• በድርቁ አካባቢዎች 350ሺ ተጨማሪ ህፃናት ይወለዳሉ
• የነፍሰ ጡር እናቶች ቁጥር እየጨመረ ነው
• የእርዳታ እህል በፍጥነት እንዲጓጓዝ ተጠየቀ
በድርቅ በተጐዱ የኢትዮጵያ አካባቢዎች በሚቀጥሉት 6 ወራት ውስጥ 350ሺህ ተጨማሪ ህፃናት እንደሚወለዱ የተባበሩት መንግስታት ያስታወቀ ሲሆን ለድርቁ የሚደረገው አለማቀፍ ድጋፍ የተቀዛቀዘ መሆኑ ችግሩን አስጨናቂና በእጅጉ አሳሳቢ አድርጐታል ተብሏል፡፡
አለማቀፉ የህፃናት አድን ድርጅት በበኩሉ፤ በአሁኑ ወቅት ከሶሪያ ቀጥሎ አሠቃቂ የሰብአዊ ቀውስ ያንዣበበው በኢትዮጵያ መሆኑን ጠቁሞ፤ 4መቶ ሺህ ህፃናት የአልሚ ምግብ በእጅጉ እንደሚያስፈልጋቸው ገልጿል፡፡
ድርቁ በተከሰተባቸው አካባቢዎች ባለሙያዎቹን በመላክ ተዘዋውረው እንዲጎበኙ ማድረጉን የጠቆመው የህፃናት አድን ድርጅቱ፤ በርካታ እናቶች ነፍሰ ጡር መሆናቸው አሳሳቢ እንደሆነ ገልጿል፡፡ ለእናቶች እንክብካቤ ማድረግ አስቸጋሪ በሆነበት እንዲሁም እናቶች አስፈላጊውን ንጥረ ምግብ ማግኘት ባልቻሉበት ሁኔታ የነፍሰ ጡር ሴቶች ቁጥር መጨመር ችግሩን አስጨናቂ ያደርገዋል ተብሏል፡፡ የሚወለዱት ህፃናት እጣ ፈንታም አሳሳቢ የህፃናት አድን ድርጅቱና የተባበሩት መንግስታት ጠቁመዋል፡፡
በሌላ በኩል የኢትዮጵያ መንግስት ድርቁን ለመቋቋም እያደረገ ያለውን ጥረት ለማገዝ ከ10.5 ቢሊዮን ብር በላይ ወጪ ለማውጣት እንደሚገደድ የአለም የምግብ ፕሮግራም ከትናንት በስቲያ ያስታወቀ ሲሆን የገንዘብ ድጋፉም እስከ ሚያዚያ ወር ድረስ ተሰባስቦ ለተረጅዎች ድጋፍ መዋል እንዳለበት ገልጿል፡፡
በአንዳንድ የሀገሪቱ አካባቢዎች የድርቁ ሁኔታ በ1977 ዓ.ም ከተከሰተውና የ1 ሚሊዮን ገደማ ዜጐችን ህይወት ከቀጠፈው የድርቅ ክስተት የባሰ መሆኑን የጠቆመው የአለም የምግብ ፕሮግራም፤ 10.5 ቢሊዮን ብሩን በመጪው ወር ከለጋሾች እንደሚያሰባስብም ገልጿል፡፡
በአጠቃላይ ለእርዳታው ያስፈልጋል ተብሎ ከተገመተው 1.4 ቢሊዮን ዶላር ውስጥ በአሁኑ ወቅት 37 በመቶ ያህሉ መገኘቱን የተባበሩት መንግስታት የእርዳታ ማስተባበሪያ ኤጀንሲ አስታውቋል፡፡
የብሔራዊ የአደጋና ስጋት ቅነሳ ስራ አመራር ኮሚሽን በበኩሉ፤ መንግስት ለተጐጂዎች በቂ እርዳታና ድጋፍ እያደረገ መሆኑን ገልፆ እስካሁን ከተለያዩ አገራትና የረድኤት ተቋማት 431 ሚ. ዶላር ድጋፍ ቃል መገባቱን አስታውቋል።
የመንገድ ችግርና የመጋዘን እጥረት እርዳታ በማከፋፈል ሂደቱ የሚገጥሙ እንቅፋቶች እንደሆኑም ኮሚሽኑ ጨምሮ ገልጿል፡፡
የተባበሩት መንግስታት የእርዳታ ማስተባበሪያ ኤጀንሲ በበኩሉ በእርዳታ አሰጣጡ ላይ ዘይት፣ ስንዴና የማባያ የምግብ ግብአቶች በአንድነት ለተረጂዎች እየቀረቡ አለመሆኑ እርዳታ ፈላጊዎች ለእንግልት እየዳረገ መሆኑን ጠቅሶ፤ የምግብ ግብአቶች በአንድነት እንዲቀርቡ ጠይቋል፡፡
እስከ ሚያዚያ 2008 የሚበቃ እርዳታ መገኘቱን የጠቆመው ኤጀንሲው፤ እርዳታውን ከወደብ የማጓጓዝ ሥራ በፍጥነት መከናወን እንዳለበት አሳስቧል፡፡ በሌላ በኩል የኢትዮጵያ ቀይ መስቀል ማህበር በአጭር የሞባይል የጽሑፍ መልዕክት ስኬታማ የሆነ እርዳታ እያሰባሰበ መሆኑን  አስታውቋል፡፡ የማህበሩ የኮሚኒኬሽንና የሃብት ማሰባሰብ መምሪያ ሃላፊ አቶ ደግሰው አማኑ ለአዲስ አድማስ እንደገለፁት፤ በአጭር ጽሑፍ መልዕክቱ እርዳታ የሚያዋጣው የህብረተሰብ ቁጥር በየእለቱ እየጨመረ መሆኑን ጠቅሰው፤ በቀን እስከ 10ሺህ ሰው ከ5 ብር 50 ብር የሚደርስ የገንዘብ እርዳታ እየሰጠ እንደሆነ ተረጋግጧል ብለዋል፡፡

The post ድርቁ አስጨናቂና አሳሳቢ ሆኗል ተባለ – አለማየሁ አንበሴ appeared first on Zehabesha Amharic.

5 የዩኒቨርሲቲው ተማሪዎች በመኪና አደጋ ህይወታቸው አለፈ

በሃዋሣ ከተማ ውስጥ በሚገኘው የሃዋሣ ዩኒቨርሲቲ ፍሳሽ ማጠራቀሚያ ገንዳ ውስጥ የገቡ 3 ህፃናት ህይወታቸው አለፈ፡፡ ዕድሜያቸው 8‚ 12‚ እና 14 የሚሆናቸው ህፃናት፤ በሽቦ አጥር በተከለለው የዩኒቨርሲቲው የቆሻሻ ፍሳሽ ማጠራቀሚያ ገንዳ ውስጥ በአጥር ተንጠላጥለው በመግባት ለመዋኘት ሲሞክሩ ህይወታቸው አልፏል፡፡
ወደ ፍሳሽ ማጠራቀሚያው የገቡት አራት ህፃናት ሲሆኑ ከሁለት መንትያ ወንድማማቾች መካከል አንደኛው ወደ ማጠራቀሚያ ውስጥ ሳይገባ በመቅረቱ ህይወቱ የተረፈ ሲሆን፤  የስምንት አመቱ ህፃን መንትያ ወንድሙን ጨምሮ ሁለት ጓደኞቹ በገንዳው ውስጥ ገብተው በመቅረታቸው ሁኔታውን ለሰዎች ነግሮ፣ የህፃናቱ አስከሬን ከገንዳው ውስጥ ሊወጣ ችሏል፡፡
የህፃናቱ የቀብር ስነስርዓት ከትናንት በስቲያ በስላሴ ቤተክርስቲያን የተፈፀመ ሲሆን በህፃናቱ ሞት የአካባቢው ነዋሪዎች በእጅጉ አዝነዋል፡፡ ዩኒቨርሲቲው ለፍሳሽ ማጠራቀሚያ ባዘጋጀው ገንዳ ውስጥ የተጠራቀመውን ፍሳሽ እያጣራ መልሶ ለአገልግሎት እንዲውል በሚያስችል ቴክኖሎጂ እየተጠቀመ መሆኑን የሚናገሩት ምንጮች፤ ማጠራቀሚያው ግን በበቂ ሁኔታ በአጥር ተከልሎና ጥበቃ ተመድቦለት ቁጥጥር ሊደረግበት ይገባ ነበር ብለዋል፡፡
ስለጉዳዩ እንዲነግሩን ለዩኒቨርሲቲው ፕሬዚዳንት ያደረግነው ተደጋጋሚ የስልክ ጥሪ ምላሽ ሳያገኝ ቀርቷል፡፡
በሌላ በኩል ከሰሞኑ ርዕደ መሬት ጋር በተያያዘ አዋሣ ዩኒቨርሲቲ ለ15 ቀናት በመዘጋቱ ምክንያት ወደ ቤተሰቦቻቸው በመኪና ሲጓዙ የነበሩ 5 የዩኒቨርሲቲው ተማሪዎች ትናንት ዝዋይ ላይ በተፈጠረ መኪና አደጋ ህይወታቸው አልፏል፡፡

The post 3 ህፃናት ሃዋሣ ዩኒቨርሲቲ ጉድጓድ ውስጥ ገብተው ሞቱ – አለማየሁ አንበሴ appeared first on Zehabesha Amharic.

ዘ-ሐበሻ በሰበር ዜና ባለፈው ሀሙስ በጋምቤላ በኑዌር እና በአኝዋክ ብሄረሰቦች መካከል በተነሳ ግጭት የሟቾች ቁጥር 6 መድረሱን መዘገቧ ይታወሳል:: ግጭቱ እስከ ዛሬ ድረስ መቀጠሉ ተዝግቦ የሟቾች ቁጥር አሻቅቧል::

አዲስ አድማስ ጋዜጣ እንደዘገበው በጋምቤላ ክልል በኑዌርና በአኝዋክ ብሔሮች መካከል በተፈጠረ ግጭት የክልሉ የፀጥታ ሃይል አባላትን ጨምሮ የ8 ሰዎች ህይወት ያለፈ ሲሆን በርካቶች በቦንብ ፍንዳታ የመቁሰል አደጋ እንደደረሰባቸው ምንጮች ጠቁመዋል፡፡

የከተማዋ ነዋሪዎች ለአዲስ አድማስ እንደገለፁት፤ በግጭቱ ቤቶች የተቃጠሉ ሲሆን ከትላንት በስቲያ ጀምሮ እስከ ትናንት ድረስ የመንግስት መስሪያ ቤቶችን ጨምሮ ባንኮችና የንግድ ተቋማት የተዘጉ ሲሆን ትናንት ረፋድ ላይም በከተማዋ አንዳንድ አካባቢዎች ግርግር ተከስቶ እንደነበር ታውቋል፡፡
ለቀናት በዘለቀው ግጭት የክልሉ የትራንስፖርት ቢሮ ም/ኃላፊን ጨምሮ 8 ሰዎች መሞታቸውንና በከተማዋ ሁለት ቦታ በፈነዳ ቦንብም በርካቶች መቁሰላቸውን የጠቆሙት ምንጮች፤ የክልሉ ልዩ የፖሊስ ኃይልን ጨምሮ የመከላከያ ሰራዊት ግጭቱን ለማረጋጋት ጥረት ማድረጋቸውን ጠቅሰው በትናንትናው ዕለትም ከተማዋ በውጥረትና ግርግር ስትዋከብ መዋሏን ገልፀዋል፡፡
የግጭቱ መነሻ ከ15 ቀናት በፊት በክልሉ ጤና ሳይንስ ኮሌጅ ም/ዲንና በክልሉ ም/ፕሬዚዳንት ሹፌር መካከል በመኖሪያ ቤት መሬት ጉዳይ በተፈጠረ የግል ፀብ መሆኑን የጠቆሙት ምንጮቻችን፤ ጠቡን ተከትሎ ም/ዲኑ የአኙዋክ ተወላጅ ሹፌሩን እጁ ላይ በጥይት መተው ማቁሰላቸውን ገልፀው በዚህም ሳቢያ ጉዳዩ የብሄር ግጭት መልክ እንደያዘና ወደ ተማሪዎች የቡድን ፀብ እንደተዛመተ አስረድተዋል፡፡
ግጭቱ ከእለት እለት እየተባባሰ ቀጥሎም አንዲት የኑዌር ተወላጅ ተማሪ በግጭቱ ጉዳት ደርሶባት ህክምና እየተከታተለች ሳለ ህይወቷ በማለፉ ግጭቱ መካረሩን የጠቆሙት ምንጮች፤ የኑዌርና የአኙዋክ ብሄር ተወላጅ ተማሪዎች የእርስ በእርስ ግጭት መፍጠራቸውን ገልፀዋል፡፡
የክልሉ ልዩ ሃይል ግጭቱን ለማርገብ ሙከራ ሲያደርግ ቢቆይም ሁኔታው ባለመረጋጋቱ የመከላከያ ሰራዊት በትናንትናው እለት በከተማዋ ተሰማርቶ ግጭቱን ለመቆጣጠር ጥረት እያደረገ መሆኑን ነዋሪዎች ለአዲስ አድማስ ተናግረዋል፡፡
በጉዳዩ ዙሪያ ከክልሉ የመንግሥት ኮሚኒኬሽን ጉዳዮች ፅ/ቤት ም/ኃላፊ ተጨማሪ መረጃ ለማግኘት ጥረት ብናደርግም በትናንትናው ዕለት ኃላፊው አዲስ አበባ መምጣታቸውን ገልፀው፤ “መረጃ ለመስጠት እንደማይችሉ ገልፀውልናል ሲል አዲስ አድማስ ዘገባውን አጠናቋል::

The post በጋምቤላ የሟቾች ቁጥር 8 ደረሰ | ውጥረቱ እንዳየለ ነው | በርካቶች በቦምብ ፍንዳታ ቆስለዋል appeared first on Zehabesha Amharic.

(ዘ-ሐበሻ) በጋምቤላ በኑዌር እና በአኝዋክ ብሄረሰቦች መካከል የተነሳው ግጭት እየተባባሰ ይገኛል:: ቀደም ባለው ዘገባችን ቦምብ ፈንድቶ በርካታ ሰዎች መቁሰላቸውን መዘገባችን ይታወሳል:: በጋምቤላ በተፈጠረው የ እርስ በ እርስ ግጭት የሟቾች ቁጥር 8 ደርሷል:: የዘ-ሐበሻ የጋምቤላ አካባቢ ያሉ በጎ ፈቃድ ዘጋቢዎች ይህን የቦምብ አደጋ እና ያደረሰውን ጥፋት የሚያሳዩ ፎቶዎች ልከውልናል:: ይመልከቷቸው::

The post በውጥረት ውስጥ ካለችው ጋምቤላ ፎቶዎች ደርሰውናል | ዛሬም ሰዎች እያለቁ ነው appeared first on Zehabesha Amharic.

(ዘ-ሐበሻ) ሰሞኑን በጋምቤላ በተነሳው ብጥብጥ ጋር ተያይዞ እስር ቤት የነበረው ኦካቺ አቡል ዛሬ ተገድሎ መገኘቱ ተዘገበ:: ዘ-ሐበሻ ከስፍራው ያነጋገቻቸው የዓይን እማኞች ከሟች ኦካቺ አቡል ፎቶ ግራፍ ጋር አያይዘው በሰጡን መረጃ በሟች አስከሬን ላይ ከፍተኛ የጥይት እና የዱላ ምልክቶች አይተዋል::

በሕወሓት መንግስት የሚደገፈውና ጋምቤላን በስልጣን ላይ ተቆጣጥሮ የሚገኘው የኑዌር ብሄረሰብ ወታደሮች ይህን ወጣት ከ እስር ቤት አውጥተው እንደገደሉት ያስታወቁት እነዚሁ ዘ-ሐበሻ ያነጋገረቻቸው ወገኖች ከተማዋን ፌደራል ፖሊስ ተቆጣጥሯት ቢገኝም በተለይ የአኝዋክ ብሄረሰብ ሲገደሉ እያዩ ዝም ብለዋል ሲሉ ተቃውሟቸውን ያሰማሉ::

እንደ አይን እማኞች ገለጻ ኦካቺ በኑዌር ተወላጅ ወታደሮች ከ እስር ቤት ተወስዶ ሲገደል እነዚሁ የሕወሓት የፌደራል ወታደሮች እያዩ ነበር::

በአሁኑ ወቅት በጋምቤላ የአኝዋክ ብሔረሰብ አባላት እንዴት በስደት ወደ ክልላችን በስደት በመጡትና በስልጣን ላይ ባሉት የኑዌር ማህበረሰብ አባላት እንገደላለን በሚል የጋምቤላ ከተማን ውጥረት ውስጥ ከተዋታል::

ዘ-ሐበሻ ይህን ጉዳይ እየተከታተለች ትዘግባለች::

The post በጋምቤላ እስር ቤት የ20 ዓመቱ ኦካቺ ኦቡል ተገደለ | የሟች ፎቶን ይዘናል | ከ16 ዓመት በታች ያሉ እንዳይመለከቱት appeared first on Zehabesha Amharic.

