ወደ በረሃ ወርዶ የሰራውን ስራ በፎቶዎቹ  እያየው ነው እነዚህን ፎቶዎችን ሳይ አይኔ በእንባ ይሞላሉ ልቤ በእልህ ይቀጣጠላል የተዘበራረቀ ስሜት ወደ ውስጤ ሲገባ ይታወቀኛል የደስታ ስሜት፣ የእልህ ስሜት፣ የቆራጥነት ስሜት፣ የጽናት ስሜት፣ የእውነተኝነት ስሜት ብቻ ምን ልበላቹህ ተደበላልቀው ውስጤን ይወጥሩታል እናም ፎቶዎቹን ሳያቸው የሚያወሩኝ ያህል ደስታን ይሰጡኛል

አንድ ቀን ታድያ አንድ የጎረቤት አገር ሰው ሁል ጌዜ በተደጋጋሚ ጌዜ  የዚህን ሰውዬ ፎቶዎች  ተመስጠህ ታየዋለህ ለምንድነው አለኝ

የኔም መልስ አይ ደስ ስለሚለኝ ነው አልኩት። እርሱም መልሶ ጥያቄወችን ይጠይቀኝ ጀመር አባትህ ነው? ዘመድህ ነው? ገበሬ ነው? ወዛደር ነው? ወታደር ነው? ምንድ ነው? ንገረኝ ደጋግመህ  ስታየው አባትህ ከሆነ  ብዬ ነው አልያም ዘመድህ  ደግሞ ይሄኘው   ፎቶ ገበሬ ደግሜ  ያኛው  ወዛደር ይሄኛው ደግሞ ወታደር ይመስላል ማን ነው ንገረኝ አለኝ እኔም ስመልስለት ልክ ብለሃል  እንደአባቴ የማየው አባት ያውም የኔ ብቻ ሳይሆን ነጻነት ለተጠሙ ኢትዮጵያዊያን ሁሉ አባት ነው።  ከገበሬም ገበሬ ነው ስለገበሬው ነጻነት የሚታገል የገበሬው ወዳጅ ነው። ከወዛደርም ወዛደር ነው ድንጋይ እየተሸከመ እንጨት እየፈለጠ ወዛደሩን ለማሳደግ የሚተጋ የፍቅር አባት ነው። ከወታደርም ወታደር ነው ወዳጅን ሳይሆን ጠላትን በህዝብ አናት ላይ ቁጭ ብሎ በብረት ረግጦ የነገሰና የሚገዛን አገር አፍራሽ ለመገርሰስ ወታደር ሆኖ ለአገሩ ነጻነት ዘብ የቆመ  ብርቅዬና ውድ የኢትዮጵያ ወታደር ነው  ብዬ ገለጽኩለት። ስሙም አንዳርጋቸው ጽጌ  ይባላል  ስምን መለአክ ያወጣዋል ይባላል እውነት ነው ስምና ተግባርን አዋህዶ  የያዘ  የዘመኑ የኢትዮጵያ ብርቅዬ ልጅ ነው።

አንድ አርጋቸው ማለት የተራራቀን ማቀራረብ፣ የተለያየን ማገናኘት፣ ያልጸናን ማጽናት፣ የሚለውን ትርጉም ሲሰጠን። ጽጌ ማለት ደግሞ አበባ ማለት ነው። ሲተረጉም  የአንድነት አበባ እንደውም  የትም የማይበቅለው ኢትዮ ጵያዊ አበባ የእግዛአብሔር ጸጋ የሚያበቅለው አደይ አበባችን ነው።

ታድያ ይህንን የኢትዮጵያ የሰላም ባንዲራ፣ የነጻነት መዝሙር፣ የፍቅር ቅኔ፣ የእውነት ታጋይ፣ የሆነውን ድንቅዬ መከታችንን  ከአመት በፊት የመኖች ሚልዮን ዶላሮችን ተቀብለው ለአገር አጥፊው እና ለአረመኔው ወያኔ አሳልፋ የሰጠችው አንዳርጋቸው ሰለ ኢትዮጵያ ነጻነት የታገለ  ታጋያችንን የመን አሳጣችን። በአሁኑ ሰዓት በመቶ ሺህ የሚቆጠሩ ኢትዮጵያን የድረሱልኝ ጥሪ እያሰሙ ይገኛሉ። ወያኔ ግን ይሄን የወገን  ጥሪ የሚሰማበት ጆሮ አልፈጠረበትም። የዜጋቸው ደህንነት ያሳሰባቸውና ያስጨነቃቸው አገሮች ነገሩ ሳይብስ በጊዜው ዜጎቻቸውን አስወጥተዋል። ከ45 በላይ ኢትዮጵያን ግን የሚደርስላቸው አጥተው በአሰቃቂ ሁኔታ ሲገደሉ አርበኛውን አንዳርጋቸው አፍኖ ለማምጣት የመን ድረስ አምርቶ  የነበረው ቦይንግ ዛሬ የጥይት ናዳ እየወረደባቸው ላለው ዜጎቻችን መድረስ አልቻለም።  አንዳርጋቸውን ለማሳፈኛ ለየመን ያወጡት በሚልዮን የሚቆጠር  ዶላር የዜጎቻችንን ነፍስ ለማዳን ሳይችሉ ቀርተዋል።  ይልቅ ለነሱ የወገን ድረሱልኝ ጥሪ ከወደ ውጪ ጉዳይ ሚንስቴር በፌስ ቡክ መስኮት የተናገሩት ቢኖር ስልክ ቁጥር ነው። እንዴት አሳፋሪ ነገር እየሰሩ እናዳለ የሁል ግዜ ተግባራቸውን በድጋሚ አሳይተውናል።  እኔን ያሳዘነኝ ነገር የራሷን የቤት ስራ ሳትሰራ፣ የራሷን የውስጥ መረጋጋት ሳታመጣ፣ ሰለራሳ ሕዝብ ሳትጨነቅ፣ የኢትዮጵያን እውነተኛ ታጋይ አሳልፋ  መስጠትዋ <<የራስዋ አሮባት የሰው ታማስላለች>>  የሚለውን አባባል ያስታውሰኛል ቢሆንም ግን  የመን ለሰራችው ስራ ልትጠየቅ ይገባል።

አንዳርጋቸው በኢትዮጵያን ልቦና ውስጥ የፈጠረው የአንድነት መንፈስ ወያኔን የማስወገድ  ሃላፊነትን ለሁሉም ኢትዮጵያዊያን መንገድ ያሳየ  በመሆኑ  እኛ ልጆችህ ያሰብከውን ዲሞክራስያዊት አገር የማየት ህልምህን እውን ለማድረግ በአንድ አንዳርጋቸው ምትክ ሚልዮኖች ተተክተው ወደትግሉ ጎራ ገብተናል። ገዳያችንን ልናጠፋ፣  አንባገነኖችን ልንገረስስ፣ ወንጀለኞችን ለፍርድ ለማቅረብ  ቆርጠን ተነስተናል። እናም የተደወለው ደውል  የክተት ነውና  ሁሉም በያለበት  ወያኔ የተባለውን ሰው በላ አውሬ  ከኢትዮጵያ  ምድር እስከ መጨረሻው ለመደምሰስ እና ጨርሶ እንዳያንሰራራ አድርጎ የማስወገድ ደውል ነውና  ሁላችንም ለዚህ ክተት ጥሪ ተሳታፊ ሆነን ትግሉን እንቀላቀል።  የነጻነት ታጋይ የአንዳርጋቸው ጽጌ ልጆች እንዳለን ዛሬ የምናሳይበት ጊዜ  ነውና ገዳያችንን ገለን፣ አሳዳጃችንን አሳደን፣ ሁሉም ኢትዮጵያዊ በስደት ከተበታተንበት ተሰባስበን በደስታና በሰላም የምንኖርባት  ዲሞክራሳዊት አገር እንዲኖረን ክተቱን ተቀብለን ነጻነታችንን እናመጣለን።

ድል ለኢትዮጵያ ሕዝብ!!!

08.04.2015

Samilost89@yahoo.com

The post የአንዳርጋቸውን የትግል መንገድ ሚሊዮኖች ይከተላሉ። – ሳሙኤል አሊ (ከኖርዌይ) appeared first on Zehabesha Amharic.

ዘ-ሐበሻ ጋዜጣ የተለያዩ መረጃዎችን በ32 ገጾች ይዛ ወጥታለች:: በሚኒሶታና አካባቢው ያላችሁ ከኢትዮጵያውያን መደብሮችና ሬስቶራንቶች ታገኛላችሁ:: በሌሎች ሃገራት ያላችሁ በፒዲኤፍ ፎማት ለማንበብ እዚህ ይጫኑ::

The post ዘ-ሐበሻ ጋዜጣ ቁጥር 73 – PDF appeared first on Zehabesha Amharic.

* ኢትዮጵያውያን ማን ይታደጋቸው ?
* ከቀሩት የውጭ ዜጎች ምን እንማር ይሆን ?
* ለነፍስ አድኑ ጥሪ የእኛ አማረጭ ምን ይሆን ?

በአረቡ ሀገር ስደት ማጥ ውስጥ የገባውን ወገን ስጋት እያደር ከስጋት አልወጣም ። ሳውዲን መዳረሻ ያደረጉ የመንን በአሳር በመከራ አልፈው በወደብ ከተማዋ ጅዳ እግራቸው ሲረግጥ በጨካኝ ደካሎችና አሸጋጋሪዎች ታግተው የድረሱልኝ ጥሪ ሲያሰሙ ደራሽ አጥተዋል። በህጋዊ የኮንትራት ስራ የመጡትም ሆኑ ህጋዊ መኖርያ ፈቃድ ይዘው ኑሮን በመግፋት ላይ ያሉ ሳይቀሩ በዙሪያቸው ባለው በሚደርስባቸው ፣ በሚያዩ በሚሰሙት እንደኔ ታመዋል ። አረቦች በደሉን ከሚባለው በላይ የራሳችን ወገኖች ደመ ነብሱን ከሚንቀሳቀሰው ያልሞላለት ግፉዕ እስከሞተው በድን ሳይራሩ ፈጣሪ ያየናል ብለው ሳይፈሩ በንዋይ ፍቅር ታውረው ግፍ እየሰሩ ነው ። ሰብዕናቸውን አሽንቀንጥረው ርቀው ሄደው የሚፈጽሙት አስነዋሪ ተግባር የጊዜውን መክፋት ያሳይ እንደሁ እንጃ … እኔም እኛም ሁላችንም ግን ችግሩን እናወራዋለን እንጅ መፍትሔ የለንም ! የየመኑን የጦርነት ግብአት ከመከታተል ጎን ለጎን ሰሞነኛ ውሎየ ያሳየኝ እውነታ ይህንኑ እውነት ነው …

እንዲህና እንዲያ እያልን ኑሮን በምንገፋበት ሰማይ ስር ከላይ ስለጠቀስኳቸው የወገን የስደት አበሳ መከራዎች መረጃ ከማቅረብ ቀዳሚው በጦርነት ማጥ ውስጥ ስለወደቁት ወገኖች አበሳ አደርገው ዘነድ ግድ ብሎኛል ። ይህንኑ የማለዳ ወግ ዳሰሳየን አጠናቅሬ ለማቅረብ ተፍ ተፍ ስል ለተባበሩት መንግስታት የስደተኞች ኮሚሽን እና ለሃያሏ አሜሪካ መሪ ለፕሬዚደንት ሁሴን ኦባማ ወገኖቻችን ይታደጉ ዘንድ ፊርማ ማሰባሰቢያ ላይ ፊርማየን አስቀምጨ መረጃ ሳገለባብጥ ለኢሮሞ ስደተኞች ድረሱላቸው የሚል የኢቦ ጁሃር መሃመድን የፊርማ ማሰባሰቢያ ጥሪ ተመልክቻለሁ ።

አንድ ሆነን በጦርነት አፋፍ ላይ ያሉ ወገኖችን እንደ መታደግ ዛሬም በልዩነት ተበታትነን የምናደርገው ጉዞ አልመችህ ቢለኝ አትፍረዱብኝ … ወደ እሰጣ ገባው ሳልገባ ከእኛ ስለሚጠበቀው አማራጭ የራሴን እይታ ላስቀምጥ ቀለም ከነጩ ወረቀት አገናኝቸ እንደጨረስኩ በቀጣዩ የማለዳ ወግ ቅኝት እስክመለስ ከአሜሪካ ድምጽ ራዲዮ የተላለፈውን ቀጣይ ዘገባ ያደምጡ ዘንድ ልጋብዝዎ ወደድኩ … ! እስኪ በሁለተኛዋ የየመን ከተማ ኤደን ውጊያው ዘገርሽቶ ፣ የአየር ጥቃቱ በርትቶ በሚገኝባት ከተማ እየሆነ ያለውን ስሙት …
ቸር ያሰማን !
ነቢዩ ሲራክ
መጋቢት 30 ቀን 2007 ዓም

The post በየመን ጦርነት ማጥ ውስጥ ያሉ ወገኖቻችን አበሳ ! – ነቢዩ ሲራክ appeared first on Zehabesha Amharic.

