገድ የምናደርገውን አስተዋጸዎ ብንቀንስም ባንቀንስም፤ሥራና በቂ የወር ደመወዝ የሚከፈለውና በተዘንናና ኑሮ ላይ ያለውም ሰው ቢሆን እንኳን ከኢትዮጵያና ከየትኛውም ክፍለ ዓለማት ወደ አሜሪካና አውሮፓ አገሮች በመግባት መኖር የማይፈልግ ሰው የለም ቢባል ማጋነን አይሆንም፡፡ ምክንያቱም የጥገኘነት ጥያቄያቸው ከተረጋገጠ በኋላ ካለቅድመ ሁኔታ የመኖሪያ ቪዛ ስለሚሰጡና ሰፊ የሥራ ዕድል ስለሚኖር ሰርተን ዲያስፖራው እንደሚሆን መሆን እንችላለን የሚል ብርቱ እምነት ስለሚያድርባቸው ነው፡፡

ድርጊቱ የተፈጸሙባቸው አገሮች፡በአረብ አገሮች ሰርተው በሚኖሩ ወገኖቻችን ላይ የደረሰው የበደል ድርጊት ትውስታው ከአዕምሮአችን ሳይጠፋ ኢትዮጵያ ስንት ውለታ አድርጋላት ከነጮች የግፍ አገዛዝ ቀንበር ስር ነጻ  የወጣችው ደቡብ አፍሪካ ጊዜው የፈቀደላቸው የዙሉ መሪ ከተለያዩ አፍሪካ አገሮች ወደ ደቡብ አፍሪካ ገብተው የሚኖሩ ስደተኞች “ለደቡብ አፍሪካ ኢኮኖሚ አስተዋጽዎ ለማድረግ ሳይሆን ለመቆያና ወደሌላ አገር ለመሽጋገሪያ፤ የአገሩን  ሰው የሥራ ዕድል  ለመሻማትና  የአገራቸውን የሠራተኛ ክፍያ መጠን  ለማራከስ ነው” ብለው ለሕዘባቸው ይፋ የሆነ ንግግር ባደረጉበት ወቅት የመሪያቸውን ንግግር ጨብጥ ላንድ አፍታ ያላገናዝቡ የአገሬው ቦዘኔ ሕዝብ ሰላማዊ ሰደተኞችን በያሉበት በማሳደድ በግፍ ገድለዋቸዋል፤ሠርተው ያተረፉትን ሃብት  ዘረፈዋል፡፡ ሸሽተው በመደበቅ ሕይወታቸው የተረፉት ደግሞ አንዴ ከአገር ወጥተናል የፈለገው ይሁን ብለው  በሕይወታቸው ቆርጠው ሳይወጡ በግል ቤታቸውና በቤተ-ዓምልኮ ድርጅቶች ውስጥ ተደብቀው በፍርሃት የሚኖሩት ስደተኞች አሁንም እየተሸማቀቁ ቢኖሩም የመኖር ዋስትናቸው የተረጋጋ አይደለም፡፡ ይህ በአፍሪካ ስደተኞች ላይ የደረሰው  አሰቃቂ በደል  በደቡብ አፍሪካ ነጮች ቢፈጸም ኖሮ አይቆጭም ነበር፡፡ ነገር ግን በጥቁር ዜጎቿ መፈጸሙ ግን በተለይ በአፍሪካውያን አዕምሮ ውስጥ የማይጠፋ ትውስታን ጥሏል፡፡

የማውገዝ ዝግጅትና ሂደት፡በውጭና በአገር ውስጥ የሚኖረው ኢትዮጵያዊያንም ድርጊቱን በልዩ ልዩ መንገድ ለማውገዝ እንዲረዳ ማህበረሰቡን በአስቸካይ አሰባስቦ በማገናኘት ኃዘኑን እንዲወጣና ለሞትና ለጉዳት ሰለባ የሆኑ ወገኖችን በጋራ እንዲዘክር በየአካባቢያችን ባሉ የኢትዮጵያ ኮሚኒቲ ማህበራቶች አማካይነት ምቹ ሁኔታን በማቻቸታቸው ከተለያዩ ወገኖችና ድርጅቶች ምስጋና ተሰንዝሮላቸዋል።