ግብጽ እና ስወዲ አረቢያም ኢትዮጵያዊያኖችን ማዋከቡን ተያይዘውታል

ከታምሩ ገዳ

የምስራቅ አፍሪካዋ አገር ታንዛኒያ በተለያዩ ጊዜያት ወደ ግዛቷ በመግባት ወደ ደ/አፍሪካ ለመሸጋገር ሲሞክሩ በቁጥጥር ስር ያደረገቻቸውን በመቶዎች የሚቆጠሩ ኢትዮጵያዊያን ስደትኞችን ወደ አገራቸው በ ሃይል ለመመለስ መዘጋጀቷን አሳወቀች።
የታንዛኒያው የአገር ውስጥ ደህንንት ሹም የሆኑት ቻርልስ ኪታዋንጋን ዋቢ ያደረገው ዜና ሮይተርስ በማክሰኞ ጥር 26 /2016 እኤ አ እንደገለጸው በኢትዮጵያ የተከሰተውን መጠነ ሰፊ ረሃብን በመሸሽ ለተሳለ ኑሮ ሲሉ ለደላሎች ከ አንድ ሺህ እስከ ሁለት ሺህ ዶላር በመክፈል በታንዛኒያ እና በማላዊ በኩል ወደ ደ/አፍሪካ እና ወደ አውሮፓ ለማምራት አቅደው በአገሪቱ የጸጥታ ሃይሎች እጅ የወደቁ በርካታ ኢትዮጵያዊያኖች እና ሶማሊያዊያኖችን በሕግ አግባብነት በማሰሰ እና በእስራት በመቅጣት ወደ አገራቸው ለማባረር በከፍተኛ እንቅስቃሴ ላይ መሆናቸውን አስታውቀዋል።

ታንዛኒያ በአትዮጵያዊያን ስደተኞች ላይ ጠጠር ያለ እርምጃ ስትውስድ የመጀመሪያዋ አይደለም። በቅርቡ ከ አርባ በላይ ኢትዮጵያዊያን ሰደተኞች በደላሎቻቸው “ወደ ደ/አፍሪካ እናሸጋግራችኋለን “ ተብለው ተሰፋ ከተሰጣቸው በሁዋላ በሁለት ባዶ ቤት ውስጥ ታጭቀው ሳሉ በፖሊስ ቁጥጥር ስር መሆናቸው ታውቋል። ቀደም ባለው ጊዜም እኤ አ በሰኔ 29/ 2012 ቁጥራቸው 43 የሚሆኑ ኢትዮጵያዊያን ሰደተኞች በእቃ መያዢያ/ኮንቴነር/ ውስጥ ተሸሽገው ከታንዛኒያ ወደ ደ/አፍሪካ ሲጓዙ በረሃብ ፣በውሃ ጥእም እና በአየር እጦት ታፍነው የመሞታቸው የበረካታዎችን ልብ የሰበረው ገጠመኝ አለማቀፋዊ መነጋገሪያ ሆኖ እንደነበር ይታወሳል።

ጎረቤት ማላዊም አንደሁ ቁጥራቸው ከ 250 በላይ ኢትዮጵያዊያን ሰድተኞችን የጤንነቱ አያያዝ በጣም ዝቅተኛ በሆነ እና እጅግ ዘግናኝ በሆነ እስር ቤት ወስጥ በማጎር ወደ አገራቸው ለማባረር እንቅሰቃሴዎችን መጀመሯን ቀደም ሲል አሰታውቃለች። ከዚሁ ከህገውጥ የሰደተኞች ጉዳይ ጋር በተያያዘ ዜና ግብጽ ሰሞኑን አኢትዮጵያዊኣኖችን ጨምሮ የተለያዩ አገር ዜጎች የተካተቱትበት ከ 40 በላይ ሰደተኞችን በግብጹ ስነይ በረሃ በኩል ወደ እስራኤል ለመሻገር ሲጥሩ ያዝኳቸው በማለት ወደ መጡበት አገር ማባረሯን ካይሮ ፖስት ጋዜጣ ሰሞኑን ዘገቧል ሰውዲ አረቢያም እንዲሁ ሰሞኑን በአንድ በሕገውጥ አዘዋዋሪ የሶማሊያ ዜጋ አማካኝነት ደንበሯ ውስጥ ዘልቀው ሲጓዙ የነበሩ አራት ኢትዮጵያዊያን ሴቶች እና አንድ ጨቅላ ልጅ መያዛቸውን ሳውዲ ጋዜት የተባለ የአገሪው ጋዜጣ ዘገቧል። ጋዜጣው በሃተታው ላይ ተጠርጣሪው ግለሰብ በአገሪቱ የጸጥታ ሃይሎች ተይዞ አብረውት በመኪና ውስጥ ሰለነበሩት ገለሰቦቹ ማነነት ሲጠየቅ “ቤተሰቦቼ ናቸው” በማለት ህገውጥ መታወቂያ በማሳየት ለማታለል ቢሞክርም ሁሉም ተጠርጣሪዎች ከ ፖሊስ መዳፍ ከመወደቅ አላመለጡም ተብሏል።ሰውዲ አረቢያ ከ አንድ አመት በፊት በሺዎች የሚቆጠሩ ኢትዮጵያዊያኖችን ከ አገሯ በገፍ ማባረሯ በሔራዊ ሃዘን እና ቁጣ መቀሰቀሱ አይዘነጋም።
ታዲያ ይህ አይነቱ የረሃብ እና የመልካም አሰተዳደር እጦት ሰለባ የሆኑ የበርካታ ኢትዮጵያዊያን አሰከፊ የሰደት ጎዞ እና ያሰቡት ሳይሳካ ህይወታቸውን እሰከ ማጣት ጨምሮ ለተለያዩ ሰው ሰራሽ እና ተፈጥሮአዊ ችግሮች የመዳረጋቸው እጣ ፈንታ መቼ ይቆም ይሆን? በሎ መጠየቁ እና ለችግሩ መንሴዎችም መፈትሄ ማፈላለጉ ግድ ይላል።

The post ታንዛኒያ ረሃብን የሸሹ በርካታ ኢትዮጵያዊያንን “ከአገሬ ጠራርጌ አባርራለሁ” አለች – ግብጽ እና ስወዲ አረቢያም ኢትዮጵያዊያኖችን ማዋከቡን ተያይዘውታል appeared first on Zehabesha Amharic.

ፀረ-ወያኔ አቋም ለአላቸው የኢትዮጵያውያን የፖለቲካ፣ የሲቪክ እና የሙያ ማኅበራት በሙሉ

በያሉበት

ሞረሽ ወገኔ ዐማራ ድርጅት፣

ሐሙስ ጥር ፲፱ ቀን ፪ሺህ፰ ዓ.ም.(Thursday January 28, 2016)

ጉዳዩ፦ መነሻ የመግባቢያ ኃሣብ ስለማቅረብ፦ እስከ አንድነት ለመድረስ የሚያስችል ውጤታማ ትብብር ለማድረግ መከተል ስለሚገባን አካሄድ፤
ማናችንም እንደምንገነዘበው፣ ባለፉት 40 እና 50 ዓመታት ኢትዮጵያውያን ስንደራጅ የኖርነው በልዩነቶቻችን ላይ ባተኮሩ ዓላማዎች ዙሪያ ነው። ልዩነቶቻችን ደግሞ ከርዕዮተ-ዓለም ባሻገር፣ በነገድ፣ በጎጥ እና በኃይማኖት ጭምር ያጠነጠኑ በመሆናቸው፣ አንድነታችንን አሳሳቢ ደረጃ ላይ አድርሶታል። ከሁሉም በላይ፣ የትግሬ-ወያኔ በባዕዳን ድጋፍ ተበረታትቶ፣ ግንቦት 20 ቀን 1983 ዓ.ም. የፖለቲካ ሥልጣን ሲጨብጥ፣ ያስተጋባው የዲሞክራሲ ቀቢፀ-ተስፋ እውነት መስሏቸው የተከተሉት ወገኖች አይጠፉም። ሆኖም ይህ ፀረ-ኢትዮጵያ ቡድን በተግባር ሲያከናውን የሚታየው፥ የቋንቋ ፣ የነገድ ፣ የጎሣ ፣ የዘር ፣ የኃይማኖት ፣ ወዘተርፈ ልዩነቶችን መሠረት አድርጎ ሕዝቡ ለዘመናት ገንብቶት በኖረው ኢትዮጵያዊ ማንነት ላይ ግልጽ የጥፋት ዘመቻ ማካሄድን ነው። የትግሬ-ወያኔ ባለፉት 25 ዓመታት ውስጥ በአካሄደው የዘር ልዩነት ፖለቲካ ግፊት፣ ሕዝቡ ኢትዮጵያዊ ማንነቱን ችላ እያለ፣ በቋንቋ ማንነቱ ዙሪያ ብቻ እንዲያስብ እና እንዲደራጅ አድርጓል። በዚህም ምክንያት ለሕዝቡ አንድነት ጌጥ እና ውበት፣ ጥንካሬ እና ልዩ መታወቂያ የሆኑት ነባራዊ ልዩነቶች የጠብ እና የብጥብጥ መነሻዎች ሆነዋል። በዚህ ረገድ የአያሌ ዜጎች ሕይዎት መጥፋቱን፣ ንብረት መውደሙን እናውቃለን። በተለይም ኢትዮጵያውያን ዐማሮች የአማርኛ ቋንቋ በመናገራቸው ብቻ ለዘመናት ከኖሩበት አካባቢ ተለይተው ሀብት ንብረታቸውን እየተዘረፉ መባረራቸውን ማስታወስ ይበቃል። በዐማራ፣ በአኙዋክ ፣ በሶማሌ እና በሌሎች ነገዶች ተወላጆች ላይ የሚደርሰው የዘር ማጥፋት እና የዘር ማጽዳት ወንጀል ሊገታ አለመቻሉ የአደባባይ ምስጢር ነው። ስለዚህ ይህ ድርጊት እየተባባሰ በመሄድ ላይ ስለሆነ፣ አፋጣኝ እና መሠረታዊ መፍትሔ የሚሻ ጉዳይ ነው።

የትግሬ ወያኔው አገዛዝ በሥልጣን ላይ ሊቆይ የሚችለው፣ ፍትሐዊ አስተዳደርን በማራመድ ሳይሆን፣ የጀመረውን የከፋፍለህ ግዛ ፖሊሲውን እያራቀቀ በመሄድ ብቻ መሆኑ ከእንግዲህ ሊያጠያይቅ አይችልም። ስለሆነም፣ ይህን የትግሬ ወያኔውን አገዛዝ በጠመንጃ ኃይል ከጨበጠው የፖለቲካ ሥልጣን በእርግጠኝነት በማላቀቅ አሽቀንጥሮ ለመጣል ከኢትዮጵያውያን አንድነት የተሻለ አስተማማኝ መሣሪያ አይኖርም። ለዚህ ደግሞ፣ እስካሁን የተጓዝንበትን የልዩነት ጉዞ በመተው፣ በኢትዮጵያዊነት አገራዊ ስሜት በአንድነት መቆም ያስፈልጋል። ስለሆነም ከልዩነቶቻችን ይልቅ በአንድነታችን ላይ አትኩረን በኅብረት መንቀሳቀስ አማራጭ አይኖረውም ። አንድነት ኃይል ነው፤ ጥንካሬ ነው፤ የማድረግ ብቃት ማረጋገጫ ነው።

ሰሞኑን ከየአቅጣጫው የሚሰሙት የ«እንተባበር» እና የ«አንድነት» ጥሪዎች ወቅታዊ ስለሆኑ አዎንታዊ ምላሽ ሊያገኙ ይገባል። ለተግባራዊነታቸው አስተማማኝ መሠረት ለመጣል ደግሞ፣ «በኢትዮጵያ ጉዳይ ያገባናል» የሚሉ ወገኖችን ሁሉ አካትቶ፣ ለሚታሰበው አንድነት ጉዞ ፈር ቀዳጅ የሆነ የምክክር መድረክ ይዋል ይደር ሳይባል መፈጠር ይኖርበታል። ለዚህ ሂደት ውጤታማነት ተሞክረው ለግብ ካልበቁ የስምምነት ሙከራዎች ትምህርት ሊቀሰም ይገባል። እንዳለፉት ስምምነቶች ሁሉ የተፈረመባቸው ቀለም ሳይደርቅ ወደ ነበሩበት የመመለስ ሁኔታ እንዳይገጥም፣ የተስማሚ ወገኖችን ይሁንታ ያገኘ የመግባቢያ ሰነድ ሊዘጋጅ ይገባል። ይህ ሰነድ ወደ ዋናዎቹ የስምምነት ጉዳዮች ለመግባት ተስማሚዎቹ ወገኖች አምነውና ዐውቀው፣ የውዴታ ግዴታ የሚገቡበት አስገዳጅ እና ተፈጻሚነት ያለው ይዘት ሊኖረው ይገባል። ሰነዱ ከተዘጋጀ እና ሁሉም አንድነት ፈላጊዎች ተስማምተው ከፈረሙበት በኋላ፣ ለሕዝብ ይፋ ሆኖ ሂደቱን ሕዝቡ በባለቤትነት እንዲከታተለው እና ተስማሚ ወገኖችም የተጠያቂነትና የኃላፊነት ስሜት እንዲያድርባቸው ማድረግ ይገባል።

ሞረሽ ወገኔ የዐማራ ድርጅት አገራችን ኢትዮጵያ የገባችበትን አሳሳቢ ሁኔታ በመግለጽ እና በአስቸኳይ ቢወሰድ አደጋውን ሊያስወግድ ይችላል ብሎ ያመነበትን የመፍትሔ ኃሣብ በመጠቆም ከዚህ በላይ የሰፈረውን አቅርቧል። ለአፈጻጸም ይረዳ ዘንድም፣ ከዚህ በታች የተመለከቱት አስፈላጊ እርምጃዎች በውል እየተጤኑ ተግባራዊ እንዲሆኑ ያሳስባል።

1. ስምምነቱን የሚመራ ኮሚቴ ሊመሠርት የሚችል የጋራ መድረክ መፍጠር

(ሀ) ይህ መድረክ ከአንድ ወር ባልበለጠ ጊዜ ውስጥ መጠራት ይኖርበታል።

(ለ) መድረኩ ኃላፊነት በወሰዱ ወይም በሚወስዱ ድርጅቶች አማካኝነት ይጠራል።

(ሐ) ለመድረኩ እያንዳንዱ በኢትዮጵያ ጉዳይ ያገባናል የሚሉ የፖለቲካ፣ የሲቪክ እና የሙያ ማኅበራት በአምስት በአምስት ሰዎች ይወከላሉ፤ ታዋቂ ግለሰቦች እና የኃይማኖት ድርጅቶች እያንዳንዳቸው በአንድ ሰው የሚወከሉ ይሆናል።

(መ) የመድረኩ ኃላፊነትም ለቀረበው የአንድነት ጥሪ አዎንታዊ መልስ ለመስጠት የሚያስችል አስማሚ ኮሚቴ መመሥረት እና አስማሚ ኮሚቴው ሊያተኩርባቸው በሚገባቸው የመግባቢያ ሰነዶች ይዘት ላይ ለመወሰን ይሆናል።

2. የአስማሚ ኮሚቴ አባሎች አመራረጥ

(ሀ) በተዘጋጀው መድረክ በተገኙ አባሎች አማካኝነት በሚደረግ ውይይት ቁጥራቸው ከአሥራ አምስት እስከ ሃያ አንድ የሚሆኑ የኮሚቴ አባሎችን የያዘ ኮሚቴ መመሥረት ።

(ለ) የኮሚቴ አባላቱም ከሚከተሉት አንዱን ወይም ከሁሉም በማቀላቀል መመሥረት ይቻላል።

3. የኮሚቴው አባላት ይዘት

(ሀ) በሁሉም ተስማሚዎች አመኔታና አክብሮት የተቸራቸው ታዋቂ ኢትዮጵያውያን ግለሰቦች፣

(ለ) በኢትዮጵያ ካሉት ነገዶች እና ጎሣዎች ከአምስት መቶ ሺህ ሕዝብ በላይ ያላቸው የነገድ እና የጎሳ ተወካዮች፤

(ሐ) ከኢትዮጵያ ታላላቅ ኃይማኖቶች ታዋቂ አባቶች ፤

4. የቴክኒክ የሥራ ቡድን ስለ ማቋቋም

(ሀ) ለሚቋቋመው አስማሚ ኮሚቴ ሥራ መቃናት እና መቀላጠፍ የሚያግዙ በሁሉም ተስማሚ ወገኖች ይሁንታ ያገኙ፣ ወይም ከተስማሚ ወገኖች ተመጣጣኝ ውክልና ያላቸው የቴክኒክ የሥራ ቡድኖች መቋቋም አለባቸው።

