ሰማያዊ ፓርቲ እንዳስታወቀው በአሜሪካን ሀገር ስቴት ዲፓርትመንት የተዘጋጀለትን ወጣት የአፍሪካ መሪ የሚል ሽልማት ለመውሰድ ዛሬ ሌሊት ወደ አሜሪካ ያቀና የነበረው የሰማያዊ ፓርቲ ሊቀመንበር ኢ/ር ይልቃል ጌትነት በቦሌ አየር መንገድ ከተገኘ በኋላ ከሀገር መውጣት አትችልም በሚል ታግቶ ይገኛል፡፡ በረራው 4 ሰአት ላይ የነበረ ሲሆን እስካሁን እስከሌሊቱ 8 ሰኣት ድረስ ታግቶ ይገኛል፡፡

ዝርዝር መረጃዎች እንደደረሱን እናቀርባለን።

“ለምንድ ነው የምትገፉኝ?” – መምህር ግርማ

(ዘ-ሐበሻ) ዘ-ሐበሻ የመምህር ግርማ ወንድሙን ጉዳይ ተከታትላ በመዘግብ ላይ ትገኛለች። አንባቢዎቻችን እውነታውን እስኪጨብጡ ድረስ ዘገባዎችን ማቅረቧ የሚቀጥል ይሆናል። በትናንትናው የዜና እወጃችን ቤተክርቲያን በአቡነ ገሪማ አማካኝነት የተጻፈን ደብዳቤ በመጥቀስ “የኢትዮጵያ ኦርቶዶክስ ተዋህዶ ቤተክርስቲያን “መልአከ መንክራት ግርማ ወንድሙ” በሚል ስያሜ የተበተነው ደብዳቤ ሕገ ወጥ በመሆኑ የሚመለከተው ሁሉ ይህን ግንዛቤ እንዲወስድ አሳሰበች፡፡” በሚል የተጻፈውን ደብዳቤዎች አቅርበን ነበር።

ቤተክርስቲያን መምህር ግርማን በፎርጂድ ደብዳቤ ማሰራጨት የሚወነጅል ደብዳቤ ቢወጣም ዘ-ሐበሻ ለመምህር ግርማ ከቤተክርስቲያን የተጻፉ 14 ደብዳቤዎችና የምስክር ወረቀቶች ደርሰዋታል። ይህም ፎርጂድ ደብዳቤ ጽፈዋል በሚል የወነጀላቸውን አካል ወይም መምህር ግርማ ህጋዊ ደብዳቤ ተሰጥቶኛል ብለው ያሰራጩትን ደብዳቤ ለተመለከተ ማን ነው የዋሸው ለሚለው ጥያቄ ምላሽ ሊሆን ይችላል የሚሉ አስተያየት ሰጪዎች አሉ። ያንብቡ ና የዋሸው ማን ነው ለሚለው ምላሽ ይስጡ።

“አንድ ሙዚቀኛ የሙዚቃ ትምህርት ቤት አንድ ሰርተፊኬት ብቻ ካለው ተቀባይነትና የታዋቂነት ክብር ይሰጠዋል፤ የሥራ መስኩም ይወደዳል፣ ይፈቀራል። ማንም የሚቃወመውም የለም፤ በሁሉም ዘርፍ ተፈላጊ ተወዳጅ ተሸላሚ ነው። በክፉ መንፈስ ከተጠቁት ጋር ለምውለው ለእኔ ግን የተገላቢጦሽ ነው። በሺህ የሚቆጠሩ የጥሪ አገልግሎትና የምስጋና ሰርተፊኬት አለኝ። ዛሬ ይህ ሁሉ ውሸት ሆኖ የመንደር አስማተኛ፤ የሱዳን ጠንቋይና የማይታወቅ አጭበራባሪ መለያ ስሜ ሆነ፤ ግን ለምን? ከጥቁር ፀጉር እስከ ነጭ ሽበት ያገለገልኩባት ቤተክርስቲያን ትምህርትና ፈውስ የሚፈልገው ሕዝብ ሲበዛ የፈውሱ ሂደት ከሃገር ውስጥና ከውጭ ዓለም ነጮችን ጨምሮ ሲከናወን የቤተክርስቲያን የወር ባጀት እና የዓመት ገቢ በእጥፍ ሲያድግ ለአባቶች እና በየአገረ ስበከቱ ላሉ አባቶች ሕዝቡ የፈውስና የትምህርት ፍላጎት ጥያቄ ሲበዛ ለምንድ ነው አስማተኛና ጠንቋይ የተባልኩት? ከነ ሙሉ መረጃው በሚቀጥለው… “አጥርቶም አየ… ከሩቅም ሳይቀር ሁሉን ተመለከተ” (ማር.23) መቆሚያና ማብቂያ የለውም ፈተና… ግን ለምን? ለምንድን ነው የምትገፉኝ?”

- መልአከ መንከራት ግርማ ወንድሙ

ደብዳቤዎቹን ለማየት እዚህ ይጫኑ

የአንድነት ፓርቲ የድርጅት ጉዳይ ኃላፊ አቶ ዳንኤል ተፈራ እና ምክትል ኃላፊ የሆኑት አቶ ዳንኤል ሺበሺ ደህንነታቸው አደጋ ላይ ነው፡፡

የሟቹን የቀድሞ ጠቅላይ ሚኒስትር የአቶ መለስ ዜናዊ ምስል ያለበት ቲሸርት የለበሱ ከ 10 የሚልቁ የመንግስት ካድሬዎች በወላይታ ሶዶ እየተደረገ የነበረውን አንድነት ፓርቲ የወላይታ ዞን ምክርቤት ስብሰባን በሀይል ማደናቀፋቸውን ከስፍራው ለፍኖተ ነጻነት የደረሰው ዘገባ አመለከተ፡፡
ካድሬዎቹ የስብሰባ አዳራሹን በሃይል በመስበር ከተሰብሳቢዎቹ ላይ የተለያዩ ሰነዶችን የቀሙ ሲሆን ብብደባ በመፈፀም ላይ ናቸው፡፡ በስብሰባ አዳራሹ ውስጥ የነበሩት የአንድነት ፓርቲ የድርጅት ጉዳይ ኃላፊ አቶ ዳንኤል ተፈራ እና ምክትል ኃላፊ የሆኑት አቶ ዳንኤል ሺበሺ ደህንነታቸው አደጋላይ መሆኑን ለፍኖተ ነፃነት ተናግረዋል፡፡

ዶክመንተሪው የ2007 ሀገራዊ ምርጫ ቅድመ ዝግጅት አካል እንደኾነ ተጠቁሟል

‹‹ማስረጃ አቅርቡና እንነጋገርበት›› ለሚለው የማኅበሩ ጥያቄ ምላሽ አልተሰጠም በኢትዮጵያ ኦርቶዶክስ ተዋሕዶ ቤተ ክርስቲያን ውስጥ የሲኖዶሱን ይኹንታ አግኝቶ በመላው አገሪቱ የሚንቀሳቀሰውን የማኅበረ ቅዱሳንን አመራርና አባላት በአክራሪነት የሚከስ ነው የተባለ ዶክመንተሪ ፊልም ለማዘጋጀት መታቀዱ ተጠቆመ፡፡

የጠቅላይ ቤተ ክህነቱ አንዳንድ ሓላፊዎች አቀብለውታል በተባለ መረጃ እንደሚታገዝና በመንግሥት አካል እንደሚሰናዳ የተገለጸው የዶክመንተሪ ዝግጅቱ በማኅበሩ ኻያ አመራሮች እና አባላት ላይ እንዳነጣጠረ ተገልጧል፡፡ መንግሥት በምርጫ – 97 ውጤትና በተከታይ ኹኔታዎቹ ላይ ባካሔደው ግምገማ፣ የማኅበረ ቅዱሳን አባላት ናቸው የሚባሉ ግለሰቦች በተለይ በገጠር ቀበሌዎች ለተቃዋሚዎች ተሰሚነት ማግኘት በምክንያትነት መጥቀሱ በዜና ጥቆማው የተመለከተ ሲኾን ‹‹የአክራሪነትና የጽንፈኛ ፖሊቲከኞች ምሽግ ነው›› በሚል የሚያቀርበው ክሥም ከዚኹ የሚነሣና ለመጪው የ2007 ሀገራዊ ምርጫ የሚደረግ ቅድመ ዝግጅትም አካል እንደኾነ ተነግሯል፡፡

በቅድመ ዝግጅቱ የሚወሰዱ ርምጃዎች የማኅበሩን አቅሞችና እንቅስቃሴዎች በመቆጣጠር በተለይም የማኅበሩ መሠረቶች ናቸው የሚባሉ የከፍተኛ ትምህርት ተቋማት ግቢ ጉባኤያትን ‹‹በሴኩላሪዝም መርሖዎች የመግባቢያ ሰነድ›› ጠርንፎ ‹የአገልግሎት ቅኝቱን የማስተካከል› ዓላማ እንዳላቸው የገለጸው የዜና ምንጩ፣ ይህም ካልተሳካ በተከታታይ አስተዳደራዊ ርምጃዎችና የተቃውሞ ቅስቀሳዎች ማኅበሩን በማወከብ ተቋሙን ለዘለቄታው የማፍረስ ውጤት ሊኖረውም እንደሚችል አመልክቷል፡፡’

ከአዲስ አበባ ሀ/ስብከት አብያተ ክርስቲያናት የተጠሩ ናቸው የተባሉ አስተዳዳሪዎችና ሠራተኞች የሚሳተፉበት እንደኾነ የተገለጸና ጠቅላይ ቤተ ክህነቱ በማኅበሩ አገልግሎት ላይ ቁጥጥሩን እንዲያጠብቅ የሚጠይቅ ስብሰባ በዛሬው ዕለት በቤተ ክህነቱ የመሰብሰቢያ አዳራሽ እንደሚካሔድ የተዘገበ ሲኾን ዓላማውም ‹‹በአክራሪዎችና ጽንፈኛ ፖሊቲከኞች ምሽግነት፣ የቤተ ክህነቱን አሠራር ባለማክበርና ከቤተ ክህነቱ በላይ ገዝፎ በመውጣት›› ማኅበሩ የሚከሰስባቸውን ኹኔታዎች በማጠናከር ለታቀዱት ርምጃዎች የሚያመቻች ነው ተብሏል፡፡

በከፍተኛ ትምህርት ተቋማት ተማሪዎች ላይ በማተኮር የተማረው ትውልድ ሃይማኖቱን የሚወድ፣ ግብረ ገብነት ያለው፣ ሀገሩንና ቤተ ክርስቲያኑን በዕውቀቱ፣ በሞያውና በገንዘቡ የሚያገለግል ብቁ ዜጋ ይኾን ዘንድ በቅዱስ ሲኖዶስ ጸድቆ በተሰጠው መተዳደርያ ደንብ መሠረት በመሥራት ላይ እንዳለ የሚገልጹ የማኅበሩ አባላትና ደጋፊዎቹ፣ ማኅበሩ ለቀረቡበት ክሦች የሚመች አደረጃጀት ይኹን ባሕርይ እንደሌለው በመግለጽ ተጠሪ ከኾነለት ጠቅላይ ቤተ ክህነት ጋራ በአሠራር ሒደት የሚፈጠር ክፍተትን በማጦዝ የሚሰነዘሩ ውንጀላዎች ተቀባይነት እንደሌላቸው ተናግረዋል፡፡ የተጠቀሱት ክሦች ላቀረቡት አካላት ‹‹የሚነገረውና የሚጻፈው እኛን የሚገልጸን ስላልኾነ ማስረጃ አቅርቡና እንነጋገርበት›› የሚል ጥያቄ ቢቀርብላቸውም ለሠለጠነ ውይይት ፍላጎት እንደሌላቸው አባላቱ አስረድተዋል፤ በምትኩ ‹‹ርምጃ እንወስዳለን›› በማለት በተለያዩ መድረኮች ማኅበሩን ማሳጣትና መክሠሥ እንደሚመርጡም ለፋክት መጽሔት አስታውቀዋል፡፡

ታቅዷል የተባለው የዶኩመንተሪ ዝግጅት እውነት ከኾነም ማኅበሩን ብቻ ሳይኾን የኦርቶዶክስ ተዋሕዶ ቤተ ክርስቲያንን የማዳከም አጠቃላይ ዘመቻ አድርገው እንደሚቆጥሩትና በቀላሉ እንደማይመለከቱት አሳስበዋል፡፡

ምንጭ፡ ፋክት መጽሔት ቅጽ ፪ ቁጥር ፴፰፤ መጋቢት ፳፻፮ ዓ.ም.)