አስተናባሪዎቹ በአፋጣኝ ባዘጋጁት ስፍራዎች ላይ የተሰባሰቡት በውጭው አገር ነዋሪ የሆኑት ትውልደ-ኢትዮጵያውያን (ዲያስፖራ) እራሱን እስላማዊ መንግስት(ISIS/ዳይሽ) እያለ በሚጠራው አሸባሪ  የስልምና ሃይማኖት ተከታይ ነን ባይ ቡድን ካለጉዙ ሠነድ ተጉዘው በሊቢያና በደቡብ አፍሪካ ውስጥ ቆይታ አድርገው የወደፊት የኑሮ ግባቸውን በማውጠንጠን ላይ እያሉ ያላሰቡት ገጥሟቸው ጥቃት ደርሶባቸው የተገደሉትንና በግፍ የተጨፈጨፉ፤ የተዘረፉና በፍራት ለመኖር የተዳረጉት ወገኖችን በሂሊና ጸሎት ለማስታውስ ቁጥሩ በዛ ያለ ትውልደ-ኢትዮጵያዊያን በተገኙበት በከፍተኛ ስሜት በመሪር ሀዘን፣ በቁጭትና የቁጣ ድባብ  አጥልቶበት ተዘክሮ  ታልፏል።

በረጅሙ ከተዘረጋ አረንጓዴ፣ ቢጫና ቀይ የኢትዮጵያ ባንዲራ ጀርባ ተደርድረው ሻማ ሲያበሩ ያመሹት በውጭ አገር ነዋሪ የሆኑ ኢትዮጵያውያን ኃዘን በሰበረው ልብ፣ በቆሰለ ስሜትና አንገታቸውን ቆዝመው ትካዜ የተሞላው ዘለግ ያለ የፅሞና ጊዜ የወሰዱ ሲሆን፤ በዲሞክራሲ ስም “እኔ ባልበሰው ጭሬ ላበላሸው“ የሚል ድብቅ ካባ ለብሰው የሚንቀሳቀሱትን ቡድን ደጋፊ የሆኑ የፖለቲካ  ተቃዋሚ ፓርቲ ተወካዮች/አባል ነን ባዮች አንገታቸው እንደከብት በካራ ታረዶ ሕይወታቸውን ላጡትና ለቆሰሉት ወገኖች ስም የተካሄደውን የጸሎት መድረክ በመጠቀም ‘ለዚህ ሁሉ መንግሥት ተጠያቂ ነው’ እያሉ ህሊናን ሞጋች የሆነ የፖለቲካ አጀንዳ አቋማቸውን በንግግር ሲያሰሙ ሌሎችም ይህ የብሄራዌ ጉዳያችን ነው እንጂ የፖለቲካ ጉዳይ ማስተጋቢያ አይደለም በማለት የቅሬታ ስሜታቸውን እየገልጹ ተካፍለውታል።

በዚህም መሰረት የተለያዩ ኢትዮጵያውያን የተሰማቸውን ጥልቅ ሀዘንና ቁጣ እንደ የዕይታቸው ለመግለጽ ዕድል አግኝተዋል። ሰለባዎቹን በመዘከርና ገዳዮቹን በመኮነን ሳይወሰኑ የችግሩን ምንጭ ለመመርመር የሞከሩም ግለሰቦች ነበሩ። በታሪካችን ባልታየ ደረጃ የኢትዮጵያ ልጆች እንዲሰደዱና ክብራችን በማንም የሚደፈር የተናቅን እንድንሆን ያበቃን ነገር ምን ይሆን የሚሉ ጉዳዮችን ያበጠልጥሉ አስተያየቶችም እንደተሰሙ የብዙሃን መድረኮች ዜናውን ለዓለም   ሕዝብ ጆሮ አድርሰዋል፡፡  የበተ-ዓምልኮ አባላትና የደብር አድባራት አለቆችም እንዲሁ በተለይ በሊቢያ ህይወታቸውን ባጡት ወገኖቻችን ላይ ያተኮረ የፍትሀተ ፀሎት እያደረጉ ከዕምነት አኳያ ለተሰዉት ሰማዕታት ክብር ሰጥተውና ፈጣሪ ኢትዮጵያውያንን ያስባል፣ ይህ የስደት ዘመን እንዲያበቃ ጸንተን እንጸልይ የሚሉ ጥሪዎችንም አስተላለፈው መጽናናትን መክረው ሕዝቡን በፀሎት  አሰናብተዋል።