(ለ) የእነዚህ የሥራ ቡድኖች ተግባርና ኃላፊነታነታው በግልጽ የሰፈረ፣ ከአስማሚ ኮሚቴው ጋር ሊኖራቸው የሚችለው የሥራ ግንኙነት በማያሻማ መንገድ የተገለጸ መሆን ይኖርበታል።

5. የኮሚቴው የሥራ ጊዜ እና የአፈጻጸም ጉዳዮች

(ሀ) አስማሚ ኮሚቴው በሥራ ላይ የሚቆይበት ጊዜ የተወሰነ መሆን ይኖርበታል።

(ለ) ኮሚቴው ዝርዝር የሥራ አፈጻጸም መመሪያዎችን ያዘጋጃል።

(ሐ) ኮሚቴው የተሳታፊ ድርጅቶችን እና ና ግለሰቦችን አመራረጥ መስፈርት ያዘጋጃል።

(መ) የስምምነቱ ሥነሥርዓት የሚገዛበት ደንብ እና የአሠራር ቅደም ተከተል መመሪያዎች በኮሚቴው ይዘጋጃሉ።

6. ትኩረት የሚጠይቁ ሌሎች ጉዳዮች

(ሀ) ተስማሚዎቹ ወገኖች ከስምምነት ከደረሱ በኋላ ማከናወን ያለባቸውን አንኳር አገራዊ ጉዳዮችን ለይቶ ማስቀመጥ፣

(ለ) ከወያኔ ውድቀት በኋላ ኢትዮጵያ ልትከተለው ስለሚገባ የአስተዳደር እና የፖለቲካ ሥርዓት በአገር አንድነት ከተስማሙ ወገኖች የቀረቡ ኃሣቦችን ማቀናጀት፤

(ሐ) ስምምነቱ የሚካሄድበት አገር፣ ከተማ እና ጊዜ መወሰን፤

(መ) በመግባቢያ ሰነዱ የተስማሙ ድርጅቶችን፣ ቡድኖችን፣ ስብስቦችን እና ማኅበሮችን ማንነትና የሚወክሏቸውን ሰዎች ማንነት ለይቶ መመዝገብ፤

(ሠ) የስምምነቱ ሂደት እና ውጤት የሚገለጽባቸውን ቋንቋዎች መወሰን፤

(ረ) ስምምነቱ በሚገለጽባቸው ቋንቋዎች መካከል የትርጉም ልዩነት ቢከሰት፣ በዋናነት የሚወሰደውን ቋንቋ ለይቶ መወሰን፤

7. ተጨማሪ ማሳሰቢያ

(ሀ) አንድነት የሚፈጥሩ ቡድኖች የሚለያዩባቸው አቋሞች ቢኖሯቸውም የአገር አንድነትን በተመለከተ የሚጋሯቸው እሴቶች ምን እንደሆኑ ተለይተው መቀመጥ ይኖርባቸዋል።

(ለ) በመስማሚያው ወይም መግባቢያው ሰነዱ እና በአሠራሩም ቅደም ተከተል ስምምነት ከተደረገ በኋላ፣ ወደ ዋናው ጉዳይ ሲገባ፣ ስምምነቱ በቀና እና በታሰበው ጊዜ እንዲከናወን፣ ተሳታፊዎች «አሉኝ» የሚሏቸውን የአቋም ጥያቄዎች በክብደታቸው ቅደም ተከተል መሠረት

አስማሚው ኮሚቴው በሚወስነው የጊዜ ገደብ ውስጥ በጽሑፍ እንዲያቀርቡ ማድረግ ሥራን ያቀላጥፋል። ከዚህ በተጨማሪ ስምምነቱም በእነዚያ ነጥቦች ዙሪያ ብቻ እንዲያተኩር መወሰኑ በውይይቱ ወቅት ሰጥቶ ለመቀበልም ሆነ፣ «ይህ ካልሆነ» ብሎ አቋምን አጠንክሮ ለመጓዝ ይረዳል።

እነዚህና መሰል ጉዳዮችን የሚያካትት ሰነድ መዘጋጀት ለሚታሰበው አንድነትና የትብብር ጥሪ ውጤታማነት ያገለግላል ብሎ ሞረሽ ወገኔ የዐማራ ድርጅት ያምናል።

The post መነሻ የመግባቢያ ኃሣብ ስለማቅረብ፦ እስከ አንድነት ለመድረስ የሚያስችል ውጤታማ ትብብር ለማድረግ መከተል ስለሚገባን አካሄድ – ሞረሽ ወገኔ appeared first on Zehabesha Amharic.

ነገረ ኢትዮጵያ

ከአርብ ጥር 20/2008 ዓ.ም ጀምሮ የማደራጀት ስራ ለማከናወን ወደ ደቡብ የኢትዮጵያ ክፍል ያቀኑት የሰማያዊ ፓርቲ የድርጅት ጉዳይ ኃላፊ አቶ ጋሻው መርሻ እና የፓርቲው የውጭ ግንኙነት ኃላፊ አቶ አበበ አካሉ ከጉጂ ዞን እንዲወጡ መደረጋቸው ታውቁዋል።
ሁለቱ አመራሮች በዞኑ ሻኪሶ ከተማ ለ2 ሰዓት ታስረው እንደቆዩም ለማወቅ ተችሉዋል።

The post የማደራጀት ስራ ለማከናወን ወደ ደቡብ ያቀኑት የሰማያዊ አመራሮች ከጉጂ ዞን በፖሊስ እንዲወጡ ተደርገዋል appeared first on Zehabesha Amharic.

የተወለደው በወለጋ ክፍለሃገር በነቀምት ከተማ ነው።የመለስተኛ ገበሬ ልጅ ሲሆን እሱም በእርሻው ዙሪያ ዕድሜው በሚፈቅድለት ተግባሮች ፣በማረም፣ወንጭፍ ይዞ ሰብሉን ከጅንጀሮና ከአእዋፍ በመጠበቅና በእረኝነት ስራ ተሰልፎ ለቤተሰቡ የድርሻውን ያበረክታል።የበኸር ልጅ በመሆኑ አባቱ የሚተማመኑበትና የሚኮሩበት ልጅ ነው።

እሱ በተወለደበትና ባደገበት አካባቢ እንዲህ እንደአሁኑ የዘመናዊ ትምህርት ዕድል አልነበረም። ህብረተሰቡ ለትምህርት የነበረው ግምትና ግንዛቤ አነስተኛ ቢሆንም የሸሪፍ አባት ልጃቸው ፊደል እንዲለይ የነበራቸው ፍላጎት ከፍተኛ ነበር።በዚህም በከባቢያቸው በሚገኘው ደብር ውስጥ ፊደል ያስቆጥሩ የነበሩ ካህን በመኖራቸው ልጃቸው ሸሪፍ በካህኑ ደጃፍ ከሌሎች ጥቂት የእድሜ አጋሮቹ ጋር ፊደል እንዲቆጥር ወስነው አስጀመሩት።ሸሪፍ በአጭር ጊዜ ውስጥ ከሃሁ ወደአቡጌዳ መልእክተና ከዛም ወደዳዊት ተሸጋገረ፤በሰፈሩ ድንቅ ጉድ ተባለ። የሰፈርተኛው ደብዳቤ ጸሃፊና አንባቢ ለመሆን በቃ።በዚያን ጊዜ ትንሽ ፊደል የለየ ለመንግስት አነስተኛ ያስተዳደር ስራዎች የሚፈለግበት ወቅት ነበር።ወጣቱ ሸሪፍ ግን ከአስር ብር ለማይበልጥ ደመወዝ ተቀጥሮ ከመስራት የያዘውን የቤተሰብ የእርሻ ስራ መርጦ የወደፊቱን ኑሮ በተስፋ እያለመ በዚያው በተወለደበት ቀዬ ዕድሉ የሰጠውን ተቀብሎ ለመኖር ወሰነ።

ይህ ተስፋውና ፍላጎቱ  እውን ሳይሆን፣ገና በጧቱ የአስራሁለት ዓመት ልጅ እንደሆነ ሌላ አቅጣጫ ያዘ።

በዚህ ዕድሜው ነበር ጠላት ኢጣሊያ ኢትዮጵያን ለመውረር ተንቀሳቅሳ ብዙ የአገራችንን መሬት፣ገጠርና ከተማ በቁጥጥሯ ስር ለማድረግ የበቃችው።በዚህ የጠላት ወረራ ያልተደሰቱትና የአገራቸውን መወረር ከተቃወሙት መካከል የሸሪፍ አባት አባ ጃርሶ አንዱ ናቸው።መቃወም ብቻ ሳይሆን በከባቢው ጫካ ገብተው ከጠላት ጦር ጋር ግብግብ የገጠሙ አርበኞች በመኖራቸው እራሳቸውን ለአገራቸው ነጻነትና ክብር አሳልፈው ለመስጠት በመወሰን ተቀላቀሉ።

የአምስት ልጆች አባት የሆኑት አባ ጃርሶ ቤቴን ልጄን፣ንብረቴን ሳይሉ፣እንደአንዳንዶቹ የጠላት ሰበካና ቅስቀሳ ሳይገዛቸው እምቢ ላገሬ ብለው፣ቤት ትዳር፣ደስታ፣የሚኖረው አገር ሲኖር ነው ብለው ቤተሰባቸውን ላልጠነከረው ለበኸር ልጃቸው ለሸሪፍ አደራ ሰጥተው ጦራቸውን ወልውለውና ስለው ጋሻቸውን ወድረው ጫካ ገብተው ከአርበኞች ጋር ተቀላቀሉ።

ቤተሰባቸው ለንግድ ስራ ወደ ሌላ ቦታ እንደሄዱ አሶራ።አባ ጃርሶ ግን አልፎ አልፎ ጨለማ ለብሰው ብቅ በማለት የቤተሰባቸውን ሁኔታ እየተከታተሉና እያበረታቱ የጠላትን እንቅስቃሴ እየጠየቁ መረጃ ሰብስበው ይመለሱ ነበር። ከቀን ወደቀን የጣሊያኖቹ ቁጥጥር እየከፋ ሲመጣ የአባ ጃርሶም እግር እየራቀ ሄደ።

ከከባዊው በመራቃቸው የቅርብ ዘመድም ደጋግሞ በመጠየቁ ጥርጣሬ እንዳይፈጠር በማለት ለንግድ በሄዱበት አገር በድንገት ታመው አረፉ የሚል መርዶ ቤተሰቡ ፈጠረና ለሃዘን ተቀመጠ።በዚህ መልክ ሊነሳ የሚችለውን ጥርጣሬና አደጋ በብልሃት ቤተሰቡ አሶገደ።

ወጣቱ ሸሪፍ የሙት ልጅ፣ህጻናት ወንድምና እህቶቹን የሚያሳድግ የቲም ተባለና ሁሉም የሚያዝንለት ሆነ።ከባቢውን ለመቆጣጠር አንድ የጣሊያን ጦር ሰፈር በመቋቋሙ ሸሪፍ ሌላ የገቢ ምንጭ ለመፍጠር እረዳው። የእንቁላል ነጋዴ ሆነና ከጣሊያን ወታደሮች ጋር ለመቀራረብ እረዳው።ይህ የንግድ ስራ በገቢውም ብቻ ሳይሆን ጫካ ለገቡት አባቱና ለቀሩት አርበኞች የዜና ምንጭ ሆኖ የውስጥ አርበኝነት ስራ ለመስራትና አርበኞቹን ከጠላት ጭፍጨፋ ለመታደግ እረድቶታል።ቀስ በቀስ በሚሰጠው አገልግሎትና በሚያሳየው ትህትና የጣሊያኖቹን ቀልብ ለመሳብ ችሎ በበር እንቁላል ከማቀበል አልፎ እቤት ውስጥ ለመግባት ለመውጣት የሚያስችል አመኔታን አገኘ። የሚሰጠው አገልግሎት ከእንቁላል አድራሽ ወደ ቤት ተላላኪነት ጩሎነት ተቀየረ። ይህም በቅርበት የጣሊያኖቹን እንቅስቃሴ ለመከታተልና ለአርበኛ አባቱና መሰሎቻቸው  መረጃ አሳልፎ ለመስጠት ትልቅ ዕድል ከፈተለት።የአርበኞቹ የምስጢር ጓደኛና የውስጥ አርበኛነቱ ታውቆለት የሚገናኘው ሰው ተመድቦለት ነበር።

ጣሊያኖች ሌላውን ሕዝብ ለማታለል በሚጠቀሙበት ዘዴ ማለትም ጣሊያን የአንተን የኦሮሞውን ነጻነትና መብት ለማስከበር የመጣ መንግስት ነው፤ሲጨቁንህ የነበረው የአማራ አገዛዝ እንዲወገድልህ እንጂ አንተን ለመበደል አልመጣንም የሚለውን ባዶ ቅስቀሳና ሰበካ ወጣቱ ሸሪፍ እንዲቀበላቸው ብዙ ቢሞክሩም ሸሪፍን ከእምነቱና አባቱ ከተሰለፉበት ዓላማ ንቅንቅ ሊያደርገው አልቻለም።ለማስመሰል ሲል እየሳቀና እያመሰገነ ስራውን ይሰራ ነበር።

ሸሪፍ የነቃ አእምሮ ስለነበረው የጣሊያኖቹን ቋንቋ በተወሰነ ደረጃ ለመረዳት በቅቶ ነበር።ሲሰክሩ የሚዘላብዱትን ሙሉ ለሙሉም ባይሆን በተወሰነ ደረጃ እየተከታተለ በተለይም ምን እንዳደረጉና ምንስ ለማድረግ እንዳቀዱ የሚያስረዳውን  ምስጢር ለሚገናኘው ያርበኞች መልእክተኛ አሳልፎ በመስጠት ትልቅ ሚና ተጫውቷል።በዚህ ሁኔታ ሸሪፍ ከጣሊያኖቹ ጋር ከሁለት ዓመት በላይ ተቀራርቦ ሰራ።የብዙ ሊሬ ጌታ ሆነ።በሚያገኘው ገንዘብ ተጨማሪ ከብቶችና የእርሻ መሬት እየገዛ የቤተሰቡን ገቢ አሳደገው።ተከታይ ወንድሙም እየጠነከረ ለሸሪፍ አጋርና ተተኪ ሆነለት።

ሁል ጊዜ እንደተመኙትና እንዳሰቡት አይሄድም ፤ከጣሊያኖቹ መካከል አንድ  በጣም ከይሲ የሆነው የሸሪፍን መግባትና መውጣት  ገና ከጅምሩ አልወደደውም ነበርና በጥርጣሬ ዓይን እየተመለከተ ፊት ይነሳው ነበር።ሸሪፍም ያላዬ እየመሰለ የዚህን ዘረኛ አካሄድ በተጠንቀቅ ይከታተል ነበር።የዚህ ሰው አድራጎት ወደባሰ ችግር ሊያመራ እንደሚችል ይገምት ነበር።መገመትም ብቻ አይደለም ችግሩ ቢፈጠር በማለት ብልሃትና ዘዴዎችን ቤተሰቡን በማይጎዳ መልኩ ማዘጋጀት ከጀመረ ውሎ አድሯል።ከቤተሰቡ ጋር እንደማይዋደድ፣ከነሱ ተለይቶ እንደሚኖር፣በእረፍት ጊዜውም አጎቱ ከሚኖርበት አገር ጊምቢ እየሄደ እንደሚያሳልፍና ወደፊትም ወደዚያው የመኖር ፍላጎትና ዓላማ እንዳለው ባዘቦቱ ቀን እየተናገረ ጣሊያኖቹ በእሱና በቤተሰቡ መካከል ያለውን መልካም ግንኙነት እንዳያዩ የማሳሳትና የማዘናጋት ስራውን በሚገባ አጠናቋል።ቤተሰቡንም በሚገባ አዘጋጅቷል።