የ2017ቱ የአፍሪካ ዋንጫ ማጣሪያ ድልድል በካፍ ዋና መቀመጫ በግብጽ ካይሮ ዛሬ ወጣ:: ኢትዮጵያ በ2017ቱ የአፍሪካ ዋንጫ ማጣሪያ ከአልጀሪያ፣ ሌሴቶና ሲሸልስ ጋር መመደቧን ሱፐር ስፖርት ድረገጽ ዘገበ::

(photo File)

በ2015ቱ የአፍሪካ ዋንጫ ማጣሪያ የኢትዮጵያ ብሄራዊ ቡድን ከማሊ፣ ማላዊ እና አልጄሪያ ጋር ተደልድሎ በአልጀሪያ በሜዳው 2 ለ 1 አልጀርስ ላይ ደግሞ 3 ለ 1 መረታቱ አይዘነጋም።

እንደ ሱፐር ስፖርት ዘገባ ጋቦን የ2017ቱን የአፍሪካ ዋንጫ እንድታዘጋጅ ስትመረጥ ከኮቲዲቯር፣ ሱዳን እና ሴራሊዮን ጋር ተመድባለች። ይሁን እንጂ ከጋቦን ጋር የሚደረጉት ጨዋታዎች ምንም አይነት ነጥብ አይያዝባቸውም።
ጋቦን በአለመረጋጋት ላይ የምትገኘውን ሊቢያን ተክታ ነው የ2017ቱን የአፍሪካ ዋንጫ እንድታስተናግድ የተመረጠችው።

ድልድሉ ሙሉው የሚከተለው ሲሆን ከየመድቡ በነጥብ አንደኛ እና ሁለተኛ የሆኑ በቀጣዩ የጋቦን አፍሪካ ዋንጫ ይሳተፋሉ::

The post የአፍሪካ ዋንጫ ማጣሪያ ድልድል ወጣ – ኢትዮጵያ ከአልጄሪያ ሲሸልስና ሌሴቶ ጋር ተደለደለች appeared first on Zehabesha Amharic.

ሊሊ ሞገስ

ብዙ ሰዎች እርር ድብን ብለን እናውቅ ይሆናል፡፡ በቅናት! ዛሬ እኔ እና እናንተ ስለ ቅናት ልናወጋ፣ በቅናት ያረርንባቸውን ጊዜያቶች በድጋሚ ልናጤን ነው፡፡ የእናንተን አላውቅም እንጂ እኔ በበኩሌ ከዚህ ቀደም የኔው ጉድ በቅናት አንፃር ያደረገችበትን ቀኖች በምናቤ እንደ ፎቶ አልበም ደርድሬያቸዋለሁ፡፡ መቼም ቀንቼ አላውቅም አትሉኝም፡፡ ቅናት መጠኑ ይብዛም ይነስም የሁላችንንም ልብ ያንኳኳል፡፡ ቅናት እና እሳት ቤት አይዘሉም፡፡ እርግጥ ነው ቅናት ውስጣችን አስደሳች ስሜት የሚፈጥር አለመሆኑን እናውቃለን፡፡ ከዚህ አኳያ ቅናትን ከአሉዊ ስሜቶች ተርታ ልንፈርጀው እንችላለን? ወይንስ ለትዳር አጋራችን ወይንም ለፍቅር ጓደኛችን ያለን ፍቅር ኃያል መሆኑን ማረጋገጫ አድርገን እንወስደዋለን? ይህንን ጥያቄ ለመመለስ ብዕሬ ጉሮሮዋን ጠራርጋለች፡፡

ከሁሉ በፊት ግን ስለምንወያይበት ርዕስ ግልፅ የሆነ መረጃ ሊኖረን ይገባል፡፡ ለዛም ነው ቀድመን ቅናት ምንድን ነው? የሚለውን ጥያቄ መመለስ ያለብን፡፡

ቅናት ምንድነው?

ቅናት ማለት በተቃራኒ ፆታ ግንኙነት ውስጥ እያለን በተለያዩ ምክንያቶች በውስጣችን ሊፈጠር የሚችል፣ የምንወደውን ሰው ከማጣት ጋር የተያያዘ የስጋት እና ሽብር ስሜት ነው፡፡ ቀደም ብዬ እንደጠቀስኩት ይሄ የሽብር ስሜት ነው፡፡ ቀደም ብዬ እንደጠቀስኩት ይሄ የሽብር ስሜት በተለያዩ ምክንያቶች ሊፈጠር ይችላል፡፡ በተጨማሪም ቅናት ያለንን ግንኙነት ሊጠቅምም ሊጎዳም እንደሚችል በዘርፉ የተመራመሩ ሰዎች ገልፀዋል፡፡

አሉታዊ ቅናት
ቅናትን አሉታዊ የምንልበት ዋናው ምክንያት በዓለም ላይ ከተፈፀሙ የትዳር ጓደኛ ግድያ መንስኤዎች መካከል ቅናት ፊት አውራሪ ሆኖ በመምራት ላይ ስለሚገኝ ነው፡፡ ይሄ ደግሞ ቅናት ልክ የማይኖረው ከሆነ አደገኛ ሊሆን እንደሚችል ያሳያል፡፡
ቅናትን አሉታዊ ቅናት የምንለው መቼ ነው? ቅናት ከልክ እንዳለፈ ለማረጋገጥ የተወሰኑ ምልክቶችን ልጠቃቅስ፡፡
ሀ. የቅናት ስሜት በሚፈጠርበት ወቅት ስሜታችንን ለመግለፅ ቃላትን ሳይሆን ጉልበትን መጠቀም ስንጀምር፤ በግልፅነት ከመወያየት ይልቅ ቅናት እንዲያድርብን አደረግን የምንለው ሰው ላይ ለዱላ ስንጋብዝ፡፡
ለ. የትዳር አጋርህ/ሽ፣ ጓደኛህ/ሽ ካንተ/ካንቺ ጋር በሌለ/ች ሰዓት ጊዜህን/ሽ ‹‹ምን እያደረገ/ች ይሆን?›› በማለት ቀኑን ሙሉ የምንብሰለሰል ከሆነ አልፎ ተርፎም ቀኑን ብቻ ሳይሆን ሌሊትም ኮርኒስ እየቆጠርን ነገር የምንበላ ከሆነ ችግር አለ ማለት ነው፡፡
ሐ. የቅናት ስሜት ከፍቅር የመነጨ ሳይሆን እምነት ከማጣት የመጣ ሲሆን፤
መ. የትዳር አጋርህ/ሽ ውሎውን/ዋን ለመናገር ወይም አንተ/አንቺ በሌለህበት/ሽበት ሰዓት የተፈጠሩ ነገሮችን ለመናገር የምትሳቀቅ/ቂ ከሆነ፤
ሠ. በዚህ በመዘዘኛ ቅናት ምክንያት ለምግብ ያለን ፍላጎት ከቀነሰ፤ ጭንቀት ውስጥ ከገባን፤ የልብ ምታችን በተደጋጋሚ የሚጨምር ከሆነ፣ ከልክ በላይ የሚያልበን እንዲሁም ቶሎ የሚደክመን ከሆነ፤
ረ. በመጨረሻም ቅናት ከፍቅረኛችሁ ጋር ያላችሁ ግንኙነት ላይ ክፍተት እየፈጠረ ከመጣ ችግር አለ ማለት ነው፡፡
ከዚህ በተጨማሪ ሊንዳ ብሎር የምትባል ክሊኒካል ሳይኮሎጂስት ቅናታችን አሉታዊ መሆን አለመሆኑን ለማረጋገጥ እነዚህን ሶስት ጥያቄዎች ራሳችሁን ጠይቁ ትለናለች፡፡
1. ይሄ ቅናት የዕለት ተዕለት ኑሮአችሁ ጋር እየተጋጨ ነው?
2. የምወደውን ሰው እያሳዘነ እና እየጎዳ ነው?
3. ቅናቱ እኔ ከምቆጣጠረው በላይ እሱ ይቆጣጠረኛል?
ከላይ ለተዘረዘሩት ሶስት ጥያቄዎች መልሳችሁ ‹‹አዎን›› ከሆነ ጉድ ፈልቷል ማለት ነው ትላለች የሳይኮሎጂ ባለሙያዋ፡፡
እንግዲህ ወዳጆች ከላይ የጠቀስኳቸው ነገሮች በተደጋጋሚ በፍቅር ግንኙነትሽ/ህ ጊዜ የሚከሰቱ ከሆነ ቆም ብሎ ማሰብ ያስፈልጋል፡፡ በአቅራቢያችን ወደሚገኝ የስነ ልቦና አማካሪ ብንሄድ መፍትሄ ልናበጅለት እንችላለን፡፡ አሊያም ማማከሩ ለውጥ ካላመጣ በሰላም መለያየቱ ሁሉ የሚበጅ ይመስለኛል፡፡

አዎንታዊ ቅናት
ቅናት በአብዛኛው ግንኙነቶች አደጋ ላይ ሲጥል ብንመለከተውም መጠኑ ሳይበዛ ግን አዎንታዊ ጎኑ ሊያመዝን የሚችልበት ሁኔታ ይፈጠራል፡፡ ታዲያ አዎንታዊ ቅናት ስል ደስ የሚል ስሜት የሚፈጥር ቅናት ማለቴ እንዳልሆነ ይገባችኋል፡፡ ታዲያ ቅናትን አዎንታዊ የምንለው እንዴት ነው?
አንዳንድ ጥናቶች እንደሚያትቱት መጠነኛ ቅናት በፍቅር ጓደኛ ላይ ደስ የሚል ስሜት ይፈጥራል፡፡ ምክንያቱም የፍቅር ጓደኛችንን ምን ያህል እንደምንወድ ሊያሳይ ይችላል፡፡ የፍቅር ወይም ትዳር አጋራችን መጠነኛ ቅናትን እንደ ፍቅር መገለጫ ሊመለከቱት ይችላሉ፡፡ ይሁን እጂ ብዙ ጥንዶች የተሰማቸውን ደስ የሚል ስሜት ቅናት ላደረበት አጋራቸው ሲያካፍሉት አይስተዋልም፡፡ በሌላ መልኩ ደግሞ መግባባት ባለመቻል እና ንትርክ መካከላቸው ያለው የፍቅር ድባብ የተጋረደባቸው ጥንዶች መጀመሪያ በፍቅር ሲወድቁ ለፍቅረኛቸው የነበራቸው ወይንም ስለ ፍቅረኛቸው የሚወዱትን ጎን መልሶ ለማግኘት ይቸገራሉ፡፡ ታዲያ በዚህ ወቅት ፍቅረኛቸውን ከሌላ ሰው ጋር ቢመለከቱት/ቷት በሚፈጠርባቸው የቅናት ስሜት ያ ጠፍቶ የነበረ የጠብ ምክንያት ግልጽ ሊሆን ይችላል፡፡ ስለዚህ ከዛ ሰው ጋር ያላቸውን ግንኙነት እንዲያድሱ ያስገድዳቸዋል፡፡ ከንትርክ የበለጠ ጥሩ የጋራ ታሪክ እንደነበራቸው ያስታውሳሉ፡፡ ያንንም ጥሩ ጊዜ ለመመለስ የሚያስችል አቅም ያገኛሉ፡፡ ‹‹በእጅ ያለ ወርቅ ከመዳብ ይቆጠራል›› እንዲሉ ነው ነገሩ አንዳንዴ፡፡