ከወላይታ ዞን የአንድነት ፓርቲ አመራሮች የእስርና እንግልት ማብራሪያ

የአንድነት ለዴሞክራሲና ለፍትህ ፓርቲ የድርጅት ጉዳይ ሃላፊ አቶ ዳንኤል ተፈራና ድርጅት ጉዳይ ም/ሃላፊ አቶ ዳንኤል ሺበሺ በደቡብ ቀጠና በወላይታ ዞንና በሲዳማ ዞን አዋሳ ከተማ ያሉ ከፍተኛ አመራሮች ጋር የፓርቲውን የትግል ስትራቴጅክ ዕቅዶች ላይ ማብራሪያ፣ ደንብና ፕሮግራም ለመስጠት እንዲሁም የስራ ጉብኝት ለማድረግ በ 12/07/06 ወደ ወላይታ ዞን ሶዶ ከተማ ተገኝተው ነበር፡፡ በ13/07/06 ደግሞ ከሶዶ ከተማ ስራ አስፈፃሚና ከወረዳ አመራር አባላት ጋር የፓርቲያችንን ደንብ፣ ፕሮግራምና ቀጣይ የስራ አቅጣጫ አስመልክቶ የተሰናዳው ውይይት ላይ ለመታደም ከ32 በላይ አመራሮችም ተገኝተው ነበር፡፡

ቅዳሜ በ 13/07/06 ዓ.ም ከአባላት ጋር ባለው ዕቅድ መሰረት የፓርቲያችንን ህጋዊ ሰነዶችን ለወረዳና ለዞን አመራሮች ለመስጠት፣ ቀጣዩን ሀገራቀፍ ምርጫ አስመልክቶ መረጃ ለመለዋወጥ ምርጫችን የነበረው የፓርቲያችን አባል የሆነውና ወጣ ብሎ ፀጥታ የሰፈነበት ግቢ ነበር፡፡ ይህንን ለማድረግ ህገ መንግስታዊ መብት ነበረን፡፡ የአንድነት ፓርቲ ከፍተኛ አመራሮች የፖለቲካ ደንብና ፕሮግራማቸውን ለዞንና ለወረዳ አመራሮች ለማስጨበጥ ፈቃድ እንደማያስፈልግ ጠንቅቀን እናውቅም ነበር፡፡

በተለይም ሃለማሪያም ደሳለኝ በሞግዚትነት ወደ ስልጣን ከመጡ በኋላ ወላይታ ሶዶ ነፃነት አልባ ከተማ እንደሆነች ለማረጋገጥ ችለናል፡፡ ወላይታ በካድሬ ተወጥራለች፡፡ ዝርዝሩን በቀጣይ እንደምናቀርብ ቃል እየገባን ለአሁን በእኛ ላይ የደረሰውን በቅንጭቡ እንደሚከተለው ለኢትዮጵያ ህዝብና ለታሪክ እናቀርባለን፡፡

1. 32 የሚሆኑ አንድነት ፓርቲ የወላይታ ዞን አመራሮች የተሰባሰቡት ከላይ በገለፅነው አላማና ህገ መንግስታዊ መብታችንን ተጠቅመን ቢሆንም ለውይይት ቅድመ ዝግጅት ስናደርግና ውይይቱን ለመጀመር ስንዘጋጅ መታወቂያ የሌላቸው ከ 8-10 የሚሆኑ ጡንቻቸው የፈረጠመ ግለሰቦች እንደ ኮማንዶ ለውይይት የተገናኝበትን የአባላችንን ጊቢ ሰብረው በመግባት የያዝናቸውን የፓርቲ ሰነዶች፣ ሳምሰንግ ጋላክሲ ስልኮችና ያገኙትን ሁሉ ዘርፈው ሂደዋል፤ አመራሮችን ደብድበዋል፡፡

2. እነዚሁ ደብዳቢዎች ታርጋ ቁጥር በሌላቸው ሞተሮች በመታጀብ ፖሊስ ይዘው በመምጣት ፕሮግራማችንን ለማደናቀፍ በሃይልና በጉልበት ወደ ፖሊስ ጣቢያ ወስደውናል፡፡
3. ፖሊስ ጣቢያውም እኛን የደበደቡንንና ንብረታችንን የቀሙንን ሲቢል ለባሽ ካድሬዎች በመልቀቅ የአንድነት ፓርቲ 20 አመራሮችን የወላይታ ሶዶ ከተማ ፖሊስ አዛዥ ሻለቃ ላሊሼ ኦሌ ቢሯቸው አስገብተው ችግሩን እንደሚቀርፍ አመራር ካነጋገሩንና ቃላችንን ከተቀበሉ በኋላ ሞባይሎቻችንን በመንጠቅ እንድንታሰር አድርገዋል፡፡
4. የእስሩ ሰዓት ከቀኑ 5፡00 ጀምሮ ነው፡፡ እንድ ቀፋፊና አስቀያሚ ማጎሪያ ውስጥ ካስቀመጡን በኋላ ከምሽቱ 2፡00 ላይ ህገወጥ ስብሰባ አድርጋችኋል በማለት ቃል ስጡ የሚል ምዝገባና ህገ ወጥ ስብሰባ እንዳደረግን እንድንመሰክር ለማስገደድ ቢሞክሩም እኛ መብታችንን እንደተጠቀምን እንጂ እነሱ እንደተረጎሙት ህገ ወጥ ስብሰባ እንዳላደረግን ሀቁን ስንነግራቸው እንዲሁም ሀሰትን ከመቀበል መታሰር እንደሚቻል የአንድነት አባላት ቁርጠኛ እንደሆንን ሲያውቁ ግራ ተጋብተው የበላይ አካል እስከሚያረጋግጥላቸው ጠብቀው ከእኩለ ለሊት በኋላ (ከምሽቱ 6፡30) በኋላ በእስር ላይ የቆዩ ከ20 በላይ ከፍተኛ አመራሮች እንዲወጡ ተደርጓል፡፡ ይሄ የሆነው ለመፍታት ታስቦ ሳይሆን ከወረዳ የመጡ አባላት ማደሪያ ቦታ እንዲያጡና ለአደጋ እንዲጋለጡ በማሰብ ነው፡፡

5. ስንታሰር ከተዘረፉ ሞባይሎች ውጭ በፖሊስ ጣቢያ አዛዡ ተይዞ የነበረው የታሳሪዎች ሞባይል ባልታወቀ ነገር ተነክሮ ከአገልግሎት ውጭ ተደርጓል፡፡ ሞባይላችን የተነከረውና ከጥቅም ውጭ የተደረገው በኬሚካል ይሁን በሌላ ነገር አልተረጋገጠም፡፡ የማንኛችንም ሞባይል ግን ከጥቅም ውጭ ሁኗል፡፡ ይሄ የሆነው የፖሊስ አዛዡ አቶ ላሊሼ ቢሮ የታሰረ ሞባይላችን ነው፡፡

ነገ ምን እንደሚገጥመን ማወቅ አይቻልም፡፡ ያረጋገጥነው ነገር ቢኖር ወላይታ ሶዶ ነፃነቷን የተነፈገች፣ በታርጋ አልባ ሞተሮች የምትታመስና ምንም ዋስትናና ህግ የሌለባት ከተማ መሆኗን ነው፡፡ ስለዚህ ነፃነት አልባዋ ወላይታ ነፃ መውጣት አለባት!!!

የአንድነት ፓርቲ የወላይታ ዞን አመራር አባላት ከምሽቱ 9፡00 ሠዓት

ሶዶ ከተማ

ከሥርጉተ ሥላሴ 23.03.2014 ( ሲዊዘርላንድ – ዙሪክ)

በእኔ ውስጥ እኔ ነኝ ያለሁት። እማስበውም አምጽፈወም በነፃ ዕይታ መንፈሴን ቃልቲ ወይንም ቂልንጦ ሳልክ ውስጤ የሚለኝን በድፍረትና በልቡ ሙሉነት ነው። ስለዚህ እኔ „እኔን“ ስገልጽ ተሸማቅቄ ወይንም ምን ይሉኝ ብዬ ወይንም አዩኝ አላዩኝ ብዬ ተሸፋፍኜ አይደለም። በዬትኛውም ዘመንና ጊዜ እኔ „እኔን“ ተውሶት ወይንም ተበድሮት አያውቅም። በጣም ብዙ ሰዎች በተለያዬ አጋጣሚ ከልጅነት እስከ እውቀት ሥርጉተን ያውቋታል። ጊዜና ሁኔታ ሲፈቅድም ቆመው ይመሰክራሉ። ባነብም ባዳምጥም እምኖረው ግን እራሴን ሆኜ ነው – በጣም በእርግጠኝነት። ተዳብሎ የሚኖር ፍላጎት ሆነ ጭሰኛ ወይንም ሞፈር ዘመት ስሜቴ ያዘለ ወይንም የሙጥኝ ብሎ ጥገኝነት የጠዬቀ ፍላጎት ኖሮኝ አያውቅም። ለዚህም በሙሉ መንፈስ እራሴን ሆኜ እንድኖር መንፈሴን በማያቋርጥ የራስ መተማማን መስኖ አልምተው ያሳደጉኝን ወላጆቼንና እጅግ የሚናፍቀኝን ማህበረሰቤን አመሰግናለሁ።

ስለዚህም እኔ ለምሰጠው አስተያዬት እኔን የወከለ ስለሆነ ጊዜ ወስዳደችሁ ለምታነቡት ወገኖቼ እንዲሁም፤ አሉታዊ ሆነ አዎንታዊ አስተያዬት ለምትሰነዝሩት ወገኖቼ እኩል አክብሮት አለኝ። እማርበታለሁም። አመሰግናችኋላሁ። አለፍ ብላችሁ መሄድ ካሰኛችሁም ሥርጉተ ጠጥታው ያደገችው ፈተና ሆነ ተመክሮ ሁሉንም ለማስተናገድ ስለመቻሏ መለኪያዋ ስለሚሆን አዝናንታ እንደምታስተናግደው ተሰፋ አላት – እራሷ።

ትናንት ነበር ያነበብኩት የሰማያዊ ፓርቲ ሊቀመንበር ፓርቲያቸውን ወክለው ወደ አሜሪካ የተዘጋጁበት ጉዞ እንደ ታገዱ ከዘሃበሻ። ከዚህ የባሰ ፈተና ብጠብቅም አዘንኩኝ። http://www.zehabesha.com/amharic/archives/13729

እጅግ ያሳዘነኝ ደግሞ ከአንባብያን የተጻፉት አስተያዬቶች ናቸው። ለመጻፍም ያነሳሳኝ ይሄው ነው። አንዱ ወያኔ ያዘጋጀው ነው አትመኑት የሰማያዊ ሊቀመንበር እንደ ልደቱ ነው ይላል። ሁለተኛው ደግሞ ወርዶ ታች ሰፈር ይቆጥራል። ወያኔ ከወሰደው የእገዳ እርምጃ ሁለቱም አሉታዊ ሆነ አዎንታዊ አስተያዬቶች አሳዘኑኝ። ሰው እንዴት እራሱን ማሸነፍ ይሳነዋል። እኛ እንዲህ መንደር ካሰኘን፤ ስለምን ወያኔን እንነቅሳለን። ለሁላችንም መዳኛችን ኢትዮጵያዊነታችን ነው። ማናቸውም ሰው ሲያጠፋም ሆነ በጉ ሲሰራ መመዘን ያለበትም በዜግነቱ መሆን አለበት እንጂ ጎጡ?!  ክብርና ግርማ፤ ፍቅርና ትህትና፤ ናፍቆትና መሆን ያሉት ከሚስጥሩ እንብርት ከኢትዮጵያዊነት ላይ ነው። የትናንት ጀግኖቻችን ናሙናነት ወተታቸው የታለበው፤ የሞቱት የተሰዉት ለሚስጥርነታቸው ነው …. ጠበል ቢጤ በዬጓዳው ሳያስፈልግ አይቀርም …. እኔ እማውቀው የሰማያዊ ሊቀመንበር ኢ/ ይልቃል ጌትነት ኢትዮጵያዊ መሆናቸውን ነው። ከዚህ ባለፈ መንፈሳችን ተቋማቱ ላይ እናሳርፍ፤ ፍቅራችንም እምነታችንም ከጋራው አመራር ላይ …. ከፓርቲው ንጥር መርህ፤ ይህ ከሆነ በስበብ አስባቡ በሚፈጠሩ ስንጥሮች አንታወክም ….

