Source:: Ethiopian Reporter

(ዘ-ሐበሻ) የግንቦት 7 አባል ነው ተብሎ የታሰረው አበበ ካሴ የተባለ ወጣት በቂሊንጦ ማረሚያ ቤት በሕወሓት/ኢሕአዴግ ካድሬ ወታደሮች ከፍተኛ የሆነ ግፍ እየተፈጸመበት መሆኑን ከስፍራው ለዘ-ሐበሻ መረጃ ያደረሱ ወገኖች አስታወቁ።

“ዛሬ ከወደ ቂሊንጦ የደረሰኝ መረጃ እጅግ የሚዘገንና እንቅልፍ የሚነሳ ነው” በሚል መረጃውን ያቀበለን ውስጥ አዋቂ አበበ ካሴ ግንቦት 7 ነው በሚል የታሰረ ሲሆን መቀጣጫ እናደርግሃለን፤ ምስጢር አውጣ እያሉ በሚዘገንን መልኩ የ10 ጣቶቹን ጥፍሮች እንደነቃቀሉት አስታውቋል። እንደ መረጃ ምንጩ ገለጻ ከሆነ ብልቱ ላይ የታሸገ የላስቲክ ውሃ (ሃይላንድ) በማንጠልጠል ሲያሰቃዩት የቆዩ ሲሆን በአሁኑ ወቅት ከብልቱ ፈሳሽ መውጣት መጀምሩም ተገልጿል። እንደመረጃ ምንጩ ገለጻ ከሆነ አበበ በብልቱ ላይ በደረሰበት ከፍተኛ ሕመም ህክምና እንዲደረግለት ቢጠይቅም “ሕክምና ማግኘት አይደለም ገና እንግድልሃለን” ብለው ከልክለውታል።

አበበ በአሁኑ ወቅት የእስረኛ መለያ መታወቂያውን መቀማቱን ያጋለጠው የመረጃ ምንጫችን የሚፈጸምበት ግፍ ከእለት ወደ እለት እየጨመረ መምጣቱን እና እየተፈጸመበት ያለው የጭካኔ ተግባርም በምን ዓይነት ቋንቋ መግለጽ እንሚቻል ከባድ እንደሆነ ገልጾልናል።

የኢሳቱ ጋዜጠኛ ሲሳይ አጌና መረጃ ፍለጋ ወ/ሮ አዜብ ጋር ደውሎ ድምፃቸውን ኢሳት ራድዮ ላይ አሰምቶናል። ጋዜጠኛ ሲሳይ ወ/ሮ አዜብ መሆናቸውን ካረጋገጡለት በኋላ መረጃ እንዲሰጡት ጠየቃቸው። አድዋ ስለሆንኩ መረጃ የለኝም በሚል ስልኩን ዘጉት። ለሁለተኛ ጊዜ ደወለላቸውና “ዶ/ር ካሱ ኢላላ ከእርስዎ ጋር ባላቸው አለመግባባት ስላላቸው የመለስን ፋውንዴሽን ለቀዋል የሚባል ነገር አለና ይህን እንዲያረጋገጡልኝ ወይም እንዲያስተባብሉልን ነው የደወልኩት” አላቸው። ምንም አይነት ችግር እንደሌለባቸው ከተናገሩ በኋላ መልሰው እርሳቸው ወ/ሮ አዜብ እንዳልሆኑ በድምጽ ተናግረው ዋሹ። “ድምጽዎት እኮ የአዜብ መስፍንን ይመስላል” አላቸው እርሳቸው ግን ልክ ይህን ሲላቸው ለሁለተኛ ጊዜ ስልኩን ዘግተውበታል። የዛሬው ኢሳት ራድዮ ለዚህ ዘገባ ምላሽ አለው ያድምጡት።

  ዶ/ር ብርሃኔ ረዳኢ

ምግቦች ለአካላዊ ጤና ስለሚሰጡት ጠቀሜታ ብዙ ተብሏል፡፡ በርካታ ጥናቶችም በየእለቱ ለንባብ ይበቃሉ፡፡ ምግቦች ድብርት፣ ጭንቀትንና ተመሳሳይ ስነልቦናዊ ችግሮችን ለመቀነስና ደስተኛነታችንን ለመጨመር እንደሚያስችሉ በተለያዩ የጥናት ቡድኖች የተካሄዱ ምርምሮች ይገልፃሉ፡፡ ደስታን ከሚያርቅ ስሜት (bad mood) ሊያላቅቁን ይችላሉ የተባሉ ሰባት ምግቦችን እነሆ ብለናል፡፡

የስራ ጫናን ተከትሎ ለሚመጣ ድካም (ስትረስ) ቸኮሌት

የስራ መውጫ ሰዓት ደርሷል-ርቦዎታል፣ ደክሞዎታል በቶሎ መውጣት አለብዎ፡፡ ነገር ግን አለቃዎ አንዲት ውለታ እንዲውሉላቸው ይጠይቆታል. . . እንቢ አይሉ ነገር፡፡ ድካምዎ እየተባባሰ ነው፡፡ ከዚህ ስሜት በፍጥነት የሚያወጣዎ ነገር ያስፈልጎታል፡፡ በቢሮዎ አካባቢ ቸኮሌቶችን የሚያስቀምጡ ከሆነ አውጥተው የሚበሉበት ጊዜ ነው፡፡

ኤክስፐርቶች በተለይ ጠቆር ያለ ቀለም ያለው ቸኮሌት (dark chocolate) በሰውነታችን ውስጥ ያሉትን የስትረስ ሆርሞኖች እንዲቀንሱ እንደሚረዳ በስዊዘርላንድ የተደረገና touna of proteome research ላይ ለንባብ የበቃ አንድ ጥናት ጥቂት ጠቆር ያለ ቸኮሌት መመገብ cortical እና catecholamines የተሰኙትን የስትረስ ሆርሞኖች አቅም ለመቀነስ ያስችላል፡፡

 ለሃሳብ መበታተን- የስፒናች ሳላድ

‹‹ሃሳብዎ እየተበታተነ ማተኮር አቅቶታል? አይኖን ከፍቶ ማየትስ ከብዶታል? እንግዲያው ቡናን ይተዉና በምትኩ የስፒናች ሰላጣ ይመገቡ›› ይላሉ ዶ/ር ጆአን ጎልዶፍ ‹‹red light, green light, eat right›› የተሰኘው መፅሃፍ ደራሲ፡፡ ፎሊክ አሲድ ወይም ፎሌት ሰውነታችን የhomocysteine መጠንን ዝቅ እንዲያደርግ ያግዘዋል፡፡ ይህ ንጥረ ነገር በሰውነት ውስጥ በከፍተኛ መጠን ከተገኘ የደም ቧንቧዎች ላይ ጉዳት ሊያደርስ የሚችልበት ሁኔታ አለ፡፡ በተጨማሪም ወደ አንጎል የሚጓዘው ደምና ንጥረ ነገሮች ላይ መስተጓጎል ሊፈጥር ይችላል፡፡ ይህ የተዛባ የደም ዝውውር ቀርፋፋና ዝንጉ ያደርጎታል›› በማለት ዶክተሯ ንጥረ ነገሩ በሰውነታችን ላይ ሊያደርስ ስለሚችለው ችግር ያብራራሉ፡፡ ይህን ችግር ለመቅረፍ በፎሌት (ፎሊክ አሲድ) የበለፀጉ ምግቦችን ይመገቡ፡፡ ስፒናችና ሌሎችም ባለቅጠል አረንጓዴ ተክሎች እንዲሁም ድንች፣ በቫይታሚን የበለፀገ ዳቦ፣ ባቄላ አተርና እንጉዳይ እንዲመገቡ ዶክተሯ ይመክራሉ፡፡

ባልተለመደ መልኩ ቁጣ ቁጣ ይልዎታል? አፕል በኦቾሎኒ ቅቤ ይመገቡ

ልጆችዎ ላይ ሳያስቡት ይጮሁባቸዋል? በትህትና ሊያናግርዎ የሚሞክርን ሰው ጥምብርኩሱን ያወጣሉ?. . . ባጠቃላይ በትንሹ ግንፍል ይላሉ? ይህ ስሜት crankiness ተብሎ የሚጠራ ሲሆን ሰውነትዎ ተጨማሪ ኃይል እንደሚያስፈልገው ያሳያል፡፡

ይህ ኃይልም በአግባቡ መሞላት ይገባዋል፡፡ ከአንድ ሰዓት በኋላ የደም የስኳር መጠንዎ እንዲቀንስ የሚያደርጉ ምግቦችን ያስወግዱ፡፡ ይህን ስሜት ስስ መሆንን ለማስወገድ የተለያዩ ምግቦችን ይመገቡ፡፡

ዶ/ር ጎልዶፎ በካርቦሃይድርትስና በፕሮቲኖች ወይም ፋት ያለባቸውን ምግቦች ቀላቅሎ መመገብ ጠቃሚ መሆኑን ይናገራሉ፡፡ ‹‹ካርቦሃይድሬትስ በፍጥነት ስራ ላይ የሚውል አቅም በመስጠት በኩል የተዋጣላቸው ናቸው፡፡ በዚህ ላይ ጥቂት ፋት ወይም ፕሮቲን መቀላቀል የምግብ መፋጨት ሂደቱን በማዘግየት የደም ስኳር መጠንዎ ሁልጊዜ የተረጋጋና የማይዋዥቅ እንዲሆን ያደርጋል›› ይላሉ፡፡ ምግቦችን ቀላቅሎ ስለመውሰድ ሲነሳ ጥሩ ምሳሌ ሆኖ የሚቀበው አፕል ከኦቾሎኒ ቅቤ ጋር የሚወሰደው ነው፡፡ አፕሉ ካርቦሃይድሬትስን የኦቾሎኒ ቅቤው ደግሞ ጤናማ ፋት ይሰጠናል፡፡ እነዚህን በኃይል የተሞሉ ምግቦች ቀላቅሎ በመመገብ ለሰዓታት የሚዘልቅ አቅም ማግኘት ይችላሉ፡፡

አሣ- ለጭንቀት

ስለ ፋይናንስ አቅምዎ፣ ስለትዳርዎና ስለልጆችዎ አብዝተው ይጨነቃሉ?ጭንቀትና ስጋት ቀንዎን እያበላሽብዎ ከተቸገሩ በተቻለ መጠን ከሰዎች ጋር ለማሳለፍ ይሞክሩ፡፡ ምሳ ከስራ ባልደረባዎ ጋር ለመብላት ይሂዱ፡፡ ምግብዎንም ከዚህ የስሜት ቀውስ ሊያወጣዎ ይችላል፡፡ በተለይ በኦሜጋ3 የበለፀገውን ሳልመን የተባለውን የአሳ ዝርያ ይመገቡ፡፡ ‹‹ኦሜጋ3 ከፍተኛ ጥናት እየተደረገበት ያለ ንጥረ ነገር ሲሆን ድብርትን ለማስወገድ በቀላሉ መናደድን መቀነስ እንደሚችል የሚያሳዩ ጥናቶችም አሉ›› ይላሉ ዶ/ር ስቴፈን ኢላርዲ፡፡

ምንም እንኳን ኦሜጋ 3 ከተክሎችም የሚገኝ ቢሆንም ዶ/ር ኢላርዲ ግን ከአሣ የሚገኘው ላይ እንድናተኩር ይመክራሉ፡፡ ‹‹ይህን ችግር ሊያስወግድ የሚችለው ኦሜጋ 3 በሳልመን፣ ሄሪንግ፣ ሳርዲንና ማካረን የተባሉ የአሳ አይነቶች ውስጥ የሚገኘው ነው፡፡›› ብለዋል፡፡

ለንዴት- አረንጓዴ ሻይ

     ለሊቱን ሙሉ የጎረቤትዎ ውሻ ሲጮህ በማደሩ አልያም እርስዎ የሳምንቱን የእረፍት ቀናትዎን ሰውተው የሰሩትን ስራ ባልደረባዎ ተመስግኖበት ወይም በሌላ ምክንያት ቱግ ብለው ቢናደዱም ለእርስዎና በአካባቢዎ ላሉት ሰዎች ሲባል በቶሎ መብረድ ይኖርቦታል፡፡ ይህን ለማድረግ ደግሞ አንድ ኩባያ አረንጓዴ ሻይ በቂ እንደሆነ የስነ ምግብ ተመራማማሪውና የኒውትሪሽን ኤክስፐርቱ ምግብ ዶ/ር ጃኮብ ቴትልባውም ይናገራሉ፡፡

‹‹አረንጓዴ ሻይ theanine የተባለውንና እንድንረጋጋና አትኩሮታችን እንዲሰባሰብ የሚያደርገውን ንጥረ ነገር ይዟል›› ይላሉ፡፡ beat sugar addiction now! የተባለውን መፅሃፍ የፃፉት ዶ/ር ቴትልባውም፡፡

ከቡና ጋር ሲነፃፀር አነስተኛ የካፌይን መጠን የያዘው አረንጓዴ ሻይ ቁጣዎን የሚያባብስ ሳይሆን ሰውነትዎን ከቡና በተሻለ የሚያረጋጋ ነው፡፡

ለሃዘን – ኮርን ፍሌክስ በወተት

     የሃዘንዎ ምንጭ ስራ ወይም የፍቅር ግንኙነት ሊሆን ይችላል፡፡ ይህን ቀርፈው በደስታ መዋጥ ይፈልጋሉ? ይህ የሃዘን ስሜት በቫይታሚን ዲ እጥረት የተከሰተ ሊሆንም ይችላል ይላሉ ዶ/ር ጎልዶፎ፡፡

ቫይታሚን ቢ በሰውነታችን ውስጥ በርካታ ጠቀሜታ አለው፡፡  ከነዚህም ውስጥ ጥሩ ስሜት እንቢያድርበት የሚያደርገውና feelgoodhonmone የሚሰኘውና ሴሬቶኒን እንዲነረት ይረዳል ይህ ንጥረ ነገር እንድንረጋጋ፣ዘና እንድንልና ደስተኛ እንድንሆን ያደርጋል ብለዋል፡፡

‹‹የሰውነትወ የቫይታሚን መጠን ዝቅተኛ ከሆነ ሙድወን የማስተካከልና ድብርትን የመቀነስ አቅምዎ ይ ዛባል፡፡ የቫይታሚኑን መጠነው ለመጨመር ወተትና በቫይታሚን የበለፀገ ኮርን ፍሌክስ (cereal) ወይን እንጉዳይ ይመገቡ፡፡ አነደ አመጋገብዎ ሁኔታ የካለሲየም ወይም ቫይታሚን ዲ እንክበሎችም መውሰድ ሊኖርብዎ ይችላል፡፡

የወር አበባ የስሜት ነውጥ – እንቁላል በሳላድ ሳንዱች

ይህ አካላዊና ስነልቦናዊ ችግድ በእንግሊዘኛው PMS- premenstrual syndrome ይሰኛል፡፡ pms ን ለማስታገስ ከሚመከሩ ምግቦች ውስጥ እንቁላል ሰላደ ዋነኛው ነው፡፡ የወር አበባ ከመምጣቱ አስቀድሞ ባሉት ቀናት ሴቶች የካርቦ ሃይድሬትስአምሮታቸው ይጨምራል ይላሉ ስቴላ ሜትሶቫስ የተባሉ የስነምግብ ባለሙያ፡፡

እንቁላሉ የሴሬቶኒን መጠንን በማሳደግ ድመቶ እንዲሻሻል ይረዳል፡፡ ነገር ግን ከፍተኛ ስኳርና ስብ የበዛበት ካርቦሃይድሬት የያዙት እንደ ዶናት ያሉትን ያስወገዱ ሙደወን ወደ ባሰ አዘቅት ይከትወታል፡፡ ካለተፈተገ ስንዴ የሚዘጋጅ ዳቦ በፕሮቲን ከበለፀገ የቀቀለ እንቁላልና ሱፍጋር ተቀላቀሎ ሲበላ የሴሬቶኒ መጠን አድንደሚጨምር ባለሙያው ይናገራል፡፡ የእንቁላል ሳላድ በዳቦ ምርጡ የካርቦሃይድሬትና tryptophan ቅንጅት ነው፡፡፡

ከሳምንት በፊት በአቶ በረከት ስምኦን የተከፈተውና 15 ቀን የሚፈጀው የ‹‹ፍትህ አካላት›› ባህር ዳር ላይ እያደረጉት በሚገኘው ስብሰባ ላይ ዳኞች ቅሬታቸውን እንዳሰሙ የነገረ ኢትዮጵያ ምንጮች ገለጹ፡፡

ልማታዊ መንግስት ግንባታ ላይ ያተኮረ ነው በተባለው ስልጠና ላይ የክልሉ የከፍተኛ ፍርድ ቤት ዳኞች፣ በክልሉ የሚገኙ ወረዳዎች የህግ ጉዳይ የስራ ሂደት አስተባባሪዎች፣ የክልሉ ማረሚያ ቤቶች፣ ጸረ ሙስና እና ሌሎችም አስተዳደርና ጸጥታ ጋር የተያያዙ መስሪያ ቤቶች ውስጥ የሚሰሩ አካላት መሳተፋቸው ተገልጾአል፡፡

በስብሰባው በተለይም ዳኞች በዳኝነት ስርዓቱ የፖለቲካ ጣልቃ ገብነት እንዳለና የገዥው ፓርቲ አባል ካልሆኑ መስራት እንደማይችሉ በመግለጽ ቅሬታቸውን እንዳቀረቡ ተገልጾአል፡፡

የክልሉ አስተዳደር የሆኑት አቶ ገዱ አንዳርጋቸው በሚመሩት በዚህ ስብሰባ ዳኞች አባል እንዲሆኑ እንደሚጠየቁ በመጥቀስ ‹‹አባል ሁኑ እየተባልን እንዴት ነጻ ዳኝነት አለ ይባላል?›› ሲሉ መጠየቃቸውን ምንጮች ለነገረ ኢትዮጵያ ገልጸዋል፡፡

ከዚህም ባሻገር የአንድ ፓርቲ የበላይነትና ዴሞክራሲ፣ የፌደራል አወቃቀር፣ በኢህአዴግ አባል ድርጅቶች ስር የሚገኙ ድርጅቶች ሃብት፣ የመሬት ጉዳይና የዳኝነት ነጻነት የመሳሰሉት ጉዳዮች ላይ ጥያቄና አስተያየቶች ቢቀርቡም መልስ እንዳልተሰጠባቸው ምንጮቹ ገልጸዋል፡፡

ዶ/ር ፈቃዱ በቀለ

እንደምናየውና እንደምንከታተለው የዓለም ሁኔታ እጅግ እየተወሳሰበ መጥቷል። በተለይም የጥቢው አብዮት በመባል ከሶስትና ከአራት ዐመታት በፊት በሰሜን አፍሪካ በአንዳንድ አገሮች የተካሂዱት እንቅስቃሴዎችና የለውጥ ፍላጎቶች የመጨረሻ መጨረሻ የተጠበቀውን ውጤት አላመጡም። ከዛሬ ሶስት ዐመት ጀምሮ የፕሬዚደንት አሳድን መንግስት ለመጣል የተካሄደውና የሚካሄደው እልክ አስጨራሽ ትግል ለብዙ መቶ ሺህ ሰዎች መገደል፣ መሰደድና መንገላታት፣ እንዲሁም ለጥንታዊ የታሪክ ቦታዎች መውደም ምክንያት ሆኗል። ––[ሙሉውን ለማንበብ እዚህ ይጫኑ]—-

ከ1 ነጥብ 317 ቢሊዮን በላይ ተጠቃሚዎች ያሉት ፌስቡክ የተሰኘው ማህበራዊ ድረገፅ ከህዳር 22 ቀን 2007 ዓ.ም ጀምሮ ተጠቃሚዎች በየወሩ ሶስት የአሜሪካን ዶላር (60 ብር ገደማ) እንዲከፍሉ ወሰነ።

