“የሕዝቡን ጥያቄ ከ140 በላይ ንጹሃን ተገለውም ስላልተመለሰ ተቃውሞው ቀጥላል” – ዶ/ር መረራ ጉዲና የኦፌኮ ሊቀመንበር

The post “የሕዝቡን ጥያቄ ከ140 በላይ ንጹሃን ተገለውም ስላልተመለሰ ተቃውሞው ቀጥላል” – ዶ/ር መረራ ጉዲና የኦፌኮ ሊቀመንበር appeared first on Zehabesha Amharic.

*‹‹ከቤተሰቦቻችን ጋር እንዳንገናኝ ተደርገናል›› ተጠርጣሪዎች
*‹‹6 ቀን ደንበኛየን ለማግኘት ተመላልሼ ተከልክያለሁ›› የጋዜጠኛ ጌታቸው ጠበቃ አምሃ መኮንን

በነገረ ኢትዮጵያ ሪፖርተር

The post እነ ጌታቸው ሺፈራው ተጨማሪ ጊዜ ቀጠሮ ተሰጠባቸው appeared first on Zehabesha Amharic.

– የእርዳታ አሰጣጥ የተጠና እንዲሆን ጠይቋል
–    ህብረቱ የ25 ሚ.ዩሮ እርዳታ ሰጥቷል ተብሏል
በኢትዮጵያ ወቅታዊ ጉዳዮች በተለይም ከአዲስ አበባ የተቀናጀ ማስተር ፕላን ጋር በተያያዘ ተቃውሞ የደረሰው ሞትና የሰብአዊ መብት ጥሰት በገለልተኛ አካል እንዲጣራና የሰብአዊ መብት ባለሙያዎችና የተባበሩት መንግሥታት ምርመራ እንዲያደርጉ የሚጠይቅ የውሳኔ ሃሳብ ለአውሮፓ ህብረት ፓርላማ ቀረበ፡፡ ለአገሪቱ የሚደረገው እርዳታም የተጠና እንዲሆን ተጠይቋል፡፡
በኦሮሚያ ክልል ከማስተር ፕላኑ ጋር በተያያዘ የተፈጠረው ተቃውሞና ግጭት ለሁለት ወራት መዝለቁን የጠቆመው የውሣኔ ሃሳቡ፤ በግጭቱ 140 ሰዎች መገደላቸውንና የተቃዋሚ ፓርቲ ከፍተኛ አመራሮችን ጨምሮ ከፍተኛ ቁጥር ያላቸው አርሶ አደሮች ፣ ተማሪዎች፣ ምሁራን፣ ጦማሪያንና ጋዜጠኞች መታሰራቸውን በመጥቀስ እየተፈፀሙ ያሉ የሰብአዊ መብት ጥሰቶች አሣሣቢ ደረጃ ላይ መድረሳቸውን ገልጿል፡፡
የኦሮሞ ፌደራሊስት ኮንግረስ (ኦፌኮ) ም/ሊቀመንበር አቶ በቀለ ገርባ፤ በፖሊሶች ከቤታቸው ከተወሰዱ በኋላ እስካሁን ያሉበት አይታወቅም ያለው የውሳኔ ሃሳብ፤ የሲፒጄን ሪፖርት ጠቅሶ 17 ጋዜጠኞች በእስር ላይ እንደሚገኙና 57 የሚዲያ ባለሙያዎችም ባለፉት 5 ዓመታት ሀገር ጥለው መሰደዳቸውን አመልክቷል፡፡
ለፓርላማው የቀረበው በርካታ ነጥቦችን የያዘው ውሳኔ ሃሳብ፤ ከተቃውሞው ጋር ተያይዞ ተፈጽመዋል ያላቸውን የሞት፣ የእስራትና የተለያዩ የሰብአዊ መብት ጥሰት ተግባራት በዝርዝር የጠቀሰ ሲሆን ተቃውሞውን ያሰሙ የህብረተሰብ ክፍሎች “ሽብርተኛ” መባላቸውን አውስቷል፡፡
ተቃውሞውን ለማርገብ በመንግስት የፀጥታ ሃይል የተወሰደውን እርምጃ፣ በግጭት መሃል የተገደሉ 140 ዜጐችን ጉዳይና ከተከሰተው ግጭት ጋር ተያይዞ የተፈፀሙ የሰብአዊ መብት ጥሰቶች በገለልተኛ አካል ተጣርተው ህጋዊ እርምጃ እንዲወሰድ የሚጠይቀው የውሳኔ ሀሳብ፤ መንግስት ማስተር ፕላኑን  መሰረዙን በበጐ እንደሚቀበለው አስታውቆ፣ በቀጣይ በሀገሪቱ ጉዳይ ላይ መንግስትና ተቃዋሚ  ፓርቲዎችን ጨምሮ ህብረተሰቡን ያሳተፈ የፖለቲካ ውይይት እንዲደረግ የህብረቱ ፓርላማ ጥሪ ያቀርብ ብሏል፡፡
የውሳኔ ሀሳቡ የኢትዮጵያ መንግስት፤ የአፍሪካ ህብረትና የተባበሩት መንግስታት የሰብአዊ መብት ጥበቃ ስምምነቶችን እንዲያከብርና የዜጐችን በሠላማዊ መንገድ የመሰብሰብ፣ ሃሳብን በነፃነት የመግለጽና የመደራጀት መብት እንዲያከብር እንዲሁም የተባበሩት መንግስታት ድርጅት ልዩ መርማሪና የሰብአዊ መብት ባለሙያዎች ወደ አገሪቱ መጥተው ጉዳዩን በመመርመር  ሪፖርት ያቀርቡ ዘንድ መንግስት እንዲፈቅድ ይላል፡፡
መንግስት ሚዲያዎችን ከማፈንና ከማዋከብ እንዲቆጠብ፣ ጋዜጠኞችና የሰብአዊ መብት ተቆርቋሪዎች ስራቸውን በነፃነት እንዲሠሩ እንዲፈቅድና የመረጃ እቀባ ከማድረግ መንግስት እንዲቆጠብ ህብረቱ ጥሪ እንዲያቀርብም በውሳኔ ሃሳቡ ጠቁሟል፡፡
ለሀገሪቱ የሚሠጠው እርዳታም ሆነ የልማት ድጋፍ በሀገሪቱ ለሚፈፀሙ የሰብአዊ መብት ጥሰቶች ግብአት አለመሆናቸውን፤  በተለይም አርሶአደሮችና አርብቶ አደሮችን እንደማያፈናቅል ማረጋገጥ ያሻል ያለው የውሳኔ ሀሳቡ፤ በአውሮፓ ህብረት የሚደረገው የገንዘብ ድጋፍም የሰብአዊ መብት አጠባበቅን መሠረት ያደረገና የኢትዮጵያ መንግስት ዲሞክራሲን ለማስፋፋት ባከናወነው ተግባር ልክ መሆን እንዳለበት ጠቁሟል፡፡ በኢትዮጵያ መንግስት በሽብርተኛ ድርጅትነት የተፈረጀው የግንቦት 7 ዋና ፀሐፊ የነበሩትና ከዓመት በፊት ከየመን ተይዘው በኢትዮጵያ በእስር ላይ እንደሚገኙ የሚነገርላቸው እንግሊዛዊ ዜግነት ያላቸው አቶ አንዳርጋቸው ፅጌ፤ በአስቸኳይ ይለቀቁ ሲልም ጥያቄ አቅርቧል፡፡
በአውሮፓ ህብረት ፓርላማ ታሪክ በኢትዮጵያ ጉዳይ ላይ ለመጀመሪያ ጊዜ የቀረበና ጠንካራ ጉዳዮችን ያካተተ ነው፡፡ በተባለው በዚህ የውሳኔ ሃሳብ ላይ የፓርላማው አባላት በቅርቡ ድምፅ ይሰጡበታል ተብሎ ይጠበቃል፡፡
በሌላ በኩል የአውሮፓ ህብረት በኢትዮጵያ ለሚከናወኑ የበጎ አድራጎት ሥራዎች የ25 ሚ. ዩሮ ድጋፍ ማድረጉን የመንግስት ኮሙኒኬሽን ጉዳዮች ጽ/ቤት አስታውቋል፡፡ ህብረቱ ለኢትዮጵያ በአማካይ በአመት የ4 ቢሊዮን ብር ገደማ አጠቃላይ ድጋፍ እንደሚያደርግ ይየሚታወቅ ሲሆን ከአሜሪካና ከእንግሊዝ በመቀጠል ለኢትዮጵያ ከፍተኛ የገንዘብ ድጋፍ በመስጠት ተጠቃሽ ነው፡፡

ምንጭ – አዲስ አድማስ

The post የአውሮፓ ፓርላማ በኢትዮጵያ ጉዳይ ጠንካራ የውሳኔ ሃሳብ አቀረበ – አለማየሁ አንበሴ appeared first on Zehabesha Amharic.

ሚኪያስ መሐመድ አጭበረበበት የተባለው ደረቅ ቼክ

በሽምግልና አዲስ አበባ የገባው አርቲስት ሚኪያስ መሐመድ ዘ-ሐበሻ በጠቀሰችው መሰረት ዛሬ ማምሻውን አዲስ አበባ ከሚገኘው የሰይፉ ፋንታሁን ራድዮ ላይ ምላሽ ሰጠ:: በቼክ ማጭበርበር የተነሳ ክስ የቀረበበትና የቼኮቹም በአደባባይ የወጡበት አርቲስቱ “የተፍጠረች ትንሽ ጭቅጭቅ ናት እንጂ ማጭበርበር አይደለም” ሲል ምላሽ ሰጥቷል:: አርቲስቱ የቀረቡበትን የቼክ ማስረጃዎች ክፍያ የተፈጸመባቸው ናቸው ብሏል:: በአርቲስቱ ላይ ክሳቸውን ከሚያሰሙት ነጋዴዎች መካከል አንዱ ለዘ-ሐበሻ በሰጡት ምላሽ ክፍያ የተፈጸመባቸው (እንዲከፈል የታዘዘበት)  ቼኮች ባንክ ቤት ይቀራሉ እንጂ እንዴት ሰውዬው ጋር ይቀራል? ሲሉ ይጠይቃሉ::  ሰይፉ ፋንታሁን ሚዜው ስለሆነ ከሙያ ስነምግባር ውጭ የርሱን ምላሽ አሰምቶ እኛ ተበዳዮች ነን የተባልነውን በአንድ ላይ አለማቅረቡ አሳዝኖናልም ብለዋል:: የአርቲስቱን ምላሽ አድምጡት::

The post በሽምግልና አዲስ አበባ የገባው አርቲስት ሚኪያስ መሐመድ ምላሽ ሰጠ – “ትንሽ ጭቅጭቅ ናት” appeared first on Zehabesha Amharic.

የኢትዮጵያውያን ሕዝባዊ ውይይት በሳንሆዜ ካሊፎርኒያ
Town Hall Meeting on the Current Political & Humanitarian Crisis in Ethiopia.

All Ethiopian Communities in the Bay Area are Invited.
Key note speakers:

• 
Dr. Fikre Tolossa,
• Ato Liku Ejigu,
• &
other Bay Area Community and Religious Leaders.

• ለሱዳን ሊሰጥ ሰለታቀደው የኢትዮጵያ መሬት

• በኢትዮጵያ ስላለው የሰብአዊ መብት ጥሰት እና በጠቅላላ በሐገሪቱ በተለይም በደቡብ የሐገሪቱ ክፍል እና በኦሮምኛ ቋንቋ ተናጋሪ የሆኑ ወገኖቻችን ሰለሚደረገው ሕዝባዊ እምቢተኝነት
• በሐገራችን ሰለተከሰተው ድርቅ እና የርሐብ አደጋ እንዲሁም ሌሎች አብይ ብሔራዊ ችግሮቻችን ላይ ነጻ እና በአይነቱ ልዩ የሆነ ውይይት ይደረጋል

የሰብሰባው ቦታ፡ The San Jose Masonic Center
2500 Masonic Dr, San Jose, CA 95125
የሰብሰባው ቀን፡ እሁድ February 14, 2016 from 1:00 PM to 7:00 PM. መግቢያ በነፃ

አዘጋጅ፡ Concerned Ethiopians
Email- concernedethio@gmail.com
Facebook:https://www.facebook.com/concernedethiopian.ethiopia

The post አስቸኳይ ጥሪ በሳንሆዜ ካሊፎኒያና አካባቢው ለምትኖሩ ኢትዮጵያውያን እና ኢትዮጵያውያን ወዳጆች appeared first on Zehabesha Amharic.

የዕለቱ ምርጥ ካርቱን – ኃይለማርያም ደሳለኝ እና ወያኔ

The post የዕለቱ ምርጥ ካርቱን – ኃይለማርያም ደሳለኝ እና ወያኔ appeared first on Zehabesha Amharic.

The post “እኔም ሆድ ሲብሰኝ እንደዚያ ያልኩባቸው ቀናት አይጠፉም” – ቃለምልልስ ከያሬድ ጥበቡ ጋር | በኦሮሚያ፣ በሁመራ፣ በቅማንት ጉዳዮች ላይ ይናገራሉ | የቀለም ቀንድ ጋዜጣ appeared first on Zehabesha Amharic.