ሌላው ያነበብኩት አስተያዬት ብቃትን ማዬት የሚናፍቀን እንዳለን ሁሉ፤ ዓይንህ ላፈር የምንል መኖራችን ፍላጎታችን ጋር ምን ያህል እዬተላለፍን እንደመንባዝን ሰፊ ስዕል ነበር። ሰማያዊ ሲመሰረት ጀምሮ እኔ ከልብ ሆኜ እከታተለዋለሁ። አሁን ባላቤት ያላቸው ይመስለኛል ውጪ ሀገር። የሎቢ ተግባር የሚሰራላቸው። ቀደም ባለው ጊዜ ባልነበራቸው ሰዓት የሚያቅዷቸው፤ ሃላፊነት ወስደው የሚወስዷቸው ፈጣንና ደፋር እርምጃዎችና ውጤቶቻቸው፤ ፈተናዎቻቸውና ፈተናውን ተከትለው የሚያሰዮዋቸው ጥንካሬ ሁሉ ይደንቁኝ ስለነበረ ከረንት ላይ አንብቤ አስተያዬት ከሥር በጣም በትጋት እጽፍበትም ነበር።

ጉልህ ድፍረታቸውን ያዬሁበት የመጀመሪያው እርምጃቸው የሙሶሎኒን ግፍ ሊዘከር አይገባውም በሚል መንግሥት ነኝ የሚለው አካል ተቀምጦ እነሱ ነበሩ ቀዳሚውን የመከራውን ገፈት ፉት ያሏት፤ ከዛም በኋላ በበርካታ ጉዳዮች ላይ ግልጽ ያለ አቋም መወሰዳቸው ብቻ ሳይሆን ተግባር ላይ መገኘታቸው አበረታች ነው – ለእኔ። በዛ ላዩ ታች እሳት በሚጋረፍ ቃጠሏማ ወጀብ ሆነው ዕለታዊ ቋያውን ተቀብለው በቅንነትና በሃቀኝነት እዬተንገረገቡ መገኘታቸው ወያኔ ሊያሰኛቸው ከቻለ እውርነት ነው። ሰማያዊ እንደ ተቋም ጠንካራ ራዕይና ጠንካራ ፍላጎት ይዞ በድፍረት እዬተንቀሳቀሳ ያለ ቀንበጥ ፓርቲ ነው – ለእኔ። ነገ ምን ይሆናል? ሥርጉተ ጠንቋይ አትቀልብም።

አሁን ባለው ሁኔታ ግን መሰረት የያዘ የተግባር ትልማና ክንውን እያዬሁ ነው። አንጋፋ የሚባሉት አብሶ ለህሊና መሰናዶ ቁብ ሲሰጡት አይታዩም። እነሱ ግን ህሊናን ከማሰናዳት ጀምሮ ያለው መንፈስ ጠንካራ ነው። አጋዥ ተቋማትን ወይንም ክንፎችን አጠናክሮ ማውጣት ብቻ ሳይሆን እንደዬባህሪያቸው „የእንቢታን“ተግባር መሸለማቸው በራሱ የብርታት መለኪያ ነው። አጋጣሚዎች ሳይበክኑ አቅምን ከሥር በመገንባት እረገድ ጅምሩም ፍሬ አዘል ነው። በአጭር ጊዜ ዘለግ ያለ ተግባርና ተመክሮውም ጠቋሚ ተስፋ አለው። ይህ ውጤታማ የግልና የቲም ተግባር ተናጠላዊ ፍርጃ የሚያሰጥም አይደለም። አመራሩ መደማመጥ፤ መከባበር መተማመን አስከቻለ ድረስ አውዱ ሰላም ነው፤ በሰላም መስመር ደግሞ ትርፍ አለ ….

ከኢንጂነር ይልቃል ጌትነት አንድ ሥንኝ ልዋስና „የድርሻ ልውውጡ“ ሰርቷል የሚያሰኘው ቁምነገር ያለውም ከዚህ ላይ ነው። ወጣት ለመኖር የሚጓጓ ቢሆንም ከፍላጎቱ በታች ባለው እንጂ በላይ ባላው ነገር አይደለም። እውነት ለመናገር ወጣቶች ለግል ኑሯቸው ስስታሞች አይደሉም። እንዲያውም የወያኔ መሰሪነት ዶክተሪን ለግል መኖር ነበር። ግን ተፈጥሯቸው አልፈቀደላቸወውምና በዬአጋጣሚውም የምናዬው የወያኔ ፍላጎት አብሶ ኢትዮጵያን በሚመለከት ተዘቅዝቆ ሲንጠለጠል ነው። ስለሆነም በዚህ ጠቀራማ ዘመን ብሄርና ብሄረሰብ እዬተባሉ ያደጉ የትናንት ለጋዎች በንጹህ መንፈስ ስለ አንድ ህዝብና አንድ ሀገር ፊት ለፊት ወጥተው፤ በባንዳነት ሀገርን በመበተን ላይ ያለውን ወያኔ እዬተፋለሙ መገኘታቸው ሊያስመሰግናቸውና እግዚአብሄር ይስጣችሁ ሊያሰኛቸው ይገባል። ይህንን በማደረጋቸውም  በዚህ ዙሪያ ቅሬታ ያላችሁ ወገኖች ድምጻችሁን አትስጡን ሲሉም አዳምጫቸዋለሁ። በጣም ደፋር እርምጃ ነው። ስለምን ትግላቸው ትውልድና ታሪክን፤ ሀገርን ከማዳን ላይ በጽኑ የተገነባ ስለሆነ ነው እንጂ በነፍስ ወከፍ የነበራቸው ቦታ ሆነ ኑሮ በቂ ነበር …. ማለት ይቻላል።

ግን አኛ አልታደለንም፤ የሚሻል፣ የሚበልጥ፣ የተወጣላት ነገር የማዬት። እንዲያውም የነጻነት ትግሉ ቤተሰቦች ሆነን አሁን በተገኘው እውቅናና ወያኔ በወሰደው የጉዞ እገዳ እርምጃ መስጥረን ደስ ሚለን የምንኖርም እንኖራለን። የእኛ ጀግናችን አደባባይ ወጥቶ እልፎችን አሰልፎ ወደ ፊት ሲገሰግስና ትርፍን ሲዝቅ ሳይሆን፤ ይልቁንም  በጠላት እጅ ገብቶ ሲታሰር፤ ሲታፍን በጠራራ ጸሃይ በባሩድ ሲነድ፤ ወይ እንደ የኔሰው ገብሬ በቤንዚን እራሱን አርከፍክፎ አቃጥሎ አምድ ሲሆን፤ ወይን ሀገር ጥሎ ተሰዶ ፊት ለፊት መጋፈጡን ሸሽቶ ለዕለት ኑሮው ሲያድር ብቻ ነው። በቃ ያልተሰረ ታታሪ፣ ያልተፈነ ባተሌ ስለነገ የሚፈለገውን ትግሉ የሚጠይቀውን መስዋዕትነት እወስዳለሁ ብሎ ለሚገፋጥ  ከወያኔ በበለጠ እኛው ስናሸው ሲሰኘንም ወያኔ በማለት ወስደን ከጠላት ጋር ስንለጥፈው  – አለመታዳል።

ከዚህ በተጨማሪ እኔ በግሌ „ሰማያዊ ጊዜ ገና ነው ተገጥሜ ለመሰፋት እኔ ለጋ ነኝ። መሬት ረግጬ እራሴን ችዬ ለመንቀሳቀስ ጊዜ እሻለሁ፤ ወይንም እራሴን ችዬ እድሌን እሞክራለሁ“ ማለቱን እራሱ ልናከብርለት ይገባል። ከእንጨትም፣ ከተራራም፣ ከቀንም፣ ከቤትም፣ ከሰውም፣ ከመሬም ዕድል አለ። እንታገልለታለን የምንለው ነፃነት እኮ ይህው ነው። ልንጫነው በፍጹም አይገባም። በተገኘው አጋጣሚም ካላፍላጎቱ በተጽዕኖ አቅጣጫውን ልናስተው አይገባም።  በመንገዱ ላይ ጋሬጣ ልንሆንበት አይገባም፤ እንደ ገራራ የማይገራ ኢጎም አድረገን ልናዬው አይገባም፤ ጉዙውን ሆነ ፍላጎቱን በፖዘቲብ ልናይለት ይገባል። ካለፉት ስህተቶች ተምሮ፣ በአገኘው ተመክሮ ተነስቶ ለትውልዱ አዲስ መንፈስ ምቹ የሚሆን ሽግሽግ ማደረጉ ራሱ ለእኔ በግሌ በጣም በጎ ነው። በራስ መንገድ፤ በራስ መርህ፤ በራስ ቴስት መንፈስን ለመምራት መወስንና መቁረጥ አንድ ጥበብ ነው። ወቅትንና ጊዜን፤ ፍላጎትንና ተስፋን ማድመጥ መቻል የአቅም ሥነ – ሥርዓት ነው።

በአንፃሩ ተናጠላዊ ትግሉ ጎድቶናል፤ ፍላጎታችን አጓቷል፤ ራዕያችን አርቋዋል፤ ተስፋችን አጫጭቷል፤ ለጠላት ኢላማ የቅርብ ተጠቂ አድርጎናል፤ ጉልበታችን – ተመክሯችን – መክሊታችን ብናስተጋብረው የበለጠ ህዝብ በማሰለፍ አቅምና ችሎታ ይኖረናል፤ በአንድ ላይ ሆነን አብረን እንሰራለን፤ ተዋህደን ወይ ተቀናጅተን የሚሉም ከተገኙ ወሸኔ ነው።  የእነሱንም ነፃነት  ልናከብርላቸው ልናዳምጣች ይገባል። የሚመቻቸውን የሚያውቁት እነሱ መሬት ላይ ያሉት እንጂ እኛ አይደለንም።

በተረፈ ዬፓርቲዎች ፉክክር ለእኔ በጎ ነው። ለሚደግፉት ፓርቲ የበለጠውን ጊዜ መስጠት ወይንም ፕሮሞት የሚያደርጓቸውም ኃይሎች የሚወስዱት እርምጃ በጎ ነው። ችግሩ ያለው ነፃነት ለራሳችን የምንፈልገውን ያህል ከሌላው ላይ ሲደርስ ወይንም ለሌላው ለመስጠት ንፉጎች መሆናችን ነው። እንደ እኔ አንዱ በአቅደው ላይ ነፃነቱን ጠብቆለት ሌላው በመሳተፍ በማገዝ፤ ሌላው በአቀደው ላይ ሌለኛው ኃላፊነቱን ወስዶ በመጋራት ፍላጎታችን ዕውን ማደረግ ይገባል እንጂ አንዱ በሌላው ላይ በመንፈስ በማማጽ፤ ወይንም ልብን በማሸፈት በጠላት ላይ የሚገኝ ድል ምንም የለም። አብሶ ይህን ቆርጠን ከምንቀጥለው የወያኔ ተለጣፊ የምንለውን ስያሜ ነገር በእጅጉ ልንቆጠብበት ይገባል። የተያዘ የተረዘዘውን ሁሉ እንዲህ እያደረግን ለምለምን ማደረቅ ምን ሊባል እንደሚችል ሂዱበት ….