ኢትዮጵያውያን ለምን ይጠቃሉ፤ በተለይ ኢትዮጵያውያን ሰደተኞች በየደረሱበት ለጥቃት ከሚዳረጉበት አንደኛው ምክንያት ኢትዮጵያና ኬንያ የፖለቲካና የኢኮኖሚ ፍላጎታቸውን ለማጠናከር ከምዕራብያውያን አገሮች ያልተቆጠበ ዕርዳታ ለማግኘት ሲሉ በሃይማኖት ሳቢያ በግድያ ዓለምን ያተራመሰው አልቃይዳንና አካሉ የሆነውን የእስላማዊ አሸባሪ ኃይል በጋራ ለመዋጋት ከምዕራብ አገሮች ጋር በመተባበር የተቀናጀ የጥቃት ቃልኪዳን ፖሊስ ስለሚያራምዱ ሽፍቶቹም በአጸፋው በአገራቸው ውስጥና በስደት ላይ የሚኖሩ ኢትዮጵያውያንና ኬንያውያን ዜጎቻቸውን ባገኙበት ቦታ እያሳደዱ በመግደል፤ንብረታቸውን በመዝረፍና በማቆሰል ያደረባቸውን የበቀል ስሜታቸውን  ስለሚወጡ ነው፡፡

መፍትሄ፡ወላጅ፤ዘመድ አዝማድና የቅርብ ጓደኛ የሆኑ ለመውጣት የሚጋበዙትን ወገኖች ለእነሱ ያለንን ፍቅርና ጊዜ በማፍሰስ አበክሮ ምክር መለገስ እንጂ ሕይወታቸውን እንዴት እንደሚመሩ ምርጫው የእነሱ ነው፡፡ ቢያምኑ ባያምኑበትም የውጭው አገር ኑሩ ምን እንደሚመስል፤በግላችን ላይ የደረሰ ነገር ካለ ካለሃፍረት በማረጋገጫ የተደገፈ ትክክለኛውን የኑሮ ነጸብራቅ በመግለጽ፤ በመንገድ ላይ ስለሚገጥማቸው ያልተጠበቀ ጥቃትና በአጠቃላይ ወጥተው ለሚደርስባቸው ከባድ ችግሮች በምንም መልኩ እንደማይጋሩላቸው አጠንክሮ በመንገር ኃላፊነትን ከእራሳችን ላይ በማውረድ ነው፡፡ሌላው አማራጭ የመርዳት ፍላጎቱና የገንዘብ አቅሙ ካለ ባሉበት ሠርተው መኖር የሚችሉበትን ሁናቴ በመፍጠር ብቻ ነው እንጂ ከአገር አትውጡ ብሎ ማሰገደድ የሚቻል ነገር አይመስልም፡፡