የቅናት መንስኤዎች
ቅናት አዎንታዊ እና አሉታዊ ጎኖች እንዳሉት ሁሉ መንስኤዎቹም የተለያዩ ናቸው፡፡ የቅናት መንስኤ በተለይ ቅጥ ያጣ ቅናት መነሻው የፍቅር አጋራችን ላይ ከመጠን ያለፈ ጥገኛ መሆን እና በራስ መተማመን አለመቻል ነው፡፡ ይሁን እንጂ የሁሉም አፍቃሪ ቅናት መንስኤ ጥገኛ መሆን እና በራስ መተማመን አለመቻል አይደለም፡፡ አንዳንድ ድርሳኖች እንደሚያስነብቡን አዎንታዊ ቅናቶች ኃያል ከሆነ ፍቅር ሊመጣ እንደሚችል እና መንስኤውም ፍቅረኛችን ካላት/ካለው የሶስተኛ ወገን ግንኙነት ጋር ሳይሆን ሌሎች ግዑዝ ከሆኑ ነገሮች ጋር በተያያዘ ሁሉ ሊመጣ ይችላል፡፡ ለአብነት ያህል ፍቅረኛ ሆዬ በስራ ብዙ ሰዓቱን/ቷን የሚያሳልፍ/የምታሳልፍ ሲሆን ወይንም ብዙ ጊዜውን/ዋን በማንበብ የምታሳልፍ/የሚያሳልፍ ከሆነ አዎንታዊ የምንለው አይነት ቅናት ሊያድርብን ይችላል፡፡ ቅናቱም የፍቅር ግንኙነቱን የሚያቀጭጭ አይነት ቅናት አይደለም፡፡ ጊዜ ከመፈለግ ጋር የሚያያዝ ብቻ ነው፡፡ ከዚህ በተጨማሪ የቅናት መንስኤ አሁን ካላቸው ግንኙነት በፊት በነበራቸው ግንኙነት የተከዱ ወደፊት በሚኖራቸው ግንኙነት የቅናት ስሜት ሊያድርባቸው ይችላል፡፡ ይህ ቅናት በበኩሉ በአመዛኙ ከእምነት ማጣት ጋር የተያያዘ ነው፡፡

አሉታዊ ቅናትን ለማስወገድ
‹‹እርር ድብን ማለት አንገሽግሾኛል፤ ጨጓራዬን ልተፋው ነው፤ አንድ በሉኝ›› የሚሉ ከሆነ ደግሞ ቅናትን ፈፅሞ ልናጠፋው ባንችል እንኳ እንዴት ልንገራው እንደምንችል እንመልከት፡፡
1. መፍትሄው ብዙ ጊዜ ያለው እዛው ፍቅረኛችን እጅ ስለሆነ የሚስማማንን ስሜት ለፍቅረኛችን ግልፅ ማድረግ ይመከራል፡፡
2. ምክንያታዊ ለመሆን መሞከርም ጥቅም አለው፡፡ ለምን በሉኝ? ብዙ ጊዜ ቅናት ያሳደረብን ጉዳይ የሚጨበጥ ነገር ላይሆን፣ ጨርሶ ያልታሰበና ያልተፈጠረ የእኛ አዕምሮ ብቻ ያውጠነጠነው ሊሆን ይችላል፡፡ ስለዚህ የሚያስቀናንን ጉዳይ ከእውነታው ጋር በማስተያየት፣ ምክንያታዊ ለመሆን በመጣር የሚስማማንን ስሜት መርምረን ልንገራቸው እንችላለን፡፡
3. ለራሳችን ያለን ክብር ሊጨምር ይገባል፡፡ በራስ መተማመናችንን ከፍ ያደርጋሉ የምንላቸውን የሌሎችን በራስ መተማመን የማይነኩ ነገሮችን ማድረግ ጠቃሚ ነው፡፡ አለ አይደል እኛ ከፍ ብለን እንድንታይ ሌላው ዝቅ ማለት የለበትም፡፡ ሌላውን ዝቅ ሳያደርጉ እኛን ከፍ የሚያደርጉ ነገሮችን ማድረግ በራስ መተማመናችንን ይጨምራል፡፡
4. ፍቅረኛሞች በአመለካከት ስለሚለያዩ ከሶስተኛ ወገን ጋር ያላቸው የግንኙነት ገደብ ይለያያል፡፡ ስለዚህ የኛን ገደብ ባለማወቅ ፍቅረኛችን ልታስቀይመን/ሊያስቀይመን ትችላለች/ይችላል፡፡ በመሆኑም አስቀድመን የሚመቹንን እና የማይመቹንን ከሶስተኛ ወገን ጋር ያሉ ግንኙነቶች ግልፅ ማድረግ መልካም ነው፡፡
ሰላም ሰንብቱልኝማ!!

The post Health: ቅናት ለፍቅር ምኑ ነው? (በተለይ በፍቅር ውስጥ ሆነው በአፈቀሩት ላይ የሚቀኑ እንዲያነቡት ይመከራል) appeared first on Zehabesha Amharic.

ዕድሜዬ 17 ዓመት ሲሆን በ10+3 ፕሮግራም የኮሌጅ ትምህርቴን ከጀመርኩ ወራትን አስቆጥሬያለሁ፡፡ ከዚህ በላይ ግን በትምህርቴ መግፋት የምችል አይመስለኝም፡፡ የደረሰብኝ ችግር ትምህርቴን ማስተጓጎል ብቻ ሳይሆን አጠቃላዩ ኑሮዬንም ምስቅልቅሉን እያወጣው ነው፡፡
እንደሚታወቀው ክላስ ገብቼ ትምህርት መማር የምችለው ቀን ቀን ነው፡፡ ከአንድ ወር ገደማ በፊት ይመስለኛል ክፍል ውስጥ እንቅልፍ እየወሰደኝ ተቸግሬያለሁ፡፡ ከአየሩ መቃትነት የተነሳ ደግሞ ታግዬ እንኳን የምቆጣጠረው አልሆነልኝም፡፡ ይህ ችግሬ በአሁኑ ጊዜ በጣም እያሳፈረኝ ነው፡፡ ችግሬን እንደ ችግር ቆጥሮ የሚያዝንልኝ ሰው እንኳን የለም፡፡ በስርዓት ተቀምጬ አስተማሪ በምከታተልበት ሳላስበው ዥው ያለ እንቅልፍ ይወስደኛል፡፡ ግንባሬን ከዴስኩ ጋር የማጋጭበት ጊዜም ብዙ ነው፡፡

ይህን ችግሬን ያወቁ ልጆች ወደ ኋላ አካባቢ እንድቀመጥ መከሩኝና ያሉትን አደረግሁ፡፡ እኔ ስተኛ ግን ክላሱ እስኪያልቅ ድረስ የሚቀሰቅሰኝ ሰው የለም፡፡ ይህስ ባልከፋ፣ ሆኖም ወዲያው እንቅልፍ እንደወሰደኝ የሚያሳቅቅ ነገር ይደርስብኛል፡፡ ምን መሰላችሁ ይሄ እንደ ዱካክ ነገር ደረቴን ፈጥርቆ ይዞ እንዳልንቀሳቀስ ያሳስረኝና ሳላስበው ቀጭን ጩኸት አሰማለሁ፡፡ በዚህ ጊዜ ነው መምህሩ መተኛቴን የሚያውቁት፡፡ ተቀስቅሼ ስነቃ ደግሞ ተማሪው ሁሉ እየሳቀብኝ ነው፡፡ ታዲያ በዚህ ሁኔታ እንዴት አድርጌ ነው የምማረው? ይኸው ትምህርት ካቋረጥኩ ሁለት ሳምንት ሆኖኛል፡፡
ይህ ዱካክ እና በቀን የመተኛት አባዜ መፍትሄ አለው ትላላችሁ? ማብራሪያችሁን በጉጉት እጠብቃለሁ፡፡
የእናንተው ጢኖ

መልስ፡- ውድ ጢኖ ለጥያቄህ ልባዊ ምስጋና ለማቅረብ እንወዳለን፡፡ ሳይታሰብ እና ሳፈለግ የሚመጣ የቀን እንቅልፍ በአጠቃላይ ህይወት ላይ የሚያመጣው ምስቅልቅ እጅግ በጣም ከባድ በመሆኑ ቅድሚያ ሰጥተነዋል፡፡

ምናልባት ለትምህርትህ ከምትሰጠው ላቅ ያለ ግምት አንፃር ክፍል ውስጥ ተቀምጠህ የማንቀላፋቱን ነገር የበለጠ ትኩረት ሰጠኸው እንጂ ህመሙስ ከዚህ የባሰም ፈተና ሊያስከትልብህ ይችላል፡፡ ሳይፈልጉ በቀን መተኛት በጣም መጥፎ ክስተት ነው፡፡ ህመሙ በህክምናው ዓለም ‹‹Narcolepsy›› ተብሎ ይጠራል፡፡

‹‹Narcolepsy›› የእንቅልፍ መዛባት ቢሆንም ከሌሎች ተያያዥነት ካላቸው የእንቅልፍ መዛባት ችግርህ ለየት የሚያደርገው ቁጥራቸው በጣም ውስን በሆኑ ሰዎች ላይ የሚከሰት ህመም በመሆኑ ሳቢያ ነው፡፡ አልጋ ላይ ተጋድመው አይናቸውን ቢጨፍኑም እስከ ውድቅት ሌሊት ወይም እስከ ንጋት ድረስ እንቅልፍ አልወስድ ብሏቸው ሲገላበጡ የሚያድሩ ብዙዎች ናቸው፡፡ እንቅልፍ ሸለብ ሲያደርጋቸውም ግማሽ ሰዓት ወይም አንድ ሁለት ሰዓት ብቻ ከቆዩ በኋላ ተመልሰው የሚነቁና የቀረውን የሌሊት ክፍል ፈጠው የሚያድሩም ጥቂት አይደሉም፡፡ ሌሎቹ ደግሞ ጠዋት ከእንቅልፋቸው መንቃት ተስኗቸው ተጋድመው ያረፍዳሉ፡፡ ከዚህ አንፃር ‹‹Narcolepsy›› የጥቂቶች ብቻ ችግር ነው፡፡
‹‹Narcolepsy›› በጣም አደገኛ ህመም ነው፡፡ የዕለት ስራን በወጉ ለማከናወን፣ ለመብላት፣ ለመዝናናት፣ ወዲያ ወዲህ ብሎ ለመንቀሳቀስ የህሊና ንቃት ያስፈልጋል፡፡ በተለይም የመኪና መንገድ ለማቋረጥ፣ ማሽን ላይ ለመስራት ወይም መኪና ለማሽከርከር ብሩህ የአዕምሮ ንቃት ማስፈለጉ የግድ ይላል፡፡

በእርግጥ ይህ ህመም ያለባቸው ሰዎች ተረጋግተው ክፍል ውስጥ መማር ይከብዳቸዋል፡፡ ከዚህ ህመም ጋር በተያያዘ መልኩ የሚከሰት አንድ ሌላ ችግር አለ፤ ይህም በተለምዶ ‹‹ዱካክ›› እየተባለ የሚጠራውና በእንቅልፍ ዓለም ውስጥ ሆነው መሰቃየት ሲሆን በጣም የሚያስጨንቅ ጉዳይ ነው፡፡

ይህ ሁኔታ ‹‹Sleep paralysis›› ተብሎ ይጠራል፤ ዱካክ እንደማለት ነው፡፡ በእርግጥ ከቀን እንቅልፍ ‹‹Narcolepsy›› ጋር ባልተያያዘ ሁኔታም ሊከሰት ይችላል፡፡ በተለይም ታዳጊ ህፃናት እና ጎረምሶች ናቸው በዚህ ችግር የሚጠቁት፡፡

ህመሙ ህክምና ያስፈልገዋል፡፡ አለበለዚያ ግን በሽተኛውን ለአደጋ ወይም ለሞት የሚዳርግ ክስተት ያስከትልበታል፡፡

ውድ ጠያቂያችን የስነ አዕምሮ ሐኪሞች ክትትል የግዴታ ያስፈልጋል፡፡ የሚታዘዙልህ መድሃኒቶች ጥንቃቄ ካልታከለባቸው በጣም አደገኞች በመሆናቸውም ሁኔታህ እየታየ የመድሃኒቶቹ መጠን ያስተካክልም ዘንድ መጠቆም እንወዳለን፡፡

The post Health: በዱካክ ተሰቃየሁኝ፣ ምን መፍትሄ አላችሁ? appeared first on Zehabesha Amharic.