ይከወን። ግን እኛ የእውነት ወያኔ እንዲወድቅ እንፈልጋለን? የትም ሳንሄድ ወደ ጎረቤትም እስኪ እራሳችን እንፈትሸው? ምኑ ይሆን የሚያስደስተን? ምኑ ይሆን የሚያስከፋን? ከቶ የት ላይ ይሆን የፍላጎታችን ሴል ያለው? ለነበረን ጊዜ ከልብ አመሰግናለሁ – የኔዎቹ – ክብረቶቼ ቸር ሰንብቱልኝ።

ፍላጎቴን ሳውቅ ቀን እኔ በእኔ ውሰጥ አለመሽሎኩን አረጋግጣለሁ።

ፈተናን ከመፈጠሩ በፊት አሸንፎ የተፈጠረ ኢትዮጵያዊነት።

እግዚአብሄር ይስጥልኝ።

እሽሩሩ ማሞ

Download (PDF, 1.08MB)

ዘነበወርቅ ድልድልይ የገባው አውቶቡስ ሲወጣ

(ዘ-ሐበሻ) በአዲስ አበባ ከተማ ከካራ ቆሬ ወደ ለገሃር ሲጓዝ የነበረ አውቶቡስ ዘነበወርቅ አለርት ሆስፒታል ፊትለፊት ረዥም ድልድይ ውስጥ ገባ፤ በዚህ አሰቃቂ አደጋ ስምንት ሰዎች መሞታቸው ይፋ ሆነ።

አውቶቡሱ ቁጥራቸው እስካሁን በውል ያልታወቁ ተሳፋሪዎችን ጭኖ ይጓዝ የነበረ መሆኑን የአዲስ አበባ ፖሊስ ሲያስታውቅ የአውቶቡሱ ቁጥር 66 እንደሆነ ታውቋል።

ካራ ቆሬ ወደ ለገሃር ሲጓዝ ዘነበወርቅ አለርት ሆስፒታል ፊት ለፊት ባለው ረዥም ድልድይ ውስጥ በገባው አውቶቡስ የተነሳ በአደጋው እስካሁን አንድ እግረኛን ጨምሮ አራት ወንድ እና አራት ሴት ተሳፋሪዎች ህይወታቸው እንዳለፈ ሲገለጽ 46 የሚሆኑት ደግሞ ከባድ የአካል ጉዳት እንደደረሰባቸው ዘ-ሐበሻ ያገኘችው መረጃ ያመለክታል። የአውቶቡሱ ሹፌር እና ትኬት ቆራጭ ከባድ የአካል ጉዳት ደርሶባቸው በሕይወት ተርፈዋል።

የአውቶቡሱ አደጋው መንስኤ ላይ መሆኑ ሲታወቅ በአውቶቡሱ ድልድይ ውስጥ መግባት ጉዳት የደረሰባቸው ወገኖች በጥቁር አንበሳ ሆስፒታል ህክምና እየተደረገላቸው መሆኑ ዘ-ሐበሻ ጨምሮ የደረሳት ዜና ያስረዳል።

መጋቢት 14/2006 ዓም አዲስ አበባ

የሰማያዊ ፓርቲ ብሄራዊ ምክር ቤት መጋቢት 14 ቀን 2006 ዓ.ም ባካሄደው ሁለተኛ ዓመት አራተኛ መደበኛ ስብሰባው የካቲት 30 ቀን 2006 ዓም የሴቶች ቀንን ምክንያት በማድረግ በተዘጋጀው ሩጫ ላይ በተገኙ የሰማያዊ ፓርቲ ሴት አባላት ላይ ፖሊስና ፍርድ ቤት በመተባበር የፈጸሙትን ሕገ መንግስት የጣሰ ተግባር፣ እንዲሁም ከአሜሪካ መንግስት በደረሳቸው ግብዣ መጋቢት 12 ቀን 2006 ዓም ምሽት ወደ አሜሪካ ለመጓዝ ቦሌ አውሮፕላን ማረፈያ በተገኙት የፓርቲያችን ሊቀመንበር ኢ/ር ይልቃል ጌትነት ላይ ራሳቸውን ከህግ በላይ ያደረጉ የደህንነት ኋይሎች የፈጸሙትን አሳፋሪና ሕገ ወጥ ተግባር በመመርመር የሚከተለውን የአቋም መግለጫ አውጥቷል፡፡

1. የሴቶችን ቀን ምክንያት በማድረግ በተዘጋጀው ሩጫ ላይ የተገኙ የሰማያዊ ፓርቲ ሴት አባላት በሩጫው ከተሳተፉ በሺዎች የሚቆጠሩ ሴቶች የሚለዩት የነጻነትን ቀን ሊያከብሩ በተገኙበት ቦታ ስለ ነጻነት፣ስለ ፍትህ፣ስለዴሞክራሲ፣ስለ ሰብአዊ መብት ወዘተ ድምጻቸውን ከፍ አድርገው በማሰማታቸው ብቻ ነው፡፡ ነገር ግን በህገ መንግሥቱ አንቀጽ 29/2 «ማንኛውም ሰው ያለማንም ጣልቃ ገብነት ሀሳቡን የመግለጽ ነጻነት አለው» ተብሎ የተደነገገውን ከምንም ያልቆጠረውና ሕጉን ሳይሆን ጠመንጃውን ተማምኖ፣ የሙያውን ሥነ ምግባር ሳይሆን የአለቆቹን ትዕዛዝ አክብሮ እንደሚሰራ በተግባሩ ያረጋገጠው ፖሊስ እነዚህን የሰማያዊ ፓርቲ ሴት ወጣቶች አፍሶ ሲያስር አንዳችም ህጋዊ ምክንያት አልነበረውም፣ የፖሊስ ሕገ ወጥ ተግባር በዚህ ሳያቆም የታሰሩ የትግል አጋሮቻቸው የሚገኙበትን ቦታና ሁኔታ ለማወቅ ወደ ፖሊስ ጣቢያ የሄዱ የፓርቲው አመራር አባላትንም አሰረ፡፡ ዋስትና ለማስከልከል አይደለም ለክስ የሚያበቃ ምንም ምክንያት ሳይኖረው ለፍ/ቤት ምርመራየን አልጨረስኩም የግዜ ቀጠሮ ይሰጠኝ በማለት አባላቱ ለአስር ቀናት በጣቢያ እስር እንዲጉላሉ በማድረግ ሕግን ለማስከበር ሳይሆን የፖለቲከኞችን ፍላጎት ለማስፈጸም የቆመ መሆኑን በተግባር አረጋግጠ፡፡ የሰማያዊ ፓርቲ ብሔራዊ ምክር ቤት ይህንን ሕገ መንግሥቱን በግልጽ የጣሰ የፖሊስ ተግባር በጽኑ እያወገዘ፣ፖሊስ የግለሰቦች ሥልጣን ጠባቂ ሳይሆን ሕግ አስከባሪ መሆኑን በተግባር እንዲያሳይ ይጠይቃል፡፡
2. የሕገ መንግሥቱ አንቀጽ 19/4 «የያዛቸው የፖሊስ መኮንን ወይም ህግ አስከባሪ በጊዜው ገደብ ፍርድ ቤት በማቅረብ የተያዙበትን ምክንያት ካላስረዳ ፍርድ ቤቱ የአካል ነጻነታቸውን እንዲያስከብርላቸው የመጠየቅ ሊጣስ የማይችል መብት አላቸው፡፡» ተብሎ የተደነገገውንእንዲያቀርቡ አዟል፡፡ የሰማያዊ ፓርቲ ብሔራዊ ምር ፍርድ ቤቱ ለህግ የበላይነት የሚሰራና  በመተላለፍ ታሳሪዎቹን የዋስትና መብት ከልክሎ ለሁለት ግዜ ለፖሊስ የግዜ ቀጠሮ የፈቀደው ፍርድ ቤት፣ የእኔ ሥልጣን አይደለም መደበኛ ፍርድ ቤት አቅርቡዋቸው በማለት ካሰናበት በኋላ የምርመራ መዝገቡ ለክስ አይበቃም ተብሎ በአቃቤ ሕግ ውድቅ የተደረገበት ፖሊስ መልሶ እዛው ፍርድ ቤት ሲያቀርባቸው እያንዳንዳቸው 1300 ብርና የሰው ዋስ በጣምራ ለፍትህ መከበር የቆመ አለመሆኑን በተግባር ያረጋገጠበትን ይህን ተግባር እያወገዘ በሕገ መንግሥቱ አንቀጽ 79/2 «በየትኛውም ደረጃ የሚገኝ የዳኝነት አካል ከማንኛውም የመንግሥት አካል፣ከማንኛውም ባለሥልጣን ሆነ ከማንኛውም ሌላ ተጽዕኖ ነጻ ነው» እንዲሁም በአንቀጽ 79/3 ዳኞች የዳኝነት ተግባራቸውን በሙሉ ነጻነት ያከናውናሉ፣ከሕግ በስተቀር በሌላ ሁኔታ አይመሩም »ተብሎ የተደነገገው በተግባር እንዲገለጽ አጥብቆ ይጠይቃል፡፡
3. የፓርቲያችን ሊቀመንበር ኢ/ር ይልቃል ጌትነት ወደ አሜሪካ የሚያደርሳቸውን አስፈላጊ የጉዞ ሰነድ አሟልተው ሻንጣቸው አውሮፕላን ላይ ካስጫኑ በኋላ ፓስፖርታቸው በደህንንት ኋይሎች ተቀዶ ጉዞአቸው እንዲስተጓጎል ተደርጓል፡፡ የሰማያዊ ፓርቲ ብሔራዊ ምክር ቤት ይህን ሕገ ወጥ ብቻ ሳይሆን እጅግ አሳፋሪ የሆነና የደህንነት ክፍሉን ብቻ ሳይሆን የአየር መንገዱንም ስም የሚያጎድፍ ተግባር በጽኑ እያወገዘ ድርጊቱን በፈጸሙት ማን አለብኝ ባዮች ላይ ከሕግ በላይ ሊሆኑ እንደማይችሉ የሚያሳይ ሕጋዊ ርምጃ አንዲወሰድ እንጠይቃለን፡፡ 4–መንግሥት ለዜጎች ዴሞክራሲያዊ መብት ጥያቄ እስራት አፈናና ማስፈራራት ምላሽ እንደማይሆን ከታሪክ በመማር ለዜጎች የመብት ጥያቄ ትክክለኛውን ምላሽ እንዲሰጥና ትግሉ ሰላማዊ፣ ዓላማው ሕዝባዊ ግቡ ዴሞክራሲያዊ ሥርዓትን እውን ማድረግ ከሆነው ሰማያዊ ፓርቲ ላይ የጥፋት እጁን እንዲያነሳ አጥበቀን እንጠይቃለን ፡፡

ክንፉ አሰፋ

አንዲት የተጎሳቆለች ወይዘሮ በሪያድ ጎዳናዎች ላይ ምጽዋት ትጠይቃለች። አላፊ አግዳሚው እቺን ወይዘሮ አይቶ አያልፋትም። ሰደቃ እየወረወረላት ያልፋል። በተለይ በበዓል ወራት ገቢዋ በእጥፍ ይጨምራል።

አይሻ ትባላለች። ነዋሪነትዋ ሪያድ ሳውዲ አረቢያ ነው። ላለፉት 50 አመታት በልመና ስራ ስትተዳደር ቆይታ በተወለደች በ100 አመትዋ በያዝነው ሳምንት እሁድ እለት ከዚህ አለም በሞት ተለይታለች። አማሟቷም ድነገት ነበር ይላል አረብ ኒውስ።

ጉድና ጅራት ከወደኋላ ነው እንዲሉ የአይሻ ህልፈት አለምን ያስደመመ ጉድ ይዞ መጣ። ለሃምሳ አመታት በልመና የተሰማራችው ወይዘሮ ሚሊየነር ኖራለች። የወርቅ ጌጣጌጦች እና የጥሬ ገንዘብ ሃብትዋ አራት ሚሊየን ዶላር ሲሆን በጂዳ ከተማ የአራት ትላልቅ ህንጻዎች ባለቤትም ነበረች።