ጦሱ ያሳደረው ተጽዕኖ፡ይህንን ዓላማ በአዕምሯቸው የቋጠሩ ሰዎች አሜሪካ  ክፉኛ ኢኮኖሚ  ውድቀት እንደደረሰባትና በኑሩ ውድነት ሳቢያ የውጭ ሰው ወደ አገሯ እንዲገቡ የመቀነስ ፍላጎቷን ያልተረዱ ሰዎች  በጉዙዋቸው ተሳክቶላቸው ህይወታቸው  ከሞትና ከመታሰር ከተረፈ እግራቸው የረገጠበት የውጭው አገር ለመቆየት ሳይሆን ከአገር የወጡት አሜሪካና አውሮፓ አገሮች ገብቶ ለመኖር ብቻ ነው የሚልውን  አስተሳሰብ ተግባራዊ ለማድረግ ወደ እነዚህ አገሮች ለመግባት የማያደርጉት ጥረት ባለመኖሩ በስደተኞቹ ላይ የደረሰው አደገኛ ጦስ በውጭና በአገር ቤት በሚኖረውም ወገን፤ዘመድና አዝማድ ላይ ያልታሰበ ጭንቀት/ተጽእኖን አሳድሯል፡፡

የስደተኛ አስተናጋጅ አገሮች ምን ይላሉ

እንደሚታወቀው ከተለያዩ አገሮች በጦርነት የሚፈናቀሉ፤ በኢኮኖሚ፤ በረሃብና በፖለቲካ ጥገኘነት ጠያቂዎችን በብዛት ተቀብለው የሚያስተናግዱ አገሮች በአብዛኛው ዩናትድ ስቴትስና የአውሮፓ አገሮች ነበሩ፡፡ ነገር ግን  የብሄራዊ ጥቅማቸውን ለማስጠበቅ ሲሉ በጦርነትና ዘመኑ ያመጣባቸው የፖለቲካ፤የኢኮኖሚና የማህበራዊ ኑሩ ሁኔታ የነበራቸው የኢኮኖሚ፤የፖለቲካና የውትድርና የበላይነት ጥንካሬያቸው ለመዳከም በቅቷል፡፡ እንዲሁም የስደተኞች ብዛት መጨመር፤ ዓለም አቀፋዊ የአሽብሪ ኃይልና ጸረ-ስደተኛ ቡድኖች በየአገሮቻቸው ውስጥ እየተጠናከረ መምጣት እንዲሁም የዓለም ጆዎፖለቲካ አካሄድና አቅጣጫ ስላሳሳባቸው ስደተኞችን ተቀብሎ የማደራጀትና የማኖሩን ጉዳይ በይታሰብበታል ይዘውታል፡፡

አሜሪካና ምዕራብ አገሮች ገብቶ ተግቶ ሰርቶ በማደር፤ በትምህርትና ንብረት በመያዝ መሰረታዊ ፍላጎትን በማሟላት እራስን ለማሻሻል ይቻል የነበረው የቀድሞ መልከ-ብዙ የብልጽግና ሕልማዊ አስተሳሰብ በአሁኑ ጊዜ የዓለም ሁኔታ ተለዋውጦ የአሜሪካና የአውሮፓ ባለሃብቶች ርካሽ የሰው ሓይል ጉልበት እንደልብ ወደሚገኝባቸው አገሮች ሃብታቸውን በማዞርና ዕውቀታቸውን በማፍሰስ ድርጅት ከፍተው  እየተጠቀሙ ለማትረፍ  እያሉ ወደ ደሃ አገሮች ፊታቸውን ስላዞሩ እንኳን ለውጭው መጤ ዜጋ ለእራሳቸውም ህዝብ  የሥራ ዕድል ተጣብቦ ለመንግሥት ድጎማ የተዳረገበት ጌዜ ሆኖባቸዋል፡፡

በዓለም የተንሰራፋው የኢኮኖሚ መንኮታኮት የሚያንሰራራበት ጊዜው አዝጋሚ በመሆኑ በደሃና በሃብታም መካከል ያለው ልዩነት ሰፍቶ 1-99% ሆኗል፡፡ይህ ሁኔታ በመፈጠሩ ቀደም ብሎ ገብቶ የሚኖረው ስደተኛውና የአገሩ ተወላጅ ህዝባቸው የመበልጸግ ህልሙ የማይጨበጥ ስለሆነበት  እንኳን ስደተኛው የአገራቸው ሕዝብም  በቀላሉ ያገኝ የነበረውን ገቢ አሁን በጣም ደክሞ ሠርቶ እንዲያገኙ ለመብቃታቸው በአገራቸው የምንኖር ትውልደ-ኢትዮጵያውያን ዲያስፖራም ተቋዳሽ ስለሆንን የዓይን ምስክሮች ለመሆን በቅተናል፡፡ ስለሆነም ለሥራ አጡ  ህዝብ  የመንግስት እራዳታ እየሰጡ ከማስነፍ አዲስ የገበያና የህዝብ አስተዳደር ፖሊስ  ነድፈው በማውጣት ህዝባቸውን ለመርዳትና የሕዝብ ብሦት እንዲያቆም ለማድረግ ታጥቀው ተነስተዋል፡፡