ሕንድ በየመን የሚገኙ ከ4,000 በላይ ዜጎቿን ለመታደግ የምታደርገው ጥረት ዘገምተኛ ነው የሚል ትችት በርትቶበታል። ቢሆንም ዛሬ ከ 1, 000 በላይ ህንዳውያን በአውሮፕላን ወደ አገራቸው መመለሳቸውን ሬውተርስ የዜና ወኪል ዘግቧል። ቻይና የርስ በርስ ጦርነት በሚያናውዛት የመን የሚገኙ ዜጎቿን አጉዛ ጨርሳለች ። የምዕራባውያን ዜጎችና እና የአለም አቀፍ ተቋማት ሠራተኞች የመንን ጥለው የወጡት ሳዑዲ አረቢያ በየመን ላይ የአየር ጥቃት ለመሰንዘር የአካባቢውን አገራት ማስተባበር ስትጀምር ነበር። ኢትዮጵያም በየመን የሚገኙ ዜጎቿን ለመመለስ ጥረት ከጀመረች ሰነባበተች። የኢትዮጵያ መንግስት የውጭ ጉዳይ ሚኒስትር ዶ/ር ቴድሮስ አድሃኖም «የመጀመሪያዎቹ 30 ተመላሽ ወገኖች ከኤደን፣የመን ጅቡቲ ደርሰው የጅቡቲ አምባሳደራችን ተቀብሏቸዋል፡፡ለመመለስ የተመዘገቡት ቁጥር ከ2000 በላይ ሲሆን የጦርነቱ መባባስ የመመለስ ስራችንን አስቸጋሪ አድርጐታል፡፡» በማለት በፌስ ቡክ ማህበራዊ ድረ-ገጻቸው አስፍረዋል። የመን ዋና ከተማ ሰነዓ የሚገኘው ግሩም ተክለ ሐይማኖት ግን ስደተኛ ኢትዮጵያውያኑን ወደ ሀገር የመመለሱ ጥረት ዘገምተኛ ነው ሲል ተችቷል።

በሳዑዲ አረቢያ የሚመራው የአየር ድብደባ ዛሬ ደግሞ የሑቲ አማጽያንን የጦር መሳሪያ ማከማቻ መጋዘን እና የቀድሞውን ፕሬዝዳንት የአሊ አብደላ ሳላህ የትውልድ አካባቢን ኢላማው ማድረጉን ሬውተርስ የዜና ወኪል ዘግቧል። ከዋና ከተማዋ ሰንዓ በስተደቡብ 160 ኪ.ሜ. ርቀት ላይ በምትገኘው ልብ(Ibb) ከተማ በአምስት ቦምቦች በተፈጸመ ድብደባ ሁለት ተማሪዎች መሞታቸውን በሑቲ አማጽያን ቁጥጥር ስር የሚገኘው መከላከያ ሚኒስቴር ድረ-ገጽ አስፍሯል። ዓለም አቀፉ የስደተኞች ድርጅት(The International Organization for Migration) በየመን የሚገኙ ከ11,000 በላይ የውጭ ዜጎችን ወደ አገሮቻቸው ለመመለስ የአስር ሚሊዮን ዶላር የገንዘብ እርዳታ ጠይቋል። ድርጅቱ በየመን እየተባባሰ የመጣውን ቀውስ የሚሸሹ ስደተኞች በተለያየ መንገድ ወደ ጅቡቲና ሶማሊያ በመሻገር ላይ መሆናቸውንም ገልጿል። ግሩም ተ/ሐይማኖት በየመን የኢትዮጵያ ኤምባሲ መታወቂያ አሊያም ፓስፖርት የሌላቸውን ስደተኞች ያገለለ ምዝገባ እየተካሄደ እንደሆነ ይናገራል።

«የኢትዮጵያ ኤምባሲ ምዝገባ የኤሊ ጉዞ ነው። ምክንያቱም ሁለት ሰዎች ናቸው ተቀምጠው የሚመዘግቡት። ፓስፖርትና መታወቂያ ነው መስፈርቱ። ፓስፖርትና መታወቂያ የሌለው ስደተኛ ወደ አገሩ መመለስ ቢፈልግ መታወቂያ ከየት ነው የሚያመጣው? ስለዚህ ከባህር ተርፎ ዛሬ ጥይት ሊበላው ነው ማለት ነው።»

የመን የተሻለ የስራ እድል እና የኑሮ ሁኔታ ፍለጋ ወደ ሳኡዲ አረቢያ እና ወደ ሌሎች የመካከለኛው ምስራቅ አገራት ለመጓዝ የኢትዮጵያውያን ስደተኞች መሸጋገሪያ ነች። በህገ ወጥ የሰዎች አሸጋጋሪዎች አማካኝነት ከጅቡቲ ተነስተው የቀይ ባህርን በጀልባ በማቋረጥ የመን የሚገቡት ኢትዮጵያውያን ስደተኞች ብዙ ጊዜ ሃሳባቸው አይሳካም። ከጥቂት ወራት በፊት 70 የምስራቅ አፍሪቃ አብዛኞቹ ደግሞ ከኢትዮጵያ የሆኑ ስደተኞችን የጫነች ጀልባ ከየመን አልማካ የወደብ ከተማ አቅራቢያ መስጠሟ ይታወሳል። መታገት፤አካላዊ ስቃይ እና መከራ የመንን አቋርጠው መካከለኛው ምስራቅ አገራት ለመድረስ ያለሙ ኢትዮጵያውያን ስደተኞች አጣ ፈንታ ነው። በየመን ለረጅም ጊዜ የኖሩ ስደተኛ ኢትዮጵያውያን ስራ በአሁኑ ቀውስ መስተጓጎሉን ግሩም ተ/ሐይማኖት ተናግሯል።

እሸቴ በቀለ
ነጋሽ መሃመድ

The post የየመን ቀውስና የኢትዮጵያውያ ስደኞች ጉዳይ – የጀርመን ድምጽ ዘገባ appeared first on Zehabesha Amharic.

ትህዲኤን እንደዘገበው በምዕራብ እዝ በ24ኛ ክ/ጦር ውስጥ የሚገኙ የገዢው ኢህአዴግ ጉጅሌ ወታደሮች በየወቅቱ መሳሪያቸውንና ትጥቃቸውን እየሸጡ በመጥፋት ላይ እንዳሉ ተገለፀ::

(ፎቶ ከፋይል)

The post በ24ኛው ክፍለጦር ውስጥ የሚገኙ ወታደሮች ትጥቃቸውን እየሸጡ በመጥፋት ላይ ናቸው ተባለ appeared first on Zehabesha Amharic.

በነሶሊያና ሺመልስ የክስ መዝገብ በተከሰሱት ጋዜጠኛችና የኢንተርኔት አምደኞች ላይ አቃቤ ሕግ ከቆጠራቸው ምስክሮች ዛሬ ተሰሙ፡፡

ከመካከላቸው አንዳንዶቹ ተከሳሾቹ የአቶ ሌንጮ ለታን የፖለቲካ ድርጅት ማኒፌስቶ በኮምፕዩተሮቻቸው ውስጥ እንደተገኙ መመልከታቸውን ተናግረዋል፡፡

ሌሎች ደግሞ ተከሣሾቹ ቢሮም ሆነ መኖሪያ ቤት ከገበያ ላይ የሚገዙ መፅሔቶችና ጋዜጦችን እንደተመለከቱ ለፍርድ ቤት ገልፀዋል፡፡

ለዝርዝሩ የተያያዘውን የመለስካቸው አምሃን የችሎት ዘገባ ያዳምጡ፡፡

The post በዞን ዘጠኝ ተከሣሾች ላይ ዶሴ የአቃቤ ሕግ ምስክር ተሰማ – VOA appeared first on Zehabesha Amharic.

ባንድ ወቅት የጨርቆሱ ጓደኛየ ኢልያስ ኣወቀ መኪናው ውስጥ ተቀምጦ ከዚያ በፊት ልብ ብሎት የማያውቀውን ኣንድ የቦብ ዘፈን ይሰማል፡፡ natural mysticከሚለው ዘፈኑ ነው፡፡

ቦብ ዘፍኖ ዘፍኖ የሆነ ቦታ ላይ ሲደርስ፤

Many more will have to suffer
Many more will have to die

ሲል ኢልያስ ገርሞት why? ኣለ፡፡

ቦብም Don’t ask me why ብሎ ቀጠለ፡፡

ዘፋኙና ኣድማጩ የዘመንን እና የቦታን ኣጥር ጥሰው ተገናኙና ተነጋገሩ፡፡ተዋሃዱ ማለት ይሻላል፡፡ ዮሃንስ ኣድማሱ ባንድ ግጥሙ “ዳንሱን ከዳንሰኛ መለየት ኣይቻልም” ያለው ይሄን ግጥም ኣይነቱን ኣጋጣሚ በደንብ ይገልጸዋል፡፡

ቦብ ፍልስፍናን መዝፈን እንደሚቻል ያሳየ ድምጻዊ ነው፡፡ እንደገባኝ የፍልስፍናው ዋና ጭብጥ“ ለውጥ በትግል ይመጣል” የሚል ነበር፡፡ ግን ታግሎ ታግሎ ወደ መጨረሻው የደከመው መሰለኝ፡፡ ከላይ የጠቀስኩት natural mystic የተባለ እንጉርግሮው ኣየሁት ታገልኩ ታገልኩ ተረታሁ የሚል ይመስላል፡፡ ። ግጥም ካንዱ ቋንቋ ወደ ኣንዱ መተርጎም ብዙ ኣያሰደስተኝም፡፡ከዚያ ይልቅ በወደድኩት ግጥም መንፈስ ያልወጣ የራሴን ሃሳብ መጫር እመርጣለሁ፡፡እና ቦብን በኣማርኛ ሳዳምጠው፤