የአይሻን ንብረት የሚወርስ ዘመድ የለም። አብሮ አደግ ነኝ የሚል አህመድ አል ሰይድ የሚባል ሰው ግን የውርስ መብት አለኝ ብሏል። በእርግጥ አይሻ ሌላ ዘመድ የላትም። እህትና እናትዋ ለማኞች ነበሩ። ወላጆችም በልመና ይተዳደሩ የነበሩ መሆናቸውን የጠቀሰው የአረብ ኒውስ፣ አይሻ ንብረታቸውን በከፊል ከነሱ በውርስ እንዳገኙም ዘግቧል። አሁን ሁለቱም ሞተዋል።

አህመድ አል ሰይድ ንብረቱን “አይሻ ለኔ አውርሳኝ ሞታለች እኔም ተቀብዬ ለድሆች እንዳከፋፍል ይፈቀድልኝ” ብሎ ነበር። ከመንግስት ያገኘው ምላሽም ግን የለም።

ልመናውን እንድትተው ቢወተውታትም አሻፈረኝ ማለቷን ለመገናኘ ብዙሃን ገልጿል።

ሌላው የሚገርመው ነገር አይሻ ህንጻዋ የሚኖሩትን ሰዎች የቤት ኪራይ አታስከፍላቸውም ነበር።

አይሻ ሚሊየነር ነበረች። አንድ ቀን ጥሩ ምግብ ሳትበላ፣ ጥሩ መኝታ ላይ ሳትተኛ፣ ጥሩ ቤት ውስጥ ሳትኖር፣ ጥሩ ልብስ ሳትለብስ ኖራ ለዘላለሙ አሸለበች። ግን ይህ ለምን ሆነ የሚለው ጥያቄ ምላሽ አላገኘም።

አልፎ አልፎ የዚህ አይነት ክስተቶችን በአለም ላይ እናያለን። በሺዎች የሚቆጠሩ የኔብጤዎች ያሉባት ኢትዮጵያም በዚህ ስራ ከፍተኛ ሃብት እና ንብረት ያፈሩ ለማኞች አጋጥመውኛል።

እርግጥ የልመና ገንዘብ ስላልተለፋበት ይጣፍጥ ይሆናል። ልመናም እንደ አደንዛዥ እጽ ሱስ ያስይዝ ይሆን?

በረከተ መርገም

Download (PDF, 166KB)

(ዘ-ሐበሻ) “ላጽናናሽ”፣ “በተራ” እና በሌሎችም በተሰኙት ሙዚቃዎቹ የሚታወቀውና 2 ሙሉ አልበም የሰራው ድምፃዊ ጌድዮን ዳንኤል በአዲስ አበባ የጎዳና ተዳዳሪ ለመሆን እንደተዳረገና እርዳታ እንደሚያስፈልገው አዲስ ጉዳይ መጽሔት ዘገበ።

በአዲስ አበባ ታትሞ የሚሰራጨው አዲስ ጉዳይ መጽሔት ጓደኞቹን ጠቅሶ እንደዘገበው ድምፃዊው የአእምሮ ህመም ምልክቶች ከታዩበት ረዥም ጊዜ ሆኖታል። መጽሔቱ ያነጋገረው የድምጻዊው ጓደኛ “ጌድዮን ካልጠጣ ሰላማዊ ሰው ነው ከጠጣ ግን በጣም ኃይለኛና ሰውን የሚያስቸግር ሰው ነው” ሲል ይገልጸዋል። ሌሎች ደግሞ ድምጻዊው ሊያገኝ የሚገባውን የሳይካትሪስት ህክምና አለማግኘቱ ለዚህ እንዳበቃው ይናገራሉ::

ጌድዮዎን በተለይ 2ኛ አልበሙን ካወጣ በኋላ ብዙም ተቀባይነት አለማግኘቱ ለዚህ የአእምሮ ችግር እንዳበቃው የሚገልጹ የቅርብ ወዳጆቹ አሉ። እንደ አዲስ ጉዳይ መጽሄት ከሆነ ይህ ወጣትና ጥሩ ብቃት ያለውን ድምጻዊ ሕይወት ለማስተካከል የሙያ አጋሮቹ፣ ማንኛውም ተቋም፣ እንዲሁም ግለሰቦች ሊተባበሩት ይገባል።

የጌድዮን 3 ሙዚቃዎችን ያድምጡ።

ከአብዱ ይማም

የኒዮርክ ፖሊስ ዲፓርትመንት አባላት በሚንሸራሸሩባቸው የከተማይቱ ጎዳናዎች ሁሉ ሲሆን የሚውለውን እና የሚያድረውን ለማወቅ ምን ቢኳትኑ አደጋች ነው፡፡ ታዲያ የከተማይቱ ፖሊስ ዲፓርትመንት ቀደም ሲል ሲጠቀምባቸው ከነበሩ የወንጀል መከታተያያ ዘዴዎች የላቀ ብቃት የለበሰ ስለመሆኑ የተነገረለት የዘመኑ ምጡቅ የቴክኖሎጂ ውጤት የሆነ የፖሊስ ተሸከርካሪ ፈጣሪዎቹ እነሆ ብለዋል፡፡

ይህ ዘመን አፈራሽ ቴክኖሎጂ የኒዮርክ ፖሊስ ዲፓርትመንት አባላትን የሥራ ጫና በእጅጉ የሚያቀል ስለመሆኑም እየተነገረለት ይገኛል ‹‹ስማርት ካር›› ሲሉ ፈጣሪዎቹ የሰየሙለት ይህ ተሽከርካሪ የሕዝቡን ደህንነት በተገቢው ሁኔታ ለመጠበቅ በሚያስችሉ ሙሉዕ በኩለሄ በሆኑ መረጃ ሰብሳቢ መሣሪያዎች የተደራጀ ነው፡፡

ተሸከርካሪው በተገጠሙለት ሁለት የኢንፍራሬድ መቆጣጠሪያዎች ያያቸውን ቁጥሮች ሁሉ ይመዘግባል፡፡ የተፈቀደለት ሰሌዳና አድራሻም ጭምር የመለየት አቅም ያለው ይኸው በተሽከርካሪው ላይ የተገጠመ ኢንፍራሬድ በዚያው መጠን የተጭበረበሩ ሰሌዳዎችና ሀሰተኛ አድራሻዎችንም ጭምር በመለየት የማጋለጥ ስራ ይሰራል፡፡ ዘመናዊ እና ‹‹ስማርት ካር›› የተስኘው የፖሊስ ተሸከርካሪ የክትትል ካሜራዎች የተገጠሙለት ሲሆን የሚቃኛቸውን አካባቢያዊ ጠባያት ሁሉ ወዲያውኑ ወደ ፖሊስ ዲፓርትመንት ማዕከል የመላክ ብቃትም የለበሱ ናቸው፡፡

የ‹‹ስማርት ካር›› ፕሮጀክት በረጅም ጊዜ ዕቅድ ሊከናወኑ ከተያዙት BYPO 2020 መጠነ ሰፊ ፕሮጀክቶች አንዱ ሲሆን የ ‹‹ስማርት ካር›› ፕሮጀክት የኒዮርክ ፖሊስ ዲፓርትመንት እስከ 2020 ሊያከናውናቸው ይዟቸው ከነበሩ በርካታ ዕቅዶች መካከል አንዱ እንደሆነ የገለፁት ኮሚሽነር ሬይምንድ ኬሊ በ2011 ከማክ ኪንሲና ኩባንያው ጋር የተጀመረው ፕሮጀክት ለሚቀጥሉት 10 ዓመታት ለዲፓርትመንቱ የሚጠቅሙ የመንገድ ላይ ካርታዎች ለመስራት ዕቅድ ሰንቋል፡፡

የኒዮርክ ፖሊስ ዲፓርትመንት በቅርቡ ሊተገብራቸው የያዛቸው 260 ያህል ፕሮጀክቶች ያሉ ሲሆን የተቋሙ ሰባት ያህል ሰዎችም ቴክኖሎጂውን ለማምረት የሚያስችለቸው ክህሎት እንዲለብሱ ተደርጓል፡፡

የኒዮርክ ፖሊስ ዲፓርትመንት የስማርት ካርን ጽንሰ ሃሳብ ያመነጨው ትኩስ የምስልና መስል መረጃዎችን ለማሰባሰብ የሚያስችለውን አዲስ አስራር ለመዘርጋት ከማስቡ ጋር ተያይዞ ሲሆን ክስተቱን የሚመለከቱ ባለስልጣናት ሊደረጉ የሚገባቸውን በተመለከተ መዲያውኑ መመሪያ እንዲያወርዱም ያስችላቸዋል፡፡
እነዚህ ሙሉ መሣሪያዎች የተገጠሙላቸው ‹‹ስማርት ካር›› የተሰኙት እነዚህ ተሸከርካሪዎች ቁጥራቸው እምብዛም ባይሆንም ቀጣይ ግን የጣት አሻራ ሊቀበሉ እና የፊትን ገጽታ ለመለየት የሚያስችል መሳሪያ የተገጠመላቸው የፖሊስ ተሽከርካሪዎች የኒዮርክ ፖሊስ ዲፕርትመንት የአጭር ጊዜ ዕቅድ ናቸው፡፡ ይህ ሁናቴ የፖሊስ መኮንኖቹ ሙሉዕነት ያለው መረጃ እንዲያገኙ በማድረግ ስራቸውን ቀና የሚያደርግላቸው እንደሆነና ውሳኔ ለመስጠት ችግር እንዳይገጥማቸው እንደሚረዳቸውም እየተነገረ ነው፡፡

በከተማ ውስጥ ሊኖር የሚችል ስውር የሽብርተኝነት ሴራ ለማጋለጥና ለትራፊክ አደጋ መከላከል ሰራተኞች ተጠርጣሪዎችን ለመለየት ዘመን አፈራሹ የፖሊስ ተሸከርካሪ ፍቱን ነው ተብሏል፡፡

በአስተዳደራዊ ስራ ረገድም የኒዮርክ ፖሊስ አባላትን ከዚሁ ዘመነኛ የቴክኖሎጂ ውጤት ጋር ማስተዋወቅም የኒዮርክ ፖሊስ የቤት ስራ እንደሚሆን ተጠቅሷል፡፡

የፖሊስ ዲፓርትመንቱ ፈተና እንደሆነ እየተነገረለት ያለ እውነትም አለ፡፡ የበጀት ጉዳይ ብዙዎቹ ሥራዎች ሊሠሩ የታቀዱት ዘመናዊ ፈጠራዎች በተሳካ ውጤት ይታጀቡ ዘንድ በየጊዜው የማሻሻያና የጥገና ሥራዎች ሊከናወኑለት እንደሚገባ ነው እየተገለፀ ያለው፡፡
እነዚህ ዘመነኛ የፖሊስ ተሸከርካሪዎች የዘመነ ወንጀል በተንሰራፋባቸው ታላላቅ ከተሞች ልበ ብርሃን በሆነው የማየት፣ የመቅመስ፣ የማሽተትና የማድመጥ ችሎታቸው ታግዘው ለፖሊስ ዲፓርትመንቶች የሚመጣበት መረጃ የዋዛ አይደለም፡፡ ዝ

“… ግን እስኪያልፍ ያለፋል” ያለው ማን ነበር? ተመልከቱ በአዲስ አበባ ጊዜ የወጣለት ፌደራል ፖሊስ 5 ህጻናትን አንበርክኮ ፎቶ ሲነሳባቸው።

አብርሃ ደስታ ከመቀሌ

የሽረ እንዳስላሴ ከተማ ባለስልጣናት ከ450-500 የሚሆኑ የባጃጅ ሹፌሮች ሰብስበው ኩንትራት (ኮንትራክት) እየጫናቹ ነው፤ መንግስት የማይፈልገውን አገልግሎት እየሰጣቹ ነው በሚል ሰበብ ማስፈራራታቸው ተከትሎ የባጃጅ ሹፌሮች የስራ ማቆም አድማ በማድረግ ባጃጆቹ ከከተማ ዉጭ በማስቆም ተቃውሞአቸውን እየገለፁ ይገኛሉ። የመንግስት አካላትም አድማው ተከትሎ ባለባጃጆቹ መንግስት ባዘዛቸው መሰረት ለመስራት ፍቃደኛ ካልሆኑ ፍቃድ እንደማይሰጣቸው በመግለፅ እንዳይንቀሳቀሱ አግዷቸዋል። አሁን ባለባጃጆቹ አድማ ላይ ናቸው፤ መንግስትም አግዷቸዋል። በከተማው ምንም የባጃጅ እንቅስቃሴ አይታይም።