አድ አዳማ

አቶ አባይ ፀሐዬ በኦሮሚያ ውስጥ የተነሳውን ሕዝባዊ ተቁዋሞ አስምልክቶ በተደጋጋሚ የድንፋታ ቃላት ሲናገሩ መቆየታቸው ከማንም የተሸሸገ አይደለም ይሁንና ዛሬ ዛሬ ደሞ የኦሮሞ ሕዝባዊ አመፅ ተጠናክሮ መቀጠሉ ስላሰጋው ለማስተባበል የት እንደሆነ በማይታወቅ ቦታ ቃለመጠይቅ ብጤ ለማድረግ ሞክሮ ነበር። ይህ ቃለ መጠቅ ከማስተባበል ይልቅ የተባሉት የትምህከት ቃላት በትክክል አውዲኦና ቪዲዎ የታከለበት ማረጋገጫ በራሱ በአቶ አባይ ፀሐዬ የተሰጠ መግለጫ ነው።በመጀመሪያ የጠያቂውን ሁኔታ ስንመለከት ዋ ከተሰጠህ ጥያቄ ትንሽ ዝንፍ ብትል ዋጋህን ታገኛለህ ስለተባለ ከመጠየቅ ይልቅ በመርበትበትና ሕዝባዊ አመፁን በመወንጀል ግዜውን የጨረሰ ይመስላል።ታዲያ የአቶ አባይ ፀሐዬ መልስ ልክ አፈትልኮ እንደወጣው ድምፅ በድንፋታ ታጅቦ ባይሆንም ቀዝቀዝ ባለ ድምፅ ማስተር ጥፋቱን ገና ከጥንስሱ የተቃወሙት የኦህዴድ አባላት ላይ ጣታቸውን ከመጠቆም ወደሗላ አላሉም።በቃለ መጠይቁ ላይ እንደሰማሁት ከሆነ አቶ አባይ ፀሐዬ አፈትልኮ የወጣው ድምፅ የኔ አይደለም ከማለት ይልቅ እኔ ጎንደር አልነበርኩም, እስቲ ቪዲዮውን ያምጡ , እስቲ የተናገርኩትን ሙሉ አረፍተ ነገር ያሰሙ እያሉ ግዜያቸውን ጨርሰውታል። አቶ አባይ አክሎም ህወሓት ወይም የፌደራል መንግስት በኦሮሚያ የተነሳው ሕዝባዊ ተቁዋሞ ውስጥ እጁን አላስገባም ብሎ ለማስተባበል ሞክራል። ለዚህ መልስ ይሆን ዘንድ ኦህዴድ ውስጥ ያሉትን ውድ የኦሮሞ ልጆችን ማስተር ጥፋቱን ስለተቃወሙ ብቻ ከኦህዴድ ባለስልጣናት ይልቅ የህወሓትና የፌደራል መንግስቱ ቱባ ባለስልጣኖች አባይ ፀሐዬንና ጌታቸው ረዳ ነበሩ ሲደነፉባቸው የነበሩት። በተጨማሪም የኦሮሚያ ፖሊስ የሕዝቡ ጥያቄ አግባብና ተገቢ ነው ባለ ወቅት የኦሮሚያ ፖሊስን ትጥቅ አስፈትተው ኦሮሚያ ውስጥ ከፈተኛ  ጭፍጨፋ ያካሔዱት የአጋዚ ጦርና የፌደራል ፖሊስ ናቸው። ይህም ጭፍጨፋ ሲካሔድ  under direct command of TPLF መሆኑ ከማንም የተሸሸገ አይደለም። ታዲያ ከዚህ በላይ ጣልቃ ገብነት ከየት ይምጣ።

ዘንድሮ ይሁን አምና ወይም ካቻምና ጎንደር ሔጄ አንድም ስብሰባ ብቻዬንም ሆነ ከሌሎች ሰዎች ጋር  አላካሔድኩም  ሙሉ ቪዲዮዋን ከነምስሌ ከነንግሬ ያምጡዋት  ያለው የዚሕ የድምፅ ተቀርፆ መውጣት ስለተደጋገመበት ምናልባት ከቪዲዮ አቀራረጽ ማን ድምፁን ቀርፆ እንዳወጣው ማወቅ በቀላሉ ይቻላል ከሚል ግምት እንጂ ስለድምፁ የሱ መሆን ቅንጣት ታህል ጥርጣሬ እንደሌለ አባይ ፀሐዬም ሆነ መላው ሕዝብ በደንብ ያውቃል። እሱም አልካደም።

የአቶ አባይ ፀሐዬ ንግግር እኔን እንደገባኝ ከሆነ  ቢያንስ ሁለት ነገር ጠቆም አድርገውን አልፈዋል

1ኛ. ከሁከትና ግርግር ለመጠቀም ከሚያስቡ ብለው ካሉ በሗላ ጥቆማው ያነጣጠረው አንዳንድ የኦሮሚያ ልዩ ዞን አስተዳደሮችና አንዳንድ የአዲስ አበባ ሀብታሞች ብሎ ቀጠለና የኦሮሚያ ሀብታሞች አለ እዚጋ ልብ ማለት የሚያስፈልገው ሙሉ አዲስ አበባና ዙሪያዋን አፍነው በጉልበት ስለያዙት የህወሐት ቱጃሮች አንድም ነገር ያለው የለም ። ከዚህ አባባሉ የተረዳሁት ነገር ቢኖር ወያኔ ማስተር ጥፋቱን የተቃወሙትን የኦሮሚያ ልዩ ዞን  አስተዳደሮችና  የኦሮሚያ ሀብታሞች ላይ ልዩ የሆነ የማዋከብ ዘመቻ ለመጀመር እቅድ ውስጥ እንዳሉ  ነው። ለዚህም መረጃ የሚሆነው በቅርብ አፈትልኮ የወጣው የአባይ ፀሐዬ ድምፅ ውስጥ ለኦህዴድ ባለስልጣናት የተሰጣቸው ትእዛዝ ማስተር ጥፋቱን የተቃወሙትን የኦሮሚያ አስተዳደሮችን አባሩ የሚል ነው።

2ኛ. የኔንና የአንዳንድ የህወሓት ባለስልጣናት ወይም የህወሓት ስምን የሚያነሱበት ምክንያት አለና በትግራይ ሕዝብ ላይ የዘር ጥላቻ ለመቀስቀስ ነው ሲል መልሧል።  ከዚህ ደሞ የምንረዳው ልክ እንደ ልማዳቸው የትግራይን ሕዝብ እኛ ከሌለን ትጠፋለህ ስለዚህ ከኛ ጋር ሆነህ የኦሮሞን ሕዝብ ውጋ ብሎ  እራሱ የዘር ግጭትን እየቀሰቀሰ ነው። የኦሮሞ ሕዝብ የሚያውቀው አንድ የፀዳ ሀቅ አለ ይኸውም ሁሉም የህወሓት አባል አባይ ፀሐዬን ጨምሮ ትግሬዎች ናቸው ነገር ግን ሁሉም ትግሬ በፍፁም የህወሓት አባል ነው ብሎ አያምንም በዚህም የተነሳ ከንፁሁ የትግራይ ህዝብ ጋር ወዳጅነት እንጂ ምንም አይነት ቅራኔ የለውም።

አቶ አባይ ፀሐዬ በንግግራቸው መሓል የኦሮሚያ ሕዝብ ማን እንደዘረፈው ማን እንደበደለው ያውቃል ብሏል እውነት ነው ድብን አድርጎ ቢያውቅማ ነው ያለው መንግስት ሳይሆን ዱርዬ ዘራፊ ነው ብሎ በአራቱም መዓዘን ለመቃውም አደባባይ የወጣው ። አንተ አባይ የምትባል ሰው የሚገባህ ከሆነ ሕዝቡ በአሁኑ ሰዓት የሚለው ያለው አንጡረ ሀብታችንን ስትዘርፉ በትግስት አለፍን, መሪዎቻችንን ለመምረጥ የሰጠነውን ድምፃችንን ስትዘርፉ ዝም አልን አሁን ግን የመኖር ህልውና በሆነው በመሬታችን ስለመጣቹ ከዚህ በሗላ ወያኔ አይመራንም ስለዚ ህወሓትና ጀሌዎቻቸው ስልጣን ልቀቁ ከእንግዲህ ለፋሺስቱ ህወሓት የሚንበረከክ አንድም የኦሮሞ ትውልድ አይኖርምነው ።

አቶ አባይ ፀሐዬ ወላዋይና ከፍተኛ የመንሸራተት ባህሪ እንዳለበት እግዜር ነብሱን በሲዖል ያኑረውና ሟቹ ጠቅላይ ሚኒስቴር መለስ ሳይቀር መስክሮለታል። እናም ዛሬ የተናገሩትን ነገር ከሽመጠጡን ነገ ደሞ ጭራሽ ማስተር ጥፋቱን ከተቃወሙት ስዎች መካከል ግባር ቀደሙ እኔ ንበርኩ ይሉን  ይሆናል! ማን ያውቃል?

ድል ለሕዝባችን!!!!!!

The post ወይ አቶ አባይ ፀሐዬ ሸመጠጠው | ሳይወዱ በግዳቸው የጠቆሙን 2 ነገሮች appeared first on Zehabesha Amharic.

ታላቅ ሰላማዊ ሰልፍ( Great Demonstration) በትሩንዳሄም ከተማ፣ ኖረዌይ ጥር 14፣208 ዓ/ም:

በጉዱ ካሣ

በኦሮሞ ኢትዮጵዊያን ኮምኒቲ በትሮድላግ አዘጋጅነትና የዲሞክራሲያዊ ለወጥ በኢትዮጵያ ድጋፍ ሰጭ ድርጅት ኖረዌይ ትሩንድላግ ቅርንጫፍ ጽ/ቤት ትሩንዳሄም አባላት በተጋባዥነት በተገኙበት፣ በትናንትናው እለት ጥር 14፣2008 ዓ/ም በረዶና ቅዝቃዜው ሳይበግራቸው ታላቅ ሰላማዊ ሰልፍ በትሩንዳሄም ከተም በማድረ ግ ፍቅርንና አንድነትን ለማይዎደው ለትግራይ መንድርተኛ ነጻ አውጭ(TPLF) በደያስፖራ ደጋፊዎች ቅስም በምስበር አንገት አስደፍተው ውለዋል:: በዚህም ሰላማዊ ሰልፍ አንድነት ሀይል መሆኑ የታየበትና በጋራ የጋራ ጠላታችንን የዘር ማጽዳትና የመሬት ቅርምት ወንጀል በጋራ ያወገዝንበት በመሆን በድል ተጠናቋል::

ኢትዮጵያ ለዘላለም ትኑሩ አንድነት ሀይል ነው

The post ኢትዮጵያውያን በኖርዌይ ትሩንዳሄም ከተማ ሰላማዊ ሰልፍ አደረጉ appeared first on Zehabesha Amharic.

እኛ ለኛ ሕዝባዊ መድረክ!

ቀኑ፡ እሁድ የካቲት 6፤ 2008ዓም/February 14, 2016

ሰዓቱ፡ 1:00 – 5:00 PM

ቦታ፡ Sheraton Silver Spring Hotel 

8777 Georgia Ave,

       Silver Spring, MD 20910 

ለአዲሲቷ ኢትዮጵያ የጋራ ንቅናቄ (አኢጋን) እሁድ የካቲት 6፤ 2008ዓ.ም./ February 14, 2016 ከ1:00 – 5:00 PM በሚያደርገው የእኛ ለእኛ ሕዝባዊ ውይይት ላይ እንዲገኙ ጥሪውን ያስተላልፋል፡፡

ዋናው የትኩረት ሃሳብ በአገራችን ላይ እየተፈጸመ ያለውን ኢፍትሃዊነት፣ ግፍ፣ እስር፣ ግድያ፣ እንዲሁም የአየር መዛባትና አስተዳደራዊ ብልሹነትን ተከትሎ የተከሰተው ችጋር፤ በሌላ በኩል ደግሞ እየጨመረ የመጣውን ሕዝባዊ ዓመጽ ወዴት አቅጣጫ ሊወስደን ይችላል? የሚል ሲሆን ከዚህ አንጻር በሚቀጥሉት ሳምንታት፣ ወራት፣ … የሚከሰተው ነገር የኢትዮጵያን የወደፊት ዕድል የሚወስን በመሆኑ አኢጋን የሚያበረክተውን የበኩሉን ድርሻ በተለመከተ ይሆናል፡፡

በሕዝባዊ ስብሰባው ላይ የጋራ ንቅናቄው ከተለያዩ ኢትዮጵያውያን ያሰባሰበውን በማቀናጀት በቀጣይ ጉዳዮች ላይ ያለውን ራዕይ ያቀርባል፡፡ በአገራችን ላይ የተንሰራፋው መጠነ ሰፊና ውስብስብ ችግር ሁላችንንም የሚያሳስብ ነው፤ ከቅርብ ጊዜ ወዲህ ደግሞ በተለይ ችግሩ እየበረታና ጭከናው እየጨመረ መምጣቱ ፈጽሞ ኢሰብዓዊ ብቻ ሳይሆን በጭራሽ የማንቀበለውም ነው፡፡ ከዚህ ባሻገር ከውስጥና ከውጭ እየተባባሰ የመጣው ሕዝባዊ ተቃውሞ ስለ አገራችን መጻዒ ዕድል በጥልቅ እንድናስብ የሚያደርገን መሆን ይገባዋል በማለት አኢጋን ያምናል፡፡ ከዚህ አንጻር እርስበርሳችን ገንቢ የሆነ ውይይት መጀመርና ሃሳብ በመለዋወጥ በአገራችን እንዲሰፍን የምንፈልገውን ሰላም፣ ፍትሕ፣ ነጻነት፣ ዕርቅና ብልጽግና ካሁኑ መሠረቱን መጣል ይገባናል፡፡

በተለያዩ የመገናኛ ብዙሃን ሲነገር እንደምንሰማው ኢትዮጵያውያን ለትግሉ መተባበር፣ አንድነት መፍጥር፣ … አለባቸው የሚለው ብዙዎች የሚጋሩት ሃሳብ ቢሆንም በተግባር መተርጎም ግን ቀላል ሥራ ሲሆን አልታየም፡፡ ከሁለት ዓስርተ ዓመታት በላይ የዘለቀው የህወሃት/ኢህአዴግ የግፍ አገዛዝ እንዳለ ሆኖ ከዚሁ ጋር ተያይዞ በራሳችን ላይ የከመርነው የዘር መለያየት፣ ያለፉ በደሎችን እያነሱ መወቃቀስ፣ በመሪዎችና በቡድኖች መካከል ያለው የፖለቲካ አስተሳሰብ ልዩነትና ቁርሾ፣ የእኔ በላይነት ችግር፣ አለመደማመጥ፣ ወዘተ ፖለቲካዊ መፍትሔ የሚገኝለት ነው ብሎ የጋራ ንቅናቄው አያምንም፡፡ ነገር ግን ሁሉንም ያቀፈ የእኛ ለእኛ በእኛ የሆነ የእርስበርስ ውይይትና ንግግር በከፍተኛ ሁኔታ ገዝፎ በመውጣት በድርጅቶች መካከል ያለውን ክፍተት አጥብቦ ወደ ትብብር ማምጣት እንዳለበት አኢጋን ያምናል፡፡