የፈሩት ይደርሳል እንደሚሉት የዚያ ከይሲ ጣሊያን ወታደር በደል ገደቡን አለፈና ጎረምሳውን ሸሪፍን ለመምታት እጁን ሰነዘረ።እልህ የተናነቀው የአርበኛው የአባ ጃርሶ ልጅ፤ቀደመና ካላሰበበት ቦታ ላይ ጣሊያኑን እንካ ቅመስ አለው።ያ ይሆናል ብሎ ያልጠበቀው ጣሊያን መሬት ላይ ተዘርሮ ማማማሪያ እያለ አድኑኝ ማለት ጀመረ ፣ወጣቱ ሸሪፍም ማሪያምን ሰማይቤት ፈልጋት እያለ ደጋግሞ ደቆሰውና ሌሎቹ ተሯሩጠው ሊይዙት ሲመጡ እግሬ አውጭኝ ብሎ አመለጠ።ይህ ዕለት ከሚወደው ቤተሰቡና ከሚወዳት አገሩ የተነጠለበት ዕለት ሆነ።

ወጣቱ ሸሪፍ በከባቢው ቢኖር ሊደርስበት የሚችለውን አደጋ በማጤን፣ከአርበኞቹም ጋር ለመቀላቀል እንዳይችል አርበኞቹ ቦታ ቀይረው ስለነበር የነበረው አማራጭ ወደሱዳን መሰደድ ነበር።ከብዙ የእግር ጉዞና ድካም በዃላ በደቡብ ሱዳን ጁባ ከተባለው ከተማ ደረሰ።የስራ ዕድል ባለመኖሩ ጥቂት ሳምንታት ካሳለፈ በዃላ ጉዞውን ወደ ካርቱም ቀጠለ።ካርቱም እንደገባ በአንድ የእንግሊዝ መንግሥት ባለስልጣን በሆነ ግብጻዊ ቤት እንደለመደው በጩሎነት ተቀጥሮ ስራ ጀመረ።መቼም ሲፈጠር የታደለ ነውና አረብኛ ቋንቋውንም፣እንግሊዝኛውንም ለመረዳት ጊዜ አልፈጀበትም።በሚሰጠው አገልግሎት የተደሰተው ግብጻዊ እንደልጁ ቆጥሮት ሾፌሩ እንዲሆን የመኪና መንዳት ችሎታ እንዲማር አደረገው።በአጭር ጊዜ ውስጥ የተዋጣለት ሾፌር ሆነ።

በዚሁ ስራው ላይ እንዳለ ጣሊያኖች ድል ሆነው ከአገራችን እንደሚወጡና ንጉሰ ነገስቱም ቀዳማዊ ሃይለስላሴ በሱዳን በኩል ወደአገራቸው እንደሚመለሱ ካርቱም በሚገኘው በስደተኛው መድሃኒዓለም ዙሪያ ይነገር ስለነበር ወጣቱ ሸሪፍ ንጉሱን አጅቦ ወደ አገሩ ለመመለስ ያደረበት ፍላጎት በልዩልዩ ምክንያቶች ሳይሳካለት ቀረ።አገሩ ለመግባት ጉጉት አድሮበት  የነበረው የውስጥ አርበኛው ሸሪፍ እስከነአካቴው በሰው አገር ለመኖር ተገደደ።የአባቱን በጦርነት መሞት ከብዙ ዓመት በዃላ  መርዶ ደረሰው።ይሰራበት የነበረው ግብጻዊም ሞተ።ሸሪፍ ለመኖር የነበረው ምርጫ በሾፌርነት ሞያ መቀጠልና የከፍተኛ የጭነት መኪና መንጃ ፈቃድ አውጥቶ መስራት ነበር፤ያም ፍላጎቱ ሰመረለትና የጭነት መኪና ይዞ እየዘወረ የሱዳንን መሬት ከዳር እከዳር እየሰነጠቀ የሚጓዝ ጠንካራና ደፋር ሾፌር ሆነ።በሙያው ብቻ ሳይሆን ሸሪፍ ኢትዮጵያ አገሩን የሚወድና ኢትዮጵያውያንን የሚረዳ ፣እርቄአለሁ ብሎ የማይርቅ፣በኢትዮጵያዊነቱ የሚያምንና የሚኮራ፣በዓመት በዓላት ቀናት አረንጓዴ ቢጫ ቀይ ጥለት ያለውን ነጠላ አጣፍቶ ቤተክርስቲያን ተሳልሞ ኢትዮጵያውያንን ሰብስቦ የሚያበላ፣የሚመክር ትልቅ ምሳሌ የነበረ፣በልጅነት ተሰዶ በአዛውነንትነት በሰው አገር አፈር የለበሰ፣ የወለጋ ተወላጅ፣የኦሮሞ ብሔረሰብ አባል የሆነ ኢትዮጵያዊ ነበር።ታሪኩን ከራሱ ከባለቤቱ የሰማሁት ሲሆን ለአሁኑ ትውልድ ትልቅ ትምህርት እንደሚሰጥ በማመን ለመጻፍ ተገድጃለሁ።ኦሮሞ ለአገሩ ለኢትዮጵያ ደሙን ያፈሰሰ ዜጋ እንጂ ተለይቶ የኖረ ባዳ ሕዝብ አለመሆኑን በውስጥ አርበኛው  በሸሪፍና  ለኢትዮጵያ አገሩ ነጻነትና ክብር ደሙን ባፈሰሰው በአርበኛው አባቱ በአባ ጃክሶ ታሪክ ልንደሰትና ልንታደስ ይገባል።

አገሬ አዲስ

The post ሸሪፍ አባ ጃርሶ ወጣቱ አርበኛ – አገሬ አዲስ appeared first on Zehabesha Amharic.

ከዳዊት ሰለሞን

በሐዋሳ በተደጋጋሚ የተከሰተውን የመሬት መንቀጥቀጥ በመሸሽ ወደ አዲስ አበባ በማምራት ላይ የነበሩ የሐዋሳ ዩኒቨርስቲ ተማሪዎች መቂ አዋሽ ወንዝ ድልድይ ጋር እንደደረሱ የተሳፈሩባት ሚኒባስ ከከባድ መኪና ጋር በመላተሟ ህይወታቸው ማለፉ አይዘነጋም ።

በአደጋው ህይወታቸውን ያጡት የአላማጣ ልጆችና ከ25-18 ባለ የእድሜ ክልል ውስጥ ይገኙ የነበሩ የሁለተኛ ዓመት የኢንጂነሪንግ ተማሪዎች ናቸው ።አገራችን አራት ኢንጅነሮችን በአንድ ቅፅበት አጥታለች ማለት ነው ።
1- አሸናፊ ተካ – እድሜ 25 – የሃይድሮሊክ ኢንጂነሪንግ ተማሪ
2 – አበበ ሞረሳ – እድሜ 23 የኬሚካል ኢንጂነሪንግ ተማሪ
3 – ኢዮብ ህሉፍ – እድሜ 20 የኬሚካል ኢንጂነሪንግ ተማሪ
4 – ሀየሎም በርሄ እድሜ 18 የመካኒካል ኢንጂነሪንግ ተማሪ።
ዛሬ በአለማጣ ከተማ ስርዓተ ቀብራቸው የሚፈፀምላቸውን ተማሪዎች ነፍስ አምላክ ያሳርፍ፣ ለቤተሰቦቻቸው ፣ለወዳጆቻቸውና ለሐዋሳ ዩኒቨርስቲ ማህበረሰብ መፅናናትን ይስጥልን ።

The post የሐዋሳውን የመሬት መንቀጥቀጥ ሽሽት ወደ አዲስ አበባ ሲጓዙ በመኪና አደጋ የሞቱት ተማሪዎች ቀብር ዛሬ ይፈጸማል appeared first on Zehabesha Amharic.

ከኤርሚያስ ለገሰ

እነሆ! ዛሬ ደግሞ ” በሚኒስትር ማእረግ የጠቅላይ ሚኒስትሩ ልዩ መልእክተኛ ” የሚል ሹመት ሰማን። የአዲሱ ቦታ ስልጣን እና ሃላፊነቱ ባይገለጵም ሹመቱ ከተሰጠው ሰው ማንነት ተነስቶ ምን ሊሆን እንደሚችል መገመት አያዳግትም። ቢያንስ ቢያንስ ” የዶሮ ወጥ መልእክተኛ” እንደማይሆን ይጠበቃል።
ባይሆን በዚያን ሰሞን በደረሰባቸው መደናገጥ የተነሳ ” ህውሀት ትግራይን ብቻ ነው የሚያስተዳድረው” ያሉት ሰውዬ ትክክል ሳይሆኑ አይቀርም። እንደምናየው ከሆነ ህውሀት ከአማካሪነት( ልዩ) ማለፍ የቻለ አይመስልም። ለምሳሌ፣
1• አርከበ እቁባይ… በሚኒስትር ማእረግ የጠቅላያችን ልዩ አማካሪ (በመሬት ጉዳይ፣ በኢንዱስትሪና ከተሞች ጉዳይ እንደሚያማክር ልብ ይሏል)
2• አለቃ ፀጋዬ በርሔ( የስብሀት ነጋ አማች) … በሚኒስትር ማእረግ የፀጥታ ልዩ አማካሪ ( የደህንነት ሐላፊ እና ምክትሉ፣ እንዲሁም የኢታማዦር ሹሙ የሕውሐት አባላት መሆናቸውን ልብ ይሏል)
3• ብርሃነ ገ/ ክርስቶስ ( የአርከበ እቁባይ አማች) …በሚኒስትር ማእረግ የጠቅላያችን ልዩ መልእክተኛ ( የውጭ ጉዳይ የበላይ ሃላፊው ህውሀት መሆኑን ልብ ይሏል)
4• አባይ ፀሐዬ… ( የፈትለወርቅ ገ/እግዚአብሔር የቀድሞ ባል) በሚኒስትር ማእረግ የፓሊሲ ጥናት ልዩ አማካሪ (ዴሬክተር)
5• ፋሲል ናሆም… በሚኒስትር ማእረግ የጠቅላያችን የህግ አማካሪ
6• ንዋይ ገብረአብ… በሚኒስትር ማእረግ የጠቅላያችን የኢኮኖሚ አማካሪ (የኢኮኖሚ ክላስተር አስተባባሪ ደብረፂዮን መሆኑን ልብ ይሏል)

The post የኃይለማርያም ደሳለኝ ስድስተኛው አማካሪ ከትግራይ – ብርሃነ ገ/ ክርስቶስ (የአርከበ እቁባይ አማች) appeared first on Zehabesha Amharic.

(ዘ-ሐበሻ) ይህ ዜና እየተጻፈበት ባለበት በአሁኑ ወቅት በዋሽንግተን ዲሲ ሕዝባዊ ስብሰባ እያደረጉ የሚገኙት ፕሮፌሰር ብርሃኑ ነጋ ተናገሩ:: ከአስመራ ወደ አሜሪካ ለአጭር ጊዜ ለሥራ ጉዳይ መጥተዋል የሚለውን ተከትሎ ካሁን በኋላ አይመለሱም ለሚለው አሉባልታ ምላሽ ሰጥተዋል:: ፕሮፌሰር ብርሃኑ እንዳሉት ከዚህ ‘ሲያምራችሁ ይቅር እኔ ከአሁን በኋላ ከዚህ ትግል አልርቅም” ብለዋል::

ፕሮፌሰር ብርሃኑ እየተናገሩ ነው… ዘርዘር ያለ መረጃ ይዘን እንመለሳለን::

The post “ሲያምራችሁ ይቅር!… ካሁን በኋላ ከዚህ ትግል አልርቅም” ፕሮፌሰር ብርሃኑ ነጋ appeared first on Zehabesha Amharic.

“የብሔር ጥያቄን የመለሰች፤ ከራሷ ጋር የታረቀች ዴሞክራሲያዊት ኢትዮጵያን እንገነባለን”

– ፕሮፌሰር ብርሃኑ ነጋ

(ዘ-ሐበሻ) የአርበኞች ግንቦት 7 ሊቀመንበር ፕሮፌሰር ብርሃኑ ነጋ ዛሬ በዋሽንግተን ዲሲ ባደረጉት ሕዝባዊ ስብሰባ በኢትዮጵያ በተከሰተው ረሃብ; በኦሮሞ ተማሪዎች አመጽ እና ትግሉ ስላለበት ሁኔታ እንዲሁም ስለተቃዋሚዎች ተናግረዋል::

በኢትዮጵያ የተከሰተው ረሃብ የስርዓቱ ችግር ነው ካሉ በኋላ እርሳቸው የሚመሩት ተቋም ከዚህ ቀደም የገመተው የተራቢዎች ቁጥር አሁን ተግባራዊ እየሆነ እንደሆነ እንዲሁም ይህ አስተዳደር ከቀጠለ ከዚህ ቀደም እንደገመቱት በ2050 ዓ.ም 50 ሚሊዮን ሕዝብ እንደሚራብ ገልጸዋል::

በአዲስ አበባ ማስተር ፕላን ዙሪያም እንዲሁ የተናገሩት ፕሮፌሰሩ በኦሮሚያ ክልል ህፃናት እና ነብሰጡርን ሳይቀር እየገደለ ያለውን ስርዓት ሕዝቡ እየሞተ ያለው ወገኔ ነው ብሎ ማውገዝ አለበት ብለዋል:: በተለይም በአሁኑ ወቅት ከኦሮሞ ድርጅቶች ጋር በህብረት ለመታገል ንግግሮች መጀመራቸውንም አስታውቀዋል::

ስለተቃዋሚዎችም የተናገሩት ፕሮፌሰሩ “የተቃዋሚዎች የምኞት ፖለቲካ ነው የሚከተሉት” ሲሉ ተችተው የምር መታገል እንዳለባቸው አስምረውበታል::

ወቅታዊውን የአርበኞች ግንቦት 7 ሁኔታ በተመለከተም “ወታደሮቻችን ያሉት ኢትዮጵያ ውስጥ ነው… ትግላችንን ለመቀላቀል ካሁን በኋላ ለምትፈልጉ ወደ ሰሜን ብቻ መሄድ የለባችሁም” ብለዋል::

ሙሉ ንግግራቸው:-

The post “ወታደሮቻችን ያሉት ኢትዮጵያ ውስጥ ነው፤ ትግላችንን ለመቀላቀል ካሁን በኋላ ለምትፈልጉ ወደ ሰሜን ብቻ መሄድ የለባችሁም” ፕ/ር ብርሃኑ ነጋ appeared first on Zehabesha Amharic.

File Photo

ሶስተኛው ወር ሊሞላ ጥቂት ቀናቶች ቀርተውታል ወያኔም የሚይዘው የሚጨብጠው ጠፍቶት በየግዜው ሕዝባዊ አመፁን ተቆጣጥሬዋልሁ የሚል የፍርሀት መግለጫ ይሰጣል።ሁለት ወር  ከ18 የጭፍጨፋ ቀናቶች በሗላ ወያኔ በኦህዴዷ ወይዘሮ አስቴር ማሞ በኩል በዕለተ January 30, 2016  ያለምንም እፍረት በኦሮሚያ ውስጥ ያለው ችግር የመልካም አስተደር እጦት ችግር እንደሆነ ተንፍሰዋል። ቀጠሉና ደሞ በዕለተ January 31, 2016, በኦሮምያ ክልል ውስጥ የተወሰደው የኃይል እርምጃ ስተት መሆኑንና ችግሩም ከማስተር ፕላኑ የላቅና የተወሳሰበ መሆኑን የኢትዮጰያ መንግሥት ባለሥልጣናት በሸሪካቸው በዩናይትድ ስቴጽ የውጭ ጉዳይ መሥሪያ ቤት የአፍሪካ ጉዳዮች ረዳት ሚኒስትር በሊንዳ ቶማስ ግሪንፊልድ በኩል ሹክ አሉን።ይሄን ሁሉ ያሰማን የአሜሪካው ድምፅ voaነው። የመልካም አስተዳደር ችግርሕዝቡን እንዳስቆጣው፣የተወሰደው እርምጃ ፍፁም ስህተት መሆኑና ገዳዮችም ለፍርድ መቅረብ እንዳለባቸው፣ችግሩ ከማስተር ፕላኑም በላይ ውስብስብ መሆኑን የኦሮሞ ህዝብ እኮ ላለፉት በርካታ ጊዜያት ሲነግራቸው ሲያስመክራቸው ቆይቷል ታዲያ ይሄን ያህል ዘግይቶ የገባቸው እነኝህ ሰዎች (ወያኔዎች) የአይምሮ ዘገምኞች ናቸው ሁልግዜ በነገሮች ላይ የሚዘገዩት። የኔ ጥርጣሬ ግን ወያኔ ትግሉን በተወሰነ መልኩ ለማብረድና ሸሪክ ከሆኑት ከአሜሪካና ከአውሮፓ ሕብረት እየመጣ ያለባትን ወቀሳ ለመቀነስ የተጠቀመችው የmake up ቅባት ነው ባይ ነኝ። ባይሆንማ ኖሮ መንግስት ከህዝባዊ አመፁ ጋር በተያያዘ ወደ መሰቃያ ቦታ የተጉዋዙትን  ውድ የኦሮሞ ልጆች ያለምንም ቅድመ ሁኔታ ፈቶ ለጠፋውም ጥፋት ሀላፊነት ወስዶ በቀጥታ የኦሮሞ ሕዝብን ይቅርታ ይጠይቅ ነበር።ይሄን ባላደረገበት ሁኔታ ደሞ የኦሮሞ ሕዝብ መልስ የሚሆነው ወያኒት ሞኝሽን ፈልጊ ትግሉ የተጀመረው በገዛ መሬቱ የመኖር መብት በተነፈገው የኦሮሞ ሕዝብ ነውና የሚቆመው ከድል በሗላ ብቻ ነው። ምናልባት ወያኔ ያልገባት ወይም ያልተረዳችው ነገር ቢኖር የኦሮሞ ሕዝብ የያዘው የትግል መርህ “ሕዝባችንን ነፃ ልቀቁ ወይም ሁላችንንም እሰሩን ነው” ስለዚህ ኦሮሞን ሙሉ በሙሉ ማሰር ውይም መግደል አይቻልምና የማትወጡት ችግር ውስጥ ከመግባታቹ በፊት ወደሰላም ብትመጡ መልካም ነው። መግደል ፣ማሰር፣ማስፈራት የተነሳውን አመጽ ያባብሰዋል እንጂ በፍጹም ሊያበርደው አልቻለም።