በዚህ ሳቢያ ወደ አሜሪካና አውሮፓ ለመግባት የሚጓጓዘው የውጭ አገር ዜጋ ከአገሩ ሳይወጣ  አገራቸው ገብቶ ሊጨብጥ የሚፈልገውን ህልሙን በአገሩ ማሳካት እንደችልና ስደተኛ አልተቀበሉም ተብለው እንዳይወቀሱ አሜሪካና አውሮፓ የበለጸጉበትን የአሰራር ባህላቸውንና የገንዘብ ማግኛ ስልታቸውን የወዳጅ አገሮቿቸው ህዝብ ተጠቃሚ እንዲሆኑላቸው በቴክኖሎጂ፤ በሲኒማ፤ በቴሌቪዥን ድራማ፤በሙዚቃና በተለያዩ የምርትና የግልጋሎት  ውጤቶችንና የህዝባቸውን አኗኗር ዘዴዎቿቻውን የሰው ኃይል ርካሽ ወደሆነባቸው አገሮች ስለላኩ ወደ አሜሪካ እየተሰደዱ ማግኘት የሚችሉትን በአገራቸው እንዲያገኙት በማድረጋቸው እበለጽጋለሁ የሚለው ሰርዓተ-ህልም በአሜሪካና በምዕረቡ አገሮች ለማግኘት አይቻልም የሚለው መልዕክታቸው ያልደረሳቸው ግለሰቦች ናቸው ከአገር ለመውጣት በየበረሃውና በየስደተኞች መጠለያ ጣቢያ የሚጉላሉት ብለዋል፡፡ የዓለም የፖለቲካ ጥገኝነት ጥያቄ አለኝ የሚሉ የውጭ አገር ዜጎች ካሉም አሳማኝ ጉዳያቸውን በአገራቸው ውስጥ ባሉት ኤምባሲዎቿቸው አማካይነት ከጨረሱ በኋላ ወደ አሜሪካና አውሮፓ አገሮች ለመግባት እንደሚችሉ አመቻችተናል ይላሉ፡፡

ይህን በማድረጋቸው ሞያውና ዕውቀት ያላቸው የአሜሪካና የአውሮፓ አገሮች  ህዝብም ንብረትነቱ የአሜሪካና የምዕራብ አውሮፓ አገር ዜጋ ሥር በሚተዳደሩ ድርጅቶች ውስጥ ሄዶ ለመሥራት ፈቃደኛ ከሆኑና ካመለከቱ ሰርቶ የመኖር ሕልማቸውን እውን ለማድረግ ቅድሚያ እንደሚሰጡዋቸው ይፋ ስላደረጉ ሥራ ፈላጊው ህዝባቸው ተጠቃሚ በማድረግ ላይ በመሆቸው ከአገሩ ወጭ እሄደ የሚሰራው የአሜሪካና የአውሮፓ ዜጋ ቁጥሩ በርካታ እንደሆነ በየጊዜው እየወጣ የሚሰራጨውን አሃዝ በቀላሉ መመልከት ይቻላል፡፡ ይህ በመሆኑም የአሜሪካና የአውሮፓ ባለሃብቶች በውጭው አገር በርካሽ ጉልበት የሚያስመርቱትን የምርት ውጤታቸውን  ወደ አገሮቻቸው ውስጥ እያስገቡ ወገናቸውን ለመጥቀምና ገቢያ እንዲያገኙበት በምርታቸው ላይ የየአገራቸውን ሰም ወይም ሰንደቅዓላማ ምልክቶች እያስለጠፉ የምርት ውጤቶችን በውጭ ቀርቶ በአገራቸው ገበያ ላይ በማዋል መቸርቸር ከጀመሩ ከርማዋል፡፡