ክሽፈትን ለመከላከል እና ለአገራችን አዎንታዊ የሆነ ውጤት ለማምጣት ከመካከላችን የተሸረሸረውን መተማመን እንደገና እንዲያሰራራ ማድረግ ያስፈልገናል፡፡ ለመተማመን ደግሞ መነጋገር የግድ ነው፡፡ አዎንታዊ ለውጥ ለማምጣት የተፈጠረው አጋጣሚ ሊያመልጠን አይገባም፤ የዚያኑ ያህልም የህወሃት/ኢህአዴግን ዓይነት የዘር ፖለቲካ በሌላ መልኩ የምንቀጥል ከመሆን ከፍተኛ ጥንቃቄ መውሰድ ይገባናል፡፡ ስለዚህ የመጀመሪያው እርምጃ ስለሌሎች ማውራት ሳይሆን እርስበርስ መነጋገር ሲሆን በቀጣይ ከሁሉም ባለጉዳዮች ጋር ውይይት የሚደረግበት ምቹ ሁኔታ ይፈጥራል ብለን እናምናለን፡፡

ኢትዮጵያ የሁላችንም ናት፤ ከዚህ አንጻር የጋራ በምንለው ላይ ወደ ስምምነት መምጣት የሁላችንም ተግዳሮት ነው፡፡ ይህ የጋራ የምንለው ግን ሁላችንንም የሚያስማማን የመነሻ ነጥብ ሊሆን ይችላል፡፡ ከዚህ በመነሳት ቀጣይ ጉዳዮች ምን መሆን እንዳለባቸው መመልከት እንችላለን፡፡

ከመቶ ሚሊዮን ኢትዮጵያውያን ጋር ለመነጋገር ጠረጴዛው ቢኖር እንኳን ተግባራዊ ማድረግ የሚቻል አይደለም፡፡ ነገር ግን የብዙሃንን ፍላጎት የሚወክሉ የተለያዩ ኢትዮጵያውያንን በአንድነት በመሰባሰብ እንደ መነሻ ነጥብ ሆነው የድርጊት መርሃግብር ሊነድፉ ይችላሉ፡፡ ከዘር ይልቅ ሰብዓዊነት የሚያስቀድሙ ወገኖች የሚያመጡት ይህ ዕቅድ የሁላችንም ነጻ መውጣት ከእያንዳንዳችን ነጻ መውጣት ጋር የተቆራኘ መሆኑን ቀዳሚው ሃሳባቸው በማድረግ ይሆናል፡፡

እሁድ ዕለት የታቀደው ስብሰባ ከመካሄዱ በፊት የጋራ ንቅናቄው ለሁለት ቀናት የተለያየ የኅብረተሰብ ክፍልን ከሚወክሉ ወገኖች ጋር በመሆን በድርጊት መርሃግብሩ ላይ ውይይት ያደርጋል፡፡ በዚህ ውይይት የሚነደፈው ዕቅድ የአገራችንን የወደፊት ሁኔታ ላይ ባተኮረ መልኩ ምን መደረግ እንዳለበት መሠረት የሚጥል ይሆናል፡፡

በማስከተልም በእሁዱ ስብሰባ ወቅት የተነደፈው ዕቅድ ለሕዝብ ውይይት ይፋ ሆኖ የአገራችንን መጻዒ ዕድል ከመቅረጽ አኳያ ሃሳብ የሚሰጥበትና በመጨረሻም የአቋም መግለጫ ሆኖ በተለያዩ ቋንቋዎች ይፋ የሚደረግ ይሆናል፡፡ ስለዚህ ይህ የብዙዎች ድምጽ መሆን እንዲችል የሚመለከታቸው ባለጉዳዮች ትችት መስጠት፣ ማሻሻል፣ … የሚችሉ ሲሆን ለዚህም ትብብራቸው በቅድሚያ ምስጋናችንን ልናቀርብ እንወዳለን፡፡

ለአዲሲቷ ኢትዮጵያ የጋራ ንቅናቄ ከተመሠረተበት ዋና መርህ አኳያ የምናከናውነው ተግባርና የምናወጣው ውሳኔ የየትኛውንም የፖለቲካ ድርጅት ወይም የዘር ክፍል የሚወክል አይሆንም፡፡ ሆኖም እነዚህ ከተለያየ የኅብረተሰብ ክፍል የምናውጣጣቸው ወገኖች የአገራችንን ጉዳይ በተመለከተ ተሰሚነት ሊኖራቸው የሚገባ የሕዝብ ድምጽ ይሆናሉ ብለን እናምናለን፡፡ ስለሆነም ትርጉም ያለው ተሃድሶ ለማምጣት፣ ለዕርቅና ለተግባራዊ ፍትሕ መስፈን እነዚህ ወገኖች ራሳቸውን ከሥልጣን ምኞት በመገደብ በቅድሚያ እርስበርሳችን እንድንነጋገር ከዚያም በአገራችን ጉዳይ ላይ የሚመለከታቸውን ባለጉዳዮችን በማቀራረብ የሚሠሩ ታማኞች ይሆናሉ፡፡

ከላይ እንዳልነው አገራችን ለሁላችንም ናት፤ ስለዚህ የወደፊቱ ትውልድ ከዘርና ከሌሎች ማናቸውም ነገሮች ይልቅ ለሰብዓዊነት ቅድሚያ የሚሰጥና በመልካም ጉርብትና የሚኖር መሆን ይገባዋል፡፡ ይህ ማለት ግን ማንነታችን፣ እምነታችንን፣ የፖለቲካ ፍላጎታችንና ዝንባሌያችንን፣ እንዲሁም የአካባቢ ፍላጎቶቻችንን እንተዋለን ማለት በጭራሽ አይደለም፡፡ እንደ ግለሰብ እና እንደ ማኅበረሰብ ለመኖር እነዚህ ልዩነቶች እጅግ ወሳኝና አስፈላጊም ናቸው፡፡ ከዚህ ይልቅ ግን እያንዳንዳችን በራስወዳድነት የራሳችንን የበላይነት ከመፈለግ ይልቅ ስለ ባልንጀራችን፣ ስለ ጎረቤታችን ግድ የሚለን እንሆናለን ማለት ነው፡፡ የሁሉም ዜጎች መሠረታዊ መብቶች መከበርና ነጻነት መጠበቅ የምንተጋ እንሆናን ማለት ነው፡፡

ስለዚህ ለዚህ የተቀደሰ ዓላማ እርስዎም የሚተባበሩና ሁላችንም አገራችን ለተጋፈጠቻቸው ችግሮች መፍትሔ ለማምጣት የምንረባረብ እንሆናለን ብለን ተስፋ እናደርጋለን፡፡

ለአንድ ቡድን ወይም ለአንድ ዘር ብቻ ሳይሆን ለሁሉም የሚሆን ዘላቂ መፍትሔ ለማምጣት እንድንችል ፈጣሪ ሁላችንንም ይርዳን፡፡

የእኛ ለሆነ ችግር የመፍትሔ ባለቤቶች እኛው ነን!

ለተጨማሪ መረጃ አቶ ኦባንግ ሜቶን ያነጋግሩ፡

ስልክ፡ (202) 725-1616

ኢሜይል፡ obang@solidaritymovement.org

www.solidaritymovement.org

The post በዋሽንግተን ዲሲ እና አካባቢዋ ለምትገኙ ኢትዮጵያውያን እና የኢትዮጵያ ወዳጆች ጥሪ appeared first on Zehabesha Amharic.

የቀዳሚ ሳይንቲስት ዶ/ር መኰንን ፈቃዱ ዕረፍት (1923 – 2008)

By ሔኖክ ያሬድ

የጤና ዘርፍ በተለይ በክትባትና እንስሳት ሕክምና በእብድ ውሻ በሽታ ሥርጭትና የመተላለፊያ መንገዶች ላይ ሳይንሳዊ ምርምሮችን በመሥራት ታዋቂ የነበሩት ቀዳሚ (ሲኒየር) ሳይንቲስት ዶ/ር መኰንን ፈቃዱ ባይሩ ከዚህ ዓለም በሞት ተለዩ፡፡
የእብድ ውሻ በሽታን ለመከላከልና ለመቆጣጠር በደቡብና ምሥራቅ አፍሪካ የባለሙያዎች ኔትወርክ ከመሠረቱት ሳይንቲስቶች አንዱ የነበሩት ዶ/ር መኰንን የኢትዮጵያ የእንስሳት ሐኪሞች ማኅበርም መሥራች አባል ነበሩ፡፡
ከግማሽ ምእት ዓመት በላይ በአገር ውስጥና በባሕር ማዶ ከፍተኛ አገልግሎት የሰጡት በአሜሪካ ሲዲሲ (የበሽታ መቆጣጠሪያ ማዕከል) አትላንታ በቀዳሚ (ሲኒየር) ሳይንቲስትነት ሲያገለግሉ የቆዩት ዶ/ር መኰንን፣ በቀዳማዊ ኃይለ ሥላሴ ዩኒቨርሲቲ (የአሁኑ አዲስ አበባ ዩኒቨርሲቲ) አዲስ በተቋቋመው የሕክምና ፋኩሊቲ ተባባሪ ፕሮፌሰር፣ በንጉሠ ነገሥት መንግሥቱ የዋናው ላቦራቶሪና የጥናት ድርጅት (ቀድሞ ፓስተር ኢኒስቲትዩት ይባል በነበረው) ከ1957 ዓ.ም. ጀምሮ በክትባትና እንስሳት ክፍል ኃላፊነት እስከ ኅዳር 1966 ዓ.ም. ካገለገሉ በኋላ ከሁለት ዓመት በላይ ተጠባባቂ ዳይሬክተር ሆነው ማገልገላቸው ገጸ ታሪካቸው ያመለክታል፡፡
የኢትዮጵያ የኅብረተሰብ ጤና ኢንስቲትዩት ለሪፖርተር በላከው መግለጫ ዶ/ር መኰንን፣ ከ1957 ዓ.ም እስከ 1968 ዓ.ም በቀድሞው የዋናው ላቦራቶሪና የጥናት ድርጅት በቆዩባቸው ዘመናት በተለይም በኢንስቲትዩቱ የእንስሳት ምርመራና ሕክምና አገልግሎት አሰጣጥ በተደራጀና በተጠናከረ መንገድ እንዲዋቀር በማድረግ ከአዲስ አበባና ከየክልሉ ለሚቀርቡ የእብድ ውሻ በሽታ የሕክምና አገልግሎት ጥያቄዎች ተገቢውን አገልግሎት በመስጠት የመጀመሪያው ኢትዮጵያዊ ነበሩ፡፡ ከዓለም የጤና ድርጅት የእንስሳት ህክምና ኤክስፐርት ባለሙያዎች ጋርም በቅርብ በመሥራት በአገራችን በወቅቱ የሚመረተው ለሰውና ለእንስሳት የሚውለው ክትባት ደረጃውን የጠበቀ እንዲሆን ብርቱ ጥረት አድርገዋል፡፡
ከዚያም በወቅቱ በተፈጠረው የፖለቲካ ለውጥ ምክንያት ወደ ውጪ አገር ቤተሰቦቻቸውን ይዘው በመሄድ አሜሪካ በሚገኘው ሲዲሲ አትላንታ በሙያቸው ተቀጥረው በቀዳሚ ሳይንቲስትነት ሲያገለግሉ ቆይተዋል፡፡ ከደርግ መንግሥት መውደቅ በኋላ በሲዲሲ አትላንታና በኢትዮጵያ መንግሥት መካከል በጤናው ዘርፍ ልማት ለተጀመረው ሁሉ አቀፍ ትብብር ከፍተኛ አስተዋጽኦ አድርገዋል፡፡
ዶ/ር መኰንን ፈቃዱ ከሲዲሲ አትላንታ በትውስት ወደ ኢትዮጵያ የጤናና ሥነ- ምግብ ምርምር ኢንስቲትዩት ተዛውረው ቀደም ሲል ያካበቱትን እውቀትና ልምድ ለኢንስቲትዩቱ ባለሙዎች ከማካፈላቸውም በላይ በተለይ በኢንስቲትዩታችንና በሲዲሲ አትላንታ መካከል የሁለትዮሽ የምርምርና የላቦራቶሪ አቅም ግንባታ ተግባራት በጥልቀትና በስፋት እንዲከናወኑ በማቀራረብና በማስተባበር እጅግ ከፍተኛ ሚና ተጫውተዋል፡፡ ዶ/ር መኰንን ከኢንስቲትዩቱና የዘርፉ ባለሙያዎች ጋር በመሆን በእብድ ውሻ በሽታ ስርጭትና የመተላለፊያ መንገዶች ላይ የተለያዩ ሳይንሳዊ ምርምሮችን መሥራታቸውን እነርሱም፡- ውሾች ቫይረሱን ለብዙ ጊዜያት ሳያማቸው ከቫይረሱ ጋር ተሸክመው በመኖር ወደ ሌላ ጤናማ እንስሳ ወይም ሰው ማስተላለፍና በውሾች መካከል ሊኖር ስለሚችለው የበሽታው ስርጭትና ዝውውር አጥንተው በዓለም አቀፍ ጆርናሎች ላይ አሳትመዋል፡፡ የእብድ ውሻ በሽታ አምጪ ቫይረስ በውሾች የምራቅ እጢ ውስጥ ስለመኖሩና በሽታው በአበደ እንስሳ ምራቅ መተላለፍ ስለመቻሉ ባደረጉት ሙከራ በበሽታው ከሞቱት 17 ውሾች በዘጠኙ የምራቅ እጢ ውስጥ ቫይረሱ መገኘቱን በጥናት አረጋግጠዋል፡፡
ይሁን እንጂ እ.አ.አ. በ1990ዎቹ ዶ/ር መኰንን ፈቃዱ ባደረጉት ጥናት አንድ በዚህ በሽታ የታመሙ እናት ለሕክምና አገልግሎት ወደ ኢንስቲትዩቱ በመጡ ጊዜ ዶ/ር መኰንን ባደረጉት የሕክምና ክትትል ጥናት መሰረት የእናቷን ጡት ስትጠባ የነበረች ታማሚ ሕፃን የእናቷን ጡት በመንከስ በሽታውን ማስተላለፍ እንደቻለች የሚገልጽ ጥናታዊ ሪፖርት ከኢትዮጵያ ለመጀመሪያ ጊዜ ለዓለም ያበረከቱ ሳይንቲስት እንደነበሩ ተቋሙ ገልጿል፡፡
ከእናታቸው ከወ/ሮ ብዙነሽ ገብረማሪያም እና ከአባታቸው ከአቶ ፈቃዱ ባይሩ ሰኔ 23 ቀን 1923 ዓ.ም. በቀድሞው ትግራይ ጠቅላይ ግዛት መቀለ ከተማ የተወለዱት ዶ/ር መኰንን መቐለ ከተማ በሚገኘው አፄ ዮሐንስ 4ኛ ትምህርት ቤት ገብተው የመጀመሪያና ሁለተኛ ደረጃ ትምህርታቸውን ተከታትለዋል፡፡ ከዚያም በአዲስ አበባ መምህራን ትምህርት ቤት ገብተው በመምህርነት ተመርቀዋል፡፡
ከ1942 ዓ.ም መስከረም 1 ቀን ጀምሮ ለአራት አመታት በመምህርነት ካገለገሉ በኋላ ለከፍተኛ ትምህርት ወደ ውጪ አገር ሄደዋል፡፡ ከዚያም ከ1946 እስከ 1956 ዓ.ም. ባሉት ጊዜያት ኮፐንሀገን ከሚገኘው ሮያል ቬተሪነሪና እርሻ ዩኒቨርስቲ ቢ.ኤስ.ሲ፣ በዚሁ ዩኒቨርሲቲ ዲ.ቪ.ኤም (D.V.M)፣ እንዲሁም በቬተረነሪና እርሻ ዩኒቨርስቲና ስታትራንስ ሴሩም ኢንስቲትዩት የዶክትሬት ዲግሬአቸውን አግኝተዋል፡፡ ሁለተኛውን የዶክትሬት ዲግሪያቸውን ከስዊድን በቫዮሮሎጂ (Virology) እና ዙኖሲስ (Zoonosis) አግኝተዋል፡፡
ታኅሣሥ 25 ቀን 2008 ዓ.ም. በአሜሪካ ያረፉት ዶ/ር መኰንን ሥርዓተ ቀብራቸው ጥር 14 ቀን 2008 ዓ.ም. በመቐለ ከተማ ደብረ ገነት መድኃኔ ዓለም ቤተክርስቲያን ተፈጽሟል፡፡
ዶ/ር መኰንን ፈቃዱ ባለትዳር፣ የሦስት ልጆች አባትና የሁለት ልጆች አያት ነበሩ፡፡
Source: ሔኖክ ያሬድ’s blog