ብዙ የከተማው ኗሪዎች ታክሲ አጥተው በመንግስት አካላት ላይ ጫና በመፍጠራቸው ባለስልጣናቱ አምስት ሚኒባሶች ከመነሃርያ የታክሲ አገልግሎት እንዲሰጡ ቢያዙም ህዝቡ በቂ አገልግሎት ማግኘት አልቻለም። ባለ ባጃጆቹ መንግስት መፍትሔ ካልሰጣቸው ሰለማዊ ሰልፍ እንደሚወጡ ለዓረና ፅሕፈትቤት (የሽረ ከተማ ቢሮ) አስታውቀዋል። ከወር በፊት በመቐለ ከተማ ተመሳሳይ ችግር እንደነበር ይታወቃል።

በሌላ ዜና ዓረና ከሀገረሰላም ህዝብ ጋ ተወያየ።

ትናንት እሁድ (መጋቢት 14, 2006 ዓም) ዓረና ፓርቲ በደጉዓ ተምቤን ወረዳ ሀገረሰላም ከተማ ህዝባዊ ስብሰባ አካሂደዋል። ለእሁዱ ስብሰባ ቅዳሜ ቅስቀሳ የተደረገ ሲሆን የሀገረሰላም ህዝብ በጥሩ ሁኔታ ተቀብሎናል።

የህዝቡን ስሜት ያስደነገጣቸው ባለስልጣናት የከተማው ወጣቶች ሰብስበው በስድስት መኪኖች ጭነው ስልጠና አለ፣ ስራ ይሰጣችኋል፣ አበል ይሰጣችኋል ወዘተ በማለት ሕዋነ ወደሚባል ከተማ ሲያጓጉዟቸው አመሹ። ሌሊትም ቁጥራቸው በዉል ያልታወቁ ወጣቶች ሲጓጓዙ አደሩ። ቁጥራቸው ያልታወቀ ወጣቶችም ቅዳሜ ማታ በፖሊሶች እየታደኑ ታስረዋል፤ የዓረና ስብሰባ እስኪጠናንቀቅ ድረስ። ጥረቱ ግልፅ ነበር። ወጣቶቹ በዓረና ስብሰባ እንዳይሳተፉና በአባልነት እንዳይመዘገቡ ለማራቅ ነው፤ ዓረና ከወጣቶች ጋር እንዳይገናኝ ለማድረግ ነው። በብዙ አከባቢዎች በዓረና ስብሰባ የሚሳተፉ ወጣቶች ናቸውና።
ወጣቶቹ ከከተማ በመውጣታቸው ምክንያት የስብሰባው ተሳታፊ ብዙ አልነበረም። ነገር ግን ከብዙ የገጠር ጣብያዎች የተወከሉ አርሶአደሮች፣ መምህራንና የተመሪዎች ተወካዮች ነበሩ። እናም ስብሰባው የተሳካ ነበር ማለት ይቻላል።
አንዳንድ የህወሓት ካድሬዎች (የከተማው የካቢኔ አባላት) በዓረና አባላት ላይ ችግር ለመፍጠር ሞክረው ነበር። አልጋ እንዳንይዝ ባለሆቴሎችን ያስፈራሩ ነበር፣ በአንዳንድ አባሎቻችንም አክታ የመትፋትና የመሳደብ እንዲሁም ለመረበሽ ጥረት ሲያደርጉ ነበር። ግን እነዚህ ተግባራት የፈፀሙ የከተማው የካቢኔ ሐላፊዎች በተናጠል (በግል) የሰሩት እንጂ እንደ የዓዲግራቱ ቀውስ ሆን ተብሎ በፓርቲ ደረጃ የተፈፀመ አልነበረም። ምክንያቱም በሀገረሰላም ካድሬዎች ችግር ሲፈጥሩ ፖሊስ ያስቁመው ነበር። በዓዲግራት ግን ፖሊስ የችግሩ ተሳታፊ ነበረ።
እሁድ ጧት ስብሰባ የጠራንበት የከተማው ማዘጋጃቤት በፖሊሶችና ካድሬዎች ተከቦ ለስብሰባ የመጣ ህዝብ ለማስፈራራት ጥረት ተደርጓል። ብዙዎች እንዲመለሱ ተደርጓል። ባጠቃላይ የህወሓት ባለስልጣናት በዓረና አባላት ላይ ይፈፅሙት የነበረ ግፍ ወደ ተሰብሳቢው ህዝብ አሸጋግረውታል።
አሁን ጥቃት የሚፈፀመው በዓረናዎች ሳይሆን ጥያቄ በሚያነሳና በዓረና ስብሰባ ለመሳተፍ ፍላጎት ባለው ሰለማዊ ህዝብ ላይ ነው። የህዝብ የመሰብሰብ መብት እየጣሱ ነው ማለት ነው። የደጉዓ ተምቤን ህዝብ ለውጥ እንደሚፈልግ አረጋግጦልናል።

ጋዜጠኛ ሃብታሙ አሰፋ

>

ኢ/ር ይልቃል ጌትነት የሰማያዊ ፓርቲ ሊቀ መንበር ወደ አሜሪካ እንዳይመጡ ስለታገዱበት ሁኔታ ለህብር ከሰጡት ማብራሪያ የተወሰደ

>

ወ/ት ሜሮን አሀዱ የዓለም አቀፉ ትብብር ለኢትዮጵያውያን መብት ተቆርቋሪ የህዝብ ግንኙነት ሀላፊ በኩዌት ስላሉ ኢትዮጵያውያን ጉዳይ ከህብር ጋር ካደረገችው ቆይታ

ደብዛው የጠፋው የማሌዢያ አየር መንገድ ጉዳይ እና ያልተሳካው ፍለጋ እስከምን ይዘልቃል (ልዩ ዘገባ)

በቬጋስ ለስራ ማቆም አድማ ወጥቶ ሕይወቱ ስላለፈው የታክሲ አሽከርካሪ መታሰቢያና የተቃውሞው ተሳታፊዎች የወደፊት እርምጃ ውይይት

ሌሎችም ዝግጅቶች

ዜናዎቻችን

* በኦጋዴን የልማትና የኢኮኖሚ ጥያቄ ያቀረቡ የአገር ሽማግሌዎች መታሰር በአካባቢው ውጥረትና ስጋት ማስነሳቱ ተነገረ

* የሰማያዊ ፓርቲ ሊቀመንበር ቦሌ ላይ በድንገት ከፓስፖርታቸው አንድ ገጽ ተቀዶ ወደ አሜሪካ እንዳይወጡ የታገዱበት ሂደት አስገራሚ ድራማ ነበር አሉት

* በወላይታ ተደብድበው የታሰሩት የአንድነት ፓርቲ አመራሮች ትላንት ተለቀቁ

- የተነጠቁት ሞባይላቸው ባልታወቀ ነገር ተነክሮ እንዲበላሽ ተደርጓል

* አሜሪካ ከኢትዮጵያ የምትወስዳቸው የማደጎ ህጻናት ቁጥር ማሽቆልቆሉ ተገለጸ

* በአዲስ አበባ ተሳፋሪዎችን የጫነ አንበሳ አውቶብስ ድልድይ ውስጥ ገብቶ የዘጠኝ ሰዎች ሕይወት አለፈ

* ኤርትራ በጥቂት ቀናት ውስጥ ሶስት ጄኔራሎቿን በሞት አጣች

* የአስመራው መንግስት ኢትዮጵያ አዲስ የዲፕሎማሲ ዘመቻ ከፍታብኛለች አለ

ሌሎችም ዜናዎች አሉ

(ይህ “ኑ! እንዋቀስ” የሚለው ስር ነቀል የለውጥ ጥሪ ቀጥታ የሚያነጣጥረው በኢህአዴግ አባላት ላይ
ብቻ ነው፤ አመራሩን በፍፁም አይመለከትም)

ጋዜጠኛ ተመስገን ደሳለኝ

የሆነው ሆኖ አባላቱ እንዲህ የመብዛታቸው ምስጢር የድርጅቱ አምባ-ገነንነት ባህሪይ መገለጫ እንጂ አመላይ አጀንዳ አሊያም
ምትሀታዊ ችሎታ እንዳለው የሚያሳይ አይደለም፡፡ ይህ የትኛውም መሰል ሥርዓት ከተጠናወተው ሁሉንም ከመቆጣጠርና መጠቅለል
(Totalitarianism) አስተሳሰብ የሚሰርፅ ማኪያቬሊያዊ አስተምህሮ ነው፡፡ የሆነው ሆኖ ‹‹አምባገነኖች የአንድ እናት መንትያ ልጆች
ናቸው›› እንዲሉ፤ በ‹‹ቆራጡ መሪ›› ዘመነ-መንግስትም በጊዜው ከነበረው የሀገሪቱ ሕዝብ ቁጥር አኳያ መሳ-ለመሳ ሊባል በሚያስደፍር
ሁኔታ ሳር ቅጠሉ ሁሉ ሰማያዊ ካኪ ለባሽ የኢሠፓ አባል ሆኖ ነበር፡፡ ግና፣ ያ ካኪ ለባሽ ሕዝብ፣ የልቡን በልቡ ይዞ ‹‹ቪቫ መንጌ!›› እያለ
አሳስቆ በስተመጨረሻ ጉድ እንደሰራው ሁሉ፤ ‹‹ይህ የህዝብ ማዕበል…›› ተብሎ በአቶ መለስ ዜናዊ የተሞካሸው የ97ቱ የቅዳሜው መሬት
አንቀጥቅጥ የሰልፍ ትዕይንትም፣ በድጋፍ ሳይሆን በግዳጅ የሰመረ መሆኑን ለማየት፤ አይቶም ለመመስከር ከሃያ አራት ሰአት ጊዜ በላይ
አልወሰደብንም፡፡ እንዴት? ቢሉ በማግስቱ (ሚያዚያ 30) ለተቃውሞ ከወጣው ሕዝብ የቅዳሜዎቹም በብዛት መሳተፋቸውን በራሳቸው
አንደበት ‹‹ትላንት ለቲሸርት፤ ዛሬ ለነፃነት!›› በሚል ሕብረ-ዝማሬ ከአደባባዩም አልፎ ከተማዋን በሚያናውፅ የለውጥ ጩኸት
የመሰከሩበት ‹‹ፖለቲካ›› መቼም ቢሆን አይዘነጋምና፡፡

እንግዲህ ይህ ሁሉ ታሪካዊ ሀቅ የሚገልፅልን አንድ ታላቅ እውነት-በጥቅም እየደለሉ አባልን ማብዛት በክፉ ቀን የማይታደግ መሆኑን ነው፡
፡ ጥቅመኝነት ግፋ ቢል የአብዮታዊ ዲሞክራሲ ‹‹ፀበል›› ያስጠምቅ፣ ‹ኢህአዴግ ጌታ ነው!›ን ያስፎክር ያሸልል ይሆናል እንጂ
የኢትዮጵያን ትንሳኤ መሻትን አያስቀይርም፡፡ ነብር ዥንጉርጉርነቱን እንደማይለውጠው ሁሉ የኢህአዴግ አባላትም ምንም ቢሆን ምን፣
እንደሌላው ሕዝብ የሀገር አንድነት የሚያሳስባቸው፣ ብሔራዊ ውርደት (ረሀብተኝነት) በቁጭት የሚያንገበግባቸው፣ ከዘውግ ልዩነት
የሕዝብ ለሕዝብ መተማመንና አንድነታዊ ጥንካሬው የሚበልጥባቸው፣ የኃይማኖት ነፃነት የሚያስተቃቅፋቸው… ናቸው ብዬ አምናለሁ፡፡
ምክንያቱም ጥቅመኝነት የእጦትን ክፍተት ለመሙላት ለጊዜው ያሰግዳል እንጂ ክብርንና ማንነትን አስሽጦ በባርነት ቀንበር አያሳድርም-
በተለይም ዥንጉርጉርነቱን ጠንቅቆ ለሚያውቀው ኩሩ-ሀበሻ!