ይህን የሥራ ዕቅድ የተጠቀሙ የአሜሪካና የአውሮፓ ባለሃብቶች በኢነቨስትሜንት ስም በአገር ውስጥ ያላቸውን ጥሬ ገንዘብ አሸሹ ተብለው ታክስ አልከፈሉም በሚል ምክንያት ባለሃብቶችንና ከእነሱ ጋር ውለታ የፈጸሙ በውጭ አገር ያሉ ባንኮች ሃብታቸውን ያዞሩ ግልሰቦች ስም ዝርዝር አቅርበዋል፡፡ ይህ የሚጠቁመው የገበያ ፍክክር መሰፋቱንና በጋርዮሽ ኢኮኖሚ መኖር የዘመኑ ቴክኖሎጂ ስለሚያግልጥ ነው፡፡ እንደ አሁኑ ጊዜ ዓለም ሳይሰለጠጥና የዓለም ሕዝብ የትም ብንሄድ አገሬ ነው የሚለው አመለካከት ያደረባቸው ስደተኞች ዓላማ ሳይጠናከር ብቻቸውን ባካበቱት የግልዮሽ ሃብት ጥርቅም ሳቢያ ሃብታም ያሰኛቸው መዋለ-ነዋይ በማህበር የተደራጀው ሰራተኛ የኑሮ ውድነት ለመቋቋም የደመውዝ ዕድገት ጥያቄ ግፊት መሳሪያ ሆኖላቸው መንግስትንና ቀጣሪ ድርጅቶችን ሲያሰገድዱ መንግስታትም በአጻፋው ቀጣሪ ደርጅቶች የሥራ ሰዓታቸውን ለቀነሱባቸው ሠራተኞች የኑሮ ድጎማ በመስጠት፤አሰሪዎች የሰራተኛውን ደመወዝ መጠን እንደ እየአካባቢው የኑሮ ሁናቴ ከፍ እንዲያደርጉና የሕዝቡን ጤንነት ለመንከባከብ የኢንሽራንስ ድርጅቶች ወርሃዊ የክፍያ መጠናቸውን ዝቅ እንዲያደርጉ በመዋዋል ሳይወዱ በግድ ፊታቸውን ወደ  ህዝባቸው ጉዳይ ለማዞር ተገድደዋል፡፡