The post በእብድ ውሻ በሽታ ላይ የመጀመሪያው ተመራማሪ የነበሩት ሳይንቲስት ዶ/ር መኰንን ፈቃዱ ባይሩ አረፉ appeared first on Zehabesha Amharic.

በኮሜዲ ሥራዎቹ ይታወቃል:: በተለይ የትያትር አድናቂዎች ሜዳሊያ በተሰኘው ትያትሩ እምባቸው እስኪወርድ ስቀዋል:: አርቲስት ፈቃዱ ከበደ:: ይህ ተወዳጅ አርቲስት በተለያዩ ትያትርዎች እና ፊልሞች ላይ ተውኗል:: አብዛኛውን ጊዜ የኮሜዲ ነክ ሥራዎችን ስለሚሰራም በሌሎች የድራማ ዘርፎች ላይ ቢሰማራ እንኳ ሰዎች መሳቃቸው አይቀርም::

ይህ ተወዳጅ አርቲስት ዛሬ በአዲስ አበባ ከ እጮኛው ወይዘሪት ሄለን ጋር የጋብቻ ስነ ስርዓቱን ፈጽሟል:: በሰርጉ ላይ ሚዜዎቹ ሆነው ያጀቡት ተወዳጅ አርቲስቶች ሰለሞን ቦጋለ; ሳምሶን ቤቢ; ይገረም ደጀኔ አስቴርና ዳንኤል ተገኝ መሆናቸውም ጨምሮ የደረሰን መረጃ ያመለክታል::

The post አርቲስት ፍቃዱ ከበደ ተሞሸረ appeared first on Zehabesha Amharic.

አዜብ ጌታቸው

አቅም በፈቀደ መጠን በየጊዜው በሃገራችን ወቅታዊ ሁነቶችና ክስተቶች ዙሪያ የተሰማኝን ለመግለጽ ስሞክር ቆይቻለሁ።ታዲያ በእያንዳንዱ ጽሁፍ ላይ በርካታ አስተያየቶች ይደርሱኛል።አብዛኞቹ አበረታች፤ ጥቂቶቹም አርበትባች። አርበትባች ስል ማስፈራራት መሞከራቸውን ለመግለጽ ያህል እንጂ ተርበተበትኩ ማለቴ እንዳልሆነ ይጠፋችኋል አልልም። “እንኳን ለሙቅ ለገንፎ አልደነግጥ አሉ…”። መዳፋቸው ውስጥ ሆና ያርበተበታቻቸውን የርዕዮት ዓለሙን ገድልና ጀግንነት እያየሁ ! እየሰማሁ! እኔ ከ4 ኪሎ ቤተ መንግስት (ቤተ መጥምጥ) በስንት ሺህ ማይልስ ርቀት ላይ ሆኜ እንዴት ልርበተበት? ያውም በኤሜል? እ ተ ተ ተ ተ…. !

አደራ! ራሴን ከርዕዮት ጋር ማመሳሰሌ መስሏችሁ ወዴት ጠጋ ጠጋ..? እንዳትሉኝ። በፍጹም! ደግሞስ እንዴት ልንመሳሰል እንችላለን? እኔ በሪሞት የምቧጥጥ እሷ ገዳዮቹን በአካል የምትጋፈጥ፡፡

የዛሬው ጽሁፌ በምን ላይ እንደሚያጠነጥን ፍንጭ ያገኛችሁ ይመስለኛል። አዎ! የዛሬው ትኩረቴ በዚኽቺው ጀግና እንስት ገድል ላይ ነው ።

በርግጥ ርዕዮት እጇ በወያኔ አፋኞች ከተያዘበት ግዜ ጀምሮ ያሳለፈቺውን ስቃይና ታሳይ የነበረውን ጽናት እንደማንኛውም ኢትዮጵያዊ ላለፉት 4 -5 አመታት ስከታተል በመቆይቴ ለሷ ያለኝ ክብርና አድናቆት የቆየ ነው።ይሁንና በውስጤ የገዘፈውን አድናቆትና ክብር አውጥቼ ለመግለጽ የተነሳሳሁት ግን ሰሞኑን በኢሳት ከሲሳይ አጌና (በርባሪው ጋዜጠኛ) ጋር ያደረገቺውን በሁለት ክፍል የቀረበ ቃለ መጠይቅ ካደመጥኩ በኋላ ነው።

ከሁሉ አስቀድሜ ግን የአተራረክ ብቃቷ እጅግ እጅግ በጣም እንዳስደነቀኝ ሳልገልጽ አላልፍም። ድሮስ መምህርነትና ጋዜጠኝነትን መሰል ሙያ አጣምራ ይዛ… እንደምትሉ እገምታለሁ። ጋዜጠኛ ሲሳይ እስከዛሬ ካነጋገራቸው እንግዶች ሁሉ ስራውን ያቀለለችለት እንግዳ ርዕዮት ነች ብል፤ አጋነንሽ ወይም የጾታ አድሎ ነው እንደማልባል ተስፋ አደርጋለሁ። ወደ ዓብይ ጉዳዪ ልመለስ።

በተለምዶ የጀግና ባህሪ፤ ብዙ የማይፈክር ወይም ብዙ የማይናገር፤ አዘኔታን ወይም ምህረትን ከማንም የማይጠብቅ፤ የተበደልኩ ሮሮ የማያበዛ ነው ይባላል፡፡ አባባሉ እውነት አለው ።ከርዕዮት ቃለ መጠይቅም የተረዳሁት ይህንኑ ነው።

አስተውላችሁ ከሆነ ርዕዮት ባደርገቺው ከሁለት ሰአታት በላይ በዘለቀው ቃለ-መጠይቅ ውስጥ ከአራት አመታት በላይ የቆየችበትን ስቃይ፤ የተፈጸመባትን ግፍና በደል… ቁብ ሳትሰጥ የፍትህ ስርዓቱን ዝቅጠት በሚያሳይ መልኩ ብቻ ነበር የምትተርከው። ጀግና ሮሮ አያበዛም። ጀግና እንባውን በወኔው እንጂ የሚያብስው ፤ በደሉን በገድሉ እንጂ የሚረሳው፤ ማንም በአዘኔታ ከንፈሩን እንዲመጥለት አይሻም።

ጀግና ነጻነቱን ከጠላቱ እጅ ፍልቅቆ እንጂ የሚወስዳት በምህረት አይቀበላትም። ርዕዮትም ነጻነቷን በምህረት ሳይሆን አፍንጫቸውን ሰንጋ ከእጃቸው ፈልቅቃ ወሰደች። ለ24 አመታት የቆየውን የወያኔ እስር ቤት “የሰጥቶ መቀበል” (ይቅርታ ተቀብሎ ምህረት መስጠት) ስልት በጽናት አመከነች።

ጀግና በራሱ እንዲደርስ የማይሻውን በሰው ላይ አይፈጽምም፡፡ ርዕዮትም በንጹሃን ሰዎች ላይ መስክረሽ ነጻ እንልቀቅሽ ስትባል፤ “የለም በንጹሃን ላይ መስክሬ ነጻ ከምወጣ እኔኑ ክሰሱኝ” ብላ ጸናች።

በዋናነት ጀግና ፍርሃት አያውቅም። አዎ! አፋኞቹ የፈጠራ ክሱን ለማዘጋጀት ግንቦት 7 እንበለሽ? ኦነግ እንበልሽ? በሚል ላቀረቡላት የፌዝ ጥያቄ ርዕዮት የሰጠቺው መልስ፤ “የፈለጋችሁትን በሉኝ ብቻ ኢ.ህ.አ.ዴ.ግ  አትበሉኝ!” የሚል አፈር ያስገባቸውን መልስ ነበር።

ውድ አንባቢያን እስኪ ንባቡን ለደቂቃ ቆም አድርጉና ይህን አስቡ፡..

ገለው እንኳ ጭካኔያቸው አላረካ ሲላቸው ሬሳውን  በሰደፍ የሚደበድቡ አረመኔዎች እጅ ገብታ በእንዲህ አይነት ድፍረት ምላሽ የሰጠችን ነፍስ በህሊናችሁ አስቡና ራሳችሁን በሷ ጫማ ከታችሁ ተመልከቱ! ታደርጉታላችሁ? አዎ! ርዕዮትን ልዩ ጀግና የሚያደርጋት ይኽው ነው። ልዩ የጭካኔ አቅም ያላቸውን ጠላቶቿን መጋፈጧ። ብሎም ማንበርከኳ!

እዚህ ላይ አንድ ሌላ ነገር ታወሰኝ፦

በ1997 ምርጫ ማግስት ማለትም በግንቦት 7 ምስረታ ዋዜማ፤ አቶ አንዳርጋቸው ጽጌ አንድ አወያይ ጽሁፍ አቅርበው ነበር፡፡ ጽሁፉ ያለፈውን የሰላማዊ ትግል ሂደትና ውጤት የገመገመና መጪው የትግል አቅጣጫ ምን መሆን እንዳለበት ያመላከተ እንደነበር አስታውሳለሁ። የአቶ አንዳርጋቸው ጽሁፍ ወያኔ ሰላማዊ  የሚባል ነገር የማይገባው መሆኑን አሳይተው፤ በቀጣይ አመጽንም የሚያካትት ሁለገብ የትግል ስልትን መከተል እንደሚገባ አስረግጠው ያስገነዘቡበት ነበር።

በዚያ ወቅት ታዲያ “ሰላማዊ ትግሉ መቼ ተነካና ?” የሚሉ ወገኖች የአቶ አንዳርጋቸውን ሃሳብ በጽኑ ተቃወሙ። መች ተነካና ያሉትን የሰላማዊ ትግል አይነት እየዘረዘሩ አቀረቡ፤ ጋንዲንም ማርቲን ሉተር ኪንግንም ከመቃብር ቤት ለምስክርነት ጠሩ። ዳግም ወደ ጦርነት አንገባም ፤ በሰላማዊ ትግል ቆርበናል ያሉ ሁሉ አቧራውን አጨሱት።

አቶ አንዳርጋቸው “ሰላማዊ ትግሉ መቼ ተነካና ?” በሚል የተነሳባቸውን ተቃውሞ አስመልክቶ በዛው ሰሞን ባደረጉት ቃለ ምልልስ የሰጡት ምላሽ ታዲያ መቼም የምረሳው አይደለም፡፤