የፌስቡክ መሥራችና ቺፍ ኤግዚኪዩቲቭ ኦፊሰር ማርክ ዙክምበርክ ከትላንት በስቲያ በአሜሪካን ሀገር በጉዳዩ ላይ ይፋዊ መግለጫ በሰጡበት ወቅት ለወርሃዊ ክፍያው የሰጡት ምክንያት የአስተዳደራዊ ወጪ እየናረ መምጣትን ነው።

ፌስቡክ አሁን ካሉት 1 ነጥብ 317 ቢሊዮን ተጠቃሚዎች 75 በመቶ ያህሉ በየወሩ የአባልነት 3 ዶላር ሊሰበስብ እንደሚችል የገመተ ሲሆን ይህም ገንዘብ በዓመት እስከ 3 ቢሊዮን ዶላር ገቢ ያስገኝለታል።

የፌስቡክ ቃለአቀባይ ሚስተር ፓውል ሆናነር ስለጉዳዩ ለሲ.ኤን. ኤን የቴሌቭዥን ጣቢያ በሰጡት አስተያየት በየቀኑ ፌስቡክን በ100ሺዎች የሚቆጠሩ ሰዎች እንደሚቀላቀሉ አስታውሰው የወርሃዊ የአባልነት ክፍያው መጣሉ ፌስቡክም ራሱ እንዳላስደሰተው ገልፀዋል።

በኢትዮጵያ በአሁኑ ወቅት የፌስቡክ አካውንት ያላቸው ከ902 ሺ 440 በላይ ያህል ዜጎች መሆናቸውን መረጃዎች የሚያመለክቱ ሲሆን በሀገሪቱ ካለው የውጪ ምንዛሪ እጥረት ጋር ተያይዞ ዶላር በባንክ ማስተላለፍ ስለማይቻል በኢትዮጵያ የሚገኙ አብዛኛዎቹ የማኅበራዊ ድረገጽ ተጠቃሚዎች ከአገልግሎቱ ውጪ ሊሆኑ እንደሚችሉ የብዙዎች ግምት ሆኗል።

ምንጭ፡ ሰንደቅ ጋዜጣ

ኢሳያስ አፈወርቂ ጉዳዩ የኢትዮጵያና የአሜሪካ ሴራ ነው አሉ
ስዊድንና ኤርትራ በዲፕሎማቲክ የእሰጣ እገባ ውስጥ ከገቡ በርከት ያሉ ጊዜያት የተቆጠሩ ሲሆን በስዊድን የኤርትራ ኤምባሲ ዲፕሎማቶች ባልተገባ ተግባር ተገኝተዋል በሚል የሀገሪቱ ዲፕሎማቶች ስዊድንን በ48 ሰዓት ለቀው እንዲወጡ የስዊድን መንግስት ውሳኔ ያስተላለፈ ሲሆን ፕሬዝዳንት ኢሳያስ አፈወርቂ ድርጊቱ የኢትዮጵያና የአሜሪካ እጅ አለበት ብለዋል። በስዊድን የወጣውን አዲስ ሕግ ተከትሎ የስዊድን መንግስት በኤርትራ ሰብዓዊ መብት ጥሰት ፈፅመዋል ባላቸው ከፍተኛ የኤርትራ መንግስት ባለስልጣናት ላይ በዚያው በስዊድን ክስ መመስረቱ የሁለቱን ሀገራት ግንኙነት አሻክሯል።

የኤርትራ መንግስት ዋነኛ የውጪ ምንዛሪ ገቢ በተለያዩ ሀገራት በሚኖሩ ኤርትራውያን ዲያስፖራዎች ላይ የጣለው ሁለት በመቶ የገቢ ታክስ ሲሆን በድርጊት በተለያዩ ሀገራት የሚገኙ ኤርትራውያን በኢምባሲያቸው ላይ ቅሬታ ሲያሰሙ ቆይተዋል። በስዊድን የሚገኙ ኤርትራውያንም ኢምባሲያቸው የሚጠበቅባቸውን የታክስ መጠን ካልከፈሉ የተለያዩ የዜግነትና የጉዞ ዶክመንቶችን ከመከልከል ባለፈ በኤርትራ የሚገኙ ቤተሰቦቻቸው በማያዣነት ተጠቅሞ እስከማስፈራራት ደርሷል በሚል ለስዊድን መንግስት ክስ ሲያሰሙ መቆየታቸው ታውቋል። የኤርትራ መንግስት በስዊድን በሚገኙ ኤርትራውያን እና የስዊድን ዜግነት ባላቸው ትውልደ ኤርትራውያን የተደራጀ ተቃውሞ እየገጠመው ሲሆን የተቃውሞ አደራጅ ግለሰቦችን ለይቶ ለመከታተል በስዊድን የሚገኘውን ኤምባሲውን እና ዲፕሎማቶችን ይጠቀማል በሚልም ጭምር ነው የስዊድን ባለስልጣት የኤርትራ ዲፕሎማቶችን ለማባረር በምክንያትነት ያስቀመጡት።

የኤርትራ መንግስት በየሀገሩ በሚገኙ ኤምባሲዎቹ አማካኝነት ከኤርትራ ዲያስፖራዎች በታክስ መልኩ በሚሰበሰበው ሁለት በመቶ ገቢ ሽብርተኞችና በፋይናንስ እያገዘ ነው በሚል በተባበሩት መንግስታት የፀጥታው ምክር ቤት አማካኝነት ማዕቀብ ከተጣለበት ዓመታት ተቆጥረዋል። ሆኖም ከማዕቀቡ በኋላ የፕሬዝዳንት ኢሳያስ መንግስት በተለያየ ሀገራት ኤምባሲዎች በኩል ታክሱን ለመሰብሰብ የሚያደርገው ሙከራ በየሀገራቱ መንግስታት ተቃውሞ እያስነሳበት ነው። ከዚህ ቀድም በተመሳሳይ መልኩ ካናዳና ኤርትራ ውዝግብ ውስጥ መግባታቸውን ተከትሎ የካናዳ መንግስት በቶሮንቶ የሚገኙ የኤርትራ ዲፕሎማቶችን በ48 ሰዓታት ውስጥ እስከማባረር ደርሷል።

የስዊድን እርምጃ ተከትሎ ፕሬዝዳንት ኢሳያስ በሰጡት ማብራሪያ ድርጊቱ የኢትዮጵያና የአሜሪካ ሴራ ነው ብለውታል፡፡ ሁለቱ ሀገራት የኤርትራ መንግስት ሁለት በመቶ ታክሱን የምስራቅ አፍሪካ ሀገራትን በሽብርተኝነት ለማተራመስ ይጠቀምበታል በሚል ማዕቀቡ እንዲጣልበት ሰፊ የዲፕሎማሲ ሚናን መጫወታቸውን በምስራቅ አፍሪካ ላይ ትኩረቱን አድርጎ የሚሠራው ጂስካ አፍሪካ ኦንላይን ዘግቧል። (ሰንደቅ ጋዜጣ እንደዘገበው)

ማንችስተር ዩናይትድ በያዝነው የውድድር ዘመን የዋንጫ ተፎካካሪ መሆን ካልቻለ ሉዊስ ቫን ሃል ለሰበብ ምክንያት አይኖራቸውም፡፡ በፕሪሚየር ሊግ ከፍተኛ ዋጋ ያለውን የተጫዋቾች ስብስብ ይዘዋልና፡፡

ከክረምቱ የተጫዋቾች ዝውውር ግርግር በኋላ ‹‹ሜይል ኦን ሰንደይ›› ባደረገው ጥናት የማንችስተር ዩናይትድ የዘንድሮ ስብስብ 379.4 ሚሊዮን ፓውንድ ድምር ዋጋ እንዳለው ተረጋግጧል፡፡ ይህም በእንግሊዝ ፕሪሚየር ሊግ ውዱ ስብስብ ያስብለዋል፡፡ የማንችስተር ሲቲው ማኑኤል ፔሌግሪኒና የቬልሲው ጆዜ ሞውሪንሆ ስብስቦች እንኳን ይህን ያህል ዋጋ አያወጡም፡፡

ሰር አሌክስ ፈርጉሰን ከአንድ ዓመት በፊት በጡረታ ከተገለሉ በኋላ የማንችስተር ዩናይትድ ጎረቤቶች ማንችስተር ሲቲ ለተጫዋቾች ግዢ 215 ሚሊዮን ፓውንድ አፍስሰዋል፡፡ ይህም በሊጉ አናት ላይ ለመቆየት ከነበራቸው ዕቅድ ነበር፡፡ ማንችስተር ዩናይትድ ከፍታውን በመልቀቁ ወደ ኃያልነቱ ለመመለስ ተመሳሳይ እርምጃ ወስዷል፡፡

በቅርቡ በተዘጋው የብሪታኒያ የተጨዋቾች ዝውውር መስኮት እንኳን አንሄል ዲ ማርያ፣ አንደር ሄሬራ፣ ሉክ ሾው፣ ማርኮስ ሮሆ እና ዴሊይ ብሊንድን በቋሚ ዝውውር ካስመጣ በኋላ ፋልካኦን ከሞናኮ በውሰት ለማግኘት 5 ሚሊዮን ፓውንድ ከፍሏል፡፡ ሌላው የሊግ ተወዳዳሪ በርንሌይ ጆርጅ ቦይድ የተባለውን ተጨዋች በ3 ሚሊዮን ፓውንድ በማስፈረም የክለቡን የዝውውር ሪከርድ ሰብሯል፡፡ ዩናይትድ ግን ቢያንስ 10 ሚሊዮን እና ከዚያም በላይ የከፈለባቸው 16 ተጨዋቾችን ይዟል፡፡ ቡድኑ ከፍተኛ ዋጋ የተከፈለባቸው የማጥቃት ባህሪይ ያላቸው ተጨዋቾች አሉት በሚል ትችቶች ቢሰነዘሩበትም ቫን ሃል ግብ ጠባቂው ዴቪድ ዴ ሂያ፣ ተከላካዮቹ ፊል ጆንስ፣ ክሪስ ስሞሊንግ፣ ራፋኤል፣ ሮሆ፣ ሾው እና ብሊንድን የመሳሰሉ 104.7 ሚሊዮን ፓውንድ የወጣባቸው ተጨዋቾችም አሉትት፡ ዩናይትድ ለተከላካዮች ግዢ ብቻ ያወጣው ዋጋ 15 የፕሪሚየር ሊግ ክለቦች ለመላ ስብሰባቸው ካወጡት ይልቃል፡፡

የፕሪሚየር ሊጉ የተጨዋቾች ግዢ ፀባይ የተቀየረው በሮማን አብራሞቪችና በሼህ መንሱር ዘመናት ምክንያት ነው፡፡ እነዚህ ከበርቴዎች እርምጃቸውን ከአውሮፓ እግርኳስ ማህበር የፋይናንስ ጨዋነት ደንብ ጋር ለማስተካከል በሚታትሩበት በዚህ ሰዓት የማንቸስተር ዩናይትዱ ምክትል ሊቀመንበር ኢድ ውድወርድ ክለባቸው በሊጉ በሰባተኛ ደረጃ ቢያጠናቅቅም አሁንም ከአውሮፓ ሃያላን አንዱ መሆኑን ለማሳየት እየሞከሩ ነው፡፡ ከቻምፒዮንስ ሊግ ውጭ የሆነው ዩናይትድ ከሱፐር ስታሮችና በክለቡ አካዳሚ ባደጉ ተጨዋቾች ቡድን የመገንባትን ሞዴል ይዘዋል፡፡ ሪያል ማድሪድ በጋላክቲኮስ ዘመን ከተሉት ከነበረው ሞዴል ጋር ይመሳሰላል፡፡

በአሌክስ ክፍለ ሀገር ተወልደው ፍራንክ ላምፓርድ በተማረበት የህዝብ ትምህርት ቤት የተማሩት አካውንታት ውድወርድ ከቀድሞው የማንቸስተር ሲቲ ቺፍ ኤግዚኪዩቲቭ ጋሪ ኩክ የተለየ የረጋ ሰብዕና ቢኖራቸውም የሁለቱ ሰዎች ራዕይ ግን ይመሳሰላል፡፡ ባለፈው ዓመት ውድወርድ ከጋሪት ቤል ወይም ክርስቲያኖ ሮናልዶ ግዢ የዓለም ሪከርድን ለመስበር ዝግጁ መሆናቸውን ሳይቀር ተናግረው ነበር፡፡ የዓሊያን ባይሰብሩም የብሪታኒያን ሪከርድ በአንሄል ዲ ማሪያ ግዢ ጨብጠዋል፡፡ በመጪው ጃንዋሪም ለኬቭን ስትሩትማንና ከፍ ያለ ደረጃ ላይ ለሚገኝ አንድ ተከላካይ ለመግዛት ተዘጋጅተዋል፡፡ በሚቀጥለው ዓመት ክረምትም 45 ሚሊዮን ፓውንድ በመክፈል ፋልካኦን በቋሚ ዝውውር የማስቀረት ምርጫም አላቸው፡፡

የፋይናንስ ትንተና የሚያቀርበው ኩባንያ ዴሎይት ማንቸስተር ዩናይትድ ባሳለፍነው የዝውውር መስኮት በግርድፉ ከዚህ ቀደም ያልታየ ከፍተኛ የዝውውር ወጪ ማውጣቱን አረጋግጧል፡፡ ለአዳዲስ ከዋክብት ግዢ በክረምቱ ወቅት ቀይ ሰይጣኖች 150 ሚሊዮን ፓውንድ ፈሰስ አድርገዋል፡፡ ከፕሪሚየር ሊጉ ክለቦች አጠቃላይ ግርድፍ ወጪ 18% ያህሉን ይዘዋል፡፡ ፈርጉሰን ዩናይትድ ባሰለጠኑባቸው የመጀመሪያ ዓመታት ለተጨዋቾች ግዢ እንዲሁ ተከታታይ ሪከርዶችን ሰብረው ነበር፡፡ ጋሪ ሊስተር፣ ሮይ ኪን እና አንዲ ኮል ለዚህ ተጠቃሾች ናቸው፡፡ ግሌዘሮች ከመጡ በኋላ ግን የግዢ ወጪያቸው ዝቅ በማለቱ ማንቸስተር ሲቲ በገበያው ላይ የበላይነቱን ይዞ ቆይቷል፡፡

አሁን መዘውሩ ወደ ማንችስተር ዩናይትድ ተመልሷል፡፡ ዩናይትድ ከቻምፒዮንስ ሊግ ከአንድ የውድድር ዘመን በላይ ርቆ መቆየት አይፈልግም፡፡አለበለዚያ ታላላቅ ተጨዋቾችን መሳብ አይችልም፡፡ በእግርኳስ ስፖርት ከፍተኛ ወጪ የሚያወጣ ክለብ ተብሎ ሲወሰድ የቆው ማንቸስተር ሲቲ እንኳን ዘንድሮ ከዩናይትድ በ26 ሚሊዮን ፓውንድ ነሰ ስብስብ ይዟል፡፡ 353.7 ሚሊዮን ፓውንድ ማለት ነው፡፡ ሞውሪንሆ የ301.3 ሚሊዮን ፓውንድ ተጨዋቾችን ሰብስበው ቡድን ሰርተዋል፡፡ እንደ ፈርናንዶ ቶሬስና ማርኮ ቫን ጊንኬል የመሳሰሉት ተጨዋቾቻቸው በውሰት በመለቀቃቸው ዘንድሮ ሊጠቀሙባቸው አይችሉም፡፡

በአጠቃላይ ክለቦች ሊያገኙት ያቀዱት ስኬት መጠን ለዝውውር ከሚያወጡት ወጪ ጋር በቀጥታ ተያይዞ ይታያል፡፡ በፕሪሚየርሊጉ ስድስት ክለቦች ማለትም ዩናይትድ፣ ሲቲ፣ ቼልሲ፣ ሊቨርፑል፣ አርሰናል እና ቶተንሃም ከተቀሩት የሊጉ ተወዳዳሪዎች ጋር ሰፊ የወጪ ልዩነት ፈጥረዋል፡፡ በሰባተኛ ደረጃ ውድ ስብስብ ያለው ኤቨርተን ሲሆን በድምሩ 96 ሚሊዮን ፓውንድ ይሆናል፡፡

በዚህ ሳምንት በፕሪሚየር ሊጉ ሰንጠረዥ ከመጨረሻዎቹ ሶስት ደረጃዎች ላይ በሁለቱ ላይ የተቀመጡት በርንሌይ እና ክርስታል ፓላስ እንዲሁ በዝውውር ወጪ የመጨረሻዎቹን ደረጃዎች ይዘዋል፡፡

በተጨዋቾች ግዢ ወጪ መሪነቱን የያዘው ዩናይትድ ዘንድሮ አንድም የሊግ ጨዋታ ሳያሸንፍ በሰንጠረዡ 14ኛ ደረጃ ላይ ይገኛል፡፡ አዳዲሶቹ ዝውውሮች ተሟልተው ለጨዋታ ዝግጁ በመሆናቸው በመጪው እሁድ ከኪውፒአር ጋር በሚደረገው ጨዋታ ነገሮች ሊቀየሩ ይችላሉ፡፡ ሌላው መታየት ያለበት ስዋንሲ ሲቲ ነው፡፡ የዌልሱ ክለብ በመጀመሪያ ቡድኑ ውስጥ ያሰባሰባቸው 25 ተጨዋቾችና ሊያጫውታቸው ፍቃድ ያገኘባቸው ከ21 ዓመት በታች ተጨዋቾች በድምር ያላቸው ዋጋ አነስተኛ ነው፡፡ 44.6 ሚሊዮን ፓውንድ መሆኑ ነው፡፡ ሆኖም ባለፉት ሁለት የውድድር ዘመናት በከፍተኛው ዲቪዚዮን ውስጥ አንፃራዊ ስኬትን እየተቀዳጁ ይገኛሉ፡፡ አሁንም ከሶስት ጨዋታዎች በኋላ የፕሪሚየር ሊጉን መሪነት በጥምረት ይዘዋል፡፡

የተጨዋቾች ግዢ ላይ የሚወጣው ገንዘብ እየናረ በሄደ ቁጥር የሊጉ የፉክክር ሚዛን በየጊዜው ይዛነፋል የሚል ስጋት አለ፡፡ ይህም በርካቶቹን ክለቦች ሊያጠፋቸው ይችላል፡፡ ባለፈው ሳምንት አዲሱ ፈራሚ ብሊንድ የሆላንድ ኮከብ ተብሎ በጋዜጠኞች ከተመረጠ በኋላ ቫን ሃል በሰጡት አስተያየት አሁን በከፍተኛ ጫና ላይ መገኘታቸውን አምነዋል፡፡ ክለባቸው ማንቸስተር ዩናይትድ የፋይናንስ ጡንቻውን በማሳየት የሚፈልጓቸውን ተጨዋቾች አሰባስቦላቸዋል፡፡ አሁን ተራው የቫን ሃል ነው፡፡ ተፎካካሪ የመሆን 379 ሚሊዮን ግዴታዎች ውስጥ ገብተዋል፡፡

የ2014 – 15 የፕሪሚየር ሊጉ ቡድኖች ድምር ዋጋ እና (ውድ ተጨዋቾቻቸው)

1. ማንችስተር ዩናይትድ

– 379.4 ሚ.ፓ-አንሄል ዲ ማሪያ – 59.7 ሚ.ፓ

2. ማን.ሲቲ

– 353.3 ሚ.ፓ – ሰርጂዮ አጉዌሮ – 38 ሚ.ፓ

3. ቼልሲ

– 301.3 ሚ.ፓ – ኤደን ሃዛርድ/ዊልያን ዲ ኮስታ 32 ሚ.ፓ

4. ሊቨርፑል

– 253.8 ሚ.ፓ – አዳም ላላና – 25 ሚ.ፓ

5. አርሰናል

– 242.7 ሚ.ፓ – ሜሱት ኦዝል – 42.5 ሚ.ፓ

6. ስፐርስ

– 178 ሚ.ፓ – ኤሪክ ላሜላ – 25.8 ሚ.ፓ

7. ኤቨርተን

– 95.7 ሚ.ፓ – ሮ ሉካኩ – 28 ሚ.ፓ

8. ሳውዛምፕተን

– 90.4 ሚ.ፓ – ሼን ሎንግ – 12 ሚ.ፓ

ዳግማዊ ጉዱ ካሣ (ከአዲስ አበባ)