ከዚህም በተጨማሪ በአገሩ ውስጥ በደረሰው የሥራ አጥነትና ተጧሪው ሕዝቧ ቁጥር መበራከት ከአገራቸው ኢኮኖሚ  አቅም በላይ  ስለሆነባቸው እንጀራ ፈላጊ ስደተኛ መጤው ወደ አገር ውስጥ እየገባ የስራ ዕድሉን እንዳያጣብብ ብሎም የክፍያ መጠኑን እንዳያርክሰው የመጤውን ህጋዊ መግቢያ በር ለማጥበብ ድርጅቶች ካለፈቃድ ሰራተኛ ቀጥረው ቢገኙ ከፈተኛ ቅጣት ጥለዋል፡፡ በተጨማሪም ቀደም ሲል በአገር ውስጥ ገብተው የመኖሪያ ፈቃድ ሳይኖራቸው ለሚኖሩት ስደተኞች፤ለአቅመ ዓዳም ላልለደረሱ ልጆች፤ኢንቨስትሜንት ለማድረግ ለሚፈልጉ ከበርቴዎችና ልዩ ሞያ አለኝ ለሚሉ ስደተኞች ብቻ ፈቃድ እንስጣለን ብለው የውጭ ሰው ወደ ምድረ-አሚሪካና አውሮፓ አገሮች እንዳይገቡ አዲስ የእምግሬሽን ሕግ አውጥተው በሥራ ላይ ለማዋል የሚጥሩና ተግባራዊ ያደረጉ አገሮች አሉ፡፡ ፀረ-ስደጸኛ/አገር ወዳዱ ህዝባቸውም በበኩሉ በሳውዲና በደቡብ አፍሪካ አገሮች ውስጥ የተፈጸመው አሰቃቂ ግድያ ዓይነት አይብዛ እንጂ የመኖሪያና የንግድ ቤታቸውን በማቃጠል አገራችን ውስጥ ያላችሁ ስደተኞች ውጡልን፤ ለመምጣት የምትፈልጉም አትምጡብን ለማለት ቅሪታቸውን ለመግለጽ ደክሞ አዳሪ ስደተኛ ላይ አልፎ አልፎ ህገወጥ ድርጊቶች በመፈጽም ተቃውሟቸውን በየመልኩ እያሳዩ ስንቱ ስደተኛ በሥራ ላይ እያሉ ተገድለው ህይወታቸውን፤ አካላቸውንና ንብረታቸውን ለማጥታ እንደበቁ ሁላችንም የምናውቀውና ተሰምቶ የታለፈ ታሪክ በመሆኑ አምሻሻቶ በሚሰራባቸው የንግድ ድርጅቶች ውስጥ ተቀጥሮ የሚሰሩ ስደተኞች ቁጥር ጥቂት እንዲሆን ምክንያት ሆኗል፡፡

የአውሮፓ አገሮችና አሜሪካንም የደረሰባቸውን የኢኪኖሚ ችግር ለመቋቋም ሰለተቸገሩና ሥራ አጡ ህዝባቸው ቁጥር እየበዛ ስለመጣባቸው ቀድሞ ይገዟቸው ከነበሩና በኢኮኖሚ ካላደጉ አገሮች ወደ አገራች በጦርነት የሚፈናቀሉትን የተሻለ ኑሮ ፍለጋ በስደተኛነት ወደ አገራቸው ለመግባት በጀልባ የሚያጓጓዙትን ስደተኞች ተቀብሎ ለማስተናገድ ኮታው ስለሞላና በሰርጎ ገብ አሸባሪዎች ጸጥታ መደፍረስ ከጊዜ ወደ ጊዜ መልኩን እየለወጠና ወንጀሉ እየጨመረ በሄደ ቁጥር ለመቆጣጣር ከአቅማቸው በላይ እንደሚሆን ከወዲሁ ስለተገነዘቡ የሰው ንግድ ዝውርውር ምንጩን ማድረቅ ብቸኛ አማራጭ ነው የሚለውን አቋም ይዘው ስደተኞች ከሚወጡባቸው አገሮች ጋር በመተባበር መመሪያ አርቅቀው በሥራ ላይ ለማዋል የተባበሩት መንግሥታት ደርጅትን አባላት ሙሉ ድጋፍ በመጠየቅ ላይ ይገኛሉ፡፡

መድረሻ፡በውጭው ዓለም በጥገኝነት የምንኖረው ዲያስፖራ የመኖር ዋስትናችን ባላታወቀ ምክንያት ተጓድሎ ውጡልኝ ብንባል ምን ማድረግ ይኖርብናል ለሚለው አርቆ የማሰብ ጥያቄ መልስ ይሆናል ተብሎ በግምት ውስጥ ልናስገባ የሚገቡ የቅድመ-ዝግጅት ጉዳዮች ቢኖሩ የሚከተሉትን ይመስላል፡፡ በተግባር እንደታየው ከሆነ አሜሪካና አውሮፓ ተሰድደን የምንኖረው ሙሉ ጤና ካለንና አኗኗሩን ካወቅንበት ፍላጎታችንን ለማሟላት ችግር ስለማይገጥመን፤አይሆንንም ትተን ይሆናልን በማሰቀደም አንድም ቀጥ ብሎ በመሥራትና በቁጠባ እየኖርን ገንዘብ መቋጠር፤ አሊያም ቀጥ ብለን በመማር ዕውቀት በመገብየት የመጣንበትን ዓላማችንን አሳክተን በመዘጋጀት ሁናቴዎች አስተገድደውን እስከምንወጣ ድረስ መቆየት እንችላለን፡፡