“ኣይመረመሬው ከሃገረ ሰማይ
በፍጥረታቱ ላይ
መከራና ሞቱን እያፈራረቀ እንደሾላ ሲጥል
ኣሜን ብለህ ቀጥል”
የሚል ነው የሚመስለኝ፡፡
ዛሬ ትልልቅ ኣገሮች ለጥቅማቸው ሲሉ ትንንሾሽን ባንድ ሌሊት ኣፍርሰው በሚያድሩበት በዚህ ዘመን ፤ፈሪሃ እግዜር ኣለን የሚሉ ሰዎች ወንድሞቻቸውን በካሜራ ፊት ኣሰልፈው እንደ ፋሲካ በግ በሚያርዱበት በዚህ ዘመን፤ በርግጥ የሰው ልጅ ሊሸሻል የሚችል ፍጡር ነው？ የሚለውን ጥያቄ ባዎንታ መመለስ ይከብዳል፡፡እና በዚህ ዘመን ማለዳ ላይ get up stand upየሚለውን ዘመን ኣዳምጣለሁ፤ ሲመሽ natural mysticየሚለውን ኣምናለሁ፡፡ከኔ የተሻለ ብሩህ ኣይን ያላቸው ወዳጆቼ ደግሞ በቦብ ዜማ ኣፍቅረዋል፡፡በቦብ ዜማ ደንሰዋል፡፡በቦብ ዜማ ኣስበዋል፡፡ በቦብ ዜማ ቀኖቻቸውን ኣስውበዋል፡፡

ቦብ ቀዳማዊ ሃይለስላሴ ኣምላክ ናቸው ይል ነበር ይባላል፡፡ልንታገሰው የሚገባ ጠቃሚ ተረት ነው፡፡የኣይሁድ የህንድ የፋርስ ነቢያት በመሲህነትና በኣምላክነት ደረጃ በሚመለኩበት ዓለም ውስጥ ኣንድ ኣፍሪካዊ ንጉስ እንዲህ ያለ ወግ ቢደርሰው ምን ችግር ኣለው？

ቦብ ማርሊ ቀንደኛ ኣጫሽ ስለሆነ መታሰቢያ ኣይገባውም እያሉ የሚከራከሩ ወዳጆች ገጥመውኛል ፡፡ ወይ የወንቃው ጊዮርጊስ！ እንደዚህ ክርክር ከሆነ የቸርቺል ጎዳና መፍረሰ ኣለበት ማለት ነው፡፡ቸርቺል በዘመነ መንግስቱ ታታሪ ኣጫሽ ስለነበረ ዛሬ በስሙ ሲጃራ ተሰይሞለታል፡፡

ቦብ ከመወለዱ መቶ ኣመታት በፊት ጸጉርን መገማመድም ሆነ እጸ ፋርስ መጠቀም ለኢትዮጵያ እንግዳ ኣልነበረም፡፡ ኣለቃ ኣጽሜ የተባሉ የኣገራችን ታሪክ ጸሃፊ እጸ ፋርስ ማጨስ የተጀመረው በልብነድንግል ዘመን እንደሆነ ይገምታሉ፡፡ለኣእምሮ ብሩህነት ፍቱን ነው እየተባለ ብላቴናው ሁሉ በቂጣና በማር እየደባለቀ የሚበላው ኣብሾም የሃሽሽ ዝርያ ነው፡፡“ጠላ ያለ ጌሾ፤ ቅኔ ያለ ኣብሾ እየተባለ ኣዳሜ ያንን እየበላ ሲቀባዥር ኖሯል፡፡ ብዙ እጾች በስማቸው ሳይሆን በብእር ስማቸው ተሸፍነው ስለኖሩ የሌሉ ይመስላሉ፡፡እንኳን ተራው ሰው ኣንዳንድ የሃይማኖት መሪዎች እንኳ ተጠቃሚ ነበሩ፡፡ቴዎድሮስን ያነገሱት የግብጹ ኣቡነ ሰላማ የኦፒየም ተጠቃሚ እንደነበሩ በመቅደላ ኣብሯቸው የተሳረው ሃኪም ሄነሪ ብላንክ ነግሮናል፡፡

ዛሬ ቦብ ማርሊ ሰው ይሁን ኣሞራ ለይተው የማያውቁ የጠረፍ ኣገር ባለኣገሮች ያለ ያእቆብ መሰላል ወደ ሰባተኛው ሰማይ ኣድርሶ የሚመልስ እጽ ያጨሳሉ፡፡ መቸስ ኣንዳንዱ ሰው በእንጀራ ብቻ ኣይኖርም፡፡ኣንዳንድ ነገሮችንም ይጨምራል፡፡

የላቀ ችሎታ ያላቸውን ሰዎች ከሌላው ልዩ ባደረጋቸው ችሎታ እንጂ ከሌላው ሰው ጋራ በሚጋሩት ድክመት መመዘን ኣሪፍ ኣደለም፡፡ ኣሁን ኣሁን በትልልቅ ሰዎች የግል ምርጫቸው ጥልቅ ብሎ መፈትፈትና ስማቸውን ማዋረድ የፊስቡክ ኣመል ሆኗል፡፡ ጥሩነሽ ውጭ ኣገር ወለደች ብሎ ርር ድብን የሚል ሰው በሃገር ፍቅር ስም ንፍገቱንና ድድብናውን እየገለጸ ነው፡፡ ኣስቡት ኢትዮጵያዊ ዜግነት ኢትዮጵያን የመውደድና የመጥላት ምልክት እንዴት ሊሆን ይችላል？ በክፉ ቀን የደረሱልን ኣለም ኣቀፍ ኣርቲስቶች የኢትዮጵያ ዜጋ ኣይደሉም፡ ፡በሌላ ገጽ፤ የምጽዋት እህል ሽጦ ታንክ የሚሸምት ኢትዮጵያዊ ባለበት ኣገር ውስጥ ዜግነትን እንደ ትልቅ የቅድስና መለኪያ ማድረግ ኣያሳምንም፡፡ የሰውን ኣገር ሰው በጭፍን መጥላትxenophobiaን ከሃገር ፍቅር ስሜት ጋር የሚያምታቱ በርክተዋል፡፡

ባገራችን ከስርኣት ኣልበኞች በላይ ግፍ ሲሠሩ የኖሩ ህዝብን ስርኣት እናስይዛለን የሚሉ ሰዎች ናቸው፡፡በኣጼ ዮሀንስ ኣራተኛ ዘመን ትምባሆ ሲያጨስ የተገኘ ሰው ኣፍንጫውንና ከንፈሩን ይፎነን （ይቆረጥ）ነበር፡፡ለዝርዝሩ Gerald h portal ፤ My mission to Abyssinia ገጽ 149፡፡
በሚያጨሰው እጽ ተገፋፍሮ ይህን መሰል ጭካኔ የሰራ ሰው መኖሩን ኣላውቅም፡፡

ወለላወቼ፤ ነገርን ነገር እየገፋ እዚህ ኣደረሰኝ እንጂ ስለ ማጨስን ለመደገፍም ሆነ ለመቃወም ኣላማ የለኝም፡፡ ኣንድ የባነነ የጥንት ኣበሻ ተናገራት ኣባባል ኣለች፡፡“ኣመልህን በጉያህ ስንቅህን በኣህያህ ”ትላለች፡፡ኣንድ ግለሰብ የዜግነት ግዴታውን እስከተወጣ ድረስ፤ የግል ኣመሉ ሁላችንም የምንጋራውን ኣደባባይ የማይጋፋ እስከሆነ ድረስ፤ ስራው ያውጣው ብለን ልንተወው ይገባል ማለት ነው፡፡

The post ኣመልህን በጉያህ ስንቅህን በሲኖትራክ （በእውቀቱ ሥዩም） appeared first on Zehabesha Amharic.

(ዴ.ም.ህ.ት) በ12ኛ ክፈለ ጦር ለሚገኙ ወታደሮች ደመወዝ ለመክፈል ሲሄዱ የነበሩ አራት መኮነኖች ከመተማ ወደ ኮር-ሁመር በሚወስደው መንገድ ላይ ተገድለው እንደተገኙ ከአካባቢው የደረሰን መረጃ አመለከተ::

እነዚህ በወታራዊ መኪና እየተጓዙ የነበሩ የ12ኛ ክፍለ ጦር የፋይናንስ ሰራተኛ የሆኑ አራት መኮነኖች መጋቢት 2/2007 ዓ.ም ከመተማ ወደ ኮር ሁመር በሚወስደው መስመር ላይ ሲደርሱ ማንነታቸው ባልታወቁ ታጣቂዎች እንደተገደሉ የገለፀው ይህ መረጃ ይዘውት የነበረው የክፍለ ጦሩ ጠቅላላ ደመወዝ 4 ሽጉጥ፤ 4 ክላሽና ሌላም ንብረታቸውን ባልታወቁ ገዳዮች እንደተወሰደ ሊታወቅ ተችሏል::

እነዚህ ለጊዜው ስማቸው ያልተገለፀው ሟቾች የስርዓቱ የወታደር አባላት ሁለት የፋይናንስ አባላት የሺህ አለቃ ማዕረግ ያላቸው አንድ ሻንበልና አንድ ደግሞ የመቶ አለቃ ማዕረግ ያላቸው አራት መኮነኖች እንደሆኑ የደረሰን መረጃ አክሎ አስታውቋል::

ምንጭ. ዴ.ም.ህ.ት

The post በ12ኛ ክፈለ ጦር የሚገኙ አራት መኮነኖች ተገድለው ተገኙ appeared first on Zehabesha Amharic.