ትግሉ የተጀመረው በተማሪዎች ይሁን እንጂ ዛሬ ትግሉ ያላቀፈው የኦሮሞ ሕዝብ አካል የለም። ይህም የሆነበት ምክንያት አሳ ጎርጉዋሪ ዘንዶ ያወጣል እንዲሉ ልክ የመጀመሪያው ሕዝባዊ አመፅ በተነሳበት ወቅት አመፁን ለማፈን የተወሰደው የሀይል እርምጃ ህፃን አዋቂ፣ሴት ወንድ፣ እርጉዝ አካለ ጎዶሎ ሳይል ተጎድተውል, በግፍ ተገድለዋል በዚህም የተነሳ ተቃውሞ በሚነሳበት ወቅት ሕፃን ልጅ እንኩዋን እቤት ለመጠበቅ ሳይቀር ሁሉም አደባባይ ይወጣል።አሁን ጥያቄው መንግስ ይውረድልን ነው። ከጥፋቷ የማትማረው ወያኔ በኦሮሞ ሕዝብ ላይ እያካሄደች ያለችው ሰላማዊ ዜጎችን የመግደል አባዜዋን አሁን ድሞ ትግሉን በራሷ ግዜ ለማስፋት የፈለገች ይመስል ወይም ሳይቀድሙኝ ልቅደማቸው በሚመስል ሁኔታ ወደ ጋምቤላ ሕዝብም ዘምታለች።የነገው ተረኛ የትኛው ክልል ይሆን?  የደነበረ ውሻ ከፊቱ ያገኘውን ሁሉ ይነክሳል ማለት እንግዲህ ይኸው ነው።

ወያኔና አንዳንድ የኦሮሞ ሕዝብ ነፃነት የማይመቻቸው ግለሰቦች ትግሉ ሌላውን ሕዝብ በተለይም አማራውን ስላላካተተ አይዘልቅም ይሉናል። ይህን ለሚሉ የኦሮሞ ሕዝብ የሚለው ደሞ በእርግጥም ትግሉ በቅርብ ግዜ በድል ተጠናቆ ይቆማል ያለበለዚያ ግን ወይ ፍንክች የአባቢለዋ ልጅ ነው፣ አሁንም ደግመዋለሁ የትግሉ ማቆሚያ ድል ነው።

ከዚህ በተረፈ የትግሉ ባለቤት ማነው የሚል ተደጋጋሚ ጥያቄዎች ይሰማሉ ይህ ምንም በማያከራክር ሁኔታ ጭቆናና መከራ መሸከም አቅቶት የውድ ልጆቹን ሕይወት እየገበረ እየታገለ ያለው ኦሮሞው ስለሆነ የትግሉ ባለቤት የኦሮሞ ሕዝብ ነው። ትግል እንደሻይ በግብዣ ወይም እንደ እርዳታ በልመና አይሆነም። ልክ እንደ ኦሮሞ ሕዝብ ጭቆናንና ምዝበራውን መሸከም ያቃተው ካለ (እንዳለም እርግጠኛ ነኝ) ተነስቶ ወያኔን በመታገል የሚገባውን መስዋዕትነት ይክፈል ያኔ እሱ የትግሉ ባለቤት ነው እንጂ ማንም ትግልን ተሰጥቶት አልታገለም አይታገልም። በኦሮሞ ሕዝብ በኩል ያለውም የትግል ጥሪ የወያኔ የጭቆና በትር ያረፈባችሁ ዜጎች before it’s too late  ለመብታቹ ተነስታቹ ታገሉ የሚል motivation እንጂ እኛን ነፃ ለማውጣት ብቻ ተባበሩን የሚል የራስ ወዳዶች ጥሪ እንዳልሆነ በግልፅ ይታወቃል።እንደሚታወቀው አሁን ያለው ምርጫ ነፃነት ወይም ባርነት ነው። የኦሮሞ ሕዝብ ነፃነት የሚለውን የትግል መስመር መርጥዋል።

በመጨረሻም ትግሉ ላይቆም ነውና የተጀመረው በሕይወትም ይሁን በንብረት ላይ ከዚህ በላይ የከፋ አደጋ ከመድረሱ በፊት ወይዘሮ  TPLF  ልቦና ገዝተሽ በሰላም እጅሽን  ስጪ እያልኩ ምክሬን ለግሳለሁ።

የማይቀረውን ድል ለሕዝባችን ያቅርብልን!!!

አድ አዳማ(Norway)

The post ላይቆም የተጀመረ ነው ትግሉ!!! – አድ አዳማ appeared first on Zehabesha Amharic.

ጥር 14 ቀን 2008 ዓ.ም. / January 23, 2016

በኮሎምቦስ ኦሃዮ የምንገኝ የወልቃይት ጠገዴ ማህበረሰብ በአገራችን በኢትዮጵያ በተለይም በወልቃይት ጠገዴ ወቅታዊ ሁኔታ ለመዳሰስ ቅዳሜ ጥር 14 ቀን 2008 ዓ.ም. (January 23, 2016) በተጠራው ሕዝባዊ ስብሰባ በመገኘት በሰፊው ተወያይተናል። ስብሰባው ከመቸውም ለየት የሚያደርገው ወጣቶችና ሴቶች በብዛትና በንቃት መሳተፋቸው ሲሆን አባቶችም ሰለ ታሪካችንና ማንነታችን ሰፋ ያላ ገለጻ ሰጥተዋል።

በቅርቡ በኢትዮጵያ ሰለተቋቋመው የወልቃይት ጠገዴ የአማራ ማንነት ጥያቄን አንግበው ለፌደራል መንግስትና ለተለያዮ የመንግስት አካላት የወልቃይት ጠገዴ ሕገ-መንግስቱ በሚፈቅደው መሰረት በመሳሪያ ሃይል የተነጠቀው መብትና ማንነት ለማስመለስ ላይ ታች እያሉ ታላቅ ሰላማዊ ተጋድሎ በማድረግ ላይ ይገኛሉ።

ስለዚህ ጉዳዩ በቀጥታ ስለሚመለከተን ኮሎምቦስ ኦሃዮም ሆነ በተለያዩ የአሜሪካ ክፍለ ግዛት (ስቴትስ) የሚገኙ ወገኖች በመነጋገር በኢትዮጵያ ሰላማዊና ሕጋዊ ስርዓትን ተከትለው የህዝባቸውን የመብትና የማንነት ጥያቄያቸውን ምላሽ ለማስገኘት ለተቋቋመው ኮሚቴ ሙሉ ድጋፍ እንደምንሰጥ ተስማምተናል።

ምንም እንኳን ጥያቄው ከዚህ ቀደም በተለያዩ ጊዜያት ለኢትዮጵያ መንግስት በጽሁፍ አቤቱታ ብናቀርብም መልስ ተነፍጎን እስካሁን ቆይቷል። አሁን ግን በህገር ቤት የሚገኙ ወንድሞቻችንና እህቶቻችን ያለምንም ፍራቻ “እኛ የወልቃይት ጠገዴ ተወላጆች ትግርኛ እንደ አንድ የኢትዮጵያ ያጎራባች ሕዝብ ቋንቋ ከመናገራችን ውጭ የራስችን ባህልና ወግ እንዲሁም ስነ-ልቦና ያለን ሕዝብ ወደ ጥንቱ ቦታችን በጌምድር ጎንደር (በአሁኑ አጠራር የአማራ ክልል) መመለስ አለብን፤ ህገ-መንግስቱም ይፈቅድልናል” በማለት ትልቅ ዋጋ የሚያስከፍለው የሁላችንም ጥያቄ ይዘው ስለተነሱ በሰሜን አሜሪካ የምንገኝ የካባቢው ተወላጆች በረስ ተነሳሽነት ለዚህ ኮሚቴ የሚያስፈለገውን የሞራልና መሰል ድጋፍ እንዲያስተባብሩ ሰባት (7) አባላትን ያቀፈ ኮሚቴ አቋቁመዋል።

ሕበረተሰቡ በዚህ አጋጣሚ ባስተላልፈው መልዕክት የኢትዮጵያ መንግስት የነዚህ ወገኖች ጥያቄ ህገ-መንግስቱ የሚፈቅደውና ሰላማዊ እንደሆነ ተገንዝቦ አስፈላጊውን ትብብር እንዲያደርግላቸውና ከኃይል እርምጃ አና ተፅዕኖ እንዲታቀብ አሳስበዋል። ድል ለኢትዮጵያ ሕዝብ!

The post የወልቃይት ጠገዴ ተወላጆች ኢትዮጵያውያን በኮሎምቦስ ኦሃዮ (ሰሜን አሜሪካ) appeared first on Zehabesha Amharic.

ለመሆኑ መንግስት የማስተር ፕላን እቅዱን ቢሰርዝ እየተካሄደ ያለው የተቃውሞ እንቅስቃሴ ይቆማል? በኢትዮዽያ የተለያዩ አካባቢዎች የአዲስ አበባ ማስተር ፕላንን የተቃወሙ ሰልፈኞች ከፀጥታ ሀይሎች ጋር እየተጋጩ ነው። ተቃውሞው ለበርካቶች እስርና መቁሰል እንዲሁም መገደል ምክንያት ሆኗል። ይህን ዘገባ እስካጠናቀርንበት ጊዜ ድረስ ተቃውሞው እንደቀጠለ ነው። እየተስፋፋ የመጣው ተቃውሞ የተለያዩና የሚቃረን የፖለቲካ አቋም ባላቸው ቡድኖች መካከል ትብብር የሚጋብዝ ሆኗል። ጥያቄው ከማስተር ፕላኑ ባሻገር በሀገሪቱ ያለውን አፋኝ ስርዓት ወደ መለወጥ ሊዞር ይችላል። አርጋው አሽኔ ዝርዝር ዘገባ አለው

የኢትዮዽያ መንግስት የአዲስ አበባ ከተማን ከአጎራባች የኦሮሚያ ከተሞች ጋር በልማት አሰተሳስራለሁ ሲል ያቀረበው ዕቅድ ሰፊ ህዝባዊ ተቃውሞ ሲገጥመው ያሁኑ ለሁለተኛ ጊዜ ነው። ተቃውሞው ባለፈው ዓመት ከነበረው ጋር ሲነፃፀር ሰፊውን የኦሮሚያ አካባቢ ያንቀሳቀሰ ሆኗል። ተቃውሞው በት/ት ተቋማትና በወጣት ተማሪዎች የሚካሄድ ይሁን እንጂ በአንዳንድ አካባቢዎች ነዋሪዎችም ከሰልፉ ለመቀላቀል እየሞከሩ መሆኑን የዓይን እማኞች ይናገራሉ።

በመንግስት በኩል ይህ አይነቱ ተቃውሞ እንደሚከሰት አስቀድሞ የተገነዘበና የተዘጋጀበት ይመስላል። በሁሉም አካባቢዎች የፀጥታ ሀይሎችን በማሰማራትየሀይል እርምጃ እየወሰደ ነው። በዚህም በርካቶች ቆስለዋል የተገደሉ ተማሪዎችም አሉ (ቁጥራቸውን ከገለልተኛ አካል ማጣራት ባይቻልም)።

እንደ ኢህአዴግ ባለ አፋኝ አገዛዝ፣ የአዲስ አባባ ማስተር ፕላን “የኦሮሚያ ገበሬዎችን ያፈናቅላል፣ የመሬት ቅርምት ስለሆነ እንቃወመዋለን” እያሉ ያሉት ሰልፈኞቹ ጥያቄያቸው ከማስተር ፕላኑ ባሻገር “መስረታዊ መብቶቻችን ይከበሩ” “ኢህአዴግን አንፈልገውም”  የሚል እንድምታ እንደሚኖረው መገመት ከባድ አይደለም።

የኦሮሚያው ስልፍ ከመጧጧፉ አስቀድሞ በጎንደር አካባቢ ብሔርን መሰረት ያደረጉና ሌሎች የመብት ጥያቄዎችን ያነገቡ ተቃውሞዎች መደረጋቸውን፣ ይህን ተከትሎም በጎንደር በእስር ቤት ውስጥ በተነሳ የእሳት ቃጠሎ እስረኞች መሞታቸውንና ማምለጣቸውን፣ ይህም በአካባቢው ውጥረት መቀስቀሱን መረጃዎች ያመለክታሉ።

በኦሮሚያ ባሉ በርካታ የት/ት ተቋማትና በሀገሪቱ ባሉ ሌሎች ከፍተኛ የት/ት ተቋማት እያገነገነ ያለው ተቃውሞ በአማራ ክልል ካለው ጋር ተዳምሮ ሀገሪቱ በጂኣኦግራፊያዊ ስፋቷ ሰፊ ሊባል የሚችል ተቃውሞ እያስተናገደች ትገኛለች።

ተማሪ መር አሆነው ይህ ተቃውሞ በማህበራዊ ሚዲያ እያገኘ ካለው ድጋፍና የሰደተኛ የፖለቲካ ተዋንያን   አይዞህ ባይነት ባሻገር ግብታዊ እንቅስቃሴ መሆኑን መገንዘብ ይቻላል። ከዚህ ቀደም በኢትዮዽያ በተደጋጋሚ እንደተደረጉት የተቃውሞ እንቅስቃሴዎች ሁሉ ይህም መሪ አልባ የተቃውሞ እንቅስቃሴ በገዢው ፓርቲ ላይ ጫና አሳድሮ ውጤታማ ለመሆን ብዙ መንገድ ይቀረዋል።

ገዢው ፓርቲ ተቃውሞው ብዙም እንዳላሳሰበው ለማስመሰል ይሞክር እንጂ የተቃውሞ እንቅስቃሴውን  በዐይነ ቁራኛ እየተመለከተው መሆኑን ውስጥ አዋቂዎች ይናገራሉ።

ተቃውሞው መሪ አልባና የተደራጀ አለመሆኑን የተገነዘቡ የፖለቲካ ቡድኖች የህዝቡን መነቃቃት ወደተደራጀ እንቅስቃሴ ለመምራት ድንገተኛ የሆነ ስራ ውስጥ እንዲገቡ አስገድዷቸዋል።

በሀገር ቤት ስውር አባላት እንዳሉት የሚገልፀው አርበኞች ግንቦት ሰባትም ሆነ ተበታተነው ያሉት የኦሮሞ የፖለቲካ ድርጅቶች ከህዝቡ ለመጣው ጥያቄ የሚጠበቀባቸውን የአመራርነት ምላሽ ለመሰጠት ጉድ ጉድ እያሉ መሆኑን ገልፀዋል። እስካሁን በመግለጫ መልክ እየተሰጡ ባሉ አስተያየቶች የኦሮሞ ህዝብ ከሌላው የኢትዮዽያ ህዝብ ጋር መተባበር ካልቻለ ትግሉ ውጤት አያመጣም ፣ በስልጣን ላይ ያለውን አፋኝ ስርዓትም ለመለወጥ አቅም አይኖረውም የሚለውን አቋማቸውን ብሄር ተኮር ያልሆኑት የፖለቲካ ቡድኖች ለኦሮሞ ልሂቃን አቅርበዋል።