አቶ አንዳርጋቸው የሰጡት መልስ፦  የጋንዲንና የማርቲን ሉተር ኪንግን የትግል ተመክሮ እየጠቀሱ ሰላማዊው ትግል መቼ ተነካና የሚሉ ወገኖች አንድ የሳቱት ነገር አለ። የጋንዲም ሆነ የማርቲን ጠላቶች የሰለጠኑ ጠላቶች ነበሩ፡፤ ጋንዲ የረሃብ አድማ ሲያደርግ እንዳይሞትባቸው የሚጨነቁ፤ ከውሃ ጋር ፈሳሽ ምግብ(ግሉኮስ) ደብቀው እየሰጡ ህይወቱን ለማትረፍ ይሞክሩ የነበሩ ናቸው። የኛ ጠላት ወያኔ ግን የሰለጠነ ጠላት አይደለም። ሁሉንም ጥያቄ በጠመንጃ አፈሙዝ ለመመለስ የቆረጠ፤ ባህሪውም ፍጥረቱም ሰላማዊ መንገድ እንዲከተል የማይፈቅድለት ጠላት ነው። ስለዚህ የኛም ቀጣዩ የትግል ስልት መነደፍ ያለበት ከወያኔ ድርጅታዊ ባህሪና ተፈጥሮ በመነሳት እንጂ ከነጋንዲ ተመክሮና ታሪክ አይደለም፡፡ የሚል መልስ ነበር የሰጡት (ቃል በቃል ሳይሆን ፍሬ ሃሳቡን  በራሴው መንገድ ነው የገለጽኩት) ከአስራ ሃንድ አመት በፊት “ሰላማዊ ትግሉ መች ተነካና ?” በሚል የሰላማዊ ትግል ስልትን ጥራዝ እየገለጡ አቶ አንዳርጋቸውን ሲሞግቱ የነበሩ ወገኖች ዛሬ ላይ ቆመው ሲያስቡት የአቶ አንዳርጋቸው አርቆ አስተዋይነት ሊታያቸው ግድ ይላል።

አሁንም ወደ ተነሳሁበት ልመለስ፦ የአቶ አንዳርጋቸውን ምላሽ እዚህ ላይ መጠቀስ ያስፈለገኝ ፤ የዛሬዋ ተዘካሪ ጀግና የርዕዮት አለሙ ገድል ከወርቅ ጸዳል ፈክቶ እንዲታይ ግድ የሚለው፤ ካልሰለጠኑ ጠላቶች ጋር ታግላ በማሸነፏ መሆኑን ለማሳየት ነው። ጨካኝ ጠላትን ለመታገል ብርቱ ጽናት ያስፈልጋል።ለማሸነፍ ደግሞ ጀግንነት።

አዎ! ወያኔ ፈሪ ነው! ፈሪ ደግሞ ፎካሪና ጨካኝ ነው።

የፈሪ ነገር ሲነሳ ባለ ራዕይው መሪ ፈሪ እንደነበሩ አብሮ አደግ ጓዶቻቸው ያጋለጧቸው ነገር ትዝ አለኝ፡፤ ይቅርታ ነፍሳቸውን ይማርና ማለት ነበረብኝ ለካ? (ዳሩ የላይኛው ጌታ እንደሳቸው የይቅርታ ፎርም አስሞልቶ አይደል ምህረት የሚሰጠው። በስራ ሚዛን እንጂ፡ .. እንደስራቸው! ..ማለቱ ይሻላል ) እናም የባለ ራዕይው መሪ ፍርሃት ወደር አልነበረውም አሉ። ፈሪ ፎካሪ አይደል፤ ሲፎክሩም አቻ የላቸውም። ባጠቃላይ ተፈጥሯቸው፦

የሞተ ባገኝ እሱን አያርገኝ!
የቆመ ሳገኝ ፈሴም አይገኝ! አይነት ነበር አሉ አብሮ አደጎቻቸው።

ፈሪ ባይኖር ኖሮ ጀግና አይኖርም ነበር። ፍርሃት የሚባል ነገር ባይኖር ጀግንነትም ትርጉም ባልኖረው ነበር፡፤ ለዚህ ነው
የርዕዮትን ገድል እያወራሁ ድንገት ወደ ባለ ራዕይው ማንነት የገባሁት።ለንፅፅር ።

ፈሪውን እዚህ ላይ ላውርደውና ወደ ጀግናዋ ልመለስ። ጀግና ሲወደስ ደስ ደስ ይላል። ርዕዮት በእሳት የተፈተነች ወርቅ ነች።

ከሃገር ቤት በብዙ ሺህ ማይልስ ርቆ በውጭው አለም እየኖረ የወያኔን መንግስት ለመቃወም በሚጠራ ሰልፍ ላይ ሰፌድ የሚያህል ባርኔጣና ጥቁር መነጽር ደንቅሮ አዩኝ አላዩኝ እያለ በፍርሃት የሚርደውን ዜጋ ስናስብ የርዕዮት ገድል ገዝፎ ሊታየን ግድ ይላል።

ለኩርማን መሬት ብሎ የወገኑን ስቃይ አይቶ እንዳላየ በሚያልፈው ስግብግብ ኢትዮጵያዊ ተብዬ ተግባር የሚያዝነው  ህዝባችን በርዕዮት መሰል ጀግኖች መስዋእትነት ይጽናናል።

በርዕዮት ጀግንነት የተደመሙ! ወገኖች የዘመናችን ጣይቱ ሲሉ አድናቆታቸውን ገልጸውላታል፡፤ ይገባታል! ጣይቱ ባህር ተሻግሮ የመጣን ፋሽሽት አሳፍራ መለሰች። ርዕዮት ደግሞ ወንዝ አፈራሹን ፋሽሽት ብቻዋን! አንበረከከች።

በነገራችን ላይ በታሪክ ጎልቶ የሚጠቀሰው የእቴጌ ጣይቱ ጀግንነት ይሁን እንጂ በተለያዩ የታሪክ ድርሳናት ውስጥ ሳጋ እየገቡ የተጠቀሱ ሌሎችም በርካታ ጀግና እናቶች ነበሩ። ክተት ሰራዊት ምታ ነጋሪት ተብሎ ጦርነት ሲታወጅ፤ ለሰራዊቱ ስንቅ የማዘጋጀቱ ኃላፊነት መሉ ለሙሉ የእናቶች ነበር።

ደረቅ ስንቅ ከማዘጋጀት ባሻገር አብረው ዘምተው ከተዋጊው ኋላ እንጀራ እየጋገሩ ወጥ እየሰሩ ሰራዊቱን ይመግቡ ነበር። ይህ ብቻም አይደለም። እናቶቻችን በውጊያ ወቅት ፈርቶ የሚያፈገፍግ ወታደር ሲመለከቱ መቀነታቸውን እየፈቱ “እንካ መቀኔቴን – ዝናርክን ፍታና ለኔ ስጠኝ” በማለት እየገሰጹ ፊቱን ወደ ጠላት አዙሮ በወኔ እንዲዋጋ ያበረታቱ እንደነበርም ተጽፏል፡፡

ንጉስ ክተት ሰራዊት ብሎ ጦርነት ሲያውጅ እያንዳንዱ ለአቅመ አዳም የደረሰ ሰው በራሱ ስንቅና ትጥቅ ለዘመቻ ይዘጋጃል። አልጋ የያዘ በሽተኛ ካልሆነ በስተቀር ከንጉስ ሰራዊት ተነጥሎ የሚቀር ሰው፤ እንደ ሰው አይቆጠርም።ሚስቱም ባል አታደርገውም።ወንዶች የዋሉበት ያልዋለ ባል ለሚስቱ ማፈሪያ ነው። አባትም ከሆነ ለልጆቹ መሰደቢያ ነው።

ተወዳጁ የባህል ዘፈን አቀንቃኝ ባህሩ ቀኜ፡

ገዳይ ገዳይ ያልሽው ባልሽ ሰው አይገድል፤
አርሶ ያብላሽ እንጂ ሆድሽ እንዳይጎድል፤

ሲል በዜማ የቋጠራቸው ስንኞች ይህኑ የሚያሳዩ ናቸው። ህይወትን ከፍሎ ሃገርን ማቆየት የሰውነት መገለጫ ነበር ።  ዛሬ ደግሞ በተቃራኒው አገርን አሳልፎ ሰጥቶ(ችላ ብሎ) ህይወትን ማቆየት ተለመደ፡፡ የርዕዮት ጀግንነትም በበርሃ ውስጥ እንደ በቀለች ጽጌሬዳ ብርቅ የሚሆነውም ለዚህ ነው።

ውድ አንባቢያን ጽሁፌን ልቋጭ ነው፦ ከዚያ በፊት ግን ይህቺ መልዕክት ለርዕዮት አድርሼ እመለሳለሁ ታገሱኝ።

ውድ እህቴ ርዕዮት ሆይ! ከሁሉ አስቀድሜ ለአራት አመታት የተሸከምሺውን የመከራ ቀንበር ሰባብረሽ፤ እንኳን ከነክብርሽ ለነጻነት በቃሽ እላለሁ።

ውድ እህቴ ርዕዮት! በታሪክ ሲዘከር የሚኖር ጀግንነት ፈጽመሻል፡፡ የአርአያነትሽ ፋይዳም ግዙፍ ነው።

ጽናትሽ አንቺ ያሳለፍሺውን ስቃይ እያሳለፉ ላሉት የህሊና ዕስረኞች የመንፈስ ብርታት ነው።
ቁርጠኝነትሽ  ለህዝብ ነጻነት ለሚታገለው ወገን ጉልበት ነው።
መስዋዕትነትሽ  ለሆዳቸው አድረው ለሚልከሰከሱ ባንዶች የህሊና ቁስል ነው።
እንስትነትሽ በጓዳቸው ከትመው ሃገራቸውን ለረሱ እህቶቻችን ማነቃቂያ ደውል ነው።
ድልሽ የነጻነት ቀን መቅረቡን አመላካች ተስፋ ነው፡፡

ከሁሉም በላይ ደግሞ ከአራት አመታት ስቃይ በኋላም እረፍት ስታፈልጊ ብረት አንስተው ዘረኛውን መንግስት ለመጣል የተሰለፉ ወገኖችን መቀላቀልሽ በራሱ፤ በፍርሃትም ሆነ በለዘብተኝነት እጁን አጣጥፎ የተቀመጠውን ወገን “እንካ መቀኔቴን – ዝናርክን ፍታና ለኔ ስጠኝ” ብለሽ የገሰጽሽበት ድንቅ ተግባር ነውና ልትኮሪ ይገባሻል። ወኔ ቢሶቹ ለዝናር ባይታደሉም ቀበቶ አያጡምና “እንካ መቀኔቴን – ቀበቶህና ስጠኝ” ብለሽ ገስጭልን። ፈሪን መገሰጽ በጀግና ያምራል። ፈተናሽን በጽናት እንድትወጪ የደገፉሽ ወላጆችሽና ቤተሰቦችሽ በሙሉ ምስጋናና ክብር ይገባቸዋል።

ውድ አንባቢያን በጣም ይቅርታ! አቆየኋችሁ፡ የርዕዮት ገድል ብዙ ቦታ ውስጥ ከተተኝና ጽሁፌ ረዘመ። በትዕግስት አንብባችሁ እዚህች ድረስ ከደረሳችሁ፡፤ ምስጋናዬ ከፍ ያለ ነው፡፤ እንዲሁ ደግሞ ጊዜ በሚያፈራው ሌላ ጉዳይ የሚሰማኝን ጣጥፌ እስከምንገናኝ ሰላም ሁኑልኝ።

ኢትዮጵያ በክብር ለዘላለም ትኑር!

azebgeta@gmail.com

The post ርዕዮት ሆይ! ወኔ ቢሶቹን “እንካ መቀኔቴን – ቀበቶህና ስጠኝ” ብለሽ ገስጭልን!  appeared first on Zehabesha Amharic.

(ዘ-ሐበሻ) በሐዋሳ ከተማ እና አካባቢዋ በአንድ ቀን ውስጥ ሁለት ጊዜ የመሬት መንቀጥቀጥ መከሰቱ ተሰማ:: ዘ-ሐበሻ ከስፍራው ያነጋገረቻቸው ወገኖች እንደሚሉት ይህ የመሬት መንቀጥቀጥ በአንድ ቀን ውስጥ ለ3 ጊዜያት ነው የተከሰተው::

የመጀመሪያው የመሬት መንቀጥቀጥ ለሰከንዶች እንደቆየ የሚገልጹት እነዚሁ ዘ-ሐበሻ ያነጋገረቻቸው ወገኖች ሁለተኛው ግን በህንፃዎች እና በሰዎች ላይም ጉዳት አድርሷል::

ይህ ዜና ከተፃፈ በኋላም እንዲሁ ለ3ኛ ጊዜ የመሬት መንቀጥቀጡ እንደተከሰተና የህንፃ መስታወቶች መሰባበራቸውም ተሰምቷል::

በአዋሳ 4.1 ማግኒቲውድ የሚገመት የመሬት መንቀጥቀጥ የተከሰተባት ሐዋሳና አካባቢዋ በተለያዩ ፎቆች ላይ የሚኖሩ ወገኖች ቤታቸውን ጥለው ወደ ምድር ወርደዋል::

የአይን እማኞች ለዘ-ሐበሻ እንደገለጹት በአሁኑ ወቅት በሐዋሳ በተለያዩ ፎቆች ላይ የሚኖሩ ወገኖች ቤታቸውን ጥለው ወደ ምድር ወርደዋል::

እዚህ ዐሜሪካ በአላስካ ስቴትም ተመሳሳይ የመሬት መንቀጥቀጥ ዛሬ ጠዋት መከሰቱ ይታወሳል::  በአላስካ የተከሰተው የመሬት መንቀጥቀጥ 7.1 ማግኒቲውድ መሬት መንቀጥቀጥ ነው::

በኢትዮጵያ የሚገኙ መንግስታዊ ሚዲያዎች ሙዚቃ በማሰማት ላይ ሲሆኑ ስለዚህ መሬት መንቀጥቀጥና ሰዎች ማድረግ ስላለባቸው ጥንቃቄ አስተማሪ መረጃዎችን መልቀቅ ተስኗቸዋል::

The post በሐዋሳ የመሬት መንቀጥቀጥ ተከሰተ appeared first on Zehabesha Amharic.