ከችግር ነጻ የሆነ ምንም ነገር ባይኖርም፤ ከሚያጋጥሙ የኑሮ ሁኔታዎች አኳያ ሲታይ ከአገር ወጥቶ መኖሩ ብቻ ብዙ ችግሮች እንዳሉት በተሞክሮ ከሞላ ጎደል ለማረጋገጥ ችለናል፡፡በመሆኑም በየምክንያቱ ክፍፍሉንና ሽኩቻውን ትተን በተናጥልም ሆነ በጋራ ትከሻ ለተከሻ ገጥመን ካልቆምንና ኃላፊነታችንን በተገቢው መንገድ ካላተወጣን በቀር ችግሮች አፍጥጠው ሲመጡ ወዲያው ልንወጣው የማንችለው ጉዳይ እንደሚሆን የዓለም ኢኮኖሚው ሁናቴ ፍንጭ እየፈነጠቀ  በመሆኑ ወገኖቻችን በጥቁር አፍረካውን በግፍ ተገድለውና ቆስለው ማየታችን የሰው አገር ምን ጊዜም የሰው አገር መሆኑን  በሊቢያና በደቡብ አፍሪካ ውስጥ ይኖሩ በነበሩ ኢትዮጵያውያን ላይ የደረሰው በደል ነግ(እ)በኔ ሁኔታን በዲያስፖራው አንደበት አሳድሮ ለማለፍ ምክንያት እንደሆነ የተገነዘብ እንኖራለን፡፡ የየትኛውም አገር ስደተኛ ወደ አሜሪካ ለመኖር ቆርጦ የመጣው የትምህርትና የኢኮኖሚ ዕድል ለማግኘት ስለሆነ፤ እኛም ከእነኝህ ዕድሎች ውስጥ አንዱን መርጠንና ዓላማ አድርገን ካልተንቀሳቀስን በቀር ተሰድደንና ተቸግረን እየኖርን ነው የሚል ምክንያት እየሰጡ በሊቢያ፤በሳውዲ አረቢያና በደቡብ አፍርቃ ለጊዜው መኖር እንደማያዋጣ ከወዲሁ ግንዛቤ የሚያስጨብጥ ድርጊት ይመስላል፡፡

ጸሐፊው ነጻ ጸሐፊና መጽሐፍትን አሳትሞ አስነብቧል፡፡

The post የደቡብ አፍሪካና የሊቢያው ጉዳይ ነግበ(እ) ኔን አሳደረ appeared first on Zehabesha Amharic.

ባለፈው ጊዜ በISIS ብዙ የጨርቆስ አካባቢ ወጣቶች መስዋዕት የሆኑ መሆኑ የሚታወቅ ሲሆን አካባቢው ነዋሪ ከሃዘኑ ሳያገግም ሌሎች ወጣቶቻቸውን አጥተዋል።

በቅርቡ በሜዲትራኒያን ባህር ላይ በሰጠመችው ጀልባ ላይ ከነበሩት ውስጥ ወደ ሰባት የሚሆኑ ወጣቶች የጨርቆስ ወጣቶች ሲሆኑ የሁለቱ 1/ አቤል ሽብሩ 2/ ቴድሮስ የተባሉ ወጣቶች ቤተሰቦች በትላንትናው ዕለት ተረድተው ቤተሰቦቻቸውና የአካባቢው ነዋሪዎች ሃዘን ተቀምጠዋል

The post [አሳዛኝ ዜና] ዛሬም አሳዛኝ ዜና ከወደሊቢያ ተሰማ * ሁለት እናቶች ጨርቆስ አካባቢ የልጆቻቸውን የሊቢያ ሞት ተረዱ appeared first on Zehabesha Amharic.