የኦሮም የፖለቲካ ቡድኖችም በኦሮሞ ላይ የሚደርስ በደል የኦሮሞ ብቻ አይደለም፣ ሁሉም ኢትዮዽያዊ አብሮን መቆም አለበት ሲሉ ጥሪ አቅርበዋል።  እነዚህ የፖለቲካ ዲስኩሮች እስካሁን ይፋዊ በሆነ መንገድ ለፖለቲካ መደራደሪያ ባይቀርቡም በመግለጫ መልክ ተሰምተዋል።

አሁን የተቀሰቀሰው ህዝባዊ ተቃውሞ አመታትን በተለያዩ መንገዶች ሲታገሉ ለቆዩት ሁሉም የፖለቲካ ፓርቲዎች መልካም አጋጣሚ የፈጠረ መስሏል። ፓርቲዎቹ ህዝባዊ ተቃውሞን መንደርደሪያ ማድረግ ከብልህ የፖለቲካ መሪ የሚጠበቅ ተግባር መሆኑን የተገነዘቡም ይመስላል። አንድ ትልቅ የቤት ስራ ግን ከፊት አለ። ብሄር ተኮር የሆኑና ከመገንጠል እስካ ራስ ገዝ መብት በሚጠይቁና፣ በተለምዶ የአንድነት ሀይል በሚባሉት ቡድኖች መካከል ፣ የግራና ቀኝ የፖለቲካ ሀይሎቹን ወደጋራ መግባባት የሚያመጣ ይህ ነው የሚባል ዝቅተኛ የመግባቢያ ስምምነት በሌለበት እንዴት በጋራ ወደፊት መራማድ ይቻላል? የሚል።

ጥያቄውን የቅንጦት አድርገው የሚመለከቱት አሉ። “አሁን ቅድሚያ የሚሰጠው በስልጣን ላይ ያለውን ስርዓት ማስወገድ ነው” የሚሉት ወገኖች በግራና ቀኝ በክንፍ ፖለቲከኞች መካከል ለአምስት አስርተ ዓመታት በኢትዮዽያ ፖለቲካ ውስጥ የነበረውን እውነታ መለስ ብለው ለማየት የደፈሩ አይመስልም።

ማዕካላዊ መንግስት አድራጊ ፈጣሪ ሆኖ ዘመናትን ባስቆጠረበት የኢትዮዽያ የፖለቲካ ታሪክ የፌደራል ስርዓቱና የብሄር ጥያቄ  አዲስ መልክ በያዙበት ባለፉት አመታት፣ ሁሉን ሊያስማማ የሚችል የፖለቲካ ፕሮግራም ይዞ የፖለቲካ ሀይሎችን ወደ አንድ ማምጣት የሚችል የፖለቲካ መሪና ድርጀት ገና አልተፈጠረም።

ከወራት በፊት ባለመተማመንና በመወነጃጀል ተጠምደው የነበሩት የሁለት ጎራ የፖለቲካ ህይሎች በጋራ መስራት አስፈላጊነት ላይ ያሳዩትን በጎ ፈቃድ ጥሩ መንደርደሪያ ቢሆንም ሩቅ መንገድ ለመጓዝ የሰከነ ውይይትና ስጥቶ የመቀበል እርምጃን ይጠይቃል።

ያልተደራጀ አልያም መሪ የሌለው ተቃውሞ ውጤታማ ሊሆንም ሆነ በገዢው ፓርቲ ላይ ግፊት አሳድሮ አንድም ለድርድር ሲሆን ደግሞ ለስርዓት ለውጥ አቅም ሊኖረው አይችልም።

የፖለቲካ ተቃውሞ ከአደባባይ ስልፍ አልፎ ውጤት የሚያመጣው እንዴት ነው? የሚለው ጥያቄ ወሳኝ ጥያቄ ይመስላል። በፀጥታና ደህንነት ተንታኞች ምክር መሰረት ህዝባዊ ተቃውሞውን የሚደግፉ ወታደራዊም ሆነ ሲቪል ባለስልጣናት ዋና ኢላማ መሆን አለባቸው። አሁን በኢትዮዽያ ባለው ተጨባጭ ሁኔታ ገዢው ፓርቲ ኢህአዴግ ብሎም ሁሉን አድራጊው ህወሀት በዘረጉት መዋቅር አፈንግጦ ወደ ተቃውሞ ጎራ የሚቀላቀል ተፅዕኖ ፈጣሪ የፖለቲካ መሪ ይኖራል ብሎ መጠበቅ የዋህነት ይሆናል።

የመከላለያና የደህንነት ተቋማቱም ቢሆን ሌላውን እንደጠላት የሚያዩ እንጂ ለህዝባዊ ተቃውሞ ምላሽ የሚሰጥ ስነልቦናዊ ዝግጅት ያላቸው አይደሉም። ወትሮ ተቃዋሚዎች የገዢውን ፓርቲ ወገኖች ለመሳብ ሙከራ ከማድረግ ይልቅ በማራቅና በማሸማቀቅ ስለሚያርቋቸው እንዲህ ባለው የተቃውሞ ወቅት አይናቸውን የሚጥሉበት የውስጥ አርበኛ ለማግኘት አዳጋች ይሆናል። ከገዢው ፓርቲ አንዱ አባል ከሆነው ኦህዴድ ጋር ይፋዊ ያልሆነ ግንኙነት ያላቸው የኣኦሮሞ ልሂቃን ይነስም ይብዛ ይህን ሙከራ የማድረግ ዕድል አላቸው።

ሌላው አብይ ጉዳይ ህዝባዊ ተቃውሞ ሲበረታ ከገዢው ፓርቲ ጋር በጓሮ በር የሚደረጉ ድርድርና          ንግግሮች ውጤት ላለው ፖለቲካ አስፈላጊ ናቸው። የፈረንጅ ዲፕሎማቶች ከሚጫወቱት ሚና በበለጠ ገለልተኛና ተሰሚ የሀገር ልጆችን ማሰናዳት አንዱ የቤት ስራ ነው። አመፅና ህዝባዊ ተቃውሞ በራሱ ግብ አይደለም፣ ግቡ የፖለቲካ ለውጥ ሲሆን አመፅና እምቢተኝነት የፖለቲካ አላማን ማስፈፀሚያ መሳሪያዎች ናቸው።

ይልቁንም በከፋፍለህ ግዛ ፖሊሲው የሚታወቀው ኢህአዴግ ሰልፉን በተሳካ መልኩ ለራሱ አላማ ማስፈፀሚያ ይጠቀምበታል፣ በህዝቦች መካከል መፈራራት እንዲሰፍንና ኢህአዴግ ብቸኛ የኢትዮዽያ መድህን ሆኖ እንዲታይ ይረዳዋል።

የከሸፉ ስልፎችና ተቃውሞዎችም ቢሆኑ የኢህአዴግን አይነኬነትና አይደፈሬነት እንዲያሳዩ አድርጎ በመቃኘት በህዝቡ ላይ የስነ ልቦና ሽንፈት ለማስረፅ መጠቀሚያ መሆኑ አይቀሬ ነው።

Source – Wazema Radio ዋዜማ ሬዲዮ

The post የኦሮሞ የተማሪዎች ተቃውሞ “የመሪ ያለህ” ይላል! ኢህአዴግስ ከተቃውሞው ምን ያተርፋል? appeared first on Zehabesha Amharic.

ጃንዋሪ 31 ቀን 2016

ዛሬ ታላላቅ አፍሪካውያን ከተናገሩት መነሳትን መረጥሁ። አንጋፋው ደቡብ አፍሪካዊ ታጋይ ዴዝሞን ቱቱ “When the missionaries came to Africa, they had the Bible and we had the land. They said ‘Let us pray’. We closed our eyes. When we opened them we had the Bible and they had the land”. ተቀራራቢ ትርጉሙ “ሚሲዮናውያን ወደ አፍሪካ ሲመጡ መጽሃፍ ቅዱስ ይዘው ነው። እኛ ደግሞ መሬት ነበረን። ‘እንጸልይ’ አሉን። ለጸሎት ዐይናችንን ጨፈንን። ጸሎቱን ጨርሰን ዐይናችንን ስንከፍት ግን እኛ መጽሃፍ ቅዱስ ብቻ ታቅፈን ስንቀር እነሱ ግን መሪታችንን ይዘውት አገኘን” የሚል ነው።

አዎ! ደቡብ አፍሪካ፣ ኬንያ፣ ኡጋንዳ፣ ዚምባዌ ወዘተ.. በቅኝ ግዛትነት ለመውረር የመጡት ነጭ ሚስዮናውያን ቀጥሎም መሳርያ የታጠቁ ናቸው። ከነጮች ወረራ ራሷን ተከላክላ የኖረችውን ኢትዮጵያን ባለፈው ሃያ አምስት ዓመት የወረሯት የእኛ መልክና ደም ያላቸው ወንድሞቻችን ወያኔዎች አገሪቷን ሲቆጣጠሩ አንገታቸው ላይ ኩሺት (መቀበርያ ጨርቅ) ምላሳቸው ላይ የዘረኝነት ከፋፋይ መርዝ ይዘው መጡ። “ሁላችንም በጎሳ እንደራጅ፣ በማንነታችንና በቋንቋችን እናተኩር” ብለው ሰበኩን።

በተቀነበበልን የጎጥ አጥር ገባንላቸው፤ ያለፈና አስከፊ የሆነውን ታሪካችንን እየመረጥን አፅም ቆፈርን፤ የምንበቃቀልበትን ስልት እያዘጋጁ ሲሰጡን ተቀበልን። ካለፈ ስህተት የባሰ ስህተት ውስጥ ገብተን መሳርያቸው ሆንን። አሁን ከእንቅልፋችን ባንነን ዐይናችንን ስንገልጥና ልቦናችንን ስናቀና መሬታችን፣ ቀሪው ሃብታችን፣ አጠቃላዩ ህልውናችን በእጃቸው ውስጥ ሆኖ ሲሳሳቁና ሲዘባበቱብን አገኘናቸው። እኛ እጅ የቀረው ለብሄር ብሄረሰብ መብታችን መከበር ራቁታችንን በየዓመቱ መጨፈርና በርሃብ፣ በስደት፣ በአጋዚ ጥይት ማለቅ ሆነ።

አባቶቻችን መጽሃፍ ቅዱስ ይቅርና መድፍ ይዘው የመጡ የውጭ ጠላቶችን እጃቸውን እየሰበሩ መልሰዋቸዋል። እኛ ልጆቻቸው ግን የኤይድስ ቫይረስ የሰውነት ሴሎችን ተመሳስሎ በማጥቃቱ መከላከል እንደሚያስቸግር ሁሉ የእኛን ደም፣ ቀለምና ቋንቋ የተካኑ የባንዳ ልጆችን ለይቶ ማጥቃት ስላልቻልን ለዚህ ወርደትና ውድቀት በቃን።

የህወሃቶች ብቸኛው መሳርያቸው ህዝብን መለያየትና መከፋፈል ነውና ይህንን ብቸኛ መርዛቸውን መቋቋም ከቻልን ሰላማዊ አገር የመገንባት ተስፋችን እውን መሆኑ የማይቀር ነው። ከቅርብ ጊዜ ወዲህ ዐይኑን መግለጥ የጀመረው ኢትዮጵያዊ የተከሰተለት እውነት ቢኖር ይኼው ነው።

አንገታቸው ላይ ኩሺት ብቻ ጠቅልለው የመጡት ወያኔዎች በአንድ ጀንበር ሚሊዮነር፣ የባለብዙ ፎቅ ጌታ፣ የከተማና የእርሻ መሬት ባለቤት፣ በውጭ አገራት የብዙ ካምፓኒዎች ባለድርሻ ሲሆኑ፤ ቀሪው ኢትዮጵያዊ የከተማ መሬቱን ተነጥቆ ዘበኛቸው፣ ከእርሻውን ተፈናቅሎ የቀን ሠራተኛቸው፣ መብራቱን  ተቀምቶ ሻማ ይዞ የሚያበላቸው ተደርጓል። ይህ ሁሉ ካስከፋውና ተስፋ ከቆረጠ ደግሞ በስደት የየአገሩ እስር ቤት ታዳሚና ኩላሊት ገባሪነት ይጠብቀዋል።

ዛሬ የወላጆቻቸውን መሬት አይነጠቅም ብለው የተነሱ የኦሮምያ፣ የጎንደር፣ የጋምቤላ፣ ልጆችን የሚጨፈጭፉ ወያኔዎች አገዛዛቸውን ዘለዓለማዊ ለማድረግ የትምህርት ሥርዓቱን ሲገድሉ የእነሱ ልጆች በስዩም መስፍን የበላይ ተቆጣጣሪነት ልጆቻቸው በቻይናና በምዕራቡ ዓለም ትልልቅ ዩኒቨርስቲዎች ተምረው አሁን ያሉትንና ወደፊትም የሚፈጠሩትን የህወሃት ካምፓኒዎች እንዲመሩ፤ እያረጁ ከፖለቲካው የሚገለሉ አባቶቻቸውን የሚተኩ መሳፍንት እንዲሆኑ እየተዘጋጁ ነው። አገር ውስጥም የመለስተኛ ህወሃት ልጆች አማርኛ፣ ኦሮምኛ፣ ሶማልኛ፣ ሲዳምኛ፣ ጉራጌኛ ወዘተ.. እንዲሰለጥኑ ተመቻችቶላቸው በመላ አገሪቱ እንዲሰማሩ ሲደረጉ ሌላው ህዝብ ከራሱ ቋንቋ ውጭ ሌላውን በጥላቻ እንዲያይና ወንዝ በማያሻግር ሁኔታ በመንደሩ ታውሮ እንዲኖር ፈርደውበታል።

ወያኔዎች ይህ አስማታቸው አሁን የያዘላቸው አይመስልም። ዓላማቸው የገባው ኢትዮጵያዊ ከዳር ዳር ተንቀሳቅሷል። ዐይኑን ገልጧል። እየቆየም አጥርቶ ያያል። በተለይም ሁለቱን ታላላቅ ህዝብ ማለትም አማራውንና ኦሮሞውን ለመለያየት ብዙ የደከሙበት ቢሆንም አሁን ህዝቡ የአንድነትን መንገድ በመምረጥ ላይ ነው። ላለፉት ሰላሳ አመታት የተፈጠረው የልዩነት ክፍተት ቀላል ባለመሆኑ የብዙ ቅን ኢትዮጵያውያንን ድካም የሚጠይቅ ሥራ ገና ከፊታችን አለ።

እንደ ህወሃቶች የእንግሊዞች መርዝ ያንገበገባቸው የኬንያውያን የነፃነት አባት  ጆሞ ኬንያታ ለወገኖቻቸው የሰጡት ምክር የቆየ ቢሆንም በተመሳሳይ ሁኔታ ላለነው ኢትዮጵያውያን ይጠቅማልና እንዲህ ላቅርበው።“ የነበረው የዘር ጥላቻ ማብቃት አለበት። የጎሳ ጥቃትም ሊቆም ይገባል። ባሳለፍነው መራራ ሁኔታ ውስጥ አንኑርበት። ካለፉት የከፉ ታሪኮቻችን ይልቅ የወደፊቷን አዲሷን ኬንያ ማለም እመርጣለሁ። ይህንን ዓይነት ብሄራዊ ስሜትና ማንነት ከፈጠርን የኤኮኖሚ ችግራችንን ለመፍታት ረጅሙን ጉዞ መሄድ እንችላለን” ብለዋል። እኛም ብንሆን ያለፉ አስከፊ ታሪኮቻችንን እያስታወስን ወደ ኋላ ከምንድህ የወደፊቷን የጋራ ኢትዮጵያ እያለምን ወደ ፊት ብንራመድ ይጠቅመናል።

አዎ ! ባለፉት ጊዚያት አባቶቻችን ሉአላዊነታችንን ለማስጠበቅ የከፈሉትን ጉልህ አኩሪ መስዋዕት ያህል ብዙ አስከፊና አሳፋሪ ታሪክ አለን። ያንን የሚክዱትም ሆኑ ያንን እየመረጡ የሚቆፍሩና በትናንት የሚኖሩ ዛሬን የማያዩ ጨለምተኞች ናቸው። ከሁሉም በላይ የወያኔ ጥሩ መሳርያዎች ይሆናሉና። የኢትዮጵያ አፈር ትናንት በደርቡሾች፣ በግብፆች፣ በጣልያኖች ጥይት ተደራርበው ከወደቁ ኦሮሞዎች፣ አማሮች፣ ትግሬዎች፣ ወላይታዎች፣ ሶማሌዎች፣ ሲዳማዎች ወዘተ ደምና አጥንት ውህደት የተቀመመ ነው። ዛሬም በወያኔ የአጋዚ ጥይትና ዱላ በኦጋዴን፣ በጋምቤላ፣ በአዲስ አበባ፣ በአምቦ፣ በወለጋ፣ በሃረር፣ በጎንደር በሚወድቁ ወጣቶች እየታደሰ ያለ አፈር ነው የኢትዮጵያ አፈር።

ወያኔ ለሱዳን “እንካ” ብሎ ቆርሶ የሚሰጠው ዳቦ አይደለም የኢትዮጵያ መሬት። የአፄ ዮሃንስና ከሁሉም ጎሳ የተውጣጡ ኢትዮጵያውያን አፅም የተቀበረበትን መሬት ነው የጣልያን እንቁላል አቅራቢ ሹምባሽ ልጆች ለማስረከብ በጓዳ የሚስማሙት። የአብዲሳ አጋ፣ የአበበ አረጋይ፣ የበላይ ዘለቀ፣ የገረሱ ዱኪ፣ የአሞራው ውብነህ፣ የአሉላ አባነጋ፣ የጀጋማ ኬሎ፣ የባልቻ አባነፍሶ አገር እንዲህ በቀላሉ ለባዕድ ስትሸጥ ልጆቿ በዝምታ ልንመለከት አይገባም።

ሚሊዮኖች በርሃብ እየረገፉ፣ ሺዎች እየተሰደዱ፣ ሺዎች በእስር እየማቀቁ፣ ሚሊዮኖች የሃፍረት ማቅ ለብሰው በሚኖሩባት፤ ጥቂት ዘረኞች አቅል ባጡባት አገር ላይ ዛሬ እየኖርን ትናንትን ለልዩነታችንና ለድክመታችን ምክንያት ማድረጉን እናቁም። ከዛሬው ተጨባጭ ችግራችን ተነስተን የነገዋን የሁላችን የጋራ አገር የመገንባት ተልዕኮ ላይ እናተኩር። ለነገ ተስፋችን እንቅፋት የሆኑ ጥቂት ዘረኞችን እንታገል። ከራሳችን ወንድሞች ቅኝ አገዛዝ ስር ነፃ እንውጣና ኢትዮጵያንና ህዝቧን ነፃ እናውጣ!