ኧኸ …. ዴዴዴዴዴዴዴ …. ነይ ነይ ያገሬ ልጅ፣ ነይ ነይ የወንዜ ልጅ … (2)

መለሎ ቁመናሽ ሸምበቆ አንገትሽ (2)
ከቶ ወዴት ገባ ያ ሰውነትሽ (2)

አይ አንቺ ገራገር አይ አንቺ ሞኝ አድባር (2)
በቁመናሽ ፈቱት ያሰርሽውን አምባር (2)

እምዬ ቀሚስሽን በጠባቡ አሰፊው (2)
ዛሬ በሙሉ አካል የለሽም በሰፊው (2)

እንግዲህ እናቴ ቁራጭ ልበሽልኝ (2)
ወጪም አላበዛ እንዲህ ካነስሽልኝ (2)

ጠበቃሽ ማን ይሆን? ዋስሽስ ማን ይሆን? እማኝሽ ማን ይሆን? ጠበቃሽ ማን ይሆን?
የነበረሽ ሁሉ እንዳልነበር ሲሆን፡፡ (2)

ኧኸ… ኤዴዴዴ… ዴዴዴዴ ….ዴዴዴ… ያገሬ ልጅዬ፣ የወንዜ ልጅዬ … ነይ ነይ ያሬ ልጅ … ነይ ነይ የወንዜ ልጅ

እትብቴ ከወዲያ መቃብሬ ወዲህ (2)
በተወለድኩበት አልኖርኩም ከእንግዲህ (2)
ምንድነው ውዳሴ ከእንግዲህ ለጠላ (2)
የደረቡት ሁሉ ከሆነ ነጠላ (2)

ጠበቃሽ ማን ይሆን … (አዝማች)

ከሌሎች ያነሰነ ምንስ ብንሆን ድሃ (2)
እንዴት እናጣለን ከቤታችን ውሃ (2)
አንዲቷ ጎረቤት ያለውን ስትቀዳው (2)
እኛ ብዙ ሆነን ተጠማን ከጓዳው (2)

የቤቱን ስባሪ ሸክም የሚያግዝ (2)
ማን አይዞህ ይለዋል ቢያዝን ቢተክዝ (2)
ሲጠፋ እማያየው እልፍኝ አዳራሽ (2)
አይጨነቅም ወይ ለነገው ወራሽ (2)

ጠበቃሽ ማን ይሆን? ዋስሽስ ማን ይሆን? እማኝሽ ማን ይሆን? ጠበቃሽ ማን ይሆን …
የነበረሽ ሁሉ እንዳልነበር ሲሆን፡፡ (2)

ድምፃዊ ቻላቸው ከበደ ካቀነቀናቸው ግሩም ሀገራዊ ዜማዎች ውስጥ የአንደኛው ግጥም (ነፍሱን ይማር)



በኢትዮጵያዊነታችሁ የምታምኑም ሆናችሁ የማታምኑ ከፍ ሲል በርዕሴ የጠቀስኳችሁ ውድ ኢትየጵያውያን ወገኖቼ፣ እንደምን አላችሁልኝ? የአዲሱን ዓመት ዋዜማና መባቻ እንዴት አያችሁት? መጪውን ዘመንስ ለእናንተም ሆነ ለእናት ሀገራችሁ ምን እንደሚሆን ትጠብቃላችሁ? ለማንኛውም አንድ ወንድማችሁ በግል ተነሣሽነትና በነፃ ፍላጎቱ ይህችን ማስታወሻ ልኮላችኋልና የእርኩሳን መናፍስት ጠባይ ከሆኑት ትዕቢትና ዕብሪት ታቅባችሁ እንድትመለከቷት አደራ ይላችኋል፡፡ መልካም አዲስ ዓመት፡፡ አዲሱ ዓመት ሁላችንም ልብ ገዝተን ወደዬኅሊናችን የምንመለስበት እንዲሆን የወቅቱ ምኞትና ጸሎቴ ነው፡፡

ግልጽ ለመሆን ያህል በርዕሴ የተጠቀሱት ኢትዮጵያውያን ኢሣይያስ አፈወርቂ፣ ኤሊያስ ክፍሌና ብርሃኑ ነጋ መሆናቸውን መጠቆም እወዳለሁ፡፡ እነዚህ ወገኖች በየራሳቸው ከአንድ ግለሰብነት የማይዘሉ ተራና ብናኝ ሰብኣዊ ፍጡራን መሆናቸውን አምናለሁ፡፡ ነገር ግን እንደዬፖለቲካ አቋማቸው የተለያዬ ውክልና ያላቸው በመሆናቸውና በአንድ ወይ በሌላ መንገድ ተፅዕኖ ፈጣሪ መሆናቸው ስለሚታወቅ ግምታቸው ከፍ ሲል ከገለጽኩት የአንድ ግለሰብነት ይዞታ ይበልጣል፡፡ ይህም ማለት ብዙ ኢሣይያሶች፣ ብዙ ኤሊያሶችና ብዙ ብርሃኑዎች መኖራቸው የአደባባይ መሥጢር ነው ለማለት ፈልጌ ነው፡፡ አነሳሴ ከወቅቱ የፖለቲካ ሙቀት ጋር የሚቀጣጭ ነው፡፡ አንዴ ሞቅ ደመቅ አንዴ ደግሞ ፈዘዝ ቀዝቀዝ እያለ ሲሻው ደንገላሣ ሳያሻው ሶምሶማ የሚጋልበው የወቅቱ ፖለቲካችን በአብዛኛው ከነዚህ ሦስት ግለሰቦች ዙሪያ አይወጣም – በሒሣባዊ የ“set and subset” ቀመር አኳያ ብንመለከተውም በሺህ ጎራ ተሰልፎ የሚደናቆረው የፖለቲካ ተቃዋሚ ነኝ ባይ ግሪሣ ሁሉ በነዚህ ሦስት ሰዎች ሊወከል ይችላል፡፡ የምናገረው ለኔ እንደመሰለኝ እቅጭ እቅጯን ነው፡፡


ሎራን ካቢላ በአሥራ አንድ ወራት የአመፅ ትግል ሞቡቱን ገልብጦ ሥልጣን ያዘና “ዴሞክራሲያዊት ሪፑብሊክ ኮንጎ”ን መሠረተ – በሥልጣን ብዙ ጊዜ ባይቆይም፡፡ ኢሣይያስ አፈወርቂ የመራው ጦር በመለስ ዜናዊ ትብብርና ሁለንተናዊ ድጋፍ ኢትዮጵያን እንደደሮ ገነጣጥሎ በጥቂት ስኬታማ ዓመታት ውስጥ ለማንም የማትሆን ባለቤት አልባ ሀገር አስገኘ፡፡ የመለስ ዜናዊ የመንፈስ ወንድም የሩዋንዳው ፖል ካጋሜም በጥቂት ወራት ውጊያ መንግሥት ጥሎ በሩዋንዳ “ዴሞክራሲ”ን ገነባ፡፡ ለሤራ ፖለቲካ ማራመጃነት በኃያላኑ መንግሥታት ተጠፍጥፈው እንደተሠሩ የሚነገርላቸውና እንደአለቆቻቸው ሁሉ እነሱም በአምልኮታዊ የሰው ነፍስ ግብር (ጭዳ – death cult) የሚያምኑት ክፉዎቹ የኢስላሚክ እስቴት ወያኔዎችም በጥቂት ወራትና ዓመታት ዝግጅትና ፍልሚያ ምዕራባውያንን የሚያርበደብድ ዘመቻቸውን በማጧጧፍ ዓለምን ጉድ እያሰኙ ነው፤ የኡክሬን አማጽያንም በጣት በሚቆጠሩ ወራትና ሣምንታት ውስጥ ባደረጉት ዘመቻ ከመገንጠል ጀምሮ የራስን መንግሥት እስከመመሥረት ደርሰዋል፤ መነሻውም መድረሻውም የሰውን ዘር በእምነቱ አሳብቦ ከምድር ማጥፋት የሆነው የናይጄሪያው ቦኮሃራም በጥቂት ወራት ትግል ዓለምን “እያስጨነቀ” ናይጄሪያንም እያመሳት ነው፤ … በነዚህ ሁለት ቀናት እንኳን የየመኖቹ ኅዳጣን ሁቲዎች በጥቂት ሣምንታት ውስጥ – ለ‹አንዳርጋቸው ጽጌና ለብዙዎች ኢትዮጵያውያን ዕንባና ጸሎት ምሥጋና ይድረስና› – የሀገሪቱን ቆሾቆምበሬ መንግሥት ዋና ከተማዋ ሰንዓ ድረስ ገብተው ስሊውን በማነቅ ለድርድር እንዲቀመጥ አስገድደውታል፡፡ ስንክሣሩ ቀጣይና እስከዓለም ፍጻሜም የማያባራ ነው፡፡ የዓለም የነማን መፈንጪያ ሆችና …..


በኢትዮጵያ ውስጥ ከወያኔና ከሻዕቢያ በኋላ የተሣካ ዐመፅ ማካሄድና የመንግሥት ሥልጣን መያዝ ያልተቻለው ለምንድን ነው? ከተቋቋሙ ዐርባና ሃምሣ ዓመት የሞላቸው ንቅናቄዎችና የትጥቅ ትግል እንቅስቃሴዎች ለምንድን ነው – ዘወትር እንደሚባለው ሁሉ – አንዲትም ትንሽዬ መንደር ሊይዙና በ“ጉጉት የሚጠብቃቸውን” ሕዝብ በደስታ ማስፈንደቅ ያልቻሉት? “አታምር ወይ አታፍር” ይባላል፡፡ ንቅናቄዎች ተብዬዎቹ እንዳልሆነላቸው ሲረዱ – መሆንና አለመሆንን መረዳት የሚያስችላቸው አእምሮ ካላቸው ማለቴ ነው – የማያዋጣ የለበጣ መንገድ እየተከተሉ በሕዝብ ላይ ከሚያላግጡ – የወያኔንም ጅራፍ ከሚያባብሱበት – የፖለቲካ ትግሉንም እንደሃይማኖቱና ንግዱ ሁሉ የመተዳደሪያ ቀፈት መሙሊያ ከሚያደርጉት ለምን በጊዜው ጥግ አይዙምና በሕዝብና በሀገር ስቃይ ከመቀለድ አይቆጠቡም? ለምሳሌ ከድርጅት ኦነግ፣ መኤሶን፣ ኢሕአፓ፣ … ከግለሰብ መረራ፣ በየነ፣ ግዛቸው፣ ነገደ፣ ኢያሱ፣ … ሌሎችም የዓዞ ዕንባ አንቢዎች ሁሉ ለምን ከሕዝቡ ጫንቃ ወርደው ራሳቸውን አይችሉም? ወጣቱስ ለምን ተኛ? ለነገሩ ቦታውን ማን ሰጠውና፡፡ አለቃ ገ/ሃና ያቺን ቤታቸው ውስጥ ያሰለቻቸውን ጎመን ጠልተው ጓደኛቸው ቤት ቢሄዱ ያቺው ጎመን ቀረበችላቸውና “በየት ዞረሽ መጣሽ?” አሏት አሉ፡፡ ንቅናቄዎችና እንቅስቃሴዎች እንዲሁም -ዲዶችና ታዋቂ ግለሰቦች ሁሉ ሕዝቡ “ነቄ” ብሏልና በሩ ሳይዘጋ ራሳችሁን እንድትመረምሩ ሃሳብ አቀርባለሁ፡፡


ኢሣይያስ አፈወርቂ – በቃህ፡፡ ታሪክ ሥራና ሙት፤ የልጅነት ዕድሜህን መስዋዕት ያደረግህበትን የዚያን ዘመን ሁሉ የትግል ውጠየት አየኸው፤ ለአንተ ምን ተረፈህ? መብላት መጠጣትና መስከር? ርሀብን ሊያስታግስ ከማይችል ባዶና አንተው የፈጠርከው ብሔራዊ ስሜት በስተቀር ለኤርትራና ዜጎቿስ ምን አተረፍክላቸው? እውነቱን ብቻ እንነጋገር ካልን በትግልህ ከተጠቀሙት ይልቅ የተጎዱት ይበልጣሉ፡፡ የእልህ ፖለቲካ ከምን ተነስቶ ምን ላይ እንደሚደርስም በራስህ ተሞክሮ ተረዳኸው፡፡ እንዴት እንደምትኖር ከውስጥ ዐዋቂዎች እንሰማለን፡፡ እንዲያ የተቅበዘበዘና አደብ ያጣ ሕይወት የምትመራው ወደህና ፈቅደህ ባይሆንም በሕዝብ ዕንባና ልቅሶ ምክንያት መሆኑን እኔ ትንሹ ወንድምህ ላስታውስህ እወዳለሁ፡፡ ተለያይተው የማይለያዩ የአንዲት እናት ልጆችን በማለያየት ሁለቱንም የቁም ስቅል ስታሳይ ላለፉት 23 ዓመታት ዘለቅህ፡፡ ወደድክም ጠላህም አሁን ሰዓቱ መሽቷል – “ምን እሆናለሁ? ማንስ ምናባቱ ያደርገኛል?” በሚል የቀድሞ ትዕቢትና ዕብሪት የምትመራ ከሆነ የጊዜንና የታሪክን ፍርድ በትግስት ጠብቅ ከማት ውጪ የምልህ የለኝም – አየህ፣ ጠብ-መንጃና ወኔ የሚሠሩበትና የማይሠሩበት ጊዜ መኖሩን አንተም ታውቃለህ ብዬ እገምታለሁ፡፡ የሆነው ሁሉ ሆኖ በዚህ የምሽት ወቅት ግን የአፍሪካ ሲንጋፖር ልትታይ አልቻለችም፡፡ ሕዝብህንም ከስደትና በስደት ከሚገኝ መዋጮ አላዳንከውም፤ ተያይዘን እየጠፋን እንደምንገኝ አታውቅም አልልም፡፡

በአንተ፣ በመለስና በመንግሥቱ የሦስትዮሽ ውጋት ምክንያት ኢትዮጵያ ያጣችው የተማረ የሰው ኃይልና አምራች ገበሬ ለግምት ያስቸግራል፡፡ በዚያም ላይ የዓመታት ጦርነቱን ለማካሄድ የወጣው በመቶ ቢሊዮን ዶላሮች የሚገመተው ገንዘብ ሀገራችንን በአሁኑ ወቅት ከነቻይናና ማሌዥያ ባልተናነሰ በከፍተኛ የዕድገት ደረጃ ላይ ባስቀመጣት ነበር፡፡ ወጪውም ለጦርነት ማካሄጃ በሁለቱም ወገን የተከሰከሰውን ሀብትና ንብረት ብቻ ሣይሆን በጦርነቱ የወደመውን መንግሥታዊና ሕዝባዊ ታህታይ መዋቅርና የዜጎችን በቀላሉ የማይተካ ውሱን አንጡራ ንብረት ሁሉ የሚያካትት ነው፡፡ ድሆች ጦርነትን ሊሠሩ ቢችሉም የመኖር ኅልውናን ግን ሊያረጋግጡ እንደማይችሉ ከነስዬ ዲስኩርና የዲስኩር ባዶነት ተገንዝበናል፡፡ ያ ሁሉ ውድመት የተከናወነው መሠረት በሌለው ጥላቻና ቂም በቀል ተነሳስታችሁ በተለይ አንተና ወንድምህ መለስ ዜናዊ ባካሄዳችሁት እልህ አስጨራሽ አፍራሽ የብረት ትግል ነው፤ እርግጥ ነው አንተና መሰሎችህ ባታምኑበትም ትንቢቱንና የትንቢቱን የአፈጻጸም ቅደም ተከተል ከመነሻው እስከመድረሻው ሳናውቀው ቀርተን አይደለም፤ እናም ታዲያ የጥፋቱ ማሽን ዘዋሪ አንተና ወንድምህ መሆናችሁ ባይካድም መንስኤው ግን ኃጢኣታችንና ክፉ ተግባራችን እንደሆነ ልጠቁምህ እፈልጋለሁ፡፡ ታውቃለህ – “እግዜር ሲቆጣ ሽመል አይቆርጥም፤ ያደርጋል እንጂ ነገር እንዳይጥም” የሚል ብሂል እንዳለን፡፡ አሁንም የምታውቀው ይመስለኛል “ፈጣሪ አንድን ሕዝብ ሊቀጣ ሲፈልግ ጨካኝ ንጉሥን ይሾማል” የሚል ጥቅስ በመጽሐፍ ቅዱስ ውስጥ በግልጽ ተቀምጦ እንደሚገኝ፡፡ በአሁኑ ሰዓት ያንተና የፀረ-ኢትዮጵያ ኃይሎች ጀምበር እያዘቀዘቀች፣ ገሚስ አካሏም እየገባች መሆንዋን በድፍረት መናገር የተቻለበት ምክንያትም የኢትዮጵያ ታሪካዊ የውስጥና የውጭ ጠላቶች ተቀስፈው የተያዙበትን ምችና ዋግ ጠንቅቀን ስለምናውቅ ነው፡፡ ኢትዮጵያን የነካ ሁሉ በአሁኑ ወቅት ብጉንጅ በብጉብጅ ሆኖ እያቃሰተ እንደሚገኝ አንተም ከያዘህ ብጉንጅ በመነሳት የምታውቅ ይመስለኛልና በዚያ በኩል ብዙ አልናገርም፡፡

ይልቁንስ ወደልቦናህ ብትመለስ የመልካም ታሪክ ተሻሚ ከመሆን የሚያግድህ ነገር የለም፡፡ በምከተለው ሃይማኖት፣ በኋላ ቅዱስ ጳውሎስ በመባል የሚታወቀው የክርስቶስ አገልጋይ በፊተኛው ሕይወቱ ልክ እንዳንተው ወንበዴና ፀረ-ክርስቶስ ነበር – ፀረ- ኢትዮጵያዊትህን በውል ሳውቅ ፀረ-ክርስቶስነትህን ከግምት ውጪ አላውቅምና ምስስሉን በዚህ ማሻሻያ አስተካክልልኝ፡፡ ንስሃና ጸጸት ግን አዲስ ስብዕና ያላብሳሉና ከአንጀቱ በማልቀስ ሳዖል ተመለሰ፤ በሩ ሳይዘጋበትም ወደ ጠባቡ አዳራሽ ገብቶ አንገቱን ለሠይፍ እስከመስጠት በሚደርስ ጽናት ክርስቶስን አገለገለ፡፡ ሁሉም ባይሆን ብዙ ነገር ይቻላል፤ አዲስ ስብዕናም መላበስ ይቻላል፤ ባንታደል እንጂ ችኮነትና ካፈርኩ አይመልሰኝ ባይነት የሰውኛ ባሕርይ መገለጫ አይደለም፤ እንደዚያ ከሆን የአእምሮ ባለቤቶች አይደለንም ማለት ነው፡፡ ትልቁ ነገር ራስን መመርመር ነው፡፡ በ11ኛው ሠዓትም ቢሆን የኢትዮጵያ አምላክ የልብ መሰበርን ይቀበላል፡፡ የአንተ ልብ ቢሰበርና አንተን እንደሰው ትታይ ዘንድ የመልካም ሰውነት ባሕርይ ቢያሰጥህ አንተን በጭፍን የሚከተሉና ግደሉ ስትላቸው የሚገድሉ፣ እሠሩ ስትላቸው የሚያስሩ፣ አሰቃዩ ስትላቸው የሚያሰቃዩ አገልጋዮችህ ሁሉ ንጹሓን ዜጎችን ወደምድራዊ ሲዖል ከመክተት ይታቀቡ ነበር፡፡ ለነሱም የጽድቅ መንገድን በከፈትክላቸውና ለምትጨነቅ ነፍሳቸው ዕረፍትን በሰጠሃት ነበር፡፡ በተረፈ ሃሳብ አይግባህ – ኢትዮጵያን ከማንም የዓለም ሀገር ባልተናነሰ ሁሌ የሚያስታውሳት ፈጣሪዋ ነፃነቷን በቅርብ ያቀዳጃታል፡፡ ከቻልህ ምክሬን ስማ፤ ካልቻልክ እንድትቸገርብኝ አልፈልግም፤ ባለህበት ሰላሙን ይስጥህ፡፡


ኤሊያስ ክፍሌ፤ በጣም ከምወዳቸው ጋዜጠኞች አንዱ ነህ፡፡ ልፋትህንና ድካምህን ሰዎች ሲያጣጥሉ ስመለከት እናደዳለሁ፡፡ ዛሬ ለምሳሌ ድረ-ገጽህን ሳነብ ከነብርሃኑ ጂ-7 በተያያዘ ባለህ አቋም የተነሣ ብዙዎች አስተያየቶች ሊያውም በራስህ ሚዲያ ሲያብጠለጥሉህ ሳይ ከፍቶኛል፡፡ ተፃራሪህን ማስናገድህን ግን በጣም ወደድኩልህ፡፡ እንዲህ መለመድ አለበት፡፡ ስለራስ ከሚነገሩ ደግ ደጉን ብቻ እየመረጡ መስማትማ ማን ይጠላል? ይህ በከንቱ የመነቃቀፍና ጫፍ እየያዙ መናቆር እንዲቀር በበኩሌ እየጸለይኩበት መሆኔ በታሳቢነት ተይዞልኝ በጻፍካቸው አንዳንድ ነጥቦች ላይ ግን እኔም የተሰማኝን ቅሬታ መጠቆም ፈለግሁ፡፡ ትፈቅድልኛለህ አይደል?