ከመኳንንት ታዬ

ሰው ማንነቱን በራሱ ማስተዋል ሲቆጥበው ያለነጋሪ እንደሚያተርፍ አውን ነው።ማትረፉ በራሱ የንግዱ መልካም መሆንን አያመላክትም።አንዳንዴ ተፈላጊው ነገር ገበያ ላይ እንብዛም ባለመኖሩ ረባም አረባም የሚፈለገው ነገር እስካለ ብቻ ገዢም የሚገዛበት ሻጭም አንዲሸጥ እድል ይሰጠዋል።

ይህ የማትረፉ አለም ውጣ ውረድ ነው።ሰውም በማንነቱ እንዲሁ የሚሆንበት አጋጣሚ አለ።ትልቅ የሚባል ፤መልካም የሚባል ሃይማኖቱን አክባሪ የሚባል ፤ ብቻ እንደሁነቱ አሳሳቢነት ለስፍር የሚሞላ ማንነት አለው የምንለው ሰው ሲጠፋ ፤ይሻላል የሚባል ከማይሻሉት የተሻለ ይመረጣል።

ይህ ሁሉ ምርጫ ለሚሰጥ ወይም ላለው ነገር ነው ።ሃይማኖት ማለት ግን አንድ እና አንድ ነው። መሆን አለመሆን።ከዚህ ያለፈ ስሌትም ባለቤትነትም አይኖረውም።ብዙዎች ለስህተታቸው ማስታገሻ የሚያደርጉት የነሱን አላዋቂነት ሳይሆን ድሮ እያወቁ ቆይተው ዛሬ መርሳታቸውን ባለማስታውስ ነው ።

ይህቺን ደረሰኝ የምታክል ፅሁፍ እንድከትባት ያስቻለኝ በቅርቡ የተለየ የመዝሙር መሳሪያን በተመለከተ በስደት እገኛለሁ ከሚሉ አንድ አባት የተሰነዘረው ሃሰብ ነው።በርግጥ ከላይ ለማለት እንደሞከርኩት ሰው ችግር የሚገጥመው ከሃገሩ ሲሰደድ ሳይሆን ከማንነቱ ሲሰደድ ነው። ለዚህም እንደማስረጃ ከምንይዛቸው ነገሮች እንዲህ እንደ አሁኔው አይነት ነገሮችን ስናይ ለግምትም ለማለትም እንቸገራለን።አውነት ነው። ላያስደነግጠንም ላያሳስበንም ይችላል ። እንቅስቃሴውም አሁን አደለም ።አሁን ንግግር የሆነበት ምክንያት ሲደመር ስለሆነ ነው።ግን እኮ ኦርጋን ሌሎች ይጠቀማሉ ።ስለዚህ እኛም መጠቀም አለበን ነው የሚሉን አቡነ መልከፀዲቅ።

ደግ እሳቸው ተቀብለውታል ።ለማስረጃውም ሌሎችን ጠቅሰዋል።እንግዲህ ልፋ ያለው ….. ከሆነ ምን ይደረጋል። ግን እኮ ሌሎች እኛ ልንበላ ጨርሶ የማንችለውን አህያ እና ፈረስ እየበሉ ክርስቶስን የሚያመልኩ አሉ።ለዚህም ደግሞ እንደማስረጃ ሮሜ ም14 ከቁጥር፩-፬ ድረስ እንዲህ ተብሎአል።በእምነት የደከመውን ተቀበሉት በአሳቡም ላይ አትፍረዱ።

ሁሉን ይበላ ዘንድ እንደ ተፈቀደለት የሚያምን አለ፤ ደካማው ግን አትክልት ይበላል ይላል…”ይህ እንግዲህ በመፅሃፍ የተፈቀደ እና ያልተፈቀደ ፤የሚያፅይፍ የሚበላ እና የማያፀይፍ የሚበላ አለ።በመፅሃፍ እንደተናገረ። በዚህ አውነት ሌሎች ሃገር የሚገኙ ኦርቶዶክሳዊያን ከላይ የተጠቀሱትን ፈረስ ወይም ውሻ ወይም ለእኛ ለኢትዮጲያ ኦርቶዶክስ ተዋሃዶ አማኞች ለመብልም ለባህሪያችንም ያልተፈቀደ ነገር የሌላ ሃገር ኦርቶዶክሶች ስለ በሉ ይበላሉ ወይ ?አሁን ባሉበት ሁኔታ አብነት መሆን ከሆነ እንግዲህ ይብሉና ይኸው እኔ በላሁ ብለው ያሳዩንና ስላኦርጋኑ እናስብበት ።አለዚያ ብዙ የሚሰራ ስራ እያለ በኑፋቄ ስራ ላይ ተሰማርቶ”ባልበላውም ጭሬ ደፋዋለሁ እንዳለችው ዶሮ “የሚሆንበዎ ይመስለኛል ።

ለዚህም ነው ከሃገር ብቻ ሳይሆን ከማንነታችንም እየተሰደድን ይመስላል ለማለት ያስደፈረኝ ።ወደ መፅሃፍ ቅዱሳዊው መልስ ስንጓዝ በስህተትም በኦርጋን አመስግኑ የሚል አላየንም። ስለዚህ ከተሰበከልን ወንጌል ውጭ የሚሰብከንን መላአክትም ቢሆነ እንዳንቀበል መፅሃፍ ያዛልና አንቀበልም።

ይቆየን

The post (የአቡነ መልኬጼዲቅና የኦርጋኑ ጉዳይ) ባልበላውም ጭሬ ደፋዋለሁ አለች ዶሮ !! | ጥቂት ጥያቄ መልስኛ ስለ ኦርጋን appeared first on Zehabesha Amharic.

ህወሓት/ኢህአዴግ ላንድ አራተኛ ምእተ ዓመት በኢትዮጵያ ህዝብ ላይ ተደጋጋሚ የጅምላና የተናጠል ፋሽስታዊ ጭፍጨፋዎች እያካሄደ፣እያሰረ፣ እየደበደበ፣ የህዝባችንን ሰብኣዊ መብትና ነፃነት ረግጦ፤ በቋንቋ እየከፋፈለ፣ በሃይማኖት ጣልቃ እየገባ፣ የህዝብ ሃብት እየዘረፈና በሙስና ተዘፍቆ ህዝባችንን አፍኖ በመግዛት ላይ ይገኛል፡፡

“ህወሓት/ኢህአዴግ” የሚል መጠሪያ ስንጠቀም፣ ከህወሓት በስተቀር ሌሎቹ የኢህአዴግ አባል ድርጅቶች ከህወሓት ነፃ የሆነ ድርጅታዊ ህልውና ኖሯቸው እንደማያውቅ፤ ህወሓት ሌሎቹን ድርጅቶች የኢትዮጵያ ህዝብን ተቆጣጥሮ ለመግዛትና ለመበዝበዝ የጠፈጠፋቸው ድርጅቶች መሆናቸውን ለመግለፅ አስፈላጊ ስለሆነ ነው፡፡
ይህ የኢህአዴግ ኣባል ድርጅቶች በወታደራዊ የሃይል ልዩነት ላይ የተገነባ የይምሰል ጥምረት በስልጣን ክፍፍል ላይ የህወሓት የበላይነት አረጋግጧል፡፡ ህወሓት በሰራዊት፣ በደህንነት፣ በውጭ ጉዳይ፣ በኦርቶዶክስ ሃይማኖት የበላይነት ስልጣን፣ በመገናኛ ብዙሃን፣ በኢኮኖሚና በቻይና የኢትዮጵያ የአምባሳደርነት ቦታ ሳይቀር ያለ ማቋረጥ መቆጣጠሩ፣ ህወሓትን ባለ ርስት እንዲመስል አድርጎታል፡፡
በኢትዮጵያ ህዝብ ላይ ለሚፈፀሙ ግፎች የህወሓት ባለስልጣኖች እንደ ስልጣናቸው ከፍተኛ ተጠያቂነት አለባቸው፡፡ ይሁን እንጂ የሌሎቹ የኢህአዴግ ኣባል ድርጅቶች ባለስልጣኖችም ከመጠየቅ ሊድኑ አይችሉም፡፡
ህወሓት ባንድ በኩል የደርግ ኣገዛዝን ለማስወገድ ባስር ሺዎች የሚቆጠሩ የትግራይ ወጣቶች
ህይወታቸውን የሰዉበት ድርጅት ነው፡፡ በሌላ በኩል ደግሞ ህወሓት ሲመሰረት ጀምሮ የተቆጣጠሩት ግለሰቦች ፀረ ኢትዮጵያ ስለሆኑ ሌሎች አባላትን አግልለው የድርጅቱ ዓላማ የትግራይ ሬፐብሊክ መመስረት እንደሆነ በማኒፌስቶ ገልፀው ነበር፡፡ እነዚህ ግለ ሰቦች የመገንጠል ዓላማቸው ለመተው ቢገደዱም በኢትዮጵያ ደረጃ ስልጣን ከያዙ በሁዋላም በሉአላዊነትና በኢትዮጵያ ህዝብ አንድነት ጥያቄዎች ላይ የማይታመኑ መሆናቸውን ደጋግመው አሳይተዋል፡፡ በዚህ መሰረት በኢትዮጵያ ታሪክ እንደ ህወሓት ብሄራዊ ጥቅምን አሳልፎ የሰጠ አገዛዝ የለም። አሁንም ህወሓት/ኢህአዴግ ግልፅነት በጎደለው አሰራር የኢትዮጵያን መሬት ለሱዳን የመስጠቱ አደጋ ስላለ የኢትዮጵያ ህዝብ ለያውቀውና ሊቃወመው ይገባል፡፡
እነዚህ ግለ ሰቦች በትጥቅ ትግሉ ጊዜ በትግራይ ውስጥ ከጦርነት ውጭ ደርግ ከገደላቸው በቁጥር የሚበዙ ሰላማዊና ራሳቸውን ሊከላከሉ የማይችሉ ዜጎችን አስረሽነዋል፡፡ ስለዚህም ነፍሰ ገዳዮቹ ከ40 ዓመት በፊት ጀምረው የንፁሃን ዜጎችን ህይወት በመቅጨት ላይ ይገኛሉ፡፡ ይህ ግፍ በይፋ እንዳይገለፅ ቢታፈንም የትግራይ ህዝብ በየቤተሰብና በየጎረቤት ደረጃ ያውቀዋል፡፡ ስለዚህ የህወሓት ባለስልጣኖች በትግራይ ውስጥ የጀመሯቸውና የለመዷቸው የግድያና አፈና ድርጊቶች ለሁሉም የኢትዮጵያ ህዝብ አዳርሰዋል፤
ምክንያቱም ወንጀለኞቹ በወቅቱ ከስልጣን አልተወገዱም፡፡
ባለፈው ህዳር በኦሮሞ ተማሪዎች የተጀመረውና የህዝብ ድጋፍ ኣግኝቶ የተቀጣጠለው ህዝባዊ እንቅስቃሴ ለመግታትና ለመደፍጠጥ የህወሓት/ኢህአዴግ መሪዎች ብዙ የኦሮሞ ተወላጆችን ገድለዋል፣ በብዙ ሺ የሚቆጠሩ አስረዋል። በኦሮሞ ህዝባችን ላይ የሚፈጸመው ግፍ በእጅጉ አሳዝኖናል፣ አስቆጥቶናል።
እንዲሁም በጎንደር አካባቢ የሚፈፀመው ወንጀል በእጅጉ አሳዝኖናል፣ አስቆጥቶናል።
የኦሮሞ ተማሪዎችና አርሶ አደሮች ሰላማዊ ተቃውሞ በማሰተር ፕላኑ ምክንያት ቢቀጣጠልም በ25
ዓመት የህወሓት/ኢህአዴግ ጭቆና ከተጠራቀመ ብሶት ጋር የተያያዘ ነው፡፡ ጭፍጨፋውም
የህወሓት/ኢህአዴግ አገዛዝ ሁሉ ጊዜ ለሰላማዊ ተቃውሞ የሚሰጠው መልስ ነው፡፡
የህወሓት/ኢህአዴግ መሪዎች የሚፈጽሟቸው አረመኔያዊ የጅምላ ግድያዎች ከዚህ በፊትም በአዲስ አበባ በተደጋጋሚ በ1985፣ በ1993፣ በሰኔ በ1997፣ በጥቅምት 1998፣ በጋምቤላ በታህሳስ 1996 ወዘተ..
ተፈፅሟል፡፡ ስለዚህ እነዚህ ጭፍጨፋዎች የሚቆሙት አስጨፍጫፊዎቹ ወንጀለኞች ከስልጣን ሲወገዱ ብቻ ነው፡፡
በበኩላችን የነዚህ ወንጀለኞች አገዛዝን በሚመለከት ያሉን አቋሞች የሚከተሉት ናቸው፦
1. የህወሓት/ኢህአዴግ መሪዎች ማንንም ብሄር/ብሄረሰብ የማይወክሉ፣ ለይስሙላ የህዝብን ጥያቄ
አንግበው ብዙ ወጣቶችን አስገድለው ለሰልጣን የበቁ ተራ አጭበርባሪዎችና ወንበዴዎች ናቸው፤
2. ለነዚህ ወንጀለኞች አቤቱታ ማቅረብ (ግድያቸውን እንዲያቆሙ፣ ህገ መንግስታቸውን እንዲያከብሩ መጠየቅ ወዘተ)ፋይዳ የለውም፤ ወንጀል ያልፈፀሙ የኢህአዴግ አባላት ወንጀለኞቹን በይፋ በማጋለጥ የህዝብ ወገንነታቸውን ማሳየት አለባቸው፡፡
3. የህወሓት/ኢህአዴግ አገዛዝ የሚደመሰሰውና ዴሞክራሲያዊ ስርዓት የሚገነባው በተናጠል ሳይሆን መላው የኢትዮጵያ ህዝብ ኣብሮ ሲታገል ነው፤ በህዝብ መካከል መሰረታዊ ቅራኔና ጠላትነት የለም፤
4. በኢትዮጵያ ህዝብ ላይ ለሚፈጸመው ወንጀል ተጠያቂዎች በዋናነት የህወሓት መሪዎች ቢሆኑም ፣ ግብረ-አበሮቻቸውም (የኦህዴድ፣ ብአዴን፣ ደኢህዴግ መሪዎችም) ተጠያቂዎች ናቸው፡፡
በመጨረሻም ማስገንዘብ የምንፈልገው የትግራይ ህዝብ የህወሓት ሰለባ እንጂ ለህወሓት ወንጀል ተጠያቂ አለመሆኑን ነው። በዚህ አጋጣሚ ግን በዲያስፖራ የሚኖሩ ትግራዎት ከሌላው ኢትዮጵያዊ ወገናቸው ጋር አብረው ለዴሞክራሲና ለአገር አንድነት እንዲታገሉ ጥሪያችንን እናቀርባለን።
እኛም ኦሮሞች ነን፤ ከኦሮሞ ህዝባችን ጎን ቆመን ፋሽስታዊውን የህወሓት/ኢህአዴግ መንግስታዊ የሽብር ድርጊት እናወግዛለን፡፡ በቅርቡ ሰላማዊ ተቃውሞ ምክንያት የታሰሩ ኦሮሞዎችና ሁሉም የፖለቲካ እስረኞችን ካለ ምንም ቅድመ ሁኔታ ለመፍታትና የተገደሉ ዜጎች ቤተሰቦችን ለመካስ አሸባሪው አገዛዝ እንዲገደድ ለኢትዮጵያ ህዝብ እናሳስባለን፡፡
በኢትዮጵያ ህዝብ (በትግራይ ከ40 ዓመታት በላይ፣ በመላ ኢትዮጵያ ለ25 ዓመታት) የሚፈፀሙት ተዳጋጋሚ ጭፍጨፋዎች (serial massacres) የሚቆሙት አስጨፍጫፊዎቹ ወንጀለኞች ከስልጣን ሲወገዱ ብቻ ነው፡፡

ከትግራይ ተወላጆች ኢትዮጵያውያን የተሰጠ መግለጫ
አብራሃ በላይ
አረጋዊ በርሀ (ዶር)
በላይነሽ ተክለሃይማኖት
ገብረመድህን ኣርኣያ
ግደይ አሰፋ (ዶር)
ግርማይ ገዛኸኝ
ካሕሳይ በርሀ
ነጋሲ በየነ
ተስፋይ ኣፅብሃ

The post ተደጋጋሚ ጭፍጨፋዎች እንዲቆሙ አስጨፍጫፊዎች መወገድ አለባቸው – እኛም ኦሮሞዎች ነን:: | ከትግራይ ተወላጆች ኢትዮጵያውያን የተሰጠ መግለጫ appeared first on Zehabesha Amharic.