The post የወንድሞቻችን ቅኝ ተገዥዎች አንሁን | ከአንተነህ መርዕድ appeared first on Zehabesha Amharic.

የህብር ሬዲዮ ጥር 22 ቀን 2008 ፕሮግራም

<…የአርበኞች ግንቦት ሰባት ትግል የደረሰበትን ከፍተኛ ደረጃ የሚያሳይ ታልቅ ስብሰባ ነው። ፕ/ር ብርሃኑ የአርበኞች ግንቦት ሰባት ወታደሮች ኢትዮጵያ ውስጥ ናቸው ትግሉ አገር ቤት ገብቷል ብለዋል።የኢትዮጵያ ሕዝብ ምን ያህል የነጻነት ፍላጎት እንዳለው የሚያሳይ ስብሰባ ነው…ፕ/ር ብርሃኑ ትግሉን ጥሎ የትም እንደማይሄድ፣በዘር ፖለቲካ ያበዱትን ተዋቸው ዲሞክራሲያዊት ኢትዮጵያ የምትገነባበት ሁኔታ ላይ በጋራ መታገል እንደሚያስፈልግ ተናግሯል። በስብሰባ ቦታ የነበረው ጥበቃ በመሳሪያ የታገዘ ነበር።ይሄም…> አክቲቪስት መኮንን ጌታቸው ከዲሲ ግብረሃይል ከስብሰባው አስተባባሪዎች አንዱ ትላንት በዋሽንግተን ዲሲ ከኤርትራ መልስ ፕ/ር ብርሃኑ ነጋ በሕዝባዊ ስብሰባው ላይ ያደረጉትን አስመልክቶ ከሰጠው ማብራሪያ (ሙሉውን ያዳምጡት)

<…ለድርቁ ትኩረት አልተሰጠም። በ15 ሺህ ብር የገዛነውን ዕርዳታ ለማከፋፈል በረሃብ ወደተጠቁት ከቀይ መስቀል ጋር የሄዱት አባሎቻችን በፊልም አስደግፈው ያመጡት መረጃ ዛሬም ወገኖቻችን በረሃቡ ሳቢያ ከፍተኛ ችግር ላይ ናቸው። አንዲት ሴት ምግብ ፍለጋ ወጥታ ስትመለስ ልጇ በረሃብ ሞቶ ለቅሶ ተቀምጣ ደርሰዋል።እርዳታ ለመቀበልም መጥጦ ስምህ ዝርዝር ውስጥ የለም ተብሎ የተመለሰ አለ።በድርቁ ለተጠቁት ፈጥነን መድረስ ካልቻልን ግን…> ጋዜጠኛ አናኒያ ሶሪ የቤዛ እንሁን በበጎ ፈቃድ በድርቅ ሳቢያ በረሃብ አደጋ ላይ ለወደቁት ዕርዳታ አሰባሳቢ ኮሚቴ የሕዝብ ግንኙነት ሀላፊ ስለ ድርቁ ተጠይቆ ከሰጠው ምልሽ የተወሰደ ( ሙሉውን ያዳምጡት)

<…በጋምቤላ እየተደረገ ያለው የጎሳ ግጭት አይደለም በስልጣን ላይ ያለው አገዛዝ ሆን ብሎ ኑዌሮችን አስታጥቆ አስቀድሞ አኚዋኮችን ትጥቅ አስፈትቶ ከጀርባ ሆኖ የሚያካሂደው የዘር ማጥፋት ወንጀል ነው። አኙዋኮች ባለመሬት ባለ አገር ናቸው።በኢትዮጵያዊነታቸው የሚያነምኑ በመሆናቸው የጥቃት ሰለባ ሆነዋል። ይሄ የዘር ማጥፋት እንጂ ጎሳ ከጎሳ የተጋጨበት የሚለው አይሰራም … > ኢ/ር ኦዶል ኦጁሉበቅርቡ የተመሰረተው የታህሳስ ሶስት መታሰቢያ ዲሞክራሲያዊ ንቅናቄ አስተባባሪ በወቅታዊ ሁኔታ ላይ ከሰጡን ቃለ መጠይቅ የተወሰደ (ሙሉውን ያዳምጡት)

<…ኢትዮጵያውያን በዘር መከፋፈል አንተ ኦሮሞ አንተ አማራ ማለት የለባቸውም ።ኦሮሞ ወገኖቻችንን እየገደሉ ያሉ የሚከፋፍሉንን አትስሙ ።ሁሉም ተከባብሮ ተፋቅሮ አንዱ ለአንዱ ጥቃት መድረስ አለበት…እግዚያብሄር ኢትዮጵያውያንን አንድ የሚያደርግ የወገኖቹ ችግር የሚሰማው መሪ ይስጠን። ኦሮሞው አማራውን ያክብር አማራውም ኦሮሞውን ያክብር አንዱ …> ብጹዕ አቡነ መቃሪዮስ በላስ ቬጋስ በአገር ቤት በኦሮሚያ ለሞቱ ወገኖች፣በድርቁ ሳቢያ ለሞቱ፣በሰሜን ጎንደር እየተገደሉ ላሉት በከተማዋ በተጠራው የጸሎትና የሻማ ማብራት ላይ ተገኝተው ከተናገሩት(ቀሪውን ያድምጡት)

የአለማችን የወቅቱ ሰጋት የሆነው እና ከ ቢጫ ወባ ከ 23 በላይ ሓገሮችን በማጥቃት ከ አራት ሚሊዮን በላይ ሕዝብን ለመበሽታ ጋር ተዛማጅነት ያለው የዚካ ቫይረስን በተመለከተ የዓለማቀፉ ማህበረሰብ አመለካከት እና ምላሾቹ ( ልዩ ዘገባ)

ሌሎችም

ዜናዎቻችን

ፕ/ር ብርሃኑ ነጋ ትግሉ አገር ቤት መግባቱንና እሳቸውም ከትግሉ እንደማይርቁ ገለጹ

ግንባሩ የኢትዮጵያን ህልውና ከሚቀበሉ ሀይሎች ጋር እንደሚሰራ ተናግረዋል

በጋምቤላ ክልል በተቀሰቀሰው የጎሳ ግጭት የበርካት ሰዎች ሕይወት እየጠፋ ነው ቤት ንብረት ወድሟል

ምእራባዊያን ዲፕሎማቶች ዜጎቻቸው ወደ ስፍራው እንዳይጓዙ ጥብቅ ማስጠቀቂያ ማስተላለፋቸው ተገለጸ

በጋምቤላ የተከሰተው የጎሳ ግጭት ሳይሆን አገዛዙ የሚያካሂደው የዘር ማጥፋት ወንጀል መሆኑ ተገለጸ

የሱዳን ከፍተኛ ባለሰልጣናት አወዛጋቢው የኢትዮ- ሱዳን ድንበርን መጎብኘታቸው ታወቀ

የሱዳን ሕዝብ ከኢትዮጵያ ታጣቂዎች ጥቃት እንዳይደርስበት ካርቱም የመከላከያ እና የደህንነት ሃይሏን በድንበሮቹ ላይ እንድታሰፈር ተጠየቀ

የተመድ ዋና ጸሃፊ ዓለማቀፉ ማህበረሰብ አትዮጵያን እና ሕዝቧን ከረሃብ እልቂት እንዲያድን አዲስ አበባ ላይ ጥሪ አቀረቡ

“አትዮጵያን እና ሕዝቧን ከእልቂት የማትረፉ ብቸኛው ጊዜ ቢኖር ዛሬ እና አሁን ብቻ ነው ” በኢትዮጵያ የአለማቀፉ ሕጻናት አድን ዋና ተጠሪ

ሌሎችም ዜናዎች አሉ

The post Hiber radio: ፕ/ር ብርሃኑ ነጋ ግንባሩ የኢትዮጵያን ህልውና ከሚቀበሉ ሀይሎች ጋር እንደሚሰራ ተናግረዋል፣ በጋምቤላ ክልል በተቀሰቀሰው የጎሳ ግጭት የበርካት ሰዎች ሕይወት እየጠፋ ነው ቤት ንብረት ወድሟል፣ ምዕራባዊያን ዲፕሎማቶች ዜጎቻቸው ወደ ስፍራው እንዳይጓዙ ጥብቅ ማስጠቀቂያ ማስተላለፋቸው ተገለጸ፣ በጋምቤላ የተከሰተው የጎሳ ግጭት ሳይሆን አገዛዙ የሚያካሂደው የዘር ማጥፋት ወንጀል መሆኑ ተገለጸ፣ የሱዳን ከፍተኛ ባለሰልጣናት አወዛጋቢው የኢትዮ- ሱዳን ድንበርን መጎብኘታቸው ታወቀ፣የተመድ ዋና ጸሐፊ ለዓለም አቀፉ ማህበረሰብ ኢትዮጵያንነ ሕዝባን እንዲታደጋት አዲስ አበባ ላይ ጥሪ አቀረቡ የሚሉና ቃለ መጠይቅ ፕ/ር ብርሃኑ ነጋ ስለተገኙበት የዲሲ ስብሰባ፣በአገር ቤት ትኩረት ስላላገኘው አሳሳቢ የረሃብ አደጋ፣ በጋምቤላ ወቅታዊ የዘር ማጥፋት እርምጃ ለይ እንዲሁም ስለ ዚካ ቫይረስ ወቅታዊ ዘገባ እና ሌሎችም appeared first on Zehabesha Amharic.

ከቦሩ በራቃ
የቀድሞው የኦነግ ቃል አቀባይ  *

የኣርበኞች ግንቦት7ቱ ሊቀመንበር ዶክተር ብርሃኑ ነጋ ዋሽንግተን ዲሲ ላይ ድርጅታቸው በጠራው ህዝባዊ ስብሰባ ላይ ያደረጉትን ንግግር ዩቲዩብ ላይ ገብቼ በቀጥታ ተከታትየዋለሁ። ሌሎችም በቀጥታ ገብተው እንዲከታተሉት ብዬ ሊንኩን በፌስቡክ ገጼ ላይ ሼር ኣርጌው ነበር። በተለይም ከሁለት ወር ተኩል በላይ ሳይቁዋረጥ እየተካሄደ የሚገኘውን የኦሮሞን ህዝብ የጸረ ጭቆና ኣመፅ በተመለከተ ሊቀመንበሩ በሚናገሩት ላይ ትኩረት መስጠቴ ኣልቀረም። በዚህ ጉዳይ ላይ እንደማናቸውም የኦሮሞ ወገኖቼ የተለየ ትኩረት እንዲሰጥ ያደረገኝ ነገር ግልጽ ነው። በኦሮምያ የተጀመረውን የኣንገዛም ለወያኔ ንቅናቄ ኣርበኞች ግንቦት ሰባት እንደ ድርጅት እንዴት እንደሚመለከተውና ምናልባትም ይህ ታሪካዊ ንቅናቄ ድርጅቱ ቀደም ሲል በሚታወቅባቸው የብሄር ማንነት ኣመለካከቶች ላይ የተሻለ ግንዛቤ ፈጥሮ እንደሆን ለመረዳት ነበር።

ቦሩ ቦራቃ ከ 2012-2014 የኦነግ ቃል አቀባይ የነበሩ ናቸው::

ግንቦት 7 ከቀደሙት ድክመቶቹ ትምህርት ይቀስም ይሆናል ብለው ተስፋ የጣሉበት ኣንዳንድ ወገኖች ነበሩ። በተለይም ከኦሮሞ ድርጅቶች ጋር ተቀራርቦ ለመስራት ሳንካ ፈጥሮ የቆየውን የፀረ ብሄር ማንነት ኣቅዋሙን ያለሳልስ ይሆናል ብለው የገመቱ ኣንዳንድ ሰዎችን ኣውቃለሁ። ነገር ግን እኔ እንደ ኣንድ የቀድሞው የኦነግ ኣመራር ኣባል በዶክተር ብርሃኑ ንግግር ውስጥ ያየሁት ለውጥ የለም። ድርጅቱ ዛሬም የብሄር ማንነትን እንደ ኣፍራሽ ፖለቲካ መመልከቱን እንደቀጠለ በሊቀመንበሩ ንግግር በሚገባ ተንጸባርቁዋል። በዚህ ላይ ዶክተር ብርሃኑ ሲናገሩ ‘የዘውግ ማንነት’ ፖለቲካን የወለደው የዴሞክራሲ እጦት ስለሆነ ዴሞክራሲ ከሰፈነ ‘የዘውግ ፖለቲካ’ ተወግዶ ወደ ዜግነት እኩልነት ፖለቲካ መሸጋገር እንደሚቻል ያላቸውን እምነት ገልጠዋል።

ቀጠሉና ደግሞ ትንሽ ይሄንን ኣቅዋም የሚቃረን የሚመስል የዶሮና የኣንቁላል ምሳሌ ኣመጡ። እሳቸው ሁል ጊዜ ‘ዘውግ’ እያሉ የሚጠሩትን የብሄር ማንነትን የፈጠረው ጭቆና መሆኑን ሲያወሱ ቆዩና መልሰው ጭቆናውን የወለደው ደግሞ ራሱ የብሄር ማንነት ፖለቲካ ይመስል ሲሸወዱ ያዝናቸው። ከዶሮና ከእንቁላሉ የትኛው ቀድሞ እንደመጣ የሚያስረዳ ግልፅ መልስ እንደሌለ ሁላችንም እናውቃለን። ስለሆነም ከጭቆናውና ከብሄር ማንነት የትኛው ቀድሞ እንደተከሰተ መግለፅ ላይቻል ነው ማለት ነው። እንዲህ ያለውን ያንድ ትልቅ ድርጅት መሪ ግራ መጋባት ምን ብለን እንደምናልፈው ለጊዜው ኣይገባኝም።