ደግሞስ ምን ያህሉ አባል ነው፣ የድርጅቱን መታወቂያ በመያዙ ብቻ የረባ ጥቅም ያገኘው? በግላጭ እንደሚታየው በግል ጥቅምም ሆነ
በተጭበረበረው የዘውግ ፖለቲካ ሳቢያ ኢህአዴግን የተቀላቀሉ የአብዛኞቹ አባላት የኑሮ ደረጃ ዛሬም እንደ ብዙሃኑ የኢትዮጵያ ህዝብ
ከችግር የመቆራመድ አስከፊ ሕይወት አልተላቀቀም፡፡ ፓርቲውን መታከካቸውም በማይጨበጥና በማይታይ እንቅልፍ የለሽ ሕልም
አናውዞ ይበልጥ ደቁሷቸዋል እንጂ በቀን ሶስቴ መመገብ እንኳ አላስቻላቸውም፡፡ ሌላው ቀርቶ የድርጅት አባልነታቸው እንደተርታው
ሕዝብ በአድሎአዊ አሰራር መማረርን እንዳላስቀረላቸው በርግጠኝነት መመስከር ይቻላል፡፡

ይህ አይነቱም እርግጠኝነት ነው ‹ኑ! እንወቃቀስ (እንነጋገር)፤ እንተማመንምና ሀገርና ትውልድ እየገደለ ያለውን ፓርቲያችሁን አብረን
ተጋግዘን እናፍርሰው› የሚል የማንቂያ ደውል ላሰማችሁ ገፊ-ምክንያት የሆነኝ፡፡ እናም ድርጅታችሁን ትመረምሩ ዘንድ ወደድኩ፡-
ድርጅታችሁ ሥልጣን ላይ ተፈናጥጦ ባሳለፋቸው ሁለት አስርታት የተጓዘበትን መንገድ በአስተውሎት ብትመረምሩ፤ በእርግጠኝነት እንደ
ግዙፍ ዐለት ካገጠጡ ሀገራዊ ውድመቶች እና ከበባድ ኪሳራዎች ጋር መፋጠጣችሁ አይቀሬ ነው፡፡ ይህም ሆኖ በቅድሚያ በተልካሻ
ፕሮፓጋንዳ ያሰለቸንን የብሔር ጉዳይ (የተወሰኑ ሰዎችን አማልሎ አባል ለማድረግ አስተዋፆ እንዳለው ባይካድም) ወደጎን ብለን፤
የትኛውም ብሔረሰብ ባህላዊ እሴቶቹን ማክበር፣ በአፍ መፍቻ ቋንቋው መጠቀም… የፖለቲካ ፓርቲ በችሮታ የሚሰጠው ሳይሆን፣
ጋዜጠኛ ተመስገን ደሳለኝ
2

የማንም ተፈጥሮአዊ መብት መሆኑን ማስረገጥ አስፈላጊ ይመስለኛል፡፡ ይህ ማለት ግን የድርጅታችሁ ሀቲት፡- ‹አንዱ በሌላው እድሜውን
ሙሉ ሲጨቆን እንደኖረ፤ ከተቀረው የኢትዮጵያ ሕዝብ የተለየ እንደሆነ፤ ከብሔራዊ ሰንደቅ ዓላማችን ይልቅ የክልሉን እንዲያስቀድም
መቀስቀስና መስበክን የብሔር ብሔረሰብ መብትን ማክበር ነው› የሚለውን አምኖ መቀበል አይደለም፡፡ በግልባጩ ስርዓቱ እንዲህ አይነት
ጉዳዮችን ሰማይ ጥግ አጉኖ፣ ሕዝብን ከፋፍሎና በጥርጣሬ (በጎሪጥ) ወደሚተያይበት ጠርዝ ገፍቶ፣ የሥልጣን ዕድሜውን ያራዘመበት
ሁለት አስርታትን ያሳለፈ ስልቱ መሆኑን መረዳት አይሳናችሁም ብዬ አስባለሁ፡፡

ሌላ ሌላውን ትተን እንኳ የኢህአዴግን አመሰራረት ብንመለከት ግንባሩን ከፈጠሩት አራቱ ድርጅቶች መካከል ከሞላ ጎደል ህወሓት እና
ኢህዴን/ብአዴንን እንደ ፖለቲካ ድርጅት መውሰድ ይቻል ይሆናል እንጂ፤ ኦህዴድና ደኢህዴን፣ በህወሓት ‹‹አባ መላ››ዎች እንደ
የፋብሪካ ሳሙና በሚፈለጉበት መጠንና ቅርፅ ተጠፍጥፈው ከተሰሩ በኋላ በኦሮሞና በደቡብ ኢትዮጵያ ተወላጆች ላይ እንደ አለቅት
የተጣበቁ የመሆናቸውን ምስጢር እነርሱም ራሳቸው የሚክዱት አይመስለኝም (ምናልባት በሽግግሩ የመጀመሪያ ዓመት ላይ
እንደአስተዋልነው ከኦህዴድ ይልቅ፣ ኦነግ ኦሮሚኛ ተናጋሪዎችን ወክሎ ቢቀጥል ኖሮ ይህ ጉዳይ በዚህ አውድ ላይነሳ ይችል ነበር፡፡ የሆነው
ግን ተቃራኒው ነው፤ የራሱ የፖለቲካ ቁመናና ራዕይ የነበረው በኃይል ተገፍቶ፤ በምትኩ በሌሎች እስትንፋስ ህልው ሆኖ
‹‹የሚያስተዳድረው››ን ሕዝብና ራሱንም ጭምር ቀን ከሌት ‹‹ከብሔር ጭቆና ነፃ አወጣናችሁ›› ስለሚሉት ሞግዚቶቹ ገድል መተረክን
‹‹ፖለቲከኛነት›› አድርጎ የወሰደው ኦህዴድን ያነገሰ ነውና)

በነገራችን ላይ የፖለቲካ ፓርቲን እንደ ፋብሪካ ምርት ጣጣ-ፈንጣጣው ተጠናቅቆለት ሲያበቃ የመጫኑ አሰራር በሁለቱ ክልሎች ብቻ
ተገድቦ የቀረ አይደለም፤ አጋር ፓርቲዎችንም ይመለከታል፡፡ ከአፋር እስከ ጋምቤላ እና ቤንሻንጉል፤ ከሀረር እስከ ሶማሌ ሲተገበር
በትዝብት የተመለከትነው ጉዳይ ነው፡፡ መቼም ገና ከስር መሰረቱ ‹‹እኛ እናውቅልሀለን!›› በሚሉ ‹‹የፖለቲካ ሞግዚቶች›› የተፈጠረ
ድርጅት በምደባ ቦታውን ያገኙ የአመራር አባላቱን በቅምጥል ኑሮ ከማንፈላሰስ በዘለለ፣ ‹‹እወክለዋለሁ›› ለሚለው ሕብረተሰብ ትርጉም
ያለው ስራ ይሰራል ተብሎ የሚታሰብ አይደለምና ‹በኦሮሚያ ሙስና እንደሰላምታ እጅ መጨባበጥ ተዘውታሪና ተራ ነገር ነው›፣ ‹በአፋር
ባጀት መቀለጃ ሆኗል›፣ ‹በሐረር ቤተሰባዊ ኢምፓየር ተገንብቷል›፣ ‹ቤንሻንጉል በድህነት ማቀቀ›፣ ‹ሶማሌ ክልል የአስተዳዳሪው አብዲ
ርስተ-ጉልት ሆነ› ጂኒ ቁልቋል እያሉ ሮሮዎችን ማሰማት ለውጥ አያመጣም፡፡ ምክንያቱም እነዚህ ህወሓትን እንደ ‹‹ግል አዳኝ››
በመቀበላቸው ብቻ ‹‹የአስተዳዳሪነት›› ካባ የተደረበላቸው ምስኪን የአመራር አባላት በቀላል ጉዳይ ላይ እንኳ የመወሰን ሥልጣን
የላቸውምና ነው፡፡

ይህ እንግዲህ በቀጥታ ከኢህአዴግ ስነ-ተፈጥሮ ጋር የሚጋመድ ችግር ነው፡፡ ሆኖም የመንግስት ሥልጣን መዘውር ከጨበጠ በኋላ
የጨፈለቃቸውን የዴሞክራሲና ሰብዓዊ መብቶች ተከትሎ በሁሉም የሀገሪቱ አካባቢዎች የደረሱ የአያሌ ሰላማዊ ዜጐች ግድያ፣ እመቃ፣
ከስራና ቤት ንብረት መፈናቀል፣ ስደትን… አንድ በአንድ ጠቅሰን ለማውገዝ ብንሞክር ሰማይ-ብራና፣ ቀይ ባህር-ቀለም ሆነው
ካልተመቻቹልን በቀር የሚደፈር አይመስለኝም፡፡ በርግጥ በኢህአዴግ ውስጥ ታላቅና ታናሽ ንጉሠ-ነገሥት የሆኑት ህወሓትና ብአዴን
ብረት ነክሰው፣ ሳንጃ ወድረው በትጥቅ ትግል ያለፉ ከመሆናቸው አኳያ ለየትኛውም አይነት ቅራኔም ሆነ ልዩነት ከመግደልና መጋደል
ውጪ ያለ ሌላ ሰላማዊ አማራጭ ላይዋጥላቸው እንደሚችል መዘንጋት የለበትም፡፡ ኦነግ ከሽግግር መንግስቱ ከተገፋበት ጊዜ አንስቶ
በኦሮሚያ፣ በአዋሳ፣ በሶማሌ… ግፉአን ያለቁበትን፤ እንዲሁም በድህረ-ምርጫ 97 የታየው የጎዳና ላይ ጭፍጨፋ ይህንኑ ሀቅ ያስረግጣሉ፡፡
ኩነቱም ግንባሩ በመጣበት አይነት የነፍጥ የበላይነት ያለፉት ሶቪየት ህብረት፣ ቻይና፣ ቬትናም፣ ኩባ፣ ኤርትራ ባሉ ሀገራት ከታየው
የሕዝቦች እልቂት፣ የተቀናቃኝ ድምፆች መታፈን፣ የጋዜጠኞች መጨፍለቅ… ጋር ቀጥታ ዝምድና አለው፡፡ እነዚህ ሀገራትንም ሆነ
ኢህአዴግን የተለየ ሃሳብ ለማስተናገድ ትዕግስቱም ፍላጎቱም እንዳይኖራቸው ያደረገው ይህ ከውልደታቸው ጀምሮ ከደም-አጥንታቸው
ጋር የተዋሃደው ተፈጥሮአቸው ይመስለኛል፡፡