የመን ጭር ብላለች፡፡ ብዙዎች እየሞቱ ነው፡፤ የሞቱን ጽዋ እየተጎነጩ ያሉት ግን ኢትዮጵያዊያኖችም ጭምር ናቸው፡፡ በጭርታዋ ውስጥ ግን በጦር መሳሪያ የተቀነባበረ ሞቅ ደመቅ ያለ ጩኸት ያናውጣታል፡፡ ከየአቅጣጫው ተኩሱ ርችት መስሎ ያዳምቀዋል፡፡
የየመኗ ዋና ከተማ ሰነዓ ታጥቦ እንደተሰጣ ጨርቅ በመውደቅና ባለመውደቅ መካከል ሆና ትራገባለች፡፡ ያልለመደባትን ዝምታን ተጎናጽፋ ግርግሩ ሁካታው የመኪናው ጩኸት ከስሞ ድብዝዝ ብሎ ደስታዋን የተነጠቀች ልጃገረድ መስላ ፈገግታዋ መወየብ ብቻ ሳይሆን ጠውልጎ ነው ያለችው የየመኗ ሰነዓ፡፡
ነዳጅ የለም፡፡
መብራት ብልጭ ድርግም ሲል ናይት ክለብ ያሉ ያስመስሎታል፡፡ ሱቆች እየተዘጋጉ ነው፡፡ የእቃዎች ዋጋ በእጥፍ ጭምሯል፡፡ ከተማዋ ጭር ብላለች፡፡ ህዝቡ እየሸሸ ወደ ገጠር ገብቷል፡፡ ከተማ ውስጥ ጥቂት የመናዊያን እና ጥቂት ሶማሊያዊያን እና ኢትዮጵያዊያን ናቸው ሰነዓን ያሉባት፡፡
ሰሞኑን በርካታዎች እየረገፉበት ያለው የመን ላይ በሳዑዲ አረቢያ አስተባባሪነት እየተወሰደ ያለው የአየር ጥቃት በርካታ ሲቪሎች እየሞቱ ነው፡፡ ህጻናት በአሰቃቂ ሁኔታ እየተጎዱ ነው፡፡ በአየር ጥቃቱ ኢትዮያዊያንም በተለያየ ቦታ እየተጎዱ ነው፡፡ በተለይ በርካታ ኢትዮጵያዊያ በአደኑ ጦርነት ምክንያት ረግፈዋል፡፡
ያናገርኳቸው አደን ነዋሪ የሆኑ ኢትዮጵያዊያኖች ኮርማክሰር የሚባለው አካባቢ ሜዳው ላይ ካርቶን እየዘረጉ የሚተኙ በርካታ ሱማሊያዊያን እና ኢትዮጵያዊያን እንደተኙ ነው ጦርነቱ በተነሳው፡፡ በዛው ዳግም ያላዩዋቸው ስልክ ቢደውሉላቸው ስልካቸው ዝግ መሆኑን የተባገሩ አሉ፡፡ ክሬተር የተባለ አካባቢ ኢትዮጵያዊኖች የሚኖርበት ህንጻ ተመቶ ሙሉ ለሙሉ ሲጎዳ ውስጡ ከነበሩ 17 ሰዎች መሞታቸው ታውቋል፡፡ ምን ያህሉ ይሆኑ ኢትዮጵያዊ?
….በባህር እየገቡ የነበሩትም በየቦታው የነበሩ ኢትዮጵያዊያን መጎዳታቸው ይገመታል፡፡ በትክክልም በባብል መንድብ አካባቢ የነበሩ ስደተኞች የገቡበት አልታወቀም፡፡ የኢትዮጵያ መንግስት ዜጎቼን ለማስገባች እየመዘገብኩ ነው ቢሊም አመዘጋገባቸው አዝጋሚ መሆኑን ለማጣራት ባደረኩት ሙከራ አረጋግጫለሁ፡፡ ወደ ሀገር የማስገባቱ ሁኔታ ‹‹ቁቅም ከፈስ ተቆጥራ..›› የሚያስተርት ነው፡፡ ከ150.000 በላይ ኢትጵያዊያን ካለበት ቦታ 30 እና 25 ሰው በባህር አሻገርን እየተባለ ፕሮፖጋንዳ ይሰራል፡፡ እንዚህ ሰዎች ግን ከአደን ወደ ኢትዮጵያዊያን ቻይናዎችን ለምነው የተሸገሩ ሲሆኑ የተቀሩት እና አሁንም እየገቡ ያሉት ከሰነዓ ሁዴዳ የተባለው የወደብ ከተማ በመሄድ በግል ወደ ጅቡቲ የሚገቡ ናቸው፡፡
እኔ ባለኝ መረጃ መሰረት ትላንትና ከሰነዓ 14 ሰዎች ወደ ሁዴዳ መሄዳቸው ታውቋል፡፡ በዛሬው ሀሙስ እለት ደግሞ 21 ሰዎች አንድ ሚኒባስ በመኮናተር ወደ ወደብ ከተማዋ ሁዴዳ አምርተዋል፡፡ ማን ያውቃል ነገ እና ዛሬ ማታ በEBC ቲቪ (እንዳሻው ቲቪ እለዋለሁ እኔ እንዳሻው ስለሚቀባጥር) ዜና ላይ እንዚህ በራሳቸው ተንገላተው የገቡትን ዜጎች እናያቸው ይሆናል፡፡

በዚሁ ልክ ሰዉን ‹‹ኑ..›› እያለ ወደ ሀገር የሚያስገባ እየመሰላቸው ጓዛቸውን ይዘው ሲሄዱ ኤርፖር እያደረሰ የሚመልሳቸው ኤምባሲው አሁንም ህዝቡን ዥዋዥዌ እያጫወተ ነው፡፡ እንዲያውም አንዱ ኤርፖርቱን በነካ እያጫወቱን ነው፡፡ ቤት ንብረታቸውን በትነው እቃቸውን በርካሽ ሸጠው የሚሰጡትን ሰጥተው እወስዳችኋለሁ እያሉ ሶስት ጊዜ ከማመላለስ ውጭ የሰሩት ፋይዳ የለም፡፡

The post (የየመን ጉዳይ ) ኢትዮጵያዊያን በጦርነቱ እየረገፉ ነው – ጋዜጠኛ ግሩም ተክለሃይማኖት ከየመን እንደዘገበው appeared first on Zehabesha Amharic.

Photo File

አቶ ጋአስ አህመድ እንደገለጸው ከሶስት ወራት በፊት ከመሬት ጋር በተያያዘ ተፈጥሮ የነበረው ግጭት ተባብሶ ባለፈው ሰኞ ደም አፋሳሽ ግጭት ተካሂዷል። በግጭቱም ከአንደኛው ጎሳ 9 ከሌላኛው ደግሞ 6 ሰዎች መሞታቸውን የገለጹት አቶ ጋአስ የግጭቱ መንስኤ ከመሬት ባለፈ የጠመንጃ መስፈታት አጀንዳም እንዳለው ገልጸዋል። የመከላከያ ሰራዊት አባላት አካባቢውን መቆጣጠራቸውን የገለጹት አቶ ገአስ፣ የአካባቢውን ህዝብ መሳሪያ ማስፈታታቸውን ገልጸዋል።

ችግሩን አስቀድሞ መፍታት ሲገባ እዚህ ደረጃ እስከሚደርስ ድረስ መጠበቁ አሳዛኝ መሆኑም አክለው ተናግረዋል።

The post በአፋር በሁለት ጎሳዎች መካከል በተፈጠረ ግጭት በርካታ ሰዎች ተገደሉ appeared first on Zehabesha Amharic.

(ዘ-ሐበሻ) የኦሮሞ ፌዴራሊስት ኮንግረስ በሰሜን አሜሪካ የጠራውን ሕዝባዊ ስብሰባ የፊታችን ቅዳሜ እንደሚጀምር ለዘ-ሐበሻ የደረሰው መረጃ አመለከተ:: በቀጣዩ የግንቦቱ ምርጫ የሚወዳደረው የኦሮሞ ፌደራሊስት ኮንግረስን በገንዘብም ሆነ በሞራል ለማጠናከር የተጠራውን ስብሰባ ለመምራት የድርጅቱ ዋና ጸሐፊ ኦቦ በቀለ ነጋ ከደቂቃዎች በፊት ሚኒያፖሊስ ሴንት ፖል ኤርፖርት ደርሰዋል::

የኦፌዴን ስብስባ የፊታችን ቅዳሜ ኤፕሪል 11 ቀን 2015 ዓ.ም በሚኒሶታ የሚጀመር ሲሆን በቀጣይም በሂውስተን እና በሳንዲያጎ ቤይ አካባቢ ኤፕሪል 18 እና 19; በዋሽንተን ሲያትል ኤፕሪል 25, 2015, በ ዋሽንግተን ዲሲ ሜይ 2, 2015 እንዲሁም ሜይ 3,2015 በጆርጃ አትላንታ ተደርጎ ይጠናቀቃል:: የኦፌዴን ዋና ጸሐፊ ኦቦ በቀለ ነጋ የሚገኙ ሲሆን ዋና ጸሐፊው በነዚህ የሰሜን አሜሪካ ታላላቅ ግዛቶች በመዘዋወር የሃገሪቱን ወቅታዊ ሁኔታ እንደሚያስረዱ ይጠበቃል::

The post የኦፌዴን ዋና ጸሐፊ ሚኒሶታ ገቡ * ከፊታችን ቅዳሜ ጀምሮ በአሜሪካ ታላላቅ ከተሞች ሕዝባዊ ስብሰባ ያደርጋሉ appeared first on Zehabesha Amharic.

አህመዲን ጀበል ከእስር ቤት የፃፉትን አዲሱን “ፈርዖን የአምባገነኖች ተምሳሌት” መጽሐፍ በማስመልከት የተዘጋጀ ልዩ ዘገባ ከኢሳት

The post አህመዲን ጀበል ከእስር ቤት የፃፉትን አዲሱን “ፈርዖን የአምባገነኖች ተምሳሌት” መጽሐፍ በማስመልከት የተዘጋጀ ልዩ ዘገባ ከኢሳት appeared first on Zehabesha Amharic.

በትግራይ ምእራባዊ ዞን ወልቃይት ወረዳ ማይ ገባ ከተማ ውስጥ የሚገኙ የፌደራል ፖሊስ በአካባቢው የሚገኙትን እለታዊ ስራቸውን በሚያከናውኑ ንፁኃን ሰዎች ላይ የተቃዋሚ ድርጅት ተላላኪዎች ናችሁ በማለት በደል እያደርሱባቸው እንደሚገኙ ተገለፀ ሲል ደህሚት አስታወቀ::

በምንጮቹን ጠቅሶ ደህሚት እንደዘገበው በወልቃይት ወረዳ ማይ ገባ ከተማ ውስጥ የሚገኙ የስርአቱ ፌደራል ፖሊስ አባላት ሰርተው ኑሮአቸውን የሚመሩ ዜጎቻችንን የትጥቅ ትግል ለሚያካሂዱ ድርጅቶች የተላካችሁ ናችሁ፤ በረሃ ላይ የደበቃችሁትን መሳሪያም አስረክቡን በማለት መጋቢት 1/2007 ዓ/ም በርካታ ንፁሃን ወገኖች በገመድ አስረው እየደበደቧቸው መዋላቸውን ለማወቅ ተችሏል::

መረጃው ጨምሮ እንዳስረዳው ምንም አይነት ወንጀል ሳይኖራቸው ባስከፊ ሁኔታ እየተደበደቡ የዋሉት በርካታ ወገኖች ቢሆኑም በተለይ ወርቅ ለቀማ ላይ የነበሩትን 6 ሰዎች በአስከፊ ሁኔታ ተደብድበው ከፍተኛ ጉዳት የደረሰባቸው ሲሆን ከተደበደቡት ውስጥም የአስገደ ፅንብላ ተወላጅ የሆነው ሓዱሽ ታፈር የተባለ ንፁህ ወገን ወድያውኑ መሞቱን መረጃው አክሎ አስረድቷል::

በሌላ ዜና ከሁመራ እስከ ትክል ድንጋይ ድረስ ያሉት የስርዓቱ ወታደሮች ህዝቡን እያንገላቱት መሆናቸውን ምንጮች አስታወቁ ሲል ደህሚት ዘግቧል::

በመረጃው መሰረት ከተለያዩ ክፍሎች የተውጣጡ አዲስ ወታደሮች ከሁመራ ጀምረው እስከ ትክል ድንጋይና ሌሎች አካባቢዎች ሰፍረው እንደሚገኙና በተለይ በትግራይ ምእራባዊ ዞን ህዝቡ ከቦታ ወደ ቦታ ተንቀሳቅሶ እለታዊ ኑሮውን እንዳይመራ እንቅፋት ሁኖው እንደሚገኙ ተገለፀ::
መረጃው በማስከተል እነዚህ ከስነ ምግባር ውጭ የሆኑ ወታደሮች በሴት እህቶቻችን ላይ ወሲባዊ አመፅ እየፈፀሙ ስለሚገኙ። በኤች አይ ቪ ኤዲስና ሌሎች ተላላፊ በሽታዎች እየተጠቁ በመሆናቸው ምክንያት ወላጅ የሌላቸውን ልጆች ለማሳደግም በመገደዳቸው ምክኒያት ነዋሪው ህዝብም ድርግቱ መፍትሄ እንዲደረግለት በማለት ወደ ሚመለከታቸው አካላት ያቀረበውን ጥያቄ እስካሁን መፍትሄ እንዳላገኘበት ለማወቅ ተችሏል::

The post በወልቃይት ወረዳ የፌደራል ፖሊሶች ባደረሱት ድብደባ የአንድ ሰው ሕይወት ጠፋ * * ከሁመራ እስከ ትክል ድንጋይ ወታደሮች ሴት እህቶቻችን ላይ ወሲባዊ ጥቃት ይፈጽማሉ appeared first on Zehabesha Amharic.