ግልፅ መሆን ያለበትን ነገር ግን ሳላሰምርበት ማለፍ ኣልፈልግም። የብሄር ማንነት ፖለቲካ ሁል ጊዜ የጭቆና ኣገዛዝ ሰለባ ከመሆን የሚፈጠር ኣድርጎ ማየት ስህተት ነው። በርግጥ ጭቆና ሲበረታ ራስን ለማዳን ሲባል ጭቆናው ያነጣጠረበት የህብረተሰቡ ክፍል በብሄር ማንነቱ ተሰባስቦ መታገል ተፈጥሮኣዊ የሰው ልጅ ባህርይ ነው። ነገር ግን ሁል ጊዜ የብሄር ማንነት ፖለቲካ የሚመነጨው ከጭቆና ኣገዛዝ ወይም ከዴሞክራሲ እጦት ነው ብሎ መደምደም ኣደገኛ ነው። የብሄር ማንነት ጭቆና ኖረም ኣልኖረም የማይለወጥ ማንነት ነው። በቅኝ ግዛት ዘመን በብሄራቸው ተደራጅተው ሲታገሉ የኖሩ የኣለማችን ህዝቦች ነጻነት ከተጎናፀፉ በሁዋላም በብሄራቸው ማንነት ፀንተው ጎልብተው ቀጠሉ እንጂ ብሄራዊ ማንነታቸውን ከጭቆናው ድርቶ ጋር ኣውልቀው ኣልጣሉትም። በብሄራቸው ማንነት ኮርተው ራሳቸውን እያስተዳደሩ ናቸው። ኦሮሞም ሆነ ሌላው ብሄርም እንዲሁ ነው። ኦሮሞ በጭቆና ኣገዛዝ ስር ከመውደቁ በፊትም ኦሮሞ ነበረ። በኦሮሞነቱ ነበር ራሱን ሲገልጽ የኖረው። ጭቆና ስር ከወደቀ በሁዋላ ያመጣው የብሄር ማንነት ኣይደለም። ነገም ከጭቆናው ኣገዛዝ ሲላቀቅ ኦሮሞነቱን ኣውልቆ ኣይጥልም። ይህ ግልጽ መሆን ኣለበት። ይህ እውነታ የማይዋጥላቸው ወገኖች ካሉ ምንም ልንረዳቸው ኣንችልም።

ትናንት በዋሽንግተን ዲሲ ፕ/ር ብርሃኑ ነጋ በጠሩት ሕዝባዊ ስብሰባ ላይ ኢትዮጵያውያኑ ለኦሮሞ ወንድም እህቶቻቸው ትግል ያላቸውን አጋርነት ያሳዩበት ሁኔታ በፎቶ

እንደ ኣርበኞች ግንቦት ሰባቱ ሊቀመንበር ቁንፅል ኣቁዋም ከሆነ ወያኔ በጋራ ትግል ከተወገደ በሁዋላ ኦሮሞው ኦሮሞ ነኝ ብሎ ራሱን መጥራት ኣቁሞ ‘ኢትዮጵያዊ ነኝ’በሚለው ኣመለካከት ብቻ እንዲጸና ይፈለጋል። ይህ ደግሞ ከቶ ሊሆን ኣይችልም። የሊበራል ዴሞክራሲ ሃዋሪያ የሆኑት እነ እንግሊዝ እንኩዋን የብሄር ማንነትን በቱባው ዴሞክራሲያቸው ስኬት ማስቀረት ኣልቻሉም። እንደዛ ቢሆንማ ዛሬ ዩናይትድ ኪንግዶም መባል ባላስፈለጋቸው ነበር። ኢንግሊሽ፣ ዌልሽ፣ ስኮትሽና ኣይርሽ እያሉ በብሄራቸው ማንነት፣ በቁዋንቁዋቸውና በጂኦግራፊያዊ ኣሰፋፈር መሸንሸን ባላስፈለጋቸው ነበር። የዴሞክራሲያቸው መዳበር ይበልጥ የብሄር ምንነታቸው ኣስከበረው እንጂ ኣልናደውም። ከኣንድ ኣመት ገደማ በፊት በስኮትላንድ የተካሄደውን የራስን እድል በራስ የመወሰን ውሳኔ ህዝብን ማስታወስ ብቻ ለዚህ ሃቅ በቂ ምስክር ነው። ለኢትዮጵያ ኣንድነት ከማንም በላይ እንቆረቆራለን የሚሉት የኢትዮጵያ ፖለቲከኞች ከኣለማችን ፖለቲካ ልምድ መቅሰም ኣይፈልጉም። በሚመኙትና በለመዱት የጭለማው ዘመን ሁዋላ ቀርና ነውረኛ የፖለቲካ ኣመለካከት ብቻ ህዝቦችን ሸብበው መቀጠል ያልማሉ። ይህ ደግሞ ከምንም ከማንም በላይ እንቆረቆርላታለን ለሚሉዋት የኢትዮጵያ ኣንድነት ኣደገኛ ነው።

ፅሁፌን የምቁዋጨው ዶክተር ብርሃኑ ነጋ ሌሎች ከኦሮሞ እኩል ተነስተው ላለመታገላቸው እንደ ምክንያት ያስቀመጡትን ኣንድ ስህተት በማረም ይሆናል። የኦሮሞ ህዝብ የረጅም ጊዜ ትግል ሂደት ኣካል የሆነውና ባሁኑ ወቅት የወያኔን ስርኣት ከመሰረቱ እየነቀነቀው የሚገኘው የኦሮሞ ፕሮተስትስ እነ ግንቦት ሰባትን ጨምሮ ለሁሉም የዛች ኣገር ፖለቲካ ያገባናል ለሚሉት ሃይሎችና ህዝቦች የትግል ጥሪ ኣስተላልፏል። ጥሪውን በመከተል በመግለጫ ደረጃ ከሞላ ጎደል ሁሉም ደግፏል። ነገር ግን ከኦሮምያ ውጪ ኣይን የሚሞላ ንቅናቄ እንዳልታዬ ግልፅ ነው። ለዚህ ደግሞ ራሳቸውን መጠየቅ ያለባቸው የነዚያ ወገኖች መቀስቀሻ መዘውር በእጃችን ይገኛል የሚሉት እንደ ዶክተር ብርሃኑ ነጋ ያሉት የፖለቲካ መሪዎች እንጂ ትንቅንቅ ላይ ያለው የኦሮሞ ህዝብና ኤሊቶቹ ኣይደሉም። ዶክተር ብርሃኑ ዲሲ ላይ ድርጅታቸው በጠራው ህዝባዊ ስብሰባ ላይ ሲናገሩ ኦሮሞዎቹ ተነስተው ሌላው ከነርሱ ጋር ባለመነሳቱ ‘ኦሮሞ ብለን በመነሳታችን ለካስ ብቻችን ነን እንዴ?’ ብለው ራሳቸውን እንዲጠይቁ ይጠቅማቸዋል የሚል ኣይነት መልእክት ያዘለ ኣባባል ተጠቅመዋል።

ይሄኛውም ኣባባላቸው ግዙፍ ስህተት መሆኑን ላስረዳ። ኦሮሞዎች በታሪክ ትልቅ ስፍራ የተሰጠውን ይህንን ትግል ለሶስተኛ ወር እስከዛሬ ሳያቁዋርጡ ሲቀጥሉ ሌሎች ከኛ ጋር ኣልተነሱምና ምን ይሻለናል ብለው ጉልበታቸው ኣልዛለም። በሌሎች ኣለመነሳትም ተስፋ የሚያስቆርጣቸው ምንም ነገር የለም። በርግጥ ሌላውም ህዝብ ከኛ ጋር ቢነሳ እሰዬው ነበር። የሁሉም መተባበር የድሉን ጊዜ ያቃርባልና። ሌሎች ባለመነሳታቸው ደግሞ የኦሮሞ ህዝብ ትግል ከሂደቱ ኣልተገታም ኣይገታምም። የኦሮሞ ህዝብ ሌሎችም የኣገሪቱ ህዝቦች ተመሳሳይ የጭቆናና የዘረፋ መዋቅር ስር መሆናቸውን ኣሳምሮ ይረዳል። ኦሮምያ ውስጥ ወያኔ ድል ከተደረገ ለተቀሩት ክልሎችም የትግል መንገዱን ጠርጎላቸው መክፈል የሚጠበቅባቸውን መስዋእትነት ያቀልልላቸዋል። ያ ማለት ደግሞ የኦሮሞ ህዝብ ዛሬ ለብቻውም ቢሆን እየከፈለ ያለው መስዋእትነት ከራሱ ኣልፎ ለሌሎችም ህዝቦች ክብር መጎናፀፍ የጎላ ድርሻ እያበረከተ ነው ማለት ነው። ወያኔን ማዳከም ቢያቅተውም እንኩዋን (ነገር ግን በግልፅ እያዳከመው ነው) እንደብዙህነቱ የትግል ፋና ወጊነቱን ሚና መጫወቱ ለራሱ እንደ ጉልህ ድርሻ ተደርጎ መመዝገብ የሚገባው ነው ብዬ ኣስባለሁ።

ዶክተር ብርሃኑ ይህንን ሃቅ መገንዘብ ኣቅቶኣቸው ኣልያም እያወቁት ነገሩን መጠምዘዝ ፈልገው እንደሆነ ኣልገባኝም። የገቡኝ ኣንድ ሁለት ነገሮች ግን ኣሉ። የመጀመሪያው ዶክተሩ የኦሮሞ ልጆች ኦሮምያን ከጭቆና ኣገዛዝ ለማላቀቅ እስከምን ድረስ ቆርጠው እንደተነሱ ኣለመረዳታቸው ነው። የትግል ኣጋር ቢመጣም ባይመጣም ኦሮምያ የለኮሰችው የትግል ችቦ እንደሰደድ እሳት ክልሉን ኣዳርሶት ጨቁዋኞችን ኣጋይቶ ማስወገዱ ኣይቀሬ መሆኑን የተረዱት ኣይመስለኝም። ሁለተኛው ሊቀመንበሩ ያልተረዱት የሚመስለኝ ነገር በኦሮምያ ትግሉን እያቀጣጠለ ያለው የፖለቲካም ሆነ የህብረተሰቡ ክፍል እሳቸው ለማስቀመጥ ኣንደሞከሩት ፅንፈኛና ፅንፈኛ ያልሆነ እየተባለ የተከፋፈለ ኣይደለም። በዚህ መልኩ ተከፋፍሎ ኣንዱ ሲታገል ሌላ ዳር ቆሞ የሚመለከት ሁኔታ ኦሮምያ ውስጥ የለም። ትግሉ የኦፒዲኦ ኣባላትን ሳይቀር ያሳተፈ ሁሉ-ኣቀፍ የኦሮሞ ህዝብ ትግል እንጂ ፅንፈኛውን ኦሮሞ ኣግልሎ በለዘብተኞች ብቻ የሚካሄድ ተብሎ የሚገለፅ ትግል ኣይደለም። ኦሮሞውን ፅንፈኛና ለዘብተኛ ብሎ መከፋፈልም ጊዜ ያለፈበት የከፋፍለህ ግዛ ስልት ኦሮምያ ውስጥ ተቀባይነት የለውም።

* ቦሩ ቦራቃ ከ 2012-2014 የኦነግ ቃል አቀባይ የነበሩ ናቸው::

The post ምላሽ ለፕ/ር ብርሃኑ ነጋ – የኦሮሞ ልጆች ኦሮምያን ከጭቆና አገዛዝ ለማላቀቅ እስከምን ድረስ ቆርጠው እንደተነሱ የተረዱት አይመስለኝም appeared first on Zehabesha Amharic.

ዶ/ር ሰንበቴ ቶማ

የወላይታ ሶዶ ዩኒቨርሲቲ በ1999 ዓ/ምሥራ ከጀመሩ 11 የኒቨርሲቲዎች መካከል አንዱ ሲሆን በአሁኑ ወቅት ከ 10 ሺህ ተማሪዎች በላይ በማስተማር ላይ ይገኛል፡፡ ተቋሙ ዶ/ር ሰንበቴ ቶማ በተባለ ፕሬዚዳንት የሚመራ ሲሆን በዩኒቨርሲቲው ማህበረሰብ ዘንድ በጠባብ ብሄርተኝነት የተለከፉ መሆናቸው ይነገራል፡፡ በዚህም ምክንያት ቀድሞ ተከበብሮ እና ተሳስቦ ይሠራና ይኖር የነበረ ማህበረሰብ መካከል በጥላቻንና በጥርጣሬ የመተያየት ሰይጣናዊ መንፈስ እንዲሰፍን አድርጓል፡፡ በሌላ በኩል አክራሪ የፕሮቴስታንት እምነት ተከታይ በመሆኑ ተቋሙን በሐይማኖታዊ ፍልስፍና ከመምራቱም በልይ ቢሮውን እንደ አምልኮ ሥፍራነትም ይጠቀምበታል፡፡ በተለይ ጥዋት ወደ ቢሮ ሲገባ የአምልኮ ሰዓት ነው በማለት ባለጉዳዮችን ለረዥም ሰዓታት በማስጠበቅ በተደጋጋሚ እንደሚያማርር በስፋት ይነገራል፡፡ መንግሰት በአንድ ጎን የመልካም አስተዳደር ዕጦን ቀርፋለው እያለ ይደነፋል በሌላ ጎን ደግሞ ህገመንግስቱን እንኳን በአግባቡ ባልተረዱ እና እራሳቸውን እንደ መንግስት በሚቆጥሩ ግለሰቦችና ቡድኖች ዜጎችን ይጉላላሉ፡፡

ሰውየው ወደ ወላይታ ሶዶ ዩኒቨርሲቲ ተሹሞ ከመጣ አንድ አመት እንኳን አልሞላውም ፡፡ ወደ ተቋሙ ከመምጣቱ በፊት በዲላ ዪኒቨረሲቲ የተማሪዎች አገልግሎት ዲን ሆኖ አገልግሎ የነበረ ሲሆን በወቅቱም ከተማሪዎች ቀለብ አቅራቢ ዲርጅቶች ጋር በመመሳጠር ሚሊዮኖችን የዘረፈ መሆኑን በቅርበት ጉዳዩን የሚያውቁ ግለሰቦች ይናገራሉ፡፡ ይህን የዲላ ዩኒቨርሲቲ በሽታን ከተለየዩ ነጋዴዎችና የግንባታ ሥራ ተቋራጮች መማለጃ በግልጽ እየጠየቀ በርካታ መቶ ሺህ ብሮችን በሚቀርቡት እና በዘመዶቹ ሥም ወደ ባንክ እያሸሸ መሆኑን ምንጮች ይጠቁማሉ፡፡

ግለሰቡ በዚህ ሥራው ሳይገደብ ተቋሙ ውስጥ ቡድንተኝነት እና ጎጠኝነት እንዲንሰራፋ በማድረጉ በአሁኑ ወቅት ከሦስት የማያንሱ ቡድኖች እንዲፈጠሩ ምክንያት ሆኗል፡፡ አንዱ ቡድን በሱ የሚመራ ሲሆን ጥቂት የአካባቢውን ተወላጆች እና ያለአግባብ መጠቀም የሚሹትን በብዛት የያዘ ነው፡፡ ይህ በድን ሌሎች ዜጎችን በጥርጣሬ የሚመለከት እና የሚያገል ነው፡፡ ሁለተኛው ቡድን በዶ/ር ብርሃኑ ኩማ (የምርምርና ማህበረሰብ አገልግሎት ዘርፍ ምክትል ፕሬዚዳንት እና የዩኒቨርሲቲው የሥራ አመራር ቦርድ ሰብሳቢው የቅርብ ዘመድ) የሚመራና የፕሬዚዳንትነት ቦታን ለመያዝ የሚታገል ሲሆን በዙሪያው በቤተ ዘመዶች እና ጥቅም ፈላጊዎች የታጀበ ነው፡፡  ሦስተኛው መሪ የሌለው እና በአብዛኛው ገለልተኛ የሆኑ ግን በፕሬዚዳንቱ አመራርና አሰራር ደስተኛ ያልሆኑ 50 በመቶ የሚሆኑ የተቋሙን ማህበረሰብ የያዘ ነው፡፡

በሌላ በኩል ዶ/ር ሰንበቴ ቡድኑን ለማጠናከር ከትምህርት ክፍል ሃላፊ አንስቶ እስከ ምክትል ፕረዚዳንት ድረስ ያሉ ቦታዎችን በራሱ ዘመዶችና ደጋፊዎች እየተካ ይገኛል፡፡ አንዳንድ ሰዎች ሰውየው በራስ የመተማመን ችግር እንደሚስተዋልበት ሲገልጹዋቸው ሌሎቹ ደግሞ የልምድ፣ የአመራር እውቀትና ክህሎት ችግር አለበት ይላሉ፡፡

የዩኒቨርሲቲው ማህበረሰብ ያለበትን ችግር በተለያየ መንገድ ለሚመለከታቸው አከላት ያሳወቀ ቢሆንም  እስካሁን ድረስ መፍትሄ የሰጠን የለም ይላሉ፡፡ በዚህም ምክንያት በርካታ የዩኒቨረሲቲው መምህራን እየለቀቁ ናቸው፡፡ በርካታ የዩኒቨርሲቲው ማህበረሰብ አካላት ተቋሙ መሪ ካጣ ቆየ ቢሉም የሚሰማቸው ጆሮ አላገኙም፡፡

ለጋው

ከወላየታ ሶዶ

The post የዲላ ዩኒቨርሲቲ በሽታ ወደ ወለይታ ሶዶ ዩኒቨርሲቲ ተዛመተ!!! ወላይታ ሶዶ ዩኒቨርሲቲ ከድጡ ወደ ማጡ … appeared first on Zehabesha Amharic.