(ዘ-ሐበሻ) በአዲስ አበባ የተለያዩ ቦታዎች በሚገኙ ግድግድዎች ላይ በስልጣን ላይ ያለውን መንግስት የሚቃወሙና ጥያቄም የሚጠይቁ መፈክሮች ተጽፈው አደሩ:: በተለይ መንግስት ያሰራቸውን የሙስሊም መፍትሄ አፈላላጊ ኮሚቴ አባላትን ፍርድ የሚቃወም; በሃገሪቱ በተቃዋሚዎች ላይ የሚሰጡ ፖለቲካዊ ፍርዶችን የሚቃወሙ; በኦሮሞ ሕዝብ ላይ እየደረሰ ያለውን ግድያ የሚያወግዙና ሌሎችም መፈክሮች በትላልቁ በግድግዳዎች ላይ ተጽፈው አድረዋል::

ሃገር ወዳድ ኢትዮጵያውያን በተለያዩ መንገዶች ተቃውሟቸውን በስርዓቱ ላይ ቢያሰሙም በስልጣን ላይ ያለው መንግስት የሕዝቡን ጥያቄ ወደ ጆሮ ዳባ ልበስ በሚል አሁንም በርካታ ጋዜጠኞችን; የሃይማኖት መሪዎችን; የፖለቲካ ሰዎችን አስሮ በማሰቃየት እንዲሁም በመግደልም ላይ ይገኛል::

በአዲስ አበባ ግድግዳዎች ላይ ተጽፈው ያደሩ ተቃውሞዎችን በፎቶ ይመልከቱ::

The post በአዲስ አበባ የተለያዩ ቦታዎች ግድግዳዎች ላይ የተቃውሞ ጽሑፎች ተጽፈው አደሩ appeared first on Zehabesha Amharic.

(ዘ-ሐበሻ) ሆላንዳዊው አሰልጣኝ ልዊስ ቫንገሃል ማን.ዩናይትድን ከተረከቡ በኋላ ባደረጉት 78 ጨዋታዎች ማሸነፍ የቻሉት 31 ጊዜ ብቻ ነው:: 29 ጊዜ አቻ ሲወጡ 18 ጊዜ ደግሞ ባልተጠበቁ ቡድኖች ሳይቀር ተሸንፈዋል::

የማን. ዩናይትዱ አሰልጣን ቫንገል በተለይ ከቅዳሜው የሳውዝ ሃምፕተን ጨዋታ ሽንፈት በኋላ ከክለቡ ይሰናበታሉ የሚለውን መረጃ በፍጥነት እያስኬደው ይገኛል:: ተጫዋቾቹ በአሁኑ ወቅት የአሰልጣኙን የአጨዋወት መንገድ መከተል ማቆማቸውን የሚገልጹት መረጃዎች በክለቡ ውስጥ ለረጅም ጊዜያት የተጫወቱ ተጫዋቾች አውራጣታቸውን ዝቅ በማድረግ ለአሰልጣኙ ያላቸውን ተቃውሞ እያሳዩ ነው::

አንዳንድ ተጫዋቾች አሰልጣኙ እንዲሰናበቱ ለክለቡ ቺፍ ኤድ ውድ ዋርድ መናገራቸውን የሚገልጹት መረጃዎች ክልቡን ሙሉ በሙሉ ሪያን ጊግስ እንዲይዘው ፍላጎት እንዳላቸው መግለጻቸው ተሰምቷል:: ኤድ ውድ ዋርድም ለማንቸስተር ዩናይትድ ያልተጠበቀ ሽንፈት ተጫዋቾች ለአሰልጣኙ አጨዋወት ዘዴ ደስተኛ ባለመሆናቸው መሆኑን መረዳታቸውን ከክለቡ የሚመጡ መረጃዎች ያመለክታሉ::

ቫንግሃል ከተሰናበቱ ሪያን ጊግስ ክለቡን ይህ ሲዝን እስከሚጠናቀቅ ሊመራው ይችላል የሚሉ ዘገባዎች ቢኖሩም ጊግስ ተጠባባቂ አሰልጣኝ ሳይሆን በቋሚነት መያዝ እንደሚፈልግ ተዘግቧል::

The post Sport: ማንቸስተር ዩናይትድ ቫንገሃልን ለማሰናበት ከጫፍ ደርሷል | ተጫዋቾች አውራ ጣቶቻቸውን ዝቅ እያደርጉባቸው ነው appeared first on Zehabesha Amharic.

ከሊሊ ሞገስ | ይህ ጽሁፍ በዘ-ሐበሻ ጋዜጣ ላይ ታትሞ ወጥቷል::

በማህበራዊ መስተጋብር ውስጥ አለመግባባት መኖራቸው አይቀሬ ነው፡፡ ሰዎች አብረው ሲኖሩ በተፈጥሮና ካደጉበት ነባራዊ ሁኔታ በመነሳት፣ ምርጫ እና ፍላጎት ምክንያት፣ አለመግባባት ውስጥ ሊገቡ ይችላሉ፡፡ በአንዱ ማህበረሰብ እንደ ጀግንነትና በራስ መተማመን የሚታየው ድርጊት፣ በሌላኛው ማህበረሰብ እንደ ብልግና እና አለሌነት ታይቶ ጉድ ሊያስብል ይችላል፡፡ ታዲያ በዚህ ለየቅል በሆነ ማህበረሰብ ውስጥ የበቀሉ ግለሰቦች ወደ አንድነት መጥተው ጎጆ ሲቀልሱ፣ እንዳደጉበት የማህበረሰብ ልዩነት አለመግባባት መፍጠራቸው አይቀሬ ነው፡፡ እኔም በዛሬው ጽሑፌ ካሉት በርካታ ግጭቶችና አለመግባባቶች ውስጥ፣ በቤት ውስጥ የሚከሰቱ አለመግባባቶችን ጥበባዊ በሆነ መልኩ እንዴት መፍታት ይቻላል የሚለውን ለመዳሰስ እሞክራለሁ፡፡

ቤተሰብ የማህበረሰብ ጥንስስ ነው፡፡ ሰዎች በቤት ውስጥ የሚኖራቸው ሰላማዊ ውሎና ጤናማ የሆነ ግንኙነት፣ በህይወት ለሚኖራቸው ዘርፈ ብዙ ስኬትና ምርታማነት የሚጫወተው ሚና ከፍተኛ ነው፡፡ ሆኖም ከላይ በመግቢያዬ ላይ ለመግለፅ እንደሞከርኩት፣ በተፈጥሮ ሂደት ባካበትነው የተለያዩ ማህበራዊ እሴቶ ምክንያት በዕለት ተዕለት ህይወታችን አለመግባባቶችን ማስተናገዳችን የግድ ነው፡፡

በርካታ ተመራማሪዎ እንደሚሉት፣ ግጭቶችና አለመግባባቶች በአግባ ከተያዙና ከተፈቱ፣ ግንኙነትን ለማጠናከር የራሱን የሆነ አስተዋፅኦ ያበረክታል፡፡ በብዙ ባለትዳሮች ዘንድ ያለውን አለመግባባት ስንመለከትም ለጭቅጭቅና ለፍቺ የሚዳረጉት፣ በየጊዜው የሚያጋጥሟቸውን ጥቃቅን አለመግባባቶች በአግባቡ ሳይፈቱ ስለሚያልፏቸው ነው፡፡

አብዛኛውን ጊዜ በባልና ሚስት መካከል የሚከሰተው አለመግባባት፣ ብዙዎች እንደሚያስቡት የፍቅር ማለቅ ምልክት ላይሆን ይችላል፡፡ ይልቁንስ የተቀመጠ ዕቃ እንደማይሰበር፣ ምንም አይነት እንቅስቃሴ ወይም ተግባር የማያከናውን ሰው እንደማይሳሳትና ቅያሜን እንደማይፈጥር ሁሉ፣ ጎጆን የሐሳብና የቃላት ልውውጦች ግን ለአለመግባባት መንስኤ መሆናቸውን መጠርጠር የለብንም፡፡ አንዳንድ ጥንዶች በጋራ የሚያሳልፏቸው ሰዓቶች ውሱን በመሆናቸው፣ በጋራ ጉዳዮቸው ላይ ለረጅም ሰዓት የመወያየት ዕድል አይኖራቸውም፡፡ በዚህም ምክንያት ሁለቱም የየግል ጉዟቸውን ተጉዘው አመሻሽ ላይ ለመኝታ ይገናኛሉ፡፡ በዚህ መልኩ ምንም አይነት ኮሽታ ሳይሰማ የተወሰኑ ጊዜያት ግንኙነታቸው ሊቀጥል ይችላል፡፡ ይህ ማለት ግን ግንኙነቱ ጤናማ ነው ወደሚለው ድምዳሜ ሊያደርሰን ስለማይችል፣ ከትዳር አጋራችን ጋር ይበልጥ በመቀራረብ የህይት እሴቶቻችንን ማጤን ያስፈልጋል፡፡

አለመግባባት ወይም ግጭት በአግባቡ ከተፈታ ግንኙነታችንን ከማሻሻል በዘለለ በግል የሚኖረንን አመለካከትና ዕውቀት አንድ ደረጃ ከፍ ያደርግልናል፡፡ ይህ የሚሆነው በግጭት ወቅትየቀኙ የአእምሮ ዋና ክፍል መፍትሄ ለመሻት ብዙ ስለሚጥር፣ የመስራትና የማመዛዘን አቅሙን በዚያው እንዲያጎለብት በር ይከፍትለታል፡፡

በመሆኑም አለመግባባት በተፈጠረ ጊዜ ጭንቀት ውስጥ ከመግባት ይልቅ ሁለቱንም ወገን ባማከለ መልኩ ነገሩን በማጤን ችግሩን መፍታት ያስፈልጋል፡፡ እንግዲህ እኔም በርካታ ድረገፆችንና መጽሐፍትን ዳስሼ ያገኘሁትን ውጤታማ የሚባሉ የግጭት አፈታት ዘዴዎች የተወሰኑትን እንደሚከተለው አቅርቤዋለሁ፡፡

ውጤታማ የግጭት አፈታት ዘዴዎች

1. ትኩረታችን ችግሩን መፍታት ላይ ይሁን፡–

ሰዎች አብዛኛውን ጊዜ ችግርን መፍታት በሚል አጉልተው ማሳየት የሚፈልጉት የሌላኛውን ወገን ደካማ ጎን ነው፡፡ ይህንንም በማድረግም የጥፋተኝነት ስሜት እንዲሰማው ሲያደርጉ ይስተዋላል፡፡ በእርግጥ ይህ አካሄድ ለአንዱ ወገን ደስታን ሊያጎናፅፍ ይችላል፡፡ ሆኖም ችግሩን ለመቅረፍ መፍትሄ አይሆንም፡፡ እንዲሁም ከዚህ በፊት በይቅርታ የታለፉ ጥፋቶችን በድጋሚ በመቆስቆስ ግለሰቡ የበለጠ እንዲሰማው ያደርጋሉ፡፡ ይህም አካሄድ ጥፋተኛ በተባለው ወገን መጥፎ ስሜትን ስለሚያጭር ከጥቅሙ ጉዳቱ ያመዘነ ይሆናል፡፡ በመሆኑም አለመግባባትን በውይይት ለመፍታት በምንቀመጥበት ጊዜ ትኩረታችን መሆን ያለበት ሌላው ላይ በአሸናፊነት ለመኩራራት ሳይሆን አግባብ ባለው ቃል ስሜትን ባለመንካት ይሁን፡፡