በደቡብ ወሎ ዞን፤ ደሴ ከተማ ውስጥ አንድ የፖሊስ አባል ማንነታቸው ባልታወቁ ሰዎች መገደሉን ደህሚት ዘገበ::

በተገኘው መረጃ መሰረት በአማራ ክልል፤ ደቡብ ወሎ ዞን፤ ደሴ ከተማ፤ 05 ቀበሌ፤ አሬራ በተባለው አካባቢ ሳጅን ሃቢብ እንዳለ የተባለው የጎጃም አካባቢ ተወላጅ የሆነው የፖሊስ አባል ማንነታቸው ባልታወቁ ሰዎች መጋቢት 2/2007 ዓ/ም ተገድሎ መገኘቱ ታውቋል::

መረጃው በማስከተል በአማራ ክልል የሚገኘው ህዝብ በአገር ደረጃ ለ5ኛ ግዜ በሚደረገው አስመሳይ ምርጫ አንሳተፍም፤ የምንመርጠው አካልም የለም ብሎ በመቃወም ላይ ባለበት ባሁኑ ግዜ በስርዓቱ ካድሬዎችና ፖሊሶች ተገዶ ከቤቱ እንዲወጣ በማድረግ የማትመርጥበት ምክንያት ምንድ ነው እያሉ እረፍት ነስተውት እንደሚገኙ የገለጸው መረጃው በፖሊሱ ላይ የተወሰደው እርምጃም በድርጊቱ የተቆጡት ወገኖች የፈጸሙት ሊሆን እንደሚችል በርካታ ወገኖች በመገመት ላይ እንደሚገኙ ለማወቅ ተችሏል::

The post በደቡብ ወሎ ደሴ ከተማ አንድ ፖሊስ ተገድሎ ተገኘ appeared first on Zehabesha Amharic.

ገዛኸኝ አበበበ

ወያኔ ኢህአዲግ የስልጣን ወንበሩን በሀይል ከተቆናጠጠበት ጊዜ ጀምሮ በስልጣን በቆየባቸው በሃያ ሶስት አመታቶች በየጊዜው በህዝባችን ላይ የሚያደርሰው ግፍ እና ጭቆና ከእለት ወደ እለት እየጨመረ መምጣቱ በአደባባይ የሚታይ እውነታ ሲሆን ከዚህም ጨቋኝና ገዳይ ስርዓት የተነሳ የሀገሪቷ ዚጓች በሀገራቸው ላይ በሰላም መኖርና የነጻነትን ሀየር መተንፈስ በማይችሉበት ክፉ ሁኔታ ውስጥ ይገኛሉ::

በአሁኑ ጊዜ ከማንኛውም ጊዜ በተለየ መልኩ ገበሬው፣ ተማሪው፣ ፣ አስተማሪው ፣ ነጋዲው፣ ጋዜጠኛው ፣ ስፖርተኛው፣ ዘፋኙ፣ አርቲስቱ፣ ወዘተ……በማንኛውም እርከን ላይ የሚገኙ የህብረተሰብ ክፍሎች በሀገራቸው ላይ በነጻነት መኖርን ስላልቻሉ ባገኙት አጋጣሚ ሁሉ ሀገራቸውን ትተው እየወጡ በየጊዜው ለስደት ሲዳረጉ ይታያሉ:: ምክንያቱም ዜጓች በሀገራቸው በተረጋጋ ሁኔታ ለመኑር የሚያስፈልጋቸው ዋንኛውና ቁልፉ ነገር ሰላም እና ነጻነት ነውና::ማንኛውም ሰው በሚኖርበት ሀገር በሚኖርበት ሰፈር ወይም አካባቢ እና በሚኖርበት ቤት ውስጥ ሳይቀር በሰላምና በነጻነት መኖርን ይፈልጋል:: ነጻነት በምንም ዋጋ ሊተመን የማይችል ትልቅ ጸጋ ነውና:: ሰላም እና ነጻነት በሌለበት ሀገር የሚኖሩ ዜጓች፣ መብታቸው ይረገጣል ፣ ነጻነታቸው ይታፈናል ዜጓች ለእስር፣ ለሞት፣ እና ለስደት ይደጋሉ::በሀገራችን ኢትዮጵያ የምናየውም ይህንኑ ነው::

እንደ አለመታደል ሆኖ ሀገራችን ኢትዮጵያም በአለም ላይ ካሉት ሀገራት በግንባር ቀደምነት የሰው ልጆች ነጻነታቸውን እና መብታቸውን ከሚገፈፉበት ሀገር ተርታ እንደምትገኝና የሀገሪቷ ዜጓች በጨቋኙ ገዥ ስርዓት ነጻነታቸውን ተገፈው ባሪያ ሆነው የሚኖሩበት ሀገር እንደሆነች በየጊዜው ከሚወጡ አለም አቀፍ ሪፖርቶች መረዳት ይቻላል::

ዜጓች በከፍተኛ ሁኔታ ለስደት እየተዳረጉ ባሉበት በአሁኑ ወቅት በኢትዮጵያ ሕዝብ ላይ የሚደረገው አፈና፣ እስራት እና ግድያው በከፍተኛ ሁኔታ ተባብሶ የሚገኝ ሲሆን ይህም በገሃድ እየታየ ያለ እውነታ ነው :: በእነዚህ ሃያ ሶስት አመታቶች በፋሺስቱ የወያኔ ቡድን ነጻነቱ እየተገፈፈና መብቱ እየተረገጠ ያለው የኢትዮጵያ ሕዝብም ከእንግዲህ ወዲህ ይሂን የወሮበሎች ቡድን እሽሩሩ እያሉ የመኖር አቅም ያለው አይመሰልም :.: በአሁኑ ጊዜ ከየአቅጣጫው ከሚሰሙ ነጻነት ናፋቂ የኢትዮጵያኖቸ ሕዝብ ጩኸት ድምጽ መረዳት እንደሚቻለው ሕዝባችን ለወያኔያዊ አንባገነን ስርዓት መገዛትን የጠላበትና ከመቺውም ጊዜ በተለየ መልኩ እምቢ አሻፈረኝ ብሎ ነጻነቱን ለማስመለስ በአንድነት ለመቋም የተነሳበት ዘመን ላይ የደረሰን በሚያስመስል መልኩ ከየቦታው የሚሰማው የነጻነትና የሰላም ናፋቂዎች የጀግንነት ድምጽ ምስክር ነው::

በቅርቡ እንኳን እንደምናየው የቀድሞው የግንቦት የግንቦት 7 የፍትህ፣ የነፃነትና የዲሞክራሲ ንቅናቄያአሁኑ አርበኞች ግንቦት 7 የፍትህ፣ የነፃነትና የዲሞክራሲ ንቅናቄ ዋና ጸሀፊ የአቶ አንዳርጋቸው ጽጌን ከየመን ታግተው በወያኔ እስር ቤት ታስረው በግፍ እየተሰቃዩ እንዳለ ይታወቃል የነጻነት ታጋዩ አቶ አንዳርጋቸው በወያኔ ሴራ ከየመን ታግተው በወያኔ እጅ ላይ መውደቃቸው ከተሰማ ጊዜ ጀምሮ የኢትዮጵያ ሕዝብ የወያኔን አውሬነት በይበልጥ በመረዳት ከዳር እስከ ዳር በአንድነት መቋሙን እያስመሰከረ ሲገኝ የፖለቲካ ግለቱም ጨምሮ የአረመኔው የወያኔን ቡድን በከፍተኛ ሁኔታ አርበድብዶት እንደሚገኝ ወያኔ ከሚሰራው ስራና ከሚያደርጋቸው ድርጊቷች ማወቅ ይቻላል::የአቶ አንዳርጋቸውን መታሰር ተከትሎ እየከረረ ያለውን የሕዝብን ቁጭትና ቁጣ ለማጥፋት በሚያስመስል መልኩ ይኼ አረመኔው መንግስት በአሁኑ ጊዜ በሀገር ቤት በሰላማዊ መንገድ ለመብታቸው እና ለኢትዮጵያ ሕዝብ ነጻነት በህጋዊ መንገድ እንኮን ሳይቀር እየታገሉ ያሉትን ሰዎች ከየመንገዱ እየለቀመ እስር ቤት አስገብቶ እያሰቃያቸው እንዳለ ይታወቃል ::ይህንንም ተከትሎ ሁላችንም እንደምናውቀው የአንድነት ፓርቲ ሥራ አስፈጻሚ አባልና ሕዝብ ግንኙነት ኃላፊ አቶ ሀብታሙ አያሌው፣ የፓርቲው ምክር ቤት አባል አቶ ዳንኤል ሺበሺ፣ የአረና የሕዝብ ግንኙንት ኃላፊ አቶ አብረሃ ደስታና የሰማያዊ ፓርቲ ምክር ቤት ምክትል አፈ ጉባዔ አቶ የሸዋስ አሰፋን ጨምሮ ሌሎችም እጅግ ብዙ ለየጻነታቸው የሚታገሉ ኢትዮጵያን ወገኖቻችን የወያኔ መንግስት በግፍ አስሯቸው እያሰቃያቸው እንደሚገኝ ይታወቃል::

ይኼ መንግስት እሱን የሚቃወሙትን ሰዎችንና በድፍረት እየተጋፈጡት ያሉትን የፖለቲካ መሪዎች አአሸባሪ የሚል የታርጋ ስም እየለጠፈላቸው ወደ እስር ቤት መወርወር የተጠናወጠው ክፉ ባህሪው ሆኖል:: የፖለቲካ መሪዎችንና የፖለቲካ ሰዎችን ማፈንና እየያዙ ወደ እስር ቤት መወርወር ይበልጥኑ ትግሉን እያከረረውና የኢትዮጵያን ሕዝብ ይበልጥኑ ለነጻነቱ በመታገል ለድል እያነሳሳው ነው እንጂ ፈጽሞ ከትግል ወደ ኋላ እይመለሰው እንዳይደለ የወያኔ ባለስልጣኖች ጠንቅቀው ሊያውቁት የሚገባቸው ነገር ይመስለኛል:: የኢትዮጵያ ሕዝብ ነጻነትን ተጠምቷል ::Freedom is more than food በአሁኑ ሰአት በሀገር ቤትም ሆነው በሰላማዊ መንገድ እየታገሉ ያሉ የፖለቲካ ድርጅቶች ይሁኑ ወይም በውጭ ሆነው በሁለገብ ትግል እየታገሉ ያሉ የፖለቲካ ድርጅቶች አላማቸውም ሆነ ጥያቄያቸው አንድ ነው የስልጣን ወይም የገንዘብ ሳይሆን የነጻነት ጥያቄ ነው :: የኢትዮጵያ ሕዝብ ነጻነት ያስፈልገዋል ::እኛም ሰላምና ነጻነት የናፈቀን ህዝቦች መብታችንን ለማስከበር ለነጻነት ከሚታገሉ ድርጅቷች ጎን በመቆም ለነጻነታቸው ሲታገሉ በወያኔ አንባገነን ትህዛዝ ወደ እስር እየተወረወሩ እና በግፍ እየተሰቃዩ ላሉ ወገኖቻችን ከመንኛውም ጊዜ በተለየ መልኩ ሀገራዊ ስሜት ተሰሞቶን ልንጮህላቸውና የእነሱንም ፈለግ በመከተል ከሁለት አስርት አመታት በላይ የዜግነት መብታችንና እየረገጠና ነጻነታችንን እያፈነ ህዝባችንን ለስደት እያደረገ ያለውን ያለውን ይኼን ሰይጣናዊና አረመናዊውን ስርዓት በማንኛውም መንገድ በመታገል፣እውነተኛ ሰላምና ነጻነት በኢትዮጵያ ምድራችን እንዲመጣ ለማድረግ የወያኔን መንግስት ለአንዴና ለመጨረሻ ጊዜ ዳግም እንዳይነሳ አከርካሪውን ሰብሮ ለመጣል በእውነተኛ ኢትዮጵያዊ ስሜት መነሳት ይጠበቅብናል እላለው::

ለዚህ ወቅታዊ የነጻነት የትግል ጥሪ ምላሽ ለመስጠት የግንቦት 7 የፍትህ፣ የነፃነትና የዲሞክራሲ ንቅናቄ አርበኞችን አስከትሎ መዋቀሩን በማሥፋት አርበኞ የግንቦት 7 የፍትህ፣ የነፃነትና የዲሞክራሲ ንቅናቄ በሚል አዲሥ ስያሜ ለቀረበው ሀገርን የማዳን የትብብር ጥሪ ምላሽ በዲሞክራሴዊ ለውጥ በኢትዮጵ ድጋፍ ድርጅት በኖረውይ አዘጋጅነት ለቀረበው የምክክርና የትብብር ጥሪ ነውሪነታቸው በኖሮዌይ የሆነ ኢትዮጵያዊያዊንና ትውልደ ኢትዮጵያዊያን መልስ ለመስጠት ከምሥራቅ፣ ከምራብ፣ ከሰሜንና ደቡብ ኖርዌይ እንዲሁም ካአዋሳኝ የአውሮፓ ሀገሮች አፕሪል (April18,,2015) ወደ ኖርዌይ ኦስሎ ይተማሉ፥

ድል ለኢትዮጵያ ሕዝብ !!!
09፣04፣2015
ሚያዚያ 1 2007 ዓ/ም

The post ለነጻነት የሚደረግ እውነተኛ የትግል ጥሪ appeared first on Zehabesha Amharic.