ብዙዎቹ የምትላቸው ነገሮች በጥንቃቄ ሊታዩና ጆሮ ሊነፈጋቸው የማይገባ መሆናቸውን በበኩሌ አምናለሁ፤ ጭፍን አማኝ መሆንም አልፈልግም – ይጎዳልና፡፡ ግን ግን ለምሳሌ ግንቦት ሰባት ያለው የተዋጊ ኃይል ከአሥር አይበልጥም ስትል ምን ማለት እንደሆነ ደጋግሜ አስተንትኜው ፈጽሞ ሊገባኝ አልቻለም፡፡ አንተም በቅጡ ያሰብክበት አልመሰለኝም፡፡ የምትለውን ሁሉ ለማመን የማላመነታ ቅንና የዋህ አንባቢ ነኝ ልበልና ራሴን ላሳምን፡፡ ግንቦት ሰባት ታዲያ ለማስመሰልም ቢሆን ከአሥር የሚበልጡ ወታደሮች አይኖሩትም ብለህ ትገምታለህ? እንደሰማሁት ወደ ሰባት ይሁን ዘጠኝ ዙር ያህል ተዋጊ ወታደሮቹን እንዳስመረቀ ተዘግቧል፡፡ በአንድ ዙር ሁለት ወታደሮችን አሠልጥኖ ቢያስመርቅ እንኳን ቢያንስ አሥራ አራት ወይም አሥራ ስምንት ወታደሮች አይኖሩትምን? ታዲያ በዚህ ረገድ ኤሊያስ ምን ትለኛለህ? ይህ ግነት መንስኤው ምን ሊሆን ይችላል? ይህን ያህል ዝቅ ብለህ – መረጃው እውነትም እንኳን ቢሆን – የወዳጅን ምሥጢር ለጠላቶች መስጠት ተገቢስ ነው ወይ? የጦር ኃይል መጠንና የሥልጠና ሁኔታ፣ የመሣሪያ ዓይነትና ብዛት፣ የስንቅና ትጥቅ ምንጭና አቅርቦት፣ ወዘተ. የአንድ ድርጅት ምሥጢሮች መሆናቸው ይታወቃል – አንተ ደግሞ ምድብህ በተቃውሞው ጎራ መሆኑን ስለማውቅ – እንደእስካሁኑ ከሆነ ማለቴ ነው – ቢያንስ ከወታደራዊ ምሥጢሮች ወጣ ያሉ ተቃውሞችህን በንቅንቄው ላይ ብታሰማ የወግ ነው፡፡ ለምሳሌ የኤርትራ መንግሥት ሊታመን የማይችል በመሆኑ ሌላ አማራጭ መፈለግ ይሻላችኋል ዓይነት ሃሳብ ብትሰነዝር በበኩሌ አይከፋኝም ብቻ ሣይሆን ደጋፊህም ልሆን እችል ነበር፡፡ ያ የጂ -7 ተዋጊዎች ከአሥር አይበልጡም የሚለውና መሰል ውኃ የማያነሱ ቃላተ-ቅዋሜዎች ግን ምን ዓላማ ሊያራምዱልህ እንደሚችሉ ሊገባኝ አልቻለም፡፡ እንዲያ በማለትህ በአንተና በንቅናቄው መካከል ያለውን ግንኙነት በጣሙን እንድጠራጠር አድርጎኛል፡፡ ምሳሌ ነው ይህን ያልኩህ፡፡ በተረፈ “ሽልም ከሆነ ይገፋል፤ ቂጣም ከሆነ ይጠፋል” እንዲሉ ነውና የምትወራከቡበትን ማዕከላዊ የቅራኔ ነጥብ እውነትነት ለማረጋገጥ ትንሽ ጊዜ ሳያስፈልገን የሚቀር አይመስለኝም፡፡ እስከዚያው ግን ለትዝብት በማይዳርግ ሁኔታ ብንተቻች ቢኖረን ጥሩ ይመስለኛል፡፡ ሁሉም ጥንቅር ብሎ ለሚቀረው ነገር በከንቱ መጠላለፉ ለማንም አይጠቅምም፡፡

እስኪ ዐይናችንን እንጨፍንና ከመቶ ዓመት በፊት ወደነበረው ጊዜ በምናብ እንሂድ፡፡ እስኪ አሁንም ዐይናችንን እንጨፍንና ከአንድ መቶ ዓመት በኋላ ያለውን ጊዜ በምናባችን ለማየት እንሞክር፡፡፡ ይህ ሁሉ መራኮት ከነዚህ ሁለት መቶ ዓመታት ውስጥ በየትኞቹ አሠርት ዓመታት ውስጥ ነው ተዘርቶ፣በቅሎ፣ አሽቶና ተመርቶ ወደታሪክ ጎተራ የሚከተተው ብለን ደግሞ እናስብ፡፡ አያችሁ – ነቢዩ ሶሎሞን በመጽሐፈ መክብብ “ሁሉም ከንቱና የከንቱ ከንቱ ነው” ማለቱ ለዚህ ነው፡፡ ይህ ሁሉ መጠላላታችን፣ ይህ ሁሉ ጠብና ግጭታችን፣ ይህ ሁሉ መገዳደላችን፣ ይህ ሁሉ ለገንዘብና ለሥልጣን መጓጓታችንና መስገብገባችን፣ ይህ ሁሉ ትርምስ … እንግዲህ ለዚህች ብቅ ብላ ለምትጠፋ እንደጤዛም ለምትመሰል አጥበርባሪ ሕይወት ነው ማለት ነው፡፡ እውነትን እያስታወስኩ እንጂ ሃይማኖትን እየሰበክሁ እንዳልሆነ ይታወቅልኝ፡፡ ሴትዮዋ ምን ነበር ያለችው ? “እንዲህ ልጠግብ በሬየን አረድኩ”፡፡ ኋላ የምንቆጭባቸው ነገር ግን ደስ እያለን የምንገባባቸው ጉዳዮች ብዙ ናቸው፤ ዲያብሎሳዊ ምርቃና ደግሞ ክፉና የክፉ ክፉ ነው፡፡ ሦስተኛውን ዐይናችንን እንዲከፍትልን አምላክን እንጠይቅ፡፡ (በነገራችን ላይ የቪኦኤው ሄኖክ ሰማእግዜር ፈንቴን ምን ነካውና እንዲያ በቁሙ የተበለሻሸው? ምን ጎደለብኝ በሎ ነው ቆሻሻ ቱቦ ውስጥ ወድቆ እየተግማማ ቪኦኤንም ሊያበክተው የፈለገው? ለገንዘብ ነው ለዓላማ ወይንስ ለእውነት ጥብቅና የቆመው? ወዳጅ ካለው ይምከረው፡፡)


ዶክተር ብርሃኑ ነጋ፡፡ ሀገር ቤት ውስጥ ስላለሁ ለናንተ ንቅናቄ ሕዝቡ ያለውን ደግና በርህራሄ የተሞላ አመለካከት ለመገንዘብ ችያለሁ – ስሜታዊ ቅኝት እንጂ ሣይንሳዊ ጥናት ግን አላደረግሁም፡፡ ዕድል እንዲገጥማችሁ ፈጣሪን የሚለምነው ብዙ ነው፡፡ በተለይ አንዳርጋቸው ጽጌ ታሪክ በቅርቡ ሊያወጣው በሚችለው አሁን ግን ሥውር በሆነ ምሥጢር የተነሣ ለወያኔው የምሥራቅ አፍሪካ ካሊፌቶች ተላልፎ ከተሰጠ ወዲህ የሕዝቡ ስሜት ክፉኛ ተለውጧል፤ በግልጽ አይናገረው እጅ ውስጥ ውስጡን እየተብሰከሰከ ነው – የሚፈልገው ማስተንፈሻ ቀዳዳ ነው፡፡ ሕዝብ ስል በሆዳምነትና በዘረኝነት አረንቋ ገብቶ የሚዳክረውን በሰው ቅርፅ የሚንቀሳቀስ አጋሰስና አድርባይ ሣይሆን ጭቁኑንና የኢትዮጵያን ትንሣኤ አንጋጦ በጉጉት የሚጠባበቀውን ማለቴ ነው፡፡ ሕዝብ ሕዝብ ሲባል ሁሉም እየተነሣ ይህን መከረኛ ቃል ስለሚናገር ሕዝብ ሲባል ምንና ከማን አንጻር እንደሆነ መለየት አስፈላጊ ነው፡፡ ዘምቦለል አርቲስቱም፣ መዥገር ፖለቲከኛውም፣ ሐሳዩ መሲህ ‹የሃይማኖት አባቱ›ም፣ … ብቻ ሁሉም እየተነሣ “ሕዝብ፣ ሕዝቡ፣ ሕዝቤ፣ ሕዝባችን፣ ለሕዝባችን፣ በሕዝባችን፣ ከሕዝባችን…” ሲል ሁልጊዜ ይገርመኛል፡፡ ዓለም ለይቶላት የውሸት መናኸሪያ መሆንዋን ከምረዳባቸው አመላካች ነጥቦች ውስጥ አንዱ ይሄው ነው፡፡
ወያኔን መጣል የተፈቀደለት አካል ይህን ዕኩይ የአፍሪካ ካሊፌት በቀላሉና ካለብዙ ወጪ እንደሞጄሌ ከነሰንኮፉ መንግሎ እንደሚጥለው በበኩሌ ቁልጭ ብሎ ይታየኛል፡፡ … ሌሊን የዛሩን መንግሥት ለመጣል በሚታገልበት ወቅት መካሪዎች “አንተ ምን ቅብጥ አድርጎህ ነው ይህን ግምብ መንግሥት ለመጣል ካለአቅምህ የምትፍጨረጨረው?” አሉት አሉ፡፡ እሱም አላቸው – “የምትሉት ነገር እውነት ነው፣ የዛሩ መንግሥት ትልቅ ግምብ ነው፤ ነገር ግን ግምቡ የበሰበሰ በመሆኑ በቀላል ግፊ ይወድቃል፡፡” ሌኒን እውነቱን ነበር፡፡

የወያኔ ግምብም ሰው አጥቶ እንጂ ከበሰበሰ ቆይቷል፡፡ ደፋሪ አጣ፤ ጀግና አጣ፡፡ በኅብረት የሚበላ እንጂ በኅብረት አታግሎ ለድል የሚያበቃ የነፃነት አርበኛ አጣ(ን)፡፡ ይህን እውነት የሚናገሩ ዜጎችን ቀንድ ቀንዳቸውን ማለት የተለመደ ቢሆንም የበሰበሰ ዝናብ ስለማይፈራ እኔ የሚሰማኝን እናገራለሁ፤ አሃ፣ መፍራት ደግ ነው ጎበዝ! ሥነ ልቦናችንን ሁሉም ከየአቅጣጫው አደቀቁትና ልምጥምጥ ሆነን ቀረን አይደል?

ለኢትዮጵያ ነፃነት በጦር እታገላለሁ ብሎ ማንም ኢትዮጵያዊ መነሣት ይችላል ብዬ በበኩሌ ካመን ቆይቻለሁ፡፡ ምክንያቱም ወያኔ ካለጦር በምንም መንገድ አራት ኪሎን እንደማይለቅ ግልጽ ነውና፡፡ ውሻን ከአጥንት፣ ጅብን ከአህያ በድን ማላቀቅ የሚቻለው በኃይልና በጉልበት እንጂ በጩኸት የማይሞከር ነው፡፡ በግሌ የማላምንበት ግን ከአሁን ወዲያ የዚህ ወይም የዚያ ጎሣ ጦር የሚባል ነገር ዳግም ሊጠቀስ የማይገባው መሆኑን ነው፡፡ እሱ ነውር ነው፡፡ በዘጠና ነገድ መሀል የአንድን ነገድ ወይም ዘውግ መብት ለማስከበር ዘጠና ጦር ሠራዊት ማቋቋም ማለት እንደወያኔ ሀገርን በኳስ አበደች ለማተራመስ ማቆብቆብ ማለት ነው፡፡ ከዚህ አንጻር አሁን የምናያቸው ዴምሃትን የመሳሰሉ የትጥቅ ኃይሎች ለሕዝብ የሚያስቡና ሕዝብን ማዕከላቸው የሚያደርጉ ከሆነ ብዙ ሳይረፍድባቸው ስማቸውንና የፖለቲካ አመለካከታቸውን ወደ ኅብረ ብሔራዊነት ይቀይሩ፡፡ ስም ብቻም አይደለም – ሕዝብ በሚወዳት ሰንደቅ ዓላማ ላይ የለጠፉትን ሀውልት በአፋጣኝ ያንሱ፡፡ እንዲህ የምለው “የአክሱም ሀውልት ለደቡቡ ምኑ ነው?” ያለው የዚያ ጋጠወጥ ልጅ ንግግር ትዝ ብሎኝ አይደለም፤ የጎሣ ወይም የቡድን ፖለቲካ አንዱ ችግር ባንዴራንና ሕገ መንግሥትን በመሳሰሉ ታላላቅ ጉዳዮች ላይ ኃይል የሚሰማቸው ጥቂቶች በዝግ ስብሰባቸው እየወሰኑ ሕዝብ ላይ መጫናቸው ነው፡፡ ይህ ደግሞ አንገሽግሾናል፤ ቋቅ እስኪለን ባለፉት በስባሳ ማኅበራዊ ሥርዓቶቻችን አለውድ በግዳችን እንድንጋታቸው ተደርገናል፡፡ ማንም ግን አልተጠቀመም፤ ስንረጋገም ይሄውና እነሱም እኛም መቅኖ አጥተን በምናብም ይሁን በአካል ከመንከራተት አልወጣንም፡፡ ድንጋይ ራሷ ሰምሃል መለስ አምስት ቢሊዮን ዶላር በስሟ መቀመጡን እንደመታደል ከቆጠርነው ስህተት ነው፡፡ ዶክተር አርከበ ዕቁባይ በተንጣለለ ግቢ በብዙ ሀብት እየተዝመነመነ መኖሩን ከጤና ከቆጠርነው ተሳስተናል – ለዚህም ነው ሁላችንም በሽተኞችና ሰላም የሌለን ተንከራታቾች ነን የምለው፡፡ አሁንም ልድገመው – በኢትዮጵያ ምድር ገዢዎችም ተገዢዎችም አልታደልንም፡፡

እነብርሃኑ የነፃነታችን ምክንያቶች መሆናችሁ እውነት ከሆነ በበኩሌ እንዲህ ብታደርጉ ደስ ይለኛል፡፡ እንዴት ብሎ መጠየቅ ከጨዋ ሰው ይጠበቃል፡፡ በግል ካልጠየቃችሁኝ ደግሞ እዚህ አልናገርም፡፡ እግዚአብሔር ኢትዮጵያን ይባርክ፡፡ ኧረ ቆይማ አንድ ነገር ትዝ አለኝ – በሀገራዊ ወኔው በጣም የምወደውና የማከብረው እንትናዬ አንድም ቀን በቀጥታም ይሁን በተዛዋሪ ስለፈጣሪ (ስለእግዚአብሔር አላልኩም) ትንፍሽ ብሎ የማያውቀው ለምን ይሆን? ለነገሩ ማመን አለማመን የግል ጣጣ እንጂ እኔን ምን አገባኝ?…)

ለመሰነባበቻ፤
“የታሪክ አጤሬራ”
አጤሬራ ማለት የዘመኑ ትምህርት ቤታዊ ልክፍት ነው – ተማሮች በእጃቸውም በወረቀትም ለፈተና መልስ ይሆናሉ ብለው የሚገምቷቸውን ነጥቦች ባጭር ባጭሩ ጽፈው ወደፈተና አዳራሽ የሚያስገቡት የባዶ ጭንቅላት ማሳያ ጽሑፍ አጤሬራ ይባላል፡፡ ቀጣዩን አጤሬራ አንብበህ የማትናደድ ከሆንክ መናደድ ብሎ ነገር አልፈጠረብህም፡፡ ስለዚህ ያለህበት ሁኔታ እንደሚገባህ ወስነሃል ማለት ነው፡፡

ሀ. ተፈሪ መኮንን፤ ጅብ፣ ዓሣማ፣ ምሥጥ፣ መሠሪ፣ ተንኮለኛ፣ አስመሳይ፣ ራስ ወዳድ፣ የሁለት ጌቶች ተገዢ፣ ‹አነር›፣ ስግብግብ፣ሥልታዊ፣ …
ለ. መንግሥቱ ኃ/ማርያም፤ አህያ(ከደደብነት አንጻር ብቻ!)፣ ቆቅ፣ ግልብ፣ ደንቆሮ፣ ግትር፣ እልኸኛ፣ ሥልጣን ወዳድ፣ ሰይጣን፣ ጭራቅ፣ ዕብሪተኛ፣ ኢ-ሥልታዊ፣ ግልፍተኛ፣ አርቆ የማያይ፣ የአንድ ጀምበር ሰው፣ …
ሐ. መለስ ዜናዊ፤ (ከ“ሀ” እና ከ“ለ” ብዙ የሚጋራቸው ባሕርያተ ሰውና ባሕርጣተ አጋንንት አሉት)፣ ውሻ፣ ፍየል፣ እባብ፣ እስስት፣ ከሃዲ፣ ዘረኛ፣ አግቦኛ፣ አሽሙረኛ፣ ሥራየ ቤታዊ፣ ሊቀ ሣጥናኤል፣ ግብዝ፣ …
መ. ምዕራባውያን፤ ፍየሎች፣ ሰይጣን አምላኪዎች፣ ባፎሜታውያን፣ ሸፍጠኞች፣ አስመሳዮች፣ ገሃነማውያን፣ መሠሪዎች፣ ሆዳሞች፣ አስመሳዮች፣ የታሪክ ቀበኞች፣ ዘረኞች፣ ፀረ-ሕዝቦች፣…