በአናቱም ኢህአዴግ ከአባላቱ ይልቅ የአመራሩ ‹‹ፓርቲ›› ብቻ ስለመሆኑ ለመረዳት የውስጥ አሰራሩን መፈትሽ የተሻለ ይሆናል፤
እናንተም በቅርበት እንደምታውቁት በድርጅቱ ያልተፃፈ ሕግ ከላይ ወደታች የሚወርድ መመሪያን ትክክል ሆነም አልሆነ ‹‹ለምን?›› ብሎ
መጠየቅ የሚያስቀስፍ ሀጢያት ነው፡፡ በዴሞክራሲያዊ መንገድ ለመወያየት መሻት፣ ጥያቄ ማቅረብ፣ ሃሳብን መቃወም፣ ስህተቶችን
ማጋለጥ… አሳድዶ በድንጋይ የሚያስወግር አሊያም ከሀገር ሀገር የሚያሰድድ ታላቅ ጥፋት ተደርጎ ይቆጠራል፡፡ ይህ ሁናቴም ነው
የአስተዳደር ድክመቶቹንም ሆነ አውዳሚ ጉድለቶቹን በፍጹም ለሕዝብ እንዳይደርሱ ገትሮ መያዝን የማይዘናጋበት ዋነኛ መንግስታዊ ስራ
ያደረገው (የነፃው ፕሬስ ጋዜጠኞችን እና የተቃዋሚ ፓርቲ አባላትን በውሃ ቀጠነ ወደ እስር ቤት ሲያግዝ መክረሙን ልብ ይሏል)
በጥቅሉ ድርጅቱ ለአመራሮቹ ከ4 ሚሊዮን ብር በላይ ወጪ በተደረገባቸው ዘመናዊ “V8” መኪናዎች እንዲምነሸነሹ እና በቢሊዮን
የሚቆጠር የሀገር ሀብት እንዲዘርፉ የሚያስችል ስልጣን ከማጎናፀፉ ባለፈ፤ እናንተ (ብዙሀኑ አባላት) ያተረፋችሁት ምንድር ነው?
በአነስተኛና ጥቃቅን ከመደራጀት፣ ‹‹ኮብል-ስቶን›› ፈልጦ ከመደርደር የዘለለስ ማን ምን ሊጠቅስ ይችላል? እስቲ! የተራቆተችና በድህነት
ወጀብ የተንገላታች ሀገራችሁን በዓይነ-ልቦናችሁ ለማስተዋል ሞክሩ፡፡ ያን ጊዜም ገና ጀንበር ስታዘቀዝቅ ስጋቸውን ለመቸርቸር ጎዳናዎችን
የሚያጥለቀልቁ እምቦቀቅላ እህቶቻችን፣ ‹‹ማምሻም ዕድሜ ነው›› እንዲሉ የመፅዋች ዓይን እየገረፋቸው በልመና ቁራሽ ሕይወታቸውን
ለማቆየት የሚውተረተሩ አዛውንትና ህፃናት፣ በየጎዳናው በየሰፈሩ ሲንገላወዱ የሚውሉ ስራ-አጥ ወጣቶች፣ በቀን አንዴ ለመመገብ ላይ
ታች የሚማስኑ ለፍቶ አዳሪዎች… ምድሪቷን እንዳጨናነቋት ይገለፅላችኋል፡፡ የዚህ ሁሉ መንስኤም የፈጣሪ ቁጣ ሳይሆን ፅንፈኛው
3

ድርጅታችሁ በሚከተለው በተግባር ያልተፈተነ (የሀገሪቱን ተጨባጭ እውነት ያላገናዘበ) ርዕዮተ-ዓለም፣ ፖሊሲ፣ አድሎአዊ አሰራር፣
ሙስና እና ለኃላፊነት የማይመጥኑ ‹‹አስፈፃሚዎች›› ችግር ስለመሆኑ ለአፍታም ቢሆን ጥርጣሬ አይግባችሁ፡፡ እናም ጉዳዩ የሀገር ነውና
በግልፅ እንወቃቀስ (እንነጋገር)፤ ስለምንድነው በአባልነት በምታገለግሉት ኢህአዴግ የሚመራው መንግስት ‹ዛሬም በስኬት ጎዳና
እየጋለብኩኝ ነው› ብሎ እንደ ቁራ እየለፈፈ በተግባር ግን፡- መብራት፣ ውሃ፣ መንገድ፣ ኔት-ወርክ እንደ አደይ አበባ በዓመት አንዴ ብቻ
ብቅ የሚለው? በአገልግሎት ተቋማት መጠቀምስ እንዲህ የአሲምባን ያህል ያራቀው ማን ነው? ፍትሕን የጠሉትን መበቀያ መሳሪያ
አድርገው ያረከሱት እነማን ናቸው? ሰርቶ መብላት የማይጨበጥ ጉም የሆነብንስ በማን የተነሳ ነው? …በርግጥ ይህንን ጥያቄ ለጠቅላይ
ሚኒስትር ኃይለማርያም ደሳለኝ ብናቀርብለት እንደ መለስ ዜናዊ በተረት መሳለቁ ባይሆንለትም፣ ‹‹ሰለሜ ሰለሜ››ን እየጨፈረ፤
እነ‹‹ሚካኤል ስሁል›› በቀደዱለት ልክ ዳናኪራውን እያስነካው ‹‹ሰው በእንጀራ ብቻ አይኖርም!›› ብሎ ከመዘባበት አይመለስም፡፡
መቼስ እንደዚህ ሕዝብ የተናቀ የትም አይገኝም፡፡

ኢህአዴግ መፍረስ ያለበት ለምንድን ነው?

ይህንን አጀንዳ ለማንሳት መግፍኤ የሆነው ከላይ ለማሳያ ያህል የተጠቀሱት ስርዓታዊ ጥፋቶች በግላጭ የመታየታቸው እውነታ ብቻ
አይደለም፤ ይልቁንም ድርጅቱ ከስሁት መንገዱ ለመታረም (ለመታደስ) ፍፁም ዝግ-በር የመሆኑ ጉዳይ ጭምርም ነው፡፡ አዎን፣ እነዚህ
አሁን ሁላችንንም እያማረሩ ያሉ አብዛኞቹ ችግሮች የተከሰቱት አንጋፋው ድርጅታችሁ የ‹‹ኢትዮጵያ ሕዝብ አብዮታዊ ዴሞክራሲያዊ
ግንባር›› የሥልጣን መሰረቱን ለማፅናት ይሁነኝ ብሎ ከደፈጠጣቸው መብቶች ጋር ተያይዘው ከመሆናቸው በዘለለ ለኢኮኖሚያዊ
ጥያቄዎች በቂ ምላሽም ሆነ ሁነኛ መፍትሔ የሌለው ፀረ-ሕዝብነቱ የተረጋገጠ፣ ለመታረም ዝግጁ ያልሆነ፣ ተስፋችንን ያሟጠጠ ስርዓት
ስለሆነም ነው፡፡ በ1970ዎቹ መጀመሪያ እነበረከት ስምኦን ልባቸው ከኢህአፓ ለመኮብለሉ አብይ ምክንያት አድርገው ያቀረቡትን ችግር
ታዬ የተባለ ታጋይ ‹‹ሞናሊዛ›› በሚለው ግጥሙ ግሩም አድርጎ ገልጦት እንደነበረ በ1993 ዓ.ም ‹‹ፅናት›› በሚል ርዕስ የተጋድሎ
ታሪካቸውን ባሳተሙበት መጽሐፍ ላይ ተርከውታል፡፡

‹‹አንተ ሌዎናርዶ የሮማ ጅል
የሰራሀትን ልታሻሽል
ልታፈርሳት ልትገነባት
ደግመህ ደጋግመህ ልትሰራት
ሰልሰህ ልትሰራት ስትችል
ጣኦት አደረግካት በሞትህ አጉል አጉል
ለራስህ ፍጡር እግዚኦ ልትል››

ይህ ግጥም በሰፈረበት ገፅ ላይ የተጠቀሰው የግርጌ ማስታወሻ ደግሞ ሊተላለፍ የተፈለገውን መልዕክት እንዲህ በማለት አብራርቶታል፡-
‹‹ታዬ የሚባል የኢህአፓ ታጋይ ‹ራሳችን የፈጠርነውን ድርጅት ማስተካከል አለብን› የሚል እምነት የነበረው ሲሆን፣ ዳ ቪንቺ እራሱ
ለሳላት ሞናሊዛ ፍቅር እንደተማረከ ሁሉ እኛም የፈጠርነውንና የተበላሸውን ድርጅት አመለክነው፤ ማስተካከልም ተሳነን በማለት ፓርቲው
ላይ እምነት ማጣቱን ‹ሞናሊዛ› በሚል ርዕስ በፃፈው ውብ ግጥም ገለፀ፡፡›› (ገፅ 61)

እነሆም አብዮታዊ ግንባሩ፣ ከመስራቾቹ አንዱ የሆነው ኢህዴን/ብአዴን፣ ያን ጊዜ ኢህአፓን መክሰሻ ባደረገበት ‹‹ድርጅታዊ አምልኮ››
ራሱም ተጠልፎ ከወደቀ ዓመታት ነጉደዋል፡፡ ታዬ እንዳለውም መሪዎቹ ኢህአዴግን ናቡከደናፆር አሰርቶት እንደነበረው አይነት እጅግ
ግዙፍ ‹‹አምላክ›› (ጣኦት) አድርገው ሀገርና ሕዝብን እየገበሩለት (እየሰዉለት) ነው፡፡ ርዕዮተ-ዓለምም ሆነ ፖሊሲ (በተለይ መሬትን
በተመለከተ) ‹‹የሚቀየረው በመቃብራችን ላይ ነው›› ሲሉም አስረግጠው ተናግረዋል፡፡ የትምህርት ፖሊሲውም እንዲህ ትውልድን
እየገደለም እንዲሻሻል ያልተሞከረው በዚሁ እምነታቸው ይመስለኛል፡፡ ይህ ሁኔታም ነው እናንተም የምትስማሙባቸውን ታላላቅ ሀገራዊ
ችግሮችን ለመፍታት ኢህአዴግን ከማፍረስ ውጪ አማራጭ እንዳይኖር ያደረገው፡፡ ከእንግዲህ ወዲያም ከጥፋቱ ታርሞ ለሀገር የሚጠቅም
ዲሞክራሲያዊ የህዝብ ሥርዓት ሊያነበር ይችላል ብሎ ተስፋ ማድረግ ተላላነት ነው፡፡ እንኳን እናንተ ከተማ ላይ የተቀላቀላችሁት አባላት
ቀርቶ፣ ከበርሃ አቅፈው ደግፈው እዚህ ያደረሱት አንጋፋ ታጋዮችና አንዳንድ አመራሮቹም በድርጅቱ ተስፋ ቆርጠው ጥለውት መሄድ
ከጀመሩ ሰንብቷል፡፡ ታጋይ የውብዳር አስፋው ‹‹ፊኒክሷም ሞታ ትነሳለች›› በሚለው መጽሐፏ እውነታውን እንዲህ በማለት ገልፀዋለች፡-
‹‹የድርጅቱ አመራር የወሰዳቸውን የተሳሳቱ እርምጃዎች ቀድሞ ከነበረኝ የድርጅቱ ግንዛቤ ጋር በማጣመር ለዓመታት የታገሉለትንና
የደከሙለትን አባላት በነፃ እንዲንቀሳቀሱ ያላስቻለ ድርጅት፣ ለሕዝብ ነፃነትና ለዲሞክራሲ እታገላለሁ ቢል ከይስሙላ የማያልፍ ከንቱ
መፈክር መሆኑን ደምድሜ፣ ከመጋቢት 5 ቀን 1993 ዓ.ም ጀምሮ ራሴን ከድርጅቱ አገለልኩ፡፡ ይህም በሕይወቴ ጉዞ ዋነኛውና ወሳኝ
እርምጃ ነበር፡፡›› (ገፅ 16)

እንግዲህ ከ1968 ዓ.ም ጀምሮ በተለያዩ የድርጅት፣ የሴቶች ጉዳይና የመንግስት ሥራዎች ተሰማርታ ልጅነቷን በትግል የጨረሰችው የአቶ
ገብሩ አስራት ባለቤት፣ የውብዳር አስፋው እንዲህ አይነቱን ከባድ ውሳኔ በማሳለፍ ከኢህአዴግ ከተቆራረጠች እነሆ አስራ ሶስት ዓመታት
4

ነጉደዋል፡፡ በግልባጩ እናንተ ደግሞ እስካሁን ድረስ አንቀላፍታችኋል-ገና አልነቃችሁም፡፡ እናም እውነት እውነት እላችኋለሁ፡- ከዚህ
በላዔ-ሰብ ሥርዓት ለመገላገል የምንችለው፣ ዛሬውኑ ይህንን ቅድሚያ ሊሰጠው የሚገባ ዋነኛና ወሳኝ እርምጃ በቆራጥነት መውሰድ
ስትችሉ ብቻ ነው፡፡ አለበለዚያ…

(የዚህ ጽሑፍ ሃሰበ-መልዕክትን በቅንነት ትቀበሉታላችሁ በሚል መተማመን አፈፃፀሙን፡- በምን አይነት መንገድ ተቀራርበን ልንወያይ
እንችላለን? በየትኞቹ ጉዳዮች ላይ መግባባት ይቻላል? ሃሳቡንስ ከግብ ለማድረስ ምን ያህል ጊዜ ይወስዳል? የሚሉትንና መሰል
ጥያቄዎችን በሌላ ዕትም ተገናኝተን በስፋት እንመክርባቸዋለን)

አትዮጵያ ለዘላለም ትኑር!

^ ^የሒሳብ-አያያዝ-ባለሞያ-የለም-ወይ-ባገሩ^^