11.04.2015 /ሲዊዘርላንድ – ዙሪክ/

„ደጋግ ፡ ሰዎችስ፡ እግዚአብሄር፡ ከማይወደው፡ ሥራ፡ ሁሉ፡ ይርቃሉ። ይወዳቸዋል፡ ከመከራቸው፡ ሁሉ፡ እንደ፡ አደራ፡ ገንዘብ፡ ይጠብቃቸዋል። ሥርዓቱንና፡ ሕጉን፡ ዬሚወደውን፡ ሁሉ፡ ይጠብቃሉና፡ ኃጢያተኞች፡ ሰዎች፡ ግን፡ ሰይጣን፡ ይገዛቸዋል። (መጸሐፈ መቃብያን ካልዕ ምዕራፍ 9 ቁጥር 25 እስከ ፍፃሜው)“

በቅድሚያ ለክርስትና ዕምነት ወገኖቼ ለማህበረ – ምዕመናን እንኳን ለ2007 የጌታችን መዳህኒታችን እዬሱስ ክርስቶስ በዕለ – ትንሳኤ አደረሳችሁ – አደረሰን። እንዲሁም አርበኛና መምህር አቶ በቀለ ገርባን እንኳን ከጥብቆ ካቴና ወደ መጠነ ሰፊው ካቴናማ ህይወት አሸጋገረዎት። ቢያንስ ከቤተሰብ ጋር መከራውን በአንድ ጉልቻ መቀበልም አንድ ነገር ስለሆነ። ላደረጉልን መልካም ነገር ሁሉ ዝቅ ብዬ አመስግናለሁ – በአክብሮት። ውለታዎትንም ታሪክ ይክሰወታል ብዬም አስባለሁ። እግዚአብሄር ይስጥልን።

የዛሬው ባለጉዳዬ – አንድ ፍሬ ልጅ በተግባር የጎለመሰ ጋዜጠኛ ተመስገን ደሳለኝ ደፋር መሆኑ፤ መጪን ጊዜ ቀድሞ የማዬት አቅሙ እንደ ማግኔት ሳቢነቱ፤ የአቅጣጫን ትኩስነት የመለካት ብቃት ብቻ ሳይሆን፤ ስሜቱን ለታዳሚው በመላክ መንፈስን በቋሚነት በመዳፉ የመያዝ ስልቱ፤ ጭንቅ ጊዜን በጭብጥ ትንተና የማብቀል ልዩ ችሎታው፤ የአቀራረብ ይዘቱ ሁለመናነት ወጥ ሆኖ ነገር ግን ጥገኛ ሳይሆን በሃቅ ማሳ መልማቱ፤ ሚዛናዊነቱና – ማዕዘንነቱ፤ የሀቅ ትንፋሽን የማድመጥ ክህሎቱ፤ ለሙያው ያለው ተቆርቋሪነት አክሎ ብቃቱን በሁለገብ ሁኔታ ማዬት እንዲያስችል አበራክቶ የሰጠው ትንታግ የእውነት ዝማሬያችን ነው። ለእኛ የመንፈስ ሃብታችን ነው። ስለዚህም ይህችን ቋጠሮ ከምስጋና ጋር ልኮልምለት – ተሰናዳሁ። ኮቢዬንም ሳማክራት በሐሤት ፈነጠዘች። አዎን! የዛሬ እንግዳችን እሱ ነው እሱ ልጅ ተመሰገን ደሳለኝ …. የብርታት ሰዐቱ። የማግሥት ተስፋ ዋዜማ – የብሩኽ ራዕይ ዜማ።

ላመስግንህ – ተመስገን

      *******

አንተ ዬዕውነት – አርበኛ

የእኛ!

የሃቅ – ሁነኛ – ሥህነኛ

መዋኛ!

የፍቅር – ቤተኛ

ማተበኛ!

የሰው መሆን – ትርጉመኛ

የህሊና – ዳኛ!

የዘር – መገኛ

የዕንባ – ዘበኛ

ወደኛ

ውድዬኛ።

ሎሌነትን – የተጠዬፍክ

ጠፈፍ – ያልክ።

ለዕብለት – ያላደርክ …

ለሃሰት ጉዝጓዝ … ያለተነጠፍክ

ክርክም ያልክ

የልጅ አዋቂ – የአደራ መልክ።

ትግል – ጠርታኽ

አፍልቃኽ።

ነፃነት „ነፃ“ እንድታወጣት – አጭታኽ፤

አንተነትህን – ሰጠሃት

ሆንክላት።

ሰላም – ናፍቃኽ፤  ሽው ስትልህ፣

ከማያልቀው ፏፏቴዋ  – ከመዳህኒቷ ውስጥ ቀድታህ

ቀለጥክላት።

ራዕይ – አምናህ

ተሳካላት።

ላመስግንህ – ተመስገን፤ የማያልቅብህ – ብዕረኛ

ባለማተብ – ዕሴተኛ፣

ጮራ – የእኛ!

ባተሌ – ጋዜጠኛ

ባለቀለም – ዝናርኛ።

ግርማ – የእኛ

ሞገስ – ለእኛ

ማኛ!

ደፋር የኮቢ –  ወታደር

ለህግ ክብር ብር – አንባር።

ግብር የሆንክ ለዘረኛ

ውለኛ!

አንተ ——– የእኛ

የመሆን  —- ሁነኛ

የፋክት! – አርበኛ።

የእኛ እሸት – የእኛ ፍሬ፣

የእኛ ቀንበጥ፣ – የወንዜ ላሂ የሀገሬ

ዬብራና – ሳታና ገበሬ።

ዘንበል ብለህ፤ አዳመጥካት

የልዕልትህ – ድምጽህ ናት፤

አረንጓዴ ቢጫ ቀይ – ደምህ

አንተን ለእኛ ሰጥታ

የታሪክ ምንጭ – ማሾ አብርታ

የሰጠችን የምልዕት ዕንባ – ጠብታ፤

የፍትህ ዕንብርት – የዕድምታ

የልዕልና አንኳር –  አግታ

ከእውነት ጋር ተጋብታ

ከዘመን ጋር ተጣብታ!

የሃቅ – ለጋ —- ለግላጋ፣

ምዕራፍ አንተን አወጋ፣

ሊያነጋ!

የሥርዓት — ቅጽ

የቅንነት —– አንቀጽ፤

ብላቴና፤

የውስጥነት – ገናና

የርትህ ፍቅር – ዝባድ ገና፤

ዬፎርቹን አራት ዓይናማ

ዛላማ!

የሴንቸሪ – ዘንጣፋ ዞማ።

ላመስግንህ – ወንድምዓለም ታንሽዬ ተመስገን

ደኑ የሆንክ፤ ለፈተና – ለመከራ

ልትደለድል የልዩነትን – ጋራ።

የቁም ነገር ዝና

ዋና!

ዬነፃነት – መምህሩ

ኪዳኑ ነው አዳሩ፤

የተስፋ ብርሃን ምግባሩ

ሰው መሆን ብቻ፣ ብቻ – ጠረኑ።

„እ — ፍ“ ብለው ያላጠፉህ

ቀጥተኛ – ደማምህ

ወጣትነትህን – ገበርክ፤

መንፈስህን – አምነህ ያከበርክ

ልክ!

መማገድህ በባዕትህ – ለባዕትህ

ጥልቀትህ!

የፈቀድከው – ሆነልህ

ከ-ሷው ጋራ ጨለማውን በካቴና፤ ————————-ህመምህ፤

በ-አብነትህ

ከ-ውስጥህ፣

እናት ሆዱ – ደግነትህ

ስስ – አንጀትህ

መሰከረ – ጣትህ

ትክክለኝነትን አበጀኸው – ሠራህ

ስለናትህ!

ሥጦታ፤ ዘመን ለሸለመን እጅግ ብርቱ ጋዜጠኛና ጣምራ ብቃት ለሰጠው ለወጣት ተመስገን ደሳለኝ ይሁንልኝ። ታናሼ ወንድምዬ ምህረቱንም አምላኬ ያምጣልህ አይዞህ ዬእኛ ብርቱ። /06.04.2015 ማርያሽታይን ገዳም – ባዝል/ ©ሥርጉተ – ሥላሴ።

በመጨረሻ የኔዎቹ ዛሬ ከልቤ ተደላድሎ በተቀመጠው በዚህ ብልህ – ብሂል ልሰናበት „አልቦ ብሄር“ የአንድ መጸሐፍ ያህል ቁምነገር ነው ያስተላለፉት ምርጥ ፍሬ – ውድድድድድ …. ዬእኔ – ጌጥ! http://www.zehabesha.com/amharic/archives/40350 መሸቢያ ሰንበት ማለፊያ ፆመ ሁዳዴ መፍቻ። ኑሩልኝ – የኔዎቹ።

ለእኔስ ሰው መሆኔ ብቻ ይበቃኛል።

እግዜብሄር ይስጥልኝ።

The post   ላመስግንህ – ተመስገን። – ከሥርጉተ – ሥላሴ appeared first on Zehabesha Amharic.

(ዘ-ሐበሻ) በኢትዮጵያ እየደረሰ ያለው አሰቃቂ የመኪና አደጋዎች እየተባባሱ መጥተዋል:: ከቅርብ ጊዜ ወዲህ እየተሰሙ የሚመጡት ዜናዎች ዘግናኝ ከመሆናቸውም በላይ የሚጠፋውም የሰው ሕይወት በዛው ልክ ሆኗል:: ኢትዮ ኪክ ከአዲስ አበባ ባሰጨው ዜና የመከላከያው አማካኝ ተጨዋች ተክለወልድ ፍቃዱ በትላንትናው እለት በትውልድ ስፍራው ደብረዘይት አካባቢ በድንገተኛ የመኪና አደጋ እይወቱ አልፏል።

በመኪና አደጋው የተወልደ ወንድም ህይወቱ ሲያልፍ አብሮ የነበረው አንዱ ጓደኛቸው በከፍተኛ አደጋው እግሩ አጥቷል።

በትንሳኤው በዓል መዳረሻ በዚህ ከፍተኛ አደጋ ከአንድ ቤተሰብ ሁለት ነፍስ ማጣት ለቤተሰቦቻቸው እጅግ መራራ ሀዘን እንደሚሆን መገመት አይከብድም።

The post ታዋቂው እግር ኳስ ተጫዋች ከወንድሙ ጋር በመኪና አደጋ ሕይወቱ ጠፋ appeared first on Zehabesha Amharic.