የኤርትራን ካርታ ለአፍታ አስብ፡፡ ከሱዳን ተነስቶ የሣህል በረሃንና ቀይ ባሕርን ይዞ ሺዎች ኪሎ ሜትሮችን በመጓዝ የት እንደገጠመ ልብ በል፡፡ የኮንጎን ካርታ ደግሞ ለአፍታ አስብ፡፡ እንዴት በመሰለ ቀጭን መስመር ኮንጎን ወደባሕር እንዳቆራኛት አስተውል፡፡ የሰዎችን ተንኮልና ቀናነትም በዚህ ተረዳ፡፡ አንዲትን ሀገር ሆን ብሎ የራሷን ግዛት በመቀስ እንደዶሮ በልቶና ቆርጦ ቆራርጦ የባሕር መውጫ ለማሳጣት የተሤረውን ሤራና ያን ሰይጣናዊ ሤራ እውን ለማድረግ የተሄደውን ርቀት ልብ በል፡፡ በአዲስ አበባ ውስጥ ዜጎች ለዓመታት ደጅ ጠንተውና ከፍተኛ እጅ መንሻ ጉቦ ከፍለው 72 ሜትር ካሬ የመኖሪያ ቤት መሥሪያ እየተሰጣቸው ባለበት ሁኔታ፣ የውጪ ኤምባሲዎቻችን በየሽንቁላው በአነስተኛ ክፍሎች ተወትፈው በሚገኙበት ሁኔታ፣ … የአሜሪካንን፣ የፈረንሣይንና የእንግሊዝን ኤምባሲዎች የግቢ ስፋት ልብ በል፡፡ እያንዳንዳቸው እነዚህ ሀገሮች የያዙት ቦታ ጂቡቲ፣ ጂቡቲን ያካክላል – ፈረስ ያስጋልባል የሚለው ሥነ ቃልም አይገልጸውም፡፡ ምክንያቱም ከሞኝ ደጃፍ ሞፈር ይቆረጣላ፡፡ ደግሞም ምክንያቱም “ሞኝ የለቱን ብልህ ያመቱን” ይባላላ፡፡ እናሳ መሪዎች ነበሩን? አሁንስ አሉን? የአሁኖቹን ግዴለም ተዋቸው፡፡ ዱሮስ ነበሩን? ከነበሩንስ ከአንድ ወር በላይ ሊራመድ የሚችል ርዕይ(ቪዥን) ነበራቸውን? እንዲያ ገምድለው ገምድለው ለየኤምባሲው ያን ያህል ኹዳድ የሰጧቸው ምን ነክቷቸው ይሆን? ከመግረም አልፎ በሞኝነት ያስቀኛል፡፡

ለ1600 ዓመታት ጳጳስ ከግብጽ እናስመጣ ነበር አሉ፡፡ ሙስሊሞቹ ግብፆች ቢቸግራቸው ቁመተ ዠርጋዳውን ሙስሊም ሰላይ የጳጳስ ልብስ እያለበሱ በስመ ኮፕቲክ ኦርቶዶክስ ወደኛ ይልኩልን ነበር አሉ – በሣይቸግር ጤፍ ብድር የገባንበትን ዕዳ በወርቅና በእምነት ሊያስከፍሉን፡፡ በማከያው ከኛ ሰው የጠፋ ይመስል ምሥጢሩ እስካሁን ባልታወቀ ሁኔታ ኢትዮጵያ በግብጽ ተፅዕኖ ምክንያት የዓለም ሬሞርኬ (ተጎታች) ሆና ቀረች፡፡ ለምን ቢሉ – እሞኝ ደጃፍ ሞፈር ይቆረጣልና፡፡ ሀፍረትን አናውቅም እንጂ ይህም ነገር እጅግ በሀፍረት ሸማቅቀን በተገባ ነበር፡፡ የክርስቲያን ደሴት የሆነችው ኢትዮጵያ ከሕዝቧ 90 በመቶው ሙስሊም ከሆነና መንገሥታዊ ሃይማኖቷ እስልምና ከሆነ የጥቅም ተጋሪ ሀገር – ለሸፍጥ ሥራ ቀጭን ሰበብ በሚያስፈልጋት ግብጽ ጳጳስ “ኢምፖርት” እናደርግ ነበር፡፡ ዕንቆቅልሽ፡፡ ተናደድ!

ያገርህን የዘመኑን ደናቁርት ባለሥልጣናት ተመልከት፡፡ ከዋሽንግተን ቀርቶ ከመንግሥተ ሰማይ ሳይቀር ስልክ ደዋይ ጋዜጠኛ “ወንጀለኛ”ን ካለበት ሊያስር የሚችል ሊያውም ነቃ ባለው የቦሌ ወረዳ የተመደበ የፖሊስ ኮሚሽነር የምታገኘው በሀገርህ ብቻ ነው፡፡ ሀፍረት ሞታ ተቀብራለች፡፡ ያሣፍራል፡፡ እንደሀገር ብቻ አይደለም ይህ ሁኔታ ሊያሣፍር የሚገባ – እንደሰው ፍጡርነትም በሀፍረት ሰውነትን ሊያሳንስ የሚገባው መራር እውነት ነው፡፡ ሰው ጠፍቶ ግርማ ወልደ ጊዮርጊስን የመሰለ በወሣንሳ የሚነሣ ባዶ ቀፎ ሀገርህን በፕሬዝደንትነት “እንዲመራልህ” ተሹሞልህ በዚህ ቶርቶራ ሰውዬ “ወርቃማ አመራር” ዓለምህን ቀጭተሃል – ዕድገትህም ሰማይ ደርሶ ስደትህንና ጠኔህን አስፋፍተህ ቀጥለሃል፡፡ ሰው ጠፍቶ በስመ የፖለቲካ ታማኝነት ራሱንና አካባቢውን እንኳን አስተካክሎ ሊገልጽ የማይችል የምሁር ማይም ደሳለኝ የሚባል ጠቅላይ ሚኒስትር ተጎልቶልሃል፡፡ በየዓለም ሀገራቱ ኤምባሲዎቻችንን ለብቻ ተቆጣጥረው የሚገኙት ወያኔ ወንድም እህቶቻችን ከፊደል መቁጠር እምብዝም ያለፉ አይደሉም – ማይም አጋሰስ ደግሞ ከ24 ሰዓት ውስጥ ወደ 30 የሚጠጋውን ስለሆዱ ሲጨነቅ ይውል ያድራል እንጂ ለሀገር ሥራ አንዲት ሴከንድም አያውልም፡፡ ሦስተኛና አራተኛ ክፍል “ግራጁየት”(ምሩቅ) ጄኔራልና ከርኔል የሆኑባት ብቸኛዋ ሀገር ኢትዮጵያ ናት፡፡ ምርጫ በሌለበት ሁኔታ በምርጫ ስም እጅግ ብዙ ገንዘብ በይስሙላው ምርጫ ሰበብ የሚከሰከስባት ብቸኛ ሀገር ኢትዮጵያ ናት – በዚህስ ኤርትራ ተሻለች – ወዲ አፈወርቂ እውነቱን ነው በትያትር ለምን ገንዘብ ይባክናል? ከቀበሌ እስከ ታላቁ ቤተ መንግሥት ሥልጣን ላይ የተቀመጡ ሰዎች በአንድ ዘውግ የሚዘወሩና በአብዛኛው የአንድ መከረኛ ዘውግ አባላት የሆኑ ከነዚሁም ብዙዎቹ ፍጹም ዘረኛና ትምህርት ዕርማቸው የሆኑ ማይማን ሆዳሞች ናቸው – ይህም በግልጽ የሚታየው በሀገርህ ውስጥ ነው፡፡ በአንድ ዘውግ ላይ በፈረንጅኛው አጠራር ጄኖሣይድ የሚባለው ዕልቂት ታውጆ ያ ዘር በየሚገኝበት ሥፍራ ሁሉ እንደዐይጥ እንዲጨፈጨፍ፣ ዘሩም እንዲመክን፣ ከሀብትና ከመንግሥታዊ ሥልጣንም እስከወዲያኛው እንዲወገድ የሚደረገው በኢትዮጵያ ሊያውም በ21ኛው መቶ ክፍለ ዘመን የሰው ልጆች ሥልጣኔ ላይ ነው፡፡ በአንድ የታሪክ አንጓ ላይ በሰሜናዊ ምዕራብ ኢትዮጵያ ግዛት ውስጥ ነዋሪ የነበሩ ሕዝቦችን በመሪር አገዛዝ ያንቀጠቅጥ የነበረውን የቀድሞ ንጉሠ ነገሥት ዓርማ በማንሣት እነዚህ አሁን ሥልጣን ያሉ በላኤሰቦች በ“የዘሬን ብተው ያንዘርዝረኝ” አረመኔያዊ አገዛዛቸው ተሻሽሎ የተቀመረን ስቃይ ሕዝብ ላይ ቀጥለው የሚገኙት በዚሁ ዘመን ነው፡፡ እሊህ የእፉኚት ልጆች የባንዳ አባቶቻቸውን ቂም በቀል አንግበው ከየአካባቢው የሚገኘውን ለምና ምርጥ ቦታ የኛ ክልል ነው ወደሚሉት ነዋሪን እያፈናቀሉና አልነሳም ብሎ የሚያንገራግርንም አለርህራሄ እየጨፈጨፉ የሚገኙት በዚህ ዘመን ነው፡፡ በኦጋዴን፣ በሶማሌ፣ በጋምቤላ፣ በሸዋ፣ በጎጃም፣ በሐረር… ሰዎቻቸውን እያዘመቱ መሬት የሚቀሙና ለጥሪ እንኳን በማይበቃ ርካሽ ዋጋ ለባዕዳን የሚሸጡ፣ ባለይዞታዎችን በመትረየስ እየረፈረፉ አስከሬኖችንም ከጭፍጨፋ ለጥቂት በተረፉ ምሥኪን ወገኖቻችን ከየወደቁበት እያሰበሰቡ “ደርድር፤ እዚያ ጋ በብዛት አለ አይደል እንዴ” የሚሉ ጉዶች የተፈጠሩብን በዚህ ዘመን ነው፡፡ የአሜሪካን ወታደሮች በአልቃኢዳዎች ሬሣ ላይ ሽንታቸውን ቢሸኑ የሥልጣኔያቸው ጉዳይ ውሃ እንደበላው ተቆጥሮ በሀገር ልጅነትና በሌሎች ነገሮች ስለሚለያዩ ነው ሊባል ይችል ይሆናል – ሰብኣዊነትንም ለጊዜው ዘንግተንላቸው፡፡ የኞች ግን ምን እንደነካቸውና ልባቸው ለምን እንደዚያ እንደደነደነ፣ በሬሣ ላይ ሣይቀር ለምን እንደዚያ የሰውነት ባሕርያቻው ወደ ጭራቅነት እንደተለወጠ ቀን ሲመጣ መጠናት ያለበት አስደንጋጭ ጉዳይ እንጂ አሁን በቀላሉ ልንመልሰው የሚቻለን አይደለም፡፡ አጤሬራየን እዚህ ካልቋጨሁት- ስዶጎዱግ ውዬ ስዶፎዱግ ማደሬ ነው፡፡ ለማንኛውም መልካም አዲስ ዓመትና መልካል የመስቀል በዓል በዓል፡፡ መስከረም 13 ቀን 2007፡፡ ይቺን 13ትን እንኳን አልወዳትም ነበር …

ኤርምያስ ለገሰ

በቅድሚያ መጵሀፉን ጊዜ ሰጥተህ በማንበብ አስደማሚ ምልከታ በመስጠትህ ከልብ አመሰግናለሁ ። የተጳፈበትም አንዱ አላማ ይህ ስለሆነ። ይህ እንደተጠበቀ ሆኖ በእይታህ ላይ እነዚህ ጉድለት ይታይባቸዋል ብለህ ያነሳኸው እና የወደፊት ግምቶችህ ላይ የተወሰነ አስተያየት ለመስጠት የሚጋብዙ ስለሆነ ትንሽ ማለት ፈለኩ። በዚህ አጋጣሚ ሌሎች በመጵሀፉ ይዘት ላይ ዝርዝር ግምገማ ላደረጉ ሰዎች ምስጋናዬ ይድረሳችሁ። ለእያንዳንዱ አስተያየት መስጠት ከጊዜ አኳያ በጣም አስቸጋሪ ስለሆነ የማልዘልቅበትን መንገድ ልጀምረው አልፈለኩም ። የጋዜጠኛ ተመስገንን በልዩ ሁኔታ መመልከት የፈለኩበት የራሱ ምክንያቶች አሉት። ተመስገን ሀገር ቤት ባለ አስጨናቂ ሁኔታ ውስጥ በድፍረት መጵሀፉን ማንበቡን በአደባባይ ገልጶ በመጵሄት ሳይቀር መክተቡ ልዩ ያደርገዋል ። አንዳንድ የቀድሞ ” የትግል ጓዶቼ! ” በሚስጥር ቢሮ እየቆለፉና እቤታቸው እየደበቁ ባነበቡበት ሁኔታ የተመስገን ፊትለፊት ማውራት ምንያህል የህሊና ራስ ምታት እንደለቀቀባቸው ማሰቤ ሁለተኛ ምክንያት ነው( ቢያንስ ሁለት “ሚኒስቴር ደረጃ ያሉ ሰዎች ” የተፃፈው ሐቅ ስለሆነ ማስተባበል አይቻልም ” የሚል አስተያየት መስጠታቸውን እርግጠኛ ከሆነ ምንጭ ሰምቻለሁ ። ማረጋገጥ ለምትፈልጉ ” የዲሞክራሲ ሐይሎች” በውስጥ በኩል ጠይቁኝ) ከዚህም በተጨማሪ ከወደ ካሊፎርኒያ የደረሰኝ ዜና የስርአቱ ደጋፊ የሆኑ ሰዎች መጵሀፉን ሲያዙ በአንድ ጊዜ እስከ ሀምሳ ኮፒ መጠየቃቸውን ነበር( መረጃውን ያደረሰኝ የዘወትር ተባባሪዬ ሔኖክ የሺጥላ ” እነዚህ ሰዎች ሊያነቡት ነው ወይስ ሊያቃጥሉት?” የሚል ጥያቄ ቢጠይቀኝም መልስ መስጠት አልቻልኩም ። መልስ ካላችሁ ተባበሩኝ።)

ሦስተኛው ምክንያት የተመስገን ፅሁፍ ሐገር ቤት በመጵሄት መልኩ ቢሰራጭም የመለስ ” ትሩፉቶች” ግን ህጋዊ በሆነ መንገድ እንድትባዛ ብትጠየቅም ሐገር ቤት ያሉ (ጥያቄው የቀረበላቸው) አሳታሚዎች ፍቃደኛ ሳይሆኑ ቀርተዋል ። በዚህም ምክንያት ወደ ህዝቡ በሰፊው መሰራጨት አልቻለም። ( በዚህ አጋጣሚ ነጳነት አሳታሚ ኢትዮጵያ ለሚያሳትም ሰው ስክሪፕቱን በነፃ ለመስጠት ፍላጐት እንዳለው ገልጶልኛል።)
ይህን እንደ መንደርደሪያ ካነሳሁ ዘንዳ የጋዜጠኛ ተመስገን ምልከታዎች ላይ ያሉኝን አስተያየቶች ላስቀምጥ።

1• “መፈንቅለ መንግሥት”

ተመስገን ከሐገር የወጣሁበት ዋነኛ ምክንያት በአንድ ወቅት የመፈንቅለ መንግሥት ሙከራ ተደርጓል ብዬ መናገሬ አቶ መለስን እንዳስቆጣው እና አቶ በረከት ይህን ተከትሎ ያለስራ እንዳንሳፈፈኝ፣ በዚህም ምክንያት ቅሬታ ቋጥሬ በትምህርት ሰበብ ከሐገር መኮብለሌን ገልፆአል ። ይህን ክስተት በመጵሀፉ ላይ መገለጵ እንደነበረበት አመላክቷል ።ይህ የተዛባ መረጃ ነው። ኢንፎርሜሽኑ ከውስጥ ወደ ውጭ ስለሆነ መዛባቱ ብዙም አልገረመኝም።

ጋዜጠኛ ተመስገን በመጵሀፉ የመጀመሪያ ገፅ ላይ ” የአሳታሚው ማስታወሻ” የሚለውን ክፍል ያነበበው አልመሰለኝም ። አሳታሚዎቹ ግልፅ በሆነ ሁኔታ በመጀመሪያው መፅሐፍ ትኩረት የተደረገባቸውን የአዲሳአባና ተያያዥ ጉዳዬች ብቻ እንደሚያሳትሙ ፣ በቀጣይ በሌሎች ጉዳዬች ( መፈንቅለ መንግስቱን ጨምሮ) እንደሚመለሱ ገልፀዋል።

በማሰከተል ” የመንግሥት ግልበጣ” የምትለው ማእከላዊ መልእክት ጣጣ እንዳመጣችብኝ መገለጱ ነው። እንደ እውነቱ ከሆነ ውሸት የመናገር ፍላጐት ቢኖረኝ ኖሮ ይህን የተመስገን አስተያየት ልክነው እል ነበር። ይህን የሚያክል ሀገርና አለም የሚያናውጥ መልእክት ቀርጬ የማስተላለፍ ስልጣን ቢኖረኝ ኖሮ ፣ የሃገሪቷን ስልጣን ” ከትግራይ የፈለቀው ገዥ መደብ” ጠቅልሎ ይዞታል የሚል አንደበት አይኖረኝም ነበር። እንደዚህ አይነት ማእከላዊ መልእክት የመቅረጵ ሚና ትላንትናም ሆነ ዛሬ እኔ፣ ሽመልስ ከማል፣ሬድዋን ሁሴን የለንም ። ጠቅላይ ሚኒስትር ሐይለማሪያምም የላቸውም / አይኖራቸውም ። በመሆኑም ከ ” መፈንቅለ መንግስት” ወደ ” ባለሥልጣናት ግድያ” ከዛም ወደ ” ቀቢፀ ተስፉ ” የሚል መልእክት የተቀረፀው ከአንድ ግለሰብ ነበር። መቼም ለምን? እንዴት? ምን ለማትረፍ የሚለው ጥያቄ አሁን እንደማይነሳ ተስፉ አደርጋለሁ ።

በማስከተል የአሜሪካ ጉዞዬን በተመለከተ ትምህርት የሚባለው መንግሥት ተደናግጦ በመጀመሪያው ሰሞን ያስተላለፈው ነበር ( በቅርብ ቀን ደግሞ ሌላ ነገር ብለዋል።) ሲጀመር ወደ አሜሪካ እንደምመጣ የተነገረኝ ኮሙዩኒኬሽን ጵ/ ቤት ከመቋቋሙ በፊት አደረጃጀቱን ለማስተካከል ስለ “Situation Room” አሰራር ለመመልከት አስቀድሞ የተያዘ ፕሮግራም ነበር። እኔ ብቻ ሳልሆን ከውጭ ጉዳይም ሌላ ሐላፊ አብሮኝ ነበር። በታህሳስ የታቀደው ጉዞ በአጣዳፊ ስራዎች ምክንያት ተላልፎ ሰኔ መጨረሻ ተቆረጠ።በርግጥ እንደ ማስታወሻ ፀሐፊ እስከ ሰኔ መቆየቴ አልከፉኝም( ድርጊቶቹ የግድ መፈፀማቸውና ሰለባዎች መኖራቸው እስካልቀረ ድረስ።) ወንድም ተሜ! መቼስ እንደራስህ የምትወዳቸውን እስክንድርና ሲሳይ አጌና ከውስጥ ወደ ውጭ ምን አይነት ሴራ ሲጠነሰስባቸው እንደነበር መስማት ትፈልጋለህ፣ መቼስ! የክቡር ዶክተር አርቲስት ጥላሁን ገሰሰ የቀብር ስርአት ላይ የኢህአዴግ ባለሥልጣናት አታካራ መስማት ትፈልጋለህ( አንተም ቢሆን በፍትህ ጋዜጣ ላይ ” ለምን አባረህ በለው ያንን አመጸኛ… ” ብለህ የጳፍከውን የፀቡ አንድ ክፉይ መሆኑን ቀብድ ያዝልኝ ፣ መቼስ! የአልበሽር ፣ የብርቱካን ሚደቅሳ፣የቴዲ አፍሮ፣… ወዘተ ጉዳዬች የወቅቱን የፓለቲካ ምህዳር አጣበውት እንደነበር አይዘነጋም። እናም ስለእነዚህ እና ሌሎች ጉዳዬች ለማውጋት እድሉን በማግኘቴ ጊዜውን እንደባከንኩ ይቆጠር ይሆን?