2. እርስ በእርስ ተደማመጡ

ሰው በተፈጥሮ ራስ ወዳድ ማህበራዊ እንስሳ ነው፡፡ በመሆኑም አብዛኛውን ጊዜ ሌሎች ሰዎች ነው፡፡ በመሆኑም አብዛኛውን ጊዜ ሌሎች ሰዎች እንዲያዳምጡትና እንዲረዱት ይፈልጋል፡፡ ሆኖም ይህ ፍላጎት የእርሱ ብቻ ሳይሆን የሁሉም ሰው ፍላጎት መሆኑን አያጤንም፡፡ ብዙ ጊዜም ብዙዎች የሚሰሩት ስህተት ለብቻቸው የንግግሩን መድረክ በመቆጣጠር፣ ሌላው በጥሞና እና በትዕግስት እንዲያዳምጣቸው መፈለጋቸው ነው፡፡ እርግጥ ነው አንዱ ወገን ሐሳቡን ሲያቀርብ ሌላው በአትኩሮት ሊከተለው ይገባል፡፡ ሆኖም ይህ አካሄድ በአንዱ ወገን ብቻ የሚመራ ከሆነ አሁንምየምንፈልገውን ውጤት ማግኘት አዳጋች ይሆናል፡፡ ስለሆነም ውጤታማ ለሆነ ውይይት የእኛን ሀሳብ ማቅረብ ብቻ ሳይሆን፣ የሌላውንም ሰው ስሜት፣ ፍላጎትና ሐሳብ ማዳመጥ ችግሩን በመፍታት ውጤቱን ያማረ ያደርገዋል፡፡

3. መልካም እሴቶችን አስታዋሽ መሆን፡-

መቼም በፀብ ጊዜ ብዙዎቻችን ጋ የተለመደው ነገር፣ በአንድ ወቅት የሰቀልነውን ሰው አሁን እኩይ ድርጊቱን ብቻ በማስታወስ ‹አፈር ዱቄት› ማብላት ነው፡፡ ይህ ነገር ግን እጅግ አደገኛ ከመሆኑ የተነሳ ያኛውን ሰው የበለጠ ግትርና እምቢተኛ ሊያደርገው ይችላል፡፡ ሆኖም ለውይይት በተቀመጥን ጊዜ በንግግራችን መባቻ ላይ የጓደኛችንን ወይም የትዳር አጋራችንን መልካም ባህሪያትና ተግባራት በመዘርዘር ብንጀምር፣ ተሟጋቻችን ከዚያ በኋላ ለሚሰነዘሩበት ማንኛውም አይነት ትችቶች ለመቀበል የስሜት ህዋሳቶቹ ዝግጁ ይሆናሉ፡፡ ይህንንም ዘዴ ተመራማሪዎች (K.K.K) (KISS KICK and method) ይሉታል፡፡

ይህም አካሄድ በበርካታ ማህበረሰብ ተሞክሮ ውጤታማ መሆኑ ተረጋግጧል፡፡ ይህም የሆነው ሰዎች በባህሪያቸው ስለራሳቸው አዎንታዊ ነገሮችን ማለትም አድናቆቶችን፣ ምስጋና እና ሙገሳ የመሳሰሉት ቃላቶች ሲነገርላቸው፣ የስሜት ህዋሳታቸውን በማነቃቃት የማዳመጥ ክህሎታቸው እጅግ እንደሚጨምር ነው፡፡ ስለሆነም መጀመሪያ ስለ ግለሰቡ የሚሰማንን በጎ ነገር ተናግረን (Kiss)፣ ወዲያው ያስቀየመንንና እንዲቀይር የምንፈልገውን እኩይ ተግባር ብናስከትል (Kick) ከዚያም ደግሞ ስላዳመጥን ብናመሰግነውና ካስቀየምነውም ይቅርታ ብንለው ውይይቱ በድል እንደሚጠናቀቅ ተመራማሪዎች ይገልፃሉ፡፡

4. አስታራቂ ሐሳቦችን ለመቀበል ዝግጁ እንሁን፡–

ይህ ብዙዎች ትኩረት የምንነፍገው ግን እጅግ አስፈላጊ ነጥብ ነው፡፡ ጥንዶች የሚፈልጉትን ነገር በሙሉ ላያገኙ ይችላሉ፡፡ ምክንያቱም የአንዳችን ፍላጎት የተጠማሪያችንን ስሜት የሚጎዳና የግንኙነታችን ህልውና አደጋ ላይ የሚጥል ሆኖ ሲገኝ፣ አስታራቂ ሀሳቦችን በማፍለቅ ፍላጎታችንን መተው ወይም መግታት ያስፈልጋል፡፡ ይህም ልዩነታችንን በማጥበብና አንድነታችንን በማጠናከር የምንፈልገውን አይነት ጤናማ ግንኙነት እንዲኖረን ያስችለናል፡፡ መስዋዕትነትም በሌላ ጊዜ ሌላኛው ወገን የመክፈል ፍላጎት ሊያድርበትም ይችላል፡፡

5. የግጭቱን መንስኤ በትክክል ማወቅ

ብዙውን ጊዜ ጥንዶች በጥቃቅን ምክንያቶች የሚያሳዩት ግልፍተኝነትና የጠብ አጫሪነት ስሜቶች፣ በአግባቡ ያልተፈቱ ከባባድ ችግሮች ውጤት መሆናቸውን ተመራማሪዎች ያስረዳሉ፡፡ ነገሩን ከምንጩ ለማወቅ ይረዳ ዘንድ ከቁጣውና ከንጭንጩ በስተጀርባ የተከለለውን ምክንያት ነቅሶ ማውጣት ይበጃል፡፡

በጥንዶች መካከል የሚፈጠርን አለመግባባት ለመፍታት፣ ጊዜን እና ቦታን መምረጥ በጣም አስፈላጊ ነው፡፡ ምክንያቱም የቦታና ጊዜ መረጣችን በመጀመሪያግንኙነታችንን ምን ያል ዋጋ እንደሰጠነውና ችግሩን ለመፍታት መፈለጋችንን ያመለክታል፡፡ ሌላው ለውይይት የምንመርጠው ቦታ ፀጥታ የሰፈነበት ከሆነ፣ የተወጠረ ስሜትን ለማርገብና በጥሞና ለማዳመጥ ምቹ ስለሚሆን ወደ መፍትሄ ሐሳቡ ለመምጣት ይቀለናል፡፡ ብዙ ጊዜ ባለትዳሮች አለመግባባቱን በፈጠሩበት ቤት፣ ምቹ ባልሆነ ስፍራ ምናልባትም ልጆች በሚገኙበት ሁኔታ ውስጥ ሊወያዩ ሲሞክሩ ይታያሉ፡፡ ይህ ሁኔታ ግን የእነሱን አለመግባባት በአንድ ደረጃ ከፍ ከማድረጉ በዘለለ፣ በልጆች አዕምሮ ላይ ጥሎ የሚያልፈው ጠባሳ ቀላል ስለማይሆን ጊዜና ቦታ መረጣ ላይ ጥንቃቄ ልናደርግ ይገባል፡፡

6. ይቅርታ መጠየቅ፡–

በመጨረሻም ከላይ የዘረዘርናቸውንና በግል ህይወት ተሞክሮ ያካበትናቸውን ውጤታማ የሆነ የችግር አፈታት ዘዴዎን በመጠቀም አለመግባባቶችን ፈትተን ከጨረስን ወዲያ፣ ጥፋተኛ ብንሆንም ባንሆንም በውይይቱ ወቅት የተለዋወጥናቸው አንዳንድ መጥፎ ቃላቶች የፈጠሩብንን የስህተት ውዥንብር በማሰብ ይቅርታ መጠየቅ ያስፈልጋል፡፡ ይቅርታ መጠየቅ ማለት ጥፋተኛ ነኝ ማለት ሳይሆን ከተፈጠሩት አለመግባባቶች በበለጠ ለአብሮነታችን ዋጋ እሰጣለሁ የሚል አንድምታ አለው፡፡ በመሆኑም አብሮ የሚኖር፣ አብሮ የሚሰራና አብሮ የሚጓዝ ሁሉ በአንድም በሌላም ምክንያት፣ የሳብና የምርጫ ልዩነት ውስጥ ይገባል፣ ይህም አንዳንዴ ወደ ግጭት ሊያመራው ይችላል፡፡ ሆኖም ሁልጊዜ አለመግባባቶች የጥላቻ ምልክቶች አለመሆናቸውን በመገንዘብ፣ መከባበር በተሞላበት መንፈስ በአብሮነት ወደፊት እንጓዝ እላለሁ፡፡

The post Health: በየቤታችን ውስጥ ያለውን ጦርነትና ሰላም እንዴት እየመራነው ይሆን? appeared first on Zehabesha Amharic.

በአፍንጫ ደም መፍሰስ (ነስር) የምንለው አስደንጋጭ የሆነ፤ነገር ግን በአብዛኛው ለከፋ አደጋ የማይዳርግ የሕመም ዓይነት ነው፡፡
ነስር በሁለት ዓይነት ይከፈላል፡፡

1) ከፊተኛው የአፍንጫችን ክፍል የሚመጣ ነስር (Anterior Nosebleeds)
• ይህ ዓይነቱ የነስር ዓይነት ከ90 በመቶ በላይ ለሚከሰት የነስር ዓይነት ምክንያት ነው፡፡ ከፍተኛው የአፍንጫችን ክፍል የሚመጣን ነስር በቀላሉ መቆጣጠር ወይንም ማቆም ይቻላል፡፡

2) ከኋለኛው የአፍንጫችን ክፍል የሚመጣ ነስር (Posterior Nosebleeds)
• ይህ ዓይነቱ የነስር ዓይንት በአብዛኘው በዕድሜ በገፉ ሰዎች ላይ የሚከሰት ሲሆን ከሌላኛው የተለየ ሕክምና የሚያስፈልገው እና ውስብስብ ነው፡፡

ነስር በአብዛኛው በቅዝቃዜ ወቅት የሚከሰት ሲሆን ከ2 – 10 ዓመትና ከ50 – 80 ዓመት ዕድሜ ክልል ውስጥ ያሉትንም ያጠቃል፡፡

✔ ነስርን የሚያስከትሉ ምክንያቶች ምንድን ናቸው?

• በአፍንጫ ላይ ከውጭ የሚከሰት አደጋ ወይንም አፍንጫ በመጎርጎር ምክንያት
• በተለያዩ የሕመም ወይንም መድኃኒቶች ምክንያት ደም መርጋት አለመቻል
• የደም ግፊት መጨመር ጋር በተያያዘ የሚመጣ ነስር ነው፡፡

✔ የነስር ምልክቶች ምንድን ናቸው?

• በአብዛኛው ደም የሚፈሰው በአንደኛው የአፍንጫ ቀዳዳ ነው፡፡ ነገር ግን ከፍተኛ የሆነ የደም መፍሰስ ካለ በሁለቱም የአፍንጫ ቀዳዳዎች ደም ሊፈስ ይችላል፡፡ እጅግ ከፍተኛ ደም መፍሰስ ካለ ደግሞ በጉሮሮ አድርጎ በአፍ በኩል ሊመጣ ይችላል፡፡
• ከፍተኛ የሆነ ድም መፍሰስ ሲኖር ራስ ማዞር፣ግራ የመጋባት እና ራስ መሳት ሊያስከትል ይችላል፡፡

✔ ነስርን እንዴት ማቆም ይቻላል?

• በመጀመሪያ ራስዎን ማረጋጋት
• ቀጥ ብለው መቀመጥ
• ከጭንቅላትዎ ጎንበስ ማለት (ጭንቅላትን ወደ ላይ ቀና ማድረግ የሚፈሰውን ደም ወደ ጉሮሮ ከማምጣት ባለፈ ጥቅም የለውም)
• ሁለቱም የአፍንጫ ቀዳዳዎች በአውራ ጣትዎ እና በጠቋሚ ታትም ግጥም አድርጎ ለአስር ደቂቃ ይዞ ማቆየት
• በአፍ የሚመጣን ደም መትፋት
• ነስሩ ካቆመ በኋላ አፍንጫዎን አለመነካካት ናቸው፡፡

✔ ነስር ከተከሰተ በኋላ ወደ ሐኪም መሄድ የሚያስፈልገው መቼ ነው?

• አፍንጫዎን ለ10 ደቂቃ ያህል ይዘው ቆይተው ነስሩ የሚያቆም ካልሆነ
• በአጭር ጊዜ ልዩነት በተደጋጋሚ የሚነስርዎ ከሆነ
• ራስ ማዞር ወይንም ራስዎን የሚስቱ ከመሰለዎት
• የልብ ምትዎ የሚጨምር ከሆነ እና ለመተንፈስ ከተቸገሩ
• ደም የሚያስመልስዎ ከሆነ
• በሰውነትዎ ላይ ሽፍታ ከኖረ
• ትኩሳት ካለዎት ናቸው፡፡

✔ ሐኪምዎን ማማከር የሚያስፈልገው መቼ ነው?

• በተደጋጋሚ ነስር የሚያስቸግርዎ ከሆነ
• ከነስር ሌላ ከሌሎች የሰውነት ክፍሎች መድማት የሚኖር ከሆነ
• በቀላሉ የመበለዝ ምልክቶች በሰውነትዎ ላይ ከተገኙ
• ደምን ለማቅጠን የሚጠቅሙ መድኃኒቶችን የሚወሰዱ ከሆነ
• የደም መርጋትን የሚያስተጓጉሉ ማንኛውንም ዓይንት ሕመም ካለዎት
• የኬሞቴራፒ ሕክምና በቅርቡ ወስደው ከነበረ ነው፡፡

✔ነስርን እንዴት መከላከል ይቻላል?

• በአብዛኛው ነስር የሚከሰተው በቀዘቀዘ እና በደረቅ የአየር ንብረት ጊዜ ነው፡፡ ለነስር ተጋላጭ የሆኑ ከሆነ አፍንጫዎ እንዳይደርቅ ቫዝሊን (Petroleum jelly) በመጠቀም ማለስለስ ይችላል፡፡
• አፍንጫዎን በጣትዎ አለመነካካት
• የነስርዎ መነስዔ ከሌላ የጤና ችግር ጋር ተያያዥነት ካለው ሐኪምዎን ማማከር የሚሰጥዎን የጤና ምክር መተግበር
• ሲጋራ ማጤስ አፍንጫን በማድረቅ ለነስር ስለሚዳርግ ማስወገድ ናቸዉ፡፡

እባክዎን ለወዳጅዎ ያካፍሉ!!

ጤና ይስጥልኝ

The post ነስር (Nose bleeds) | በዶ/ር ሆነሊያት ኤፍሬም ቱፈር appeared first on Zehabesha Amharic.