2• የፍትህ ጋዜጣ ባልደረባ ስለነበረው ማስተዋል ብርሐኑ በተመለከተ፣

ጋዜጠኛ ማስተዋል እንደገለፀው ቢሮ ጠርቼ አናግሬዋለሁ። እንደ ማስፈራራትም ከተመለከተው የስርአቱ ባህሪና እኔም የዛ ስርአት ውላጅ ስለነበርኩ ከዛ ውጭ ልሆን አልችልም። ለደረሰበት የስነ ልቦና ጫና ይቅርታዬን አድርስልኝ።( በነገራችን ላይ ስርአቱ ውስጥ በነበረኝ አስተዋጽኦ ይቅርታ መጠየቁ ችግር ያለብኝ ሰው አይደለሁም ።በተለይ በግለሰብ ደረጃ ከይቅርታም አልፌ በመጵሀፉ ምእራፎች መታሰቢያ ያደረኩት አለ። ” እውን ታሪክ ራሱን ደገመ? ” የሚለውን ምእራፍ ልብ ይሏል።)

ነገር ግን ከሃላፊነት ራሱን እንዲያገል ጠይቆኝ ነበር የሚለው ትክክል አይደለም ። እንደውም በወቅቱ የነበረው አቅጣጫ ጋዜጠኛን ወደ ኢህአዴግ መሳብ ስለነበር በተቃራኒው ሊሆን ይችላል ። መቼስ ወንድም ተሜ!ከፍትህ ጋዜጣ ጋር ኢሕአዴግ ለምን ተጣላ? ጋዜጠኛ ማስተዋልን በምን ጉዳይ አናገርኩት? ጋዜጣው ላይ ለምን እርምጃ ተወሰደ ( የነበርኩት ጥንስሱ ላይ ነበር)የሚለውን ቁምነገር አሁን እንደማትጠብቅ ተስፉ አደርጋለሁ። በነገራችን ላይ በጋዜጣህ ላይ እኔና ጋዜጠኛ ሳምሶን ( ካልጠፉ ሰው!!) አጃምላችሁ ” ሚኒስትር ዴኤታውና ጋዜጠኛ ሳምሶን ማሞ ሊከሰሱ ነው!” ብላችሁ በፊት ገፅ ያወጣችኃት በሀገረ አሜሪካ ኢምግሬሽን ጵ/ ቤት የጥያቄ መአት አዥጐድጉዳለች። ሂሳብ ማወራረድ ሳይጠይቅ አይቀርም!! እውነት እውነት እልሃለሁ የበግ ለምድ ከለበሰው ተኩላና ከጅምሩ ከምጠየፈው ሰው ጋር ማጃመላችሁ አሳዝኖኛል ። ጋዜጣዋ የወጣች እለት ለእሱ የወገንተኝነት ማረጋገጫ ብስራት፣ ለእኔ ደግሞ ሐዘን ነበር።እውነቴን ነው የምልህ ጋዜጠኛ (?) ሳምሶንን ኢህአዴግ ቢሮ ጀምሮ እጠየፈዋለው። ታዲያ እኔ ብቻ እንዳልመስልህ?…

3• የፓለቲካ ሁለተኛ እድል

ይህቺ አስተያየት የአንተ አይደለችምና ጣላት ። ነው ካልከኝም በድፍረት እነግርሀለሁ ። ተሳስተሀል። ይህ አጀንዳ ሆን ተብሎ በኢህአዴግ እና እጅግ በጣም ጥቂት የራሳቸው ሚና ያነሰ የመሰላቸው ( self ego) ባላቸው ሰዎች የሚቀነቀን ነው። አልፎ አልፎም ” የማንነት ሰርተፍኬት ሰጪና ነፉጊ ” አድርገው ራሳቸውን ከቆጠሩ ግለሰቦች የሚመነጭ ነው። ከኢህአዴግ ውጭ ያሉት የተዛባም ቢሆን ምክንያትና ተጨባጭ ተሞክሮ ስላላቸው የሚጣል አይደለም ። ተገቢ የማይሆነው ኢህአዴግ ይህን እንደ መደላድል እንዲጠቀም ለም መሬት ሆነው ማገልገላቸው ነው።
ወንድም ተሜ! ወጋችን ካንተ ጋር ስለሆነ ወደዛው ልመለስ ። እስቲ አንድ ጥያቄ ልጠይቅ? ከዚህ በፊት ከኢህአዴግ ጋር ከሰሩ እና ጥለው በመውጣት ተቃዋሚን ከተቀላቀሉ ግባብዳ ካድሬዎች ላይ ይህን እኔ ላይ ያነሳኸውን ጥያቄ አንስተሀል?

ግራም ነፈሰ ቀኝ እኔን በተመለከተ የየትኛውም ፓለቲካ ፓርቲ አባል አይደለሁም። አባል ያልሆንኩት ለጊዜው የድርጅት ተልእኮ የመሸከም አቅም ስለሌለኝ ነው ።ከዚህ በተጨማሪም ለተወሰነ ጊዜ ( ቢያንስ የጀመርኳቸውን መፅሐፍት እስክጨርስ) ያለድርጅት ተጵእኖ ነፃነቴን ጠብቄ መኖር ስለምፈልግ ነው። የድርጅት አባል መሆን ( በተለይ የተቃዋሚ) ቁርጠኝነት ፣ የአላማ ጵናት፣ ጊዜን መስዋዕት ማድረግ፣ ግለኛ አለመሆን… ወዘተ ይጠይቃል ። ለእንደዚህ አይነት ሰዎች( የትኛውንም የትግል ስልት ለሚጠቀሙ ) ልዩ አክብሮት አለኝ። መደገፍ አለባቸው የሚል እምነት አለኝ።
እንግዲህ በመጀመሪያው ምልከታህ ላይ ያሉኝ አስተያየቶች ከሞላ ጐደል እነዚህ ናቸው። ሁልግዜም የተላበስከውን የቁርጠኝነት ፀጋ አብሮህ እንደሚዘልቅ እምነቴ ነው።

የሎሚ መጽሔት አዘጋጆች ከሀገር ከተሰደዱ አንድ ወር ያለፋቸው ሲሆን፤ ይህ ጽሁፍ ደግሞ ለመጨረሻ ጊዜ ማለትም ነሐሴ 17/2006 ዓ.ም ለህትመት ሊበቃ ከነበረው እና ከታገተው የመጨረሻ ዕትም (ከቁጥር 120) ላይ የተወሰደ ነው፡፡ ጽሁፉም መንግስት የመሰረተውን ክስ እና በወቅቱ የነበረውን ነባራዊ ስሜት የሚያንጸባርቅ ሲሆን፤ ለአንባብያን ግንዛቤ ይረዳ ዘንድም እንደሚከተለው አቅርበነዋል፡፡ አንባቢም ጽሁፉን በወቅቱ የነበረውን ስሜት ከግንዛቤ በማስገባት እንዲያነብ እንጠይቃለን፡፡

ከሁለት አስርት ዓመታት በፊት ባለጠመንጃውን ወታደራዊ መንግስት በጠመንጃ ኃይል አሸንፎ የአራት ኪሎ ቤተ መንግስትን ከተቆጣጠረ በኋላ፣ ዜጎች በሃገሪቱ የይስሙላ ዲሞክራሲያዊ ሥርዓት ይዘረጋል የሚል ተስፋ አሳድረው ነበር፡፡ ሕዳር 29/1985 ዓ.ም የፀደቀው ሕገ መንግስት አንቀፅ 39ን ጨምሮ (መገንጠልን የሚፈቅደው) አወዛጋቢ ጉዳዮች የሰፈሩበት ቢሆንም፣ በአንቀፅ 29 የተካተተውን (ሃሳብን በነፃ የመግለፅና የፕሬስ ነፃነት መብት) እንዲሁም ዓለም አቀፍ የሰብዓዊ መብት ድንጋጌዎችን የያዘ መሆኑ ይህንኑ ተስፋ ከፍ አድርጎታል ማለት ይቻላል፡፡ ከጊዜ ወደ ጊዜ ግን የሀገሪቱ የበላይ ሕግ የሆነው ሕገ መንግስቱ ሃገሪቱን በሚገዛው ፓርቲና በሹማምንቱ እየተጣሰ፣ አፋኝ አዋጆችና ሕጎች እየጸደቁ ሲሄዱ ማስተዋል ይቻላል፡፡ ከእኛ በኋላ የዲሞክራሲ ጎዳና ጠረጋ የጀመሩት እንደ ቦትስዋና እና ጋና የመሳሰሉ የአፍሪካ ሀገራት በትክክለኛው መንገድ በመጓዛቸው የትና የት ጥለውን ሲሄዱ ገዢዎቻችን ግን ዛሬም “ዲሞክራሲ ሂደት በመሆኑ በአንድ ጀንበር አይመጣም” የሚለውን የተለመደ ዜማ መቀየር አልቻሉም፡፡ መንግሥት አጣብቂኝ ውስጥ ካስገባቸው መሠረታዊ የዲሞክራሲ ጎዳና ጥርጊያዎች አንዱ ሃሳብን በነፃ የመግለፅና የፕሬስ ነፃነት አንዱ ነው፡፡ ከጊዜ ወደ ጊዜ እየጠበበ በመጣው የመብት ጥሰቶች እጅግ አደገኛ አጣብቂኝ ውስጥ ከገቡት መሀል መጽሔታችን “ሎሚ” እና አዘጋጆቿ ይጠቀሳሉ፡፡

ይህ ዕትማችን ከአንባቢያን ጋር የምንገናኝበት የመጨረሻው ሕትመት ባይሆን መልካም ነበር፤ “ሎሚ” መጽሔት ከተመሠረተችበት ነሐሴ 2003 ዓ.ም አሁን እስካለንበት ነሐሴ 2006 ዓ.ም፣ ብዙ ራዕይ ሠንቃ ለሕትመት በበቁ 120 ዕትሞቿ ከጊዜ ወደ ጊዜ የጥራት ደረጃዋን ጨምራ ስትጓዝ ቆይታለች፡፡ በጠበበው የነፃ ፕሬስ ምሕዳር ውስጥም ሆና የሚደርሱባትን ጫና ተቋቁማ ለሦስት ዓመት ዘልቃለች፡፡

“ሎሚ” የተለያየ አቋም ያላቸው ምሁራንና ባለሙያዎች በጥናት ላይ ተመርኩዘው ያቀረቧቸውን ትንታኔዎች አስተናግዳለች፤ ከራሱ ድምፅ ውጪ መስማት የማይፈልገው የገዢው ፓርቲ አመራሮችና ደጋፊያቸው አቋማቸውን በሎሚ እንዲያንፀባርቁ የቀረበላቸውን ግብዣ በተደጋጋሚ ባይቀበሉትም ዜጐቹ አማራጭ መድረክ በመሆን አመለካከታቸውን፣ ሃሳባቸውንና አቋማቸውን በነፃ እንዲገልፁ ዕድል ፈጥራለች፡፡ ከጊዜ ወደ ጊዜ ተነባቢነቷ በማደጉ በአሁኑ ወቅት በሀገሪቱ በወር ከ40 ሺህ ኮፒ በላይ ከሚያሳትሙ ሦስት የነፃው ፕሬስ ቀዳሚ መጽሔቶች ሎሚ አንዷ ሆናለች፡፡ ለ80 ሚሊዮን ህዝብ በወር 40 ሺህ ኮፒ ማሳተም ባያኩራራም፡፡

በነዚህ ጊዜያት በበርካታ ፈታኝ፣ አዳጋችና ተስፋ አስቆራጭ ሂደቶች ውስጥ አልፋለች፡፡ የባለስልጣናት ማስፈራሪያ፣ የደህንነቶች ማዋከብና ማሸማቀቅ፣ አዘጋጆቿ በተደጋጋሚ እየተከሰሱ ዋስትና እያስያዙ ከማዕከላዊ በሹማምንቱ በሚሰነዘር ዛቻና ሥጋት የተነሳ በማተሚያ ቤት እጦት መንገላታት… አብረውን የቆዩ በመሆናቸው “ተላምደናቸዋል” ማለት ይቻላል፡፡ ለአዘጋጆቹ በአንድ “የግል ባንክ በኩል የሚያማልል ዶላር በምንዛሪ በመላክ ከአሸባሪዎች ጋር ለማነካካት የተሰራውን ድራማ አዘጋጆቹ ለንዋይ ባለመንበርከክና ለሙያቸው ታማኝ በመሆን ገንዘቡን ባለመቀበል ፉርሽ ያደረጉበት አካሄድንም መጥቀስ አይከብድም፡፡ የመጽሔቱ አዘጋጆች ላይ ይደርስ የነበረው ማስፈራራት ውጤት ሳያመጣ ሲቀር ቤተሰቦቻቸው ዘንድ ስልክ እየተደወለ “ይህን ሥራውን ካላቆመ ለሚደርስበት መከራ ተጠያቂ እንደሌለ እንድታውቁት” ዓይነት ዛቻዎች የፈጠሩት ሰቀቀንና ስጋትም እንደዋዛ የሚታለፍ አይደለም፡፡ ለምርጫ 97 ኪሳራ የነፃው ፕሬስ ውጤቶችንና አባላትን ተጠያቂ ከማድረግ ቦዝኖ የማያውቀው ገዢው ፓርቲ በ1999 የግል ፕሬሶችን አንዴት “መዋጋት” እንዳለበት የያዘውን አቋም በሰነድ መልክ አዘጋጅቶ ለአመራሮቹ መበተኑ ይታወቃል፡፡ በገዢው ፓርቲ አመራርነት ውስጥ ቢገኙም የፕሬስ ነፃነት መሰበር ይኖርበታል ካሉ ከራሱ ሰዎች በደረሰን በዚህ ሠነድ ላይ “ጋዜጠኞችን ማሠር”፣ “ፕሬሱን ማገድ” በመፍትሄ አቅጣጫነት ሠፍሮ ተመልክተናል፡፡ ይህንንም ምርጫ 2007 ከመድረሱ በፊት “በአስተዳደራዊ” ውሳኔ ለማድረግ እንቅስቃሴ መጀመሩን ውስጥ አዋቂ ምንጮቻችን ከደረሱን መረጃ ተገንዝበነዋል፡፡ ከቅርብ ጊዜያት ወዲህ በፍትህ ሚኒስቴር፣ በብሮድካስት ባለስልጣናት፣ በመንግስት ኮሙኒኬሽን ጉዳይ መ/ቤት፣ በገቢዎችና ጉምሩክ ባለስልጣን፣ በንግድና ኢንዱስትሪ ሚኒስቴር እንዲሁም በመንግስት መገናኛ ብዙሃን ሎሚን ጨምሮ በስድስት የነፃው ፕሬስ ውጤቶች ላይ እየተወሰዱ ያሉ “ዘመቻዎች” ነገ የሚወሰደውን እርምጃ ከወዲሁ ጠቋሚ ናቸው፡፡ የቀደመውን ጊዜ አፈና ወደ ጎን ብለን ባለፈው ሐምሌ ወር የተወሰዱትን እርምጃዎች ብንቃኝ ከወዲሁ መልሱን በግልፅ እናገኘዋለን፡፡ በሐምሌ ወር መጀመሪያ ጠ/ሚ/ር ኃ/ማርያም ደሳለኝ ባሰሙት ንግግር “ሁሉንም ነገሮች አፅድተን ወደ ምርጫው እንገባለን” ማለታቸው ምርጫው ከመድረሱ በፊት ከነፃው ፕሬስ ላይ እርምጃ የመውሰጃ የመጀመሪያ ፊሽካ ነበር፤ ሐምሌ 3/2006 ዓ.ም ምሽት ኢቲቪ “ዶክመንተሪ” ብሎ ባቀረበው “ድራማ” በነፃው ፕሬስ ላይ “ዘመቻ ፀሐይ ግባት” እወጃ ተጀመረ፡፡ በማግስቱ ጠ/ሚ/ሩ “በሕጋዊ ሁኔታ የተመሰረተ ፓርቲ አባል መሆን ወይም በጋዜጠኝነት ከለላ መንቀሳቀስ ከሽብርተኝነት አያድንም” በማለት የታሰረ ጋዜጠኛ በሌለበት ሁኔታ ምን ሊፈፀም እንደታሰበ ተጨማሪ ምንጭ ሰጡ፡፡
ሐምሌ 7/2006 ዓ.ም ከገቢዎችና ጉምሩክ ባለስልጣን እና ከንግድና ኢንዱስትሪ ሚኒስቴር ሠራተኞች “ያለ ንግድ ፈቃድ ነው መጽሔት የምታትሙት”፣ በድንገት “ያለፉትን ዓመታት የሂሳብ ሠነዳችሁን ልታቀርቡልን ይገባል” የሚል ሠበብ በመስጠት፣ ሆኖም ተሰምቶም በማያውቅ ሁኔታ ከሃያ ባላነሱ መሣሪያ የታጠቁ የፌዴራል ፖሊስ አባላት ታጅበው የ“ሎሚ” መጽሔት ቢሮን አሸጉ፡፡ ከቀናት በኋላ “ቢሮውን እንክፈት” ብለው ከመጡ በኋላም የሎሚ መጽሔትን ፋይል ወስደው መልሰው አሸጉት፡፡ ከቀናት በኋላ በየዕትሙ በመፅሔቱ ላይ ማስታወቂያ ያወጡ ድርጅቶች ለሎሚ ምን ያህል ብር ከፍለው ማስታወቂያ እንደሰሩ ከተጠቀሱት መንግስታዊ መስሪያ ቤቶች እየተጠየቀ መሆኑን ገለፁልን፡፡ ከውስጥ አዋቂዎች በደረሰን መረጃም የግብር ቁልል እየተዘጋጀ መሆኑ ታወቀ፡፡ ሐምሌ 28/2006 ዓ.ም ደግሞ ፍትህ ሚኒስቴር ሎሚን ጨምሮ ስድስት የሕትመት ውጤቶች በፍርድ ቤት መከሠሣቸውን ገለጸ፡፡ የክስ መጥሪያ ሳይደርሳቸው የቆዩት አሳታሚዎችም የመዘጋጃ ጊዜ እንዳያገኙ በሚመስል መልኩ ፍርድ ቤት ለመቅረብ ሁለት ቀን ሲቀራቸው መጥሪያው ደረሳቸው፡፡ ከነዚህ መሀልም የሎሚ መጽሔት አሳታሚ ዳዲሞስ ኢንተርቴይመንት እና ፕሬስ ሥራዎች ኃ.የተ.የግ. ማህበር ሥራ አስኪያጅ አቶ ግዛው ታዬ ናቸው፡፡ ሌሎችም ተከሳሾች እንዳሉ ለአቃቤ ሕግ ተገለፀ፡፡

የሆነው ሁሉ እንደሚሆን ከአስተማማኝ ምንጮች መረጃ የደረሳት ሎሚ ሊፈፀም የታቀደውን በርዕሰ አንቀጿ በመጠቆም፣ መፍትሄው ግን ይህ እንዳይደለ ለማመላከት ጥራለች፡፡ ለአብነት ያህል ከአንድ ወር በፊት ሐምሌ 12/2006 ለንባብ የበቃችው “ሎሚ” በርዕሰ አንቀፅዋ የመንግስትን አቅጣጫ ተንብያ ነበር፡፡
አሁን የፕሬሱ ህልውናና የሎሚ አዘጋጆች አጣብቂኝ በሆነ አደገኛ ደረጃ ላይ ይገኛሉ፡፡ ከአስተዳደራዊ ውሳኔ መፅሔቷ ከመታገድ፣ አዘጋጆቿም አስራ ስምንት ዓመት እና ከዚያም በላይ በሚያስፈርደው ፀረ ሽብርተኝነት ተከስሰው እንደሚቀጡ ከስጋት ያለፉ ምልክቶች በርክተዋል፡፡ ከገዢው ፓርቲ ጋር ቅርበት ያላቸው ውስጥ አዋቂዎችም “ሁለት ምርጫ” እንደቀረበልን፣ እስካሁን አለመረዳታችንም አሳስቧቸዋል፡፡ ምርጫው ሁለት እንደሆነም ተጠቅሷል፡፡ “ጋዜጠኞቹ ታስረው የመፅሔቷ ሕትመት ይቋረጣል”፤ አሊያም ደግሞ “ወደ ስደት እንድታመሩ “የማርያም መንገድ” ተከፍቶላችኋል” የሚሉ ሆነው ተገኝተዋል፡፡ ሁለቱን መምረጥ አይቻልም፡፡ ምርጫው አንድ ነው፡፡ የሎሚ መጽሔት ክስ ዝርዝር የሚከተለውን ይመስላል፡-
ለፌዴራል የመጀመሪያ ደረጃ ፍ/ቤት ልደታ ምድብ ወ/ችሎት
አዲስ አበባ
ከሳሽ፡- የፌዴራል አቃቤ ህግ
ተከሳሾች፡- 1ኛ/ ግዛው ታዬ ወርዶፋ
አድራሻ ጉለሌ ክ/ከተማ ቀበሌ 03
2ኛ/ ዳዲሞስ ኢንተርቴይመንት እና የፕሬስ ስራዎች ኃ/የተ/የግ/ማህበር
አድራሻ ጉለሌ ክ/ከተማ ቀበሌ 03
1ኛ ክስ
ወንጀሉ በ1996 ዓ.ም የወጣውን የኢፌድሪ የወንጀል ህግ አንቀጽ 32/1/ለ፣ 34/1/44/1/ እና 257/ሀ እና ሠ/ ላይ የተመለከተውን በመተላለፍ፡፡
የወንጀሉ ዝርዝር ተከሳሾች በዋና ወንጀል አድራጊነት ተካፋይ በመሆን ወንጀሉና ወንጀሉ የሚሰጠውን ውጤት በመቀበል መንግስት የሚለወጠው ሕገ-መንግስታዊ በሆነ መርህ በምርጫ ብቻ ሆኖ እያለ ኢ-ሕገ-መንግስታዊ በሆነ መንገድ በአመፅ ስርዓቱን ለማፍረስ በማሰብ 1ኛ ተከሳሽ ዳዲሞስ ኢንተርቴይመንት እና የፕሬስ ስራዎች ኃ/የተ/የግ/ማህበር በስራ አስኪያጅነት፣ 2ኛ ተከሳሽነት በተጠቀሰው ድርጅት “ሎሚ” በሚል እየታተመ በሚወጣ መፅሔት በቅፅ 3 ቁጥር 109 በግንቦት 2006 ዓ.ም በወጣው ዕትም በገፅ 3 ላይ “በአለም በጨቋኝነቱ አቻ የማይገኝለት የሚዲያ ምህዳር በኢትዮጵያ በሚል ርዕስ በገፅ 3 ላይ ሰብዓዊ መብት የሚባል በኢትዮጵያ መንግስት ሙሉ በሙሉ ተረስቷል፡፡ የምንገኝበት አለም የመራጮች እና የለውጥ ማዕበሎች የሰፈነበት በመሆኑ ኢትዮጵያን በቀጣይ ዓመት በሚደረገው አገራዊ የአጠቃላይ ምርጫ በመንተራስ ለበርካታ አመታት ከዘለቀው የግፍ፣ የጭቆና አገዛዝ ለማላቀቅ የማይቀረውን የለውጥ ማዕበል ለማምጣት ራሳቸውን ለተጠናከረ ህዝባዊ አመጽ ማደራጀት መጀመራቸው ሊበረታታ የሚገባው ነው” በማለት በማሳተም 2007 ዓ.ም ምርጫ ከመካሄዱ በፊት አዋጪ የሚሆነው ለአመጽ መደራጀት፣ የኃይል ተግባር መፈጸም ሊበረታታ የሚገባው መሆኑን በመጥቀስ ሕትመቱን ያሳተሙና ለህዝብ እንዲደርስ ያደረጉ በመሆኑ፤ በአጠቃላይ ተከሳሾች ህገመንግስታዊ ስርዓቱን ከሕገመንግስታዊ ሥርዓት ውጪ በአመጽ መንገድ ለማፍረስ
ከላይ በተጠቀሱት መንገዶች ለአመፅ የሚያነሳሱ ፅሁፎች አትመው በማውጣት በዋና ወንጀል አድራጊነት ቅስቀሳ ያካሄዱ በመሆኑ በፈፀሙት መገፋፋት እና ግዙፍ ያልሆነ መሰናዳት ወንጀል ተከስሰዋል፡፡
2ኛ ክስ
ወንጀሉ በ1996 ዓ.ም የወጣውን የኢፌዴሪ የወንጀል ሕግ አንቀፅ 32 (1) ሀ እና ለ፣ 34/እና 44/1፣ 486/ሀ እና ለ/ ላይ የተመለከተውን በመተላለፍ፡፡
የወንጀሉ ዝርዝር
ተከሳሾች በዋና ወንጀል አድራጊነት ተካፋይ በመሆን 1ኛ/ ተከሳሽ ዳዲሞስ ኢንተርቴይመንት እና የፕሬስ ስራዎች ኃ/የተ/የግ/ማህበር ስራ አስኪያጅ በመሆን፣ 2ኛ/ ተከሳሽ በተጠቀሰው ድርጅት ሎሚ በሚል እየታተመ የሚወጣ መፅሔት ላይ በሃሰት ወሬዎችን በማሳተም ህዝብን ለማነሳሳት በማሰብ በቅፅ 3 ቁጥር 91 ከጥር 24 እስከ የካቲት 1 ቀን 2006 ዓ.ም በታተመው ዕትም በገጽ 6 ላይ “የአሸባሪነት ፈርጦች” በሚል ርዕስ ስር “ኢህአዴግም ከማን አንሼ በሚል ስሜት ተቃራኒ ሃሳብ የሚያቀርቡ ጋዜጠኞችን፣ ለስልጣኔ /ለወንበሬ/ ያስጉኛል የሚላቸውን ጠንካራ ተቃዋሚዎችን እያደነ በአሸባሪነት ስም ወህኒ ያወርዳቸው ከጀመረ ሰንብቷል” በሚል የሀሰት ዘገባ በማሳተሙ እንዲሁም በገፅ 23 ላይ “የኢህአዴግ የሽብርተኝነት መመዘኛ ምንድነው” በሚል ርዕስ “ኢህአዴግ” የህዝብ ተቀባይነት ያገኘ አይመስለውም፡፡ ሕዝብ የተቀበለውና አምነዋለሁ የሚለው ሰው ለኢህአዴግ ጠላት ነው፣ ሽብርተኛ ተብሎ ይከሰሳል” በማለት በሽብር ሕግ ተከስሰው የተቀጡ ተከሳሾች በሕዝብ የሚወደዱ እና ለገዢው ፓርቲ ተቀናቃኝ በመሆናቸው ብቻ በግፍ የተቀጡ ንፁሀን እንደሆኑ የሚያስመስልና ሃሰተኛ ወሬ አትመው በማውጣታቸው በዋና ወንጀል አድራጊነት በፈፀሙት በሀሰት ወሬዎች ህዝብን ማነሳሳት ወንጀል ተከስሰዋል፡፡
የማስረጃ ዝርዝር
የሰነድ ማስረጃ
1. ሎሚ መፅሄት ቅፅ 3 ቁጥር 91 ገጽ 1፣ 6 እና 23 ገፅ 03 ገጽ ኮፒ
2. ሎሚ መፅሄት ቅፅ 3 ቁጥር 109 ገጽ 1፣ እና 3 03 ገፅ ኮፒ
3. ዳዲሞስ ኢንተርቴይመንት እና የፕሬስ ስራዎች ኃ/የተ/የግል/ ማህበር በንግድ ሚኒስቴር የንግድ ምዝገባና ፈቃድ ዳይሬክቶሬት የሰጠ የንግድ ፈቃድ ኮፒ 01 ገጽ ይላል ከፍትህ ሚኒስቴር የተላከልን የክስ ዝርዝር፡፡
የአፍርሮ ታይምስ ጋዜጣ እና የጋዜጠኛ ቶማስ አያሌው የክስ ዝርዝር ደግሞ የሚከተለውን ይመስላል፤
ለፌዴራል1 የመጀመሪያ ደረጃ ፍ/ቤት አራዳ ምድብ ወ/ችሎት
አዲስ አበባ
ከሳሽ፡- የፌዴራል አቃቤ ህግ
ተከሳሾች፡- 1ኛ/ ቶማስ አያሌው ተካልኝ፤
አድራሻ አራዳ ክ/ከተማ ወረዳ 6 የቤት ቁጥር 136
2ኛ/ ግዛውና ቶማስ ኢንተርቴይመንት የፕሬስ ስራዎች ኃ/የተ/የግ/ማህበር
አድራሻ አራዳ ክ/ከተማ ወረዳ 6 የቤት ቁጥር 136
1ኛ ክስ
ወንጀሉ
በ1996 ዓ.ም የወጣውን የኢፌዴሪ ወንጀል ህግ አንቀጽ 32/1/ለ፣ 34/1/44/1/ እና 486/ለ ላይ የተመለከተውን በመተላለፍ፡፡
የወንጀል ዝርዝር
ተከሳሾች በዋና ወንጀል አድራጊነት ተካፋይ በመሆን አንደኛ ተከሳሽ ግዛውና ቶማስ ኢንተርቴይመንት የፕሬስ ኃ/ የተ/የግ/ማህበር ሥራ አስኪያጅ በመሆን በሁለተኛ ተከሳሽነት በተጠቀሰው ድርጅት አፍሮ ታይምስ በሚል እየታተመ በሚወጣ ጋዜጣ ላይ በሃሰት ወሬዎችን በማሳተም ህዝብን ለማነሳሳት በማሰብ ህዝቡ በሕገ-መንግስታዊ ስርዓቱ ላይ አመኔታ እንዳይኖረው፣ ጥርጣሬ እንዲገባው ለማድረግ በማሰብ በቁጥር 9 ሚያዝያ 21 እና 22 2006 ዓ.ም በወጣው የጋዜጣ ሕትመት በገጽ
1 ላይ “ልዩ ኃይሎችና መከላከያ ሠራዊት ተፋጠዋል” በሚል ርዕስ ስር “ቀደም ባሉት ጊዜያት በጋምቤላ ክልል ሰፍሮ የሚገኘው የመከላከያ ሰራዊት የፈለገውን ሰው ሲያስር፣ ሲገድል፣ ሴቶችን አስገድዶ ሲደፍር ቆይቷል፡፡ ይህም የሰራዊቱን ስርዓት አልበኝነት እና ሕገ-ወጥ ድርጊት ለማስቆም የሞከረ መንግስታዊ አካል አልነበረም” በማለት አገሩንና ሕገ መንግስቱን በመጠበቅ እንዲሁም በዓለም አቀፍ ህብረተሰብ እና መንግስታት በመልካም ስነ-ምግባር ተግባሩ እያከናወነ ያለውን የኢትዮጵያ መከላከያ ሰራዊት በህዝቡ ዘንድ አመኔታ እንዲያጣ፣ ጥርጣሬ እንዲገባው ለማድረግ ዋና ወንጀል አድራጊነት ተካፋይ በመሆን በፈፀሙት ሐሰተኛ ወሬዎችን በመንዛትና ሕዝብን በማነሳሳት ወንጀል ተከስሰዋል፡፡
የሰነድ ማስረጃ
የሰነድ
1.ቅፅ 1 ቁጥር 9 ሚያዝያ 21 እና 22 2006 ዓ.ም የወጣውን አፍሮ ታይምስ ጋዜጣ 02 ገፅ ኮፒ፣
2.በንግድ ሚ/ር የንግድ ምዝገባና ፈቃድ በአንደኛ ተከሳሽ ስም ዳይሬክቶሬት የተሰጠ የንግድ ፈቃድ ኮፒ 01 ገፅ ኮፒ ሲል ይደመድማል፡፡

ነገረ ኢትዮጵያ ጋዜጣ ከአዲስ አበባ እንደዘገበው

ከመስከረም 10/2007 ዓ.ም እስከ መስከረም 12/2007 ዓ.ም በጥቃቅንና አነስተኛ ለተደራጁ የአዲስ አበባ ነዋሪዎች በተሰጠው የ‹‹አብዮታዊ ዴሞክራሲ›› የማጥመቅ ስልጠና በምርጫው ንቁ ተሳትፎ በማድረግ ኢህአዴግ እንዲመረጥ እንዲሰሩ ትዕዛዝ እንደተሰጣቸውና እቅዱን ካላሳኩ ሸዳቸውን መስሪያ ቦታውን እንደሚያጡ ማስጠንቀቂያ እንደተሰጣቸው ለነገረ ኢትዮጵያ ገለጹ፡፡

ሰልጣኞቹ ‹‹ግብር በዝቶብናል፣ ደንብ አስከባሪዎች በየጊዜው እየመጡ ገንዘብ ይወስዱብናል፣ በየወረዳው የመልካም አስተዳደር ችግር መፍትሄ ልናኝ አልቻልንም፣ ስለዚህ እናንተን እንዴት ነው የምንመርጠው? በየምርጫው ቃል ትገባላችሁ? ካለፈ በኋላ ትረሱናላችሁ እንዴት እነመንላችሁ?›› ሲሉ ቅሬታቸውንና በገዥው ፓርቲ እምነት እንደሌላቸው መግለጻቸውን ምንጮች ለነገረ ኢትዮጵያ ገልጸዋል፡፡

በሌላ በኩል በስልጠናው የተገኙት ባለስልጣናት ገዥው ፓርቲ ቃሉን እንደሚያከብርና በአነስተኛና ጥቃቅን የተደራጁት ዜጎች የተባሉትን ስራ ካከናወኑ ተጠቃሚ እንደሚሆኑ ቃል ገብተውላቸዋል ተብሏል፡፡ ተሰብሳቢው በተደጋጋሚ ችግሮችንና ኢህአዴግ ቃል ገብቶ የማይተገብራቸውን ነገሮች በማንሳታቸው በስልጠናው ከተገኙት ባለስልጣናት መካከል አንዱ ‹‹ቃላችንን አናጥፍም፣ ቃላችንን ካጠፍን የመለስን ቀን ይስጠን›› ብለው እንደማሉ ሰልጣኞቹ ለነገረ ኢትዮጵያ ገልጸዋል፡፡

ሰልጣኞቹ በስተመጨረሻም የምስክር ወረቀት የተሰጣቸው ቢሆንም የምስክር ወረቀቱ ላይ የሰፈረውና የሰለጠኑት ግንኙነት እንደሌላቸው ተናግረዋል፡፡ ቀደም ሲል፣ ከስልጠናው በፊት በስልጠናው ያልተገኘ በሸድ ስራ እንደማይቀጥል የማስጠንቀቂያ ደብዳቤ ደርሷቸው እንደነበር ሰነዱን አያይዘን መዘገባችን ይታወሳል፡፡

በትናንትናው እለት ወደ ደብረማርቆስ ሲጓዝ የነበረ የሕዝብ ማመላለሻ አውቶቡስ ተገልጥቦ ለ13 ሰዎች ሕይወት መጥፋት ምክንያት ሲሆን አደጋውን ለማጣራት ፖሊስ እየሠራ ቢሆንም የሹፌሩ ሕይወት ማለፍ ማጣራቱን ውስብሰብ እንደሚያደርገው የፖሊስ ምንጮች ለዘ-ሐበሻ ዘጋቢዎች ገልጸዋል።

ትናንት ከጠዋቱ 7 ሰዓት አካባቢ ወደ ደብረማርቆስ የሚጓዘው የሕዝብ ማመላለሻ አውቶቡስ የተገለበጠው በኦሮሚያ ክልል ወረ ጃርሶ ወረዳ ነው። 60 ተሳፋሪዎችን ጭኖ ይጓዝ የነበረው ይኸው አውቶቡስ በምን ምክንያት እንደተገለበጠ ባይታወቅም አንዳንድ ታዛቢዎች ግን በኢትዮጵያ የሚደርሱት እንዲህ ያሉት አደጋዎች ከቸልተኛ ሾፌሮች በመነጨ ነው ይላሉ።

እንደነዚህ ታዛቢዎች ገለጻ መጠጥን፣ ጫትን እና አደንዛዥ እጾችን ተጠቅሞ መኪና የሚነዱ ሰዎችን መንግስት ተከታትሎ ስለማይቀጣ ሾፌሮች በግድሌሽነት ረዥም መንገድ ሲነዱ አደንዛዥ እጾችን እንደሚጠቀሙ ታዛቢዎች ይናገራሉ። ሌላው ለመኪና አደጋ የሚያጋልጠው የመንገድ ጥራት ማነስ ሲሆን በተለይም የሕዝብ ማመላለሻ አውቶቡሶች የአገልግሎት ዘመናቸው ስለማይታወቅ አደጋ እንደሚያደርሱ ተገልጿል። በሰለጠነው አለም ለሕዝብ ማመላለሻነት የሚውሉ መኪኖች የተመረተበት ዓ.ም በገደብ የሚቀመጥ ሲሆን ገደብ ከተቀመጠለት ዓ.ም በፊት የተመረተ መኪና ሕዝብ እንዲጭን አይፈቀድም።

ወደ ደብረማርቆስ 60 ሰዎችን ጭኖ የተጓዘው አውቶቡስ የተገለበጠበት ሥፍራ ከዚህ ቀደም በርካታ አደጋዎች የደረሱበት መሆኑም ጨምሮ የደረሰን ዜና ያስረዳል።

ኢሳት ዜና

መንግስት የሁለተኛ ደረጃ ተማሪዎችን የአብዮታዊ ዲሞክራሲ የትምህርት መመሪያን ለማጥመቅ ያወጣውን መመሪያ ተከትሎ በአገሪቱ የሚገኙ የሁለተኛ ደረጃ ተማሪዎች ስልጠናውን በግዳጅ እንዲወስዱ እየተደረጉ ነው። በአንዳንድ አካባቢዎች ተማሪዎቹ የፖለቲካ ስልጠና እንዳለ አስቀድመው በመስማታቸው፣ ከስልጠናውን የቀሩ ሲሆን፣ የገዢው ፓርቲ የወረዳ ሹሞች መምህራን ተማሪዎችን እንዲያመጡ የተለያዩ ዘዴዎችን እንዲጠቀሙ እያግባቡ ነው።

አንድ መምህር ለኢሳት እንደገለጹት፣ ከተማሪዎች በፊት የተደረገው የመምህራን ስልጠና ያለውጤት ከተበተነ በኋላ፣ ተማሪዎች ስለሰላም እና ስለትምህርት ስርአት ስልጠና ይወስዳሉ ተብሎ ሲጠበቅ፣ ስልጠናውን ለመውሰድ በአካል የተገኙት ተማሪዎች ቁጥር እጅግ አነስተኛ ሆኖ መገኘቱን ተናግረዋል። መስከረም 5 ይጀመራል የተባለው ትምህርት በፖለቲካ ስልጠናው የተነሳ እስከ አሁን አለመጀመሩን የተናገሩት መምህሩ በዚህ ሁኔታ በሚቀጥለው ሳምንት መደበኛው ትምህርት ይጀመራል ብለው እንደማያስቡ ተናግረዋል።

ፕሮፌሰር አስራት ወልደየስ የሟቹ የመለስ ዜናዊ ሰላባ ከሆኑት ብርቅዬ የኢትዮጵያ ልጆች መካከል አንዱ ነበሩ። ከ19 ዘጠኝ አመታት በፊት፣ በኩወቤክ ካናዳ የቀድሞ የካናዳ ጠቅላይ ሚኒስተር ጆን ክሬቲየን፣ ባለፈው ሳምንት ደግሞ በስክቶላንድ የአሁኑ የእንግሊዘ ጠቅላይ ሚኒስቴር ዴቪድ ካሜሮን ፣ የአገራቸውን አንድነት ለማስጠበቅ፣ ክዌቤክና ስኮትላንድ እንዳይገነጠሉ ብዙ የደከሙ፣ የድካማቸውን ፍሬ ያዩ አገራቸዉን እና ህዝባቸውን  የሚወዱ መሪዎች መሆናቸውን ያስመሰከሩ ናቸው።

ሟቹ መለስ ዜናዊ ግን ፣ ከጉዳዩ ባለቤቶች  ከኤርትራዊያን በላይ የኤርትራ መገንጠል ዋና አዝማች ሆነው ሲሰሩ የነበሩ ፣ ኢትዮጵያን ባህር አልባ ያደረጉ፣ ወንድምን ከወንድም የለያዩ ሰው ነበሩ።

ከዚያም የተነሳ ለጅቡቲ ኢትዮጵያ 700 ሚሊዮን ዶላር በአመት  ለወደቡ መጠቀሚያ እንድትከፍል ተደርጋለች። 700 ሚሊዮን  ዶላር፣  የአዲስ አበባ የመለስተኛ ባቡር እንዲሁም ከሰበታ ሜኤሶን ያለውን የባብሩ መስመር ለመገንባት የሚያሰፈልገው ሙሉ ወጭን ይሸፍን ነበር (ከማንም ብድር ሳንበደር) ። ለጅቡቲ በየአመቱ የሚከፈለው ፣ በስድስት አመት ዉስጥ የአባይን ግድብ ወጭ ሙሉ ለሙሉ ይዘጋ ነበር።

በወቅቱ፣   መለስ ዜናዊ «ስዊዘርላንድም ያለ ወደብ አድጋለች። ሶማሊያ ደግሞ ወደብ ሞልቷት አላደገችም።  ለእድገት ወደብ አያስፈልግም»  እያሉ ሲፎክሩ ፣ ፕሮፌሰር አስራት ፣ በዋናነት ኢትዮጵያ ባህር አልባ መሆን እንደሌለባት፣ የኤርትራ ህዝብ ወንድም ህዝብ እንደሆነ በማረጋገጥ ለኢትዮጵያ አንድነት ሲከራከሩና ሲሟገቱ የነበሩ የኢትዮጵያ የቁርጥ ቀን ልጅ ነበሩ። አገራችንንም ለምንወድ  ኢትዮጵያዊ ሁሉ አባት ! (በነገራችን ላይ ያኔ ከመለስ ጎን የነበሩ እንደ አቶ ገብሩ አስራት ያሉ በርካታ የቀድሞ የሕወሃት ባለስልጣናት የፕሮፌሰር አስራትን አቋም ይዘው፣ አሁን ለኢትዮጵያ ወደብ እንደሚያስፈልጋት መከራከራቸው፣ የፕሮፌሰሩ ሐሳብ በሕወሃቶችም ዘንድ እያሸነፈ መምጣቱን አመላካች ነው)

መለስ ዜናዊ በአካል ቢሞቱም ፣ አሁንም ዳግማዊ መለስ ዜናዊው ኅያለማርያም ፣ ሕሊናቸዉን፣  ክብራቸውን፣ ማስትሬት ያገኙበትን እውቀታቸዉን ፣ የክርስትና እምነታቸዉን ጥለው፣ የጥቂት ሕውሃት ማፊያዎች ሮቦት በመሆን፣ የመለስ ጸረ-ኢትዮጵያዊ፣ ጸረ-ሕዝብ፣ ጸረ-ዲሞክራሲያዊ አሰራሮችና ጎጂ ፖሊሲዎች እያስቀጠሉ ነው።  መለስ ቢሞቱም የመለስ መንፈስ በሃይለማሪያም ዉስጥ አድሮ ሕዝብን እያሸበረ ነው።

ፕሮፌሰር አስራት ወልደየስ ለአገራቸው ኢትዮጵያ ደማቸውን ያፈሰሱ፣  ሰማእት ሆነው ያለፉ ትልቅና የተከበሩ ሰው ነበሩ። መለስ ዜናዊ አሰቃይተው ነው የገደሏቸው። ፕሮፌሰር አስራት ያኔ እንደሞቱት አሁንም ብዙዎች እንደ ቅጠል እየረገፉ ነው። ብዙዎች እየታሰሩ ነው። ብዙዎች እየተሰደዱ ነው። ብዙዎች የሚኖሩበት አካባቢ በጥቂት ከአገዛዙ ጋር ግንኙነት ባላቸው  ኢንቨስተሮች ስለተፈለገ ብቻ በጭካኔ ከቅያቸው እየተፈናቀሉ ነው። ሰቆቃና መከራ በዛ። በርግጥ ይህን የመለስን መንፈስ ከመዋጋትና ከመታገል ዉጭ ሌላ አማራጭ ሊኖር አይችልም።

አንዳንዶች በሌላው ላይ የሚደርሰው ግፍ ሳይሰማቸው፣ ከአገዛዙ ትናንሽ ፍርፋሪ ጥቅም ስላገኙ ብቻ፣ ዝምታን የመረጡ ወይንም የአገዛዙ አቀንቃኝ ሆነው የሚሯሯጡ እንዳሉ እናያለን። «የተሰሩ ብዙ የልማት ስራዎች አሉ» ይሉናል። «እንዴት ይሄ ሁሉ ፎቅ፣ ይሄ ሁን መንገድ ተሰርቶ ኢሕአዴግን ትቃወማላችሁ ? » ይሉናል።  «መንገዱን፣ ልማቱን እንደግፋለን። ግን የልማቱ ተጠቃሚ ጥቂቶች ሳይሆኑ ሁሉም ይሁን። በሚሰሩ ፎቆች ደስ ብሎናል፤ ግን የጀነራሎች ፎቅ ብቻ ሳይሆን ሌላውም የሚኖርበት ይሁን» እንላቸዋለን። ስናክልም « ሰው ያለነጻነቱ ምንድን ነው? እንደተባለው፣ መንገድ ተሰርቶ፣ ፎቅ ተገንብቶ፣  የኛ መኖሪያ ወህኒ ከሆነ ፣ ነጻነታችንና ልእልናችን ከተደፈረ፣ ፎቁና ሰገነቱ ለኛ ምናችን ነው ? » ብለን እንጠይቃቸዋለን።

ፕሮፌሰር አስራት ከ22 አመታት በፊት በደብረ ብርሃን  አደባባይ ካደረጉት ንግግር የሚከተለውን ቀንጭብ አድርጌ እንዳቀርብ ይፈቀድልኝ፡

«የአባቶቻችንን የሚያኮራ ታሪክ በማስደፈርም ሆነ ባለማስደፈር በውርደትም ሆነ በኩራት ለማስረከብ ባለብን የዜግነት ግዴታ አንፃር በአሁኑ ጊዜ በታሪክ ፊት ተጋልጠን የምንገኝበትን እንደገና ላስታውሳችሁ እገደዳለሁ፡፡ በጠላት ወረራ ጊዜ የኢትዮጵያ ሕዝብ በ3 ተከፍሎ እንደነበር አስታውሱ። አንደኛው ወገን ውርደትን በመጥላት በነፃነቱና ለክብሩ ሲል ቤት ንብረቱን ትቶ ወደ አርበኝነቱ በመግባት፣ የዱር ገደሉን ኑሮ በመጀመር፣ ታሪክ ሠርቶ ያለፈና የኖረ፣ ሁለተኛው አገር ሲረጋ እመለሳለሁ ብሎ ሕይወቱን ለማዳን ሲል የተሰደደ፣ ሦስተኛው ለሆዱ አድሮ የጠላት መሳሪያ በመሆን ወገኑን ከሚጨፈጭፈው የኢጣሊያ ጦር ጋር ያበረ ነበር፡፡
ሆዱን ለመሙላትና የማይቀረውን ሞት ለጊዜው ለማዘግየት ሲል የውርደትን መንገድ የመረጠው በትዝብት ውስጥ ወደቀ እንጂ የኢትዮጵያ አርበኞች ድል አድራጊነት አልቀረም፡፡
ለሀገሩና ለወገኑ ክብርና ደህንነት ደረቱን ለጥይት በመስጠት የቆረጠው አርበኛም ያለቀኑ አልወደቀም፣ አልሞተም እንዲያውም ከተፈጥሮ ሞቱ በኋላም ቢሆን በታሪክ ውሰጥ እየኖረና ኢትዮጵያንም በታሪክ እያኖረ ነው፡፡
ወገኑን የከዳውና ለሆዱ ያደረው ባንዳም ከውርደት በቀር ትረፍ ሕይወትና ትርፍ ኑሮ አልኖረም፡፡ ዛሬም እንደነዚህ ያሉ የሕዝብ ጠላቶች ለማንም የማይበጁ ማንኛውንም የሀገርና የወገን ጉዳይ ለጥቃቅን ጥቅማቸው የሚሸጡ፣ የትውልድ አተላ ስለሆኑ እግዚአብሔር በቸርነቱና በኃይሉ ቀናውን አስተሳሰብ እንዲሰጣቸው እየተመኘን ይህን ከመሰለው የትውልድና የታሪክ አተላነት የሚላቀቁበትን ልብ ለማግኘት በቂ ጊዜ ስላላቸው ማሰብና ደጋግመው ማሰላሰል ከዚያም ስለአቋማቸው መወሰን የኖርባቸዋል፡»

ፕሮፌሰሩ  እንዳሉት ለመብታችን እና ለነጻነታችን የምንቆም ያድርገን። የትዉልድ አተላዎች ከመሆንም ይሰዉረን !

(ኢሳት ዜና) – ያለፉትን 9 ወራት ንብረቶቻቸውን በመሸጥ ውጭ የሚወጡበትን አጋጣሚ ሲያፈላልጉ ከርመዋል።

98 በመቶ የሚሆነውን የመከላከያ ሰራዊት ከፍተኛ የአዛዥነት ቦታዎችን ከተቆጣጠሩት የህወሃት ጄኔራሎች ባልተናነሰ በከፍተኛ የስልጣን ቦታ ላይ የነበሩት ብቸኛው የአማራ ተወላጁ ጄኔራል አበባው ታደሰ በጄ/ል ሳሞራ የኑስ ትእዛዝ ከሃላፊነታቸው ዝቅ ብልው እንዲሰሩ ከተወሰነባቸው በሁዋላ በመጨረሻ ከመከላከያ ሰራዊት መሰናበታቸውን ምንጮች ገልጸዋል።ጄ/ል አበባው ከጄ/ል ሞላ ሃ/ማርያም እና ከጄ/ል ሰአረ መኮንን ጋር በመነጋገር ጄ/ል ሳሞራ የኑስ በመከላከያ ውስጥ የሚታየውን ሙስና አልተቆጣጠሩም በሚል ሊገመግሙዋቸው ነበር የሚል ሪፖርት ቀርቦባቸው ከሃላፊነት ዝቅ እንዲሉ መደረጉን ኢሳት ከ9 ወራት በፊት ” የመተካካቱ ተውኔት በመከላከያ ሰራዊት ውስጥ” በሚል ርእስ ባቀረበው የምርመራ ዘገባ ገልጿል። በጊዜው እንደተዘገበው ጄ/ል ሳሞራ የኑስን የሚተካው ኢታማዦር ሹም ከህወሃት እጅ እንዳይወጣ ለማድረግ ተፎካካሪ ሆነው ይቀርባሉ ተብሎ የተገመቱትን ጄ/ል አበባውን ጠልፎ ለመጣል ሁለቱ ጄኔራሎች የቤት ስራውን ወስደው ሲሰሩ ቆይተዋል፡፤ ጄ/ል አበባው ግሳጼ ደርሶባቸው ከሃላፊነት እንዲለቁ ሲደርግ የህወሃቶቹ ጄ/ል ሰአረ መኮንንና ጄ/ል ሞላ ሃ/ማርያም ወደ አዲስ አበባ ተጠርተው ከፍተኛ ስልጣን ተሰጥቷቸዋል። በአንጻሩ ጄ/ል አበባው ከሃላፊነት ተቀንሰው ያለፉትን 9 ወራት ንብረቶቻቸውን በመሸጥ ውጭ የሚወጡበትን አጋጣሚ ሲያፈላልጉ ከርመዋል።

ጄ/ል አበባው በባህርዳር ከተማ የሚገኘውን አልዋቅ ሆቴልና ሌሎች ድርጅቶቻቸውን ለሼክ ሙሃመድ አላሙዲን ከሸጡ በሁዋላ ከአገር ለመውጣት ቢያስቡም መከልከላቸውንና የቁም እስረኛ መሆናቸውን ምንጮች ገልጻል።የጄ/ል አበባው የቁም እስረኛ መሆን በብአዴንና በህወሃት የመከላከያ የሰራዊት አባላት መካከል ያለውን ሽኩቻ ሊያባብሰው ይችላል የሚሉት ምንጮች፣ አንዳንድ ምልክቶች መታየታቸውን ተከትሎ በመካከለኛ ደረጃ ላይ በሚገኙ የአማራተወላጅ መኮንኖች ለይ ጥበቃ እና ክትትሉ ጨምሯል። የብአዴን አባል የሆኑ መኮንኖች በሰራዊቱ ውስጥ የሚታየውን የህወሃት ፍጹም የባላይነት በተደጋጋሚ ይቃወማሉ።

ስለ ጃኪ ጎሲ ኮንሰርት ውዝግብ
ይህ የቁም ነገር መፅሔት ቅ ፅ 13 ቁጥር 187 ወሬ ልንገርህ ዕምድ ነው

መቼም አንድም አልበም ሳያወጣ በነጠላ ዜማዎቹ ብቻ የሚሊዮኖችን የሙዚቃ አፍቃሪያንን ልብ ስለተቆጣጠረው ጃኪ ጎሲ አላውቅም አትለኝም! ጃኪ ጎሲ ማነው? በእርግጥ ወላጆቹ ያወጡለት ስም ጃኪ ጆሲ አይደለም፡፡ የመዝገብ ስሙ ጎሳዬ ቀለሙ ነው፡፡ ራሱ ነው ስሙን አሳጥሮ ጃኪ ጎሲ ያለው፡፡
እናስ? እናማ ባለፈው ሳምንት ለአዲሱ 2007 መግቢያ በከተማችን ከተዘጋጁት የሙዚቃ ኮንሰርቶች መካከል አንዱ የዚህ ወጣት ድምፃዊ ጃኪ ጎሲ ነበር፡፡ ታዲያልህ ለዚህ ዘመነኛ ወጣት ገና አንድ አልበም ሳያወጣ የተከፈለው ክፍያ ስንት እንደሆነ ሰምተሃል?ማን ነግሮኝ? በል ከተማው ውስጥ የለህም ማለት ነው፡፡ ለማንኛውም ለዚህ የመጀመሪያ ኮንሰርቱ 1.5 ሚሊዮን ብር እንደተከፈለው ይነገራል፡፡ ያው ክፍያው ቫትን ያካት አያካት ግልፅ አይደለም፡፡

እናስ? ጳግሜ 5 ምሽት በሚሊኒየም አዳራሽ ኮንሰርቱን ለማሳየት ቀጠሮ የተያዘለት ጃኪ ጎሲ ብቻ አልነበረም፡፡ ደግሞ ማን አለ አልክ? ሁለቱ አንጋፋ አርቲስቶችም ጃኪ ጎሲን እንዲያሯሩጡ ተጋብዘው ነበር፡፡ ማንና ማን መሰሉህ? አንጋፋው ድምፃዊ አለማየሁ እሸቴና ሌላው አንጋፋ ድምፃዊ ቴዎድሮስ ታደሰ ነበሩ፡፡

በፕሮግራሙ ቅደም ተከተል መሰረት አለማየሁ እሸቴ መጀመሪያ ገብቶ ከዘፈነ በኋላ ቴዎድሮስ፤ ከዚያ ጃኪ ጎሲና ቴዲ እየተፈራረቁ እንዲዘፍኑ ነበር እቅዱ፡፡ እናስ? እናማ በፕሮግራሙ መሠረት አለማየሁ ከአራት በላይ ዘፈኖቹን /ተማር ልጄን ጨምሮ/ ከተጫወተ በኋላ በዛው ዕለትና ሰዓት በካፒታል ሆቴል ሌላ መድረክ ስለነበረው ሹልክ ብሎ አመለጠ፡፡

ከዚያስ? ከዚያማ ያው ቴዎድሮስና ጃኪ መድረኩን በየተራ በመውጣት ተመልካቹን ካዝናኑ በኋላ የተመስገን ልጆች መድረኩን ተረከቡ፡፡ የተሜ ልጆች ለሁለት ዘፈን መድረክ ላይ ወጥተው አርባ አምስት ደቂቃ ሲቆዩ ሰዓቱ ወደ ስምንት ሰዓት ተኩል ደርሶ ነበር፡፡ በዚህ መሀል ውዝግብ ተጀመረ፡፡ በማንና በማን? በጃኪና በቴዎድሮስ ታደሰ ማናጀሮች መካከል፡፡ ለምን መሰለህ? የተመስገን ልጆች ከመድረክ ሲወርዱ መጀመሪያ መውጣት ያለብኝ ‹እኔ ነኝ – እኔ ነኝ› በሚል ማለት ነው፡፡

ለምን መሰለህ? የኮንሰርቱ ማብቂያ ሰዓት እየተጠናቀቀ ስለነበር ጃኪ ከወጣ በኋላ ከመድረክ ሲወርድ ተመልካቹ ወደ ቤቱ ስለሚሄድ መጀመሪያ መውጣት ያለብኝ እኔ ነኝ ያለው ቴዲ ነበር አሉ፡፡ በዚህ የመድረክ ጀርባ ውዝግብ ሲካሄድ የተመስገን ልጆች ውዝዋዜያቸውን ጨርሰው ወደ መድረክ ጀርባ ተመልሰው ነበር፡፡ ውዝግቡ በሁለቱ አርቲስቶች ማናጀሮች መካከል ለተወሰነ ደቂቃ ከተካሄደ በኋላ የቴዎድሮስ ታደሰ ማናጀር ባለቤቱ አንድ ውሳኔ ላይ ደረሰች፡፡

ውሳኔው ምን ቢሆን ጥሩ ነው? መጀመሪያ ጃኪ ጎሲ እንዲዘፍን ከተደረገ ቴዲ ከእሱ በኋላ አይዘፍንም አለች፡፡ እናስ? እናማ ጃኪ ጎሲ በዛየን ባንድ አጃቢነት ተመልሶ ለሶስተኛ ጊዜ ወደ መድረክ ሲወጣ ቴዲን ባለቤቱ እጁን ይዛ ወደ ቤቱ…
በነገራችን ላይ ውዝግቡ የተጀመረው ቀደም ብሎ እንደሆነ ሲነገር ነበር፡፡ መቼ? መቼ መሰለህ? የጃኪ ጎሲንም ሆነ የቴዎድሮስ ታደሰን ዘፈኖች የሚያጅቡት ዛየን ባንዶች እንደሆኑ ከሳምንታት በፊት በተለቀቀው ማስታወቂያ ላይ ተገልጧል፡፡ ለኮንሰርቱ ተብሎ በታተመው ፖስተር ላይም አይተህ ከሆነ አጃቢው ባንድ ዛየን ባንድ ብቻ ነው፡፡

እናስ? እናማ ኮንሰርቱ ሊካሄድ ሁለት ቀን ሲቀረው ቴዲ በነአበጋዙ ሚሊኒየም ባንድ ነው የምዘፍነው አለ አሉ፡፡ በዚህ ሳቢያ ኮንሰርቱ እንዳይበላሽ በሚል የቴዲን ዘፈኖች ሚሊኒየም ባንዶች እንዲጫወቱለት ተደረገ፡፡ በዚህ ሳቢያ ቴዲ ወደ መድረክ አልወጣም ብሎ ወደ ቤቱ ሄዶ ስለነበር ከጃኪ በኋላ ስሙ ሲጠራ ያልነበረው እሱ ብቻ አልነበረም፤ ሚሊኒየም ባንድም አልነበረም… በል ቻዎ…

ቁምነገር መጽሔት በአዲስ አበባ የሚታተመው እንደዘገበው።

ዘ-ሐበሻ ቁጥር 67 ልዩ ልዩ ጥንቅሮችን ይዛ እነሆ ለንባብ በቅታለች። በሚኒሶታ የታተመውን ጋዜጣ ማንበብ ላልቻላችሁ እድመ ለዘ-ሐበሻ ድረገጽ ይሁን እና PDF ፎርማቱን ልታነቡት ነው። በውስጡ የያዝናቸውን ከምናስተዋውቅ እናንተው ገለጥ ገለጥ አድርጉት።

ሙሉ ጋዜጣውን ለማንበብ እዚህ ይጫኑ